Sun. Nov 22nd, 2026

ಕಾರ್ಲದ ಸುದ್ದಿ Karkala News

Aam Aadmi Party – Vijayanath Vittal Shetty is the candidate for Mulki Moodbidri constituency ಮುಲ್ಕಿ- ಬೆದ್ರ ಕ್ಷೇತ್ರಗ್ ಆಮ್ ಆದ್ಮಿ ಪಕ್ಷೊರ್ದು ವಿಜಯನಾಥ ವಿಠಲ ಶೆಟ್ಟಿ ಅಭ್ಯರ್ತಿ

ಬೆದ್ರ: ಕರ್ನಾಟಕ ವಿಧಾನಸಭೆ ವೋಟುದ ಆಭ್ಯರ್ಥಿಲೆನ ಸುರುತ್ತ ಪಟ್ಟಿನ್ ಆಮ್ ಆದ್ಮಿ ಪಕ್ಷ ಬುಡುಗಡೆ ಮಲ್ತ್‌ದಿತ್ತ್‌ದ್, ಬೆದ್ರ ವಿಧಾನಸಭಾ ಕ್ಷೇತ್ರರ್ದ್ ವಿಜಯನಾಥ ವಿಠಲ ಶೆಟ್ಟಿ ಮೆರೆನ ಪುದರ್ ಅಧಿಕೃತವಾದ್ ಘೋಷಣೆ ಆತ್ಂಡ್.

ಉದ್ಯಮಿ ಎಡಪದವು ಶಾಸ್ತಾವು ಶ್ರೀ ಭೂತನಾಥೇಶ್ವರ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಆಯಿನ ವಿಜಯನಾಥ ವಿಠಲ ಶೆಟ್ಟಿ ಮೇರ್ “ಬಲೇ ತೆಲಿಪಾಲೆ” ಕಾರ್ಯಕ್ರಮದ ಮುಕೇನ ಜನಕ್ಲೆಗ್ ಪರಿಚಯ ಆದಿತ್ತೆರ್. ಕುಡ್ಲ ದಕ್ಷಿಣ ಕ್ಷೇತ್ರರ್ದ್ ಮಾಜಿ ಜಿಲ್ಲಾಧ್ಯಕ್ಷೆರ್ ಸಂತೋಷ್ ಕಾಮತ್, ಸುಳ್ಯ ಕ್ಷೇತ್ರರ್ದ್ ಸುಮನಾ ಬೊಕ್ಕ ಕಾರ್ಲ ಕ್ಷೇತ್ರರ್ದ್ ಡ್ಯಾನಿಯಲ್ ಮೆರೆನ ಪುದರ್ ಘೋಷಣೆ ಆತ್ಂಡ್.

Aam Aadmi Party – Vijay nath Vittal Shetty is the candidate for Mulki Moodbidri constituency

Moodbidri: In the upcoming Vidhana Sabha elections, in the Moodbidri Mulki constituency; Vijaynath Vittal Shetty has been announced as candidate for Aam Aadmi Party.

Enterpreneur Vijaynath Vittal Shetty from Yedapadav, is also the managing trustee of Sri Boothanatheshwara temple and is well known among the public for organising the popular ” Bale Telipalay” Tulu comedy show.

ಬಂಟ್ವಾಳ ಕ್ಷೇತ್ರದ ಸಾಲೆತ್ತೂರ್‌ಡ್ ಮಾಜಿ ಸಚಿವೆರ್ ಬಿ.ರಮಾನಾಥ ರೈ ಮೆರೆನ ಮುತಾಲಿಕೆಡ್ ಪ್ರಜಾಧ್ವನಿ ಯಾತ್ರೆ

ಬಂಟ್ವಾಳ ಕ್ಷೇತ್ರದ ಸಾಲೆತ್ತೂರ್‌ಡ್ ಮಾಜಿ ಸಚಿವೆರ್ ಬಿ.ರಮಾನಾಥ ರೈ ಮುತಾಲಿಕೆಡ್ ನಡತೊಂದು ಇಪ್ಪುನ ಪ್ರಜಾಧ್ವನಿ ಯಾತ್ರೆ ಸಾಲೆತ್ತೂರು ಗ್ರಾಮರ್ದ್ ಸುರು ಆದ್ ಕರೋಪಾಡಿ ಗ್ರಾಮಡ್ ಪೋದು ಅಯಿರ್ದ್ ಬೊಕ್ಕ ಬಯ್ಯ ಕನ್ಯಾನ ಸಾರ್ವಜನಿಕ ಸಭೆತ್ತ ಮುಕೇನ ಮುಗಿತಲದ ಚುಕ್ಕಿನ್ ದೀಂಡ್.

 

ಎಲ್ಲೆ ಕಾಂಡೆ ವಿಟ್ಲದ ಪಡ್ನೂರು ಮುಕೇನ ಈ ಯಾತ್ರೆ ಪೋಯರೆ ಇತ್ತ್‌ದ್ ಕೊಳ್ನಾಡು ಗ್ರಾಮದ ಸಾಲೆತ್ತೂರುಡು ಸಭೆ ನಡಪರೆ ಉಂಡು.

ಅತ್ತೂರು ಬೆರಂದೊಟ್ಟು ಶ್ರೀ ಧರ್ಮರಸು ಕೊಡಮಣಿತ್ತಾಯ, ಕುಕ್ಕಿನಂತಾಯ ದೈವಸ್ಥಾನ, ಶ್ರೀ ಬ್ರಹ್ಮ ಬೈದರ್ಕಳ ಗರಡಿಡ್ ವಾರ್ಷಿಕ ನೇಮೋಚ್ಚಯ

ಕಾರ್ಲ ತಾಲೂಕ್‌ದ ಅತ್ತೂರು ಬೆರಂದೊಟ್ಟು ಶ್ರೀ ಧರ್ಮರಸು ಕೊಡಮಣಿತ್ತಾಯ, ಕುಕ್ಕಿನಂತಾಯ ದೈವಸ್ಥಾನ, ಶ್ರೀ ಬ್ರಹ್ಮ ಬೈದರ್ಕಳ ಗರಡಿಡ್ ಮಾ.20-25 ಮುಟ್ಟ ವಾರ್ಷಿಕ ನೇಮೋಚ್ಚಯ ನಡಪರೆ ಉಂಡು.

ಮಾ.20 ಗ್ ಕೋರಿಗುಂಟ ಆದ್, 21 ಕ್ಕ್ ಚೆಂಡು, 22 ಕ್ಕ್ ಬಯ್ಯ 5.30 ಗಂಟೆಗ್ ಭಂಡಾರ ಪಿದಡ್ದ್ ರಾತ್ರೆ ಕೊಡಿ ಏರ್ದ್ ಧರ್ಮ ಅರಸುರಾಯ ನೇಮ ಸುರು ಆಯರೆ ಉಂಡು. ಮಾ.23 ಕ್ಕ್ ಬಯ್ಯ 6 ಗಂಟೆಗ್ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜೆ ನಡಪರೆ ಉಂಡು. ಅವ್ವೆ ದಿನ ರಾತ್ರೆ ಕೊಡಮಣಿತ್ತಾಯ, ಕುಕ್ಕಿನಂತ್ತಾಯ, ಕಲ್ಕುಡ, ತುಕತ್ತರಿ, ವರ್ತೆ ದೈವದ ನೇಮ, ಗೋಂದುಲ ನೇಮ ನಡಪರೆ ಉಂಡು. ಮಾ. 24 ಕ್ಕ್ ರಾತ್ರೆ ಬೈರ್ದೆಲ್ನ ನೇಮ ನಡತ್ತ್‌ದ್ 25 ಕ್ಕ್ ಕಾಂಡೆ 10.30 ಗಂಟೆಗ್ ಮಾಯಿಂದಲೆ ದೈವದ ನೇಮ ನಡಪರೆ ಉಂಡು.

ಬೈಂದೂರು: ಶ್ರೀ ಬ್ರಹ್ಮಬೈದರ್ಕಳ ಕೋಟಿ ಚೆನ್ನಯ್ಯ ಬೊಕ್ಕ ಶ್ರೀ ಪಂಜುರ್ಲಿ ಸಪರಿವಾರ ಗರೋಡಿಡ್ ಪುನಃ ಪ್ರತಿಷ್ಠಾ ಬ್ರಹ್ಮಕಲಶೋಚ್ಚಯ

ಬೈಂದೂರ್ ತಾಲೂಕ್‌ದ ಹೇರೂರು ಗ್ರಾಮದ ಶ್ರೀ ಬ್ರಹ್ಮಬೈದರ್ಕಳ ಕೋಟಿ ಚೆನ್ನಯ್ಯ ಬೊಕ್ಕ ಶ್ರೀ ಪಂಜುರ್ಲಿ ಸಪರಿವಾರ ಗರೋಡಿಡ್ ನವೀಕೃತ ದಾರಯಮಯ ಗರೋಡಿ ಲೋಕಾರ್ಪಣೆ ಬೊಕ್ಕ ಪುನಃ ಪ್ರತಿಷ್ಠಾ ಬ್ರಹ್ಮಕಲಶೋಚ್ಚಯ ಮಾ.22-23 ಮುಟ್ಟ ನಡಪರೆ ಉಂಡು.

ಪುದೆಕಾಣಿಕೆನ್ ಕೊರ್ಪುನಕುಲು ಮಾ.19 ಬೊಕ್ಕ 20 ತಾರೀಕ್‌ಗ್ ಕೊರೊಲಿ. ಈ ಪುಣ್ಯ ಕಾರ್ಯಗ್ ಮಾತ ಭಕ್ತೆರ್ ಬತ್ತ್‌ದ್ ದೇವೆರೆನ ಗಂಧ ಪ್ರಸಾದನ್ ಸ್ವೀಕಾರ ಮಲ್ಪೊಡು ಪಂದ್ ಸಮಿತಿದ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕಾರ್ಲ: ಶ್ರೀ ಉಮಾಮಹೇಶ್ವರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಾ.22-28 ಮುಟ್ಟ ಬ್ರಹ್ಮಕಲಶೋಚ್ಚಯ ಅಂಚನೆ ಸಹಸ್ರ ಚಂಡಿಕಾ ಮಹಾಯಾಗ

ಒಡಿಪು: ಕಾರ್ಲ ತಾಲೂಕ್‌ದ ಅಡಪಾಡಿ ಪಳ್ಳಿ ಗ್ರಾಮದ ಶ್ರೀ ಉಮಾಮಹೇಶ್ವರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಾ.22-28 ಮುಟ್ಟ ಶ್ರೀ ಕ್ಷೇತ್ರಡ್ ಬ್ರಹ್ಮಕಲಶೋಚ್ಚಯ ಅಂಚನೆ ಸಹಸ್ರ ಚಂಡಿಕಾ ಮಹಾಯಾಗ ನಡಪರೆ ಉಂಡು.

ಬೇತೆ ಬೇತೆ ಧಾರ್ಮಿಕ ಕಾರ್ಯಕ್ರಮದೊಟ್ಟುಗು ಅಂಚನೆ ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಕೈವಲ್ಯ ಮಠಾಧೀಶ ಶ್ರೀಮದ್ ಶಿವಾನಂದ ಸರಸ್ವತೀ ಸ್ವಾಮೀಜಿ ಮೆರೆನ ಉಪಸ್ಥಿತಿಡ್ ಅಂಚನೆ ವೇದಮೂರ್ತಿ ಶ್ರೀ ಮೃಗೇಶ್ ಭಟ್, ಲಕ್ಷ್ಮೀಪುರ ಹಿರ್ಗಾನ ಬೊಕ್ಕ ವೇದಮೂರ್ತಿ ಶ್ರೀ ದಯಾನಂದ್ ಭಟ್, ಕಲ್ಲಡ್ಕ ಮೆರೆನ ಮುತಾಲಿಕೆಡ್ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ದೇವಲ್ಯದ ಅರ್ಚಕೆರ್ ಅಂಚನೆ ಅಡಪಾಡಿ ಕೋಡಿಮನೆ ಕುಟುಂಬಸ್ಥೆರ್, ಧರ್ಮದರ್ಶಿಲು ಪುಂಡಲೀಕ ನಾಯಕ್ ಲೆಪ್ಪೋಲೆಡ್ ತೆರಿಪಾದೆರ್.

ಕಾರ್ಲ : ಮುಂಡ್ಕೂರು ಕಲ್ಲಿಮಾರ್‌ಡ್ ಪಿರಾಕ್‌ದ ನಾಗಕಲ್ಲ್ ಪತ್ತೆ

ಕಾರ್ಲ ತಾಲೂಕ್‌ದ ಮುಂಡ್ಕೂರು ಗ್ರಾಮದ ಕಲ್ಲಿಮಾರ್‌ಡ್ ಪಿರಾಕ್‌ದ ನಾಗಕಲ್ಲ್ ಪತ್ತೆ ಆತ್ಂಡ್.

ನಾಗ ಬನತ್ತ ಕೈತಲ್ ಗರ್ಪುನಗ ಈ ಕಲ್ಲ್ ತಿಕ್ಕ್‌ದ್ಂಡ್. ಈ ಕಲ್ಲ್ ತುಂಡಾದಿತ್ತ್‌ದ್ ಪಿರಾಕ್‌ದ ಅಪ್ರೂಪವಾಯಿನ ಶಿಲ್ಪ ಕಲೆ ಉಂದೆಟ್ಟ್ ಉಂಡು. ರವಿಪ್ರಸಾದ್ ಭಟ್ ಸಾಕಾರಡ್ ಈ ಶಿಲ್ಪ ರೂಪದ ನಾಗಕಲ್ಲ್ ಪತ್ತೆಯಾತ್ಂಡ್. ಸುಮಾರ್ 500 ವರ್ಷ ಪಿರವುದ ಶಿಲ್ಪ ಕಲ್ಲ್ ದ ಲೆಕ್ಕ ತೋಜಿದ್ ಬೈದ್ಂಡ್.

ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈಗ್ ಜೂವ ಬೆದರಿಕೆ, ದೂರು ದಾಖಲ್

ಮುಲ್ಕಿ : ಕಾಂಗ್ರೆಸ್ ಮುಖಂಡೆರ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಅಂಚಿನ ಮುಲ್ಕಿ-ಬೆದ್ರ ಕ್ಷೇತ್ರದ ವೋಟುದ ಉಸ್ತುವಾರಿ ಆಯಿನ ಮಿಥುನ್ ರೈ ಮೆರೆಗ್ ಸಾಮಾಜಿಕ ಜಾಲತಾಣಡ್ ಜೂವ ಬೆದರಿಕೆ ಪಾಡ್ದಿನ ಘಟನೆ ನಡದ್ಂಡ್.

ಈ ನಿಲೆಟ್ಟ್ ಮುಲ್ಕಿ ಪೊಲೀಸ್ ಠಾಣೆಡ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ದೂರು ದಾಖಲ್ ಮಲ್ತ್‌ದೆರ್. ಜೈ ಶ್ರೀ ರಾಮ್ ಪನ್ಪಿನ ಪುದರ್‌ದ ವಾಟ್ಸ್ ಆಪ್ ಗ್ರೂಪ್‌ಡ್ ಹನಿ ಹಿಂದೂಸ್ತಾನಿ ಬೊಂಬಾಯಿ ಪನ್ಪಿನ ಪುದರ್‌ಡ್ “ಮಿಥುನ್ ರೈ ಮೆರೆಗ್ “ಗುಂಡುದ ವನಸ್ ಮಲ್ಪಾವೆ” ಪನ್ಪಿನ ಬೆದರಿಕೆದ ಪೋಸ್ಟ್ ಒಂಜೆನ್ ಪಾಡ್ದೆರ್ ಪಂದ್ ಪೊಲೀಸ್ ದೂರ್‌ಡ್ ತೆರಿಪಾದೆರ್.
ಜೂವ ಬೆದರಿಕೆದ ಪೋಸ್ಟ್ ಪಾಡ್ದಿನಕ್ಲೆನ ಮಿತ್ತ್ ಸರಿಯಾಯಿನ ಕ್ರಮ ದೆತೊನೊಡು ಪಂದ್ ಮುಲ್ಕಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಪಂತೆರ್.

ಕಾರ್ಲ: ಕಾಬೆಟ್ಟು ಬ್ರಹ್ಮಶ್ರೀ ಮೊಗೇರ್ಕಳ ದೇವಲ್ಯಡ್ ಎ.1-3 ಮುಟ್ಟ ವರ್ಷಾವಧಿ ನೇಮೋಚ್ಚಯ

ಕಾರ್ಲದ ಕಾಬೆಟ್ಟು ಬ್ರಹ್ಮಶ್ರೀ ಮೊಗೇರ್ಕಳ ದೇವಲ್ಯಡ್ ಎ.1-3 ಮುಟ್ಟ ವರ್ಷಾವಧಿ ನೇಮೋಚ್ಚಯ ಭಾರೀ ಗೌಜಿಡ್ ನಡಪರೆ ಉಂಡು.

ಎ.1 ಕ್ಕ್ ಸನಿವಾರ ಕಾಂಡೆ ಗಣಹೋಮ ಆದ್ ರಾತ್ರೆ ಭಂಡಾರ ಬತ್ತ್‌ದ್ ಧರ್ಮರಸು ದೈವದ ನೇಮ ನಡಪರೆ ಉಂಡು. ಎಪ್ರಿಲ್ 2 ಕ್ಕ್ ರಾತ್ರೆ ಬ್ರಹ್ಮಶ್ರೀ ಮೊಗೇರ ದೈವದ ಅಂಚನೆ ಶ್ರೀ ಶಕ್ತಿ ಸ್ವರೂಪಿಣಿ ತನ್ನಿಮಾನಿಗ ದೈವದ ನೇಮ ನಡಪರೆ ಉಂಡು. ಎಪ್ರಿಲ್ 3 ಕ್ಕ್ ಸೋಮಾರ ಮಧ್ಯಾಹ್ನ 12 ಗಂಟೆಗ್ ಅಲೇರ ಪಂಜುರ್ಲಿ ದೈವದ ನೇಮ ಆದ್ ರಾತ್ರೆ ಚಾಮುಂಡೇಶ್ವರಿ ಅಂಚೆನೆ ಗುಳಿಗ ದೈವದ ನೇಮ ನಡಪರೆ ಉಂಡು.

ಅತ್ತೂರು ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಮಾ.14-17 ಮುಟ್ಟ ವಾರ್ಷಿಕ ಜಾತ್ರಾ ಮಹೋಚ್ಚಯ, ಮಲ್ಲ ತೇರ್ ಉಚ್ಚಯ

ಕಾರ್ಲ ತಾಲೂಕ್‌ದ ನಿಟ್ಟೆದ ಅತ್ತೂರು ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಶ್ರೀ ಪೇಜಾವರ ಅಧೋಕ್ಷಜ ಮಠದ ಶ್ರೀ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಶ್ರೀ ಸ್ವಾಮಿಲೆನ ಆಶೀರ್ವಾದದೊಟ್ಟುಗು ಪುತ್ತೂರ್ ಶ್ರೀ ಶ್ರೀಶ ತಂತ್ರಿಲೆನ ಮುತಾಲಿಕೆಡ್ ಮಾ.14-17 ಮುಟ್ಟ ವಾರ್ಷಿಕ ಜಾತ್ರಾ ಮಹೋಚ್ಚಯ ಅಂಚನೆ ಮಲ್ಲ ತೇರ್ ಉಚ್ಚಯ ಭಾರೀ ಗೌಜಿಡ್ ನಡಪರೆ ಉಂಡು.

ಮಾ.14 ಕ್ಕ್ ಕಾಂಡೆ 10 ಗಂಟೆಗ್ ತೋರಣ ಮುರ್ತ ನಡತ್ತ್‌ದ್ ನವಕ ಪ್ರಧಾನ ಬೊಕ್ಕ ಕಲಶಾಭಿಷೇಕ ಆದ್ ಅಲಂಕಾರ ಪೂಜೆ ನಡಪರೆ ಉಂಡು. ಅಂಚನೆ 4 ದಿನಲ ದೇವೆರೆಗ್ ಬೇತೆ ಬೇತೆ ರೀತಿದ ಪೂಜೆ ನಡತ್ತ್‌ದ್ ರಾತ್ರೆ ಭಜನೆ ಸೇವೆ ನಡಪರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ದೇವೆರೆನ ಗಂಧ ಪ್ರಸಾದನ್ ದೆತೊಂದು ಶ್ರೀ ವಿಷ್ಣುಮೂರ್ತಿ ದೇವೆರೆನ ಅನುಗ್ರಹಗ್ ಪಾತ್ರರಾವೊಡು ಪಂದ್ ದೇವಲ್ಯದ ಪ್ರಧಾನ ಅರ್ಚಕೆರ್ ಎ. ಶ್ರೀನಿವಾಸ ಆಚಾರ್ಯ, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಮನ್ಮಥ ಜೆ. ಶೆಟ್ಟಿ ಬೊಕ್ಕ ವ್ಯವಸ್ಥಾಪನಾ ಸಮಿತಿದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಇರುವೈಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಗೌಜಿಡ್ ನಡತ್ಂಡ್ ಮಹಾ ರಥೋಚ್ಚಯ

ಬೆದ್ರದ ಇರುವೈಲ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಮಾ.4-12 ಮುಟ್ಟ ಭಾರೀ ಗೌಜಿಡ್ ವಾರ್ಷಿಕ ಜಾತ್ರಾ ಉಚ್ಚಯ ನಡತೊಂದು ಉಂಡು.

ಇಂಚಾದ್ ಮಾ.11 ಕ್ಕ್ ಕಾಂಡೆ ಶ್ರೀ ದೇವಿನ ಮಹಾ ರಥೋಚ್ಚಯ ಭಾರೀ ಗೌಜಿಡ್ ನಡತ್ಂಡ್. ಸಾರರ್ದ್ ಎಚ್ಚದ ಭಕ್ತೆರ್ ಉಂದೆನ್ ತೂದು ಶ್ರೀ ದೇವಿನ ಕೃಪೆಗ್ ಪಾತ್ರರಾಯೆರ್.

You Missed