ಉಡುಪಿದ ಸುದ್ದಿ | Udupi News

ಕೊಡವೂರು ತುಳು ಲಿಪಿ ಕಲಿಕಾ ಕಾರ್ಯಾಗಾರ

ಮಾತೃಭಾಷೆ ನೆಲತ ಸಂಸ್ಕೃತಿದ ಅವಿಭಾಜ್ಯ ಅಂಗ.ಇನಿ ನಮ ದೆತೊಂದಿನ ಸಾಮಾಜಿಕ, ಸಾಂಸ್ಕೃತಿಕ ಮೌಲ್ಯನ್ ಎಗ್ಗಿಜ್ಜಂದೆ ಒತ್ತೋನೊಂದು ಉಪ್ಪುನ ಪ್ರಸುತ್ತ ಕಾಲಘಟ್ಟಡ್ ತುಳುನಾಡ್ದಕುಲಾಯಿನ ನಮ ಮಾತಾ ನೆಲತ ಸಂಸ್ಕೃತಿನ್ ಪ್ರತಿಬಿಂಬಿಸಾವುನ ತುಳು ಮಾತೃಭಾಷೆನ್ ಒರಿಪಾದ್ ಬುಲೆಪಾವುನಲ್ಪ ಗಮನ ಕೊರೊಡು ಪಂದ್ ಕೊಡವೂರು ಶ್ರೀ ಶಂಕರನಾರಾಯಣ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರ್ಲಾಯಿನ ಕೊಡವೂರು ಪ್ರಕಾಶ್ ಪಂಡೆರ್ .ಮೇರ್ ಶ್ರೀ ಶಂಕರನಾರಾಯಣ ದೇವಸ್ಥಾನದ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ,ಜೈ ತುಳುನಾಡ್ ಸಂಘುಟನೆ ಬೊಕ್ಕ ಕೊಡವೂರು ಹಳೆ ವಿದ್ಯಾರ್ಥಿ ಸಂಘ, ಯುವಕ ಸಂಘದ ಸಂಯುಕ್ತಾಶ್ರಯಡ್ ಜ. 10 ತಾರೀಖ್ ಗ್ ಶ್ರೀ ದೇಗುಲಡ್ ನಡತಿನ ತುಳು ಲಿಪಿ ಕಲಿಕಾ ಕಾರ್ಯಾಗಾರನ್ ಉದಿಪನ ಮಲ್ತ್ದ್ ಪಾತೆರಿಯೆರ್.

ಸಮ್ಮಾನ, ಗೌರವಾರ್ಪಣೆ

‌ತುಳು ಲಿಪಿ ಫಾಂಟ್ ದ ವಿನ್ಯಾಸ ಮಲ್ತ್ ದ್ ವಿದ್ಯುನ್ಮಾನ ಮಾಧ್ಯಮದಲ್ ತುಳು ಲಿಪಿ ಪಸರೆರೆ ಕಾರಣಕರ್ತೆರಾಯಿನ ದೀಪಕ್ ಪಡುಕೋಣೆ ಮೆರೆಗ್ ಮಾನದಿಗೆ ಮಲ್ತೆರ್. ಇಂಚೋಗು ಬುಡುಗಡೆ ಆಯಿನ ಇರ್ನೂದೆದ ಒಂಜಿ ನೋಟು ತುಳು ಕ್ರತಿದ ಲೇಖಕಿ ವಾಸಂತಿ ಅಂಬಲಪಾಡಿ ಮೆರೆಗ್ ಮಾನದಿಗೆ ಮಲ್ತೆರ್.
ಈ ಪೊರ್ತುಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆ ತಾರಾ ಉಮೇಶ್ ಆಚಾರ್ಯ, ಮೀನುಗಾರರ ಪೆರಿಯ ಮುಂದಾಳು ಕಾಂತಪ್ಪ ಕರ್ಕೇರ,ಜೈ ತುಳುನಾಡ್ ಸಂಘುಟನೆದ ಗುರ್ಕಾರ್ಲು ಸುದರ್ಶನ್ ಸುರತ್ಕಲ್,ಶಿಕ್ಷಕಿ ಮಲ್ಲಿಕಾ ದೇವಿ, ಶಂಕರನಾರಾಯಣ ಭಕ್ತವ್ರಂದದ ಕೋಶಾಧಿಕಾರಿ ರಾಮ ಸೇರಿಗಾರ್, ಕೊಡವೂರು ಹಳೆ ವಿದ್ಯಾರ್ಥಿ ಸಂಘದ ಗುರ್ಕಾರ್ಲು ಸತೀಶ್ ಕೊಡವೂರು, ಯುವಕ ಸಂಘದ ಗುರ್ಕಾರ್ಲು ಪ್ರಭಾತ್ ಕೋಟ್ಯಾನ್, ಜೈ ತುಳುನಾಡ್ ಸಂಘುಟನೆದ ರಾಜೇಶ್ ತುಳುವೆ, ಕಿರಣ್ ತುಳುವೆ,ತುಳು ಲಿಪಿ ಶಿಕ್ಷಕ ಶರತ್ ಕೊಡವೂರು, ಶಿಕ್ಷಕಿ ಉಜ್ವಲ ಎನ್ ಪೂಜಾರಿ ಪಾಲ್ ಪಡೆದಿತ್ತೆರ್.ಯಶೋದ ಕೇಶವ್ ಎದುಕೊಂಡೆರ್ , ಸ್ವಾತಿ ಸುವರ್ಣ ಸೊಲ್ಮೆ ಸಂದೈತ ಮಲ್ತೆರ್ .ಸುಷ್ಮಾ ದೇವಾಡಿಗ ನಿರೂಪಣೆ ಮಲ್ತೆರ್ .

ಮಹಾಲಕ್ಷ್ಮಿ ಸಂಜೀವಿನಿ ಸ್ವಸಹಾಯ ಸಂಘದ ಉದಿಪನ ಕಜ್ಜೊ

ಮಹಾಲಕ್ಷ್ಮಿ ಸಂಜೀವಿನಿ ಸ್ವಸಹಾಯ ಸಂಘದ ಉದಿಪನ ಕಜ್ಜೊ ಬಡಾನಿಡಿಯೂರುದ ತೊಟ್ಟಂ ಡ್ ನಡತುಂಡ್.ಅಂಚೆ ಇಲಾಖೆದ ಉದ್ಯೋಗಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ವಿಜೇತೆ ಪೂರ್ಣಿಮ ಜನಾರ್ಧನ್ ಕಜ್ಜೊದ ಉದಿಪನ ಮಲ್ತುದ್ ಅಂಚೆ ಇಲಾಖೆಡ್ ಗ್ರಾಮೀಣ ಪ್ರದೇಶದ ಪೊಂಜೊವುನಕ್ಲೆಗ್ ತಿಕ್ಕುನಂಚಿನ ಯೋಜನೆ ಬೊಕ್ಕ ಉಪಯೋಗದ ಬಗ್ಗೆ ಸಂಕ್ಷಿಪ್ತ ಮಾಹಿತಿ ಕೊರಿಯೆರ್..ಈ ಪೊರ್ತುಡ್ ಗ್ರಾಮ ಒಕ್ಕೂಟ ನವಶಕ್ತಿ ಸಂಜೀವಿನಿದ ಅಧ್ಯಕ್ಷೆರಾಯಿನ ಲತಾ ಅಶೋಕ್ ಮೇರ್ ಕಜ್ಜೊದ ಅಧ್ಯಕ್ಷತೆಡಿತ್ತೆರ್

.ವೇದಿಕೆಡ್ ಉಪಾಧ್ಯಕ್ಷೆರಾಯಿನ ಶ್ರೀ ಮತಿ ತಾರಾ ಪ್ರಭಾಕರ್ ,ಕಾರ್ಯದರ್ಶಿ ವತ್ಸಲಾ,ಕೋಶಾಧಿಕಾರಿ ಸುಗುಣ,ನಾಲನೇ ವಾರ್ಡ್ ದ ಕೋಶಾಧಿಕಾರಿ ಯಶೋದ ಉಮೇಶ್,ಉಪಸ್ಥಿತರಿತ್ತೆರ್. ಮಹಾಲಕ್ಷ್ಮಿ ಸಂಜೀವಿನಿ ಸ್ವಸಹಾಯ ಸಂಘದ ಅಧ್ಯಕ್ಷೆರಾದ್ ಶ್ರೀಮತಿ ಜಯಂತಿ,ಕಾರ್ಯದರ್ಶಿಯಾದ್ ಶ್ರೀಮತಿ ಶೀಬಾ,ಕೋಶಾಧಿಕಾರಿಯಾದ್ ಕುಮಾರಿ ಸಂಧ್ಯಾ ಮೊಕ್ಲೆನ್ ಒಕ್ಕೂಟದ ಪದಾಧಿಕಾರಿಲು ಆಯ್ಕೆ ಮಲ್ತೆರ್.ಆರತಿ ಕಜ್ಜೊದ ನಿರೂಪಣೆ ಮಲ್ತೆರ್.