ಉಡುಪಿದ ಸುದ್ದಿ | Udupi News

ಬೆದ್ರ : ಶಾಲೆದ ಗಾಡಿಗ್ ಗುದ್ದಿನ ಕಾರ್: ಬಚಾವ್ ಆಯಿನ ಶಾಲೆದ ಜೋಕುಲು

ಬೆದ್ರ : ಶಾಲೆದ ಗಾಡಿಗ್ ಕಾರ್ ಒಂಜಿ ತಾಂಟ್ ದ್ ಕಾರ್ ದ ಡ್ರೈವರ್ ಗ್ ಮಸ್ತ್ ಪೆಟ್ಟ್ ಆತಿನ ಘಟನೆ ಬೆದ್ರದ ಆಲಂಗಾರ್ ಡ್ ಬಯ್ಯ 4 ಗಂಟೆದ ಪೊರ್ತುಡು ನಡತ್oಡ್. ಶಾಲೆದ ಗಾಡಿಡ್ ಇತ್ತಿನ ಜೋಕುಲು ಬಚಾವ್ ಆತೆರ್.

ಬೆದ್ರದ ಆಲಂಗಾರ್ ದ ಸೈಂಟ್ ಥಾಮಸ್ ಆಂಗ್ಲ ಮಾಧ್ಯಮ ಶಾಲೆದ ಬಸ್ ಜೋಕ್ಲೆನ್ ಇಲ್ಲಗ್ ಬುಡಿಯರೆ ಬೆಳುವಾಯಿ ದಂಚಿ ಪೋವೊoದಿಪ್ಪುನಗ ಕಾರ್ಲರ್ದ್ ಬೆದ್ರ ದಂಚಿ ಬರೊಂದಿತ್ತಿನ ಕೆಎ09 z 7481 ನಂಬರ್ ದ ಕಾರ್ ಆಲಂಗಾರು ಕೈತಲ್ ಬ್ರೇಕ್ ಪಾಡ್ ದಿತ್ತ್ ದ್, ಕಾರು ಬಲತ್ತ ಕಡೆಕ್ಕ್ ತಿರ್ಗ್ ದ್ ಶಾಲೆದ ಗಾಡಿಗ್ ಗುದ್ದ್ ದುಂಡು.

ಕಾರ್ ದ ಡ್ರೈವರ್ ನ ಮೂoಕು ಬೊಕ್ಕ ಕೆಬಿಟ್ಟ್ ನೆತ್ತೆರ್ ಬರೊಂದಿತ್ತ್oಡ್ ಪಂದ್ ಅಲ್ಪದ ಜನಕುಲು ಮಾಹಿತಿ ಕೊರ್ತೆರ್. ಪೆಟ್ಟ್ ಆತಿನಕ್ಲೆಗ್ ಆಸ್ಪತ್ರೆಗ್ ಸೇರ್ಸಾದೆರ್.

ತುಳುನಾಡ ರಕ್ಷಣಾ ವೇದಿಕೆದ ಯೋಗೀಶ್ ಶೆಟ್ಟಿ ಜೆಪ್ಪು ಮೆರೆಗ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ

ಕುಡ್ಲ: ಕನ್ನಡ ರಾಜ್ಯೋತ್ಸವದ ಪೊರ್ತುಡು ಕೊರ್ಪಿನ ದ.ಕ.ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿಗ್ ಈ ಸರ್ತಿ ಬೇತೆ ಬೇತೆ ಕ್ಷೇತ್ರದ 34 ಸಾಧಕೆರ್ ಬೊಕ್ಕ 20 ಸಂಘ ಸಂಸ್ಥೆಲು ಪ್ರಶಸ್ತಿಗ್ ಆಯ್ಕೆಯಾತ್ಂಡ್. ಈ ಬಗೆಟ್ ಸಮಾಜ ಸೇವೆ ಕ್ಷೇತ್ರದ ವಿಭಾಗಡ್ ತುಳುನಾಡ ರಕ್ಷಣಾ ವೇದಿಕೆದ ಸ್ಥಾಪಕಾಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜೆಪ್ಪು ಆಯ್ಕೆಯಾತೆರ್.

ತುಳುನಾಡ ರಕ್ಷಣಾ ವೇದಿಕೆ, ಸ್ಥಾಪಕಾಧ್ಯಕ್ಷೆರ್ ಯೋಗೀಶ್ ಶೆಟ್ಟಿ ಜೆಪ್ಪು ಮುತಾಲಿಕೆಡ್ ಕರಿನ 14 ವರ್ಷರ್ದ್ ತುಳುನಾಡ್‌ದ ಆಚಾರ ವಿಚಾರ ಅಂಚನೆ ತುಳು ಭಾಷೆನ್ ಸಂವಿಧಾನದ 8ನೇ ಪರಿಚ್ಛೇದಗ್ ಸೇರ್ಸಾಯರೆ ಪೊರ್ಂಬಾಟ ಅಂಚನೆ ಸಾಮಾಜಿಕ ಜಾಲತಾಣದ ಮುಖೇನ ಜನಕ್ಲೆಡ ತಿಳುವಳಿಕೆ ಪುಟ್ಟಾವುನ ಬೇಲೆನ್ ನಿರಂತರವಾದ್ ಮಲ್ತೊಂದು ಬೈದ್ಂಡ್.

ಕೋವಿಡ್ 2ನೇ ಅಲೆ ಬತ್ತಿನ ಪೊರ್ತುಡುಲ ಕುಡ್ಲಡ್ 62 ದಿನತ್ತ ಕಾಲ ಬೇಲೆ ಮಲ್ಪುನ ಕೂಲಿ ಕಾರ್ಮಿಕೆರೆಗ್ ನುಪ್ಪು ಸೇವೆ ಮಲ್ತಿನ ಪುಗರ್ತೆ ಈ ಸಂಘಟನೆಗ್ ಉಂಡು. ಮೊಕ್ಲೆನ ಸೇವೆನ್ ಗುರ್ತಿಸಾದ್ 2020 ಟ್ಟ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಯುವ ಸಾಧಕ ಪ್ರಶಸ್ತಿನ್ ಕೊರ್ದ್ ಮಾನಾದಿಗೆ ಮಲ್ತ್‌ದಿತ್ತೆರ್. ಇತ್ತೆ ಪ್ರತಿಷ್ಠಿತ ದ.ಕ.ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿಗ್ ಆಯ್ಕೆಯಾತೆರ್.

Yogish Shetty Jeppu of Tulunadu Rakshana Vedike gets the District Rajyotsava award

Mangalore: The Kannada Rajyotsava award given by the district administration has been awarded to 34 acheivers in different fields and to 20 different firms and associations .

In the field of social service the founder president of Tulunadu Rakshana Vedike Yogesh Shetty Jeppu has been selected.

He has been taking lead from the past 14 years in various activities for promoting Tulu language, literature and also in creating awareness amongst the people through the social media to favour for the inclusion of Tulu in the eighth schedule of the constitution.

At the time of the covid crisis ; the association led by him had provided food to labourers for a term of 62 days .In recognition of the services rendered, the Tulu Sahitya Akademy had presented him the Yuva Sadaka Prashasti. Now the prestigious DK district Rajyotsava award will be awarded to him.

ಏಳ್ ಜನ ಚಿರಂಜೀವಿಲೆಡ್ ಬಲೀಂದ್ರೆಲ ಒರಿ ಚಿರಂಜೀವಿ : ಡಾ.ವೈ.ಎನ್.ಶೆಟ್ಟಿ

ಬಂಟರ ಸಂಘ(ರಿ) ಮುಲ್ಕಿ ಜವನೆರ್ ಬೊಕ್ಕ ಪೊಂಜೊವುಲೆನ ಕೂಟದಕ್ಲೆರ್ದ್ ತುಡರ ಪರ್ಬ

ತುಡರ ಪರ್ಬ ಪಂಡ ತುಳುವೆರೆನ ಮಾಮಲ್ಲ ಪರ್ಬ. ಮಹಾ ಬಲಿ ಚಕ್ರವರ್ತಿನ್ ಬೂಮಿಗ್ ಲೆತ್ತ್ ದ್ ಪೂಜೆ ಮಲ್ಪುನ ಪರ್ವ ಕಾಲನೇ ಈ ತುಡರ ಪರ್ಬ. ವಿಷ್ಣು ದೇವೆರ್ ಮೂಜಿ ಮುಟ್ಟು ದಾನ ಕೇಂಡ್ ದ್ ಬಲಿನ್ ನೆಲಕ್ಕ್ ತರ್ತೆರ್ಡಲ ಬಲಿ ಗ್ ಅಲಿ ಇಜ್ಜಿ. ಏಳ್ ಜನ ಚಿರಂಜೀವಿಲೆಡ್ ಆಯೆಲ ಒರಿ ಚಿರಂಜೀವಿ ಆದುಲ್ಲೆ ಪಂದ್ ಜಾನಪದ ವಿದ್ವಾಂಸೆರ್ ಡಾ.ವೈ.ಎನ್.ಶೆಟ್ರ್ ಪಂಡೆರ್.

ಆರ್ ಬಂಟರ ಸಂಘ(ರಿ) ಮುಲ್ಕಿ ಜವನೆರ್ ಬೊಕ್ಕ ಪೊಂಜೊವುಲೆನ ಕೂಟದ ಮುತಾಲಿಕೆಡ್ ಕಾರ್ನಾಡ್ ಡ್ ಶನಿಯಾರ ನಡತಿನ ಸಾಂಪ್ರದಾಯಿಕ ತುಡರ್ ಪರ್ಬ ಆಚರಣೆಡ್ ತುಡರ ಪರ್ಬದ ಪೊಲಬು ಮಲ್ತ್ ದ್ ಪಾತೆರಿಯೆರ್.

ತುಳುವೆರ್ ನುಪ್ಪು ಕೊರ್ಪಿನ ಬೂಮಿ ಅಪ್ಪೆನ್ ಪೂಜೆ ಮಲ್ಪುವೆರ್. ಕೃಸಿ ಸಂಬಂಧಿ ಕಾರಣೊಗು ತುಳುವೆರ್ ಬಲೀಂದ್ರನ್ ಪ್ರತಿ ವರ್ಷಲ ಮೂಜಿ ದಿನ ಲೆತ್ತ್ ದ್ ತುಡರ ಪರ್ಬ ಆಚರಣೆ ಮಲ್ಪುವೆರ್ ಪಂದ್ ಪಂಡೆರ್.
ಬೇಜಾರ್ದ ಸಂಗತಿ ದಾದ ಪಂಡ ಆಟಿದ ಆಚರಣೆ ಬೊಕ್ಕ ಇಂಚೊಗು ತುಡರ ಪರ್ಬಲ ಇಲ್ಲ್, ಕಂಡ, ಜಾಲ್ ಬುಡ್ದು ವೇದಿಕೆಗ್ ಬೈದ್ಂಡ್. ಇತ್ತೆ ಕಾಲ ಬದಲಾದ್ ಯಂತ್ರೋಪಕರಣ ಬೈದಿನೆರ್ದಾವರ ಮರತ್ತ ಪನೆ, ನಾಯೆರ್, ನುಗ, ಇಂಚಿನ ಕೃಸಿತ್ತ ಸೊತ್ತುಲು ಕಾಲಿ ಪ್ರದರ್ಶನ ದ ಸೊತ್ತುಲಾತ್ಂಡ್ ಪಂಡೆರ್ .

ಈ ಪೊರ್ತುಡು ವಿದ್ವಾಂಸೆರ್ ಡಾ.ವೈ.ಎನ್ ಶೆಟ್ಟಿ ಬೊಕ್ಕ ಕುಡ್ಲ ರ್ದ್ ಕಾಶ್ಮೀರ ಮುಟ್ಟ ಸೈಕ್ಲಿಂಗ್ ಮಲ್ತ್ ಸಾಧನೆ ಮಲ್ತಿನ ಅತ್ತೂರು ಕಂಬಳಿ ಮನೆ ಶ್ರೀ ನಿಧಿ ಶೆಟ್ಟಿ ಮೆರೆಗ್ ಮಾನಾದಿಗೆ ನಡತ್‌ಂಡ್.

ಮಲ್ಲ ಬಿನ್ನೆರಾದ್ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯದ ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ರ್ ಬತ್ತಿತ್ತೆರ್.

ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಪುರುಷೋತ್ತಮ ಶೆಟ್ಟಿ , ಉಪಾಧ್ಯಕ್ಷೆರ್ ರಾಜೇಶ್ ಶೆಟ್ಟಿ ಮಾನಾಡಿ,
ಕಾರ್ಯದರ್ಶಿ ಗಂಗಾಧರ ಶೆಟ್ಟಿ ಬೆರ್ಕೆತೋಟ, ಕೋಶಾಧಿಕಾರಿ ಕರುಣಾಕರ ಶೆಟ್ಟಿ, ಯುವ ವಿಭಾಗದ ಸಂಚಾಲಕೆರ್ ದಾಮೋದರ ಶೆಟ್ಟಿ, ಪ್ರಚಾರ ಸಮಿತಿದ ನಿಶಾಂತ್ ಶೆಟ್ಟಿ ಕಿಲೆಂಜೂರು, ಕಿಶೋರ್ ಶೆಟ್ಟಿ, ಬಪ್ಪನಾಡು, ಶ್ರೀಶ ಸರಾಫ್ ಐಕಳ ಮೊಕುಲು ಮಿತ್ತರ್ಮೆಡ್ ಇತ್ತೆರ್.

ಶೈಲಜಾ ಶೆಟ್ಟಿ, ಮಮತಾ ಶೆಟ್ಟಿ ಬೊಕ್ಕ ಸರಿತಾ ರಾಜೇಶ್ ಶೆಟ್ಟಿ ದೇವೆರೆನ್ ಸುಗಿತೆರ್. ಮುಲ್ಕಿ ಬಂಟರ ಸಂಘದ ಅಧ್ಯಕ್ಷೆರ್ ಪುರುಷೋತ್ತಮ ಶೆಟ್ಟಿ ಬಿನ್ನೆರೆನ್ ಎದ್ಕೊಂಡೆರ್. ಕಿರಣ್ ಶೆಟ್ಟಿ ಅತ್ತೂರು ಸಭೆ ಸುಧಾರಿಕೆ ಮಲ್ತೆರ್. ಅಯಿರ್ದ್ ಬೊಕ್ಕ ತುಡರ ಪರ್ಬದ ತುಡರ್ ಉದಿಪನ, ನಲಿಕೆ, ರಂಗೋಲಿ ಬೊಕ್ಕ ಗೂಡುದೀಪ ಪಂತೊಡು ಗೆಂದಿನಕ್ಲೆಗ್ ಇನಾಮು ಪಟ್ಟುನ ಲೇಸ್, ಸೀರೆಲೆನ ಪ್ರದರ್ಶನ ಬೊಕ್ಕ ಮಾರಾಟ ನಡತ್ಂಡ್.

ಮುಳ್ಳುಮುಟ್ಟೆದ ತೂಟ್ಟು ಬೆಚ್ಚ ಆಯಿನ ನೀರ್ ಡ್ ನೀರ್ ಮೀಪಿ ಪರ್ಬ

ತುಳುವೆರ್ ಪಂಡ ತುಳುವೆ ಪೆಲಕಾಯಿದಂಚ. ಪಂಡ ನಸೆ ಮನಸ್ ದಕುಲು. ಅರೆಗಾಲ ಮುಗಿದ್
ಪತ್ತನಾಜೆ ಆಯಿಬೊಕ್ಕ ಬೆನ್ನಿ ಸುರುವಾಪುಂಡು. ಆಟಿ ಕರಿದ್ ಸೋನ ಬನ್ನಗ ನಾಗರ ಪಂಚೆಮಿ, ಅಟ್ಟೆಮಿ, ಚೌತಿ, ತುಡರ ಪರ್ಬ ಇಂಚಿನ ಪರ್ಬೊಲು ಮಾತ ಬರ್ಪುಂಡು. ನಮ ತುಡರ ಪರ್ಬೊನು ಮೂಜಿ ದಿನತ್ತ ಪರ್ಬ ಆದ್ ಆಚರಣೆ ಮಲ್ಪುವ. ಸುರುಕ್ಕು ನೀರ್ ಮೀಪಿನ ಪರ್ಬ. ಪೆತ್ತ ಕಂಜಿಲೆನ್ ಮೀಪಾದ್ ಕಂಟೆಲ್ಗ್ ಅಲ್ಲಿ ಪೂತ್ತ ಮಾಲೆ ಮಲ್ತ್ ಪಾಡ್ದ್ ಪೂಜೆ ಮಲ್ಪುನ ಕ್ರಮ ಇತ್ತ್ಂಡ್. ಕಂಡೊಗು ತುಡರ್ ದೀಪಿನಿ, ದೈವೊಲೆಗ್ ಬೊಕ್ಕ ಹಿರಿಯೆರೆಗ್ ಬಲಸುನು, ತುಡರ್ ತೋಜಾವುನು, ಗಟ್ಟಿ ಬಜಿಲ್ ತಿಂದ್ ವನಸ್ ಮಲ್ಪುನು ಇಂಚ ಮಾತ ಕ್ರಮ ಉಂಡು. ಕಾಪುದಂಚಿ ಮುಳ್ಳುಮುಟ್ಟೆಗ್ ತೂ ಕೊರ್ಪಿನ ಕ್ರಮ ಉಂಡು. ಮಾತೆರ್ಲ ಅಲ್ಪಲ್ಪ ಇತ್ತಿನ ಮುಳ್ಳುಮುಟ್ಟೆನ್ ಕಡ್ತ್ ದ್ ಒಂಜೇ ಕಡೆಕ್ಕ್ ಕನತ್ ದ್ ರಾಸಿ ಪಾಡ್ದ್ ತೂ ಕೊರ್ಪಿನ ಕ್ರಮ ಇತ್ತೆಲ ನಡಪುಂಡು. ದುಂಬುದ ಕಾಲೊಡು ಮಾತ ಇಲ್ಲದಕುಲು ನೀರ್ ದ ಕಡ್ಯ ಕಂದೆಲ್ ಕನತ್ ದ್ ಮುಳ್ಳುಮುಟ್ಟೆದ ತೂತ್ತ ಕೈತಲ್ ದೀದುಪ್ಪುವೆರ್ . ತೂತ್ತ ಬೆಚ್ಚೊಗು ಬೆಚ್ಚ ಆಯಿನ ಕಡ್ಯ ಕಂದೆಲ್ ದ ನೀರ್ ಡ್ ಇಲ್ಲದಕುಲು ನೀರ್ ಮೀವೊಂದಿತ್ತೆರ್ ಪಂದ್ ಡಾ.ವೈ.ಎನ್.ಶೆಟ್ರ್ ತೆರಿಪಾಯೆರ್.