ಉಡುಪಿದ ಸುದ್ದಿ | Udupi News

ಕಾಂಗ್ರೆಸ್‌ದ 2ನೇ ಪಟ್ಟಿ ಪ್ರಕಟ – ಒಡಿಪುಡ್ ಪ್ರಸಾದ್ ರಾಜ್ ಕಾಂಚನ್ ಗ್ ಟಿಕೆಟ್

ಕರ್ನಾಟಕ ವಿಧಾನಸಭಾ ವೋಟುಗ್ ಕಾಂಗ್ರೆಸ್ ಪಕ್ಷ ತನ್ನ ಅಭ್ಯರ್ಥಿಲೆನ ರಡ್ಡನೇ ಪಟ್ಟಿನ್ ಇನಿ ಬುಡುಗಡೆ ಮಲ್ತ್‌ದ್ಂಡ್.

ಸುರುತ್ತ ಪಟ್ಟಿಡ್ 124 ಅಭ್ಯರ್ಥಿಲೆನ ಪುದರ್ ಇತ್ತ್‌ದ್ ರಡ್ಡನೇ ಪಟ್ಟಿಡ್ 42 ಅಭ್ಯರ್ಥಿಲೆನ ಪುದರ್‌ನ್ ಬುಡುಗಡೆ ಮಲ್ತ್‌ದ್ಂಡ್.

ಒಡಿಪು ವಿಧಾನ ಸಭೆ ಕ್ಷೇತ್ರಡ್ ಪ್ರಸಾದ್ ರಾಜ್ ಕಾಂಚನ್ ಮೆರೆಗ್ ಟಿಕೆಟ್ ಘೋಷಣೆಯಾತ್ಂಡ್. ನಿರೀಕ್ಷೆ ಇತ್ತಿಲೆಕ್ಕನೆ ಮೊಗವೀರರೆಗ್ ಕಾಂಗ್ರೆಸ್ ಟಿಕೆಟ್ ಕೊರ್ತುಂಡು. ತುಳುನಾಡ್‌ದ ಬಾಕಿ ಒರಿದಿನ ಕ್ಷೇತ್ರ ಆಯಿನ ಪುತ್ತೂರ್, ಕುಡ್ಲ ದಕ್ಷಿಣ – ಉತ್ತರ, ಕಾರ್ಲ, ಕಾಪು ಬೈಂದೂರ್ ಗ್ ನನಲ ಟಿಕೆಟ್ ಘೋಷಣೆ ಆತ್‌ಜಿ.

ರಾಜಕೀಯ ಬುಡಿಯೆರ್ ಬಿಜೆಪಿ ಶಾಸಕೆರ್ ಹಾಲಾಡಿ ಶ್ರೀನಿವಾಸ ಶೆಟ್ರ್ 

ಒಡಿಪು: ತುಳುನಾಡ್‌ದ ವಾಜಪೇಯಿ ಪಂದೇ ಪುಗರ್ತೆ ಪಡೆದಿತ್ತಿನ, ಕುಂದಾಪುರ ವಿಧಾನಸಭಾ ಕ್ಷೇತ್ರರ್ದ್ 5 ಸರ್ತಿ ಶಾಸಕೆರ್ ಆದಿತ್ತಿನ ಹಾಲಾಡಿ ಶ್ರೀನಿವಾಸ ಶೆಟ್ಟಿ ಮೇರ್ ಈ ಸರ್ತಿ ರಾಜಕೀಯೊರ್ದು ಪಿರ ಉಂತುದೆರ್.

1999 ರ್ದ್ ಇಡೇ ಮುಟ್ಟ “ಸೋಲಿಲ್ಲದ ಸರದಾರ” ಆದಿತ್ತಿನ 72 ವರ್ಷದ ಹಾಲಾಡಿ ಶ್ರೀನಿವಾಸ್ ಶೆಟ್ಟಿ ಮೇರ್ ಯಾನ್ ಈ ಸರ್ತಿ ವಿಧಾನಸಭೆ ವೋಟುಗು ಉಂತುಜಿ ಪಂದ್ ಸೋಮಾರ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

ಎಸ್ಸೆಸ್ಸೆಲ್ಸಿ ಪರೀಕ್ಷೆ 31 ಜೆಡ್ದ್ ಸುರು: ಎಪ್ರಿಲ್ 15 ಮುಟ್ಟ ನಿಷೇಧಾಜ್ಞೆ

ಕುಡ್ಲ: ರಾಜ್ಯಡ್ ಎಸ್ಸೆಸ್ಸೆಲ್ಸಿ ಪರೀಕ್ಷೆ 31 ಜೆಡ್ದ್ ಸುರು ಆವರೆ ಇತ್ತ್‌ದ್, ಪರೀಕ್ಷಾ ಕೇಂದ್ರಡ್ ಕಾನೂನು ಬಾಹಿರ ಚಟುವಟಿಕೆ, ಬೊಡ್ಚಾಂದಿನ ಘಟನೆಲು ನಡಪಂದಿಲೆಕ್ಕ ಪರೀಕ್ಷೆನ್ ಎಡ್ಡೆ ರೀತಿಡ್ ನಡಪಾವುನ ನಿಲೆಟ್ಟ್ ದ.ಕ. ಜಿಲ್ಲಾಧಿಕಾರಿ ಎಪ್ರಿಲ್ 15 ಮುಟ್ಟ ನಿಷೇಧಾಜ್ಞೆ ಜಾರಿ ಮಲ್ತ್‌ದೆರ್.

ಪರೀಕ್ಷಾ ಕೇಂದ್ರದ 200 ಮೀಟರ್ ಸುತ್ತಮುತ್ತಲ್‌ದ ಪ್ರದೇಶನ್ ನಿಷೇಧಿತ ಪ್ರದೇಶ ಪಂದ್ ಘೋಷಣೆ ಮಲ್ತ್‌ದ್ ದಂಡ ಸಂಹಿತೆ 1973 ತ್ತ ಕಲಂ 144 ದಂಚ ಜಿಲ್ಲಾ ದಂಡಾಧಿಕಾರಿಲು ಆಯಿನ ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್ ಮೇರ್ ನಿಷೇಧಾಜ್ಞೆ ಜಾರಿ ಮಲ್ದೆರ್.

ಸಸಿಹಿತ್ಲು: ಶ್ರೀ ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನಡ್ ಕಾಲಾವದಿ ನೇಮೋಚ್ಚಯ

ಸಸಿಹಿತ್ಲುದ ಶ್ರೀ ಸಾರಂತಾಯ ಗರೋಡಿ ಉಳ್ಳಾಯ ದೈವಸ್ಥಾನಡ್ ಮಾ.24-27 ಮುಟ್ಟ ಕಾಲಾವದಿ ನೇಮೋಚ್ಚಯ ನಡಪರೆ ಉಂಡು.

ಮಾ.24 ಕ್ಕ್ ಶ್ರೀ ಕ್ಷೇತ್ರಗ್ ಕಾಂತುಲಕ್ಕಣೆರ್‍ನ ಇಲ್ಲರ್ದ್ ಭಂಡಾರ ಬರಿಯರೆ ಉಂಡು. ಕಾಂಡೆ 8 ಗಂಟೆಗ್ ನಾಗದೇವೆರೆಗ್ ತನು ತಂಬಿಲ ಅಂಚನೆ ಬೇತೆ ಬೇತೆ ರೀತಿದ ಸೇವೆಲು ನಡಪರೆ ಉಂಡು. ಬಯ್ಯ 7 ಗಂಟೆಗ್ ಶ್ರೀ ಕ್ಷೇತ್ರಡ್ ಕಾಂತುಲಕ್ಕಣ ಗುರಿಕಾರೆರ್‍ನ ಭಂಡಾರ ಇಲ್ಲದ ತಂಬಿಲ ಸೇವೆ, ಕಾಂತಾಬಾರೆ ಬೂದಾಬಾರೆ ಮೊಕುಲೆಗ್ ಅಗೇಲು ಸೇವೆ ಆದ್ ಭಂಡಾರ ಪೋಯರೆ ಉಂಡು.

ಮಾ.25 ಕ್ಕ್ ಬಯ್ಯ ಚಪ್ಪರ ಏರ್ದ್ 6 ಗಂಟೆಗ್ ಗ್ರಾಮದ ಪೊಂಜೋವುಲೆರ್ದ್ “ಶಿವ ಸಹಸ್ರ ನಾಮಾರ್ಚನೆ” ನಡಪರೆ ಉಂಡು. ರಾತ್ರೆ 9.30 ಗಂಟೆಗ್ ಖಂಡಿಗೆ ಬೀಡು ಉಳ್ಳಾಯ ದೈವಸ್ಥಾನರ್ದ್ ಅಂಚನೆ ಶ್ರೀ ಕಾಂತುಲಕ್ಕಣ ಗುರಿಕಾರೆರ್‍ನ ಇಲ್ಲರ್ದ್ ಭಂಡಾರ ಬತ್ತ್‌ದ್, ಕೊಡಿ ಏರಿಯರೆ ಉಂಡು. ಮಾ.26 ಕ್ಕ್ ಉಳ್ಳಾಯ ದೈವದ ನೇಮೋಚ್ಚಯ, ಇಷ್ಟದೇವತೆ, ಮೂಲ ಮಹಿಷಂದಾಯ, ಬಬ್ಬರ್ಯ ಅಂಚನೆ ಪರಿವಾರ ದೈವಲೆನ ನೇಮ ಬೊಕ್ಕ ಕಾಂತಾಬಾರೆ ಬೂದಾಬಾರೆ ಮೊಕುಲೆಗ್ ಪಂಜಕಜ್ಜಾಯ ಸೇವೆ ನಡಪರೆ ಉಂಡು. ಮಧ್ಯಾಹ್ನ ಓಡ್ಯಂತಾಯ ದೈವದ ನೇಮೋಚ್ಚಯ, ರಾತ್ರೆ 9 ಗಂಟೆಗ್ ಜಾರಂದಾಯ ಬಂಟ, ಧೂಮಾವತಿ ಬಂಟ, ಕೊಡಮಣಿತ್ತಾಯ, ಕಾಂತೇರಿ ಧೂಮಾವತಿ, ಪಿಲಿಚಾಮುಂಡಿ ದೈವಲೆಗ್ ನೇಮ ನಡಪರೆ ಉಂಡು.

ಮಾ.27 ಕ್ಕ್ ಕೊಡಿ ಜತ್ತ್‌ದ್, ಕಾಂತುಲಕ್ಕಣ ಗುರಿಕಾರೆರ್‍ನ ಇಲ್ಲಗ್ ಅಂಚನೆ ಖಂಡಿಗೆ ಬೀಡುಗ್ ಭಂಡಾರ ಪೋಯರೆ ಉಂಡು. ಈ ಲೇಸ್‌ಗ್ ಮಾತ ಭಕ್ತೆರ್ ಬತ್ತ್‌ದ್ ದೈವದ ಗಂಧಪ್ರಸಾದನ್ ದೆತೊನೊಡು ಪಂದ್ ಅನುವಂಶೀಕ ಮೊಕ್ತೇಸರೆರ್ ಅಂಚನೆ ಗೌರವಾಧ್ಯಕ್ಷೆರ್ ಆಯಿನ ಕಾಂತುಲಕ್ಕಣ ಗುರಿಕಾರೆರ್ ಯಾನೆ ಪಠೇಲ್ ಯಾದವ ಜಿ. ಬಂಗೇರ ಅಂಚೆನೆ ಆಡಳಿತ ಸಮಿತಿದ, ಮುಂಬೈ ಸಮಿತಿ, ಪೊಂಜೋವುಲೆನ ಸಭಾ ಸಮಿತಿದ ಸರ್ವ ಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಬಪ್ಪನಾಡ್ ಡ್ ಇನಿರ್ದ್ ಜಾತ್ರೆದ ಬಲಿ ಸುರು; ಏ.5 ಕೊಡಿ ಏರ್ರೆ, ಏ.11 ಕ್ಕ್ ಪಗೆಲ್ ತೇರ್, ರಾತ್ರೆ ಶಯನ

ಮುಲ್ಕಿ: ಶ್ರೀ ಕ್ಷೇತ್ರ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಮಾ.21 ರ್ದ್ ಬಪ್ಪನಾಡು ಜಾತ್ರೆಗ್ ಚಾಲನೆ ತಿಕ್ಕರೆ ಉಂಡು.

ಮಾ.21 ಕ್ಕ್ ರಾತ್ರೆರ್ದ್ ಮುಲ್ಕಿ ಸೀಮೆದ ಅರಸು ಸಾವಂತೆರ್ನ ಬಲಿ ಉಚ್ಚಯದೊಟ್ಟುಗು ಈ ವರ್ಷದ ವರ್ಷಾವಧಿ ಮಹೋಚ್ಚಯಗ್ ಚಾಲನೆ ತಿಕ್ಕರೆ ಇತ್ತ್‌ದ್ ದಿನೋಲ ಬೇತೆ ಬೇತೆ ರೀತಿದ ಬಲಿ ಉತ್ಸವ ನಡಪರೆ ಉಂಡು.

ಮಾ.27 ಕ್ಕ್ ಬ್ರಹ್ಮಕಲಶ ವರ್ಧಂತಿ ಉಚ್ಚಯ ನಡಪರೆ ಇತ್ತ್‌ದ್, ಕಾಂಡೆ 8.30 ಕ್ಕ್ ಕಲಶಾಭಿಷೇಕ, 9.30 ಗ್ ಚಂಡಿಕಾಯಾಗ, ಮಧ್ಯಾಹ್ನ ಪ್ರಸನ್ನ ಪೂಜೆ, ರಾತ್ರೆ ಮಹಾರಂಗ ಪೂಜೆ, ಬಲಿ ಉತ್ಸವ ನಡಪರೆ ಉಂಡು.

ಏ.5 ಕ್ಕ್ ಕೊಡಿ ಏರ್ರೆ: ಏ.5 ಕ್ಕ್ ಮಧ್ಯಾಹ್ನ 11.30 ಗಂಟೆಗ್ ಕೊಡಿ ಏರುಂಡು.ಆ ಪೊರ್ತುಗು ಶ್ರೀ ದುರ್ಗಾಪರಮೇಶ್ವರಿ ಬೊಕ್ಕ ಸಸಿಹಿತ್ಲು ಶ್ರೀ ಭಗವತಿ ದೇವಿನ ಭೇಟಿ ಆವರೆ ಉಂಡು. ರಾತ್ರೆ 7 ಗಂಟೆಗ್ ಉಚ್ಚಯ ಬಲಿ ನಡಪರೆ ಉಂಡು. ಏ.7 ಕ್ಕ್ ರಾತ್ರೆ 7 ಗಂಟೆಗ್ ಪೇಂಟೆ ಸವಾರಿ ಉಚ್ಚಯ, ಏ.8 ಗ್ ರಾತ್ರೆ 7 ಗಂಟೆಗ್ ಕೊಪ್ಪಲ ಸವಾರಿ ಉತ್ಸವ, ಏ.9 ಗ್ ರಾತ್ರೆ 7 ಗಂಟೆಗ್ ಬಾಕಿಮಾರ್ ದೀಪೋಚ್ಚಯ, ಏ.10 ಕ್ಕ್ ರಾತ್ರೆ 7 ಗಂಟೆಗ್ ಕೆರೆ ದೀಪೋಚ್ಚಯ ನಡಪರೆ ಉಂಡು.

ಏ.11 ಕ್ಕ್ ಪಗೆಲ್ ತೇರ್ ಉಚ್ಚಯ ಆದ್, ಶಯನೋಚ್ಚಯ ನಡಪರೆ ಉಂಡು. ಏ.12 ಕ್ಕ್ ಮಲ್ಲ ತೇರ್ ಉಚ್ಚಯ ನಡಪರೆ ಉಂಡು. ಏ.16 ಕ್ಕ್ ದೇವಲ್ಯದ ಆಡಳಿತಡ್ ಇಪ್ಪುನ ಕೊಳಚಿಕಂಬಳ ಶ್ರೀ ಜಾರಂದಾಯ ದೈವದ ನೇಮೋಚ್ಚಯ ನಡಪರೆ ಉಂಡು ಪಂದ್ ದೇವಲ್ಯದ ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತೆರ್, ಅನುವಂಶಿಕ ಬೊಕ್ಕ ಆಡಳಿತ ಮೊಕ್ತೇಸರೆರ್ ಎನ್.ಎಸ್. ಮನೋಹರ ಶೆಟ್ಟಿ, ಕಾರ್ಯ ನಿರ್ವಹಣಾಧಿಕಾರಿ ಜಯಮ್ಮ ಪಿ. ಪ್ರಕಟಣೆಡ್ ತೆರಿಪಾದೆರ್.