Sun. Nov 22nd, 2026

ಊರ್ದ ಸುದ್ದಿ Regional News

ಎಂಪೆರ್ ದೇಸಿ ಫುಡ್ಸ್ ಅಂಗಡಿದ ಪುದರ್ ಪಲವೆಡ್ ತುಳು ಬರವು

ಕುಡ್ಲದ ಯಯ್ಯಾಡಿ ಜಂಕ್ಸನ್ ದ ಕೈತಲ್ ಎಂಪೆರ್ ದೇಸಿ ಫುಡ್ಸ್ ಪನ್ಪಿನ ಪೊಸ ಅಂಗಡಿ ಉದಿಪನ ಆತ್ಂಡ್. ಈ ಅಂಗಡಿದ ಪುದರ್ ಪಲವೆಡ್ ತುಳು ಬರವುನ್ ಪಾಡ್ದೆರ್. ಚಾ, ಕಾಪಿ ಸೇರಿನಂಚನೆ ಮಾತ ಬಗೆತ್ತ ತಿಂಡಿಲು ಮುಲ್ಪ ಉಂಡು. ನಿಕ್ಲೇನ ಚೀಪೆದ ದಿನೊಕ್ಲೇಗಾದ್ ಎಂಪರ್ ದೇಸಿ ಫುಡ್ಸ್ ಅಂಗಡಿಗ್ ಭೇಟಿ ಕೊರ್ಲೆ.

ಕುಡ್ಲ ತಾಲೂಕ್ ಚುಟುಕು ಸಾಹಿತ್ಯ ಪರಿಷತ್ ಬೊಕ್ಕ ವಿದ್ಯಾ ಪ್ರಕಾಶನ ಕುಡ್ಲ ಮುಕ್ಲೆನ ಮುತಾಲಿಕೆಡ್ ನಡತಿನ ಕಬಿತೆ ಬುಡುಗಡೆ ಲೇಸ್

ಕುಡ್ಲ ತಾಲೂಕ್ ಚುಟುಕು ಸಾಹಿತ್ಯ ಪರಿಷತ್ ಬೊಕ್ಕ ವಿದ್ಯಾ ಪ್ರಕಾಶನ ಕುಡ್ಲ ಮುಕ್ಲೆನ ಮುತಾಲಿಕೆಡ್ ರಘು ಇಡ್ಕಿದು ಇಂದೆತ್ತ 24ನೇ ಕೃತಿ ನೆತ್ತರು ಬೊಕ್ಕ ಮೌನದುಲಯಿ ಚಿತ್ರ ಕಬಿತೆನ್ ಇನಿ ಕಾಂಡೆ 10.30 ಗ್ ಕುಡ್ಲದ ಡಾನ್ ಬಾಸ್ಕೋ ಹಾಲ್ ಡ್ ಬುಡುಗಡೆ ಆತ್ಂಡ್.

ಕವಿ, ವಿಮರ್ಶಕೆರ್ ಬೊಕ್ಕ ಸಂಶೋಧಕೆರ್ ಆಯಿನ ಡಾ. ರಾಧಾಕೃಷ್ಣ ಎನ್. ಬೆಳ್ಳೂರು ಈ ಕಬಿತೆನ್ ಬುಡುಗಡೆ ಮಲ್ತೆರ್. ಪೆರಿಯ ಕವಿ ಆಯಿನ ಶ್ರೀ ರಾಧಾಕೃಷ್ಣ ಉಳಿಯತ್ತಡ್ಕ, ಫ್ರೋ.ಪಿ.ಕೃಷ್ಣ
ಮೂರ್ತಿ, ಶ್ರೀ. ಕಾ.ವಿ. ಕೃಷ್ಣದಾಸ್ ಮಲ್ಲ ಬಿನ್ನೆರಾದ್ ಲೇಸ್ ಡ್ ಪಾಲ್ ಪಡೆದಿತ್ತೆರ್. ಶ್ರೀಮತಿ ವಿಜಯಲಕ್ಷ್ಮಿ ಕಟೀಲು ಕಾರ್ಯಕ್ರಮದ ನಿರೂಪಣೆ ಮಲ್ತೆರ್.

ರೇಡಿಯೋ ಮಣಿಪಾಲ್ 90.4 Mhz, ಎಂ.ಐ.ಸಿ ಕ್ಯಾಂಪಸ್, ಮಣಿಪಾಲ :-ದೇಸಿ ಸೊಗಡು ಸಮುದಾಯ ಬಾನುಲಿ

ಮಣಿಪಾಲ : ರೇಡಿಯೋ ಮಣಿಪಾಲ್ 90.4 Mhz -ದೇಸಿ ಸೊಗಡು ಸಮುದಾಯ ಬಾನುಲಿಡ್ ಗ್ರಾಮೀಣ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆ ಬೆಂಗ್ಳೂರು, ಕರ್ನಾಟಕ ಸರ್ಕಾರ ಅಟ್ಟನೆ ಮಲ್ಪುನ “ಶುದ್ಧ ಜಲ , ಸ್ವಚ್ಛ ನೆಲ , ಆರೋಗ್ಯವಾದ್ ಉಪ್ಪಡ್ ಜೀವಸಂಕುಲ” ಪನ್ಪಿನ ಬಾನುಲಿ ಸರಣಿ ಲೇಸ್ ಡ್ ನವೆಂಬರ್ ತಿಂಗೊಲ್ ದ ತಾರೀಖ್ 22 ನೇ ಸೋಮಾರದಾನಿ ಬಯ್ಯಗ್ 6 ಗಂಟೆಗ್ ಶಿಕ್ಷಣ ಸಂಸ್ಥೆಡ್ ಪಾಯಿಖಾನೆದ ನಿರ್ವಹಣೆ ಬಗೆಟ್ ಕಾರ್ಯಕ್ರಮ ಪ್ರಸಾರ ಆಯೆರೆ ಉಂಡು.

ಮಣಿಪಾಲ ಕೆ.ಎಂ.ಸಿ ಸಮುದಾಯ ವೈದ್ಯಕೀಯ ವಿಭಾಗದ ವೈದ್ಯಕೀಯ ಸಮಾಜ ಸೇವಕೆರ್ ಆಯಿನ ನೀಲಾವತಿ.ಎ ಪಾಲ್ ಪಡೆಯರೇ ಉಲ್ಲೆರ್. ಈ ಕಾರ್ಯಕ್ರಮ ನವೆಂಬರ್ 23 ನೇ ದಾನಿ ಮಧ್ಯಾಹ್ನ 1 ಗಂಟೆಗ್ ಮರು ಪ್ರಸಾರ ಆಯಾರ ಉಂಡು.

ಸಾಕಾರ : ಒಡಿಪು ಜಿ.ಪಂ

ಉಪ್ಪುಂದದ ಕೊಡಿಪರ್ಬ : ಮನ್ಮಹಾರಥೋತ್ಸವ

ಬೈಂದೂರು: ಪುರಾಣ ಪ್ರಸಿದ್ಧ ಉಪ್ಪುಂದ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನದ ಶ್ರೀ ಮನ್ಮಹಾ ರಥೋತ್ಸವ ನ.20 ಶನಿವಾರ ನಡತುಂಡು .

ಬೈಂದೂರು ಕ್ಷೇತ್ರದ ಶಾಸಕ ಬಿ.ಎಂ.ಸುಕುಮಾರ ಶೆಟ್ಟಿ, ಮಾಜಿ ಶಾಸಕ ಕೆ.ಗೋಪಾಲ ಪೂಜಾರಿ, ದೇವಳ ಪ್ರಭಾರ ಕಾರ್ಯನಿರ್ವಹಣಾಧಿಕಾರಿ ಗಣೇಶ ಗೌಡ, ಆಡಳಿತಾಧಿಕಾರಿ ಮತ್ತು ಬೈಂದೂರು ತಹಶೀಲ್ದಾರ್ ಶೋಭಾಲಕ್ಷ್ಮೀ ಎಚ್.ಎಸ್., ಕ್ಷೇತ್ರದ ತಂತ್ರಿಲು , ಭಟ್ರ್ , ಸಿಬ್ಬಂದಿ ವರ್ಗದಕುಲು , ಪಾಲ್ ಪಡೆದಿತ್ತೆರ್.ಕ್ಷೇತ್ರದ ತಂತ್ರಿಲೆರ್ದ್ ಧಾರ್ಮಿಕ ವಿಧಿವಿಧಾನಲು ನಡತುಂಡು .

ಆಣಿ ದ ಮುಖೇನ ವಿಶ್ವ ದಾಖಲೆ ಬರೆಯಿನ ಬೆದ್ರ ದ ಜವಣ್ಯೆ

ಬೆದ್ರ : ಬೆದ್ರ ದ ಒಂಟಿಕಟ್ಟೆದ ನಿವಾಸಿಯಾಯಿನ ತಿಲಕ್ ಕುಲಾಲ್ ಮೇರ್ ತನ್ನ ದೋಸ್ತಿ ಅಕ್ಷಿತ್ ನೊಟ್ಟುಗು ಸೇರ್ದ್ ಸತತವಾದ್ 5 ಗಂಟೆಡ್ 6,666 ಆಣಿ ಡ್ (0.8 ಇಂಚು) ಪಲಾಯಿಡ್ ಮಹಾಗಣಪತಿನ ಕಲಾಕೃತಿನ್ ರಚನೆ ವಿಶ್ವ ದಾಖಲೆನ್ ಮಲ್ತೆರ್ . ಏಕ ಕಾಲಗ್ 3 ವಿಶ್ವ ದಾಖಲೆನ್ ಮಲ್ದೆರ್ ( Indian Book of Records, Asia Book of Records, World Record of India).

ಪುರಿತ ಮಾತ್ರೆ ಪಟ್ಟುನ ಕಜ್ಜ

ಕುಡ್ಲ : ಜೋಕ್ಲೆನ ಆರೋಗ್ಯದ ನೆಲೆಟ್ಟ್ ಜಂತುಹುಳ ನಿವಾರಣೆಗಾದ್ ನ.23ರ್ದ್ 27 ತಾರೀಖು ಮುಟ ಪೇಂಟೆದ ಮಾತಾ ಸರ್ಕಾರಿ, ಖಾಸಗಿ ಶಾಲೆ, ಕಾಲೇಜು ಬೊಕ್ಕ ಅಂಗನವಾಡಿ ಕೇಂದ್ರಡ್ 1ರ್ದ್ 19 ವರ್ಷದುಲಯಿ ಆಲ್ಬೆಂಡಝೋಲ್ ಮಾತ್ರೆಲೆನ್ ಕೊರೊಂದು ಉಲ್ಲ ಪಂದ್ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣಾಧಿಕಾರಿ ಡಾ.ಕಿಶೋರ್ ಕುಮಾರ್ ತೆರಿಪಾದೆರ್ .

29 ತಾರೀಖ್ ರ್ದ್ ಧರ್ಮಸ್ಥಳ ಮಂಜುನಾಥನ ದೇವಲ್ಯೊಡು ಲಕ್ಷದೀಪೋಚ್ಚಯ

ಧರ್ಮಸ್ಥಳ : ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಕಾರ್ತಿಕ ಮಾಸಡ್ ನಡಪುನ ಲಕ್ಷ ದೀಪೋಚ್ಚಯ ಲೇಸ್ ಡಿ.4 ಮುಟ ನಡಪರೇ ಉಂಡು . ಡಿ.3ಕ್ಕ್ ಲಕ್ಷ ದೀಪೋಚ್ಚಯ ನಡಪರೇ ಉಂಡು . ಡಿ.2ಕ್ಕ್ ಬೈಯ್ಯಗ್ 5 ಗಂಟೆಗ್ ಅಮೃತವರ್ಷಿಣಿ ಚಾವಡಿದ್ ಸರ್ವಧರ್ಮ ಸಮ್ಮೇಳನದ 89ನೇ ಅಧಿ ವೇಶನನ್ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್ ಉದಿಪನ ಮಲ್ಪರೆ ಉಲ್ಲೆರ್.

ರಾಮಕುಂಜಡ್ ತುಡರ್ ತೋಜಾವುನಿ, ಪುಲಮರ್ದ್ ಕರಜನದ ಉದಿಪನ ಬೊಕ್ಕ ತುಳು ಬೂಕುಲೆನ ಕೈ ಪಗಪು ಲೇಸ್

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಕುಡ್ಲ ಮುಕ್ಲೆನ ನಿರೆಲ್ಡ್ ನೇತ್ರಾವತಿ ತುಳು ಕೂಟ ರಾಮಕುಂಜ ಮುಕ್ಲೆನ ಸೇರಿಗೆಡ್ ಶ್ರೀ ರಾಮಕುಂಜೇಶ್ವರ ಆಂಗ್ಲ ಮಾಧ್ಯಮ ಶಾಲೆ ರಾಮಕುಂಜ, ಮುಕ್ಲೆನ ಚಾವಡಿಡ್ ತುಡರ್ ತೋಜಾವುನಿ, ಪುಲಮರ್ದ್ ಕರಜನದ ಉದಿಪನ ಬೊಕ್ಕ ತುಳು ಬೂಕುಲೆನ ಕೈ ಪಗಪು ಪನ್ಪಿನ ಲೇಸ್ ಭಾರೀ ಗೌಜಿಡ್ ನಡತ್ಂಡ್.

ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರ್ ಆಯಿನ ದಯಾನಂದ್ ಕತ್ತಲ್ ಸಾರ್ ಈ ಲೇಸ್ ನ್ ಉದಿಪನ ಮಲ್ತೆರ್. ಆಯಿಬೊಕ್ಕ ಪಾತೆರ್ದಿನ ಆರ್, ತುಳು ಭಾಷೆ, ಸಂಸ್ಕೃತಿದ ಉಳಿವಿಗಾದ್ ಬೆನೊಂದಿ ಪ್ಪುನಕ್ಲೆಗ್ ದುಂಬುದ ದಿನಟ್ಟ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ವತಿಡ್ದ್ ಬಾಲ, ಯುವ, ಸಂಘಟನಾ ಅಂಚನೆ ಮಾಧ್ಯಮ ವಿಭಾಗಡ್ ಪ್ರಶಸ್ತಿನ್ ಕೊರ್ದ್ ಮಾನಾದಿಗೆ ಮಲ್ಪರೆ ಉಂಡು ಪಂದ್ ಪಂಡೆರ್. ಈ ಲೇಸ್ ಡ್ ತುಳು ಲಿಪಿ ಕಲ್ಪಾದಿನ ನಿಶ್ಚಿತ್ ರಾಮಕುಂಜ ಮೇರೆಗ್ ಶ್ರೀ ರಾಮಕುಂಜೇಶ್ವರ ಆಂಗ್ಲ ಮಾಧ್ಯಮ ಫ್ರೌಡ ಶಾಲೆಡ್ ಮಾನಾದಿಗೆ ಮಲ್ತೆರ್. ಅಂಚನೆ ಲೇಸ್ ಡ್ ಗೋ ಪೂಜೆಲ ನಡತ್ಂಡ್. ಈ ಪೊರ್ತುಡ್ ಮಸ್ತ್ ಮಲ್ಲ ಮಲ್ಲ ಬಿನ್ನೆರ್ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಕೋಟಾ ಶ್ರೀನಿವಾಸ ಪೂಜಾರಿ ಮೇರೆಡ್ದ್ ನಾಮಪತ್ರ ಸಂದಾಯ

ಕುಡ್ಲ, ನ.20:- ಕರ್ನಾಟಕ ವಿಧಾನ ಪರಿಷತ್ ಗ್ ದಕ್ಷಿಣ ಕನ್ನಡ ಸ್ಥಳೀಯ ಸಂಸ್ಥೆದ ಮತಕ್ಷೇತ್ರದ ಓಟುಗ್
ಪೇಂಟೆದ ಜಿಲ್ಲಾಧಿಕಾರಿ ಕಚೇರಿದ ಚಾವಡಿಡ್ ನ.20 ಗ್ ಶನಿವಾರ ಭಾರತೀಯ ಜನತಾ ಪಕ್ಷದ ಅಭ್ಯರ್ಥಿಯಾಯಿನ ಕೋಟಾ ಶ್ರೀನಿವಾಸ ಪೂಜಾರ್ಲು ಚುನಾವಣಾಧಿಕಾರಿಲು ಆಯಿನ ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ., ಮೇರೆಗ್ ನಾಮಪತ್ರನ್ ಸಂದಾಯೆರ್.

ಕನ್ನಡ ಬೊಕ್ಕ ಸಂಸ್ಕೃತಿ ಅಂಚನೆ ಅರಣ್ಯ ಸಚಿವೆರ್ ಆಯಿನ ಸುನೀಲ್ ಕುಮಾರ್, ಮೀನುಗಾರಿಕೆ, ಬಂದರು ಅಂಚನೆ ಒಳನಾಡು ಜಲ ಸಾರಿಗೆ ಇಲಾಖೆದ ಸಚಿವೆರ್ ಆಯಿನ ಎಸ್. ಅಂಗಾರ ಅಂಚನೆ ಮುಖಂಡೆರ್ ಈ ಪೊರ್ತುಡ್ ಪಾಲ್ ಪಡೆದಿತ್ತೆರ್.

ರಾಷ್ಟ್ರೀಯ ಮಟ್ಟದ ವೈಟ್‌ ಲಿಫ್ಟಿಂಗ್‌ ಡ್ ಕಿನ್ನಿಗೋಳಿದ ಪೊಣ್ಣಗ್ ಬಂಗಾರ್ ದ ಪದಕ

ಕುಡ್ಲ, ನ.20: ಗೋವಾಡ್ ಕೋಡೆ ನಡತಿನ ರಾಷ್ಟ್ರೀಯ ಮಟ್ಟದ ಬೆಂಚ್‌ ಪ್ರೆಸ್‌ ವೈಟ್‌ ಲಿಫ್ಟಿಂಗ್‌ ಡ್ ಕಿನ್ನಿಗೋಳಿ ವೀರ ಮಾರುತಿ ವ್ಯಾಯಾಮ ಶಾಲೆದ ದಿಶಾ ಕುಕ್ಯಾನ್‌ ಬಂಗಾರ್ ದ ಪದಕನ್ ಪಡೆತ್ತೆರ್.

You Missed