Sun. Nov 22nd, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಕಲಾವಿದನ ಕೊಲೆ: ಆರೋಪಿ ಅರೆಸ್ಟ್

ಕುಡ್ಲ : ಕಲಾವಿದೆ ಜಯಾನಂದ ಆಚಾರ್ಯ ನ್ (65) ಮೆರೆನ್ ಕಾವೂರುದ ಹರಿಪದವುದಲ್ಪ ಕೊಲೆ ಮಲ್ದಿನ ಆರೋಪಿ ಕುಂಜತ್‌ಬೈಲ್ ದೇವಿನಗರದ ರಾಜೇಶ್ ಪೂಜಾರಿ‌ನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.


ಜಯಾನಂದೆರೆನ ಪುಣ ನಾಲಿಗ್ ಬಲ್ಲ್ ಬಿಗಿತ್ ದಿನ ಸ್ಥಿತಿಟ್ಟ್ ಸನಿವಾರ ಪತ್ತೆ ಆತ್ಂಡ್.
ಈ ಬಗೆಟ್ ಜಯಾನಂದೆರೆನ ಸಹೋದರೆ ಅಚ್ಚುತ ಆಚಾರ್ಯ ಕಾವೂರು ಠಾಣೆಗ್ ಕೇಸ್ ದಾಖಲ್ ಮಲ್ದೆರ್. ನೆತ್ತ ಬಗೆಟ್ ತನಿಖೆ ಸುರು ಮಲ್ತಿನ ಕಾವೂರು ಪೊಲೀಸೆರ್ ರಾಜೇಶ್ ಪೂಜಾರಿ‌ನ್ ಅಂಗಾರೆ ಬಂಧಿಸಾದ್ ಕೋರ್ಟ್ ಗ್ ಹಾಜರ್ ಮಲ್ದೆರ್.

ಶಾರದಾ ಉಚ್ಚಯದ ಫ್ಲೆಕ್ಸ್ ಪರ್ತಿನ ಕೇಸ್ ಡ್ ಮೂಜಿ ಜನ ಉಲಯಿ

ಕುಡ್ಲ : ವಾಮಂಜೂರು ಜಂಕ್ಷನ್ ಡ್ ಶಾರದಾ ಉಚ್ಚಯದ ಬಗೆಟ್ ವಾಮಂಜೂರು ಫ್ರೆಂಡ್ಸ್ ಸಾರ್ವಜನಿಕ ಜಾಗೆಡ್ ಪಾಡ್ದಿನ ಫ್ಲೆಕ್ಸ್ ಲೆನ್ ಪರಿತ್ ಪಾಡಿನ ಕೇಸ್ ದ ಮಿತ್ತ್ ಮೂಜಿ ಜನಬೊಕ್ಕ ನೆಕ್ ಗಲಸಿನ ಸ್ವಿಫ್ಟ್ ಕಾರ್ ನ್ ಅ.11ಕ್ ಕುಡ್ಲ ಗ್ರಾಮಾಂತರ ಪೊಲೀಸೆರ್ ವಶಕ್ಕ್ ದೆತೊಂದೆರ್.

ಈ ಕೇಸ್ ಗ್ ಸಂಬಂಧ ಪಟ್ ದ್ ಆರೋಪಿಲಾಯಿನ ಸುಮಿತ್ ಹೆಗ್ಡೆ, ಯತೀಶ್ ಪೂಜಾರಿ, ಪ್ರವೀಣ್ ಪೂಜಾರಿ ಇತ್ತೆ ಪೋಲಿಸ್ ವಶಟ್ ಉಲ್ಲೆರ್.
ಈ ಘಟನೆ ಅ.8 ಗು ನಡುರಾತ್ರೆಡ್ ಆದಿತ್ತ್ಂಡ್. ಈ ಬಗೆಟ್ ಕುಡ್ಲ ಗ್ರಾಮಾಂತರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆದಿತ್ತ್ಂಡ್.

ಕಡಂದಲೆ- ಪಾಲಡ್ಕಡ್ ವಿದ್ಯುತ್ ಉಪಕೇಂದ್ರ ಮಲ್ಪರೆ ಅವಕಾಶ ಕೊರ್ರೆ ಬಲ್ಲಿ ಪಂದ್ ಗ್ರಾಮಸಭೆಟ್ಟ್ ನಿರ್ಣಯ

ಕಡಂದಲೆ: ಕಡಂದಲೆ- ಪಾಲಡ್ಕಡ್ ವಿದ್ಯುತ್ ಉಪಕೇಂದ್ರ ಮಲ್ಪರೆ ಅವಕಾಶ ಕೊರ್ರೆ ಬಲ್ಲಿ ಪಂದ್ ಅಂಗಾರೆ (ಅ.11)ಪಾಲಡ್ಕ ಪೂಪಾಡಿಕಲ್ಲ್ ಬ್ರಹ್ಮಶ್ರೀ ನಾರಾಯಣ ಗುರು ಸಭಾಂಗಣದ ಚಾವಡಿಡ್ ನಡತಿನ ಪಾಲಡ್ಕ ಗ್ರಾಮ ಪಂಚಾಯಿತಿ ವಿಶೇಷ ಸಭೆಟ್ಟ್ ನಿರ್ಣಯ ದೆತೊಂದೆರ್.


ಈ ಗ್ರಾಮ ಸಭೆಟ್ಟ್ ಗ್ರಾಮಸ್ಥೆರ್ ಇಂಧನ‌ ಇಲಾಖೆದ ಮಿತ್ತ್ ಗ್ರಾಮಸ್ಥೆರ್ ಬೆಚ್ಚಾದಿತ್ತೆರ್. ಬೊಕ್ಕ ಸಭೆಕ್ ಬತ್ತಿನ ಶಾಸಕೆರ್ ಉಮಾನಾಥ ಕೋಟ್ಯಾನ್ ಗ್ರಾಮಸ್ಥೆರ್ ನ್ ಸಮಾಧಾನ ಮಲ್ತ್ ದ್ , ಊರುದಕ್ಲೆನ ಗಮನೊಗು ಕನವಂದಿನ ಇಚಾರೊಡು ಕೆಪಿಟಿಸಿಎಲ್ ಅಧಿಕಾರಿಲೆಗ್ ಪ್ರಶ್ನೆ ಮಲ್ತ್ ದ್ , ಈ ಯೋಜನೆಗ್ ಗ್ರಾಮಸ್ಥೆರ್ನ ವಿರೋಧ ಇತ್ತಿನ ಬಗೆಟ್ಟ್ ಇಂಧನ ಸಚಿವೆರೆಡ ಪಾತೆರುವೆ ಪಂದ್ ಪಂಡೆರ್. ಗ್ರಾಮಸಭೆಟ್ ಸುಮಾರ್ 500 ಕ್ ಜಾಸ್ತಿ ಜನ ಗ್ರಾಮಸ್ಥೆರ್ ಸೇರ್ದಿತ್ತೆರ್.
ವೇದಿಕೆಡ್ ಮೂಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಬೊಕ್ಕ ಪಂಚಾಯತ್ ಅಧ್ಯಕ್ಷೆರ್ ನ ಮುತಾಲಿಕೆಡ್ ಅಭಿವೃದ್ಧಿ ಅಧಿಕಾರಿ, ಕೆಪಿಟಿಸಿಎಲ್ ಅಧಿಕಾರಿಲೆಗ್ ಯೋಜನೆದ ಬಗೆಟ್ ಗ್ರಾಮಸ್ಥೆರೆಗ್ ತಿಳುವಳಿಕೆ ಕೊರ್ಯೆರೆ ಪಂಡೆರ್.
ನೆತ್ತ ನಡುಟು ಯೋಜನೆಗ್ ನಮ್ಮ ಮಾತೆರ್ನಲ ವಿರೋಧ ಉಂಡು ಪನ್ಪಿನ ಮನವಿನ್ ಸಭೆಗ್ ಓದುದು ತೆರಿಪಾಯಿ ಬೊಕ್ಕ ಟಿಎನ್ ಕೆಂಬಾರೆ ಮೇರ್ ಬಿನ್ನಾಪುನ್ ಶಾಸಕೆರೆಗ್ ಕೊರ್ಯೆರ್.
ಅಯಿರ್ದ್ ಬೊಕ್ಕ ಕಡಂದಲೆ ಪರಾರಿ ಸಂತೋಷ್ ಶೆಟ್ರ್ ಪಾತೆರ್ದ್, ನೆಟ್ಟ್ ರಾಜಕೀಯ ಇಜ್ಜಿ. ಯಾನ್ ಒರಿ ಯೋಜನೆದ ಸಂತ್ರಸ್ತೆ ಪಂದ್ ಸ್ಪಷ್ಟವಾದ್ ಪಂಡಿನ ಬೊಕ್ಕ ಇತ್ತಿನ
ಗ್ರಾಮಸ್ಥೆರ್ ಯೋಜನೆದ ವಿರುದ್ಧವಾದ್ ಉಲ್ಲೆರ್ ಪನ್ಪುನ ಮನವರಿಕೆ ಆಯಿನ ಶಾಸಕೆರ್
ಇಂಧನ ಸಚಿವೆರೆಡ ಈ ಬಗೆಟ್ ಪಾತೆರ್ಪಾವೆ ಬೊಕ್ಕ ಯಾನ್ ತಾರತಮ್ಯ ಮಲ್ಪುನ ಮನುಸೆ ಅತ್ತ್. ಜನಪರವಾದ್ ಕೆಲಸನ್ ಮಲ್ಪುನಾಯೇ, ನಿಕುಲೆನೊಟ್ಟಿಗೆ ಏಪಲ ಉಲ್ಲೆ ಪನ್ಪಿನ ಬರವಸೆನ್ ಕೊರ್ಯೆರ್.
ಈ ಸಭೆಟ್ ಕೆಪಿಟಿಸಿಎಲ್ ದ ಯೋಜನೆದ 100% ವಿರೋಧ ಉಂಡು ಪಂದ್ ಗ್ರಾಮಸ್ಥೆರ್ ಒಂಜೇ ಸೊರೊಟ್ಟು ಪಂದ್ ಸರ್ವಾನುಮತಟ್ಟ್ ಮಾತೆರ್ಲ ಲಕ್ಕ್ ದ್ ಉಂತುದು ನಿರ್ಣಯನ್ ಎದ್ಕೊನಿಯೆರ್.
ಈ ಸಭೆತ ನಿರ್ಣಯನ್ ಅಭಿವೃದ್ಧಿ ಅಧಿಕಾರಿ ಅಲ್ಪ ಇತ್ತಿನ ಸಾರ್ವಜನಿಕೆರೆಗ್ ಓದುದು ಪನ್ನಗ ಮಾತೆರ್ಲ ಕುಷಿಟ್ ತಾಟಿ ಬೊಟ್ಟಿಯೆರ್.

ಬಂಗಾರ್ , ಬೊಲ್ಲಿಗ್ ಇನಿ ಕಮ್ಮಿ ಆಂಡ್ ಬಿಲೆ

ದೇಶೀಯ ಮಾರ್ಕೆಟ್ ಡ್ ಬುಧಾರ ಕಾಂಡೆ ಬಂಗಾರ್, ಬೊಲ್ಲಿದ ಬಿಲೆ ಕಮ್ಮಿಯಾತ್ಂಡ್. 22 ಕ್ಯಾರೆಟ್‌ದ ಗ್ರಾಂ 10 ಬಂಗಾರ್‌ದ ಬಿಲೆ 700 ರೂ. ಕಮ್ಮಿಯಾದ್ 46,900 ರೂ. ಆತುಂಡು. 24 ಕ್ಯಾ. ಬಂಗಾರ್‌ದ ಬಿಲೆ 770 ರೂ. ಕಮ್ಮಿಯಾದ್ 51,160 ರೂ. ದಾಖಲ್ ಆತ್ಂಡ್.

1 ಕೆಜಿ ಬೊಲ್ಲಿದ ಬಿಲೆ 600 ರೂ. ಕಮ್ಮಿಯಾದ್ 58,900 ರೂ. ಆತ್ಂಡ್. ಬೆಂಗ್ಲೂರ್‌ಡ್ 22 ಕ್ಯಾರೆಟ್‌ದ ಗ್ರಾಂ 10 ಬಂಗಾರ್‌ದ ಬಿಲೆ 700 ರೂ. ಕಮ್ಮಿಯಾದ್ 46,000 ರೂ. ಆತ್ಂಡ್.

ಯಕ್ಷಗಾನದ ಏಸ ಪಾಡ್ದ್ ಕುಷಿ ಪಡೆಯೊಂಡೆರ್ ಸಚಿವೆರ್ ಡಾ.ಸುಧಾಕರ್

ತುಳುನಾಡ್‌ದ ಆಣ್ ಕಲೆ ಯಕ್ಷಗಾನದ ಏಸ ಪಾಡ್ದ್ ಸಚಿವೆರ್ ಡಾ. ಸುಧಾಕರ್ ಕುಷಿ ಪಡೆಯೊಂದೆರ್. ಉತ್ತರ ಕನ್ನಡ ಜಿಲ್ಲೆದ ಕಾರವಾರ ತಾಲೂಕ್‌ದ ಭಟ್ಕಳಗ್ ಭೇಟಿ ಮಲ್ತಿನ ಪೊರ್ತುಡು, ಏಸ ಪಾಡ್ದ್ ಫೋಟೋಗ್ ಪೋಸ್ ಕೊರ್ತೆರ್.

ಶಾಸಕೆರ್ ಸುನೀಲ್ ನಾಯ್ಕ್ ಅರೆನ ಇಲ್ಲಡ್ ಯಕ್ಷಗಾನ ಅಟ್ಟನೆ ಮಲ್ತ್‌ದಿತ್ತೆರ್. ಉಂದೆಟ್ಟ್ ಪಾಲ್ ಪಡೆಯಿನ ಸಚಿವೆರ್ ಆಟ ಮುಗಿ ಬೊಕ್ಕ ಏಸ ಪಾಡ್ದ್ ಕುಷಿ ಪಡೆಯೊನ್ಯೆರ್.

ಥಾಣೆ ಬಂಟ್ಸ್ ಎಸೋಸಿಯೇಶನ್‌ಗ್ ಪೊಸ ಪದಾಧಿಕಾರಿಲೆನ ಪದಗ್ರಹಣ ಲೇಸ್

ಪೊಸ ಗುರ್ಕಾರೆಯಾದ್ ಜಬದಾರಿ ದೆತೊಂಡೆರ್ ಸುನೀಲ್ ಜೆ. ಶೆಟ್ಟಿ

ಥಾಣೆ: ಏಳ್ ಜನ ಒಂಜೇ ಮನಸ್ಸ್ ದ ಜನಕ್ಲೆರ್ದ್ ಸುರು ಆದ್ ಇನಿ ಮಲ್ಲ ಪುದರ್ ಪಡೆದಿನ ಥಾಣೆ ಬಂಟ್ಸ್ ಎಸೋಸಿಯೇಶನ್ ಭಾರೀ ಎಡ್ಡೆ ರೀತಿಡ್ ಬೇಲೆ ಮಲ್ತೊಂದುಂಡು. ಈ ಪ್ರತಿಷ್ಠಿತ ಸಂಸ್ಥೆನ್ ದುಂಬು ಕೊನಪಿನ ಯೋಗ ಯನ್ನ ಪಾಲ್ ಗ್ ಒದಗ್ ದ್ ಬೈದ್ಂಡ್. ನಿಜವಾದ್‌ಲ ಪೊಸ ಕಾರ್ಯಕಾರಿ ಸಮಿತಿದ ಎದುರು ಎಡ್ಡೆ ಯೋಜನೆಲು ಉಂಡು. ಅಂಚನೆ ಸಂಘದ ಮಾತ ಸದಸ್ಯೆರ್ ಎಡ್ಡೆ ರೀತಿಡ್ ಬೆನ್ಪೆರ್ ಪಂದ್ ಥಾಣೆ ಬಂಟ್ಸ್ ಎಸೋಸಿಯೇಷನ್‌ದ ಪೊಸ ಗುರ್ಕಾರೆಯಾದ್ ಅಧಿಕಾರ ಸ್ವೀಕಾರ ಮಲ್ತಿನ ಸುನೀಲ್ ಜೆ. ಶೆಟ್ಟಿ ಪಂಡೆರ್.
ಆರ್ ಅಕ್ಟೋಬರ್ 7ಕ್ಕ್ ಸುಕ್ರಾರ ಬಯ್ಯಗ್ ಥಾಣೆ ಪಶ್ಚಿಮ, ಘೋಡ್ ಬಂದರ್ ರೋಡ್‌ಡ್ ಇಪ್ಪುನ ಹೊಟೇಲ್ ವಿಹಾಂಗ್ ಇನ್‌ದ ಚಾವಡಿಡ್ ನಡತಿನ ಥಾಣೆ ಬಂಟ್ಸ್ ಎಸೋಸಿಯೇಶನ್‌ದ 2022-24ನೇ ಸಾಲ್‌ದ ಪೊಸ ಪದಾಧಿಕಾರಿಲೆನ ಪದಗ್ರಹಣ ಲೇಸ್‌ಡ್ ಪಾತೆರಿಯೆರ್.

 

2022-24 ನೇ ಸಾಲ್‌ದ ಪೊಸ ಅಧ್ಯಕ್ಷೆರಾದ್ ಸುನೀಲ್ ಜೆ.ಶೆಟ್ಟಿ, ಉಪಾಧ್ಯಕ್ಷೆರ್ ಆಶೋಕ್ ಎಂ.ಶೆಟ್ಟಿ, ಗೌರವ ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ್ ಎಸ್ ಶೆಟ್ಟಿ, ಗೌರವ ಕೋಶಾಧಿಕಾರಿ ಜಗದೀಶ್ ಶೆಟ್ಟಿ, ಜೊತೆ ಕಾರ್ಯದರ್ಶಿ ಸುರೇಶ್ ಶೆಟ್ಟಿ, ಜೊತೆ ಕೋಶಾಧಿಕಾರಿ ಪುಷ್ಪರಾಜ್ ಎಲ್ ಶೆಟ್ಟಿ ಆಯ್ಕೆಯಾತೆರ್.

ಪೊಂಜೊವುಲೆನ ವಿಭಾಗಡ್ ಕಾರ್ಯಾಧ್ಯಕ್ಷೆರ್ ತಾರಾ ಪಿ.ಶೆಟ್ಟಿ, ಉಪ ಕಾರ್ಯಾಧ್ಯಕ್ಷೆರ್ ಮೋಹಿನಿ ಆರ್. ಶೆಟ್ಟಿ, ಗೌರವ ಕಾಯದರ್ಶಿ ಭಾರತಿ ಸಿ.ಶೆಟ್ಟಿ, ಗೌರವ ಕೋಶಾಧಿಕಾರಿ ವಿನುತಾ ಪ.ಶೆಟ್ಟಿ, ಜೊತೆ ಕಾರ್ಯದರ್ಶಿ ಜ್ಯೋತಿ ಎನ್. ಶೆಟ್ಟಿ, ಜೊತೆ ಕೋಶಾಧಿಕಾರಿ ಶಶಿಪ್ರಭಾ ಶೆಟ್ಟಿ ಆಯ್ಕೆ ಆಯೆರ್.

ಯುವ ವಿಭಾಗಡ್ ಕಾರ್ಯಾಧ್ಯಕ್ಷೆರ್ ಸುಶಾಂತ್ ಶೆಟ್ಟಿ, ಉಪ ಕಾರ್ಯಾಧ್ಯಕ್ಷೆರ್ ರಿನೀತ್ ಶೆಟ್ಟಿ, ಗೌರವ ಕಾರ್ಯದರ್ಶಿ ಅಶ್ವಿನಿ ಶೆಟ್ಟಿ, ಗೌರವ ಕೋಶಾಧಿಕಾರಿ ಸ್ವರೂಪ್ ಶೆಟ್ಟಿ, ಜೊತೆ ಕಾರ್ಯದರ್ಶಿ ನಿಖಿಲ್ ಶೆಟ್ಟಿ, ಜೊತೆ ಕೋಶಾಧಿಕಾರಿಯಾದ್ ಪೂಜಾ ಶೆಟ್ಟಿ ಆಯ್ಕೆಯಾತೆರ್.

ಮಲೇಷ್ಯಾ ಸಂಸತ್‌ಗ್ ಪ್ರಧಾನಿ ಇಸ್ಮಾಯಿಲ್ ಸಬ್ರಿ ಯಾಕೂಬ್ ರಾಜೀನಾಮೆ

ಕೌಲಾಲಂಪುರ: ಮಲೇಷ್ಯಾ ಪ್ರಧಾನಿ ಇಸ್ಮಾಯಿಲ್ ಸಬ್ರಿ ಯಾಕೂಬ್ ರಾಜೀನಾಮೆ ಕೊರ್ತೆರ್. ಅಂಚಾದ್ ಅಲ್ಪ ಕುಡ ವೋಟು ಎದುರಿಸಾವುನ ಸ್ಥಿತಿ ಬೈದ್ಂಡ್.

ಹಾಲಿ ಸಂಸತ್‌ದ ಪೊರ್ತು ಮುಗಿಯರೆ ನನ 9 ತಿಂಗೊಲು ಇತ್ತ್ಂಡ್. ಪ್ರಧಾನಿ ಇಸ್ಮಾಯಿಲ್ ಮುತಾಲಿಕೆಡ್ ಯುನೈಟೆಡ್ ಮಲಯಾಸ್ ನ್ಯಾಷನಲ್ ಆರ್ಗನೈಸೇಷನ್ ನನ ಬರ್ಪಿನ ವೋಟುಡು ಗೆಂದುನ ವಿಶ್ವಾಸ ಉಂಡು.

ಏತೇ ವಿರೋಧ ಬತ್ತ್ಂಡಲ ಬಲೆತ್ತ್ ಪಾಡ್ದಿನ ಜಾಗೆದ ಕಟ್ವಾಣ ದರ್ಪುನ ಬೇಲೆ ಉಂತಾವುಜ : ಆರ್ ಅಶೋಕ್

ಬೆಂಗ್ಲೂರು : ಏತೇ ವಿರೋಧ ಬತ್ತ್oಡಲ ಬೆಂಗ್ಲೂರ್ ಡ್ ಬಲೆತ್ತ್ ಪಾಡ್ದಿನ (ಒತ್ತುವರಿ) ಜಾಗೆದ ಕಟ್ವಾಣಲೆನ್ ದರ್ಪುನ ಬೇಲೆನ್ ಉಂತಾವುಜ ಪಂದ್ ಕಂದಾಯ ಸಚಿವೆರ್ ಆರ್. ಅಶೋಕ್ ಪಂಡೆರ್.

ವಿಧಾನಸೌದಡ್ ಸುದ್ದಿಗಾರೆರ್ನೊಟ್ಟುಗು ಪಾತೆರಿನ ಆರ್, ಬೊಲ್ಲ ಬತ್ತಿನ ಜಾಗೆಲೆಡ್ ಸುರುತ್ತ ಆದ್ಯತೆ ಕೊರ್ದು ಒತ್ತುವರಿ ಕಟ್ವಾಣಲೆನ್ ದರ್ಪುನ ಬೇಲೆ ನಡತೊಂದು ಉಂಡು. ಮಾತೆರ್ಲ ಸಕಾಯ ಕೊರೊಡು. ಏತೇ ವಿರೋಧ ಬತ್ತ್oಡಲ ದರ್ಪುನ ಬೇಲೆನ್ ಉಂತಾವುನ ಪಾತೆರನೇ ಇಜ್ಜಿ ಪಂದ್ ಸಚಿವೆರ್ ಪಂಡೆರ್.

ಎಲ್ಲೆರ್ದ್ ಓಲಾ, ಉಬರ್ ಆಟೋರಿಕ್ಷಾ ಬಂದ್..!

ಬೆಂಗ್ಲೂರು : ರಾಜ್ಯಡ್ ಎಲ್ಲೆರ್ದ್ ಓಲಾ, ಉಬರ್ ಆಟೋಲು ಮಾರ್ಗಗ್ ಜಪ್ಪುಲೆಕ್ಕ ಇಜ್ಜಿ. ಒಂಜಿ ವೇಳೆ ಆದೇಶ ತತ್ತ್ ದ್ ಮಾರ್ಗಗ್ ಜತ್ತ್oಡ 5 ಸಾರ ರೂ.ಮುಟ್ಟ ದಂಡ ಪಾಡುವ ಪಂದ್ ಸಾರಿಗೆ ಆಯುಕ್ತೆರ್ ಟಿಎಚ್ ಎಂ ಕುಮಾರ್ ಪಂಡೆರ್.

ಓಲಾ, ಉಬರ್ ಆಟೊದಕುಲು ಅಗ್ರಿಗೇಟರ್ ಲೈಸನ್ಸ್ ಪಡೆಯೊಂಜೆರ್. ಇಂಚಾದ್ ಎಲ್ಲೆರ್ದ್ ಆಟೋದ ಸೇವೆ ಬಂದ್. ಓಲಾ, ಉಬರ್ ಡ್ ಆಟೋಲು ಬುಕ್ ಆಂಡ ಕ್ರಮ ದೆತೊನ್ಯರೆ ಉಂಡು ಪಂದ್ ಎಚ್ಚೆರ್ಗೆ ಕೊರ್ತೆರ್.

ಒರಾನೆ ನೆಲಕ್ಕ್ ಜತ್ತ್ಂಡ್ ಸಿಎಂ ಬೊಮ್ಮಾಯಿ, ಯಡಿಯೂರಪ್ಪೆರ್ ಇತ್ತಿನ ಹೆಲಿಕಾಫ್ಟರ್

ಬಳ್ಳಾರಿ : ಸಿಎಂ ಬೊಮ್ಮಾಯಿ ಬೊಕ್ಕ ಮಾಜಿ ಸಿಎಂ ಯಡಿಯೂರಪ್ಪೆರ್ ಪೋವೊಂದಿತ್ತಿನ ಹೆಲಿಕಾಫ್ಟರ್ ನ್ ಗಾಳಿ ಬರ್ಸದ ಕಾರಣ ಒರಾನೆ ನೆಲಕ್ಕ್ ಜಪುಡಾವೊಡಾಯಿನ ಘಟನೆ ಅಂಗಾರೆ ನಡತ್ಂಡ್.
ಸಂಡೂರು ತಾಲೂಕ್ ದ ತೋರಣಗಲ್ ಕೈತಲ್ ಜಿಂದಾಲ್ ಏರ್ ಪೋರ್ಟ್ ಡ್ ಹೆಲಿಕಾಫ್ಟರ್ ಲ್ಯಾoಡ್ ಆತ್ಂಡ್.

ಸಿಎಂ ರಾಯಚೂರುರ್ದ್ ಹೊಸಪೇಟೆಗ್ ಪೋವೊಂದಿತ್ತೆರ್. ಹೆಲಿಕಾಫ್ಟರ್ ಬಳ್ಳಾರಿದ ಹಂಪಿ ಕನ್ನಡ ವಿಶ್ವವಿದ್ಯಾಲಯಡ್ ಲ್ಯಾoಡ್ ಆವೊಡಿತ್ತ್oಡ್. ಆಂಡ ಹವಾಮಾನ ವೈಪರೀತ್ಯ ಆತಿನೆಡ್ದಾವರ ಭೂಸ್ಪರ್ಶ ಮಲ್ಪೊಡಾಂಡ್. ಬೊಮ್ಮಾಯಿ, ಬಿಎಸ್ ವೈ ರಾತ್ರೆ ಕಮಲಾಪುರಡ್ ಉಂತರೆ ಉಲ್ಲೆರ್.

You Missed