Sat. Nov 21st, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಜಯಕರ್ನಾಟಕ ಜನಪರ ವೇದಿಕೆದ ಕೇಂದ್ರ ಕಚೇರಿಡ್ ಒಡಿಪು ಜಿಲ್ಲೆದ ಅಧ್ಯಕ್ಷೆರೆನ ಆಯ್ಕೆ

ಜಯಕರ್ನಾಟಕ ಜನಪರ ವೇದಿಕೆ ಬೊಕ್ಕ ಐಕೇರ್ ಬ್ರಿಗೇಡ್ ಸಂಸ್ಥೆದ ಯುವ ಸಂಸ್ಥಾಪಕ ಅಧ್ಯಕ್ಷೆರ್ ಬಿ.ಗುಣರಂಜನ್ ಶೆಟ್ರ್ ನ ಮುತಾಲಿಕೆಡ್ ಅ.12 ಬುಧಾರದಾನಿ ಜಯಕರ್ನಾಟಕ ಜನಪರ ವೇದಿಕೆದ ಕೇಂದ್ರ ಕಚೇರಿಡ್, ಜನನಿ ದಿವಾಕರ್ ಶೆಟ್ಟಿ ಮೆರೆನ್ ಒಡಿಪು ಜಿಲ್ಲೆದ ಅಧ್ಯಕ್ಷೆರಾದ್ ಆಯ್ಕೆ ಮಲ್ತೆರ್.

ಈ ಪೊರ್ತುಡು ರಾಜ್ಯ ಮಹಾ ಪ್ರಧಾನ ಸಂಚಾಲಕೆರ್ ಶೆ.ಭೋ.ರಾಧಾಕೃಷ್ಣ, ರಾಜ್ಯ ಸಂಘಟನಾ ಕಾರ್ಯದರ್ಶಿ ಬಾಲಚಂದರ್ ಇತ್ತೆರ್. ನೂತನವಾದ್ ಒಡಿಪು ಜಿಲ್ಲಾಧ್ಯಕ್ಷೆರಾದ್ ಆಯ್ಕೆ ಆಯಿನ ಜನನಿ ದಿವಾಕರ ಶೆಟ್ಟಿ ಮೆರೆಗ್ ಜಯಕರ್ನಾಟಕ ಜನಪರ ವೇದಿಕೆದ ಯುವಸಂಸ್ಥಾಪಕ‌ ಅಧ್ಯಕ್ಷೆರ್ ಆದೇಶ ಪತ್ರನ್ ಕೊರ್ದು ಸೊಲ್ಮೆ ಸಂದಾಯೆರ್.

ಮಧ್ಯಪ್ರದೇಶ: ಪಟಾಕಿ ಫ್ಯಾಕ್ಟರಿಡ್ ಪಟಾಕಿ ಪುಡಾದ್ 4 ಜನ ತೀರ್ ಪೋಯೆರ್

ಮಧ್ಯಪ್ರದೇಶದ ಮೊರೆನಾ ಜಿಲ್ಲೆದ ಬನ್‌ಮೋರ್ ಪೇಂಟೆಡ್ ಪಟಾಕಿ ಸಂಗ್ರಹ ಇತ್ತಿನ ಗೋಡೌನ್‌ಡ್ ಪಟಾಕಿ ಪುಡಾದ್ 4 ಜನ ತೀರ್ ಪೋಯೆರ್.

ತುಡರ್ ಪರ್ಬರ್ದ್ ದುಂಬೇ ಗೋಡೌನ್‌ಡ್ ಪಟಾಕಿ ದಿಂಜಾದಿತ್ತೆರ್. ಪಟಾಕಿ ಪುಡಾದ್ 7 ಜನಕ್ಕ್ ಮಸ್ತ್ ಪೆಟ್ಟಾತ್ಂಡ್. ಪೊಲೀಸೆರ್ ಬೊಕ್ಕ ಆಡಳಿತ ಅಧಿಕಾರಿಲು ಜಾಗೆಗ್ ಬತ್ತ್‌ದ್ ಪರಿಶೀಲನೆ ಮಲ್ತೊಂದುಲ್ಲೆರ್.

ರಾಧಾ ಸುರಭಿ ಗೋ ಮಂದಿರ ರಾಷ್ಟ್ರೀಯ ಗೋಸೇವಾ ಸಂಸ್ಥಾನಮ್ ಟ್ರಸ್ಟ್ (ರಿ.)ಬೊಕ್ಕ ಗೋ ಸೇವಾ ಗತಿವಿಧಿದ ಮುತಾಲಿಕೆಡ್ ಗೋ ಪೂಜೆ, ಗೋ ರಥ ಯಾತ್ರೆ

ರಾಧಾ ಸುರಭಿ ಗೋ ಮಂದಿರ ರಾಷ್ಟ್ರೀಯ ಗೋಸೇವಾ ಸಂಸ್ಥಾನಮ್ ಟ್ರಸ್ಟ್ (ರಿ.)ಬೊಕ್ಕ ಗೋ ಸೇವಾ ಗತಿವಿಧಿದ ಮುತಾಲಿಕೆಡ್ ಗೋ ಉಚ್ಚಯದ ಸಂದೇಶ ಬೊಕ್ಕ ಉದ್ದೇಶಲೆನ್ ತೋಪಾವುನ ಗೋ ರಥ ಯಾತ್ರೆ ಅ.19 ಬುಧಾರ ದಾನಿ ನಡತ್ಂಡ್.


ಬೊಕ್ಕ ಗೋ ಪೂಜೆ ರಾತ್ರೆ 8 ಗಂಟೆಗ್ ಕುಳಾಯಿ ಶ್ರೀ ವಿಷ್ಣುಮೂರ್ತಿ ದೇವಲ್ಯಡ್ ಆಂಡ್.
ಅ.20 ದಾನಿ ಬೊಲ್ಪುಗು 7ಗಂಟೆದ ಗೋ‌ ಪೊಜೆ ಆಯಿ ಬೊಕ್ಕ ರಥಯಾತ್ರೆ ಸುರತ್ಕಲ್ ಗ್ ಪೊಂಡು.

ಚಿಕ್ಕಮಗಳೂರು: ಶಾಲೆಡ್ ಕುಕ್ಕರ್ ಪುಡಾದ್ 4ನೇ ಕ್ಲಾಸ್‌ದ ಕಲ್ಪಾರ್ಥಿನ ಸ್ಥಿತಿ ಗಂಭೀರ

ಶಾಲೆಡ್ ಕುಕ್ಕರ್ ಪುಡಾದ್ 4 ನೇ ಕ್ಲಾಸ್‌ದ ಕಲ್ಪಾರ್ಥಿನ ಸ್ಥಿತಿ ಗಂಭೀರವಾದ್ ಪೆಟ್ಟ್ ಆತಿನ ಘಟನೆ ಚಿಕ್ಕಮಗಳೂರ್‌ದ ಮಲ್ಲಂದೂರು ಪೊಲೀಸ್ ಠಾಣಾ ವ್ಯಾಪ್ತಿದ ಮಾಕೋಡು ಗ್ರಾಮಡ್ ನಡತ್ಂಡ್.

ಶಾಲೆಡ್ ಅಟಿಲ್‌ದ ಬೇಲೆ ಮಲ್ಪುನಾರ್ ಕುಕ್ಕರ್‌ಡ್ ಅಟಿಲ್‌ನ್ ದೀದಿತ್ತೆರ್. ಈ ಪೊರ್ತುಡು ಕುಕ್ಕರ್‌ಡ್ ಇತ್ತಿನ ಅಟಿಲ್‌ನ್ ಪಾಡ್ದ್ ವನಸ್ ಮಲ್ಪರೆ ಶಾಲೆದ ಟೀಚರ್ ಒರಿ ಪಂದಿತ್ತೆರ್. ಅಟಿಲ್ ಕೋಣೆಗ್ ಪೋತಿನ ಪೊಣ್ಣ್ ಒಲೆರ್ದ್ ತಿರ್ತ್ ದೀತಿನ ಕುಕ್ಕರ್‌ದ ಮುಚ್ಚಲನ್ ದೆಪ್ಪುನಗ ಈ ಘಟನೆ ನಡತ್ಂಡ್. ಈ ಪೊರ್ತುಡು ಪೊಣ್ಣನ ಮೊನೆಗ್ ಮಸ್ತ್ ಪೆಟ್ಟಾತ್ಂಡ್.

ಗೋವನಿತಾಶ್ರಯ ಟ್ರಸ್ಟ್ (ರಿ.)ದ ಗೋವಿಗಾಗಿ ಮೇವು ಲೇಸ್ ದ ಉದಿಪನ ಕೂಟ

ಗೋವನಿತಾಶ್ರಯ ಟ್ರಸ್ಟ್ (ರಿ.) ಕುಡ್ಲ (ವಿಶ್ವಹಿಂದೂ ಪರಿಷತ್ ಸಹಯೋಗದ ಸೇವಾ ಸಂಸ್ಥೆ) ಗೋ ಹೊರೆಕಾಣಿಕೆ ಸಮಿತಿದ ಗೋವಿಗಾಗಿ ಮೇವು, ಹೊರೆಕಾಣಿಕೆ ಅರ್ಪಣೆ
ಕಾರ್ಯಾಲಯ ಬೊಕ್ಕ ಹೊರ ಕಾಣಿಕೆ ಸಂಗ್ರಹ ಕೇಂದ್ರ ದ ಉದಿಪನ ಕೂಟ ಬುಧಾರ ಬಯ್ಯಗ್ 5 ಗಂಟೆಗ್ ಕುಡ್ಲ ಶರವು ದೇವಲ್ಯಡ್ ನಡತ್ಂಡ್.

ದೇವೆರೆ ಪಾದ ಸೇರಿನ ಬಿಜೆಪಿದ ಹಿರಿಯ ಮುಖಂಡೆರ್ ಶೀನ ಶೆಟ್ರ್

ಭಾರತೀಯ ಜನತಾ ಪಾರ್ಟಿದ ಹಿರಿಯ ಮುಖಂಡೆರ್, ಧಾರ್ಮಿಕ ಮುಂದಾಳು ಅಮ್ಮು಼ಂಜೆದ ಗಣ್ಯ ವ್ಯಕ್ತಿ ಶೀನ ಶೆಟ್ರ್ (93) ಇನಿ ದೇವೆರೆ ಪಾದ ಸೇರ್ಯೆರ್.


ಮೇರೆನ ಆತ್ಮಗು ಆ ದೇವೆರ್ ಚಿರಶಾಂತಿ ಕೊರಡ್ ಪಂದ್ ದೇವೆರೆನ್ ಸುಗಿತೊನುಗ.

ಮುಜರಾಯಿ ಇಲಾಖೆದ ದೇವಲ್ಯಡ್ ತುಡರ್ ಪರ್ಬಗ್ ಗೋಪೂಜೆ ಕಡ್ಡಾಯ

ಬೆಂಗ್ಲೂರ್: ರಾಜ್ಯದ ಮುಜರಾಯಿ ಇಲಾಖೆಗ್ ಸಂಬಂಧ ಪಟ್ಟಿನ ಮಾತ ದೇವಲ್ಯಡ್ ತುಡರ್ ಪರ್ಬದ ಅಕೇರಿದ ದಿನ ಬಲಿ ಪಾಡ್ಯಮಿದಾನಿ (ಅ. 26) ಬಯ್ಯಗ್ 5.30 ರ್ದ್ 6.30 ಮುಟ್ಟದ ಗೋಧೂಳಿ ಲಗ್ನಡ್ ಗೋಪೂಜೆ ಮಲ್ಪೊಡು ಪಂದ್ ರಾಜ್ಯ ಸರ್ಕಾರ ನಿರ್ದೇಶನ ಕೊರ್ತುಂಡು.


ಸನಾತನ ಹಿಂದೂ ಧರ್ಮದ ಆಚರಣೆನ್ ಜನ ಮರಪೆರೆ ಬಲ್ಲಿ, ನನದ ಪೀಳಿಗೆಗ್ಲಾ ಉಂದು ಗೊತ್ತು ಇಪ್ಪೊಡು ಪಂದ್ ಈ ನಿರ್ದೇಶನನ್ ಕೊರ್ತುಂಡು ಪಂದ್ ಅರ್ಚಕೆರ್ ಪಂಡೆರ್.
ಪೆತ್ತಲೆನ್ ಮೀಪಾದ್ ಜನಕುಲು ದೇವಲ್ಯಗ್ ಲೆತೊಂದು ಬತ್ತ್ ದ್ ಕುಂಕುಮ, ಅರಿಶಿಣ, ಪೂ ಪರ್ಂದ್, ಅರಿ, ಬೆಲ್ಲ, ಪಾಡ್ದ್ ಬೊಕ್ಕ ಬೇತೆ ಚೀಪೆ ತಿಂಡಿಲೆನ್ ಕೊರೊಡು. ಅಯಿರ್ದ್ ಬೊಕ್ಕ ದೀಪ ಬೊಕ್ಕ ಧೂಪರ್ದ್ ಪೆತ್ತಲೆಗ್ ಪೂಜೆ ಮಲ್ಪೊಡು ಪಂದ್ ನಿರ್ದೇಶನಡ್ ಸೂಚನೆ ಕೊರ್ತುಂಡು.

ಬಂಟ್ವಾಳ: ಹರೀಶ್ ಪೂಂಜೆರೆನ ಮಿತ್ತ್ ತಲ್ವಾರ್ ಬೀಜಿನ ಕೇಸ್; ಸಿಐಡಿ ತನಿಖೆ ಸುರು

ಬಂಟ್ವಾಳ: ಬೊಲ್ತೇರ್ ದ ಶಾಸಕೆರ್ ಹರೀಶ್ ಪೂಂಜೆರೆನ ಮಿತ್ತ್ ತಲ್ವಾರ್ ಬೀಜಿನ ಕೇಸ್ ದ ಬಗೆಟ್ ಬಂಟ್ವಾಳಡ್ ಸಿ.ಐ.ಡಿ. ಪೋಲೀಸೆರ್ ತನಿಖೆ ಸುರು ಮಲ್ದೆರ್.


ರಾಜ್ಯದ ಸಿ.ಐ.ಡಿ.ಇನ್ಸ್ ಪೆಕ್ಟರ್ ಶಿವರಾಜ್ ಮುತಾಲಿಕೆಡ್ ಒರಿ ಎಸ್.ಐ. ಬೊಕ್ಕ ರಡ್ಡ್ ಸಿಬ್ಬಂದಿಲೆನ ತಂಡ ಅ.19ದಾನಿ ಬೊಲ್ಪುಗ್ ಗು ಬಂಟ್ವಾಳಗ್ ಬೈದೆರ್. ಈ ಕೇಸ್ ಡ್ ಆರೋಪಿ ಅಡ್ಯಾರು ನಿವಾಸಿ ರಿಯಾಜ್ ನ್ ಬಂಧನ ಮಲ್ದಿತ್ತೆರ್. ‌ಅ.18 ಅಂಗಾರೆ ಈ ಕೇಸ್ ದ ಪೂರ ಫೈಲ್ ಲೆನ್ ಬಂಟ್ವಾಳ ಗ್ರಾಮಾಂತರ ಎಸ್.ಐ.ಹರೀಶ್ ‌ಬೆಂಗ್ಲೂರ್ ‌ಕಚೇರಿಗ್ ಎತ್ತಾದೆರ್. ಇತ್ತೆ ಸಿ.ಐ.ಡಿ.ಪೋಲೀಸೆರ್ ತನಿಖೆ ಸುರು ಮಲ್ತ್ ಬೇತೆ ಬೇತೆ ರೀತಿಡ್ ತನಿಖೆ ಮಲ್ತ್ ದ್ ಆರೋಪಿನ್ ಸಿ.ಐ.ಡಿ. ಕೋರ್ಟುಗು ಹಾಜರ್ ಆಪುಲೆಕ್ಕ ನೋಟೀಸ್ ‌ಕೊರ್ಪುನ ಸಾಧ್ಯತೆ ಉಂಡು.

ಗುಜರಾತ್‌ದ ಕೆವಾಡಿಡ್ ಮಿಷನ್ ಲೈಫ್‌ಗ್ ಚಾಲನೆ ಕೊರಿಯರೆ ಉಲ್ಲೆರ್ ಪ್ರಧಾನಿ

ಅಹಮದಾಬಾದ್: ಗುಜರಾತ್ ವಿಧಾನಸಭೆ ಚುನಾವಣೆಗ್ ನನ ಕೆಲ ತಿಂಗೊಲ್ ಮಾತ್ರ ಬಾಕಿ ಇಪ್ಪುನಿ. ಈ ಪೊರ್ತುಡು ಪ್ರಧಾನಿ ನರೇಂದ್ರ ಮೋದಿ ಮಸ್ತ್ ರಾಜ್ಯಲೆಗ್ ಭೇಟಿ ಕೊರ್ದು ಬೇತೆ ಬೇತೆ ರೀತಿದ ಯೋಜನೆಲೆನ್ ಸುರು ಮಲ್ತೊಂದು ಉಲ್ಲೆರ್. ಕೆಲವು ಯೋಜನೆಲೆಗ್ ಚಾಲನೆನ್‌ಲ ಕೊರ್ತೆರ್.

ಗುಜರಾತ್ ಪ್ರವಾಸದ ಕಡೆತ್ತ ದಿನ ಆಯಿನ ಇನಿ ಕೆವಾಡಿಡ್ ಮಿಷನ್ ಲೈಫ್‌ಗ್ ಚಾಲನೆ ಕೊರಿಯರೆ ಇತ್ತ್‌ದ್, ತಾಪಿ ಜಿಲ್ಲೆದ ವ್ಯಾರ ಪೇಂಟೆಡ್ 1970 ಕೋಟಿ ರೂ.ದ ಬೇತೆ ಬೇತೆ ಅಭಿವೃದ್ದಿದ ಯೋಜನೆಲೆಗ್ ಶಂಕುಸ್ಥಾಪನೆ ಮಲ್ಪರೆ ಉಲ್ಲೆರ್.

27 ವರ್ಷರ್ದ್ ಬೊಕ್ಕ ವಿಶೇಷ ಸೂರ್ಯ ಗ್ರಾಣ; ಕೆಲವು ರಾಶಿದಕುಲೆಗ್ ಎಚ್ಚೆರ್ಗೆ

27 ವರ್ಷರ್ದ್ ಬೊಕ್ಕ ತುಡರ್ ಪರ್ಬದಾನಿ(ಅ.25) ಸೂರ್ಯಗ್ರಾಣ ಆಯೆರೆ ಉಂಡು. 1995 ಟ್ಟ್ ತುಡರ್ ಪರ್ಬದಾನಿಯೇ ಸೂರ್ಯಗ್ರಾಣ ಆದಿತ್ತ್ಂಡ್. ಕಾರ್ತಿಕ ತಿಂಗೊಲ್ದ ಅಮಾಸೆ ದಿನ ಪರ್ಬದ ಒಟ್ಟುಗು ಬರ್ಪಿನ ಈ ಸೂರ್ಯಗ್ರಾಣ ಭಾರೀ ವಿಶಿಷ್ಟವಾಯಿನವ್ ಪಂದ್ ವಿದ್ವಾಂಸೆರ್ ಪಂತೆರ್.

ಮೇಷ, ವೃಷಭ, ಮಿಥುನ, ಕರ್ಕಾಟಕ ಬೊಕ್ಕ ಸಿಂಹ ರಾಶಿಡ್ ಪುಟ್ಟಿನಕ್ಲೆನ ಮಿತ್ತ್ ಅಡ್ಡ ಪರಿಣಾಮಲು ಆಪಿನ ಸಾಧ್ಯತೆ ಉಂಡು. ಈ ಗ್ರಾಣಡ್ ಎಡ್ಡೆಲ ಉಂಡು ಹಾಳ್‌ಲ ಉಂಡು ಪಂದ್ ತೆರಿದಿನಕುಲು ಪನೊಂದುಲ್ಲೆರ್.

You Missed