Uncategorized

ಕೋವಿಡ್ ಲಸಿಕೆ – ರಾಜ್ಯಗ್ ಮಾದರಿಯಾಯಿನ ಕೊಡವೂರು ವಾರ್ಡ್

ಒಡಿಪು : ಜಿಲ್ಲೆದ ಕೊಡವೂರು ವಾರ್ಡ್ ಡ್ ದಿವ್ಯಾಂಗೆರೆಗ್ ಅಂಗವಿಕಲೆರೆಗ್,ದುರ್ಬಲೆರೆಗ್ ನಡಪರೆ ಸಾಧ್ಯ ಇಜ್ಜಂದಿನಕ್ಲೆಗ್ ಇಲ್ಲ್ ಇಲ್ಲಗ್ ಪೋದು ಲಸಿಕೆ ಕೊರ್ಪಿನ ಅಭಿಯಾನನ್ ಕೊಡವೂರು ವಾರ್ಡ್ ದ ನಗರಸಭಾ ಸದಸ್ಯ ವಿಜಯ್ ಕೊಡವೂರು ಅಲ್ಪದ ಮಾತಾ ಸಂಘಸಂಸ್ಥೆದ ಸಾಕರಡ್ ನಡಪಾಯಿನ ಕಾರ್ಯ ರಾಜ್ಯಗ್ ಮಾದರಿಯಾತುಂಡು .

ಅಂಚನೇ.ಮಾತಾ ವಿಷಯಡ್ಲ ಕೊಡವೂರು ವಾರ್ಡ್ ಡ್ ಮಾದರಿ ಬೇಲೆ ಆವೊಂದು ಉಂಡು . ಕೋವಿಡ್ ಪೊರ್ತುಡು ಮಾತಾ ಇಲ್ಲ ಇಲ್ಲಗ್ ಪೋದು ಅರಿ ಕೊರ್ದು ಅಂಚನೇ ಲಾಕ್ ಡೌನ್ ಪೊರ್ತುಡು ಇಲ್ಲರ್ದ್ ಪಿದಾಯಿ ಬರಿಯರೆ ಸಾಧ್ಯ ಆವಂದಿನಕ್ಲೆಗ್ ತರಕಾರಿಲೆನ್ ನಗರಸಭಾ ಸದಸ್ಯೆರೆ ಗಾಡಿಡ್ ಕೊಂದು ಕೊರೊಂದು ಇತ್ತೆರ್.

ಆಸರೆ ಚಾರಿಟೇಬಲ್ ಟ್ರಸ್ಟ್ 91ನೇ ಇಲ್ಲಗ್ ವಿದ್ಯುತ್ ಸಂಪರ್ಕ

ಒಡಿಪು : ಒಡಿಪುದ ಕಸ್ತೂರ್ಬಾ ನಗರ ವಾರ್ಡ್ ದ ಚಿಟ್ಟಾಡಿದ ದಲಿತ ಸಮುದಾಯದ ನಾರಾಯಣ ಇಲ್ಲಗ್ ಉಚಿತ ವಿದ್ಯುತ್ ಸಂಪರ್ಕ ಕೊರೊಂದು ಉಲ್ಲೆರ್ .

ಈ ಇಲ್ಲಗ್ ಕರಿನ 20 ವರ್ಷರ್ದ್ ವಿದ್ಯುತ್ ಸಂಪರ್ಕನೆ ಇಜ್ಜಿ . ಈ ಇಲ್ಲದ ಸಂಪೂರ್ಣ ವಿದ್ಯುತ್ ಸಂಪರ್ಕದ ಪಣವುನು ಒಡಿಪು ಕಲ್ಸಂಕ ಪಿ. ವಿಶ್ವನಾಥ ಶೆಣೈ ಬೊಕ್ಕ ಅನನ್ಯ ಶೆಣೈ ದಂಪತಿಲೆನ ಪುತ್ರಿ ಕೋಡೆ ತನ್ನ 5 ನೆ ವರ್ಷದ ಪುಟ್ಟು ಪರ್ಬ ಆಚರನೆ ಮಲ್ತಿನ ಜೇಷ್ಠ ಶೆಣೈ ಕೊರಿನೆರ್ದಾವರ ಆರೇ ಉದಿಪನ ಮಲ್ತೆರ್.

ಈ ಪೊರ್ತುಡು ಮೆಸ್ಕಾಂದ ಸಹಾಯಕ ಕಾರ್ಯನಿರ್ವಾಹಕ ಇಂಜಿನಿಯರ್ ಗಣರಾಜ ಭಟ್, ನಗರಸಭಾ ಸದಸ್ಯರಾಯಿನ ಶ್ರೀ ರಾಜು, ಪಾಲ್ ಪಡೆದಿತ್ತೆರ್.

ಪುತ್ತೂರು ಸರಕಾರಿ ಆಸ್ಪತ್ರೆದ ಹೆರಿಗೆ ತಜ್ಞರಾಯಿನ ಡಾ. ಸಂದೀಪ್ ವಿಧಿವಶ

ಪುತ್ತೂರು: ಸರಕಾರಿ ಆಸ್ಪತ್ರೆದ ಖ್ಯಾತ ಹೆರಿಗೆ ತಜ್ಞರಾಯಿನ ಶಿರ್ವ ಮಂಚಿಕಲ್ಲು ನಿವಾಸಿ ಡಾ.ಸಂದೀಪ್ ಮೇರ್ ಹುಷಾರ್ ದಾಂತೆ ತೀರ್ ಪೋಯೆರ್.

ಮೇರ್ ಸೌತ್ ಕೆನರಾಡೇ ಜಾಸ್ತಿ ಪೆದ್ದಯಿನ ಖ್ಯಾತ ಹೆರಿಗೆ ತಜ್ಞರಾತೆರ್ . ಸಿಜೇರಿಯನ್ ಎಕ್ಸರ್ಟ್ ಕೂಡ ಆದ್ ಇತ್ತೆರ್ . ಪುತ್ತೂರು ಸರಕಾರಿ ಆಸ್ಪತ್ರೆರ್ದ್ ಕುಡ್ಲದ ಲೇಡಿಗೋಷನ್ ಆಸ್ಪತ್ರೆಗ್ ವರ್ಗಾವಣೆ ಆಯಿಬೊಕ್ಕ ಮೇರ್ ಕುಡ ಪುತ್ತೂರುಗು ವರ್ಗಾವಣೆ ಆದ್ ಪುತ್ತೂರು ಸರಕಾರಿ ಆಸ್ಪತ್ರೆಡೇ ಬೇಲೆ ಮಲ್ದೆರ್ .

ಮೆರ್ನ ಅವಳಿ ಸಹೋದರೆ ಆಯಿನ ಮಹಾವೀರ ಆಸ್ಪತ್ರೆದ ಖ್ಯಾತ ಎಲುಬು ತಜ್ಞ ಪ್ರದೀಪ್ ಬೋರ್ಕರ್. ಮೃತೆರ್ ಬೊಡೆದಿ ಮಗೆ ಬೊಕ್ಕ ಇಷ್ಟ ಮಿತ್ರೆರೆರ್ದ್ ದೂರ ಆತೆರ್.

ಬಂಗಾರ್ದ ಅಂಗಡಿಡ್ ಕಂಡಿನ ಪ್ರಕರಣ : ಮೂಜಿ ಜನನ್ ಪತ್ತಿನ ಪೊಲೀಸೆರ್

ಕಾಸ್ರೋಡು : ಉಪ್ಪಳದ ಬಂಗಾರ್ದ ಅಂಗಡಿರ್ದ್ ಕಂಡಿನ ಪ್ರಕಾರಣಗ್ ಮೂಜಿ ಜನ ಆರೋಪಿಲೆನ್ ಡಿವೈಎಸ್ಪಿ ಬಾಲಕೃಷ್ಣನ್ ನಾಯರ್ ನೇತೃತ್ವದ ಪೊಲೀಸ್ ಕೂಟ ಪತ್ತ್ದೆರ್ .

ಉಪ್ಪಳದ ಎಸ್.ಎಸ್ ಗೋಲ್ಡ್ ಡ್ ನಡತಿನ ಕಳವು ಪ್ರಕರಣಗ್ ಸಂಬಂಧಿ ಆರೋಪಿಲೆನ್ ಬಂಧನ ಮಲ್ದೆರ್ .

ಕಲ್ವೇರೆನ್ ತಮಿಳುನಾಡು ನಾಮಕ್ಕಲ್ ದ ವೇಲಾಯುಧನ್ (46), ಕೊಯಮುತ್ತೂರುದ ಸೈದಾಲಿ (49) ಬೊಕ್ಕ ರಾಜನ್ (51) ಪಂದ್ ಗುರ್ತಿಸಾದೆರ್ .

ಮಾಣಿ ಗ್ರಾಮಡ್ ಜಲ್ ಜೀವನ್ ಮಿಷನ್ ಯೋಜನೆಗ್ ಚಾಲನೆ

ಬಂಟ್ವಾಳ : ಪ್ರಧಾನಿ ನರೇಂದ್ರ ಮೋದಿನ ಕೇಂದ್ರ ಸರಕಾರದ ಮಹತ್ವಾಕಾಂಕ್ಷಿ ಯೋಜನೆ ಜಲ್ ಜೀವನ್ ಮಿಷನ್ ಯೋಜನೆದಡಿ ಮಾಣಿ ಗ್ರಾಮಡ್ ಕೇಂದ್ರ ಬೊಕ್ಕ ರಾಜ್ಯ ಸರಕಾರದ ರೂ 69 ಲಕ್ಷ ಅನುದಾನಡ್ ನಡಪರೆ ಉಪ್ಪುನ ಸೂರಿಕುಮೇರು ಹಳಿರ 50,000 ಲೀ ಸಾಮರ್ಥ್ಯದ ಟ್ಯಾಂಕ್,ಪಳ್ಳತ್ತಿಲ್ಲ 50,000 ಲೀ ಸಾಮರ್ಥ್ಯದ ಟ್ಯಾಂಕ್,ಭರಣಿಕೆರೆ 50,000 ಲೀ ಸಾಮರ್ಥ್ಯದ ಟ್ಯಾಂಕ್,ಮಾಣಿ ಕಾಪಿಕಾಡು ಒಂಜಿ ಲಕ್ಷ ಲೀಟರ್ ಸಾಮರ್ಥ್ಯದ ಟ್ಯಾಂಕ್ ಕಾಮಗಾರಿಗ್ ಬಂಟ್ವಾಳದ ಶಾಸಕೆರಾಯಿನ ರಾಜೇಶ್ ನಾಯ್ ಉಳಿಪ್ಪಾಡಿ ಮೇರ್ ಗುದ್ದಲಿ ಪೂಜೆ ಮಲ್ಪುನ ಮುಖೇನ ಚಾಲನೆ ಕೊರಿಯೆರ್ .

ಈ ಪೊರ್ತುಡು ಪಂಚಾಯತ್ ಸದಸ್ಯ ನಾರಾಯಣ ಶೆಟ್ಟಿ,ಮಾಜಿ ಜಿ.ಪಂ ಸದಸ್ಯೆ ಮಂಜುಳಾ ಮಾವೆ, ಬಿಜೆಪಿ ಕ್ಷೇತ್ರ ಕಾರ್ಯಂತೆರಾಯಿನ ಗಣೇಶ್ ರೈನೇರಳಕಟ್ಟೆ ಸೊಸೈಟಿ ಗುರ್ಕಾರ್ಲಾಯಿನ ಪುಷ್ಪರಾಜ್ ಚೌಟ, ಹರೀಶ್ ಕುಲಾಲ್,ಪಂಚಾಯತ್ ಸದಸ್ಯೆ ಮಿತ್ರಾಕ್ಷಿ,ಪ್ರಮಿತ್ ಶೆಟ್ಟಿ,ಜನಾರ್ಧನ ಪೂಜಾರಿ,ನಾರಾಯಣ ಭಟ್,ರಾಜೇಶ್ ಕುಲಾಲ್,ಉಮೇಶ್‌ಎಸ್.ಪಿ,ಪ್ರಜ್ವಲ್ ಯತೀಶ್ ಶೆಟ್ಟಿ,ನವೀನ್,ನೋಣಯ್ಯ ನಾಯ್ಕ ದಿವಾಕರ ಕುಲಾಲ್,ಪಂಚಾಯತ್ ಅಭಿವೃದ್ಧಿ ಅಧಿಕಾರಿ,ಇಂಜಿನಿಯರ್ ಪಾಲ್ ಪಡೆದಿತ್ತೆರ್.

ಒಡಿಪುಡು ಕ್ಯಾಂಪಸ್ ಫ್ರಂಟ್ ಸದಸ್ಯತ್ವ ಅಭಿಯಾನ

ಒಡಿಪು : ಕ್ಯಾಂಪಸ್ ಫ್ರಂಟ್ ಆಫ್ ಇಂಡಿಯಾದ ಸದಸ್ಯತ್ವ ಅಭಿಯಾನ ರಾಜ್ಯೋಡು ” ಒಗ್ಗಟ್ಟಿನಲ್ಲಿ ಬಲವರ್ಧನೆ , ಭಿನ್ನ ಧ್ವನಿಯ ರಕ್ಷಣೆ” ಪನ್ಪಿನ ಘೋಷಾ ವಾಕ್ಯದಡಿ ಸುರು ಆತುಂಡು , ನೆತ್ತ ಭಾಗವಾದ್ ಒಡಿಪು ಜಿಲ್ಲಾ ಸದಸ್ಯತ್ವ ಅಭಿಯಾನಗ್ ಒಡಿಪುಡು ಚಾಲನೆ ಕೊರಿಯೆರ್ .

ಉಡುಪಿ ಜಿಲ್ಲಾ ಗುರ್ಕಾರ್ಲಾಯಿನ ಅಸೀಲ್ ಅಕ್ರಮ್ ಸದಸ್ಯತ್ವ ಕೂಪನ್ ಜೋಕ್ಲೆಗ್ ಕೊರ್ಪಿನ ಮುಖೇನ ಚಾಲನೆ ಕೊರಿಯೆರ್ .

ಈ ಪೊರ್ತುಡು ಜಿಲ್ಲಾ ಒತ್ತು ಗುರ್ಕಾರ್ಲಾಯಿನ ಸಾಧಿಕ್ ಕಾರ್ಕಳ, ಜಿಲ್ಲಾ ಸಮಿತಿ ಸದಸ್ಯೆರಾಯಿನ ನಝಾತ್, ಅಫ್ತಾಬ್, ಅರ್ಫಾಝ್ ಬೊಕ್ಕ ಬೇತೆ ಕಾರ್ಯಂತೆರ್ ಪಾಲ್ ಪಡೆದಿತ್ತೆರ್.

ಯಾನ್ ಕಾಬೂಲ್ ಕಾನ್ವೆಂಟ್ಡ್ ಹುಷಾರ್ ಆದ್ ಉಲ್ಲೆ :ಭ |ತೆರೆಸಾ ಕ್ರಾಸ್ತಾ

ಕುಡ್ಲ : ಅಫ್ಘಾನಿಸ್ಥಾನಡ್ ತಿಕ್ಕ್ ದ್ ಬೂರ್ದಿನ ಕುಡ್ಲದ ಸಿಸ್ಟರ್ ಆಫ್‌ ಚಾರಿಟಿದ ಭಗಿನಿ ಕಾಸ್ರೋಡು ದ ಬೇಳ ಮೂಲದ ತೆರೆಸಾ ಕ್ರಾಸ್ತಾ ಮೇರ್ ಸುರಕ್ಷಿತವಾದ್ ಉಲ್ಲೆರ್ ಪಂದ್ ಸಿಸ್ಟರ್ ಆಫ್‌ ಚಾರಿಟಿ ಸಂಸ್ಥೆ ಬೊಕ್ಕ ಆರ್ನ ಕುಟುಂಬದ ಮೂಲ ತೆರಿಪಾದುಂಡು.

ಸ್ವತಃ ತೆರೆಸಾ ಕ್ರಾಸ್ತಾ ಮೇರ್ ಧ್ವನಿ ಸಂದೇಶವೊಂಜೇನ್ ಕಡಪಾದ್ ತಾನ್ ಕಾಬೂಲ್‌ ಕಾನ್ವೆಂಟ್‌ಡ್ ಸುರಕ್ಷಿತವಾದುಲ್ಲೆ ಪಂದ್ ಪಂಡೆರ್.