ಕುಡ್ಲ – ಸುರತ್ಕಲ್: ತುಳುನಾಡ ಮಣ್ಣುಡ್ ದೈವಾರಾಧನೆ ಬೊಕ್ಕ ನಾಗರಾಧನೆಗ್ ಬಾರಿ ಮಹತ್ವ ಕೊರ್ಪೆರ್. ಅಂಚೆನೆ ಧರ್ಮ ನೇಮ ಪನ್ಪಿನವು ಈ ಮಣ್ಣುದ ವಿಶೇಷವಾಯಿನ ದೈವಾರಾಧನೆದ ಕೆಲಸ. ಧರ್ಮ ನೇಮೊನು ಮಾತೆರೆಗ್ಲಾ ಮಲ್ಪರೆ ಅಪುಜಿ, ಅವೆಕ್ ಪುರ ಯೋಗ, ಭಾಗ್ಯ ಕೂಡ್ದ್ ಬರೊಡ್ ಪಂಡ್ದು ಪನ್ಪೆರು. ಧರ್ಮ ನೇಮ ಮಲ್ತಿನ ಕುಟುಂಬದಕುಲು ಪಂಡ ಸಮಾಜೊಡು ಅಕ್ಲೆನ ಮಿತ್ತ್ ಬಾರಿ ಮಾನಾದಿಗೆ ಕೊರ್ಪೆರ್.
ಧರ್ಮ ನೇಮ ಮಲ್ಪುನಕುಲು ಮಸ್ತ್ ನೇಮ ನಿಷ್ಠೆ, ಧರ್ಮ ನಿಷ್ಠೆಡ್ ಉಪ್ಪೊಡು, ಅಂಚೆನೇ ಧರ್ಮ ನೇಮ ಶುರು ಅಯಿನೆಡ್ದ್ ಮುಗಿಯುನ ಮುಟ್ಟ ಧರ್ಮ ನೇಮ ತೂವರೆ ಬತ್ತಿನ ಮಾತಾ ಬಂಧು ಮಿತ್ರೆರೆಗ್, ಭಕ್ತಾದಿಲೆಗ್, ದೈವಾರಾಧನೆದ ಚಾಕಿರಿದಕಲೆಗ್, ಬೇತೆ ಬೇತೆ ರೀತಿಡ್ ದೈವದ ಚಾಕಿರಿ ಮಲ್ಪುನಕಲೆಗ್ ಧರ್ಮ ಚಾವಡಿದ ಮಣ್ಣುಡ್ ಚೂರ್ಲ ಕುಂದು ಕೊರತೆ ಬರಂದಿಲೆಕ್ಕ ಉಪ್ಪೊಡು ಪಂಡ್ದ್ ನಮ್ಮ ಹಿರಿಯಕುಲು ಪನ್ಪಿನೆನ್ ಕೆನ್ದ. ಅಂಚೆನೇ ಧರ್ಮ ನೇಮೊಗು ಬತ್ತಿನಕಲು ಅಂಚ ಇಂಚ ದಾಲ ಪಂಡ್ದ್ ಮನಸ್ಸ್ ಬೇಜಾರ್ ಎನ್ನರೆಲಾ ಬಲ್ಲಿ. ಧರ್ಮ ನೇಮ ಮಲ್ಪಾವುನಕುಲು ಧರ್ಮ ತತ್ತೆರ್ಡ, ಧರ್ಮ ದೈವೆನೇ ಫಲ ತೋಜಾದ್ ಕೊರ್ಪುಂಡ್, ಅಂಚನೇ ಧರ್ಮೊಡ್ ನಡತೆರ್ಡ ಬಂಗಾರ್ದಲಕ ಧರ್ಮದೈವ ಮಾನಾದ್ ಕಾಪಾಡುವೆರ್ ಪಂಡ್ದ್ ದೈವದ ನಂಬುಗೆಡ್ ಹಿರಿಯಕುಲು ಪನೊಂದ್ ಇತ್ತೆರ್.
ಪಣಂಬೂರು ದೊಡ್ಡಮನೆ ಕಾಂತು ಶೆಟ್ಟಿಗಾರ್ ಕುಟುಂಬಸ್ಥೆರ್ ಸೇರ್ದ್, ಏಪ್ರಿಲ್ 12ನೇ ತಾರೀಖ್, 2024 ಶುಕ್ರಾರದಾನಿ, ವಿದ್ಯಾನಗರ, ಹೊನ್ನಕಟ್ಟೆ-ಕುಳಾಯಿ ಮುಲ್ಪ ಕುಟುಂಬದಕುಲು ಆರಾಧನೆ ಮಲ್ತೊಂದು ಬೈದಿನ ಜುಮಾದಿ-ಬಂಟ, ಮಹಿಷಂದಾಯ, ವಾರಾಹಿ ಬೊಕ್ಕ ಸಹ ಪರಿವಾರ ದೈವಲೆಗ್ ಧರ್ಮ ನೇಮದ ಗೌಜಿ ನಡಪರೆಂಡು.
ಈ ಕುಟುಂಬದಕುಲು ಪಿರಾಕ್ಡ್ ರಡ್ಡ್ ಸಲ ಧರ್ಮ ನೇಮ ಮಲ್ದಿನ ಇತಿಹಾಸ ಉಂಡುಂದು ಪನ್ಪಿನವುಲ ವಿಶೇಷ. ಅಂಚ ನೇಮ ನಿಷ್ಠೆಡ್ ದೈವಾರಾಧನೆ ಮಲ್ತೊಂದು ಬತ್ತಿನ ಕಾಂತು ಶೆಟ್ಟಿಗಾರೆರೆನ ಕುಟುಂಬ, ಇತ್ತೆ ಕುಡೊರ (2024 ವರ್ಷಡ್) ಧರ್ಮ ನೇಮ ಮಲ್ತೊಂದು ಉಪ್ಪುನವು, ಧರ್ಮ ದೈವದ ಮಲ್ಲ ಅನುಗ್ರಹ, ಕುಟುಂಬದ ಯೋಗ, ಭಾಗ್ಯ ಪಂಡ ತಪ್ಪಾವಂದ್.
ಈ ಧರ್ಮ ನೇಮದ ಕೆಲಸೊನು ವೇದಮೂರ್ತಿ ಬ್ರಹ್ಮಶ್ರೀ ಕುಡುಪು ನರಸಿಂಹ ತಂತ್ರಿ ಮೆರೆನ ಮುತಾಲಿಕೆಡ್ ಬೊಕ್ಕ ಪಣಂಬೂರು ಶ್ರೀ ವೀರಭದ್ರ ಸ್ವಾಮಿ ಮಹಮ್ಮಾಯೀ ದೇವಸ್ಥಾನ, ಸಂಗಬೆಟ್ಟು-ಸಿದ್ಧಕಟ್ಟೆ, ಮುಲ್ಪದ ಆಡಳಿತ ಮಂಡಳಿದ ಮಾರ್ಗದರ್ಶನ ಬೊಕ್ಕ ಪತ್ತು ಸಮಸ್ತೆರೆನ ಸಹಕಾರೊಡ್, ಗುರು ಹಿರಿಯೆರೆನ ಆಶೀರ್ವಾದೊಡ್ ಮಲ್ಪೊಡುಂದು ಕಾಂತು ಶೆಟ್ಟಿಗಾರ್ ಕುಟುಂಬಸ್ಥೆರ್ ತೀರ್ಮಾನ ಮಲ್ತ್ ದೆರ್.
ಧರ್ಮ ನೇಮಗು ಮಾತೆರ್ಲಾ ಒಮ್ಮತೊಡು ಬತ್ತ್ ದ್ ದೈವ ದೇವೆರೆನ ಸಿರಿ ಮುಡಿ ಗಂಧ ಪ್ರಸಾದ ಸಂತೋಷೊಡ್ ಸ್ವೀಕಾರ ಮಲ್ತ್ ದ್ ಶ್ರೀ ದೈವ ದೇವೆರೆನ ಅನುಗ್ರಹ ಪಡೆಯೊಡುಂದು ಪಣಂಬೂರು ದೊಡ್ಡಮನೆ ಶ್ರೀ ಕಾಂತು ಶೆಟ್ಟಿಗಾರ್ ಕುಟುಂಬಸ್ಥೆರ್, ವಿದ್ಯಾನಗರ, ಹೊನ್ನಕಟ್ಟೆ-ಕುಳಾಯಿ, ಮೊಕುಲೆನ ಪರವಾದ್ ವಿಶ್ವನಾಥ್ ಶೆಟ್ಟಿಗಾರ್, ಸಿದ್ಧಕಟ್ಟೆ ಮೇರ್ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಪ್ರಕಟನೆ ಮುಖಾಂತರ ಮೋಕೆಡ್ ಬಿನ್ನಯ ಮಲ್ತೊಂದುಲ್ಲೆರ್.
ವರದಿ: ಯಾದವ ಶೆಟ್ಟಿಗಾರ್ ಕಲ್ಲಾಪು, ಬೆಂಗಳೂರು.
