Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಅಮೆರಿಕೊಡು ಐಸ್ ಸುನಾಮಿಗ್ 60 ಜನ ತೀರ್ ಪೋಯೆರ್: 15 ಸಾರ ಇಮಾನ ಬಂದ್!!

ವಾಷಿಂಗ್ಟನ್: ಅಮೆರಿಕಾಡ್ ಐಸ್ ಸುನಾಮಿ ಬೊಕ್ಕ ಸೀತಗಾಳಿಗ್ ಉಷ್ಣಾಂಶ ಮೈನಸ್ 50 ಡಿಗ್ರಿ ಮುಟ್ಟ ಇನಿ ಮುಟ್ಟ 60 ರ್ದ್ ಲ ಎಚ್ಚ ಜನ ತೀರ್ ಪೋತೆರ್.

ನ್ಯೂಯಾರ್ಕ್ ಸಿಟಿ ಒಂಜೇಟ್ 27 ಜನ ಸೇರ್ದ್ ಇಡೀ ದೇಶಡ್ ಸುಮಾರ್ 60 ಜನ ತೀರ್ ಪೋತೆರ್. ಐಸ್ ರ್ದ್ ಕಾರ್, ಬಸ್, ಅಂಬುಲೆನ್ಸ್ ಬೊಕ್ಕ ಟ್ರಕ್‌ಲು ಮುರ್ಕುದು ಪೊತ್ಂಡ್. ನೆರ್ದಾವೆರ ವೈದ್ಯಕೀಯ ಸೌಲಭ್ಯಲೆನ್ ಕೊರಿಯೆರೆ ಬಂಙ ಆತ್ಂಡ್. ಇನಿ ಬೊಲ್ಪುರ್ದೆ ಪಶ್ಚಿಮ ನ್ಯೂಯಾರ್ಕ್ ಡ್ ಸುಮಾರ್ 9 ಇಂಚ್ (23 ಸೆಂ.ಮೀ.) ಪ್ರಮಾಣಡ್ ಐಸ್ ಬೂರೊಂದು ಉಂಡು. ಪರ್ಪಿನ ನೀರ್ ಗ್ಲಾ ಜನ ಬಂಙ ಬರೊಂದುಲ್ಲೆರ್. ಆತ್ಂಡ್. 15 ಲಕ್ಷರ್ದ್ ಎಚ್ಚ ಇಲ್ಲ್ ಲೆಗ್ ಕರೆಂಟ್ ಇಜ್ಜಂದೆ ಕತ್ತಲೆಡ್ ಇಪ್ಪುಲೆಕ್ಕ ಆತ್ಂಡ್. ಕರಿನ ನಾಲ್ ದಿನರ್ದ್ ದಿಂಚ ಸುಮಾರ್ 15 ಸಾರ ವಿಮಾನ ಸಂಚಾರನ್ ಉಂತಾದೆರ್. ಅಮೆರಿಕ-ಕೆನಡಾ ನಡುಟ್ ಐಸ್ ದ ರಾಶಿ ಜಾಸ್ತಿ ಅವೊಂದು ಉಂಡು. ಟೆಕ್ಸಾಸ್‌ರ್ದ್ ಕ್ಯೂಬೆಕ್‌ ಮುಟ್ಟ ಸುಮಾರ್ 3,200 ಕಿ.ಮೀ.ಮುಟ್ಟ ಐಸ್ ಡ್ ದಿಂಜಿದ್ಂಡ್. ನ್ಯೂಯಾರ್ಕ್, ಬಫೆಲೋ ಮಿಚಿಗನ್, ಒರ್ಲಾಂಡೋ, ಡೆನ್ವರ್, ದಲ್ಲಾಸ್, ನಾಶ್‌ವಿಲ್ಲೆಲೆಡ್ ಅಲರ್ಟ್ ಘೋಷಣೆ ಆತ್ಂಡ್.

ಸಿನಿಮಾ ನಟಿ ಆಶಿಕಾ ರಂಗನಾಥ್ ಗ್ ಕರ್ನಾಟಕ ಮಹಿಳಾ ಸಾಧಕಿ ಪ್ರಶಸ್ತಿ

ಸ್ಯಾಂಡಲ್ ವುಡ್ ನಟಿ ಆಶಿಕಾ ರಂಗನಾಥ್ ಮೆರೆಗ್ ಪುಗರ್ತೆದ ಕರ್ನಾಟಕ ಮಹಿಳಾ ಸಾಧಕಿ ಪ್ರಶಸ್ತಿ ತಿಕ್ ದ್ಂಡ್.

ಬೇತೆ ಬೇತೆ ಕ್ಷೇತ್ರಲೆಡ್ ಸಾಧನೆ ಮಲ್ತಿನ ಪೊಂಜೋವ್ ನಕ್ಲೆಗ್ ಪ್ರತಿ ವರ್ಷ ಈ ಪ್ರಶಸ್ತಿನ್ ಕೊರ್ಪೆರ್. ಈ ವರ್ಷ ಆಶಿಕಾಗ್ ಪ್ರಶಸ್ತಿ ತಿಕ್ ದ್ಂಡ್. ಬೆಂಗ್ಲೂರ್ ಡ್ ನಡತಿನ ಲೇಸ್ ಡ್ ಅಶ್ವಿನಿ ಪುನೀತ್ ಪ್ರಶಸ್ತಿ ಪ್ರದಾನ ಮಲ್ತಿನ ಪೋಟೋನ್ ಆಶಿಕಾ ಶೇರ್ ಮಲ್ದೆರ್.

ಮಲ್ಪೆಡ್ ಬಲೆಕ್ಕ್ ಬೂರ್ದಿನ ಮೀನ್ ದ ಬಿಲೆ 2 ಲಕ್ಷರ್ದ್ ಲ ಎಚ್ಚ!!

ಮಲ್ಪೆ: ಕೊರೊನಾ ಬತ್ತ್ ದ್ ರಡ್ಡ್ ವರ್ಷ ಆಯಿ ಬೊಕ್ಕ ಕಡಲ್ ಡ್ ಭಾರಿ ಮೀನ್ ತಿಕೊಂದುಂಡು. ಅವ್ವತ್ತಾಂದೆ ಈ ವರ್ಷ ಬೇತೆ ಬೇತೆ ಜಾತಿದ ಮಸ್ತ್ ಬಿಲೆತ ಮೀನ್ ಲು ಮೀನ್ ಗಾರೆರೆನ ಬಲೆಕ್ ಬೂರ್ದುಂಡು. ಮಲ್ಪೆ ಕಡಲ್ ಡ್ ಕೋಡೆ ಮೀನ್ ಗಾರೆರ್ ಬಲೆಕ್ ಬೂರ್ದಿನ ಒಂಜಿ ಅಪ್ರೂಪದ ಮೀನ್ ದ ಬಿಲೆ ಲಕ್ಷ ರೂಪಾಯಿರ್ದ್ ಲ ಎಚ್ಚದ ಬಿಲೆ ಉಂಡು.

ಈ ಮೀನ್ ದ ಪುದರ್ ಗೋಲಿ ಮೀನ್. 22 ಕೆ.ಜಿ ತೂಕದ ಈ ಮೀನ್ 2,34,080 ರೂಪಾಯಿಗ್ ಸೇಲ್ ಆದ್ ದಾಖಲೆ ಆತ್ಂಡ್. ಈ ಮೀನ್ ನ್ ಮರ್ದ್ ತಯಾರ್ ಮಲ್ಪೆರೆ ಗಲಸುವೆರ್ ಪಂದ್ ಮೀನ್ ಗಾರೆರ್ ಪಂಡೆರ್. ಮಲ್ಪೆ ಬಂದರ್ ಡ್ ವಾರ್ ಪಾಡ್ನಗ ವ್ಯಕ್ತಿಯೊರಿ ಈ ಮೀನ್ ನ್ ದೆತೊಂದೆರ್. ನೆತ್ತ ವಿಡಿಯೋ ವೈರಲ್ ಆತ್ಂಡ್.

ಸಾಣೆಹಳ್ಳಿ ರಂಗ ಸುಹಾಸ ಟ್ರಸ್ಟ್ ರ್ದ್ ನಟೆ ಉಮೇಶ ಎಂ. ಸಾಲಿಯಾನ್ ಮೆರೆಗ್ ತಮ್ಮನ

ಕಾಸ್ರೋಡು : ನಟೆ, ನಿರ್ದೇಶಕೆರ್, ಸಂಘಟಕೆರ್, ಕೇರಳ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಅಧ್ಯಕ್ಷೆರ್ ಉಮೇಶ್ ಎಂ. ಸಾಲಿಯಾನ್ ಮೆರೆಗ್ ಚಿತ್ರದುರ್ಗ ಸಾಣೆಹಳ್ಳಿ ದ ರಂಗ ಸುಹಾಸ ಟ್ರಸ್ಟ್ ದಕುಲು ಮಾನಾದಿಗೆ ಮಲ್ತೆರ್.


ಕಾಸ್ರೋಡುದ ರಂಗ ಕುಟೀರಡ್ ನಡತಿನ ಲೇಸ್ ಡ್ ಯಕ್ಷಗಾನ ಕಲಾವಿದೆರ್ ನರಸಿಂಹ ಬಲ್ಲಾಳ ಅಧ್ಯಕ್ಷತೆ ಒಯಿಸ್ ದಿತ್ತೆರ್. ಹಿರಿಯ ಯಕ್ಷಗಾನ ಕಲಾವಿದೆರಾಯಿನ ಅಪ್ಪುಕುಂಞ ಮೇರ್ ಲೇಸ್ ಉದಿಪನ ಮಲ್ತೆರ್. ಕರ್ನಾಟಕ ನಾಟಕ ಆಕಾಡೆಮಿ ಸದಸ್ಯೆರೆನ ರಾಗಿಕಲೆ, ಸಾಹಿತ್ಯ, ಸಂಘಟನೆ ಮುಖೇನ ಕರ್ನಾಟಕಡ್ ಇಡೀ ಪುದರ್ ನ್ ಗಲಸಿನ ಕಲಾವಿದೆರೆನ್ ಒಟ್ಟು ಮಲ್ತ್ ದ್ ಸವಾಕ್ ಸಂಘಟನೆದ ರಾಜ್ಯ ಕೋಶಾಧಿಕಾರಿಯಾದ್, ಕೇರಳ ತುಳು ಅಕಾಡೆಮಿದ ಮಾಜಿ ಅಧ್ಯಕ್ಷೆರಾದ್, ಇತ್ತೆ ತಾನೇ ಕೇರಳ ಸರ್ಕಾರ ರಾಷ್ಟ್ರಕವಿ ಎಂ. ಗೋವಿಂದ ಪೈ ಸ್ಮಾರಕ ಸಮಿತಿ ಕಾರ್ಯದರ್ಶಿಯಾದ್ ನೇಮಕ ಆಯಿನ ಉಮೇಶ ಸಾಲಿಯಾನ್ ಮೆರೆನ್ ಮಾನಾದಿಗೆ ಮಲ್ತ್ ದ್, ಅಭಿನಂದನಾ ಪತ್ರ ಕೊರೊಂದು ಉಲ್ಲೆರ್ ಪಂದ್ ರಂಗ ಸುಹಾಸ ಟ್ರಸ್ಟ್ ದ ಕಾರ್ಯದರ್ಶಿ ಕೆ.ಮಲ್ಲಯ್ಯ ಶ್ರೀಮಠ ಪಂಡೆರ್. ಬೊಕ್ಕ ಸಂಚಾಲಕೆರ್ ಕೆ.ಬಿ.ಮೂರ್ತಿ ಕಬ್ಬಿನಕೆರೆ, ಸವಾಕ್ ಜಿಲ್ಲಾಧ್ಯೆಕ್ಷೆರ್ ಕೆ.ಭಾರತಿ ಬಾಬು, ಕಾರ್ಯದರ್ಶಿಲಾಯಿನ ನರೇಂದ್ರ, ಹರಿಕಾಂತ ಸಾಲಿಯಾನ್ ಪಾತೆರಿಯೆರ್. ರಂಗ ಕುಟೀರದ ಕಾರ್ಯದರ್ಶಿ ನಿಶ್ಮಿತ ಕಮಲೇಶ್ ಎದ್ಕೊನಿಯೆರ್. ಸವಾಕ್ ಕಾಸ್ರೋಡು ವಲಯದ ಅಧ್ಯಕ್ಷೆರ್ ದಯಾಪ್ರಸಾದ್ ಸೊಲ್ಮೆ ಸಂದಾಯೆರ್.

ಕಂಬುಲ ಗ್ರಾಮೀಣ ಬದ್ ಕ್ ಗ್ ಸಗ್ತಿ ಕೊರ್ಪುನ ಕಲೆ: ಸಿಎಂ ಬಸವರಾಜ್ ಬೊಮ್ಮಾಯಿ

ಬೆದ್ರ: ಗ್ರಾಮೀಣ ಸಂಸ್ಕೃತಿನ್ ತೂಪಾವುನ ಕಂಬುಲ ಕ್ರೀಡೆ ಮಾತ್ರ ಅತ್ತ್ ಅವು ಗ್ರಾಮೀಣ ಬದ್ ಕ್ ಗ್ ಸಗ್ತಿ ಕೊರ್ಪಿನ ಕಲೆ. ಬಿರ್ಸ್, ತಂಕ ಬೊಕ್ಕ ಗೇನ ಇಪ್ಪುನ ಕಂಬುಲ ತನ್ನನೇ ಆಯಿನ ಶೈಲಿಡ್ ಉಂಡು. ನನ ಒಂಜಿ ದಿನ ಭಾರತದ ಮಾತ ರಾಜ್ಯಲೆಡ್ ಕಂಬುಲ ನಡಪರೆ ಉಂಡು. ವಿದೇಶಡ್ ಲ ಕಂಬುಲ ನಡಪುನ ದಿನ ಬರ್ಪುಂಡು ಪಂದ್ ರಾಜ್ಯದ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಪಂಡೆರ್.

ಮೇರ್ ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಮೆರೆನ ಮುತಾಲಿಕೆಡ್ ಒಂಟಿಕಟ್ಟೆದ ಕಡಲಕೆರೆ ನಿಸರ್ಗಧಾಮ, ವೀರರಾಣಿ ಅಬ್ಬಕ್ಕರಾಣಿ ಸಂಸ್ಕೃತಿ ಗ್ರಾಮಡ್ ನಡತೊಂದು ಇಪ್ಪುನ 20ನೇ ವರ್ಷದ ಬೆದ್ರದ ಪುಗರ್ತೆದ ಫ್ಲಡ್ ಲೈಟ್ ಕೋಟಿ-ಚೆನ್ನಯ ಕಂಬುಲಡ್ ಐತಾರ ಪಾಲ್ ಪಡೆದ್ ಪಾತೆರಿಯೆರ್.
ಈ ಪೊರ್ತುಡು ಕಂಬುಲ ಸಮಿತಿರ್ದ್ ಮುಖ್ಯಮಂತ್ರಿನ್ ತಮ್ಮನ ಮಲ್ತೆರ್.


ಉಸ್ತುವಾರಿ ಸಚಿವೆರ್ ವಿ. ಸುನಿಲ್ ಕುಮಾರ್, ಸಚಿವೆರಾಯಿನ ಸಿ. ಟಿ ರವಿ, ನಾರಾಯಣ ಗೌಡ, ಶಿಕ್ಷಣ ಸಚಿವೆರ್ ನಾಗೇಶ್, ಜಿಲ್ಲಾಧಿಕಾರಿ ರವಿ ಕುಮಾರ್, ಪುರಸಭಾ ಅಧ್ಯಕ್ಷೆರ್ ಪ್ರಸಾದ್ ಕುಮಾರ್ ಸ್ಥಾಯಿ ಸಮಿತಿ ಅಧ್ಯಕ್ಷೆರ್ ನಾಗರಾಜ್ ಪೂಜಾರಿ, ಸಹಾಯಕೆರ್ ಅರಣ್ಯ ಸಂರಕ್ಷಣಾಧಿಕಾರಿ ಸತೀಶ್ ಕೆ., ವಲಯಾರಣ್ಯಧಿಕಾರಿ ಹೇಮಗಿರಿ ಅಂಗಡಿ, ಪೊಲೀಸ್ ವರಿಷ್ಠಾಧಿಕಾರಿ, ಕಂಬುಲ ಸಮಿತಿದ ಪ್ರಧಾನ ಕಾರ್ಯದರ್ಶಿ ಗುಣಪಾಲ್ ಕಡಂಬ, ಭಾಸ್ಕರ್ ಎಸ್. ಕೋಟ್ಯಾನ್ ಇತ್ತೆರ್. ಶಾಸಕೆರ್ ಉಮಾನಾಥ್ ಕೋಟ್ಯಾನ್ ಎದ್ಕೊನಿಯೆರ್.
✍️ಜಗದೀಶ್ ಪೂಜಾರಿ
ಬೆದ್ರ

ಡಿ. 28: ಕುಡ್ಲ ಸಾಹಿತ್ಯಾ ಪ್ರಕಾಶನದ ನಿಲೆಟ್ ರಾಜೇಶ್ ಶೆಟ್ಟಿ ದೋಟ ಮೆರೆನ ಮುಗದಾರಗೆ ಕಬಿತೆ ಗೊಂಚಿಲ್ ಬುಡುಗಡೆ ಲೇಸ್

ಕುಡ್ಲ ಸಾಹಿತ್ಯಾ ಪ್ರಕಾಶನದ ನಿಲೆಟ್ ರಾಜೇಶ್ ಶೆಟ್ಟಿ ದೋಟ ಮೆರೆನ ಮುಗದಾರಗೆ ಕಬಿತೆ ಗೊಂಚಿಲ್ ಬುಡುಗಡೆ ಲೇಸ್ ಡಿ. 28 ಬುಧಾರದಾನಿ ಕಾಂಡೆ 10:30 ಕ್ ಕುಡ್ಲ ಪ್ರೆಸ್‌ ಕ್ಲಬ್ ದ ಪ್ರತಿಕಾ ಭವನಡ್ ನಡಪರೆ ಉಂಡು.

ಈ ಲೇಸ್ ಡ್ ಕುಡ್ಲ ಆಕಾಶವಾಣಿ, ಸಾಹಿತಿ, ಕಬಿ ಡಾ. ವಸಂತಕುಮಾರ ಪೆರ್ಲ ಬೂಕು ಬುಡುಗಡೆ ಮಲ್ಪೆರೆ ಉಲ್ಲೆರ್. ಎಂಆರ್ ಪಿಎಲ್ ಒಎನ್ ಜಿಸಿ ಜನರಲ್ ಮ್ಯಾನೇಜರ್, ಸಿಎಸ್ ಆರ್ ವೀಣಾ ಟಿ.ಶೆಟ್ಟಿ ಗುರ್ಕಾರ್ಮೆ ಒಯಿಸೊನ್ವೆರ್. ಕೃತಿ ಪೊಲಬುನ್ ಸಾಹಿತಿ, ಕಬಿ, ಪ್ರಾಧ್ಯಾಪಕೆರ್ ರಘ ಇಡ್ಕಿದು ಮಲ್ಪುವೆರ್. ಹಿರಿಯ ಪತ್ರಕರ್ತೆರ್ ಪಿ.ಬಿ ಹರೀಶ್ ರೈ ಲೇಸ್ ನ್ ಸುಧಾರಿಕೆ ಮಲ್ಪುವೆರ್.

ತಿರುಪತಿ ದೇವಲ್ಯದ ಗರ್ಭಗುಡಿ 8 ತಿಂಗೊಲ್ ಬಂದ್!

ಹೈದರಾಬಾದ್: ಆಂಧ್ರಪ್ರದೇಶದ ತಿರುಪತಿ ಜಿಲ್ಲೆಡ್ ಇಪ್ಪುನ ತಿರುಮಲ ಶ್ರೀ ತಿಮ್ಮಪ್ಪ ದೇವಲ್ಯದ ಗರ್ಭಗುಡಿನ್ 2023 ಟ್ಟ್ ಆಜಿ ಇಜ್ಜಿಂಡ 8 ತಿಂಗೊಲ್ ಮುಚ್ಚುನ ಸಾಧ್ಯತೆ ಉಂಡು.

ತಿರುಮಲದ ಮುಖ್ಯ ಗರ್ಭಗುಡಿ ಮಿತ್ತ್ ಇಪ್ಪುನ ಇಮಾನ ಆಕೃತಿದ ಗೋಪುರ ಆನಂದ ನಿಲಯದ ಬಂಗಾರ್‌ದ ಲೇಪನನ್ ಬದಲ್ ಮಲ್ಪರೆ ತಿರುಮಲ ದೇವಸ್ಥಾನಂ ನಿರ್ಧಾರ ಮಲ್ತ್‌ದ್ಂಡ್ ಪಂದ್ ವರದಿ ಆತ್ಂಡ್. ಇಂಚಾದ್ ತಾತ್ಕಾಲಿಕಾದ್ ವೆಂಕಟೇಶ್ವರ ಮೂರ್ತಿನ್ ದೇವಲ್ಯದ ಬರಿಟ್ಟ್ ಬಾಲಾಲಯಟ್ಟ್ ದೀಯರೆ ಉಂಡು. ಫೆಬ್ರವರಿರ್ದ್ ಬಂಗಾರ್‌ದ ಲೇಪನ ಪಾಡುನ ಬೇಲೆ ಸುರು ಆಯರೆ ಉಂಡು.

Andra Pradesh – Tirupati temple sanctum to be closed for about 8 months

Hyderabad: The Tirupathi temple at Tirumala hills in Andhra Pradesh, the sanctum of which is likely to be closed for 6-8 months.

Sources say the gold covering on top of the sanctum is to be refurbished. So the idol of the lord will be placed a little away from its original place. The work of the gold replating is likely to start from February.

ಕುಕ್ಕೆಗ್ ಇನಿ ಕೇಂದ್ರ ಸಚಿವೆರ್ ಸ್ಮೃತಿ ಇರಾನಿ ಭೇಟಿ

ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಕ್ಷೇತ್ರಗ್ ಇನಿ ಕೇಂದ್ರ ಸರ್ಕಾರದ ಪೊಂಜೊವುಲೆನ ಬೊಕ್ಕ ಜೋಕ್ಲೆನ ಕಲ್ಯಾಣಾಭಿವೃದ್ದಿ ಸಚಿವೆರ್ ಸ್ಮೃತಿ ಇರಾನಿ ಭೇಟಿ ಕೊರಿಯರೆ ಉಲ್ಲೆರ್.

ಕಾಂಡೆ 11 ಜೆಡ್ದ್ 11.45 ಮುಟ್ಟ ಕಿರುಷಷ್ಠಿ ವೇದಿಕೆಡ್ ಕುಕ್ಕೆ ಶ್ರೀ ಸುಬ್ರಹ್ಮಣ್ಯೇಶ್ವರ ಮಹಾವಿದ್ಯಾಲಯದ ಕಲ್ಪಾರ್ಥಿನಕ್ಲೆನೊಟ್ಟುಗು ಸಂವಾದ ನಡಪಾಯರೆ ಉಲ್ಲೆರ್. ಆಯಿಬೊಕ್ಕ 12 ಗಂಟೆಗ್ ಮಹಾಪೂಜೆಡ್ ಪಾಲ್ ಪಡೆದ್, ಪ್ರಸಾದ ದೆತೊನರೆ ಉಲ್ಲೆರ್.

ತೋಡಾರ್ ಕೊಡಮಂದಾಯ ದೈವೊಲ್ಯಗ್ ಪೂ ಮಾಲೆ ದಂಡಿಗೆ ಸಮರ್ಪಣೆ

ಬೆದ್ರ ಕೈತಲ್ ದ ತೋಡಾರು ಶ್ರೀ ಕೊಡಮಂದಾಯ ದೈವೊಲ್ಯಗ್ ಪೂ ಮಾಲೆಲೆನ್ ದೀಯೆರೆ ಪೊರ್ಲ ಕೆತ್ತನೆದ ” ಪುಷ್ಪ ದಂಡಿಗೆ ” ನ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ದ ಬೆದ್ರ ಘಟಕದ ಸಂಚಾಲಕೆರಾಯಿನ ಶ್ರೀ ಕಾರಮೊಗರು ಗುತ್ತು ಪ್ರೇಮನಾಥ ಮಾರ್ಲ ಮೇರ್ ಸೇವೆದ ರೂಪಡ್ ಕೊರಿಯೆರ್.

ಬೆದ್ರ ದೇವಕೀ ಲಕ್ಷ್ಮಿ ಮಿಲ್ ದ ಮಾಲಕೆರಾಯಿನ ಪ್ರೇಮನಾಥ ಮಾರ್ಲ ಮೇರ್, ತನ್ನನೇ ಮಿಲ್ ಡ್ ನಿರ್ಮಾಣ ಮಲ್ತಿನ ಈ ಪುಷ್ಪ ದಂಡಿಗೆ ಸುಂದರವಾದ್ ಬೊಕ್ಕ ಅಪೂರ್ವದ ಕೆತ್ತನೆ ಆತ್ಂಡ್. ಎಡ್ಡೆ ಗುಣಮಟ್ಟದ ಮರರ್ದ್ ನಿರ್ಮಾಣ ಮಲ್ತಿನ ಈ ಪುಷ್ಪದಂಡಿಗೆ ಆನೆದ ನಾಲ್ ಕಾರ್ ಲೆನ್, ಮಿತ್ತ್ ದ ಭಾಗಡ್ ಆನೆದ ನಾಲ್ ಸೊಂಡಿಲ್ ಉಂಡು. ಈ ಸೊಂಡಿಲ್ ಡ್ ಪೂತ್ತ ಮಾಲೆಲೆನ್ ಒಟ್ಟು ಮಲ್ತ್ ದ್ ದೀಪುನ ರೀತಿಡ್ ನಿರ್ಮಾಣ ಮಲ್ದೆರ್‌.


ಪೂತ್ತ ಮಾಲೆಲೆನ್ ಒಟ್ಟು ಮಲ್ತ್ ದ್ ದೀಪುನ ಈ ಪುಷ್ಪ ದಂಡಿಗೆದ ಕಲ್ಪನೆ ಪ್ರೇಮನಾಥ ಮಾರ್ಲ ಮೆರೆನ ಆತ್ಂಡ್. ಈ ರೀತಿದ ಪುಷ್ಪ ದಂಡಿಗೆ, ದಕ್ಷಿಣ ಕನ್ನಡ ಜಿಲ್ಲೆದ ದೈವೊಲ್ಯಲೆಡ್ ಉಂದುವೇ ಸುರುತ ಆದುಂಡು. ಈ ಪುಷ್ಪ ದಂಡಿಗೆನ್ ಪ್ರೇಮನಾಥ ಮಾರ್ಲ ಮೆರೆನ ಪರವಾದ್ ಮೆರೆನ ಮಗೆ ಹಾನ್ಯಗುತ್ತು ಭುವನ್ ವೈಷ್ಣವ ಮಾರ್ಲ ಮೇರ್ ಶುಕ್ರಾರ ಸಮರ್ಪಣೆ ಮಲ್ತೆರ್. ಈ ಪೊರ್ತುಡು ಸೇವಾಕರ್ತೆರಾಯಿನ ಕಾರಮೊಗರುಗುತ್ತು ಪ್ರೇಮನಾಥ ಮಾರ್ಲ, ಕಾರಮೊಗರುಗುತ್ತು ಕಿರಣ್ ಕುಮಾರ್ ಮಾರ್ಲ, ಹಾನ್ಯಗುತ್ತು ಮನೋಜ್ ಶೆಟ್ಟಿ, ಯಕ್ಷಗಾನ ವಿಮರ್ಶಕೆರ್ ಬೊಕ್ಕ ಯಕ್ಷಸಂಗಮ ಬೆದ್ರದ ಸಂಚಾಲಕೆರಾಯಿನ ಎಂ.ಶಾಂತರಾಮ ಕುಡ್ವ, ಹಾನ್ಯಗುತ್ತು ರಿತೇಶ್ ಶೆಟ್ಟಿ, ಪಟ್ಲ ಫೌಂಡೇಶನ್ ಬೆದ್ರ ಘಟಕದ ಸಕ್ರಿಯ ಸದಸ್ಯೆರಾಯಿನ ಪುನೀತ್ ಕಟ್ಟೆಮಾರು, ವಾಸುದೇವ, ಮನೋಜ್ ಪೂಜಾರಿ ಇತ್ತೆರ್.

ಆಸ್ಪತ್ರೆಗ್ ದಾಖಲ್ ಆಯಿನ ಪನವುದ ಸಚಿವೆರ್ ನಿರ್ಮಲಾ ಸೀತಾರಾಮನ್

ದಿಲ್ಲಿ: ಕೇಂದ್ರದ ಪನವುದ ಸಚಿವೆರ್ ನಿರ್ಮಲಾ ಸೀತಾರಾಮನ್ (63) ಮೇರ್ ಹುಷಾರ್ ದಾಂತೆ ಸೋಮಾರ ಅಖಿಲ ಭಾರತ ವೈದ್ಯಕೀಯ ವಿಜ್ಞಾನ ಸಂಸ್ಥೆಗ್ ದಾಖಲ್ ಆತೆರ್.

ಮೆರೆನ್ ಮಧ್ಯಾಹ್ನ 12 ಗಂಟೆದ ಸುಮಾರ್ ಗ್ ಆಸ್ಪತ್ರೆದ ಖಾಸಗಿ ವಾರ್ಡ್‌ಗ್ ದಾಖಲ್ ಮಲ್ದೆರ್. ಹೆಚ್ಚದ ಮಾಹಿತಿ ನನ ಗೊತ್ತಾವೊಡಾತೆ.

Central finance minister Nirmala Seetaraman admitted to hospital

New Delhi: Central finance minister Nirmala Seetaraman (63) was admitted to AIIMS today said sources.

She was admitted to a private ward around 12 noon.More information is awaited.

You Missed