ಕನ್ಯಾನ ಗ್ರಾಮದ ದ.ಕ.ಜಿ.ಪಂ.ಹಿ.ಪ್ರಾ. ಶಾಲೆ ಕಣಿಯೂರು ಮುಲ್ತ ಕಲ್ಪಾರ್ಥಿಲೆಗ್ ನೇಜಿ ನಡ್ಪಿನ ಬೇಲೆದ ಅನುಭವದ ಕಲಿಕೆಗಾದ್ ಸಾಲೆದ ದುಂಬುದ ಕಲ್ಪಾರ್ಥಿ ಗಣೇಶ್ ಸಪಲ್ಯ ಬಟ್ನಡ್ಕ ಮೊಕ್ಲೆನ ಇಲ್ಲದ ಕಂಡಡ್ ಇನಿ ನೇಜಿ ನಡ್ಪುನ ಲೇಸ್ ನಡತ್ಂಡ್.
ಈ ಲೇಸ್‌ಡ್ ಸಾಲೆದ ಮುಖ್ಯ ಶಿಕ್ಷಕಿ ಶ್ ಅನಿತಾ ಮಿನೇಜಸ್ ಕೃಷಿ ಬದ್‌ಕ್‌ದ ಪಂತನ್ ಕಲ್ಪಾರ್ಥಿಲೆಗ್ ವಿವರಣೆ ಕೊರಿಯೆರ್. ಕಲ್ಪಾರ್ಥಿಲು ಕಂಡದ ವೀಕ್ಷಣೆ ಮಲ್ತ್ , ನೇಜಿ ನಡಿಯೆರ್.
ಶಿಕ್ಷಕೆರಾಯಿನ ರೇಷ್ಮಾ, ಲವೀನಾ, ಕು. ವನಿತಾ ಕೆ.ಎಲ್, ರೇಣುಕಾ, ಇಲ್ಲದಕುಲು ಇತ್ತೆರ್.
ಕಾರ್ಲ: ಮೈತ್ರಿ ಮಹಿಳಾ ಮಂಡಲ ಈದು ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ಉದಿಪನ ಲೇಸ್ ಐತಾರ ಶ್ರೀ ಮುಜಿಲ್ನಾಯ ಅನುದಾನಿ‌ತ ಹಿರಿಯ ಪ್ರಾಥಮಿಕ ಶಾಲೆಡ್ ನಡತ್ಂಡ್.
ಈ ಲೇಸ್ ದ ಉದಿಪನನ್ ಶಾಲೆದ ಸಂಚಾಲಕೆರ್ ಪ್ರೇಮ್ ಕುಮಾರ್ ಜೈನ್ ಮೇರ್ ಮಲ್ತ್ ದ್ ತುಳು ನಮ್ಮ ಅಪ್ಪೆ ಭಾಷೆ ಆಯಿಕ್ಕ್ ಸಾರರ್ದ್ ಎಚ್ಚ ಕಾಲದ ಇತಿಹಾಸ ಉಂಡು. ಅವೆನ್ ಕಲ್ತ್ ದ್ ಬುಲೆಪಾವುನವು ನಮ್ಮ ಮಾತೆರ್ನಲ ಜಬದಾರಿ ಪಂದ್ ಪಂಡೆರ್. ಅಂಚೆನೆ ಜೈ ತುಲುನಾಡ್ (ರಿ.) ಸಂಘಟನೆದ ಕೆಲಸನ್ ಮೆಚ್ಚಿಯೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಮೈತ್ರಿ ಮಹಿಳಾ ಮಂಡಲದ ಅಧ್ಯಕ್ಷೆರ್ ವಿಮಲ ಆರ್ ಬಲ್ಲಾಳ್ ಒಯಿಸೊಂದಿತ್ತೆರ್. ಮಲ್ಲ ಬಿನ್ನೆರಾದ್ ಜೈ ತುಲುನಾಡ್ (ರಿ.) ಸಂಘದ ಅಧ್ಯಕ್ಷೆರ್ ವಿಶು ಶ್ರೀಕೇರ, ಶಾಲೆದ ಮುಖ್ಯೋಪಾಧ್ಯಾಯೆರ್ ಜ್ಞಾನೇಂದ್ರ ಜೈನ್ ಬೊಕ್ಕ ಯಶೋಧ ಶೆಟ್ಟಿ, ಪ್ರಭಾವತಿ ಪಾಲ್ ಪಡೆದಿತ್ತೆರ್.
ಪದ್ಮಜಾ ಶೆಟ್ಟಿ ಮಾನಸ ಲೇಸ್ ದ ಸುಧಾರಿಕೆ ಮಲ್ತೆರ್. ಸ್ವಾತಿ ಹೆಗ್ಡೆ ಎದ್ಕೊಂದು ಸೊಲ್ಮೆ ಸಂದಾಯೆರ್. ಕಲಿಕಾ ತರಗತಿದ ಅ.6 ರ್ದ್ ಪ್ರತಿ ಐತಾರ ನಡಪರೆ ಉಂಡು.
ಕುಡ್ಲ: ವಿಶ್ವವಿದ್ಯಾಲಯದ ಮಾಜಿ ಉಪಕುಲಪತಿ ಪ್ರೊ.ಕೆ.ಬೈರಪ್ಪ (69ವ) ಇನಿ ಬೊಲ್ಪುಗು ತಿಗಲೆ ಬೇನೆಡ್ ತೀರ್‌ಪೋಯೆರ್.
ಕುಡ್ಲದ ವಿಶ್ವವಿದ್ಯಾಯಡ್ 2014 ಜೂನ್‌ರ್ದ್ 2019 ಜೂನ್ ಮುಟ್ಟ ಕುಲಪತಿಯಾದ್ ಸೇವೆ ಸಂದಾದ್ ಬೊಕ್ಕ ನಿವೃತ್ತಿ ದೆತೊಂದು ಬೊಕ್ಕ ಆದಿ ಚುಂಚನಗಿರಿಟ್ ಕುಲಧಿಪತಿಯಾದ್ ಸೇವೆ ಸಂದಾವೊಂದು ಇತ್ತೆರ್.
ಬೆಳಗಾವಿಡ್ ನಡಪುನ ಕಾರ್ಯಕ್ರಮಗ್ ಪೋನಗ ಬೆಂಗ್ಲೂರು ವಿಮಾನ ನಿಲ್ದಾಣಗ್ ಬನ್ನಗ ತಿಗಲೆ ಬೇನೆ ಬತ್ತಿತ್ತ್ಂಡ್.
ಕಲ್ಯಾಣ್: ತುಳುನಾಡ ತುಳುವೆರ್, ಕಲ್ಯಾಣ್ ನೆತ್ತ ಮುತಾಲಿಕೆಡ್ ಆಟಿಡೊಂಜಿ ದಿನ “ಪಗೆಲ್ಡ್ ಅಗೆಲ್” ಲೇಸ್ ಜು.26 ಬುಧವಾರ ಸಂಸ್ಥೆದ ಸಂಸ್ಥಾಪಕೆರ್ ಅಶೋಕ್ ಎಲ್. ಪೂಜಾರಿ ಉಳ್ಯಗುತ್ತು ಪಂಜ ಕೊಯಿಕುಡೆ ಮೆರೆನ “ಮನಸು ಮತ್ತು ಕನಸು” ಪುದರ್ ದ ಇಲ್ಲಡ್ ನಡತ್ಂಡ್.
ಈ ಲೇಸ್ ಸದಸ್ಯೆರೆನ ಪ್ರಾರ್ತನೆದೊಟ್ಟಿಗೆ ಸಂಸ್ಥಾಪಕೆರ್ ಬೊಕ್ಕ ಸಂಸ್ಥಾಪಕ ಸದಸ್ಯೆರ್ ಮಾತ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ರೇಖಾ ಶೆಟ್ಟಿ ಮೆರೆರ್ದ್ ಆಟಿ ಕಳಂಜೆ, ಉಮಾ ಶೆಟ್ಟಿ, ದೇವಕಿ ಪೂಜಾರಿ ಮಾದಿರದಕುಲಾದ್ ಬೊಕ್ಕ ಯಮುನ ಕುಲಾಲ್ ಕೊರತಿಯಾದ್ ಜನಪದ ಪದ್ಯಗ್ ನಲಿತೆರ್‌.
ಈ ಪೊರ್ತುಡು ಉಮಾ ಶೆಟ್ಟಿ ಮೆರೆಗ್ ಶಾಲ್ ಪಾಡ್ದ್ ಫಲ ಪುಷ್ಪ ಕೊರ್ದು ಮಾನಾದಿಗೆ ಮಲ್ತೆರ್. ಬೊಕ್ಕ ಸದಸ್ಯೆರ್ ಮಲ್ತಿನ 18 ಬಗೆತ್ತ ತಿಂಡಿ ತೆನಸ್ ನ್ ಪ್ರದರ್ಶನ ಮಲ್ತ್ ದ್ ಮಾತೆರೆಗ್ಲಾ ಬಲಸಿಯೆರ್.
ಈ ಲೇಸ್ ದ ಯಶಸ್ವಿಗಾದ್ ಪ್ರಭಾವತಿ ಸುವರ್ಣ, ರೇಖಾ ಶೆಟ್ಟಿ, ಉಮಾ ಶೆಟ್ಟಿ, ಅಂಜನಾ ಪೂಜಾರಿ, ದಯಾವತಿ ಸುವರ್ಣ, ದೇವಕಿ ಪೂಜಾರಿ, ಯಮುನ ಕುಲಾಲ್, ಭವಾನಿ ಪೂಜಾರಿ, ಪ್ರೀತಿ ಸುವರ್ಣ ಬೊಕ್ಕ ರಾಮಚಂದ್ರ ಸುವರ್ಣೆರ್ ಸಹಕಾರ ಮಲ್ತೆರ್. ಅಶೋಕ್ ಎಲ್. ಪೂಜಾರಿ ಮೇರ್ ಸೊಲ್ಮೆ ಸಂದಾಯೆರ್.
ಕುಡ್ಲ: ನೀಂದರೆ ಪೋಯಿನ 6 ಜನಟ್ 2 ಜನ ನೀರ್‌ಪಾಲ್ ಆಯಿನ ಘಟನೆ ಐತಾರ ಬಯ್ಯಗ್ ಪಡ್ಪುದಲ್ಪ ನಡತ್ಂಡ್.
ಅಳಪೆ ನಿವಾಸಿ ವರುಣ್(26ವ) ಬೊಕ್ಕ ವೀಕ್ಷಿತ್(26ವ) ನೀರ್‌ಪಾಲ್ ಆಯಿನಕುಲ್.
ಅಳಪೆದ ಪಡ್ಪುದ ಲೈತಲ್ ಇಪ್ಪುನ ನೀರ್ ಜಿಂಜಿನ ಕೆರೆತಂಚ ಇಪ್ಪುನ ಗುಂಡಿಗ್ ವರುಣ್ ಬೊಕ್ಕ ವೀಕ್ಷಿತ್ ಇಂಚೆನೆ 6 ಜನ ಜತ್ ದೆರ್. ರಡ್ಡ್ ಜನ ನಾಪತ್ತೆ ಆತೆರ್. ಐಟ್ ಒರಿಯನ ಪುನ ತಿಕ್‌ದ್ ನನೊರಿಯನ್ ನಾಡೊದುಲ್ಲೆರ್. ಪೊಲೀಸೆರ್ ಬೊಕ್ಕ ಅಗ್ನಿಶಾಮಕ ದಳ ಜಾಗೆಗ್ ಬತ್ ದ್ ನಾಡೊಂದುಲ್ಲೆರ್.
ಮುಲ್ಕಿ : ಯಕ್ಷ ಲಹರಿ (ರಿ) ಕಿನ್ನಿಗೋಳಿ ಕೂಟದ 33ನೇ ವರ್ಷದ ಉಚ್ಚಯ, ಕರ್ಣಾಟಕ ಬ್ಯಾಂಕ್ ಯಕ್ಷಗಾನ ತಾಳಮದ್ದಳೆ “ಚರಿತಂ ಮಹಾತ್ಮನಃ” ಸಪ್ತಾಹ ಅಂಚೆನೆ ಕರಿದ್ ಪೋಯಿನ ಕಲಾವಿದೆರ್ನ ನೆಂಪು, ಸಾಧಕೆರೆಗ್ ಸನ್ಮಾನ ಲೇಸ್ ಜುಲೈ 31ರ್ದ್ ಆಗಸ್ಟ್ 6 ತಾರೀಕ್ ಮುಟ್ಟ ಯುಗಪುರುಷ ಸಭಾಭವನಡ್ ಪ್ರತಿ ದಿನ ಬಯ್ಯಡ್ 3.45 ಗಂಟೆರ್ದ್ ರಾತ್ರೆ 8.30 ಮುಟ್ಟ ನಡಪರೆ ಉಂಡು.
ಜು.31 ಸೋಮಾರ ಬಯ್ಯಡ್ ಕಟೀಲು ಕ್ಷೇತ್ರದ ಪ್ರಧಾನ ಅರ್ಚಕೆರ್ ಕೆ.ಲಕ್ಷ್ಮೀನಾರಾಯಣ ಅಸ್ರಣ್ಣ ಲೇಸ್ ಉದಿಪನ ಮಲ್ಪುವೆರ್. ಆ.6 ಐತಾರ ಬಯ್ಯಡ್ 4 ಗಂಟೆಗ್ ಮುಗಿತಲದ ಲೇಸ್ ನಡಪರೆ ಉಂಡು.
ಪ್ರತಿ ದಿನ ಬಯ್ಯಡ್ ಸಭಾ ಕಾರ್ಯಕ್ರಮರ್ದ್ ಬೊಕ್ಕ 5 ಗಂಟೆರ್ದ್ ಪುಗರ್ತೆದ ಕಲಾವಿದೆರೆರ್ದ್ ಧ್ರುವ ಚರಿತ್ರೆ, ನಳ ಚರಿತ್ರೆ,ರುಕ್ಮಾಂಗದ ಚರಿತ್ರೆ, ಪ್ರಹ್ಲಾದ ಚರಿತ್ರೆ, ವಾಮನ ಚರಿತ್ರೆ, ಕೌಶಿಕ ಚರಿತ್ರೆ ಬೊಕ್ಕ ಅಕೇರಿದ ದಿನ ಕಾಂಡೆ 10 ಗಂಟೆರ್ದ್ ಹರಿಶ್ಚಂದ್ರ ಚರಿತ್ರೆ ಮಧ್ಯಾಹ್ನ 2.30 ರ್ದ್ ಚಂದ್ರಹಾಸ ಚರಿತ್ರೆ ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು ಪಂದ್ ಯಕ್ಷಲಹರಿ ಕಿನ್ನಿಗೋಳಿ (ರಿ) ಅಧ್ಯಕ್ಷೆರ್ ಬೊಕ್ಕ ಕೂಟದಕುಲು ಪತ್ರಿಕಾ ಹೇಳಿಕೆ ಡ್ ತೆರಿಪಾದೆರ್.
ಮುಲ್ಕಿ: ಪತ್ರಕರ್ತೆರೆಗ್ ಪ್ರತಿಯೊಂಜಿ ಎಲ್ಯ ವಿಷಯದ ಮಿತ್ತ್ ಗೇನ ಕೊರ್ಪಿನ ಸೂಕ್ಷ್ಮದೃಷ್ಟಿ ಬೋಡು. ಅಂಚಿನ ಎಲ್ಯ ವಿಷಯೊಡ್ಲ ರಾಜ್ಯ ಮಟ್ಟದ ವರದಿ ಮಲ್ತ್ ದ್ ಪುದರ್ ಪಡೆವೊಲಿ ಪಂದ್ ಕಾಪು ತಾಲೂಕು ಪತ್ರಕರ್ತೆರ್ನ ಅಧ್ಯಕ್ಷೆರ್ ಎಚ್ಕೆ ಹೆಜ್ಮಾಡಿ ಪಂಡೆರ್.
ಆರ್ ಮುಲ್ಕಿದ ಪುನರೂರು ಟೂರಿಸ್ಟ್ ಹೋಮ್ ದ ಚಾವಡಿಡ್ ಸನಿವಾರ ಮುಲ್ಕಿ ಪ್ರೆಸ್ ಕ್ಲಬ್ ಮುತಾಲಿಕೆಡ್ ನಡತಿನ ಪತ್ರಿಕಾದ ದಿನಾಚರಣೆಡ್ ಸಾಧಕೆರ್ನ ನಿಲೆಟ್ಟ್ ಮಾನಾದಿಗೆ ದೆತೊಂದು ಪಾತೆರಿಯೆರ್.
ಮುಲ್ಕಿ ನಗರ ಪಂಚಾಯತ್ ಮುಖ್ಯಾಧಿಕಾರಿ ಎನ್.ಎಂ.ಮೇಸ್ತ ಲೇಸ್ ದ ಗುರ್ಕಾರ್ಮೆ ಒಯಿಸೊಂಡೆರ್.
ಮಲ್ಲ ಬಿನ್ನೆರಾದ್ ಬತ್ತಿತ್ತಿನ ಹಿರಿಯ ಪತ್ರಕರ್ತೆರ್, ತುಳು ಕನ್ನಡ ಬರವುಗಾರೆರ್ ಕೆ.ಎಲ್.ಕುಂಡಂತಾಯ ಮೇರ್ ಪತ್ರಿಕಾ ದಿನತ್ತ ಎಡ್ಡೆಪ್ಪು ಬಯಕ್ ದ್ ಪತ್ರಕರ್ತೆರೆಗ್ ಆಶೀರ್ವಾದದ ಮದಿಪು ಮದಿತೆರ್.
ಪುನರೂರು ಪ್ರತಿಷ್ಠಾನದ ಅಧ್ಯಕ್ಷೆರ್ ದೇವಪ್ರಸಾದ್ ಎಚ್.ಪುನರೂರು ಮೇರ್ ಪಾತೆರ್ದ್, ಪತ್ರಕರ್ತೆರೆಗ್ ಸಮಾಜೊಡು ಮಲ್ಲ ಶಕ್ತಿ ಬೊಕ್ಕ ಜಬದಾರಿ ಉಂಡು. ಆ ಶಕ್ತಿನ್ ಸಮಾಜದ ಎಡ್ಡೆಪ್ಪುಗಾದ್ ಗಲಸ್ ಲೆ ಪಂದ್ ಪಂಡೆರ್.
ಲೇಸ್ ಡ್ ಹೊಸ ಅಂಗಣ ಸಂಪಾದಕೆರ್ ಡಾ.ಹರಿಶ್ಚಂದ್ರ ಸಾಲ್ಯಾನ್, ಲಯನ್ಸ್ ಇನ್ ಸ್ಪೈರ್, ಬಪ್ಪನಾಡು ಅಧ್ಯಕ್ಷೆರ್ ವೆಂಕಟೇಶ್ ಹೆಬ್ಬಾರ್ , ಉಪಾಧ್ಯಕ್ಷೆರ್ ಸುಧೀರ್ ಬಾಳಿಗ, ವಕೀಲೆರ್ ರವೀಶ್ ಕಾಮತ್ ಮೊಕುಲು ಮಾತ ಇತ್ತೆರ್.
ಮುಲ್ಕಿ ಪ್ರೆಸ್ ಕ್ಲಬ್ ಅಧ್ಯಕ್ಷೆರ್ ನಿಶಾಂತ್ ಕಿಲೆಂಜೂರು ಬಿನ್ನೆರೆನ್ ಎದ್ಕೊಂಡೆರ್. ಕೋಶಾಧಿಕಾರಿ ರಘುನಾಥ ಕಾಮತ್ ದೇವೆರೆನ್ ಸುಗಿತೆರ್. ಕಾರ್ಯದರ್ಶಿ ಪ್ರಕಾಶ್ ಸುವರ್ಣ ಸೊಲ್ಮೆ ಸಂದಾಯೆರ್. ಹಿರಿಯ ಪತ್ರಕರ್ತೆರ್ ಶರತ್ ಶೆಟ್ಟಿ ಲೇಸ್ ಸುಧಾರಿಕೆ ಮಲ್ತೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಅಂತರಾಷ್ಟ್ರೀಯ ಪಿಲಿ ಸಂರಕ್ಷಣೆ ದಿನತ್ತ ಇಸೇಸ ಪಾತೆರಕತೆ ಜು.29 ಕ್ಕ್ ಸನಿಯಾರ ಬಯ್ಯಗ್ 6 ಗಂಟೆಗ್ ಪ್ರಸಾರ ಆಂಡ್.
ಈ ಲೇಸ್ ಡ್ ವನ್ಯಜೀವಿ ಸ್ನೇಹಿ ಬೊಕ್ಕ ಸಿವಿಲ್ ಎಂಜಿನಿಯರ್ ಕೆ.ಹರೀಶ್ ಕುಮಾರ್ ಒಡಿಪು ಮೇರ್ ಪಿಲಿ ಸಂರಕ್ಷಣೆದ ಮಹತ್ವ ಬೊಕ್ಕ ಪಿಲಿತ್ತ ಬಗೆಟ್ಟ್ ಪೊಲಬು ಕೊರಿಯೆರ್. ಜು.30 ಕ್ಕ್ ಮಧ್ಯಾಹ್ನ 2 ಗಂಟೆಗ್ ಕುಡೊರ ಪ್ರಸಾರ ಆಪುಂಡು ಪಂದ್ ಮಣಿಪಾಲ ಮಾಹೆದ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಕ್ಯಾಂಪಸ್ ಡ್ ಇಪ್ಪುನ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಸಹಾಯಕ ಪ್ರಾಧ್ಯಾಪಕೆರ್ ಬೊಕ್ಕ ಸಂಯೋಜಕೆರ್ ಡಾ.ರಶ್ಮಿ ಅಮ್ಮೆಂಬಳ ಪ್ರಕಟಣೆಡ್ ತೆರಿಪಾದೆರ್.
ಸ್ಯಾಂಡಲ್ ವುಡ್ ನಟೆ ಕಿಚ್ಚ ಸುದೀಪ್ ಇನಿ ತಿರುಪತಿ ದೇವಲ್ಯಗ್ ಭೇಟಿ ಕೊರ್ದು, ದರ್ಶನ ಪಡೆತೆರ್.
ಮೇರ್ K-46 ಪಿಚ್ಚರ್ ಸುರು ಮಲ್ಪುನ ದುಂಬು ತಿರುಪತಿ ದೇವೆರೆನ ದರ್ಶನ ಪಡೆಯೆರೆ ಬೈದೆ ಪಂದ್ ಪಂಡೆರ್. ಈ ಪಿಚ್ಚರ್ ದ ಶೂಟಿಂಗ್ 70 ದಿನತ್ತ ಕಾಲ ಮಹಾಬಲಿಪುರಂಡ್ ನಡಪರೆ ಉಂಡು. ಇಂಚಿಪ್ಪ ಈ ಪಿಚ್ಚರ್ ದ ಟೀಸರ್ ದ ಬುಡುಗಡೆ ಆತ್ಂಡ್.
ಜಾರ್ಖಂಡ್: ಮೊಹರಂ ಮೆರವಣಿಗೆ ಪೊರ್ತುಡು ಕರೆಂಟ್ ಶಾಕ್ ಹಾಕ್ ದ್ ನಾಲ್ ಜನ ತೀರ್ ಪೋದ್, 10 ಜನಕ್ಕ್ ಪೆಟ್ಟಾಯಿನ ಘಟನೆ ಜಾರ್ಖಂಡ್ ದ ಬೊಕಾರೊ ಜಿಲ್ಲೆದ ಪೀಟರ್ ವಾರ್ ಬ್ಲಾಕ್ ದ ಖೆಟ್ಕೊ ಗ್ರಾಮಡ್ ನಡತ್ಂಡ್.
ಇನಿ ಬೊಲ್ಪುಗು ಸುಮಾರ್ 6 ಗಂಟೆಗ್ ಮೊಹರಂ ಮೆರವಣಿಗೆ ಸುರು ಆತ್ಂಡ್. ಈ ಮೆರವಣಿಗೆಡ್ ಕೊನೊಂದು ಇತ್ತಿನ ಧ್ವಜ 11,000 ವೋಲ್ಟ್ ಹೈ-ಟೆನ್ಶನ್ ಕರೆಂಟ್ ವೈರ್ ಗ್ ತಾಗ್ ದ್ ಈ ಘಟನೆ ನಡತ್ ದ್ಂಡ್. ನೆರ್ದ್ ಪೆಟ್ಟಾಯಿನಕ್ಲೆನ್ ಕೈತಲ್ ದ ಆಸ್ಪತ್ರೆಗ್ ದಾಖಲ್ ಮಲ್ದ್ಂಡ್ ಪಂದ್ ಪೊಲೀಸ್ ಅಧಿಕಾರಿಲು ತೆರಿಪಾದೆರ್.
ಜಾಗೆಗ್ ಬತ್ತಿನ ಬೊಕಾರೊದ ಪೊಲೀಸ್ ವರಿಷ್ಠಾಧಿಕಾರಿ ಪ್ರಿಯದರ್ಶಿ ಅಲೋಕ್ ಮೇರ್ ಈ ಬಗೆಟ್ಟ್ ತನಿಖೆ ನಡಪಾದೆರ್. ಈ ಘಟನೆದ ಬಗ್ಗೆ ವರದಿ ದೆತೊಂದ ಪಂದ್ ಪಂಡೆರ್.
