ಬೊಂಬೈ: ತ್ರಿರಂಗ ಸಂಗಮ ಬೊಂಬೈ ಮೊಕ್ಲೆನ ಸಂಚಾಲಕತ್ವಡ್‌ ಗರುಡ ಪಂಚೆಮಿ ತುಳು ನಾಟಕ ನ.25 ಸನಿವಾರ ಬೊಂಬೈ ಬಂಟರ ಭವನ, ಕುರ್ಲಾ(ಪೂರ್ವ) ಮೂಲು ಬಯ್ಯ 6 ಗಂಟೆಗ್ ನಡಪೆರೆ ಉಂಡು. ಈ ಲೇಸ್‌ಡ್‌ ಮಾತೆರ್ಲ ಎಚ್ಚಿನ ಸಂಖ್ಯೆಡ್‌ ಪಾಲ್ ಪಡೆಯೊಡು ಪಂದ್ ಲೆಪ್ಪೋಲೆಡ್‌ ತೆರಿಪಾದೆರ್.
ಪ್ರಧಾನಿ ನರೇಂದ್ರ ಮೋದಿಗ್ ಪನೌತಿ ಪನ್ದ್ ಪನ್ತಿನ ವಿಷಯೊಡು ರಾಹುಲ್ ಗಾಂಧಿಗ್ ಚುನಾವಣಾ ಆಯೋಗ ಗುರುವಾರ ನೋಟೀಸ್ ಕೊರ್ತುಂಡು. ಬಿಜೆಪಿ ಚುನಾವಣಾ ಆಯೋಗೊಗು ಈ ಬಗೆಟ್ ಒಯಿಲ್ ಕೊರ್ದಿತ್ತ್ಂಡ್, ಶುಕ್ರಾರ ಬಯ್ಯ 6 ಗಂಟೆದ ಉಲಯಿ ಸದು ಕೊರೊಡು ಪನ್ದ್ ರಾಹುಲ್ ಗಾಂಧಿಗ್ ಚುನಾವಣಾ ಆಯೋಗ ಪನ್ತ್ಂಡ್.
ಪನೌತಿ ಪನ್ಡ ಅನಿಷ್ಟ, ತೆಟ್ಟ್ ಕನಪಿನ ಪನ್ದ್ ಅರ್ಥೊ ಬರ್ಪುಂಡು. ಆತೇ ಅತ್ತಂದೆ ರಾಹುಲ್ ಗಾಂಧಿ ಮೋದಿಗ್ ಜೇಬ್ ಕತ್ರಿ ಪನ್ದ್ ಲಾ ಪನ್ತೆರ್, ಅಂಚ ಪನ್ಡ ಕಿಸೆ ಕಲುವೆ ಪನ್ದ್ ಅರ್ಥ ಬರ್ಪುಂಡು. ರಾಜಸ್ಥಾನೊಡು ನಡತಿನ ಓಟುದ ಪ್ರಚಾರ ಸಭೆಟ್ ಮೋದಿ ಫೈನಲ್ ಮ್ಯಾಚ್ ತೂವರೆ ಪೋಯಿನವು ಭಾರತ ಸೋಪರೆ ನೆವನ ಆಂಡ್ ಪನ್ಪಿಲೆಕ್ಕ ಪನ್ದಿತ್ತೆರ್.
ಕುಡ್ಲ ಕುಕ್ಕರ್ ಬಾಂಬ್ ಸ್ಪೋಟದ ಜಡ್ತೆದ ಅಕೇರಿಗ್ ಎತ್ತಿನ ರಾಷ್ಟ್ರೀಯ ತನಿಖಾ ದಳ, ಆರೋಪಿ ಶಾರೀಕ್ ಸೇರ್ದ್ ಐನ್ ಜನತ ಮಿತ್ತ್ ಆರೋಪಪಟ್ಟಿನ್ ಬೇಗನೆ ಸಲ್ಲಿಕೆ ಮಲ್ಪರೆ ಉಂಡು. ಈ ಕೇಸ್ ಡ್ ಸದ್ಯೊಗು ಶಾರೀಕ್, ಮುನೀರ್, ಯಾಸೀನ್, ಅರಾಫತ್ ಒಟ್ಟುಗು ಐನ್ ಜನನ್ ಅರೆಸ್ಟ್ ಮಲ್ದೆರ್.
ಈ ಆರೋಪಿಲೆನ ಮಿತ್ತ್ ಐವೊರ್ದುಲಾ ಎಚ್ಚಿನ ಸಾಕ್ಷಿಲೆನ ಹೇಳಿಕೆ ಅಂಚೆನೆ ತಾಂತ್ರಿಕ ಸಾಕ್ಷಿಲೆನ್ ಒಟ್ಟು ಮಲ್ದ್ಂಡ್. ಆರೋಪಿಲು ಕದ್ರಿ ದೇವಲ್ಯೊಗು ಬಾಂಬ್ ಪಾಡುನ ಅಟ್ಟನೆಡ್ ಇತ್ತೆರ್ ಪನ್ದ್ ತನಿಕೆಡ್ ಬೈದಿತ್ತ್ಂಡ್. ಕದ್ರಿರ್ದ್ ಬೊಕ್ಕ ಒಡಿಪುದ ಕೃಷ್ಣ ಮಠ, ಚಿಕ್ಕಮಗಳೂರುದ ಬಿಜೆಪಿ ಕಚೇರಿಲಾ ಮೊಕಲೆನ ಟಾರ್ಗೆಟ್ ಡ್ ಇತ್ತ್ಂಡ್. ಈ ಬಗೆಟ್ ಆಜಿ ತಿಂಗೊಲು ತರಬೇತಿ ದೆತೊನ್ದಿನ ಉಲ್ಲೇಖಲಾ ಉಂಡು.
ಕಾರ್ಲ: ಶ್ರೀ ರಾಘವೇಂದ್ರ ಚಾರಿಟೇಬಲ್ ಟ್ರಸ್ಟ್ (ರಿ.) ಹೆಬ್ರ ಮುತಾಲಿಕೆಡ್ ಸಂಸ್ಕೃತಿ ವಿಶ್ವ ಪ್ರತಿಷ್ಠಾನ (ರಿ.) ಒಡಿಪು ಕೊರ್ಪಿನ ‘ಶಾರದಾ ಕೃಷ್ಣ’ ಪ್ರಶಸ್ತಿಗ್ ಈ ಸರ್ತಿ ಮಲ್ಲ ಕಲಾವಿದೆರ್, ನಿರ್ದೇಶಕೆರ್, ಸಂಘಟಕೆರ್, ಚಲನಚಿತ್ರ ನಟೆ ಕಾಸರಗೋಡು ಚಿನ್ನಾ ಮೇರ್ ಆಯ್ಕೆ ಆತೆರ್.
ಮೆರೆಗ್ ಜನವರಿ ತಿಂಗೊಲ್ಡ್ ಪ್ರಶಸ್ತಿ ಪ್ರದಾನ ಮಲ್ಪೆರೆ ಉಂಡು. ಪ್ರಶಸ್ತಿ ಪತ್ರ, ಫಲಕ ಬೊಕ್ಕ 25,000 ರೂಪಾಯಿ ಪನವುದೊಟ್ಟಿಗೆ ಮಾನಾದಿಗೆ ಮಲ್ಪೆರೆ ಉಂಡು ಪಂದ್ ಪ್ರಶಸ್ತಿದ ಸಂಚಾಲಕೆರ್ ವಿವೇಕಾನಂದ ಎನ್. ಮೇರ್ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.
ಕನ್ನಡದ ಗಡಿನಾಡ್ ಕಾಸ್ರೋಡುದ ಶ್ರೀನಿವಾಸ ರಾವ್ ಎಸ್. ಮೇರ್ ಕಾಸರಗೋಡು ಚಿನ್ನಾ ಪಂದೇ ಪರಿಚಿತೆರ್. ತನ್ನ ಬಿ.ಎ. ವಿದ್ಯಾಭ್ಯಾಸನ್ ಮುಗಿತ್ ದ್, ಆದರ್ಶ ಫಿಲಂ ಇನ್ಸ್ಟಿಟ್ಯೂಟ್ ಡ್ ಡಿಪ್ಲೋಮೋ ಡ್ ಬಂಗಾರ್ ದ ಪದಕನ್ ಪಡೆಯಿನ ಚಿನ್ನಾ ಮೇರ್ ಸಂಘಟಕೆರಾದ್, ನಟೆಯಾದ್, ರಂಗ ನಿರ್ದೇಶಕೆರಾದ್, ಚಲನಚಿತ್ರ ನಿರ್ದೇಶಕೆರಾದ್ ಚಿರಪರಿಚಿತೆರ್.
ಮೇರ್ ಕನ್ನಡ, ತುಳು, ಕೊಂಕಣಿ ಮಲಯಾಳಂ, ಇಂಗ್ಲಿಷ್ ನಾಟಕಡ್ ಅಭಿನಯ ಮಲ್ತ್ ದ್, ನಾಟಕನ್ ನಿರ್ದೇಶನ ಮಲ್ತ್ ದ್, ಸುಮಾರ್ ಸಂಘ ಸಂಸ್ಥೆಲೆಡ್ ಗುರ್ಕಾರೆ, ಮಾನಾದಿಗೆದ ಗುರ್ಕಾರೆ, ಒತ್ತು ಗುರ್ಕಾರೆಯಾದ್ ಸೇವೆ ಸಂದಾದೆರ್. ಅತ್ತಂದೆ ರಂಗ ಚಿನ್ನಾರಿ ಪನ್ಪುನ ಸಂಸ್ಥೆನ್ ಕಟ್ಟ್ ದ್, ಸುಮಾರ್ ಕನ್ನಡದ ಕೆಲಸನ್ ಏಪಲ ಕಾಸ್ರೋಡು ಪರಿಸರಡ್ ಮಲ್ತೊಂದು ಉಲ್ಲೆರ್.
ಅಂಚೆನೆ ಸುಮಾರ್ ಕೃತಿನ್ ಕನ್ನಡರ್ದ್ ಮಲಯಾಳಂಗ್, ಮಲಯಾಳಂರ್ದ್ ತುಳು, ಕೊಂಕಣಿ ಬೊಕ್ಕ ಕನ್ನಡಗ್ ಅನುವಾದ ಮಲ್ದೆರ್. ಬೊಕ್ಕ ಸಾಹಿತ್ಯ ಕ್ಷೇತ್ರಡ್ ಉಲ್ಲೆರ್. ಸುಮಾರ್ ನೂದೆರ್ದ್ ಎಚ್ಚ ಯಶಸ್ವಿ ಸಾಂಸ್ಕೃತಿಕ ಲೇಸ್ ನ್ ಸಂಘಟನೆ ಮಲ್ತಿನ ಕೀರ್ತಿ ಮೆರೆಗ್ ಸಂದುಂಡು. ಮೆರೆನ ಈ ಸೇವೆಗ್, ಸಾಧನೆಗ್, ಕರ್ನಾಟಕ ರಾಜ್ಯ, ಕನ್ನಡ ಸಾಹಿತ್ಯ ಪರಿಷತ್ತ್, ಕೇರಳ ರಾಜ್ಯ ಬೊಕ್ಕ ಪ್ರತಿಷ್ಠಿತ ಸಂಘ ಸಂಸ್ಥೆಲೆನ ಪ್ರಶಸ್ತಿ ಬೈದ್ಂಡ್.
ಖೇಲೋ ಇಂಡಿಯಾ ಕ್ರೀಡಾಕೂಟ ಯಶಸ್ವಿ ಆತ್ಂಡ್. ನನ ಡಿ.10-17 ಮುಟ್ಟ ಖೇಲೋ ಇಂಡಿಯಾ ಪ್ಯಾರಾ ಗೇಮ್ಸ್ ಆಯೋಜನೆ ಮಲ್ಪೆರೆ ಕೇಂದ್ರ ತಯಾರಾತ್ಂಡ್.
ಪ್ಯಾರಾ ಗೇಮ್ಸ್ ದ ಚೊಚ್ಚಲ ಆವೃತ್ತಿ ಉಂದಾತ್ಂಡ್. 28 ರಾಜ್ಯ, 4 ಕೇಂದ್ರಾಡಳಿತ ಪ್ರದೇಶಲೆಡ್ ಒಟ್ಟು 1350 ರ್ದ್ ಎಚ್ಚ ಕ್ರೀಡಾಪಟುಲು ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಕೇಂದ್ರ ಕ್ರೀಡಾ ಸಚಿವೆರ್ ಅನುರಾಗ್ ಠಾಕೂರ್ ತೆರಿಪಾದೆರ್. ಇಂಚಿಪ್ಪ ಪ್ಯಾರಾ ಏಷ್ಯನ್ ಗೇಮ್ಸ್ ಡ್ ಭಾರತ 29 ಬಂಗಾರ್, 31 ಬೊಳ್ಳಿ, 51 ಕಂಚ್ ದ ಪದಕ ಗೆಂದ್ ದ್ಂಡ್.
ಕುತ್ತೆತ್ತೂರ್ ಬಾಜಾವುದ ಶ್ರೀ ಕೋರ್ದಬ್ಬು ದೈವೊಲ್ಯಡ್ ವರ್ಷದ ನೇಮ ನ.17 ಬೊಕ್ಕ 18 ಕ್ಕ್ ನಡತ್ಂಡ್.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ದೈವೊಲೆನ ಕೃಪೆಗ್ ಪಾತ್ರರಾಯೆರ್.
ಕಾಸ್ರೋಡು: ಉಪ್ಪಳ ಶ್ರೀ ಭಗವತೀ ಮಹಿಳಾ ಸಂಘ (ರಿ.) ದ ಮುತಾಲಿಕೆಡ್ 20ನೇ ವರ್ಷದ ಲೆಕ್ಕೊಡು ಚಂಡಿಕಾ ಹೋಮ ಬೊಕ್ಕ ಸಾಮೂಹಿಕ ಇಸೇಸ ಪೂತ್ತ ಪೂಜೆ ನ.19 ಐತಾರ ಉಪ್ಪಳ ಶ್ರೀ ಭಗವತೀ ಕ್ಷೇತ್ರಡ್ ನಡತ್ಂಡ್.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ಭಗವತೀ ಅಪ್ಪೆನ ಕೃಪೆಗ್ ಪಾತ್ರರಾಯೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಬನ್ನಂಜೆ ಬತ್ತೆರ್ ತುಳು ಸರಣಿ ಲೇಸ್ ದ ಸಂಚಿಕೆ ನ. 23 ಕ್ಕ್ ಗುರುವಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಜಾನಪದ ವಿದ್ವಾಂಸೆರ್ ಬನ್ನಂಜೆ ಬಾಬು ಅಮೀನ್ ಪಾತೆರಿಯೆರೆ ಉಲ್ಲೆರ್. ನ. 24 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ನೆಲ್ಲಿಕಾಯಿ ತಿನ್ಪುನೆರ್ದ್ ನರಮಾನಿನ ಆರೋಗ್ಯಗ್ ಮಸ್ತ್ ಎಡ್ಡೆ ಉಂಡು.
ನೆಲ್ಲಿಕಾಯಿಡ್ ಇಪ್ಪುನ ಫೈಬರ್ ಕರ್ಲ್ ದ ಚಲನೆನ್ ಸರಿ ಮಲ್ಪುಂಡು. ಉಂದು ಮಲಬದ್ಧತೆ ಬೊಕ್ಕ ಜೀರ್ಣಕಾರಿ ಸಮಸ್ಯೆನ್ ಕಮ್ಮಿ ಮಲ್ಪುಂಡು. ನೆಟ್ಟ್ ಇಪ್ಪುನ ಫ್ಲೇವನಾಯ್ಡ್, ಆ್ಯಂಟಿ ಆಕ್ಸಿಡೆಂಟ್ ಲು ಜೂವದುಲಯಿ ಡ್ ಇಪ್ಪುನ ಹಾನಿಕಾರಕ ಫ್ರೀ radical ದ ಮಿತ್ತ್ ಪೊರ್ಂಬಾಟ ಮಲ್ತ್ ದ್ ಒತ್ತಡನ್ ಕಮ್ಮಿ ಮಲ್ಪುಂಡು. ಬೊಕ್ಕ ಬೊಲ್ದು ನೆತ್ತೆರ್ ನ್ ಎಚ್ಚ ಮಲ್ಪುಂಡು. ಶೀತ, ತೆಮ್ಮ, ಜ್ವರತ್ತಂಚಿನ ಋತುಮಾನದ ಸೀಕ್ ನ್ ತಡೆಯೆರೆ ನೆಲ್ಲಿ ಆಮ್ಲ ಸಕಾಯ ಮಲ್ಪುಂಡು. ಚರ್ಮ, ತರೆತ್ತ ಪೊಟ್ಟು ಸಮಸ್ಯೆನ್ಲಾ ಉಂದು ಕಮ್ಮಿ ಮಲ್ಪುಂಡು.
ತುಳುಕೂಟ 50ನೇ ವರ್ಷೊದ ವಾರ್ಷಿಕ ಉಚ್ಚಯದ ಲೆಕ್ಕೊಡು ಬೆಂಗ್ಲೂರ್ ಶ್ರೀ ಕಲಾ ಸಂಗಮ (ರಿ.) ಮೊಕ್ಲೆನ ಮುತಾಲಿಕೆಡ್ ಸಿರಿ ದೇವಿ ಮಹಿಮೆ ತುಳು ಆಟ ನ.24 ಸುಕ್ರಾರ ಬಯ್ಯಗ್ ನೀರ್ಚಲ್ಲ್ ಅರಮನೆ ಮೈದಾನಡ್ ನಡಪರೆ ಉಂಡು.
ಈ ಆಟನ್ ಶರವೂರು ಶ್ರೀನಿವಾಸ್ ರಾವ್ ಸಂಯೋಜನೆ ಮಲ್ದೆರ್. ಹಿಮ್ಮೇಳಡ್ ಉಂಡಮನೆ ಶ್ರೀಕೃಷ್ಣ ಭಟ್, ಶ್ರೀಶ ರಾವ್ ನಿಡ್ಲೆ, ಜಿತೇಶ್ ಬಿ ಕೋಳ್ಯೂರ್, ಕೀರ್ತನ್ ಕೋಳ್ಯೂರ್, ಶ್ರೇಯಸ್ ಕೃಷ್ಣಾಪುರ, ಬೊಕ್ಕ ಮುಮ್ಮೇಳಡ್ ಅವಿನಾಶ್ ಉಬರಡ್ಕ, ಅಭಿಜಿತ್ ರಾಯಿ, ಪವನ್ ಕುಮಾರ್ ನಿರ್ಚಲ್, ಹೇಮಂತ್ ಆಚಾರ್ಯ, ಧನುಷ್ ರಾವ್ ಎಕ್ಕರ್, ಆದರ್ಶ್ ವಿ ಎ, ಕೃಷ್ಣ ಜೋಯಿಸ್, ಶ್ರೀ ಶಂಕರ ಜೋಯಿಸ್, ಸುಧಾಕರ್ ಜೈನ್ ಹೊಸಬೆಟ್ಟು, ಶ್ರೀನಿವಾಸ್ ರಾವ್ ಶರವೂರು, ಶ್ರದ್ಧಾ ರಾವ್ ಶರವೂರು, ಶ್ರೇಯಾ ರಾವ್ ಶರವೂರು, ಕಾರುಣ್ಯ ರಾವ್ ಶರವೂರು ಪಾಲ್ ಪಡೆಯೆರೆ ಉಲ್ಲೆರ್.
