ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಲಕ್ಷ ದೀಪ ಬಲಿ ಉಚ್ಚಯ

ಮುಲ್ಕಿ ಸೀಮೆದ ಒರ್ಂಬ ಮಾಗಣೆದ ಬಪ್ಪನಾಡ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಲಕ್ಷ ದೀಪ ಬಲಿ ಉಚ್ಚಯ ಗೌಜಿಡ್ ನಡತ್ಂಡ್.

ಕ್ಷೇತ್ರದ ತಂತ್ರಿಲಾಯಿನ ಶಿಬರೂರು ಗೋಪಾಲಕೃಷ್ಣ ತಂತ್ರಿಲು ಬೊಕ್ಕ ಅರ್ಚಕೆರ್ ಶ್ರೀಪತಿ ಉಪಾಧ್ಯಾಯ, ನರಸಿಂಹ ಭಟ್ ಮೊಕ್ಲೆನ ಪೌರೋಹಿತ್ಯಡ್ ಇಸೇಸ ಪ್ರಾರ್ತನೆ, ಭಕ್ತೆರೆರ್ದ್ ಲಕ್ಷ ಕುಂಕುಮಾರ್ಚನೆ, ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ ಬಯ್ಯಗ್ ಸಾಮೂಹಿಕ ಕುಂಕುಮಾರ್ಚನೆ, ಶ್ರೀ ದೇವೆರೆನ ಲಕ್ಷ ದೀಪ ಬಲಿ ಉಚ್ಚಯ, ಅಷ್ಟಾವಧಾನ ಸೇವೆ, ಪ್ರಸಾದ ಪಟ್ಟುನ ಲೇಸ್ ನಡತ್ಂಡ್.

ಈ ಪೊರ್ತುಡು ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ದುಗ್ಗಣ್ಣ ಸಾವಂತ ಅರಸೆರ್, ಆಡಳಿತ ಮೊಕ್ತೇಸರೆರ್ ಮನೋಹರ ಶೆಟ್ಟಿ, ಕಾರ್ಯನಿರ್ವಹಣಾಧಿಕಾರಿ ಪಿ. ಜಯಮ್ಮ, ವಾದಿರಾಜ ಉಪಾಧ್ಯಾಯ ಕೊಲಕಾಡಿ ಬೊಕ್ಕ ಭಕ್ತವೃಂದ ಪಾಲ್ ಪಡೆದಿತ್ತೆರ್.

ಮಲ್ಲಿಗೆಯಂಗಡಿ ಶ್ರೀ ವನದುರ್ಗಾ ಪ್ರಕೃತಿ ಅನಂತೇಶ್ವರ ಕಾಲಭೈರವ ಗುರು ಸನ್ನಿಧಿದ ಜೀರ್ಣೋದ್ಧಾರ ಗ್ ಭಕ್ತೆರ್ದ್ ಸಕಾಯಗ್ ಬಿನ್ನಾಪು

ಕಟೀಲ್: ಮಲ್ಲಿಗೆಯಂಗಡಿ ಶ್ರೀ ವನದುರ್ಗಾ ಪ್ರಕೃತಿ ಅನಂತೇಶ್ವರ ಕಾಲಭೈರವ ಗುರು ಸನ್ನಿಧಿದ ಜೀರ್ಣೋದ್ಧಾರ ಕೆಲಸಲು ನಡತೊಂದು ಉಂಡು.

ನೆತ್ತ ಕಿರೆ ನಿರ್ಮಾಣ, ಅನ್ನಛತ್ರ ಬೊಕ್ಕ ಬತ್ತಿನ ಭಕ್ತೆರೆಗ್ ಕುಲ್ಲುನ ವ್ಯವಸ್ಥೆ ಮಲ್ಪರೆಗ್ ಭೂಮಿ ದೆತೊನೊಡಾಪುಂಡು. ಅಂಚಾದ್ ಭಕ್ತಾದಿಲು ತನು ಮನ ಧನ ಕೊರ್ದು ಸಹಕಾರ ಮಲ್ಪೊಡು. ಅಂಚೆನೆ ಕ್ಷೇತ್ರದ ಅಭಿವೃದ್ಧಿ ಕಾರ್ಯಡ್ ಪಾಲ್ ಪಡೆದ್ ಶ್ರೀ ವನದುರ್ಗಾ ಪ್ರಕೃತಿ ಅನಂತೇಶ್ವರ ಗುರು ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಮಲ್ಲಿಗೆಯಂಗಡಿ ಶ್ರೀ ವನದುರ್ಗಾ ಪ್ರಕೃತಿ ಅನಂತೇಶ್ವರ ಕಾಲಭೈರವ ಗುರು ಸನ್ನಿಧಿ (ರಿ.) ದ ಮುಖ್ಯಸ್ಥೆರ್, ಗುರ್ಕಾರೆ, ಸರ್ವಸದಸ್ಯೆರ್ ಬೊಕ್ಕ ಜೀರ್ಣೋದ್ಧಾರ ಸಮಿತಿ ಲೆಪ್ಪೋಲೆಡ್ ಬಿನ್ನಾಪು ಮಲ್ದೆರ್.

ಈಶ್ವರಗೋಳಿ ಬ್ರಹ್ಮಶ್ರೀ ಮುಗೇರ ಶ್ರೀ ಮಹಾಂಕಾಳಿ ದೈವೊಲ್ಯದ ಜೀರ್ಣೋದ್ಧಾರಗ್ ಭಕ್ತೆರ್ದ್ ಸಕಾಯಗ್ ಬಿನ್ನಾಪು

ಕುಡ್ಲ: ಹೊಸಬೆಟ್ಟು ಈಶ್ವರಗೋಳಿ ಬ್ರಹ್ಮಶ್ರೀ ಮುಗೇರ ಶ್ರೀ ಮಹಾಂಕಾಳಿ ದೈವೊಲ್ಯದ ಜೀರ್ಣೋದ್ಧಾರದ ಕಾರ್ಯಗ್ ಸುಮಾರ್ 1 ಕೋಟಿ 20 ಲಕ್ಷ ರೂ. ದ ಅಂದಾಜಿ ಉಂಡು.

ನೆತ್ತ ಸುಮಾರ್ 30 ಲಕ್ಷ ರೂ.ದ ಕೆಲಸ ಕಜ್ಜೊಲು ನಡತ್ ದ್ಂಡ್. ನನದ ದುಂಬುದ ದಿನಟ್ಟ್ ನೆತ್ತ ಸಾನದ ಶಿಲೆ, ಕಲ್ಲ್ ದ ಗೋಡೆ, ಮರತ ಕೆತ್ತನೆದ ಬೇಲೆ ಬೊಕ್ಕ ಗರ್ಭ ಗುಡಿಕ್ಕ್ ಪಿತ್ತಾಳೆ ಮುಚ್ಚುನ ಬೇಲೆ ನಡಪರೆ ಉಂಡು.

ಅಂಚಾದ್ ಭಕ್ತೆರ್ ಮಾತೆರ್ಲಾ ತನು ಮನ ಧನಟ್ಟ್ ಸಹಕಾರ ಮಲ್ತ್ ದ್, ಈಶ್ವರಗೋಳಿದ ಸತ್ಯೊಲೆನ ಪುಣ್ಯ ಕಾರ್ಯಡ್ ಪಾಲ್ ಪಡೆಯೊಡ್ ಪಂದ್ ಶ್ರೀ ಕ್ಷೇತ್ರದ ಆಡಳಿತ ಸಮಿತಿದ ಬೊಕ್ಕ ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ತೆರಿಪಾದೆರ್.

ಬ್ಯಾಂಕ್ ದ ಪೊಲಬು:
JEERNODDARA SAMITHI SBMMD
Bank Of Baroda, Hosabettu Branch
A/c No :71080100009149
IFSC : BARBOVJHOBE

ಡಿ.17: ಘನ್ಸೋಳಿ ಶ್ರೀ ಮೂಕಾಂಬಿಕಾ ದೇವಲ್ಯದ ಚಾವಡಿಡ್ ಅಯ್ಯಪ್ಪ ಮಹಾಪೂಜೆ

ನವಿಬೊಂಬೈ: ಘನ್ಸೋಳಿ ಶ್ರೀ ಮೂಕಾಂಬಿಕಾ ಧರ್ಮಶಾಸ್ತ ಸೇವಾ ಸಂಸ್ಥೆದ 21ನೇ ವರ್ಷದ ಅಯ್ಯಪ್ಪ ಮಹಾಪೂಜೆ ಡಿ.17 ಐತಾರ ಘನ್ಸೋಳಿ ಶ್ರೀ ಮೂಕಾಂಬಿಕಾ ದೇವಲ್ಯದ ಚಾವಡಿಡ್ ನಡಪರೆ ಉಂಡು.

ಬೊಲ್ಪುಗು ಶ್ರೀ ಮಹಾಗಣಪತಿ ಹೋಮ, ಶ್ರೀ ಅಯ್ಯಪ್ಪ ಸಹಸ್ರ ನಾಮಾರ್ಚನೆ, ಭಜನೆ, ಮಧ್ಯಾಹ್ನ ಮಹಾಪೂಜೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಭಜನೆ, ರಾತ್ರೆ ದೀಪಾರಾಧನೆ, ಮಹಾಪೂಜೆ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು ಶ್ರೀ ಅಯ್ಯಪ್ಪ ಸ್ವಾಮಿನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ರೇಡಿಯೊ ಮಣಿಪಾಲಡ್ ಆರೋಗ್ಯ ದರ್ಶನ

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಬೊಕ್ಕ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲದ ಒಟ್ಟುಸೇರಿಗೆಡ್ ಆರೋಗ್ಯ ದರ್ಶನ ಸರಣಿ ಲೇಸ್ ಡಿ.13 ಬುಧಾರ ಬಯ್ಯಗ್ 5 ಗಂಟೆಗ್ ನ್ಯುಮೋನಿಯಾ ಬಗೆಟ್ಟ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕಸ್ತೂರ್ಬಾ ಮೆಡಿಕಲ್ ಆಂಡ್ ಹಾಸ್ಪಿಟಲ್ ದ ರೆಸಿಪ್ರೇಟರಿ ಮೆಡಿಸಿನ್ ವಿಭಾಗಡ್ ಸಲಹೆಗಾರೆರಾಯಿನ ಡಾ.ದಿವ್ಯಾಬಾಲನ್ ಪಾಲ್ ಪಡೆಯೆರೆ ಉಲ್ಲೆರ್. ಡಿ.14 ಕ್ಕ್ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಮಂಗಳಾ ಸ್ವಿಮ್ಮಿಂಗ್ ಪೂಲ್ ಡ್ ಮುರ್ಕುದು ತೀರ್ ಪೋಯಿನ ಜವನೆ

ಕುಡ್ಲ ಪೇಂಟೆದ ಮಂಗಳಾ ಸ್ವಿಮ್ಮಿಂಗ್ ಪೂಲ್ ಡ್ ಜವನೆಯೊರಿ ಮುರ್ಕುದು ತೀರ್ ಪೋಯಿನ ಘಟನೆ (ಡಿ.12) ಅಂಗಾರೆ ಬಯ್ಯಗ್ ನಡತ್ಂಡ್.

ತೀರ್ ಪೋಯಿನ ಜವನೆ ಹರ್ಯಾಣ ಮೂಲದ ಅಭಿಷೇಕ್ (30) ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ಟ್ ಬರ್ಕೆ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆತ್ಂಡ್. ‌

ಕುಡ್ಲ- ಬೆಂಗ್ಲೂರು ರೈಲ್ ಕ್ಯಾನ್ಸಲ್!

ಎಲ್ಲೆರ್ದ್ (ಡಿ.14) 18 ಮುಟ್ಟ 5 ದಿನ ರಾಜಬೂಡುಗು ಪೋಪುನ ಕೆಲವು ರೈಲ್ ಕ್ಯಾನ್ಸಲ್ ಆತ್ಂಡ್.

ಹಾಸನ ಜಂಕ್ಷನ್ ರೈಲ್ ನಿಲ್ದಾಣಡ್ ಸಿಗ್ನಲಿಂಗ್ ಬೊಕ್ಕ ಇಂಟರ್ ಲಾಕಿಂಗ್ ವ್ಯವಸ್ಥೆನ್ ನವೀಕರಣ ಮಲ್ಪರೆ ಯಾರ್ಡ್ ನ್ ಕುಡ ಮಲ್ಪುನ ಸಲುವಾದ್ ನೈಋತ್ಯ ರೈಲ್ವೆ ಕಾಮಗಾರಿ ಮಲ್ಪರೆ ಉಂಡು. ಅಂಚಾದ್ 5 ದಿನ ಬೆಂಗ್ಲೂರ್, ಹಾಸನ ಬೊಕ್ಕ ಕರಾವಳಿಗ್ ಸಂಪರ್ಕ ಇಪ್ಪುನ ಬೆಂಗ್ಲೂರ್-ಕಣ್ಣೂರು ಪಂಚಗಂಗಾ ಎಕ್ಸ್‌ಪ್ರೆಸ್‌ ಸೇರಿನ ರೈಲ್ ಕ್ಯಾನ್ಸಲ್ ಆತ್ಂಡ್.

ರಂಗ ತರಂಗದ ನಟೆ, ನಿರ್ದೇಶಕೆರ್ ಕಾಪು ಲೀಲಾಧರ ಶೆಟ್ಟಿ ದಂಪತಿ ಆತ್ಮಹತ್ಯೆ!

ಕಾಪು: ಪುಗರ್ತೆದ ರಂಗತರಂಗ ನಾಟಕ ಕೂಟದ ನಟೆ, ನಿರ್ದೇಶಕೆರ್ ಕಾಪು ಲೀಲಾಧರ ಶೆಟ್ಟಿ ಬೊಕ್ಕ ಅರೆನ ಬೊಡೆದಿ ವಸುಂಧರಾ ಶೆಟ್ಟಿ ಒಟ್ಟಿಗೆ ಆತ್ಮಹತ್ಯೆ ಮಲ್ತೊನ್ನ ಘಟನೆ ಅಂಗಾರೆ ರಾತ್ರೆ ನಡತ್ ದ್ಂಡ್.

ಸರಳ ವ್ಯಕ್ತಿ ಆಯಿನ ಲೀಲಾಧರ ಶೆಟ್ಟಿ ಒರ ಕಾಪು ಕ್ಷೇತ್ರರ್ದ್ ವಿಧಾನಸಭೆ ವೋಟುಗು ಉಂತುದು ಇತ್ತೆರ್. ಮೆರೆಗ್ ಮಲ್ಲ ನಾಟಕ ಕೂಟ ಇತ್ತ್ಂಡ್. ಅತ್ತಂದೆ ಕಾಪು ರಂಗತರಂಗ ಕೂಟದ ಯಜಮಾನೆ ಆದ್ ಭಾರೀ ಪುಗರ್ತೆ ಪಡೆತೆರ್. ಬಡಪತ್ತ್ ದಕ್ಲೆಗ್ ಸಕಾಯ ಮಲ್ಪುನ ಮೆರೆಗ್ ಏಪಲ ಸಮಾಜದ ಪರವಾದ್ ಕಾಳಜಿ ಇತ್ತ್ಂಡ್.

ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಮೆರೆನ ಆಪ್ತೆರಾಯಿನ ಮೇರ್ ಕಾಪು ಬಂಟರ ಸಂಘದ ಮಾಜಿ ಗುರ್ಕಾರೆ, ಭಜನಾ ಮಂಡಳಿದ ಸಂಚಾಲಕೆರ್, ನಟೆ ಬೊಕ್ಕ ನಿರ್ದೇಶಕೆರಾದಿತ್ತೆರ್. ಆತ್ಮಹತ್ಯೆಗ್ ಕಾರಣ ದಾದ ಪಂದ್ ನನ ಗೊತ್ತಾವೊಡಾತೆ.