ಕರ್ನಾಟಕ ರಾಜ್ಯಡ್ ಸುದ್ದಿಲು | Karnataka News

ಬೆಂಗ್ಲೂರ್‌ಡು ಪುಲ್ಯಕಾಂಡೆನೇ 15 ಕಡೆಟ್ಟ್ ಐಟಿ ದಾಳಿ!

ಬೆಂಗ್ಲೂರ್: ರಾಜಧಾನಿ ಬೆಂಗ್ಲೂರ್‌ಡ್ ಪುಲ್ಯಕಾಂಡೆ ಐಟಿ ಅಧಿಕಾರಿಲು ಶಾಕ್ ಕೊರ್ದಿತ್ತ್‌ದ್, 15 ನೆರ್ದ್ ಎಚ್ಚದ ಕಡೆಟ್ಟ್ ಐಟಿ ದಾಳಿ ಮಲ್ತ್‌ದೆರ್.

ವಿಜಯನಗರ, ಬಿಟಿಎಂ ಲೇಔಟ್, ಹುಳಿಮಾವು, ಸದಾಶಿವನಗರ, ಸ್ಯಾಂಕಿ ಟ್ಯಾಂಕ್ ಸೇರಿನಂಚನೆ ಮಸ್ತ್ ಕಡೆಟ್ಟ್ ಅಧಿಕಾರಿಲು ದಾಳಿ ಮಲ್ತ್‌ದಿತ್ತ್‌ದ್, ಐಟಿ ಅಧಿಕಾರಿಲೆನ 15 ನೆರ್ದ್ ಎಚ್ಚದ ತಂಡ ದಾಳಿಗಾದ್ ಚೆನ್ನೈ, ದಿಲ್ಲಿರ್ದ್ ರಾತ್ರೆಡೇ ಬೆಂಗ್ಲೂರ್‌ಗ್ ಬೈದೆರ್.

ತೆರಿಗೆ ವಂಚನೆ ಮಲ್ತಿನ ಖಾಸಗಿ ಕಂಪನಿಲು, ಅವೆತ್ತ ಮಾಲೀಕೆರ್ ಅಂಚನೆ ಬಂಗಾರ್‌ದ ಬ್ಯಾರ ಮಲ್ಪುನ ಇಲ್ಲದಕ್ಲೆನ ಮಿತ್ತ್ ದಾಳಿ ಮಲ್ತ್‌ದಿನ ಮಾಹಿತಿ ತಿಕ್ಕ್‌ದ್ಂಡ್. ಸದ್ಯಗ್ ದಾಳಿ ಮಲ್ತ್‌ದ್ ದಾಖಲೆದ ಪರಿಶೀಲನೆ ಮಲ್ತೊಂದುಲ್ಲೆರ್.

ಎಲ್ ಪಿಜಿ ಗ್ಯಾಸ್ ಕನಪಿನಕ್ಲೆಗ್ ಕಮಿಷನ್ ಎಚ್ಚ, ಗಿರಾಕಿಲೆಗ್ 8.24 ರೂ. ನಷ್ಟ!

ಅಟಿಲ್‌ಗ್ ಗಲಸುನ ಎಲ್‌ಪಿಜಿ ಗ್ಯಾಸ್ ಕೊರ್ಪಿನಕ್ಲೆನ ಕಮಿಷನ್ ಕಾಸ್‌ನ್ ಕೇಂದ್ರ ಪೆಟ್ರೋಲಿಯಂ ಬೊಕ್ಕ ನೈಸರ್ಗಿಕ ಅನಿಲ ಸಚಿವಾಲಯ ಎಚ್ಚ ಮಲ್ತ್ಂಡ್.

14 ಕೆಜಿ ಸಿಲಿಂಡರ್ ಕಮಿಷನ್‌ನ್ 64.84 ರೂಪಾಯಿರ್ದ್ 73.18 ರೂಪಾಯಿಗ್ ಎಚ್ಚ ಆತ್ಂಡ್. ಪಂಡ 8.24 ರೂಪಾಯಿ ಎಚ್ಚ ಆತ್ಂಡ್. 5 ಕೆಜಿ ಸಿಲಿಂಡರ್‌ದ ಕಮಿಷನ್ ಕಾಸ್ 32.42 ರೂಪಾಯಿರ್ದ್ 36.54 ರೂಪಾಯಿಗ್ ಎಚ್ಚ ಮಲ್ತ್‌ದೆರ್. ನನ ಗ್ರಾಹಕೆರ್ ಸಿಲಿಂಡರ್ ಕಾಸ್‌ದ ಒಟ್ಟಿಗೆ ಕಮಿಷನ್ ಕಾಸ್‌ನ್‌ಲ ಕೊರೊಡಾಪುಂಡು.

ಸಿಮ್ ಕಾರ್ಡ್ ದೆತೊನರೆ ಪೊಸ ರೂಲ್ಸ್

ದಿಲ್ಲಿ: ಆನ್‌ಲೈನ್‌ಡ್ ಮಸ್ತ್ ವಂಚನೆ ಆವೊಂದಿಪ್ಪುನೆಡ್ದಾವರ ಉಂದೆನ್ ತೂಯಿನ ಕೇಂದ್ರ ಸರ್ಕಾರ ಸಿಮ್ ಕಾರ್ಡ್ ಸಂಖ್ಯೆನ್ ಕಮ್ಮಿ ಮಲ್ಪರೆ ಪೊಸ ನಿಯಮ ಜಾರಿಗ್ ಕನಯರೆ ದುಂಬು ಬೈದ್ಂಡ್.

ಒದ ಮುಟ್ಟ ಒಂಜಿ ಐಡಿಡ್ 9 ಸಿಮ್‌ಕಾರ್ಡ್‌ ಕೊರೊಂದಿತ್ತೆರ್. ಇತ್ತೆ 4 ಸಿಮ್ ದೆತೊನರೆ ಮಾತ್ರ ಅನುಮತಿ ಕೊರ್ತ್ಂಡ್. ಉಂದೆರ್ದಾವರ ಆನ್‌ಲೈನ್ ವಂಚನೆಗ್ ಬೇತೆ ಬೇತೆ ಸಿಮ್ ಕಾರ್ಡ್ ಗಲಸುನೆನ್ ತಪ್ಪಾವೊಲಿ. ಉಂದೆತ್ತ ಮಾರ್ಗಸೂಚಿಗ್ ದೂರ ಸಂಪರ್ಕದ ಸಚಿವೆರ್ ಅಶ್ವಿನಿ ವೈಷ್ಣವ್ ಅನುಮೋದನೆ ಕೊರ್ದಿತ್ತ್‌ದ್, ಸರಿಯಾಯಿನ ನಿಯಮ ಜಾರಿ ಆಯರೆ ಉಂಡು ಪಂದ್ ತೆರಿಪಾದ್ಂಡ್.

ಸಾರ್ವಜನಿಕೆರೆನ ಸಮಸ್ಯೆ ಕೇನರೆ ಟ್ವಿಟರ್ ಅಕೌಂಟ್ ಓಪನ್ ಮಲ್ತಿನ ಸಿಎಂ ಆಫೀಸ್

ಬೆಂಗ್ಲೂರ್: ಸಾರ್ವಜನಿಕೆರೆಗ್ ಆಪಿನ ಸಮಸ್ಯೆನ್ ಕೇನರೆ ಮುಖ್ಯಮಂತ್ರಿಲೆನ ಕಚೇರಿದ ಅಧಿಕಾರಿಲು ಬೊಕ್ಕ ಸಿಬ್ಬಂದಿ ಮೊಕುಲೆಗ್ ಗೇನಗ್ ಕನಯರೆ ಪೊಸ ಟ್ವಿಟರ್ ಖಾತೆನ್ ಓಪನ್ ಮಲ್ತ್‌ದೆರ್.

ಈ ಬಗೆಟ್ ಮುಖ್ಯಮಂತ್ರಿ ಕಚೇರಿ ಮಾಧ್ಯಮಡ್ ಪ್ರಕಟನೆ ಮಲ್ತ್‌ದಿತ್ತ್‌ದ್, https://twitter.com/osd_cmkarnataka ಪುದರ್‌ದ ಟ್ವಿಟರ್ ಖಾತೆಗ್ ಸಾರ್ವಜನಿಕೆರೆನ ಸಮಸ್ಯೆದ ಬಗೆಟ್ ಸಮಸ್ಯೆನ್ ಟ್ಯಾಗ್ ಮಲ್ಪೊಲಿ ಪಂದ್ ತೆರಿಪಾದೆರ್.