ತುಳು ಸುದ್ದಿ

ಕುಡ್ಲ : ಸ್ವೀಟ್ ಸಿಂಫನಿ ಇನ್ಸ್ಟಿಟ್ಯೂಟ್ ಆಫ್ ಮ್ಯೂಸಿಕ್ ಸಂಸ್ಥೆದ ಸಂಗೀತ ಕ್ಷೇತ್ರಡ್ ಸಂಪುಟ 2′ ತ್ತ ಪೊಸ ಕೃತಿ ಉದಿಪನ

ಕುಡ್ಲದ ಕುಲಶೇಖರಡ್ ಇಪ್ಪುನ ‘ಸ್ವೀಟ್ ಸಿಂಫನಿ ಇನ್ಸ್ಟಿಟ್ಯೂಟ್ ಆಫ್ ಮ್ಯೂಸಿಕ್’ ಸಂಸ್ಥೆದ ಪ್ರಕಾಶನಡ್ ಇಂಗ್ಲಿಷ್, ಹಿಂದಿ ಬೊಕ್ಕ ಕನ್ನಡದ ಪುಗರ್ತೆದ ಪದ್ಯನ್ ಪಾಶ್ಚಿಮಾತ್ಯ ನೊಟೇಶನ್ ಮುಕೇನ ವಯಲಿನ್, ಗಿಟಾರ್ ಬೊಕ್ಕ ಕೀಬೋರ್ಡ್ ನ್ ನುಡಿಸಾಯೆರೆ ಸಕಾಯ ಆಪುನ ಸಂಪುಟ 2′ ತ್ತ ಪೊಸ ಕೃತಿ ಕರಿನ ವಾರ ಕುಡ್ಲಡ್ ಉದಿಪನ ಆಂಡ್.

ಉದ್ಯಮಿ, ಸಮಾಜಸೇವಕಿ, ಮಾನವ ಹಕ್ಕುಲೆನ ಹೋರಾಟಗಾರ್ತಿ ಬೆನೆಟ್ ನವಿತಾ ಕ್ರಾಸ್ತ ಮೇರ್ ಕೃತಿ ಬುಡುಗಡೆ ಮಲ್ತ್ ದ್ ಪಾತೆರ್ದ್, “ಸಂಗೀತ ಶಿಕ್ಷಕೆರ್ ಬೊಕ್ಕ ರಂಗ ಕಲಾವಿದೆರ್ ವಿಜಯ್ ನೊರೊನ್ಹ ಮೆರೆನ ಸುಮಾರ್ ದಶಕದ ಅಧ್ಯಾಪನ‌ದ ಅನುಭವ ಬೊಕ್ಕ ವಾದನರಂಗದ ಪರಿಶ್ರಮ ಪಾಂಡಿತ್ಯಲು ಈ ಕೃತಿದ ಪ್ರತಿ ಪುಟನ್ ಸಮೃದ್ಧ ಮಲ್ದ್ಂಡ್. ಸಂಗೀತ ಕಲಿಕಾರ್ಥಿಲೆನ ಕೈಬಿರೆಲ್ ಪತ್ತ್ ದ್ ದುಂಬು ನಡಪಾವುನ ಸ್ಪಷ್ಟ ಸೂಚನೆಲು ಬೊಕ್ಕ ಉತ್ತಮ ಮಾರ್ಗದರ್ಶನನ್ ಕೃತಿ ಕೊರ್ಪುಂಡು” ಪಂದ್ ನೆಂಪು ಮಲ್ತೆರ್.

ಮಲ್ಲ ಬಿನ್ನೆರಾಯಿನ ಸಂಗೀತಗಾರೆ ಬೊಕ್ಕ ಶಾಲೋಮ್ ರೆಕಾರ್ಡಿಂಗ್ ಸ್ಟುಡಿಯೋ ಮಾಲಿಕೆರ್ ಡಿಜೆ ರಾಕೇಶ್ ಜೋಸೆಫ್ ಡಿಸೋಜ ಮೇರ್ “ಸ್ವೀಟ್ ಸಿಂಫನಿ ಸಂಸ್ಥೆದ ಮಾಲಕೆರ್, ಉತ್ತಮ ಸಂಗೀತಗಾರೆರ್ ಆಯಿನ ಕೃತಿಕಾರೆ ವಿಜಯ್ ನೊರೊನ್ಹ ಮೇರ್ ಮಾತ ಹಂತದ ಸಂಗೀತಾರ್ಥಿಲು ತನ್ನ ನೆಚ್ಚಿನ ರಾಗಡ್ ಪ್ರಭುತ್ವ ಸಾಧಿಸಾಯೆರೆ ಅವಶ್ಯ ಇಪ್ಪುನ ಕೌಶಲ್ಯ ಬೊಕ್ಕ ತಂತ್ರನ್ ಈ ಕೃತಿಟ್ಟ್ ವಿನ್ಯಾಸ ಮಲ್ತೆರ್. ಸಾರ್ವಕಾಲಿಕ ಜನಪ್ರಿಯತೆದ ಮಧುರ ಗೀತೆಲೆರ್ದ್ ಸಮಕಾಲೀನ ಸೂಪರ್ ಹಿಟ್ ಗೀತೆ ಮುಟ್ಟ, ಬೇತೆ ಬೇತೆ ತಲೆಮಾರ್ ದ, ಬೇತೆ ಬೇತೆ ಭಾಷೆದ ವೈವಿಧ್ಯಮಯ ಪದ್ಯಲೆನ ಪಾಶ್ಚಿಮಾತ್ಯ ನೊಟೇಶನ್ ನ್ ಕೊರ್ಪುನ ಮುಕೇನ ಉದಯೋನ್ಮುಖ ಸಂಗೀತಗಾರೆರೆಗ್ ಈ ಬೂಕು ಬಹು ಉಪಯುಕ್ತ ಆತ್ಂಡ್” ಪಂದ್ ಪಂಡೆರ್.

ಜಯರಾಜ್ ರೇಗೊ ಬಿನ್ನೆರೆನ್ ಎದ್ಕೊಂದು, ಕೃತಿನ್ ಪರಿಚಯ ಮಲ್ತೆರ್. ಸ್ವೀಟ್ ಸಿಂಫನಿ ಸಂಸ್ಥೆದ ಮಾಲಕೆರ್ ವಿಜಯ್ ನೊರೊನ್ಹ ಮೇರ್ ಮಾತೆರೆಗ್ಲಾ ಸೊಲ್ಮೆ ಸಂದಾಯೆರ್.

ಏ.5 ಸ್ವತಂತ್ರ ತುಳುನಾಡ ಆಳ್ವಿಕೆ ಸುರು ಮಲ್ತಿನ ದಿನ: ಕೆದಂಬಾಡಿ ರಾಮಯ್ಯ ಗೌಡೆರೆನ ಪ್ರತಿಮೆಗ್ ಪುಷ್ಪಾರ್ಚನೆ ಮಲ್ತಿನ ಪದ್ಮರಾಜ್ ಆರ್

ತುಳುನಾಡ ಸ್ವಾತಂತ್ರ್ಯ ಹೋರಾಟಗಾರೆರೆಗ್ ಗೌರವ ನಮನ ಸಂದಾಯಿನ ಕಾಂಗ್ರೆಸ್ ಅಭ್ಯರ್ಥಿ

ಕುಡ್ಲದ ಬಾವುಟಗುಡ್ಡೆಡ್ ಇಪ್ಪುನ ಸ್ವಾತಂತ್ರ್ಯ ಹೋರಾಟಗಾರೆ ಕೆದಂಬಾಡಿ ರಾಮಯ್ಯ ಗೌಡೆರೆನ ಪ್ರತಿಮೆಗ್ ಕಾಂಗ್ರೆಸ್ ಅಭ್ಯರ್ಥಿ ಪದ್ಮರಾಜ್ ಆರ್. ಮೇರ್ ಪುಷ್ಪಾರ್ಚನೆ ಮಲ್ತೆರ್.

ಸುರುತ್ತ ಸ್ವಾತಂತ್ರ್ಯ ಸಂಗ್ರಾಮಗ್ ದುಂಬೇ ತುಳುನಾಡ್ ಡ್ ಸ್ವಾತಂತ್ರ್ಯ ಪೊರ್ಂಬಾಟ ನಡತ್ತ್ ದಿತ್ತ್ಂಡ್. ಉಂದೆನ್ ಅಮರ ಸುಳ್ಯದ ದಂಗೆ ಪಂದ್ ಲೆತ್ತ್ಂಡ, ನನ ಕೆಲವೆರ್ ತುಳುನಾಡ ಸ್ವಾತಂತ್ರ್ಯ ಸಂಗ್ರಾಮ ಪಂದ್ ಲೆತ್ತ್ ದಿತ್ತೆರ್. ಈ ಪೊರ್ಂಬಾಟಡ್ ಕೆದಂಬಾಡಿ ರಾಮಯ್ಯ ಗೌಡ ಮೇರ್ ಪ್ರಮುಖ ಪಾತ್ರ ಒಯಿಸ್ ದಿತ್ತೆರ್.

ಈ ಪೊರ್ಂಬಾಟಡ್ ಬ್ರಿಟಿಷೆರೆನ್ ಪರಾಭವ ಮಲ್ತಿನ ತುಳುನಾಡ ಪೊರ್ಂಬಾಟಗಾರೆರ್ ನನದ 13 ದಿನ ಸ್ವತಂತ್ರ ತುಳುನಾಡ್ ನ್ ಆಳ್ವಿಕೆ ಮಲ್ತ್ ದಿತ್ತೆರ್. ಇಂಚ ಆಳ್ವಿಕೆ ಸುರು ಮಲ್ತಿನ ದಿನ ಏ.5 ಈ ನಾಡ್ ದ ಸ್ವಾತಂತ್ರ್ಯಗಾದ್ ತನ್ನ ಪ್ರಾಣಾರ್ಪಣೆ ಮಲ್ತಿನ ಪೊರ್ಂಬಾಟಗಾರೆ ಕೆದಂಬಾಡಿ ರಾಮಯ್ಯ ಗೌಡ ಮೆರೆನ ಪ್ರತಿಮೆಗ್ ಪುಷ್ಪಾರ್ಚನೆ ಸಂದಾವುನ ಮುಕೇನ ತುಳುನಾಡ ಸಂಗ್ರಾಮಡ್ ಪಾಲ್ ಪಡೆಯಿನ ವೀರೆರೆಗ್ ಗೌರವ ಸಂದಾಯೆರ್.‌

ಎ.6-8: ಉರ್ವ ಶ್ರೀ ವೈದ್ಯನಾಥೇಶ್ವರ ಕೋಡ್ದಬ್ಬು ದೈವಸ್ಥಾನಡ್ ವರ್ಷಾವಧಿ ನೇಮ

ಕುಡ್ಲ: ಉರ್ವ ಶ್ರೀ ವೈದ್ಯನಾಥೇಶ್ವರ ಕೋಡ್ದಬ್ಬು ದೈವಸ್ಥಾನಡ್ ವರ್ಷಾವಧಿ ನೇಮ ಎ.6-8 ಮುಟ್ಟ ನಡಪರೆ ಉಂಡು.

ಎ.6 ಸನಿಯಾರ ಬೊಲ್ಪುಗು ಪ್ರಾರ್ತನೆ, ಗಣಹೋಮ, ಭಂಡಾರ ಏರಿಯೆರೆ, ಮಧ್ಯಾಹ್ನ ಕಲಶ ಸ್ಥಾಪನೆ ಪುಷ್ಪಾಲಂಕಾರ ರಾತ್ರೆ ಭಜನೆ, ನೇಮ, ಶ್ರೀ ವೈದ್ಯನಾಥೇಶ್ವರ ಕೋಡ್ದಬ್ಬು ದೈವೊದ ನೇಮ, ತನ್ನಿಮಾನಿಗ ದೈವೊದ ನೇಮ ನಡಪರೆ ಉಂಡು.

ಎ.7 ಐತಾರ ಬೊಲ್ಪುಗು ಶ್ರೀ ಕೋಡ್ದಬ್ಬು ದೈವ ಬೊಕ್ಕ ಶ್ರೀ ಮಾರಿಯಮ್ಮ ದೇವಿನ ಭೇಟಿ, ಬೀದಿ ಸವಾರಿ ಬಯ್ಯಗ್ ರಾಹು ಗುಳಿಗ ನೇಮ ರಾತ್ರೆ ಗುಳಿಗ ಪಂಜುರ್ಲಿ ನೇಮ, ಮಾಯಿಲಜ್ಜ ದೈವೊದ ನೇಮ ನಡಪರೆ ಉಂಡು.

ಎ.8 ಸೋಮಾರ ಮಧ್ಯಾಹ್ನ ಪ್ರಸಾದ ವಿತರಣೆ, ಅನ್ನ ಪ್ರಸಾದ ಸೇವೆ, ಭಂಡಾರ ಜಪ್ಪುಂಡು.

ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಗೌರವಾಧ್ಯಕ್ಷೆರ್ ಡಾ.ಬಿ‌.ಜಿ ಸುವರ್ಣ, ಅಧ್ಯಕ್ಷೆರ್ ಯು.ಎಸ್ ಬಾಲಕೃಷ್ಣ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಎ.15-17: ಬೊಂಬೈ ಶ್ರೀ ಮಹಾಕಾಳಿ ಮಂದಿರಡ್ ವಾರ್ಷಿಕ ಉಚ್ಚಯ

ಬೊಂಬೈ ಶ್ರೀ ಮಹಾಕಾಳಿ ಮಂದಿರಡ್ ಎ.15-17 ಮುಟ್ಟ ವಾರ್ಷಿಕ ಉಚ್ಚಯ ನಡಪರೆ ಉಂಡು.

ಎ.15 ಸೋಮಾರ ಬೊಲ್ಪುಗು ಮಹಾಗಣಪತಿ ಹೋಮ, ರಾತ್ರೆ ವಾಸ್ತು ಬಲಿ, ಸುದರ್ಶನ ಹೋಮ ನಡಪರೆ ಉಂಡು.

ಎ.16 ಅಂಗಾರೆ ಬಯ್ಯಗ್ ಭಜನೆ, ಮಹಾಪೂಜೆ ನಡಪರೆ ಉಂಡು.

ಎ.17 ಬುದಾರ ಬೊಲ್ಪುಗು ಮಹಾ ಕಲಶಾಭಿಷೇಕ, ಮಧ್ಯಾಹ್ನ ಮಹಾಪೂಜೆ, ಶ್ರೀ ಸತ್ಯನಾರಾಯಣ ಪೂಜೆ, ಬಯ್ಯಗ್ ಇಸೇಸ ಅಲಂಕಾರ, ದೀಪಾರಾಧನೆ, ದೇವಿ ಅವೇಶ

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀ ಜಗನ್ಮಾತೆನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಮೊಕ್ತೇಸರೆರ್ ಚಂದ್ರಶೇಖರ್ ಗಿ. ಪೂಜಾರಿ, ಪ್ರಧಾನ ಅರ್ಚಕೆರ್ ದೇವದಾಸ್ ತಂತ್ರಿ ಮುಲ್ಕಿ ಲೆಪ್ಪೋಲೆಡ್ ತೆರಿಪಾದೆರ್.

ಕೊಳಚಿಕಂಬಳ ಶ್ರೀ ಜಾರಂದಾಯ ದೈವಸ್ಥಾನಡ್ ಗೌಜಿದ ನೇಮ

ಮುಲ್ಕಿ ಸೀಮೆದ ಪುಗರ್ತೆದ ಕೊಳಚಿಕಂಬಳ ಶ್ರೀ ಜಾರಂದಾಯ ದೈವಸ್ಥಾನಡ್ ಶ್ರೀ ಜಾರಂದಾಯ, ಶ್ರೀ ಧೂಮಾವತಿ ಬೊಕ್ಕ ಪರಿವಾರ ದೈವೊಲೆನ ನೇಮ ಗುರುವಾರ ಭಾರಿ ಗೌಜಿಡ್ ನಡತ್ಂಡ್.

ಎ.3 ಕ್ಕ್ ದೈವಸ್ಥಾನಡ್ ಭಂಡಾರ ಜತ್ತ್ ದ್ ಕೊಡಿ ಏರ್ಂಡ್.‌ ಎ.4 ಗುರುವಾರ ಬೊಲ್ಪುಗು ನಾಗಸನ್ನಿಧಿಡ್ ನಾಗತಂಬಿಲ, ದೈವಸ್ಥಾನಡ್ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ಶ್ರೀ ಜಾರಂದಾಯ ಶ್ರೀ ಧೂಮಾವತಿ ಬೊಕ್ಕ ಪರಿವಾರ ದೈವೊಲೆನ ನೇಮ ಗೌಜಿರ್ದ್ ನಡತ್ಂಡ್.

ಈ ಪೊರ್ತುಡು ದೈವಸ್ಥಾನದ ಗುರಿಕಾರೆರ್, ಆಡಳಿತ ಸಮಿತಿದ ಅಧ್ಯಕ್ಷೆರ್, ಸದಸ್ಯೆರ್, ಪದುಕೆರ್ ಪಾಲ್ ಪಡೆದಿತ್ತೆರ್. ಎ.5 ಸುಕ್ರಾರ ಮಾಯಂದಾಲೆ ನೇಮ ನಡತ್ಂಡ್.

ಇತಿಹಾಸ ಉಪನ್ಯಾಸಕೆರೆನ ಸಂಘದ ಜಿಲ್ಲಾಧ್ಯಕ್ಷೆರಾಧ ಪ್ರಸನ್ನ ಎನ್.ಎಚ್ ಆಯ್ಕೆ

ಸುಬ್ರಹ್ಮಣ್ಯ: ದ.ಕ.ಜಿಲ್ಲಾ ಇತಿಹಾಸ ಉಪನ್ಯಾಸಕೆರೆನ ಸಂಘದ 2024-25ನೇ ಸಾಲ್ ದ ಪೊಸ ಅಧ್ಯಕ್ಷೆರಾದ್ ಸುಳ್ಯ ಶಾರದಾ ಪದವಿಪೂರ್ವ ಕಾಲೇಜ್ ದ ಇತಿಹಾಸ ಉಪನ್ಯಾಸಕೆರ್ ಪ್ರಸನ್ನ ಎನ್.ಎಚ್ ಆಯ್ಕೆ ಆತೆರ್.

ಇಂಚಿಪ್ಪ ಸಂಘದ ಅಧ್ಯಕ್ಷೆರ್ ರಾಮಚಂದ್ರ ನಾಯಕ್ ಮೆರೆನ ಗುರ್ಕಾರ್ಮೆಡ್ ನಡತಿನ ವಾರ್ಷಿಕ ಸಭೆಟ್ಟ್ ಈ ಆಯ್ಕೆ ನಡತ್ಂಡ್.

ಕಾರ್ಯದರ್ಶಿಯಾದ್ ಕುಡ್ಲದ ಬಿಇಎಂ ಪದವಿಪೂರ್ವ ಕಾಲೇಜ್ ದ ಐತಪ್ಪ.ಎಂ ನೇಮಕ ಆಯೆರ್.

ಉಪಾಧ್ಯಕ್ಷೆರಾದ್ ಕಾಟಿಪಳ್ಳ ಸರಕಾರಿ ಕಾಲೇಜ್ ದ ಪೂರ್ಣಿಮಾ ಕಾಮತ್, ಕೋಶಾಧಿಕಾರಿಯಾದ್ ಬೆಸೆಂಟ್ ಪದವಿಪೂರ್ವ ಕಾಲೇಜ್ ದ ಗಾಯತ್ರಿ ಶೆಟ್ಟಿ, ಸಂಘಟನಾ ಕಾರ್ಯದರ್ಶಿಯಾದ್ ಪುತ್ತೂರು ಸರಕಾರಿ ಕಾಲೇಜ್ ದ ಮನಮೋಹನ್, ಜತೆ ಕಾರ್ಯದರ್ಶಿಯಾದ್ ಬಲ್ಮಠ ಸರಕಾರಿ ಕಾಲೇಜ್ ದ ಕೃಷ್ಣಯ್ಯ, ಗೌರವ ಸಲಹೆಗಾರೆರಾದ್ ಬೆಸೆಂಟ್ ವಿದ್ಯಾಲಯದ ರೂಪಾಕ್ಷ.ಎಂ ಆಯ್ಕೆ ಆಯೆರ್.

ತಾಲೂಕ್ ಪ್ರತಿನಿಧಿಯಾದ್ ರತ್ನಾಕರ ಸುಬ್ರಹ್ಮಣ್ಯ (ಸುಳ್ಯ,ಕಡಬ), ರೋಹಿತಾ, ಯೋಗಿತಾ, ಧರ್ಮಪಾಲ (ಕುಡ್ಲ), ಗಿರೀಶ್ ತಂತ್ರಿ ಕಟೀಲ್ (ಮುಲ್ಕಿ, ಬೆದ್ರ), ದಾಮೋದರ್ (ಪುತ್ತೂರು), ಶೈಲಜಾ (ಬೊಲ್ತೇರ್), ರೇವತಿ (ಉಳ್ಳಾಲ) ನೇಮಕ ಆಯೆರ್.

ಬೆದ್ರ ಜೈನ್ ಪದವಿಪೂರ್ವ ಕಾಲೇಜ್ ದ ಪ್ರಾಚಾರ್ಯೆರ್ ಡಾ.ಪ್ರಭಾತ್ ಬಲ್ನಾಡ್ ಆಯ್ಕೆ ಪ್ರಕ್ರಿಯೆ ನಡಪಾಯೆರ್‌.

ಎ.7: ಬಿಜೆಪಿ ಮಹಾಸಮಾವೇಶ

ಲೋಕಸಭೆ ವೋಟುದ ಲೆಕ್ಕೊಡು ಬೊಂಬೈಡ್ ಇಪ್ಪುನ ದಕ್ಷಿಣ ಕನ್ನಡ, ಒಡಿಪು-ಚಿಕ್ಕಮಗಳೂರು ಬೊಕ್ಕ ಕಾಸ್ರೋಡು ಲೋಕಸಭಾ ಕ್ಷೇತ್ರದ ಬಂಧುಲೆನ ಮಹಾಸಮಾವೇಶ ಎ.7 ಐತಾರ ಬಯ್ಯಗ್ ನಡಪರೆ ಉಂಡು.

ಈ ಲೇಸ್ ಡ್ ಒಡಿಪು-ಚಿಕ್ಕಮಗಳೂರು ಲೋಕಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಕೋಟ ಶ್ರೀನಿವಾಸ ಪೂಜಾರಿ, ಕಾಸ್ರೋಡು ಲೋಕಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಎಂ.ಎಲ್ ಅಶ್ವಿನಿ, ದಕ್ಷಿಣ ಕನ್ನಡ ಲೋಕಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಕ್ಯಾಪ್ಟನ್ ಬೃಜೇಶ್ ಚೌಟ ಪಾಲ್ ಪಡೆಯೆರೆ ಉಲ್ಲೆರ್.

ಮಾಯಿದೇ ದೇವುಸ್ ಚರ್ಚ್ ಸಭಾಂಗಣಡ್ ಚಿತ್ತಾರ ಜೋಕ್ಲೆನ ಬೇಸಿಗೆ ಶಿಬಿರ ಉದಿಪನ

ಪುತ್ತೂರು: ಮಾಯಿದೇ ದೇವುಸ್ ಅನುದಾನಿತ ಹಿ.ಪ್ರಾ ಶಾಲೆ, ಸಂತ ವಿಕ್ಟರ್ ಆಂಗ್ಲ ಮಾಧ್ಯಮ ಹಿ.ಪ್ರಾ ಶಾಲೆ, ಮೇಘ ಕಲಾ ಆರ್ಟ್ಸ್&ಡ್ಯಾನ್ಸ್, ಮುರಳಿ ಬ್ರದರ‍್ಸ್ ಡ್ಯಾನ್ಸ್ ಕ್ರೂ ದ ಒಟ್ಟುಸೇರಿಗೆಡ್ ಮಾಯಿದೇ ದೇವುಸ್ ಚರ್ಚ್ ಸಭಾಂಗಣಡ್ ನಡಪರೆ ಇಪ್ಪುನ ಚಿತ್ತಾರ ಜೋಕ್ಲೆನ ಬೇಸಿಗೆ ಶಿಬಿರ ಎ.2 ಕ್ಕ್ ಉದಿಪನ ಆಂಡ್.

ಬೇಸಿಗೆ ಶಿಬಿರನ್ ತುಡರ್ ಅರ್ಲಾದ್ ಉದಿಪನ ಮಲ್ತಿನ ಮಾಯಿದೇ ದೇವುಸ್ ಸಮೂಹ ಶಿಕ್ಷಣ ಸಂಸ್ಥೆಲೆನ ಸಂಚಾಲಕೆರ್ ಲಾರೆನ್ಸ್ ಮಸ್ಕರೇನಸ್ ಪಾತೆರ್ದ್, ಬೇಸಿಗೆ ಶಿಬಿರಲು ಜೋಕ್ಲೆಡ ಇಪ್ಪುನ ಸುಪ್ತವಾಯಿನ ಪ್ರತಿಭೆಲೆನ ಬುಲೆವಣಿಗೆಗ್ ಸೂಕ್ತ ವೇದಿಕೆ ಆತ್ಂಡ್. ಪೋಷಕೆರೆಗ್ ಜೋಕ್ಲೆನ ಮಿತ್ತ್ ಆಸೆ, ಭರವಸೆಲು ಇತ್ತ್ ದ್ ಅಯಿಕ್ಕ್ ಪೂರಕವಾಯಿನ ಜೋಕುಲು ಎಡ್ಡೆ ಶಿಕ್ಷಣ ಪಡೆವೊಡು. ಬೇತೆ ಬೇತೆ ಪ್ರತಿಭೆನ್ ಕಲ್ತೊನೊಡು. ಶಿಬಿರ, ತರಬೇತಿನ್ ಸದುಪಯೋಗ ಮಲ್ತೊನೊಡು. ಸ್ವಚ್ಚಂದ ಮನಸ್ಸು, ಉತ್ತಮ ಚಿಂತನೆ, ಹೃದಯ ವೈಶಾಲ್ಯತೆನ್ ನಿಕ್ಲೆನವು ಆವೊಡು. ವಿನಯಶೀಲತೆ, ಮೌಲ್ಯ, ಸಂಸ್ಕಾರನ್ ಜೀವನಡ್ ಅಳವಡಿಸಾವೊಡು ಪಂದ್ ಪಂಡೆರ್.

ಮಲ್ಲ ಬಿನ್ನೆರ್ ವಿವೇಕಾನಂದ ಕಾನೂನು ಮಹಾವಿದ್ಯಾಲಯದ ರಾಜ್ಯಶಾಸ್ತ್ರ ವಿಭಾಗದ ಸಹಾಯಕ ಪ್ರಾಧ್ಯಾಪಕೆರ್ ಲಕ್ಷ್ಮೀಕಾಂತ ರೈ ಅನಿಕೂಟೇಲ್ ಪಾತೆರ್ದ್, ಜೋಕ್ಲೆಗಾದ್ ತಯಾರ್ ಆಯಿನ ಬೇಸಿಗೆ ಶಿಬಿರಲು ಶಿಕ್ಷಣ-ಅಂಕಲು- ಗ್ರೇಡ್ ಪದ್ಧತಿರ್ದ್ ಪಿದಯಿ ಇಪ್ಪುರ್ನೆದಾವೆರ, ಜೋಕ್ಲೆನ ಮನಸ್ಸ್ ದ ದುನ್ನನ್ ಕಮ್ಮಿ ಮಲ್ಪುಂಡು. ವರ್ಷ ಇಡೀ ಪರೀಕ್ಷೆಲೆನ ಜಂಜಾಟರ್ದ್ ಇಪ್ಪುನ ಮೊಕ್ಲೆನ ಮನಸ್ಸ್ ಗ್ ಶಿಬಿರಲು ಸಹಾಯ ಆಪುಂಡು. ಶಿಬಿರಡ್ ಪಾಲ್ ಪಡೆಪುರ್ನೆದಾವೆರ, ದೈಹಿಕ ಕ್ಷಮತೆ, ಅರೋಗ್ಯ ಎಚ್ಚಾಪುಂಡು. ಮುಲ್ಪ ಕಲ್ಪಾವುನ ಪೊಸ ಬಗೆತ್ತ ಗೊಬ್ಬುಲು, ಕಲೆ, ಪೇಂಟಿಂಗ್, ನೃತ್ಯ ದಂಚಿನ ಸಾಂಸ್ಕೃತಿಕ ಚಟುವಟಿಕೆಲು ಜೋಕ್ಲೆಡ ಸುಪ್ತವಾಯಿನ ಕ್ರಿಯಾಶೀಲತೆನ್ ತೆರಿವೊನಿಯೆರೆ, ಸಭಾ ಕಂಪನನ್ ದೂರ ಮಲ್ಪುನಲ್ಪ ಪ್ರಮುಖ ಪಾತ್ರ ಒಯಿಸೊಂಡು ಪಂದ್ ಪಂಡೆರ್.

ಉಬಾರ್ ರಾಮನಗರ ಜನಾರ್ಪಣ ಸೇವಾ ಸಂಸ್ಥೆದ ಸಂಸ್ಥಾಪಕೆರ್ ಜಯರಾಜ್ ಅಮೀನ್ ಪಾತೆರ್ದ್, ಜೋಕ್ಲೆಗ್ ಶಿಕ್ಷಣದೊಟ್ಟಿಗೆ ಆಯಿಕ್ಕ್ ಪೂರಕವಾಯಿನ ಚಟುವಟಿಕೆಲೆಡ್ ಇಪ್ಪುನೇ ಮುಖ್ಯ. ರಜೆತ್ತ ಸಮಯಡ್ ಶಿಬಿರಲೆಡ್ ಇಪ್ಪುರ್ನೆದಾವೆರ ಜೋಕ್ಲೆನ ಮನಸ್ಸ್ ಡ್ ಬರ್ಪುನ ಬೊರ್ಚಂದಿನ ಇಚಾರನ್ ದೆಪ್ಪೆರೆ ಸಹಕಾರಿ ಆಪುಂಡು ಪಂದ್ ಪಂಡೆರ್.

ಜಿಲ್ಲಾ ಯುವ ಪ್ರಶಸ್ತಿ ಪುರಸ್ಕೃತೆರ್, ಪುತ್ತೂರು ಎಂ.ವಿ ಗ್ರೂಪ್ ಆಫ್ ಸೋಸಿಯಲ್ ಸರ್ವೀಸಸ್‌ದ ಮುಖ್ಯಸ್ಥೆರ್ ಪಿ.ವಿ ಸುಬ್ರಮಣಿ ಪಾತೆರ್ದ್, ಇನಿ ಜೋಕುಲು ಮಾತ ಕ್ಷೇತ್ರಲೆಡ್ ಬುಲೆಂಡ ಮಾತ್ರ ದುಂಬಾರಿಯೆರೆ ಸಾಧ್ಯ. ಶಿಬಿರಲು ಜೋಕ್ಲೆನ ಸರ್ವತೋಮುಖ ಬುಲೆವಣಿಗೆಗ್ ಸಹಕಾರಿ ಆತ್ಂಡ್. ಜೋಕುಲು ಸಮಾಜದ ಮುಖ್ಯ ವಾಹಿನಿಗ್ ಬರಿಯೆರೆ ಸಹಕಾರಿ ಆಪುಂಡು ಪಂದ್ ಪಂಡೆರ್.

ಮೇಘಾ ಕಲಾ ಆರ್ಟ್ಸ್‌ದ ಮುಖ್ಯಸ್ಥೆರ್ ಶಾರದ ದಾಮೋದರ ಪ್ರಾಸ್ತಾವಿಕವಾದ್ ಪಾತೆರ್ದ್, ಜೋಕ್ಲೆನ ಬೇಸಿಗೆ ಶಿಬಿರಡ್ ಶೈಕ್ಷಣಿಕ ಚಟುವಟಿಕೆಲೆಗ್ ಪೂರಕವಾದ್ ಮಾತ ರೀತಿದ ಚಟುವಟಿಕೆಲೆನ್ ತೆರಿಪಾವೊಂಡು. ಈ ಶಿಬಿರಡ್ ಪ್ರಮುಖವಾದ್ ಜೋಕ್ಲೆಡ ಇಪ್ಪುನ ವೇದಿಕೆದ ಮಿತ್ತ್ ಇಪ್ಪುನ ಪೋಡಿಗೆ ಪೋಪಾಯೆರೆ ಪೂರಕವಾಯಿನ ತರಬೇತಿ ಕೊರಿಯೆರೆ ಉಂಡು. ಯಕ್ಷಗಾನ, ಯೋಗದಂಚಿನ ಆರ್ಟ್ ಬೊಕ್ಕ ಕ್ರಾಫ್ಟ್ ತರಬೇತಿಲೆನ್ ನುರಿತ ಸಂಪನ್ಮೂಲ ವ್ಯಕ್ತಿಲೆರ್ದ್ ಕೊರಿಯೆರೆ ಉಂಡು. ಶಿಬಿರ ಪ್ರತಿದಿನ 10 ಗಂಟೆರ್ದ್ ಮಧ್ಯಾಹ್ನ 1 ಗಂಟೆ ಮುಟ್ಟ ನಡಪರೆ ಉಂಡು ಪಂದ್ ಪಂಡೆರ್.

ಮಾಯಿದೇ ದೇವುಸ್ ಅನುದಾನಿತ ಶಾಲಾ ಮುಖ್ಯಗುರು ಜಾನೆಟ್ ಡಿ’ಸೋಜ, ಸಂತ ವಿಕ್ಟರಣ ಆಂಗ್ಲ ಮಾಧ್ಯಮ ಶಾಲಾ ಮುಖ್ಯಗುರು ಹ್ಯಾರಿ ಡಿ’ಸೋಜ, ರಕ್ಷಕ-ಶಿಕ್ಷಕ ಸಂಘದ ಉಪಾಧ್ಯಕ್ಷೆರ್ ಬಿ.ಟಿ ಮಹೇಶ್ಚಂದ್ರ ಸಾಲಿಯಾನ್ ಚಾವಡಿಡ್ ಪಾಲ್ ಪಡೆದಿತ್ತೆರ್.

ಸಂತ ವಿಕ್ಟರಣ ಬಾಲಿಕಾ ಪ್ರೌಢ ಶಾಲಾ ಶಿಕ್ಷಕಿ ಕುಮುದಾಕ್ಷಿ ಎದ್ಕೊನಿಯೆರ್. ಮುರಳಿ ಬ್ರದರ್ಸ್ ಡ್ಯಾನ್ಸ್ ಕ್ರೂ ದ ಕಿರಣ್ ಮುರಳಿ ಬಿನ್ನೆರೆಗ್ ಪೂ ಕೊರ್ದು ಸ್ವಾಗತ ಮಲ್ತೆರ್. ಹರ್ಷಿತ್ ಸ್ಮರಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್. ಮಾಯಿದೆ ದೇವುಸ್ ಶಾಲಾ ಸಹ ಶಿಕ್ಷಕೆರ್ ಫ್ಲಾವಿಯ ಅಲ್ಬುಕರ್ಕ್ ಸೊಲ್ಮೆ ಸಂದಾಯೆರ್. ಸುಬ್ಬರಾಜ ಶಾಸ್ತ್ರೀ ಲೇಸ್ ದ ಸುಧಾರಿಕೆ ಮಲ್ತೆರ್.