ಇತಿಹಾಸಡ್ ಸುರುತ್ತ ಸರ್ತಿ 53ನೇ ವರ್ಷಡ್ ಈ ಸರ್ತಿ ವಿಜ್ಞಾನ ವಿಭಾಗಡ್ ನೂದೆಕ್ಕ್ ನೂದು ರಿಸಲ್ಟ್ ನ್ ಸುಬ್ರಹ್ಮಣ್ಯ ಪದವಿಪೂರ್ವ ಕಾಲೇಜ್ ಕೊರ್ತುಂಡು.
ಈ ವಿಜ್ಞಾನ ವಿಭಾಗಡ್ 40 ಡಿಸ್ಟಿಂಕ್ಷನ್ ಬೈದ್ಂಡ್. ಅತ್ತಂದೆ ಪರೀಕ್ಷೆಗ್ ಹಾಜರಾಯಿನ 370 ವಿದ್ಯಾರ್ಥಿಲೆಡ್ 365 ವಿದ್ಯಾರ್ಥಿಲು ಪಾಸಾದ್ ದಾಖಲೆದ 98.65 % ರಿಸಲ್ಟ್ ಬೈದ್ಂಡ್. ಒಟ್ಟಾರೆಯಾದ್ 98 ಡಿಸ್ಟಿಂಕ್ಷನ್ ಬೈದ್ಂಡ್ ಪಂದ್ ಪ್ರಾಚಾರ್ಯೆರ್ ಸೋಮಶೇಖರ ನಾಯಕ್ ಪಂತೆರ್.
ಬೊಂಬೈ ಕನ್ನಡ ಕಲಾಕೇಂದ್ರ ಬೊಕ್ಕ ಕನ್ನಡ ವೆಲ್ ಫೇರ್ ಸೊಸೈಟಿ (ರಿ.) ದ ಮುತಾಲಿಕೆಡ್ ನಾಟಕ ರಚನಾ ಕಮ್ಮಟ ಬೊಕ್ಕ ನಿರ್ದೇಶಕೆರೆನ ಸಮ್ಮಿಲನ ಎ.13 ಸನಿಯಾರ ಬೊಂಬೈ ಕನ್ನಡ ವೆಲ್ ಫೇರ್ ಸೊಸೈಟಿದ ಸಭಾಗೃಹಡ್ ನಡಪರೆ ಉಂಡು.
ಈ ಲೇಸ್ ಬೆಂಗ್ಲೂರು ಕನ್ನಡ ಸಂಸ್ಕೃತಿ ಇಲಾಖೆದ ಒಟ್ಟು ಸೇರಿಗೆಡ್ ವಿಶ್ವ ರಂಗ ದಿನಾಚರಣೆ 2024 ತ್ತ ಲೆಕ್ಕೊಡು ನಡಪರೆ ಉಂಡು.
ಈ ಲೇಸ್ ಡ್ ರಂಗನಿರ್ದೇಶಕೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಬೊಂಬೈ ಕನ್ನಡ ಕಲಾ ಕೇಂದ್ರದ ಅಧ್ಯಕ್ಷೆರ್ ಮಧುಸೂದನ ಟಿ.ಆರ್ ಬೊಕ್ಕ ಘಾಟ್ಕೋಪರ್ ಕನ್ನಡ ವೆಲ್ ಫೇರ್ ಸೊಸೈಟಿದ ಅಧ್ಯಕ್ಷೆರ್ ನವೀನ್ ಶೆಟ್ಟಿ ಇನ್ನಾಬಾಳಿಕೆ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಸೆಕೆಂಡ್ ಪಿಯುಸಿ ರಿಸಲ್ಟ್ 2024 ಪ್ರಕಟ ಆತ್ಂಡ್.
5,52,690 ವಿದ್ಯಾರ್ಥಿಲು ಉತ್ತೀರ್ಣರಾತೆರ್. ಉತ್ತೀರ್ಣ ಪ್ರಮಾಣ ಶೇಕಡ 81.15 ದಾಖಲಾತ್ಂಡ್. ಜಿಲ್ಲಾವಾರು ಉತ್ತೀರ್ಣ ಪ್ರಮಾಣಡ್ ದ.ಕ 97.37% ರಿಸಲ್ಟ್ ದೊಟ್ಟಿಗೆ ಸುರುತ್ತ ಸ್ಥಾನ, ಒಡಿಪು 96.80% ರಿಸಲ್ಟ್ ದೊಟ್ಟಿಗೆ ರಡ್ಡನೇ ಸ್ಥಾನ, ವಿಜಯಪುರ ಜಿಲ್ಲೆ ಮೂಜಿನೇ ಸ್ಥಾನ, ಗದಗ ಜಿಲ್ಲೆ 72.86% ರಿಸಲ್ಟ್ ದೊಟ್ಟಿಗೆ ಅಕೇರಿದ ಸ್ಥಾನಡ್ ಉಂಡು.
ವಿಜ್ಞಾನ ವಿಭಾಗಡ್ 598 ಮಾರ್ಕ್ಸ್ ಪಡೆಯಿನ ವಿದ್ಯಾಲಕ್ಷ್ಮಿ, ಕಲಾ ವಿಭಾಗಡ್ ಬೆಂಗ್ಲೂರುದ ಮೇಧಾ.ಡಿ. ರಾಜ್ಯದ ಟಾಪರ್ಸ್ ಆತೆರ್. ನಗರ ಪ್ರದೇಶದ ರಿಸಲ್ಟ್ ಪ್ರಮಾಣ ಶೇ 81.10, ಗ್ರಾಮಾಂತರದ ರಿಸಲ್ಟ್ ಪ್ರಮಾಣ ಶೇ 81.31 ಪಂದ್ ಕರ್ನಾಟಕ ಶಾಲಾ ಪರೀಕ್ಷೆ ಬೊಕ್ಕ ಮೌಲ್ಯಮಾಪನ ಮಂಡಳಿ ಎನ್.ಮಂಜುಶ್ರೀ ತೆರಿಪಾದೆರ್.
ಮಲ್ಲೇಶ್ವರಂಡ್ ಇಪ್ಪುನ ಕರ್ನಾಟಕ ಶಾಲಾ ಪರೀಕ್ಷೆ ಬೊಕ್ಕ ಮೌಲ್ಯಮಾಪನ ಮಂಡಳಿದ ಕಚೇರಿಡ್ ಮಂಡಳಿ ಅಧ್ಯಕ್ಷೆರಾಯಿನ ಎನ್.ಮಂಜುಶ್ರೀ ಸುದ್ದಿಗೋಷ್ಠಿ ನಡಪಾದ್ ರಿಸಟ್ಟ್ ಪ್ರಕಟ ಮಲ್ದೆರ್.
6.98 ಲಕ್ಷ ವಿದ್ಯಾರ್ಥಿಲು ಪರೀಕ್ಷೆ ಬರೆತೆರ್, 3.3 ಲಕ್ಷ ಆನುಲು, 3.6 ಲಕ್ಷ ಪೊಣ್ಣುಲು ಪಾಸಾತೆರ್. ಈ ವರ್ಷಲ ಪೊಣ್ಣುಲೇ ಸುರುತ್ತ ಸ್ಥಾನಡ್ ಉಲ್ಲೆರ್. ಕಲಾ ವಿಭಾಗಡ್ ಶೇಕಡ 68.36, ವಿಜ್ಞಾನ ವಿಭಾಗಡ್ 89.96, ವಾಣಿಜ್ಯ ವಿಭಾಗಡ್ ಶೇಕಡ 80.94 ಉತ್ತೀರ್ಣರಾತೆರ್.
ಕಾಪು ಪೊಸ ಮಾರಿಗುಡಿ ದೇವಸ್ಥಾನದ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರಾದ್ ಬೆಂಗ್ಲೂರುದ ಎಂ ಆರ್ ಜಿ ಗ್ರೂಪ್ ಆಡಳಿತ ನಿರ್ದೇಶಕೆರ್ ಕೆ. ಪ್ರಕಾಶ್ ಶೆಟ್ಟಿ ಆಯ್ಕೆ ಆತೆರ್.
ಮೇರ್ ಪೊಸ ಮಾರಿಗುಡಿ ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಗೌರವಾಧ್ಯಕ್ಷೆರಾದ್ ಕೆಲಸ ಮಲ್ದೆರ್. ಪಡ್ಡೆದ್ರ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರಾದಿತ್ತೆರ್.
ಸುರತ್ಕಲ್: ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ (ರಿ.) ಸುರತ್ಕಲ್ ಘಟಕದ 4 ನೇ ವರ್ಷದ ಉಚ್ಚಯ ಎ.14 ಐತಾರ ಬಯ್ಯಗ್ ಸುರತ್ಕಲ್ ಬಂಟರ ಭವನದಲ್ಪ ನಡಪರೆ ಉಂಡು.
ಈ ಲೇಸ್ ದ ಉದಿಪನನ್ ಯಕ್ಷಧ್ರುವ ಯಕ್ಷ ಶಿಕ್ಷಣದ ಪ್ರಧಾನ ಸಂಚಾಲಕೆರ್ ಪಣಂಬೂರು ವಾಸುದೇವ ಐತಾಳ ತುಡರ್ ಅರ್ಲಾದ್ ಉದಿಪನ ಮಲ್ಪುವೆರ್. ಪಟ್ಲ ಫೌಂಡೇಶನ್ ಟ್ರಸ್ಟ್ ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ಮೆರೆನ ಗೌರವ ಉಪಸ್ಥಿತಿಡ್ ನಡಪುನ ಲೇಸ್ ದ ಗುರ್ಕಾರ್ಮೆನ್ ಸುರತ್ಕಲ್ ಘಟಕದ ಅಧ್ಯಕ್ಷೆರ್ ಸುಧಾಕರ ಎಸ್ ಪೂಂಜ ಒಯಿಸೊನ್ವೆರ್.
ಮಲ್ಲ ಬಿನ್ನೆರಾದ್ ಫೌಂಡೇಶನ್ ದ ಟ್ರಸ್ಟಿ, ಉದ್ಯಮಿ ಚಂದ್ರಶೇಖರ ಮಾಡ ಕುದ್ರಾಡಿಗುತ್ತು, ಕೇಂದ್ರೀಯ ಮಹಿಳಾ ಘಟಕದ ಗೌರವಾಧ್ಯಕ್ಷೆರ್ ಆರತಿ ಆಳ್ವ, ಗೋವಿಂದ ದಾಸ ಕಾಲೇಜ್ ದ ನಿವೃತ್ತ ಉಪ ಪ್ರಾಂಶುಪಾಲೆರ್ ಪ್ರೊ.ರಮೇಶ್ ಭಟ್ ಯಸ್ ಜಿ, ಲಲಿತಾ ಕಲಾ ಆರ್ಟ್ಸ್ ದ ಮಾಲಕೆರ್ ಧನಪಾಲ್ ಶೆಟ್ಟಿಗಾರ್ ತಡಂಬೈಲ್ ಪಾಲ್ ಪಡೆಯೆರೆ ಉಲ್ಲೆರ್.
ಲೇಸ್ ಡ್ ಹಿರಿಯ ಯಕ್ಷಗಾನ ಕಲಾವಿದೆರ್ ನೆಲ್ಲಿಕಟ್ಟೆ ನಾರಾಯಣ ಹಾಸ್ಯಗಾರ್ ಮೆರೆಗ್ ಸನ್ಮಾನ ನಡಪರೆ ಉಂಡು. ಅಂಚೆನೆ ಯಕ್ಷಗಾನ ತಾಳಮದ್ದಲೆಡ್ ಸಾಧನೆ ಮಲ್ತಿನ ಮಹಾಬಲ ಶೆಟ್ಟಿ ಜೋಕಟ್ಟೆ, ಜಯಂತಿ ಹೊಳ್ಳ ಕೃಷ್ಣಾಪುರ, ವಾಸುದೇವ ಆಚಾರ್ಯ ಕುಳಾಯಿ, ಕರುಣಾಕರ ಪೂಜಾರಿ ಮಧ್ಯ, ಲಿಂಗಪ್ಪ ಶೆಟ್ಟಿ ಕೃಷ್ಣಾಪುರ ಮೊಕ್ಲೆಗ್ ಮಾನಾದಿಗೆ ಮಲ್ಪೆರೆ ಉಂಡು.
ಯಕ್ಷಸಿರಿ ತರಗತಿದ ವಿದ್ಯಾರ್ಥಿ ದಿ. ಯಶ್ವಿತ್ ಅಗರಮೇಲು ಕುಟುಂಬಗ್ ಮರಣೋತ್ತರ ಪನವುದ ಸಕಾಯ ಕೊರಿಯೆರೆ ಉಂಡು. ಬೊಕ್ಕ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿ ನಾಗವೃಜ ಕ್ಷೇತ್ರ ಪಾವಂಜೆ ಮೊಕ್ಲೆರ್ದ್ ಅಯೋಧ್ಯಾ ದೀಪ ಯಕ್ಷಗಾನ ಪ್ರದರ್ಶನ ಅವೆರೆ ಉಂಡು ಪಂದ್ ಸುರತ್ಕಲ್ ಘಟಕದ ಪ್ರಧಾನ ಕಾರ್ಯದರ್ಶಿ ಬಾಳ ಗಂಗಾಧರ ಪೂಜಾರಿ ಚೇಳಾರ್ ಪ್ರಕಟಣೆಡ್ ತೆರಿಪಾದೆರ್.
ಪುತ್ತೂರು: ಪುಗರ್ತೆದ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ವರ್ಷಾವಧಿ ಜಾತ್ರೆದ ಲೆಕ್ಕೊಡು (ಎ.10) ಇನಿ ಕೊಡಿ ಏರ್ಂಡ್.
ಈ ಪೊರ್ತುಡು ದೇವಸ್ಥಾನದಕುಲು ಬೊಕ್ಕ ಭಕ್ತೆರ್ ಪಾಲ್ ಪಡೆದಿತ್ತೆರ್.
ಸೆಕೆಂಡ್ ಪಿಯುಸಿ ರಿಸಲ್ಟ್ ಪ್ರಕಟ
ದಕ್ಷಿಣ ಕನ್ನಡಗ್ ಸುರುತ್ತ ತಾನ 97.37%
ಒಡಿಪುಗ್ ರಡ್ಡನೇ ತಾನ 96.80%
ಒಟ್ಟು 5,52,690 ವಿದ್ಯಾರ್ಥಿಲು ಉತ್ತೀರ್ಣ
ಕಲಾ ವಿಭಾಗಡ್ 128448 ವಿದ್ಯಾರ್ಥಿಲು ಪಾಸ್
ವಿಜ್ಞಾನ ವಿಭಾಗಡ್ 249927 ವಿದ್ಯಾರ್ಥಿಲು ಪಾಸ್
ವಾಣಿಜ್ಯ ವಿಭಾಗಡ್ 174315ವಿದ್ಯಾರ್ಥಿಲು ಪಾಸ್
ವಿಜಯನಗರ (ಬೆಂಗಳೂರು) : ಪ್ರತಿನಿತ್ಯ ಪ್ರತಿ ಇಲ್ಲ್ ಇಲ್ಲಡ್ ಬೊಕ್ಕ ಮಾತಾ ಹಿಂದೂ ಧಾರ್ಮಿಕ ಕ್ಷೇತ್ರಲೆಡ್ ಭಜನೆದ ಅಜನೆ ಇತ್ತ್ಂಡ ಅಲ್ಪ ದೇವೆರೆನ ಸಾನ್ನಿಧ್ಯ ಉಪ್ಪುಂಡು. ವಾರಡೊಂಜಿ ದಿನ ಆಂಡಲ ಭಜನೆ ಮಲ್ತ್ಂಡ ಕಣ್ಣ್ ಗ್ ತೋಜಂದಿ ದೇವೆರೇ ಬೇತೊಂಜಿ ರೂಪೊಡು ಬತ್ತ್ ದ್ ಒಲಿವರೆ ಸಾಧ್ಯ ಆವು ಪಂಡ್ದ್ ನಮ್ಮ ನಂಬುಗೆ. ಅಂಚೆನೇ ಹಿಂದೂ ಸಮಾಜ ನನಲಾ ಬಲಿಷ್ಠ ಆವೊಡಾಂಡ ಭಜನೆದಂಚಿನ ಸೇವೆ ಮಲ್ತ್ ದ್ ಶ್ರದ್ಧಾ ಭಕ್ತಿದಂಚಿ ಗಮನ ಕೊರ್ಪಿನ ಅಗತ್ಯ ಉಂಡು.
ತುಳುವ ಮಣ್ಣ್ ದ ಜವನೆರ್ ಬದ್ ಕ್ ದ ತಾದಿಗೋಸ್ಕರ ರಾಜಬೂಡು ಬೆಂಗಳೂರುಗು ಬತ್ತ್ ದ್ , ಪೊರ್ಲುದ ಬದುಕುದೊಟ್ಟುಗು ನನ ದುಂಬುದ ಜನಾಂಗದ ಜೋಕುಲೆಗ್ ಭಜನೆ ಪಂಡ ದಾದಂದ್ ಪಂಡ್ದ್ ಶ್ರದ್ದಾ-ಭಕ್ತಿಡ್ ಭಜನೆ ಮಲ್ಪುನ ಮುಖಾಂತರ ಮನಸ್ಸ್ ದ ಬೇನೆ ಬೇಜಾರ್ ದೂರ ಮಲ್ಪುನ ಮೂಲಕ ಭಜನೆದ ಮಹತ್ವ ತೆರಿಪಾವೆರೆ ಮಲ್ಲ ಪ್ರಯತ್ನ ಮಲ್ತೊಂದುಲ್ಲೆರ್ ನಮ್ಮ ಮಕರಶ್ರೀ ಭಜನಾ ಮಂಡಳಿದ ಸರ್ವ ಸದಸ್ಯೆರ್.
ಏಪ್ರಿಲ್ 9 ಅಂಗಾರೆ 2024 ವಿಜಯನಗರದ ಆದಿ ಚುಂಚನಗಿರಿ ಶ್ರೀ ಬಾಲ ಗಂಗಾಧರೇಶ್ವರ ದೇವಸ್ಥಾನದ ಸಾನಿದ್ಯೊಡ್ ಯುಗಾದಿ ಪರ್ಬದ ಸಂಬ್ರಮೊಡು ವಿಜಯನಗರ ಆದಿ ಚುಂಚನಗಿರಿ ಮಠತ್ತ ಶ್ರೀ ಸೌಮ್ಯಾನಂದ ಸ್ವಾಮೀಜಿ ಮೆರೆನ ಉಪಸ್ಥಿತಿಡ್ ಮಕರಶ್ರೀ ಭಜನಾ ಮಂಡಳಿದ ಸರ್ವ ಸದ್ಯಸೆರ್ ಬೊಕ ಬೇತೆ ಬೇತೆ ಭಜನಾ ಮಂಡಳಿದ ಸದಸ್ಯೆರ್ ಸೇರ್ದ್ ದೇವೆರೆಗ್ ಭಜನೆ ಸೇವೆ ನಡಪಾದ್ ಕೊರಿಯೆರ್.
ಅಂಚೆನೇ ಬೆಂಗಳೂರು ಮಹಾನಗರೊಡ್ ಭಜನೆ ಮಲ್ಪರೆ ಆಸಕ್ತಿ ಇತ್ತಿನಕಲು ಮಕರ ಶ್ರೀ ಭಜನಾ ಮಂಡಳಿದ ಸಂಚಾಲಕೆರಾಯಿನ ಸುಕೇಶ್ ಕುಲಾಲ್(+91 7259564910) ಮೆರೆನ ಪೋನ್ ನಂಬರ್ ಗ್ ಪಾತೆರೊಲಿಂದ್ ತೆರಿಪಾದೆರ್.
(ವರದಿ : ಯಾದವ ಶೆಟ್ಟಿಗಾರ್ ಕಲ್ಲಾಪು, ಬೆಂಗಳೂರು)
ನೈರೋಬಿ-ಕೀನ್ಯ: ಪೂರ್ವ ಆಫ್ರಿಕಾ ಬಂಟ್ಸ್ ಸಂಘದ ತುಳುವೆರೆ ಪೊಸ ವರ್ಸ ಬಿಸು ಪರ್ಬದ ವನಸ್ ಎ.14 ಕ್ಕ್ ನೈರೋಬಿದ ಚೌಪಾಟಿ ವೆಸ್ಟ್ ಪಾರ್ಕ್ ಟವರ್ಸ್, ವೆಸ್ಟ್ಲ್ಯಾಂಡ್ಸ್ ಮೂಲು ನಡಪರೆ ಉಂಡು.
ಈ ಲೇಸ್ ಡ್ ತುಳುನಾಡ ಪೊಸ ವರ್ಷ ಬೊಕ್ಕ ಸುಗ್ಗಿ ಪರ್ಬದ ಇಸೇಸ ತೆನಸ್ ಲು ಇಪ್ಪುಂಡು.
ದೊಂಬುದ ಬೆಚ್ಚದೊಟ್ಟಿಗೆ ಜನಕ್ಲೆಗ್ ಲೋಕಸಭೆ ವೋಟುದ ಬೆಚ್ಚಲ ದಿನರ್ದ್ ದಿನ ಎಚ್ಚಾವೊಂದು ಉಂಡು. ಏಪ್ರಿಲ್ 14 ಕ್ಕ್ ಪ್ರಧಾನಿ ನರೇಂದ್ರ ಮೋದಿ ಮೇರ್ ಕುಡ್ಲಗ್ ಭೇಟಿ ಕೊರಿಯೆರೆ ಉಲ್ಲೆರ್.
ಆನಿ ಮಧ್ಯಾಹ್ನ 3 ಗಂಟೆಗ್ ಬಂಗ್ರಕೂಳೂರುದ ಗೋಲ್ಡ್ಫಿಂಚ್ ಮೈದಾನಡ್ ಬೃಹತ್ ಸಾರ್ವಜನಿಕ ಸಭೆನ್ ಉದ್ದೇಶಿಸಾದ್ ಪ್ರಧಾನಿ ಮೋದಿ ಪಾತೆರಿಯೆರೆ ಉಲ್ಲೆರ್ ಪಂದ್ ಬಿಜೆಪಿದ ರಾಜ್ಯ ಪ್ರಧಾನ ಕಾರ್ಯದರ್ಶಿ, ರಾಜ್ಯ ಚುನಾವಣಾ ಸಮಿತಿದ ಪ್ರಧಾನ ಸಂಚಾಲಕೆರ್, ಮಾಜಿ ಸಚಿವೆರ್ ವಿ. ಸುನಿಲ್ ಕುಮಾರ್ ಮೇರ್ ಸುದ್ದಿಗೋಷ್ಠಿಡ್ ತೆರಿಪಾರಯೆರ್. ಸುದ್ದಿಗೋಷ್ಠಿಡ್ ಜಿಲ್ಲಾ ಬಿಜೆಪಿ ಅಧ್ಯಕ್ಷೆರ್ ಸತೀಶ್ ಕುಂಪಲ, ವಿಧಾನ ಪರಿಷತ್ ಸದಸ್ಯೆರ್ ಪ್ರತಾಪ್ ಸಿಂಹ ನಾಯಕ್, ಚುನಾವಣಾ ಸಂಚಾಲಕೆರ್ ನಿತಿನ್ ಕುಮಾರ್, ಪಕ್ಷದ ನಿಕಟಪೂರ್ವ ಜಿಲ್ಲಾಧ್ಯಕ್ಷೆರ್ ಸುದರ್ಶನ ಬೆದ್ರ, ಪಕ್ಷದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಪ್ರೇಮಾನಂದ ಶೆಟ್ಟಿ ಬೊಕ್ಕ ಯತೀಶ್ ಆರುವರ್ ಪಾಲ್ ಪಡೆದಿತ್ತೆರ್.
