ಮಣಿಪಾಲ: ರೇಡಿಯೊ ಮಣಿಪಾಲ್ 90.4 ಮೆಗಾಹರ್ಟ್ಝ್ ಸಮುದಾಯ ಬಾನುಲಿ ಕೇಂದ್ರಡ್ ಒಡಿಪುದ ಎಂಜಿ.ಎಂ ಕಾಲೇಜ್ ದ ವಿದ್ಯಾರ್ಥಿನಿ ಪ್ರಿಯಾ ಆರ್ ಎಲ್ ನೆನಪಿನಂಗಳದಲ್ಲಿ ರೇಡಿಯೊ ಪನ್ಪುನ ಇಸಯದ ಬಗೆಟ್ಟ್ ಪಾತೆರಿಯೆರ್.
ಈ ಲೇಸ್ ಎಪ್ರಿಲ್ 11 ಕ್ಕ್ ಬಯ್ಯಗ್ 6.30 ಕ್ಕ್ ಪ್ರಸಾರ ಆಂಡ್. ಎಪ್ರಿಲ್ 12 ಕ್ಕ್ ಮಧ್ಯಾಹ್ನ 2.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊಡ್ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕಟಪಾಡಿ: ರುದ್ರದೇವೆರ್ ರೋಗ ನಿವಾರಕ, ಸುಖ ದಾಯಕೆ ಆತೆರ್, ಮೂಜಿ ಗ್ರಾಮದ ಭಕ್ತೆರ್ ಶುದ್ಧ ಮನಸ್ಸ್ ರ್ದ್ ಮಲ್ತೊಂದು ಇಪ್ಪುನ ಗ್ರಾಮಾಧಿಪತಿನ ಬ್ರಹ್ಮಕಲಶ ನಾಗಮಂಡಲ ಉಚ್ಚಯ ಸೇವೆ ನಿರ್ವಿಘ್ನವಾದ್ ನಡಪಡ್ ಪಂದ್ ಪರ್ಯಾಯ ಪುತ್ತಿಗೆ ಶ್ರೀಸುಗುಣೇಂದ್ರ ತೀರ್ಥ ಸ್ವಾಮೀಜಿ ಪಂಡೆರ್.
ಮೇರ್ ಒಡಿಪು ಶ್ರೀಕೃಷ್ಣ ಮಠಟ್ಟ್ ಕಳತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯದ ಲೆಪ್ಪೋಲೆನ್ ಬುಡುಗಡೆ ಮಲ್ತ್ ದ್ ಆಶೀರ್ವಚನ ಕೊರಿಯೆರ್.
ಈ ಪೊರ್ತುಡು ದೇವಸ್ಥಾನದ ಆಡಳಿತ ಮೊಕ್ತೇಸರೆರ್ ಕೇಂಜ ಶ್ರೀಧರ ತಂತ್ರಿ, ಎಲ್ಲೂರು ದೇವಸ್ಥಾನದ ನಿಕಟಪೂರ್ವ ಅಧ್ಯಕ್ಷೆರ್ ಕರುಣಾಕರ ಶೆಟ್ಟಿ, ಶ್ರೀ ಮಠತ್ತ ದಿವಾನೆರ್ ನಾಗರಾಜ ಆಚಾರ್ಯ, ಸ್ವಾಮೀಜಿನ ಆಪ್ತ ಕಾರ್ಯದರ್ಶಿ ಕಳತ್ತೂರು ರತೀಶ ತಂತ್ರಿ, ಗೌರವಾಧ್ಯಕ್ಷೆರ್ ಕಳತ್ತೂರು ಕೇಶವ ತಂತ್ರಿ, ಅರ್ಚಕೆರ್ ಕಳತ್ತೂರು ಯಾದವ ತಂತ್ರಿ, ಪ್ರಕಾಶ ತಂತ್ರಿ, ವ್ಯವಸ್ಥಾಪನಾ ಸಮಿತಿದ ಸದಸ್ಯೆರ್ ಕೆ.ವಿಷ್ಣುಮೂರ್ತಿ ಸರಳಾಯ, ಪಾದೂರು ಮಮತಾ ತಂತ್ರಿ, ಶಾರದೇಶ್ವರೀ ಗುರ್ಮೆ, ಸಂತೋಷ್ ಶೆಟ್ಟಿ ತೆಂಕರಗುತ್ತು, ಮೋಹನ ತಂತ್ರಿ, ಕೇಂಜ ರಘುರಾಮ ತಂತ್ರಿ, ಕೇಂಜ ಭಾರ್ಗವ ತಂತ್ರಿ, ಕೇಂಜ ರಾಮ ತಂತ್ರಿ ಪಾಲ್ ಪಡೆದಿತ್ತೆರ್.
ಕಡೇಶಿವಾಲಯ ಮಹತೋಭಾರ ಚಿಂತಾಮಣಿ ಶ್ರೀ ಲಕ್ಷ್ಮೀನರಸಿಂಹ ಸ್ವಾಮಿ ದೇವಸ್ಥಾನಡ್ ವರ್ಷಾವಧಿ ಜಾತ್ರೆ ಎ.1-23 ಮುಟ್ಟ ನಡಪರೆ ಉಂಡು.
ಎ.1 ಕ್ಕ್ ಬೊಲ್ಪುಗು ಕೈಲ್ ಕಡ್ತೆರ್. ಎ.9 ಕ್ಕ್ ಮಧ್ಯಾಹ್ನ ಮಹಾಪೂಜೆ, ಕೊಡಿ ಏರ್ಂಡ್, ರಾತ್ರೆ ಪ್ರತಿಷ್ಠೆ ಉಚ್ಚಯ ನಡತ್ಂಡ್. ಎ.10-12 ಮುಟ್ಟ ನಿತ್ಯಬಲಿ, ಮಹಾಪೂಜೆ ನಡಪರೆ ಉಂಡು.
ಎ.13 ಕ್ಕ್ ಸಂಕ್ರಾಂತಿ, ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಉಚ್ಚಯ, ಎ.14 ಕ್ಕ್ ಬೊಲ್ಪುಗು ಉಚ್ಚಯ, ಮಧ್ಯಾಹ್ನ ಮಹಾಪೂಜೆ ರಾತ್ರೆ ಉಚ್ಚಯ, ಎ.15 ಕ್ಕ್ ಬೊಲ್ಪುಗು ಉಚ್ಚಯ ಮಧ್ಯಾಹ್ನ ಮಹಾಪೂಜೆ ರಾತ್ರೆ ಉಚ್ಚಯ ನಡಪರೆ ಉಂಡು.
ಎ.16 ಕ್ಕ್ ಬೊಲ್ಪುಗು ಉಚ್ಚಯ, ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ಮಧ್ಯಾಹ್ನ ಮಹಾಪೂಜೆ ರಾತ್ರೆ ಉಚ್ಚಯ, ಬೀದಿ ಸವಾರಿ, ಕಟ್ಟೆಪೂಜೆ ನಡಪರೆ ಉಂಡು.
ಎ.17 ಕ್ಕ್ ಮಧ್ಯಾಹ್ನ ಮಹಾಪೂಜೆ ರಾತ್ರೆ ಉಚ್ಚಯ, ಕಟ್ಟೆಪೂಜೆ, ಎ.18 ಕ್ಕ್ ಮಧ್ಯಾಹ್ನ ಮಹಾಪೂಜೆ, ರಾತ್ರೆ ಚಂದ್ರಮಂಡಲ ಉಚ್ಚಯ, ಅನ್ನ ಪ್ರಸಾದ ಸೇವೆ, ಎ.19 ಕ್ಕ್ (ಏಕಾದಶಿ) ಉಚ್ಚಯ, ಬೀದಿ ಸವಾರಿ ನಡಪರೆ ಉಂಡು.
ಎ.20 ಕ್ಕ್ ಮಧ್ಯಾಹ್ನ ಪಲ್ಲಪೂಜೆ, ಮಹಾಪೂಜೆ ರಾತ್ರೆ ಮಲ್ಲ ತೇರ್ ಉಚ್ಚಯ, ಬೆಡಿಮರ್ದ್ ಪ್ರದರ್ಶನ, ಮಹಾಪೂಜೆ, ಕವಾಟ ಬಂಧನ, ಅನ್ನ ಪ್ರಸಾದ ಸೇವೆ ನಡಪರೆ ಉಂಡು.
ಎ.21 ಕ್ಕ್ ಬೊಲ್ಪುಗು ಕವಾಟೋದ್ಘಾಟನೆ, ತುಲಾಭಾರ ಸೇವೆ, ಮಧ್ಯಾಹ್ನ ಮಹಾಪೂಜೆ ಬಯ್ಯಗ್ ಉಚ್ಚಯ, ಕಟ್ಟೆಪೂಜೆ, ಅನ್ನ ಪ್ರಸಾದ ಸೇವೆ, ಅವಭೃತ ಸ್ನಾನ, ಕೊಡಿ ಜಾವೆರೆ ಉಂಡು.
ಎ.22 ಕ್ಕ್ ರಾತ್ರೆ ಮಹಾಪೂಜೆ, ಶ್ರೀ ನಾರಾಳ್ತಾಯ ಬೊಕ್ಕ ಬೇತೆ ದೈವೊಲೆನ ನೇಮ, ಅನ್ನ ಪ್ರಸಾದ ಸೇವೆ, ಎ.23 ಕ್ಕ್ ಮಧ್ಯಾಹ್ನ ಸಂಪ್ರೋಕ್ಷಣೆ, ಮಹಾಪೂಜೆ, ರಾತ್ರೆ ಮಂಗಳ, ಮಂತ್ರಾಕ್ಷತೆ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಬ್ರಹ್ಮಶ್ರೀ ಉಚ್ಚಿಲತ್ತಾಯ ನೀಲೇಶ್ವರ ಪದ್ಮನಾಭ ತಂತ್ರಿಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಸಾಮಾಜಿಕ ಜಾಲತಾಣದ ವಾಟ್ಸ್ಯಾಪ್ ಗ್ರೂಪ್ ಡ್ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೆರೆನ ಬಗ್ಗೆ ಅಪಪ್ರಚಾರ ಬೊಕ್ಕ ಅವಮಾನಕರ ನಕಲಿ ಸುದ್ದಿನ್ ಪ್ರಚಾರ ಮಲ್ತೊಂದು ಇಪ್ಪುನಕ್ಲೆನ ಮಿತ್ತ್ ಸೂಕ್ತ ಕಾನೂನು ಕ್ರಮ ದೆತೊನಿಯೆರೆ ಕುಕ್ಕೆಸುಬ್ರಹ್ಮಣ್ಯ ಕಾಂಗ್ರೆಸ್ ಪಕ್ಷದಕುಲು ಸುಬ್ರಹ್ಮಣ್ಯ ಠಾಣಾಧಿಕಾರಿಗ್ ದೂರು ಕೊರ್ತೆರ್.
ಶೈವಾಗಮ ಕ್ಷೇತ್ರ ಶ್ರೀ ಕುಕ್ಕೆ ಬೊಕ್ಕ ಗೌಡ ಸಮಿತಿ ಸುಬ್ರಹ್ಮಣ್ಯ ವಲಯ ಪನ್ಪುನ ರಡ್ಡ್ ವಾಟ್ಸ್ಯಾಪ್ ಗ್ರೂಪ್ ಡ್ ಮೆರೆನ ಬಗ್ಗೆ ನಕಲಿ ಸುದ್ದಿನ್ ದಿನಪತ್ರಿಕೆಡ್ ಪ್ರಕಟ ಆಯಿನ ರೀತಿ ಸಂಕಲನ ಮಲ್ತ್ ದ್ ಪ್ರಕಟ ಮಲ್ದೆರ್. ಈ ಸುದ್ದಿಲೆಡ್ ಹಿಂದು ಬೊಕ್ಕ ಮುಸ್ಲಿಂ ಧರ್ಮದ ಸಮುದಾಯದ ನಡುಟ್ಟ್ ದ್ವೇಷ ಸುರು ಆಪುನ ಮತೀಯ ಭಾವನೆನ್ ಕೊರ್ದ್ ಕೋಮುಗಲಭೆಗ್ ಪ್ರಚೋದನೆ ಕೊರ್ಪುನ ಉದ್ದೇಶಕಾರಿ ಹೇಳಿಕೆಲೆಡ್ ಸೃಷ್ಟಿ ಮಲ್ದೆರ್, ಉಂದು ನಕಲಿ ಆತ್ಂಡ್. ಅಂಚಾದ್ ಕಾನೂನುಬಾಹಿರ ಪ್ರಕಟಣೆ ಮಲ್ತಿನ ಕಿಡಿಗೇಡಿಲೆನ ಮಿತ್ತ್ ತನಿಖೆ ನಡಪಾದ್ ಸೂಕ್ತ ಕಾನೂನು ಕ್ರಮ ದೆತೊನಿಯೆರೆ ಕುಕ್ಕೆ ಸುಬ್ರಹ್ಮಣ್ಯ ಭಾರತ ರಾಷ್ಟ್ರೀಯ ಪಕ್ಷದ ಅಧ್ಯಕ್ಷೆರ್ ಬೊಕ್ಕ ಕಾರ್ಯದರ್ಶಿ ದೂರುದ ಅರ್ಜಿಡ್ ತೆರಿಪಾದೆರ್.
ಬಾದಾಮಿ ಸೇವನೆರ್ದ್ ಆರೋಗ್ಯಗ್ ಮಸ್ತ್ ಪ್ರಯೋಜನ ಉಂಡು.
ಉಂದು ತೂಕದ ನಷ್ಟಗ್ ಮಸ್ತ್ ಎಡ್ಡೆ, ನೆಟ್ಟ್ ಇಪ್ಪುನ ಫೈಬರ್ ಬೊಕ್ಕ ಪ್ರೋಟೀನ್ ಬಡವುನ್ ಕಡಿಮೆ ಮಲ್ಪುಂಡು. ಉಂದು ಜೋಕ್ಲೆನ ಬುದ್ಧಿಶಕ್ತಿನ್ ಎಚ್ಚ ಮಲ್ಪುಂಡು.
ಬಾದಾಮಿಡ್ ಕಬ್ಬಿಣಾಂಶ ಬೊಕ್ಕ ವಿಟಮಿನ್ ಸಮೃದ್ಧ ಆತ್ಂಡ್. ಬಾದಾಮಿಡ್ ಇಪ್ಪುನ ವಿಟಮಿನ್ ಲು ಹೃದ್ರೋಗದ ಅಪಾಯನ್ ಕಡಿಮೆ ಮಲ್ಪುಂಡು.
ಅಂಚೆನೆ ನೆತ್ತೆರ್ ದ ಸಮಸ್ಯೆ ಇಪ್ಪುನಕುಲು ಉಂದೆನ್ ನೆನಪಾದ್ ಪ್ರತಿದಿನೊಲ ತಿನೊಡು. ನೆರ್ದ್ ನೆತ್ತೆರ್ ಡ್ ಇಪ್ಪುನ ಸೆಕ್ಕರೆದ ಮಟ್ಟ ಕಡಿಮೆ ಆಪುಂಡು. ಅತ್ತಂದೆ ಉಂದು ಕುಜಲ್ ದ ಬೆಳೆವಣಿಗೆಗ್ ಬೊಕ್ಕ ಚರ್ಮದ ಆರೈಕೆಗ್ ಎಡ್ಡೆ.
ಪ್ರಧಾನಿ ನರೇಂದ್ರ ಮೋದಿ ಎ.14 ಕ್ಕ್ ಕುಡ್ಲಡ್ ರೋಡ್ ಶೋ ಮಲ್ಪುನ ದುಂಬು ಮೈಸೂರುಡು ಪ್ರಚಾರ ಮಲ್ಪೆರೆ ಉಲ್ಲೆರ್.
ಮೈಸೂರುದ ಮಹಾರಾಜ ಕಾಲೇಜ್ ಮೈದಾನಡ್ ಮಂಡ್ಯ, ಮೈಸೂರು, ಚಾಮರಾಜನಗರ ಬೊಕ್ಕ ಹಾಸನ ಲೋಕಸಭಾ ಕ್ಷೇತ್ರದ ಕಾರ್ಯಕರ್ತೆರೆನ ಬೊಕ್ಕ ಸಾರ್ವಜನಿಕ ಸಮಾವೇಶ ಉದ್ದೇಶಿಸಾದ್ ಪಾತೆರಿಯೆರೆ ಉಲ್ಲೆರ್.
ಬೊಕ್ಕ ಕುಡ್ಲ ಪೇಂಟೆಗ್ ಬರ್ಪುನ ಮೇರ್ ನಾರಾಯಣಗುರು ವೃತ್ತರ್ದ್ ನವಭಾರತ್ ವೃತ್ತ ಮುಟ್ಟ ಸುಮಾರ್ ಒಂಜರೆ ಕಿಮೀ. ರೋಡ್ ಶೋ ನಡಪಾಯೆರೆ ಉಲ್ಲೆರ್ ಪಂದ್ ಬಿಜೆಪಿ ರಾಜ್ಯ ಚುನಾವಣಾ ಸಮಿತಿ ಸಂಚಾಲಕೆರ್ ಸುನಿಲ್ ಕುಮಾರ್ ತೆರಿಪಾದೆರ್.
ತುಳಸಿ ಚಹಾಡ್ ರೋಗನಿರೋಧಕ ಶಕ್ತಿ ಉಂಡು. ನೆಟ್ಟ್ ವಿಟಮಿನ್ ಎ, ಸಿ, ಕ್ಯಾಲ್ಸಿಯಂ ಬೊಕ್ಕ ಸತು ಸೇರಿನಂಚೆನೆ ಅಗತ್ಯ ಪೋಷಕಾಂಶ ಉಂಡು.
ಉಂದು ಕರ್ಲ್ ದ ಆರೋಗ್ಯ ಬೊಕ್ಕ ಜೀರ್ಣಕಾರಿ ಸಮಸ್ಯೆಗ್ ಎಡ್ಡೆ. ಸುರುಕು ತುಳಸಿನ್ ನೀರ್ ಡ್ ಕೊದಿಪಾದ್ ಬೊಕ್ಕ ದಾಲ್ಚಿನ್ನಿ ಪಾಡೊಡು. ನೀರ್ ಚೌಳಿ ಆಯಿನ ಬೊಕ್ಕ ಆಯಿಕ್ಕ್ ತೊಡ್ಡೆ ನೆಯಿ ಬೊಕ್ಕ ಲಿಂಬೆ ರಸನ್ ಪಾಡ್ದ್ ಪರೊಡು.
ಲೋಕಸಭೆ ವೋಟುಗು ಬಿಜೆಪಿ ಪಕ್ಷದ ಪೊಸ ಪ್ರಚಾರ ಪದ್ಯನ್ ಬುಡುಗಡೆ ಮಲ್ದ್ಂಡ್.
ಭಾರತ್ ಕಾ ಬೇಟಾ ಮೋದಿ ಚಲಾ ಭಾರತ್ ಕಾ ಮಾನ್ ಬಢಾನೆ ಕೋ ಪನ್ಪುನ ಸಾಲ್ ದ ಪದ್ಯನ್ ರಚನೆ ಮಲ್ದ್ಂಡ್. ಒಟ್ಟು 12 ಭಾಷೆಡ್ ಪ್ರಚಾರ ಗೀತೆನ್ ಬುಡುಗಡೆ ಮಲ್ದ್ಂಡ್.
ದೇಶದ ಪ್ರತಿಷ್ಠೆ ಎಚ್ಚ ಮಲ್ಪೆರೆ ಮೋದಿ ಪಿದಾಡ್ ದೆರ್ ಪನ್ಪುನ ಅರ್ಥನ್ ಉಂದು ಕೊರ್ತುಂಡು.
ಕುಡ್ಲಡ್ ಪ್ರಧಾನಿ ಮೋದಿ ಎ. 14 ಕ್ಕ್ ರೋಡ್ ಮಲ್ಪುನ ನಿಲೆಟ್ಟ್ ಪೊಲೀಸೆರ್ ಮಾತ ಕಡೆಟ್ಲಾ ಬಿಗಿ ಭದ್ರತೆನ್ ಸುರು ಮಲ್ದೆರ್.
ಎನ್ ಎಸ್ ಜಿ ಇಸೇಸ ಭದ್ರತೆ ಕೂಟ ಬುದಾರ ಕುಡ್ಲಗ್ ಬತ್ತ್ ದ್, ಮೋದಿ ರೋಡ್ ಶೋ ನಡಪಾವುನ ಮಾರ್ಗಡ್ ದೆತೊನೊಡಾಯಿನ ಭದ್ರತಾ ಕ್ರಮತ್ತ ಬಗೆಟ್ಟ್ ಪರಿಶೀಲನೆ ನಡಪಾದ್ ಸೂಕ್ತ ಮಾರ್ಗದರ್ಶನ ಕೊರಿಯೆರೆ ಉಲ್ಲೆರ್.
ಮೈಸೂರ್ ಡ್ ಆ ದಿನ ಸಮಾವೇಶ ಮುಗಿತ್ ದ್ ಕುಡ್ಲಗ್ ಬರ್ಪಿನ ಮೋದಿ ಕುಡ್ಲಡೇ ವಾಸ ಮಲ್ಪುನ ಸಾಧ್ಯತೆಲ ಉಂಡು ಪಂದ್ ತೆರಿದ್ ಬೈದ್ಂಡ್.
ಒಡಿಪು: ಶ್ರೀ ಶೀರೂರು ಮೂಲ ಮಠಟ್ಟ್ ಶ್ರೀ ರಾಮನವಮಿ ಉಚ್ಚಯ ಎ.9-18 ಮುಟ್ಟ ನಡಪರೆ ಉಂಡು.
ಶೀರೂರು ಮಠಾಧೀಶೆರ್ ವೇದವರ್ಧನತೀರ್ಥ ಸ್ವಾಮೀಜಿಲೆನ ಮುತಾಲಿಕೆಡ್ ಈ ಲೇಸ್ ನಡಪರೆ ಉಂಡು.
ಎ.11 ಗುರುವಾರ ಬಯ್ಯಗ್ ಪಟ್ಟದ ದೇವೆರೆನೊಟ್ಟಿಗೆ ಶ್ರೀ ಚಿತ್ರಾಪುರ ಸ್ವಾಮೀಜಿ ಬರಿಯೆರೆ, ಬಯ್ಯಗ್ ವಯೋಲಿನ್ ವಾದನ ನಡಪರೆ ಉಂಡು.
ಎ.12 ಸುಕ್ರಾರ ಬಯ್ಯಗ್ ಸಾಂಸ್ಕೃತಿಕ ಲೇಸ್, ಊರಪರ್ಬ ನಡಪರೆ ಉಂಡು.
ಎ.13 ಸನಿಯಾರ ಬಯ್ಯಗ್ ಪಟ್ಟದ ದೇವೆರೆನೊಟ್ಟಿಗೆ ಶ್ರೀ ಕಾಣಿಯೂರು ಸ್ವಾಮಿಲು ಬರಿಯೆರೆ, ಭೂತರಾಜನ ಪೂಜೆ, ಶ್ರೀ ನರಸಿಂಹ ನೃತ್ಯರೂಪಕ ನಡಪರೆ ಉಂಡು.
ಎ.14 ಐತಾರ ಬಯ್ಯಗ್ ಕಟ್ಟೆಪೂಜೆ ಬೊಕ್ಕ ಮ್ಯಾಜಿಕ್ ಷೋ ನಡಪರೆ ಉಂಡು.
ಎ.15 ಸೋಮಾರ ಬಯ್ಯಗ್ ಭಕ್ತಿ ಸಂಗೀತ ನಡಪರೆ ಉಂಡು.
ಎ.16 ಅಂಗಾರೆ ಬಯ್ಯಗ್ ಹಿಂದುಸ್ತಾನಿ ಗಾಯನ ನಡಪರೆ ಉಂಡು.
ಎ.17 ಬುದಾರ ಬೊಲ್ಪುಗು ಪಂಚಾಮೃತಾಭಿಷೇಕ, ಇಸೇಸ ಪೂಜೆ, ಪವಮಾನ ಕಲಶ, ಶ್ರೀ ಪಟ್ಟದ ದೇವೆರೆನ ಪೂಜೆ, ಶ್ರೀ ಮುಖ್ಯಪ್ರಾಣ ದೇವೆರೆನ ಪೂಜೆ, ಪಲ್ಲದ ಪೂಜೆ, ಬ್ರಾಹ್ಮಣ ಸುವಾಸಿನೆ ಆರಾಧನೆ, ಸಾರ್ವಜನಿಕ ಅನ್ನ ಪ್ರಸಾದ ಸೇವೆ, ಮಧ್ಯಾಹ್ನ ಸಂಗೀತ, ಬಯ್ಯಗ್ ಪಟ್ಟದ ದೇವೆರೆನೊಟ್ಟಿಗೆ ಶ್ರೀ ಕೃಷ್ಣಾಪುರ ಸ್ವಾಮಿಲು ಬರಿಯೆರೆ, ಪ್ರಾಣ ದೇವೆರೆನ ರಂಗಪೂಜೆ, ತೇರ್ ಉಚ್ಚಯ, ಓಲಗ ಮಂಟಪ ಪೂಜೆ, ರಾತ್ರೆ ಆಟ ನಡಪರೆ ಉಂಡು.
ಎ.18 ಗುರುವಾರ ಬೊಲ್ಪುಗು ಶಾಕಲ ಋಕ್ಸಂಹಿತಾಯಾಗದ ಪೂರ್ಣಾಹುತಿ, ಪಗೆಲ್ ತೇರ್ ಉಚ್ಚಯ, ಓಲಗ ಮಂಟಪ ಪೂಜೆ, ಅವಭೃತ ಸ್ನಾನ ರಾತ್ರೆ ಶ್ರೀ ಮಠತ್ತ ಬೊಬ್ಬರ್ಯ ಕೋಲ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ತೀರ್ಥ ಪ್ರಸಾದ ದೆತೊಂದು ಶ್ರೀ ಹರಿವಾಯು ಗುರುಕ್ಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಒಡಿಪು ಶ್ರೀ ಶೀರೂರು ಮಠತ್ತ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
