ತುಳು ಸುದ್ದಿ

ಜ.21: ಕುಡ್ಲಡ್ ರಾಜ್ಯಮಟ್ಟದ ಬೃಹತ್ ಕಾಂಗ್ರೆಸ್ ಕಾರ್ಯಕರ್ತೆರೆನ ಸಮಾವೇಶ

ಕುಡ್ಲಡ್ ಜ.21 ಕ್ಕ್ ರಾಜ್ಯಮಟ್ಟದ ಬೃಹತ್ ಕಾರ್ಯಕರ್ತೆರೆನ ಸಮಾವೇಶ ನಡಪರೆ ಉಂಡು ಪಂದ್ ಕೆಪಿಸಿಸಿ ಗುರ್ಕಾರೆ ಡಿಕೆ ಶಿವಕುಮಾರ್‌ ತೆರಿಪಾದೆರ್.

ಅಖಿಲ ಭಾರತ ಕಾಂಗ್ರೆಸ್‌ ಸಮಿತಿ ಸೂಚನೆದ ಮಿತ್ತ್ ದ.ಕ ಜಿಲ್ಲೆದ ಕುಡ್ಲಡ್ ಈ ಲೇಸ್ ನ್ ಆಯೋಜನೆ ಮಲ್ದ್ಂಡ್. ಸಮಾವೇಶಡ್ ಎಐಸಿಸಿ ಗುರ್ಕಾರೆ ಮಲ್ಲಿಕಾರ್ಜುನ ಖರ್ಗೆ, ಮುಖ್ಯಮಂತ್ರಿ ಸಿದ್ದರಾಮಯ್ಯ, ಎಐಸಿಸಿ ಪ್ರಧಾನ ಕಾರ್ಯದರ್ಶಿ, ಕಾರ್ಯದರ್ಶಿ, ಸಚಿವೆರ್, ಕೆಪಿಸಿಸಿ ಕಾರ್ಯಾಧ್ಯಕ್ಷೆರ್ ಸೇರಿನಂಚಿನಂಚೆನೆ ಹಿರಿಯ ಮುಖಂಡೆರ್ ಪಾಲ್ ಪಡ್ಪೆರ್ ಪಂದ್ ಡಿಕೆಸಿ ಪಂಡೆರ್.

ಅಂಚೆನೆ ರಾಜ್ಯದ ಮಾತ ಕಾರ್ಯಕರ್ತೆರ್, ಸಚಿವೆರ್, ಸಂಸದೆರ್, ಶಾಸಕೆರ್, ಕೆಪಿಸಿಸಿ ಪದುಕೆರ್, 2023 ತ್ತ ವಿಧಾನಸಭೆ ಅಭ್ಯರ್ಥಿಲು, ಆಕಾಂಕ್ಷಿಲು, ಎಐಸಿಸಿ, ಕೆಪಿಸಿಸಿ ಸದಸ್ಯೆರ್, ಡಿಸಿಸಿ, ಬಿಸಿಸಿ ಗುರಿಕಾರೆರ್, ಮುಂಚೂಣಿ ಘಟಕ, ಸೆಲ್‌, ವಿಭಾಗದ ಮಾತ ಹಂತದ ಗುರಿಕಾರೆರ್, ಪಾಲಿಕೆ, ನಗರಸಭೆ, ಪಟ್ಟಣ ಪಂಚಾಯತ್‌ ಸದಸ್ಯೆರ್ ಬೊಕ್ಕ ಪರಾಜಿತ ಅಭ್ಯರ್ಥಿಲು, ಗ್ರಾ.ಪಂ ಸದಸ್ಯೆರ್, ಜಿಲ್ಲಾ ಕಾಂಗ್ರೆಸ್‌ ಮಟ್ಟರ್ದ್ ಬೂತ್‌ ಮುಟ್ಟದ ಮಾತ ಸಮಿತಿಲೆನ ಗುರಿಕಾರೆರ್, ಪದುಕೆರ್ ಬೊಕ್ಕ ಸದಸ್ಯೆರ್ ಲೇಸ್ ಡ್ ಪಾಲ್ ಪಡೆವೊಡು ಪಂದ್ ಪಂಡೆರ್.

ಉಳ್ಳಾಲ ಉಳಿಯದ ಉಳ್ಳಾಲ್ತಿ ಧರ್ಮ ಅರಸರು” ಬೂಕು ಬುಡುಗಡೆ

ಉಳ್ಳಾಲ್ತಿ ಆರಾಧನೆದ ವಿಶಿಷ್ಟ ಪೊಲಬು ಇಪ್ಪುನ ಉಳಿಯ ಗ್ರಾಮ ಚರಿತ್ರೆದ “ಉಳ್ಳಾಲ ಉಳಿಯದ ಉಳ್ಳಾಲ್ತಿ ಧರ್ಮ ಅರಸರು” ಕ್ಷೇತ್ರ ಪರಿಚಯ ಗ್ರಂಥ ಬುಡುಗಡೆ ಉಳ್ಳಾಲ ಉಳಿಯ ಕ್ಷೇತ್ರದ ಅನಂದೋತ್ಸವ ಚಾವಡಿಡ್ ನಡತ್ಂಡ್.

ದೈವಜ್ಞೆರ್ ಶ್ರೀರಂಗ ಐತಾಳ, ಧರ್ಮದರ್ಶಿಲು ದೇವು ಮೂಲ್ಯಣ್ಣ, ಮಾಜಿ ಆಡಳಿತ ಮೊಕ್ತೇಸರೆರ್ ಯು. ಎಸ್. ಪ್ರಕಾಶ್ ಬೂಕು ಬುಡುಗಡೆ ಮಲ್ತೆರ್.

ನೇತ್ರಾವತಿ ತುದೆಟ್ಟ್ ಇಪ್ಪುನ ಎಡತ್ತ ಪಾಶ್ವಡ್ ಉಳ್ಳಾಲದ ಎಲ್ಯ ದ್ವೀಪ ಉಳಿಯ. ನೂದೆರ್ದ್ ಎಚ್ಚ ವರ್ಷದ ಇತಿಹಾಸ ಇಪ್ಪುನ ಉಳಿಯ ಕ್ಷೇತ್ರಡ್ ಶಬರ ರೂಪದ ಶಿವ ಪಾರ್ವತಿಯೆರ್ ಅಣ್ಣೆ ತಂಗಡಿಯಾದ್ ರಡ್ಡ್ ಮಾಡಡ್ ನೆಲೆ ಆಯಿನ ಪಾರ್ದನ ಇಪ್ಪುನ ಕಥೆ-ನಂಬಿಕೆದ ಇಚಾರನ್ ಬೇತೆ ಬೇತೆ ಮೂಲಲೆರ್ದ್ ಸಂಗ್ರಹ ಮಲ್ದೆರ್.

ಕ್ಷೇತ್ರದ ತಂತ್ರಿ ವಾಮಂಜೂರು ಅನಂತ ಪದ್ಮನಾಭ ತಂತ್ರಿಲೆನ ಮಾರ್ಗದರ್ಶನಡ್, ದೇವು ಮೂಲ್ಯಣ್ಣ ಮೆರೆನ ಮಾನಾದಿಗೆದ ಸಂಪಾದಕತ್ವಡ್ ಕದ್ರಿ ನವನೀತ ಶೆಟ್ರ್ ಪ್ರಧಾನ ಸಂಪಾದಕೆರಾದ್ ಬೂಕು ರಚನೆ ಮಲ್ದೆರ್.

ಕ್ಷೇತ್ರ ಅಭಿವೃದ್ಧಿ, ಬ್ರಹ್ಮಕಲಶ ಬೊಕ್ಕ ಕ್ಷೇತ್ರಗ್ ಸಂಬಂಧಪಟ್ಟಿನ ಚಿತ್ರ ಇಪ್ಪುನ ಸುಮಾರ್ 200 ಪುಟತ್ತ ಬೂಕು ಉಂದು.

ಜ.14 ಕ್ಕ್ ಉಳಿಯ ಪಡುಮಾಡಡ್ ಪೂತ್ತ ಹಾಸಿಗೆ ಸೇವೆ ಉಂಡು. ಆನಿ ಪ್ರಕಟಣೆ ಪೂರ್ವ ಬೂಕುನ್ ಭಕ್ತೆರೆಗ್ ಪಟ್ಟಿಯೆರೆ ಉಂಡು ಪಂದ್ ಪ್ರಕಾಶಕ ಉಳಿಯತ್ತಾಯ ಸೇವಾ ಸಮಿತಿದ ಆನಂದ ಮೆಂಡನ್ ತೆರಿಪಾದೆರ್.

ಈ ಪೊರ್ತುಡು ಜೀರ್ಣೋದ್ದಾರ ಸಮಿತಿ ಗುರ್ಕಾರೆ ರಮೇಶ್ ಮೆಂಡನ್, ಬ್ರಹ್ಮಕಲಶ ಉಚ್ಚಯ ಸಮಿತಿದ ಕಾರ್ಯಾಧ್ಯಕ್ಷೆರ್ ಹರೀಶ್ ಕುಮಾರ್ ಕುತ್ತಾರ್, ಪ್ರಧಾನ ಕಾರ್ಯದರ್ಶಿ ರವಿಶಂಕರ್ ಸೋಮೇಶ್ವರ್, ವ್ಯವಸ್ಥಾಪನ ಸಮಿತಿದ ಗುರ್ಕಾರೆ ರಾಜೇಶ್ ಉಳಿಯ ಬೊಕ್ಕ ಗುರಿಕಾರೆರ್ ಪಾಲ್ ಪಡೆದಿತ್ತೆರ್.

ಡಾ.ಅರುಣ್ ಉಳ್ಳಾಲ್ ಬೂಕುದ ಪರಿಚಯ ಮಲ್ತೆರ್. ಜೀವನ್ ಉಳ್ಳಾಲ್ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಜ.12: ಕಲ್ಲಾಜೆಪಲ್ಕೆ ಮೈದಾನಡ್ ಸಂಪೂರ್ಣ ಶ್ರೀ ದೇವಿ ಮಹಾತ್ಮೆ ಆಟ

ಗೆಳೆಯರ ಬಳಗ ಕಲ್ಲಾಜೆ-ಕಡೇಶಿವಾಲಯದ ಮುತಾಲಿಕೆಡ್ 8ನೇ ವರ್ಷದ ಆಟ ಸಂಪೂರ್ಣ ಶ್ರೀ ದೇವಿ ಮಹಾತ್ಮೆ ಜ.12 ಸುಕ್ರಾರ ಕಲ್ಲಾಜೆಪಲ್ಕೆ ಮೈದಾನಡ್ ನಡಪರೆ ಉಂಡು.

ಈ ಆಟ ಊರುದ ಪತ್ತ್ ಸಮಸ್ತೆರೆನ ಸಹಕಾರಡ್, ಕಟೀಲ್ ಶ್ರೀ ದುರ್ಗಾಪರಮೇಶ್ವರಿ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ನಡಪರೆ ಉಂಡು.

ಜ.18: ಪೆರುವಾಜೆ ಶ್ರೀ ಜಲದುರ್ಗಾದೇವೀ ದೇವಲ್ಯಡ್ ಯಕ್ಷ ಸಂಭ್ರಮ 2024

ಪೆರುವಾಜೆ ಶ್ರೀ ಜಲದುರ್ಗಾದೇವಿ ದೇವಲ್ಯ ಬೊಕ್ಕ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಸುಳ್ಯ ಘಟಕದ ಒಟ್ಟುಸೇರಿಗೆಡ್ ಯಕ್ಷ ಸಂಭ್ರಮ 2024 ಜ.18 ಗುರುವಾರ ಬಯ್ಯಗ್ ಪೆರುವಾಜೆ ಶ್ರೀ ಜಲದುರ್ಗಾದೇವೀ ದೇವಲ್ಯಡ್ ನಡಪರೆ ಉಂಡು.

ನೆತ್ತ ಸಭಾ ಲೇಸ್ ದ ಗುರ್ಕಾರ್ಮೆನ್ ಕುಡ್ಲ ಯಕ್ಷಧ್ರುವ ಪಟ್ಲ ಫೌಂಡೇಶನ್ (ರಿ.) ದ ಸ್ಥಾಪಕಾಧ್ಯಕ್ಷೆರ್ ಸತೀಶ್ ಶೆಟ್ಟಿ ಪಟ್ಲ ಒಯಿಸೊನ್ವೆರ್. ಹಿರಿಯ ಯಕ್ಷಗಾನ ಕಲಾವಿದೆರ್ ಕೊಳ್ತಿಗೆ ನಾರಾಯಣ ಗೌಡ ಮೇರ್ ಪಟ್ಲ ಮಾನಾದಿಗೆಡ್ ಉಲ್ಲೆರ್. ಮಲ್ಲ ಬಿನ್ನೆರಾದ್ ಸುಳ್ಯ ಶಾಸಕೆರ್ ಭಾಗೀರಥಿ ಮುರುಳ್ಯ, ಪೆರುವಾಜೆ ಶ್ರೀ ಜಲದುರ್ಗಾದೇವಿ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ ಪದ್ಮನಾಭ ಶೆಟ್ಟಿ, ಪೆರುವಾಜೆ ಗ್ರಾಮ ಪಂಚಾಯತ್ ಗುರ್ಕಾರೆ ಜಗನ್ನಾಥ ಪೂಜಾರಿ ಮುಕ್ಕೂರು, ಮಾಜಿ ಒತ್ತು ಗುರ್ಕಾರೆ ಸುನಿಲ್ ರೈ, ಬೆಳ್ಳಾರೆ ಜೆಸಿಐದ ಗುರ್ಕಾರೆ ಜಗದೀಶ್ ರೈ, ಪ್ರಗತಿಪರ ಕೃಷಿಕೆರ್ ಶರತ್ ಪೂಗವನ‌ ಪಾಲ್ ಪಡೆಯೆರೆ ಉಲ್ಲೆರ್.

ಅಂಚೆನೆ ಪಾವಂಜೆ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ಕೃಪಾಪೋಷಿತ ಯಕ್ಷಗಾನ ಮಂಡಳಿದಕ್ಲೆರ್ದ್ ಅಯೋಧ್ಯಾ ದೀಪ ಆಟ ನಡಪರೆ ಉಂಡು ಪಂದ್ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಸುಳ್ಯ ಘಟಕದ ಮಾನಾದಿಗೆದ ಗುರ್ಕಾರೆ ಪಿ.ಬಿ ದಿವಾಕರ ರೈ, ಗುರ್ಕಾರೆ ಶ್ರೀನಾಥ್ ಬಾಳಿಲ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಜ.14: ಉರ್ವಾಸ್ಟೋರ್ ಶ್ರೀ ಮಹಾಗಣಪತಿ ದೇವಲ್ಯಗ್ ಪೊಸ ತೇರ್ ದ ಮೆರವಣಿಗೆ

ಕುಡ್ಲ: ಉರ್ವಾ ಸ್ಟೋರ್ ಶ್ರೀ ಮಹಾಗಣಪತಿ ದೇವಲ್ಯದ ಅಷ್ಟಬಂಧ ಬ್ರಹ್ಮಕಲಶ ಉಚ್ಚಯದ ಲೆಕ್ಕೊಡು ಶ್ರೀ ಮಹಾಗಣಪತಿ ದೇವೆರೆನ ಸನ್ನಿಧಾನಗ್ 65 ಲಕ್ಷ ರೂ.ಡ್ ನಿರ್ಮಾಣ ಆಯಿನ ಪೊಸ ತೇರ್ ದ ಮೆರವಣಿಗೆ ಜ.14 ಐತಾರ ನಡಪರೆ ಉಂಡು.

ಈ ಮೆರವಣಿಗೆ ಕೂಳೂರು ಗೋಲ್ಡ್ ಪಿಂಚ್ ಮೈದಾನರ್ದ್ ಬೇತೆ ಬೇತೆ ಭಜನಾ ಕೂಟದೊಟ್ಟಿಗೆ ನಲಿಕೆ ಭಜನೆ, ಚೆಂಡೆ, ವಾದ್ಯದೊಟ್ಟಿಗೆ ಶ್ರೀ ಮಹಾಗಣಪತಿ ಸನ್ನಿಧಾನಗ್ ಬ್ರಹ್ಮಶ್ರೀ ಡಾ. ಶಿವಪ್ರಸಾದ ತಂತ್ರಿಲೆನ ಉಪಸ್ಥಿತಿಡ್ ಬರಿಯೆರೆ ಉಂಡು.

ಈ ಮೆರವಣಿಗೆಡ್ ಭಕ್ತೆರ್ ಮಾತೆರ್ಲಾ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರ್ದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಉರ್ವಸ್ಟೋರ್ ಶ್ರೀ ಮಹಾಗಣಪತಿ ದೇವಲ್ಯದ ಸಮಸ್ತ ಭಕ್ತ ವೃಂದದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ರೇಡಿಯೊ ಮಣಿಪಾಲಡ್ ಮಧುರಗಾನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಮಧುರಗಾನ ಸರಣಿ ಲೇಸ್ ಜ.11 ಗುರುವಾರ ಬಯ್ಯಗ್ 6.30 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಉದಯವಾಣಿ ಉಪಸಂಪಾದಕೆರ್ ರಾಧಿಕಾ ಬಸ್ರೂರು ಪಾಲ್ ಪಡೆಯೆರ್. ಜ.12 ಕ್ಕ್ ಮಧ್ಯಾಹ್ನ 2.30 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಫ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ಶ್ರೀ ಕ್ಷೇತ್ರ ಗೆಜ್ಜೆಗಿರಿ ಜಾತ್ರೆ ಕಾರ್ಯಾಧ್ಯಕ್ಷೆರಾದ್ ಶೈಲೇಂದ್ರ ಸುವರ್ಣ

ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ವಾರ್ಷಿಕ ಜಾತ್ರಾ ಮಹೋಚ್ಚಯದ ಲೆಕ್ಕೊಡು ಜ.9 ಕ್ಕ್ ಕುಡ್ಲಡ್ ಅಟ್ಟಣೆದ ಸಭೆ ನಡತ್ಂಡ್.

ಫೆ.25-28 ಮುಟ್ಟ ನಡಪುನ ಈ ಜಾತ್ರಾ ಮಹೋಚ್ಚಯ ಯಶಸ್ವಿಯಾದ್ ನಡಪೊಡಾಂಡ ನೆತ್ತ ಲೆಪ್ಪೋಲೆನ್ ಪ್ರತಿಯೊಂಜಿ ಕ್ಷೇತ್ರಗ್ಲಾ ಕಡಪಾವೊಡು ಪಂದ್ ತೀರ್ಮಾನ ಮಲ್ತೆರ್. ಬೊಕ್ಕ ಶೈಲೇಂದ್ರ ಸುವರ್ಣ ಮೆರೆನ್ ಜಾತ್ರೋಚ್ಚಯ ಕಾರ್ಯಾಧ್ಯಕ್ಷೆರಾದ್ ಆಯ್ಕೆ ಮಲ್ತೆರ್.

ಈ ಪೊರ್ತುಡು ಕಂಕನಾಡಿ ಗರಡಿದ ಮುಖ್ಯಸ್ಥೆರ್ ಕೆ. ಚಿತ್ತರಂಜನ್ ಕಂಕನಾಡಿ, ಆಡಳಿತ ಸಮಿತಿದ ಗುರ್ಕಾರೆ ಪೀತಾಂಬರ ಹೆರಾಜೆ, ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲದ ಗುರ್ಕಾರೆ ರಾಜಶೇಖರ್ ಕೋಟ್ಯಾನ್, ಎಸ್ ಆರ್ ಶೈಲೇಂದ್ರ ಸುವರ್ಣ, ಪ್ರಧಾನ ಕಾರ್ಯದರ್ಶಿ ಉಲ್ಲಾಸ್ ಕೋಟ್ಯಾನ್, ಕೋಶಾಧಿಕಾರಿ ದೀಪಕ್ ಕೋಟ್ಯಾನ್, ಯುವವಾಹಿನಿ ಕೇಂದ್ರ ಸಮಿತಿದ ಗುರ್ಕಾರೆ ಹರೀಶ್ ಪೂಜಾರಿ ಬಳೆಂಜ, ಎಂ.ಜಯನಂದ ಪೂಜಾರಿ, ಸಂತೋಷ್ ಪೂಜಾರಿ ಉಗ್ಗೇಲ್ ಬೆಟ್ಟು, ಶುಭ ರಾಜೇಂದ್ರ ಪೂಜಾರಿ, ಜಯರಾಮ ಪೂಜಾರಿ ಸುಳ್ಯ, ಜಯರಾಮ್ ಬಂಗೇರ ಬೊಲ್ತೇರ್, ವಿದ್ಯಾ ರಾಕೇಶ್, ಶೇಖರ್ ಅಮೀನ್ ಮರೋಲಿ, ಹರೀಶ ಸನಿಲ್ ಕುಡ್ಲ, ಪೃಥ್ವಿರಾಜ್ ಎಂ ಕಂಕನಾಡಿ, ವಿಶ್ವನಾಥ್ ಕುಂದರ್ ಶಕ್ತಿನಗರ, ಕುಸುಮಾಕರ್ ಕುಂಪಲ ಪಾಲ್ ಪಡೆದಿತ್ತೆರ್.

ಉಲ್ಲಾಸ್ ಕೋಟ್ಯಾನ್ ಎದ್ಕೊನಿಯೆರ್. ದೀಪಕ್ ಕೋಟ್ಯಾನ್ ಸೊಲ್ಮೆ ಸಂದಾಯೆರ್.

ರಂಗಭೂಮಿಡ್ ಶ್ರೀಲಲಿತೆ ಕೂಟರ್ದ್ ಪೊಸತನದ ಪ್ರಯೋಗ: ಪಟ್ಲ ಸತೀಶ ಶೆಟ್ಟಿ

“ಗರುಡ ಪಂಚೆಮಿ” ನಾಟಕದ 50ನೇ ಸಂಭ್ರಮ, ಪತ್ರಕರ್ತೆರ್ ಜಗನ್ನಾಥ ಶೆಟ್ಟಿ ಬಾಳ ಮೆರೆಗ್ “ರಂಗ ಕಲಾಬಂಧು” ಬಿರುದು ಪ್ರದಾನ

ಕುಡ್ಲ: ರಂಗಭೂಮಿಡ್ ಶ್ರೀ ಲಲಿತೆ ಕಲಾವಿದೆರೆನ ತಂಡ ಬೇತೆ ಬೇತೆ ರೀತಿದ ನಾಟಕಲೆನ್ ಪ್ರದರ್ಶನ ಮಲ್ಪುನ ಮುಕೇನ ತೂಪಿನ ಜನಕ್ಲೆಗ್ ಪೊಸತನನ್ ಕೊರ್ತ್ಂಡ್. ಅವೆಟ್ಟ್‌ಲ ಶ್ರೀಲಲಿತೆ ಕಲಾವಿದೆರೆನ ತಂಡರ್ದ್ ಪ್ರದರ್ಶನ ಆಯಿನ “ಗರುಡ ಪಂಚೆಮಿ” ನಾಟಕಡ್ ವಿಶಿಷ್ಟವಾಯಿನ ರಂಗವಿನ್ಯಾಸನ್ ಗಲಸ್‌ದೆರ್. ಕಿಶೋರ್ ಡಿ. ಶೆಟ್ಟಿ ಮೇರ್ ರಂಗಭೂಮಿಗ್ ಮೌಲ್ಯಯುತ ಆಯಿನ ನಾಟಕಲೆನ್ ಕೊರ್ತೆರ್. ಸಮಾಜಗ್ ಎಡ್ಡೆ ಸಂದೇಶ ಉಂಡು ಪಂದ್ ಯಕ್ಚಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್‌ದ ಸ್ಥಾಪಕಾಧ್ಯಕ್ಷೆರ್ ಪಟ್ಲ ಸತೀಶ್ ಶೆಟ್ಟಿ ತೆರಿಪಾಯೆರ್.

ಕುಡ್ಲ ಪುರಭವನಡ್ ಶ್ರೀ ಕಲಾವಿದರು (ರಿ) ಅರ್ಪಣೆ ಮಲ್ಪುನ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಪ್ರಾಯೋಜಕತ್ವಡ್ ನಡತಿನ ಗರುಡ ಪಂಚೆಮಿ ನಾಟಕದ 50ನೇ ಪ್ರದರ್ಶನದ ಸಂಭ್ರಮಾಚರಣೆ ಬೊಕ್ಕ ಪತ್ರಕರ್ತೆರ್ ಜಗನ್ನಾಥ ಶೆಟ್ಟಿ ಬಾಳ ಮೆರೆಗ್ ಕೊರಿನ “ರಂಗ ಕಲಾಬಂಧು” ಬಿರುದು ಪ್ರದಾನ ಲೇಸ್‌ನ್ ತುಡರ್ ಅರ್ಲಾದ್ ಉದಿಪನ ಮಲ್ತ್‌ದ್ ಪಾತೆರಿಯೆರ್.

ಮೇಯರ್ ಸುಧೀರ್ ಶೆಟ್ಟ ಕಣ್ಣೂರು ಅಧ್ಯಕ್ಷತೆ ವಹಿಸ್‌ದಿತ್ತೆರ್. ಆರ್ ಪಾತೆರ್ದ್, ಕಿಶೋರ್ ಡಿ ಶೆಟ್ಟಿ ಮೇರ್ ಮಸ್ತ್ ವರ್ಷರ್ದ್ ನಾಟಕ ತಂಡಲೆನ್ ಕಟ್ಟ್‌ದ್ ಕಲಾವಿದೆರೆಗ್ ಆಸರೆಯಾತೆರ್. ಸಾಮಾಜಿಕ, ಪೌರಾಣಿಕ, ಭಕ್ತಿ ಪ್ರಧಾನ ನಾಟಕಲೆನ ಪ್ರದರ್ಶನದ ಮುಕೇನ ಆರ್ ಪುದರ್ ಪಡೆತಿನಾರ್. ರಂಗಭೂಮಿಗ್ ಅರೆನ ಮಲ್ಲ ಕೊಡುಗೆ ಉಂಡು ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ಚಲನಚಿತ್ರ ನಿರ್ಮಾಪಕೆರ್ ಪ್ರಕಾಶ್ ಪಾಂಡೇಶ್ವರ, ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕೆರ್ ರಾಜೇಶ್ ಜಿ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಕಾರ್ಯದರ್ಶಿ ಪುರುಷೋತ್ತಮ್ ಭಂಡಾರಿ, ಯಕ್ಷಧ್ರುವ ಪಟ್ಲ ಫೌಂಡೇಶನ್ ಕೋಶಾಧಿಕಾರಿ ಸಿಎ ಸುದೇಶ್ ರೈ, ಜನನಿ ಕನ್ ಸ್ಟ್ರಕ್ಷನ್ ಮಾಲಕೆರ್ ಸುಧಾಕರ್ ಪೂಂಜ, ಹೋಟೆಲ್ ಉದ್ಯಮಿ ಶಶಿಕಾಂತ ಶೇಖ, ಲ. ಚಂದ್ರಹಾಸ್ ಶೆಟ್ಟಿ, ಉದ್ಯಮಿ ತಾರಾನಾಥ ಶೆಟ್ಟಿ ಬೋಳಾರ, ಭುಜಬಲಿ ಧರ್ಮಸ್ಥಳ, ಲೀಲಾಕ್ಷ ಕರ್ಕೇರ, ಲ. ಸ್ವರೂಪ ಎನ್. ಶೆಟ್ಟಿ, ನವೀನ್ ಶೆಟ್ಟಿ ಅಳಕೆ ಪಾಲ್ ಪಡೆದ್ ಇತ್ತೆರ್.

ಉಂದುವೇ ಪೊರ್ತುಡ್ ಪತ್ರಕರ್ತೆರ್ ಬಾಳ ಜಗನ್ನಾಥ ಶೆಟ್ಟಿ ಮೆರೆಗ್ ರಂಗಕಲಾ ಬಂಧು ಬಿರುದು ಕೊರ್ದು ಮಾನಾದಿಗೆ ಮಲ್ತೆರ್. ಅವ್ವೇ ರೀತಿ ತ್ರಿರಂಗ ಸಂಗಮ ಬೊಂಬೈ ಉಂದೆತ್ತ ಸಂಚಾಲಕೆರ್ ಅಶೋಕ್ ಪಕ್ಕಳ, ನವೀನ್ ಶೆಟ್ಟಿ ಇನ್ನ, ಕರ್ನೂರು ಮೋಹನ್ ರೈ ಮೊಕುಲೆಗ್ ಮಾನಾದಿಗೆ ಮಲ್ತೆರ್. ನಾಟಕ ರಚನೆಕಾರೆರ್ ಜೀವನ್ ಉಳ್ಳಾಲ್, ಮೋಹನ್ ಕೊಪ್ಪಲ, ಕದ್ರಿ ನವನೀತ ಶೆಟ್ಟಿ, ಪ್ರದೀಪ್ ಆಳ್ವ ಕದ್ರಿ, ಗೋಕುಲ್ ದಾಸ್ ಇತ್ತೆರ್. ಕದ್ರಿ ನವನೀತ ಶೆಟ್ಟಿ ಲೇಸ್ ಸುಧಾರಿಕೆ ಮಲ್ತೆರ್. ಕಿಶೋರ್ ಡಿ. ಶೆಟ್ಟಿ ಬತ್ತಿನ ಬಿನ್ನೆರೆನ್ ಎದ್ಕೊನಿಯೆರ್. ಅವೆರ್ದ್ ಬೊಕ್ಕ ಗರುಡ ಪಂಚೆಮಿ ನಾಟಕ ಪ್ರದರ್ಶನ ಆಂಡ್.

ಜ.14: ಹಳೇಕೋಟೆ ಶ್ರೀ ಮಾರಿಯಮ್ಮ ದೇವಲ್ಯಡ್ ಸಾರ್ವಜನಿಕ ಮಹಾ ಚಂಡಿಕಾಯಾಗ, ಇಸೇಸ ಪೂತ್ತ ಪೂಜೆ

ಕುಡ್ಲ: ಹಳೇಕೋಟೆ ಶ್ರೀ ಮಾರಿಯಮ್ಮ ದೇವಲ್ಯಡ್ ಜ.14 ಐತಾರ ಸಾರ್ವಜನಿಕ ಮಹಾ ಚಂಡಿಕಾಯಾಗ ಬೊಕ್ಕ ಇಸೇಸ ಪೂತ್ತ ಪೂಜೆ ಗೌಜಿಡ್ ನಡಪರೆ ಉಂಡು.

ಆನಿ ಮಧ್ಯಾಹ್ನ ಮಹಾಪೂಜೆದ ಬೊಕ್ಕ ಅನ್ನ ಪ್ರಸಾದ ಸೇವೆ, ರಾತ್ರೆ ಹಳೇಕೋಟೆ ಶ್ರೀ ಮಾರಿಯಮ್ಮ ಪ್ರಸಾದಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು.

ಅಂಚೆನೆ ಜ.12 ಸುಕ್ರಾರ ಬಯ್ಯಗ್ ಪಾಂಡೇಶ್ವರ, ಮಂಗಳಾದೇವಿ, ಜಪ್ಪು, ಮುಳಿಹಿತ್ಲು, ಬೋಳಾರ ಮಾರ್ಗವಾದ್ ಪುದೆಕಾಣಿಕೆ ಮೆರವಣಿಗೆ ಬರಿಯೆರೆ ಉಂಡು.

ಈ ಮಾತ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ವರ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಆಡಳಿತ ಮಂಡಳಿದಕುಲು ಲೆಪ್ಪೋಲೆಡ್ ತೆರಿಪಾದೆರ್.