ನೆಲ್ಯಾಡಿ: ಕುಡ್ಲ- ಬೆಂಗ್ಳೂರ್ ರಾಷ್ಟ್ರೀಯ ಪೆರ್ಸಾದಿ 75ತ ಕೊಣಾಲ್ ಗ್ರಾಮೊದ ಕೋಲ್ಪೆ ಪಲ್ಲಿದ ಎದುರು ಉಂತಾದಿತ್ತಿನ ಲಾರಿಗ್ ಬೈಕ್ ಎಡ್ತ್ದ್ ಬೈಕ್ ಬುಡೊಂದಿತ್ತಿನಾಯಗ್ ಗಾತಿದ ಪೆಟ್ಟಾತಿನ ನಡಕೆ ನವೆಂಬರ್ 16ತ ಮಧ್ಯಾಹ್ನ ನಡತಿತ್ತ್ಂಡ್. ಪೆಟ್ಟಾತಿನಾರೆನ್ ಅಪಗನೇ ನೆಲ್ಯಾಡಿದ ಅಶ್ವಿನಿ ಆ್ಯಂಬ್ಯುಲೆನ್ಸ್ಡ್ ಕುಡ್ಲದ ಖಾಸಗಿ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಸ್ಪತ್ರೆಡ್ ಮರ್ದ್ ಪಲಿಪಂದೆ ತೀರ್ದೆರ್.
ಕುಡ್ಲ: ಕರಾವಳಿಡ್ ಪಿರ ಹಿಂದೂ ಕಾರ್ಯಕರ್ತೆರೆನ ಮಿತ್ತ್ ಗಡೀಪಾರು ಅಸ್ತ್ರ ಪ್ರಯೋಗ ಆತ್ಂಡ್. ದಕ್ಷಿಣ ಕನ್ನಡ ಜಿಲ್ಲೆದ ಐನ್ ಜನ ಬಜರಂಗದಳ ಕಾರ್ಯಕರ್ತರೆಗ್ ಪೊಲೀಸೆರ್ ನೋಟೀಸ್ ಜಾರಿ ಮಲ್ತ್ದೆರ್.
ನೈತಿಕ ಪೊಲೀಸ್ ಗಿರಿಟ್ಟ್ ಪಾಲ್ ಪಡೆನ ಬಜರಂಗದಳ ಕಾರ್ಯಕರ್ತೆರ್ ಲತೇಶ್ ಗುಂಡ್ಯ, ಪ್ರಜ್ವಲ್, ನಿಶಾಂತ್, ಪ್ರದೀಪ್ ಬೊಕ್ಕ ದಿನೇಶ್ಗ್ ದಾಯೆ ಗಡಿಪಾರು ಮಲ್ಪೆರೆ ಬಲ್ಲಿ ಪಂದ್ ಕಾರಣ ಕೇಂದ್ ನೋಟೀಸ್ ಜಾರಿ ಆತ್ಂಡ್. ಮಾತೆರೆಗ್ ನವೆಂಬರ್ 22 ದಾನಿ ಪುತ್ತೂರು ಸಹಾಯಕ ಆಯುಕ್ತರ ಎದುರು ಹಾಜರ್ ಆವೆರೆ ಸೂಚನೆ ಕೊರ್ತೆರ್.
ಮೊಕ್ಲೆನೆಟ್ಟ್ ದಿನೇಶ್ ಬೊಕ್ಕ ಪ್ರಜ್ವಲ್ ಬಜರಂಗದಳಡ್ ಪುತ್ತೂರು ತಾಲೂಕು ಜವಾಬ್ದಾರಿ ವಹಿಸ್ದ್ ಇತ್ತೆರ್. ಲತೇಶ್ ಗುಂಡ್ಯ ಬಜರಂಗದಳದ ಪುತ್ತೂರು ಜಿಲ್ಲಾ ಸಹ ಸಂಯೋಜಕ್ ಆದಿತ್ತೆರ್. ಬಾಕಿದಕುಲು ಕಾರ್ಯಕರ್ತೆರಾದಿತ್ತೆರ್. ಈ ಐನ್ ಜನಟ್ಟ್ ಲತೇಶ್ನ್ ಬುರ್ದ್ ಒರಿನ ನಾಲ್ ಜನತ್ತ ಮಿತ್ತ್ ಒಂಜೊಂಜಿ ಕೇಸ್ಲು ಉಲ್ಲ. ಮೊಕುಲು ಕೋಮುಗಲಭೆ, ದನಸಾಗಾಟ ಹಲ್ಲೆ, ನೈತಿಕ ಪೊಲೀಸ್ ಗಿರಿ ಸೇರಿನಂಚ ಕೆಲವು ಕೇಸ್ಡ್ ಪಾಲ್ ಪಡೆನ ಆರೋಪಲು ಉಲ್ಲ. ಪುತ್ತೂರು ನಗರ ಠಾಣೆ ಬೊಕ್ಕ ಸುಳ್ಯ ಠಾಣೆರ್ದ್ ಗಡೀಪಾರ್ಗ್ ಸೂಚನೆ ಕೊರ್ತೆರ್.
ವಿಚಾರಣೆಗ್ ಹಾಜರ್ ಆಯಿನ ಬೊಕ್ಕ ಅಧಿಕೃತವಾದ್ ಒಂಜಿ ವರ್ಷದ ಕಾಲ ಗಡೀಪಾರು ಆದೇಶ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್.
ಪುತ್ತೂರು : ನೀಂದೊಂದಿಪ್ಪುನಗ ಹಾರ್ಟ್ ಆಟ್ಯಾಕ್ ಆದ್ ಜನವೆ ಒರಿ ತೀರಿನ ನಡಕೆ ಪುತ್ತೂರುಡು ನಡದ್ಂಡ್. ಪುತ್ತೂರುದ ದೇವಸ್ಯದ ನಿವಾಸಿ 27 ವರ್ಸದ ಸುಜಿತ್ ಮೇರ್ ತೀರಿನಾರ್.
ಸುಜಿತ್ ಮೇರ್ ಸಂಬಂದದಕಲೆನ ಇಲ್ಲದಲ್ಪ ಪೋದಿತ್ತಿನಪಗ ಅಲ್ಪನೇ ಕೈತಲ್ ತುದೆಟ್ ನೀಂದರೆ ಪೋತೆರ್, ನೀಂದೊಂದಿಪ್ಪುನಗನೇ ಹಾರ್ಟ್ ಆಟ್ಯಾಕ್ಡ್ ತೀರಿಯೆರ್. ಮೇರ್ ಪುತ್ತೂರುದ ಬೊಳುವಾರ್ ಗ್ಯಾರೇಜ್ ಡ್ ಬೇಲೆ ಮಲ್ತೊಂದಿತ್ತೆರ್. ಪರ್ಬದ ಲೆಕ್ಕೊಡು ಸಂಬಂದದಕಲೆನ ಇಲ್ಲಗ್ ಪೋದಿತ್ತೆರ್.
ಬೋಲ್ತೆರ್: ಕರಿಮಣೇಲು ಶ್ರೀ ಕ್ಷೇತ್ರ ದೇಲಂಪುರಿ ಶ್ರೀ ಮಹಾದೇವ ಮಹಾಗಣಪತಿ ಸಭಾ ಮಂಟಪಡ್ ದುಡ್ಡು ಬಾಲಕೃಷ್ಣ ಭಟ್ಟೆರೆನ ನುಡಿನಮನ ಕಾರ್ಯಕ್ರಮ ನ.19 ದಾನಿ ಐತಾರ 4 ಗಂಟೆಗ್ ನಡಪೆರೆ ಉಂಡು.
ಮಾತೆರ್ಲ ಬತ್ತ್ ದ್ ಶ್ರೀ ಕ್ಷೇತ್ರ ದೇಲಂಪುರಿದ ಜೀರ್ಣೋದ್ಧಾರದ ರೂವಾರಿಗ್ ನುಡಿನಮನ ಸಲ್ಲಿಸಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಕುಮಾರಸ್ವಾಮಿ ವಿದ್ಯಾಲಯಡ್ ಪ್ರತಿ ವರ್ಷ ನಡಪುನ ಎಡ್ಡೆ ಸಾಧನೆ ಮಲ್ತಿನಕ್ಲೆಗ್ ಕೊರ್ಪುನ ಕುಮಾರ ನಾಯರ್ ಎಕ್ಸಲೆನ್ಸ್ ಅವಾರ್ಡ್ ಪ್ರಧಾನ ಲೇಸ್ ಇಂಚಿಪಗ್ ನಡತ್ಂಡ್.
ಈ ಸರ್ತಿ ಬಿಳಿ ನೆಲೆದ ನೋಣಯ್ಯ ಉಗ್ರಾಣಿ ಮೆರೆನ ಮಗೆ ಎಸ್. ಆರ್. ಕೆ .ಲ್ಯಾಡರ್ಸ್ ದ ಧಣಿ ಕೇಶವ ಮೇರೆಗ್ ಕೊರಿಯೆರ್ ನೀಡಿ ಗೌರವಿಸಲಾಯಿತು . ಪ್ರಶಸ್ತಿ ಸ್ವೀಕಾರ ಮಲ್ತ್ ಪಾತೆರ್ದ್ ಕುಮಾರ ನಾಯರ್ ಅರೆನ ದೂರ ದೃಷ್ಟಿರ್ದ್ ಸಾವಿರ ಜೋಕುಲ್ ಇನಿ ಎಡ್ಡೆ ಮಟ್ಟ್ ದ ಶಿಕ್ಷಣನ್ ಪಡೆಯೊಂದುಲ್ಲೆರ್. ಈ ಸಂಸ್ಥೆಡ್ ಕಲ್ತಿನ ಜೋಕುಲು ರಾಜ್ಯಮಟ್ಟಡ್ ರಾಂಕ್ ಪಡೆದ್ ಎಡ್ಡೆ ಬೇಲೆಡ್ ಉಲ್ಲೆರ್. ಮೂಲು ಕಲ್ಪುನ ಮಾತಾ ಜೋಕುಲೆಗ್ ಎಡ್ಡೆ ಭವಿಷ್ಯ ಉಂಡು ಪಂದ್ ಪಂಡೆರ್.
ವೇದಿಕೆಡ್ ಸಮಾರಂಭದ ಗುರ್ಕಾರ್ದಿ ವಿದ್ಯಾರ್ಥಿನಿ ತಪಸ್ಯ ನಾಯಕ್, ಸಂಸ್ಥೆದ ಗುರ್ಕಾರ್ಲು ಗಣೇಶ್ ಪ್ರಸಾದ್ , ನ್ಯಾಯವಾದಿ ಜಯಪ್ರಕಾಶ್ ರೈ, ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಸಮಿತಿದ ಸದಸ್ಯೆರ್ ಶೋಭಾ ಗಿರಿಧರ್, ಆಡಳಿತ ಮಂಡಳಿದ ಸದಸ್ಯೆರ್ ವೆಂಕಟರಾಜ್, ಶಿವರಾಮ ಏನಕಲ್, ಶಿಕ್ಷಕರಕ್ಷಕ ಸಂಘದ ಗುರ್ಕಾರ್ಲು ಭಾರತೀ ದಿನೇಶ್, ಸಂಸ್ಥೆಯ ಮುಖ್ಯೋಪಾಧ್ಯಾಯನಿ ವಿದ್ಯಾರತ್ನ, ಪ್ರಾಂಶುಪಾಲ ಡಾlಸಂಕೀರ್ತ ಹೆಬ್ಬಾರ್ , ವಿದ್ಯಾರ್ಥಿ ನಾಯಕೆ ಪ್ರದೀಶ್ ಇತ್ತೆರ್. ಸಂಸ್ಥೆದ ಸಂಚಾಲಕೆರ್ ಚಂದ್ರಶೇಖರ ನಾಯರ್ ಪ್ರಸ್ತಾವಿಕವಾದ್ ಪಾತೆರ್ದ್ ಮಾತೆರೆನ್ ಎದ್ಕೊಂಡೆರ್. ಆಡಳಿತ ಮಂಡಳಿ ಸದಸ್ಯೆರ್ ಶಿವರಾಮ್ ಸೊಲ್ಮೆ ಸಂದಾಯ ಮಲ್ತೆರ್. ಕಲ್ಪಾರ್ಥಿಲಾಯಿನ ನಿವೇದಿತ ಗಣೇಶ್ ಬೊಕ್ಕ ಪೂರ್ವಿ ಆರ್ ಲೇಸ್ ದ ಸುದಾರಿಕೆ ಮಲ್ತೆರ್.
ಕಾಪು: ಕಟಪಾಡಿದ ಭಾಗ್ಯಲಕ್ಷ್ಮೀ ಗ್ರಾನೈಟ್ಸ್ ಎದುರು ಕಾರ್ ಒಂಜಿ ಡಿಕ್ಕಿ ಹಾಕಿನ ಪರಿಣಾಮ ರೋಡ್ ಕ್ರಾಸ್ ಮಲ್ತೊಂದು ಇತ್ತಿನ ಜನ ಒಂಜಿ ತೀರ್ ಪೋಯಿನ ಘಟನೆ ನಡತ್ಂಡ್.
ತೀರ್ ಪೋಯಿನಾರ್ ಇನ್ನಂಜೆದ ಉತ್ತಮ (33) ಪಂದ್ ತೆರಿದ್ ಬೈದ್ಂಡ್.
ಕಾರ್ ಡಿಕ್ಕಿ ಹಾಕ್ ದ್ ಡ್ರೈವರ್ ಪರಾರಿ ಆತೆ ಪಂದ್ ತೆರಿದ್ ಬೈದ್ಂಡ್. ಗಾಯಾಳುನು ಆಸ್ಪತ್ರೆಗ್ ಲೆತಪೋನಗ ಸಾದಿದ ನಡುಟ್ ತೀರ್ ಪೋತೆರ್.
ಈ ಬಗೆಟ್ ಕಾಪು ಪೊಲೀಸ್ ಠಾಣೆಡ್ ಕೇಸ್ ದಾಖಲಾತ್ಂಡ್.
ಬೆಟ್ಟಂಪಾಡಿ: ಶ್ರೀ ಮಂಜುನಾಥೇಶ್ವರ ಭಜನಾ ಮಂದಿರಡ್ ಉಚಿತ ಯಕ್ಷಗಾನ ತರಬೇತಿ ತರಗತಿ ಸುರು ಆಂಡ್. ಯಕ್ಷಗಾನ ಗುರು ಶಶಿಕಿರಣ್ ಕಾವು ತುಡರ್ ಅರ್ಲಾದ್ ಉದಿಪನ ಮಲ್ತ್ ಶುಭ ಹಾರೈಸಾಯೆರ್.
ವೇದಿಕೆಡ್ ಶಿವಾಜಿ ಗೆಳೆಯರ ಬಳಗದ ಗುರ್ಕಾರ್ಲು ರಾಧಕೃಷ್ಣ ನಾಯಕ್, ಕಾರ್ಯದರ್ಶಿ ಭಾಸ್ಕರ್ ಎಂ.ಎಸ್, ಮಂಜುನಾಥೇಶ್ವರ ಭಜನಾ ಮಂಡಳಿ ಗೌರವಾಧ್ಯಕ್ಷೆರ್ ನಾರಾಯಣ ಬೆಟ್ಟಂಪಾಡಿ, ಭಜನಾ ಮಂಡಳಿದ ಗುರ್ಕಾರ್ಲು ಅವಿನ್ ಬೆಟ್ಟಂಪಾಡಿ, ಸನತ್ ಬರಮೇಲು ಇತ್ತೆರ್.
ಬೆಳಂದೂರು: ಅಂತರ್ ಕಾಲೇಜು ತುಳು ಐಸಿರೊ 2023 ತುಳು ವೈವಿಧ್ಯ ಪಂತೊದ ಮೋನೆಗ್ ಅರದಲ ವಿಭಾಗಡ್ ಬೆಳಂದೂರು ಸರಕಾರಿ ಪ್ರಥಮ ದರ್ಜೆ ಕಾಲೇಜ್ದ ದೇವಿ ಪ್ರಸಾದ್ ಬೊಕ್ಕ ಸಚಿನ್ ಪಿ. ಸುರುತ ಇನಾಮು ಪಡೆಯೊಂದೆರ್.
ಮೋನೆಗ್ ಅರದಲ ವಿಭಾಗಡ್ ಯಕ್ಷಗಾನದ ಹಾಸ್ಯ ಮುಖವರ್ಣಿಕೆ ಪನ್ಪುನ ವಿಷಯ ಕೊರ್ದು ಇತ್ತೆರ್. ದೇವಿ ಪ್ರಸಾದ್ ಬೊಕ್ಕ ಸಚಿನ್ ಪಿ. ಮೊಕ್ಲೆಗ್ ಕಾಲೇಜ್ದ ಸಾಂಸ್ಕೃತಿಕ ಸಂಚಾಲಕಿ ದೀಪ್ತಿ ಎ.ಸಿ. ಮಾರ್ಗದರ್ಶನ ಕೊರ್ದಿತ್ತೆರ್.
ಕುಡ್ಲದ ರಥಬೀದಿಡ್ ಇಪ್ಪುನ ಡಾ| ಪಿ. ದಯಾನಂದ ಪೈ – ಪಿ ಸತೀಶ ಪೈ ಸರಕಾರಿ ಪ್ರಥಮ ದರ್ಜೆ ಕಾಲೇಜ್ಡ್ ಸ್ಪರ್ಧೆ ನಡತ್ತ್ಂಡ್, ಬೆಳಂದೂರು ಸರಕಾರಿ ಕಾಲೇಜ್ದ ವಿದ್ಯಾರ್ಥಿಲು ಪಾಲ್ ಪಡೆದಿತ್ತೆರ್.
ಪುತ್ತೂರು: ಪುತ್ತಿಲ ಪರಿವಾರ ಧಾರ್ಮಿಕ ಸೇವಾ ಸಮಿತಿರ್ದ್ ಲೋಕ ಕಲ್ಯಾಣಾರ್ಥಕವಾದ್ ಕೆಮ್ಮಾಯಿ ಶ್ರೀ ಮಹಾವಿಷ್ಣು ದೇವೆರೆಗ್ ತುಳಸಿ ಅರ್ಚನೆ ಬೊಕ್ಕ ಸಾರ್ವಜನಿಕ ದುರ್ಗಾಪೂಜೆ ಡಿ.1ರಂದು ನಡಪೆರೆ ಉಂಡು, ಅವೆತ್ತ ಲೆಪ್ಪೋಲೆ ಬುಡುಗಡೆ ಪತ್ರನ್ ಆಮಂತ್ರಣ ದೇವಸ್ಥಾನದ ವಠಾರಡ್ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ಅರ್ಚಕೆರ್, ಪುತ್ತಿಲ ಪರಿವಾರದ ಸದಸ್ಯೆರ್ ಇತ್ತೆರ್.
ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಳಡ್ ರಾಜ್ಯ ಸರಕಾರದ ಆದೇಶದ ಮಿತ್ತ್ ಗೋಪೂಜೆ ನ.14 ಅಂಗಾರೆ ದಾನಿ ನಡತ್ಂಡ್.
ದೇವಸ್ಥಾನದ ಎದುರುಡು ಬಯ್ಯ 5.30ರ್ದ್ 6.30 ತ್ತ ನಡುಟ್ಟು ಗೋಧೂಳಿ ಲಗ್ನಡ್ ಗೋಪೂಜೆ ನಡತ್ಂಡ್. ಈ ಲೇಸ್ ಡ್ ಎಚ್ಚಿನ ಸಂಖ್ಯೆಡ್ ಭಕ್ತೆರ್ ಪಾಲ್ ಪಡೆದಿತ್ತೆರ್.
