ಕನ್ಯಾನ ಗ್ರಾಮದ ದ.ಕ.ಜಿ.ಪಂ.ಹಿ.ಪ್ರಾ. ಶಾಲೆ ಕಣಿಯೂರು ಮುಲ್ತ ಕಲ್ಪಾರ್ಥಿಲೆಗ್ ನೇಜಿ ನಡ್ಪಿನ ಬೇಲೆದ ಅನುಭವದ ಕಲಿಕೆಗಾದ್ ಸಾಲೆದ ದುಂಬುದ ಕಲ್ಪಾರ್ಥಿ ಗಣೇಶ್ ಸಪಲ್ಯ ಬಟ್ನಡ್ಕ ಮೊಕ್ಲೆನ ಇಲ್ಲದ ಕಂಡಡ್ ಇನಿ ನೇಜಿ ನಡ್ಪುನ ಲೇಸ್ ನಡತ್ಂಡ್.
ಈ ಲೇಸ್‌ಡ್ ಸಾಲೆದ ಮುಖ್ಯ ಶಿಕ್ಷಕಿ ಶ್ ಅನಿತಾ ಮಿನೇಜಸ್ ಕೃಷಿ ಬದ್‌ಕ್‌ದ ಪಂತನ್ ಕಲ್ಪಾರ್ಥಿಲೆಗ್ ವಿವರಣೆ ಕೊರಿಯೆರ್. ಕಲ್ಪಾರ್ಥಿಲು ಕಂಡದ ವೀಕ್ಷಣೆ ಮಲ್ತ್ , ನೇಜಿ ನಡಿಯೆರ್.
ಶಿಕ್ಷಕೆರಾಯಿನ ರೇಷ್ಮಾ, ಲವೀನಾ, ಕು. ವನಿತಾ ಕೆ.ಎಲ್, ರೇಣುಕಾ, ಇಲ್ಲದಕುಲು ಇತ್ತೆರ್.
ಕಾರ್ಲ: ಮೈತ್ರಿ ಮಹಿಳಾ ಮಂಡಲ ಈದು ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಲುನಾಡ್ (ರಿ.) ದ ಒಟ್ಟುಸೇರಿಗೆಡ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯದ ಉದಿಪನ ಲೇಸ್ ಐತಾರ ಶ್ರೀ ಮುಜಿಲ್ನಾಯ ಅನುದಾನಿ‌ತ ಹಿರಿಯ ಪ್ರಾಥಮಿಕ ಶಾಲೆಡ್ ನಡತ್ಂಡ್.
ಈ ಲೇಸ್ ದ ಉದಿಪನನ್ ಶಾಲೆದ ಸಂಚಾಲಕೆರ್ ಪ್ರೇಮ್ ಕುಮಾರ್ ಜೈನ್ ಮೇರ್ ಮಲ್ತ್ ದ್ ತುಳು ನಮ್ಮ ಅಪ್ಪೆ ಭಾಷೆ ಆಯಿಕ್ಕ್ ಸಾರರ್ದ್ ಎಚ್ಚ ಕಾಲದ ಇತಿಹಾಸ ಉಂಡು. ಅವೆನ್ ಕಲ್ತ್ ದ್ ಬುಲೆಪಾವುನವು ನಮ್ಮ ಮಾತೆರ್ನಲ ಜಬದಾರಿ ಪಂದ್ ಪಂಡೆರ್. ಅಂಚೆನೆ ಜೈ ತುಲುನಾಡ್ (ರಿ.) ಸಂಘಟನೆದ ಕೆಲಸನ್ ಮೆಚ್ಚಿಯೆರ್.
ಈ ಲೇಸ್ ದ ಗುರ್ಕಾರ್ಮೆನ್ ಮೈತ್ರಿ ಮಹಿಳಾ ಮಂಡಲದ ಅಧ್ಯಕ್ಷೆರ್ ವಿಮಲ ಆರ್ ಬಲ್ಲಾಳ್ ಒಯಿಸೊಂದಿತ್ತೆರ್. ಮಲ್ಲ ಬಿನ್ನೆರಾದ್ ಜೈ ತುಲುನಾಡ್ (ರಿ.) ಸಂಘದ ಅಧ್ಯಕ್ಷೆರ್ ವಿಶು ಶ್ರೀಕೇರ, ಶಾಲೆದ ಮುಖ್ಯೋಪಾಧ್ಯಾಯೆರ್ ಜ್ಞಾನೇಂದ್ರ ಜೈನ್ ಬೊಕ್ಕ ಯಶೋಧ ಶೆಟ್ಟಿ, ಪ್ರಭಾವತಿ ಪಾಲ್ ಪಡೆದಿತ್ತೆರ್.
ಪದ್ಮಜಾ ಶೆಟ್ಟಿ ಮಾನಸ ಲೇಸ್ ದ ಸುಧಾರಿಕೆ ಮಲ್ತೆರ್. ಸ್ವಾತಿ ಹೆಗ್ಡೆ ಎದ್ಕೊಂದು ಸೊಲ್ಮೆ ಸಂದಾಯೆರ್. ಕಲಿಕಾ ತರಗತಿದ ಅ.6 ರ್ದ್ ಪ್ರತಿ ಐತಾರ ನಡಪರೆ ಉಂಡು.
ಕುಡ್ಲ: ವಿಶ್ವವಿದ್ಯಾಲಯದ ಮಾಜಿ ಉಪಕುಲಪತಿ ಪ್ರೊ.ಕೆ.ಬೈರಪ್ಪ (69ವ) ಇನಿ ಬೊಲ್ಪುಗು ತಿಗಲೆ ಬೇನೆಡ್ ತೀರ್‌ಪೋಯೆರ್.
ಕುಡ್ಲದ ವಿಶ್ವವಿದ್ಯಾಯಡ್ 2014 ಜೂನ್‌ರ್ದ್ 2019 ಜೂನ್ ಮುಟ್ಟ ಕುಲಪತಿಯಾದ್ ಸೇವೆ ಸಂದಾದ್ ಬೊಕ್ಕ ನಿವೃತ್ತಿ ದೆತೊಂದು ಬೊಕ್ಕ ಆದಿ ಚುಂಚನಗಿರಿಟ್ ಕುಲಧಿಪತಿಯಾದ್ ಸೇವೆ ಸಂದಾವೊಂದು ಇತ್ತೆರ್.
ಬೆಳಗಾವಿಡ್ ನಡಪುನ ಕಾರ್ಯಕ್ರಮಗ್ ಪೋನಗ ಬೆಂಗ್ಲೂರು ವಿಮಾನ ನಿಲ್ದಾಣಗ್ ಬನ್ನಗ ತಿಗಲೆ ಬೇನೆ ಬತ್ತಿತ್ತ್ಂಡ್.
ಕಲ್ಯಾಣ್: ತುಳುನಾಡ ತುಳುವೆರ್, ಕಲ್ಯಾಣ್ ನೆತ್ತ ಮುತಾಲಿಕೆಡ್ ಆಟಿಡೊಂಜಿ ದಿನ “ಪಗೆಲ್ಡ್ ಅಗೆಲ್” ಲೇಸ್ ಜು.26 ಬುಧವಾರ ಸಂಸ್ಥೆದ ಸಂಸ್ಥಾಪಕೆರ್ ಅಶೋಕ್ ಎಲ್. ಪೂಜಾರಿ ಉಳ್ಯಗುತ್ತು ಪಂಜ ಕೊಯಿಕುಡೆ ಮೆರೆನ “ಮನಸು ಮತ್ತು ಕನಸು” ಪುದರ್ ದ ಇಲ್ಲಡ್ ನಡತ್ಂಡ್.
ಈ ಲೇಸ್ ಸದಸ್ಯೆರೆನ ಪ್ರಾರ್ತನೆದೊಟ್ಟಿಗೆ ಸಂಸ್ಥಾಪಕೆರ್ ಬೊಕ್ಕ ಸಂಸ್ಥಾಪಕ ಸದಸ್ಯೆರ್ ಮಾತ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.
ರೇಖಾ ಶೆಟ್ಟಿ ಮೆರೆರ್ದ್ ಆಟಿ ಕಳಂಜೆ, ಉಮಾ ಶೆಟ್ಟಿ, ದೇವಕಿ ಪೂಜಾರಿ ಮಾದಿರದಕುಲಾದ್ ಬೊಕ್ಕ ಯಮುನ ಕುಲಾಲ್ ಕೊರತಿಯಾದ್ ಜನಪದ ಪದ್ಯಗ್ ನಲಿತೆರ್‌.
ಈ ಪೊರ್ತುಡು ಉಮಾ ಶೆಟ್ಟಿ ಮೆರೆಗ್ ಶಾಲ್ ಪಾಡ್ದ್ ಫಲ ಪುಷ್ಪ ಕೊರ್ದು ಮಾನಾದಿಗೆ ಮಲ್ತೆರ್. ಬೊಕ್ಕ ಸದಸ್ಯೆರ್ ಮಲ್ತಿನ 18 ಬಗೆತ್ತ ತಿಂಡಿ ತೆನಸ್ ನ್ ಪ್ರದರ್ಶನ ಮಲ್ತ್ ದ್ ಮಾತೆರೆಗ್ಲಾ ಬಲಸಿಯೆರ್.
ಈ ಲೇಸ್ ದ ಯಶಸ್ವಿಗಾದ್ ಪ್ರಭಾವತಿ ಸುವರ್ಣ, ರೇಖಾ ಶೆಟ್ಟಿ, ಉಮಾ ಶೆಟ್ಟಿ, ಅಂಜನಾ ಪೂಜಾರಿ, ದಯಾವತಿ ಸುವರ್ಣ, ದೇವಕಿ ಪೂಜಾರಿ, ಯಮುನ ಕುಲಾಲ್, ಭವಾನಿ ಪೂಜಾರಿ, ಪ್ರೀತಿ ಸುವರ್ಣ ಬೊಕ್ಕ ರಾಮಚಂದ್ರ ಸುವರ್ಣೆರ್ ಸಹಕಾರ ಮಲ್ತೆರ್. ಅಶೋಕ್ ಎಲ್. ಪೂಜಾರಿ ಮೇರ್ ಸೊಲ್ಮೆ ಸಂದಾಯೆರ್.
ಕುಡ್ಲ: ನೀಂದರೆ ಪೋಯಿನ 6 ಜನಟ್ 2 ಜನ ನೀರ್‌ಪಾಲ್ ಆಯಿನ ಘಟನೆ ಐತಾರ ಬಯ್ಯಗ್ ಪಡ್ಪುದಲ್ಪ ನಡತ್ಂಡ್.
ಅಳಪೆ ನಿವಾಸಿ ವರುಣ್(26ವ) ಬೊಕ್ಕ ವೀಕ್ಷಿತ್(26ವ) ನೀರ್‌ಪಾಲ್ ಆಯಿನಕುಲ್.
ಅಳಪೆದ ಪಡ್ಪುದ ಲೈತಲ್ ಇಪ್ಪುನ ನೀರ್ ಜಿಂಜಿನ ಕೆರೆತಂಚ ಇಪ್ಪುನ ಗುಂಡಿಗ್ ವರುಣ್ ಬೊಕ್ಕ ವೀಕ್ಷಿತ್ ಇಂಚೆನೆ 6 ಜನ ಜತ್ ದೆರ್. ರಡ್ಡ್ ಜನ ನಾಪತ್ತೆ ಆತೆರ್. ಐಟ್ ಒರಿಯನ ಪುನ ತಿಕ್‌ದ್ ನನೊರಿಯನ್ ನಾಡೊದುಲ್ಲೆರ್. ಪೊಲೀಸೆರ್ ಬೊಕ್ಕ ಅಗ್ನಿಶಾಮಕ ದಳ ಜಾಗೆಗ್ ಬತ್ ದ್ ನಾಡೊಂದುಲ್ಲೆರ್.
ಮುಲ್ಕಿ : ಯಕ್ಷ ಲಹರಿ (ರಿ) ಕಿನ್ನಿಗೋಳಿ ಕೂಟದ 33ನೇ ವರ್ಷದ ಉಚ್ಚಯ, ಕರ್ಣಾಟಕ ಬ್ಯಾಂಕ್ ಯಕ್ಷಗಾನ ತಾಳಮದ್ದಳೆ “ಚರಿತಂ ಮಹಾತ್ಮನಃ” ಸಪ್ತಾಹ ಅಂಚೆನೆ ಕರಿದ್ ಪೋಯಿನ ಕಲಾವಿದೆರ್ನ ನೆಂಪು, ಸಾಧಕೆರೆಗ್ ಸನ್ಮಾನ ಲೇಸ್ ಜುಲೈ 31ರ್ದ್ ಆಗಸ್ಟ್ 6 ತಾರೀಕ್ ಮುಟ್ಟ ಯುಗಪುರುಷ ಸಭಾಭವನಡ್ ಪ್ರತಿ ದಿನ ಬಯ್ಯಡ್ 3.45 ಗಂಟೆರ್ದ್ ರಾತ್ರೆ 8.30 ಮುಟ್ಟ ನಡಪರೆ ಉಂಡು.
ಜು.31 ಸೋಮಾರ ಬಯ್ಯಡ್ ಕಟೀಲು ಕ್ಷೇತ್ರದ ಪ್ರಧಾನ ಅರ್ಚಕೆರ್ ಕೆ.ಲಕ್ಷ್ಮೀನಾರಾಯಣ ಅಸ್ರಣ್ಣ ಲೇಸ್ ಉದಿಪನ ಮಲ್ಪುವೆರ್. ಆ.6 ಐತಾರ ಬಯ್ಯಡ್ 4 ಗಂಟೆಗ್ ಮುಗಿತಲದ ಲೇಸ್ ನಡಪರೆ ಉಂಡು.
ಪ್ರತಿ ದಿನ ಬಯ್ಯಡ್ ಸಭಾ ಕಾರ್ಯಕ್ರಮರ್ದ್ ಬೊಕ್ಕ 5 ಗಂಟೆರ್ದ್ ಪುಗರ್ತೆದ ಕಲಾವಿದೆರೆರ್ದ್ ಧ್ರುವ ಚರಿತ್ರೆ, ನಳ ಚರಿತ್ರೆ,ರುಕ್ಮಾಂಗದ ಚರಿತ್ರೆ, ಪ್ರಹ್ಲಾದ ಚರಿತ್ರೆ, ವಾಮನ ಚರಿತ್ರೆ, ಕೌಶಿಕ ಚರಿತ್ರೆ ಬೊಕ್ಕ ಅಕೇರಿದ ದಿನ ಕಾಂಡೆ 10 ಗಂಟೆರ್ದ್ ಹರಿಶ್ಚಂದ್ರ ಚರಿತ್ರೆ ಮಧ್ಯಾಹ್ನ 2.30 ರ್ದ್ ಚಂದ್ರಹಾಸ ಚರಿತ್ರೆ ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು ಪಂದ್ ಯಕ್ಷಲಹರಿ ಕಿನ್ನಿಗೋಳಿ (ರಿ) ಅಧ್ಯಕ್ಷೆರ್ ಬೊಕ್ಕ ಕೂಟದಕುಲು ಪತ್ರಿಕಾ ಹೇಳಿಕೆ ಡ್ ತೆರಿಪಾದೆರ್.
ಪುತ್ತೂರು: ಬೆಂಗ್ಲೂರ್‌ರ್ದ್ ಪುತ್ತೂರ್‌ಗ್ ಬರೊಂದಿತ್ತಿನ ಕೆ.ಎಸ್.ಆರ್.ಟಿ.ಸಿ ಬಸ್ಸ್ ಡ್ ಬರೊಂದಿತ್ತಿನ ಪ್ರಯಾಣಿಕೆರರ್ನ ಬ್ಯಾಗ್‌ರ್ದ್ ಮಸ್ತ್ ಬಿಲೆತ್ತ ಸೊತ್ತು ಲೆನ್ ಕಂಡ್ ದೆರ್ ಪಂದ್ ಪೊಲೀಸೆರೆಗ್ ದೂರ್ ಕೊರ್ತೆರ್.
ಪುಣಚ ಗ್ರಾಮದ ಅಜೇರು ನಿವಾಸಿ ದಿವಾಕರ ನಾಯಕ್ ಅರೆನ ಮಗಲ್ ದೀಪಿಕಾ ಅರೆನ ಬ್ಯಾಗ್‌ರ್ದ್ ಲ್ಯಾಪ್‌ಟಾಪ್, ಸ್ಯಾಮ್‌ಸಾಂಗ್ ಕಂಪೆನಿದ ಮೊಬೈಲ್, ಡೇನಿಯಲ್ ಕ್ರೇನ್ ಕಂಪನಿದ ವಾಚ್ ಇಂಚೆನೆ ಒಟ್ಟು ರೂ. 53 ಸಾವಿರದ ಮೌಲ್ಯದ ಸೊತ್ತು ಕಂಡ್ ದ್ ಪೋತುಂಡು. ಬೆಂಗ್ಲೂರುಡು ಟಿಸಿಎಸ್ ಕಂಪನಿದ ಉದ್ಯೋಗಿ ಆದಿಪ್ಪುನ ಮೇರ್ ಜು.26 ದಾನಿ ರಾತ್ರೆ ಬೆಂಗ್ಲೂರ್ ರ್ದ್ ಪುತ್ತೂರ್‌ಗ್ ಕೆಎಸ್‌ಆರ್‌ಟಿಸಿ ಬಸ್ಸ್ ಡ್ ಬತ್ತರ ದ್ ಬೆಳುವಾಯಿಡ್ ಬ್ಯಾಗ್ ತೂನಗ ಸೊತ್ತುಲು ಕಂಡ್ ದ್ ಪೋತಿನ ಗೊತ್ತಾತ್ಂಡ್. ನೆತ್ತ ಬಗ್ಗೆ ಪುತ್ತೂರು ಸಿಟಿ ಪೊಲೀಸ್ ಠಾಣೆಡ್ ದೂರ್ ದಾಖಲಾತ್‌ಂಡ್.
ಕುಡ್ಲ: ದ.ಕ ಜಿಲ್ಲೆಡ್ ಕೆಲವೊಂಜಿ ಕುಟುಂಬದ ಸದಸ್ಯೆರ್ ತೀರ್‌ಪೋದಿತ್ತ್ಂಡಲ ಅಕ್ಲೆನ ಪುದರ್ ಪಡಿತರ ಚೀಟಿರ್ದ್ ನನಲ ದೆತ್ತಿಜೆರ್. ಇಂಚ 13,133 ಫಲಾನುಭವಿನಕ್ಲೆನ ಪುದರ್ ಪಡಿತರ ಚೀಟಿಡ್ ಅಕ್ರಮವಾದ್ ಒರಿತೊಂದೆರ್ ಪಂದ್ ತೆರಿದ್ ಬೈದ್ಂಡ್.
ಅಂಚಿನ ಪಡಿತರ ಚೀಟಿ ಇತ್ತಿನಕುಲ್ ತೀರ್‌ಪೋಯಿನಕ್ಲೆನ ದಾಖಲಾತಿನ್ ತಾಲೂಕು ಕಚೇರಿಗ್ ಕೊರ್ದು ಪಡಿತರ ಚೀಟಿರ್ದ್ ಪುದರ್ ದೆಪ್ಪೊಡು. ಇಜಿಂಡ ಅಂಚಿನಕ್ಲೆನ ಕಾರ್ಡ್ ನಿಯಮದ ಪ್ರಕಾರ ಅನರ್ಹ ಮಲ್ಪ ಪಂದ್ ತೆರಿಪಾದೆರ್.
ದೆಲ್ಲಿ: ಬಿಜೆಪಿ ಪಕ್ಷ ರಾಷ್ಟ್ರೀಯ ನಾಯಕತ್ವಡ್ ಬದಲಾವಣೆ ಕನತ್‌ಂಡ್. ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸೇರಿನಂಚ ರಾಷ್ಟ್ರೀಯ ಮಟ್ಟಡ್ ಪ್ರಮುಖ ಹುದ್ದೆಲೆಡ್ ಬದಲಾವಣೆ ಮಲ್ತ್ಂಡ್.
3 ಉಪಾಧ್ಯಕ್ಷೆರ್, 9 ಪ್ರಧಾನ ಕಾರ್ಯದರ್ಶಿ, ಸಂಘಟನಾ ಕಾರ್ಯದರ್ಶಿ ಬಿ.ಎಲ್ ಸಂತೋಷ್ ಸೇರಿನಂಚ 13 ಕಾರ್ಯದರ್ಶಿನ ನೇಮಕ ಮಲ್ತ್ ದೆರ್. ಕೆಲವೆರೆನ್ ಈ ಹುದ್ದೆರ್ದ್ ದುಂಬರಿವುನಂಚ ಮಲ್ತ್ ದ್ ಮಸ್ತ್ ನಾಯೆಕೆರ್ನ ಕೈ ಬುಡ್ತೆರ್.
ಬಂಡಿ ಸಂಜಯ್, ಅನಿಲ್ ಆಂಟೋನಿ, ಬೊಕ್ಕ ಕಾಮಾಖ್ಯ ಪಿ ತಾಸಾ ಸೇರಿನಂಚ ಪೊಸ ಬೆರೆಗ್ ತಾನೊ ಕೊರ್ತೆರ್. ಸಿಟಿ ರವಿ, ದಿಲೀಪ್ ಘೋಷ್, ದಿಲೀಪ್ ಸೈಕಿಯಾ ಬೊಕ್ಕ ಸುನಿಲ್ ದಿಯೋಧರ್ ಮೊಕ್ಲೆನ್ ಕೈ ಬುಡ್ತೆರ್.
ಸಂತೆಕಟ್ಟೆ: ಕರ್ನಾಟಕ ವಿಧಾನ ಸಭಾಧ್ಯಕ್ಷೆರ್ ಯು.ಟಿ ಖಾದರ್ ಮೆರೆಗ್ ಬೆಳ್ತಂಗಡಿ ಕಾಂಗ್ರೆಸ್ ಪಕ್ಷದ ವತಿರ್ದ್ ಸ್ವಾಗತ ಮಲ್ತೆರ್. ಧರ್ಮಸ್ಥಳದ ಕಾರ್ಯಕ್ರಮಗ್ ಪೋಪಿನ ಪೊರ್ತುಡು ಯು.ಟಿ ಖಾದರ್ ಸಂತೆಕಟ್ಟೆದ ಅಯ್ಯಪ್ಪ ಮಂದಿರದ ಕೈತಲ್ ಕಾಂಗ್ರೆಸ್‌ದ ಮುಖಂಡೆರ್ ಸ್ವಾಗತ್ ಮಲ್ತ್ ಅಭಿನಂದನೆ ಮಲ್ತೆರ್.
ಈ ಪೊರ್ತುಡು ಬೆಳ್ತಂಗಡಿ ಬ್ಲಾಕ್ ಕಾಂಗ್ರೆಸ್ ದ ನಗರಾಧ್ಯಕ್ಷೆರ್ ಸತೀಶ್ ಕಾಶಿಪಟ್ಣ, ಗ್ರಾಮೀಣ ಅಧ್ಯಕ್ಷೆರ್ ನಾಗೇಶ್ ಕುಮಾರ್ ಗೌಡ, ಕಾಂಗ್ರೆಸ್‌ದ ನಾಯಕೆರಾಯಿನ ಧರಣೇಂದ್ರ ಕುಮಾರ್, ಯು.ಕೆ ಹನೀಫ್, ಹಸನಬ್ಬ ಚಾರ್ಮಾಡಿ, ಪ್ರವೀಣ್ ಫೆರ್ನಾಂಡಿಸ್, ರಮಾನಂದ ಸಾಲಿಯಾನ್, ಧನಂಜಯ್ ರಾವ್, ತ್ರಿವಿಕ್ರಮ್, ಸಿರಾಜ್, ತನುಷ್ ಶೆಟ್ಟಿ, ತೇಜಸ್, ರಾಜೇಶ್ ಸವಣಾಲ್, ಯತೀಶ್ ಯಕ್ಷ, ನವೀನ್ ಗೌಡ, ಅಯಾಜ್, ರಜತ್, ಯಶೋಧರ ಚಾರ್ಮಾಡಿ , ಮನೋಹರ್ ಇಳಂತಿಲ ಇತ್ತೆರ್.
