ಬೊಲ್ತೆರ್ ಸುದ್ದಿ | Belthangady News

ಅ.29: ಉಜಿರೆರ್ದ್ ಧರ್ಮಸ್ಥಳಗ್ ಧರ್ಮಸಂರಕ್ಷಣ ಪಾದಯಾತ್ರೆ: ಗಾಡಿಲೆಗ್‌ ಮಾರ್ಗಸೂಚಿಡ್ ಬದಲಾವಣೆ

ಧರ್ಮ ಸಂರಕ್ಷಣ ಯಾತ್ರೆ ಸಮಿತಿದ ಗೌರವಾಧ್ಯಕ್ಷ ಬನ್ನೂರು ಅಪ್ಪಣ್ಣ ಹೆಗ್ಡೆ, ಸಂಚಾಲಕೆರ್ ಉಜಿರೆ ಶ್ರೀ ಜನಾರ್ದನ ದೇವಸ್ಥಾನದ ಆಡಳಿತ ಮೊಕ್ತಸರೆರ್ ಶರತ್‌ಕೃಷ್ಣ ಪಡುವೆಟ್ನಾಯ ಬೊಕ್ಕ ಬರೋಡದ ಉದ್ಯಮಿ ಶಶಿಧರ್ ಶೆಟ್ಟಿ ಸಾರಥ್ಯಡ್ ಅ. 28ರ ಕಾಂಡೆ 9.30ಕ್ಕ್ ಪ್ರಸಿದ್ಧ ದೇವೀ ಕ್ಷೇತ್ರವಾಯಿನ ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಸ್ಥಾನರ್ದ್‌ ಪಿದರ್ದ್ ಯಾತ್ರೆ ಬಯ್ಯ 6.10ಕ್ಕ್ ಕುಡ್ಲದ ಕದ್ರಿ ಶ್ರೀ ಮಂಜುನಾಥ ಸನ್ನಿಧಿಗ್‌ ಬರಿಯೆರೆ ಉಂಡು.

ಅ. 29ದಾನಿ ಕಾಂಡೆ 7ಕ್ಕ್ ಕದ್ರಿರ್ದ್‌ ಪಿದರ್ದ್ ಮಧ್ಯಾಹ್ನ 1ಕ್ಕ್ ಉಜಿರೆದ ಶ್ರೀ ಜನಾರ್ದನ ದೇವಸ್ಥಾನಗ್‌ ಬರಿಯೆರೆ ಉಂಡು. ಮಾತೆರೆಗ್‌ ವನಸ್‌ದ ವ್ಯವಸ್ಥೆ ಉಂಡು. ಅಲ್ಪರ್ದ್ ಮಧ್ಯಾಹ್ನ 2.30ಕ್ಕ್ ಉಭಯ ಜಿಲ್ಲೆದ ಪ್ರಮುಖ ಮಠಾಧೀಶೆರ್, ಸ್ವಾಮೀಜಿಲು, ಮಾತ ಪಕ್ಷದ ರಾಜಕೀಯ ಮುಖಂಡೆರ್, ಸಾತ್ವಿಕೆರ್ ಪಾದಯಾತ್ರೆದ ಮುಖೇನ ಶ್ರೀ ಕ್ಷೇತ್ರ ಧರ್ಮಸ್ಥಳದ ಮಂಜುನಾಥ ಸನ್ನಿಧಿಗ್‌ ಬತ್ತ್‌ದ್ ಪ್ರಾರ್ಥನೆದೊಟ್ಟಿಗೆ ಯಾತ್ರೆ ಸಂಪನ್ನ ಆವರೆ ಉಂಡು. ರೋಡ್‌ ಬದಲಾವಣೆ ಕುಡ್ಲರ್ದ್‌ ಬರ್ಪುನ ಗಾಡಿಲು ಬರುವ ಮದ್ದಡ್ಕ-ರೇಷ್ಮೆರೋಡ್- ಗೇರುಕಟ್ಟೆ-ಕೊಯ್ಯೂರು, ಬೆಳಾಲು ಮುಖಾಂತರ ಉಜಿರೆಗ್, ಮಡಂತ್ಯಾರು- ಕಲ್ಲೇರಿ-ಕುಪ್ಪೆಟ್ಟಿಗ್‌ ಬತ್ತ್‌ದ್ -ಶಿವನಗರ-ಬೈಪಾಡಿ ಮೂಲಕ ಉಜಿರೆಗ್. ಪುತ್ತೂರ್ದ್‌ ಬರ್ಪುನ ಗಾಡಿ ಕುಪ್ಪೆಟ್ಟಿ– ಶಿವನಗರ-ಬೈಪಾಡಿ ಮೂಲಕ ಉಜಿರೆಗ್, ಪುತ್ತೂರ್‌ರ್ದ್ ಗೇರುಕಟ್ಟೆ-ಕೊಯ್ಯೂರು (ಆದೂರು ಪೆರಲ)- ಬೆಳಾಲು ಮುಖಾಂತರ ಉಜಿರೆಗ್. ಕಾರ್ಲರ್ದ್‌ ಬರ್ಪುನ ಗಾಡಿ ಅಳದಂಗಡಿ-ಕೆದ್ದು ಸವಣಾಲು, ಶಿರ್ಲಾಲು ಮುಖಾಂತರ ಬೋಲ್ತೆರ್ ಉಜಿರೆಗ್, ಬೋಲ್ತೆರ್‌ರ್ದ್- ಕೊಯ್ಯೂರು-ಪಿಜಕ್ಕಲ -ಬೆಳಾಲು ಆದ್ ಉಜಿರೆಗ್.

ಬೋಲ್ತೆರ್: ರೋಡ್‌ ಕ್ರಾಸ್‌ ಮಲ್ಪುನಗ ಬೈಕ್ ಡಿಕ್ಕಿ – ತೀರ್‌ಪೋಯಿನ ಪೊಣ್ಣು

ಬೋಲ್ತೆರ್: ಬೈಕ್‌ ಢಿಕ್ಕಿ ಆಯಿನ ಪರಿಣಾಮ ಶಾಲಾ ಕಲ್ಪಾರ್ಥಿ ಒರ್ತಿ ತೀರ್‌ಪೋಯಿನ ಘಟನೆ ಉಜಿರೆದ ಬದನಾಜೆಡ್ ನಡತ್‌ಂಡ್.‌ ತೀರ್‌ಪೋಯಿನ ಪೊಣ್ಣು ಅಶೋಕ್ ಬೊಕ್ಕ ಜಯಶ್ರೀ ಮೊಕ್ಲೆನ ಮಗಲ್ ಅಂಕಿತಾ (8) ಪಂದ್‌ ತೆರಿದ್‌ ಬೈದ್‌ಂಡ್.

ಬಯ್ಯ ಶಾಲೆ ಬುಡ್ದು ಇಲ್ಲಗ್‌ ಪೋನಗ ಈ ಘಟನೆ ನಡತ್‌ಂಡ್. ಬೋಲ್ತೆರ್ ಸಂಚಾರಿ ಪೊಲೀಸ್ ಠಾಣೆಡ್ ಬೈಕ್‌ ಸವಾರೆ ವಿಕಾಸ್ ವಿರುದ್ಧ ದೂರು ದಾಖಲಾತ್‌ಂಡ್.

ರಾಷ್ಟ್ರಮಟ್ಟದ ಚೆಸ್ ಚಾಂಪಿಯನ್ ಶಿಪ್‌ಗ್ ಆಯ್ಕೆಯಾಯಿನ ಶಿಬಾಜೆದ ವಿರಾಜ್ ಜೆ ಪೂಜಾರಿ

ಶಿಬಾಜೆ: ಶಿಬಾಜೆ ಗ್ರಾಮದ ಜಯರಾಮ ಪೂಜಾರಿ ಬೊಕ್ಕ ವನಜ ದಂಪತಿನ ಮಗೆ, ವಿರಾಜ್ ಜೆ ಪೂಜಾರಿ ಕಲ್ಲಡ್ಕ ವಿದ್ಯಾಭಾರತಿ ನಡಪಾಯಿನ ರಾಜ್ಯಮಟ್ಟದ ಚೆಸ್ ಚಾಂಪಿಯನ್‌ಡ್ (ತರುಣ ವರ್ಗ) ಸುರುತ ಇನಾಮು ಪಡೆದ್ ರಾಷ್ಟ್ರಮಟ್ಟದ ಚೆಸ್ ಚಾಂಪಿಯನ್ ಶಿಪ್‌ಗ್‌ ಆಯ್ಕೆಯಾತೆರ್.‌

ಅರುಣಾಚಲ ಪ್ರದೇಶಡ್ “ವಿದ್ಯಾಭಾರತಿ ಅಖಿಲ ಭಾರತಿಯ ಶಿಕ್ಷಾ ಸಂಸ್ಥಾನ್” ಅಕ್ಟೋಬರ್ 26-30 ಮುಟ್ಟ ನಡಪುನ 34ನೇ ರಾಷ್ಟ್ರೀಯ ಚೆಸ್ ಚಾಂಪಿಯನ್ ಶಿಪ್‌ಡ್ ಕರ್ನಾಟಕ ರಾಜ್ಯನ್ ಪ್ರತಿನಿಧಿಸಾದ್‌ ಪಾಲ್‌ ಪಡೆಯೆರೆ ಉಲ್ಲೆರ್.

ಕಕ್ಕಿಂಜೆ: ಕರೆಂಟ್ ಕಂಬಗ್ ಡಿಕ್ಕಿ ಹಾಕಿನ ಕಾರ್…!

ಕಕ್ಕಿಂಜೆ: ಚಿಬಿದ್ರೆದಲ್ಪ ಚಿಕ್ಕಮಗಳೂರ್ದ್ ಕುಡ್ಲಗ್‌ ಬರೊಂದು ಇತ್ತಿನ ಕಾರ್‌ ಡ್ರೈವರ್‌ನ ನಿಯಂತ್ರಣ ತತ್ತ್‌ದ್ ಕರೆಂಟ್‌ ಕಂಬಗ್ ಡಿಕ್ಕಿ ಹಾಕಿನ ಘಟನೆ ವರದಿ ಆತ್‌ಂಡ್‌. ಪ್ರಯಾಣಿಕೆರ್‌ ಎಲ್ಯ ಎಲ್ಯ ಗಾಯ ಆದ್‌ ಮಲ್ಲ ಅಪಾಯರ್ದ್ ಪಾರಾತೆರ್.

ಧರ್ಮಸ್ಥಳಡ್ 1753 ನೇ ಮದ್ಯವರ್ಜನ ಶಿಬಿರದ ಲೆಪ್ಪೋಲೆ ಬುಡುಗಡೆ

ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬಿ.ಸಿ.ಟ್ರಸ್ಟ್, ಜನಜಾಗೃತಿ ವೇದಿಕೆದ ಮುತಾಲಿಕೆಡ್ ಅಜ್ಜಾವರಡ್‌ ನಡಪುನ 1753 ನೇ ಮದ್ಯವರ್ಜನ ಶಿಬಿರದ ಲೆಪ್ಪೋಲೆ ಬುಡುಗಡೆನ್ ಧರ್ಮಸ್ಥಳಡ್ ಡಾ.ಡಿ.ವೀರೇಂದ್ರ ಹೆಗ್ಗಡೆರ್‌ ಇನಿ ಬಿಡುಗಡೆ ಮಲ್ತೆರ್.‌ ಸುಳ್ಯಡ್‌ ನಡತ್ತಿನ ಗಾಂಧಿಸ್ಮೃತಿ ಬೊಕ್ಕ ಜನಜಾಗೃತಿ ಸಮಾವೇಶದ ಯಶಸ್ವಿಯಾದ್ ನಿರ್ವಹಣೆ ಮಲ್ತಿನ ಜನಜಾಗೃತಿ ವೇದಿಕೆದ ಅಧ್ಯಕ್ಷರೆನ್ ಬೊಕ್ಕ ಪದಾಧಿಕಾರಿಲೆಗ್ ಹೆಗ್ಗಡೆರ್‌ ಅಭಿನಂದನೆ‌ ಸಲ್ಲಿಸಾಯೆರ್.

ಈ ಪೊರ್ತುಡು ಅಖಿಲ ಕರ್ನಾಟಕ ಜನಜಾಗೃತಿ ನಿಕಟಪೂರ್ವ ಜಿಲ್ಲಾಧ್ಯಕ್ಷೆರ್ ಎನ್. ಎ. ರಾಮಚಂದ್ರ, ತಾಲೂಕು ಅಧ್ಯಕ್ಷೆರ್ ಲೋಕನಾಥ್ ಅಮೆಚೂರು, ತಾಲೂಕು ನಿಕಟಪೂರ್ವಾಧ್ಯಕ್ಷೆರ್ ಮಹೇಶ್ ಕುಮಾರ್ ಮೇನಾಲ, ಪ್ರಗತಿಬಂಧು ಸ್ವಸಹಾಯ ಸಂಘದ ತಾಲೂಕು ಅಧ್ಯಕ್ಷೆರ್ ಸುರೇಶ್ ಕಣೆಮರಡ್ಕ, ಪೂರ್ವಾಧ್ಯಕ್ಷೆರ್ ಬೂಡು ರಾಧಾಕೃಷ್ಣ ರೈ, ಮದ್ಯವರ್ಜನ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಶಿವಪ್ರಕಾಶ್ ಅಡ್ಪಂಗಾಯ, ತಾಲೂಕು ಯೋಜನಾಧಿಕಾರಿ ನಾಗೇಶ್ ಪಿ, ವಲಯ ಮೇಲ್ವಿಚಾರಕಿ ವಿಶಾಲ ಕೆ, ಮದ್ಯವರ್ಜನ ಸಮಿತಿದ ಉಪಾಧ್ಯಕ್ಷೆರ್ ಶಶ್ಮಿ ಭಟ್‌ ಇತ್ತೆರ್.

ಶಿರ್ಲಾಲು ಗರಡಿದ ಜಾತ್ರಾ ಸಮಿತಿಗ್‌ ಆಯ್ಕೆ

ಶಿರ್ಲಾಲು: ಶಿರ್ಲಾಲು-ನಲ್ಲಾರು-ಕರಂಬಾರು ಗ್ರಾಮದ ಬೆರ್ಮೆರ್ ಬೈದೆರ್ಲೆ ಗರಡಿದ 2023-24ನೇ ಸಾಲ್‌ದ ಬ್ರಹ್ಮ ಬೈದೆರ್ಕಳ ಜಾತ್ರಾ ಮಹೋತ್ಸವದ ಪೊಸ ಸಮಿತಿನ್ ಗರಡಿ ವಠಾರಡ್‌ ನಡತ್ತಿನ ಪೂರ್ವಭಾವಿ ಸಭೆಟ್ ಆಯ್ಕೆ ಮಲ್ತೆರ್. ಸಮಿತಿದ ಪೊಸ ಗುರ್ಕಾರೆ ಆದ್ ಶಿವಾನಂದ ಮಜಲಪಲ್ಕೆ, ಕಾರ್ಯದರ್ಶಿಯಾದ್ ಜ್ಞಾನೇಶ್ ಕಟ್ಟ, ಕೋಶಾಧಿಕಾರಿಯಾದ್ ಯತೀಶ್ ಕರಂಬಾರು ಆಯ್ಕೆಯಾಯೆರ್.

ಧರ್ಮಸ್ಥಳದ ಮಂಜೂಷಾ ಮ್ಯೂಸಿಯಂ ಸೇರಿನ 75 ವರ್ಷ ಪಿರಾಕ್ ದ ಲಾರಿ‌

ಬರೋಬ್ಬರಿ 75 ವರ್ಷದ ಪಿರಾಕ್‌ದ ಲಾರಿ ಪೊಸ ದೇಖಿಡ್ ಓಲ್ಡ್ ಈಸ್ ಗೋಲ್ಡ್ ಪನ್ಪುನ ರೇಂಜ್‌ಗ್ ರೆಡಿಯಾತ್‌ಂಡ್. 75 ವರ್ಷದ ಈ ಲಾರಿ ಇತ್ತೆ ದಕ್ಷಿಣ ಕನ್ನಡ ಜಿಲ್ಲೆ ಧರ್ಮಸ್ಥಳದ ಮಂಜೂಷಾ ಮ್ಯೂಸಿಯಂ ಸೇರೊಂದುಂಡ್.‌ ಧರ್ಮಸ್ಥಳ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ಅರೆನ ವಿಶೇಷ ಮುತುವರ್ಜಿಡ್ ಕುಂದಾಪುರ ತಾಲೂಕುದ ತೆಕ್ಕಟ್ಟೆ ಮಲ್ಯಾಡಿದ ಗಜಾನನ ಬಾಡಿ ಬಿಲ್ಡ್ ಬೊಕ್ಕ ವೆಲ್ಡಿಂಗ್ ಗ್ಯಾರೇಜ್‌ಡ್ ಪುನರ್ ವಿನ್ಯಾಸ ಆದ್ ಶ್ರೀ ಕ್ಷೇತ್ರ ಧರ್ಮಸ್ಥಳಗ್‌ ಬೈದ್‌ಂಡ್.‌
1948ನೇ ಇಸವಿದ ಪೋರ್ಡ್ ಕಂಪನಿದ ಎಂ ಸೀರೀಸ್‌ನ ಈ ಲಾರಿ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ಅರೆನ ಪೊಪ್ಪನ ಕಾಲದ ಗಾಡಿ. ಈ ಲಾರಿ ಕ್ಷೇತ್ರದ ಸರಕು ಸಾಗಾವೊಂದಿತ್ತ್ಂಡ್. ಸುಮಾರು 30 ವರ್ಷ ಸೇವೆ ಸಲ್ಲಿಸಾದ್ ಸ್ಪೇರ್ ಪಾರ್ಟ್ಸ್ ದಾಂತೆ ಬರಿಕ್ಕ್ ಬೂರ್ದಿತ್ತ್ಂಡ್.‌ ವೀರೇಂದ್ರ ಹೆಗ್ಡೆರ್ ಪೊಪ್ಪನ ಕಾಲದ ಗಾಡಿನ್‌ ಪೊರ್ಲು ತೋಜಿಯೆರೆ ಲಾರಿದ ಪೊಸ ದೇಖಿ ದ ನೀಲನಕ್ಷೆ ತಯಾರ್‌ ಮಲ್ತ್‌ದ್‌ ಆರೇ ಗ್ಯಾರೇಜ್‌ದ ಧಣಿಕ್ಕ್ ಕೊರ್ದ್‌ ಪಿರ ನವೀಕರಣ ಮಲ್ತ್‌ದೆರ್.

ಉಜಿರೆ: ಧರ್ಮ ಸಂರಕ್ಷಣಾ ಪಾದಯಾತ್ರೆದ ಪೋಸ್ಟರ್ ಬುಡುಗಡೆ

ಉಜಿರೆ: ಅ.29 ದಾನಿ ನಡಪುನ ಧರ್ಮ ಸಂರಕ್ಷಣಾ ಪಾದಯಾತ್ರೆದ ಪೋಸ್ಟರ್‌ನ ಇನಿ (ಅ.21) ಉಜಿರೆ ಶ್ರೀ ಜನಾರ್ದನ ಸ್ವಾಮಿ ದೇವಸ್ಥಾನದ ಅನುವಂಶೀಯ ಆಡಳಿತ ಮೊಕ್ತೇಸರೆರ್ ಶರತ್ ಕೃಷ್ಣ ಪಡ್ವೆಟ್ನಾಯ ಬುಡುಗಡೆ ಮಲ್ತೆರ್.‌
ಈ ಪೊರ್ತುಡು ಧರ್ಮ ಜಾಗೃತಿ ಸಮಿತಿದ ಅಧ್ಯಕ್ಷೆರ್ ಶಶಿಧರ ಶೆಟ್ಟಿ ಬರೋಡಾ, ಬದುಕು ಕಟ್ಟೋಣ ತಂಡದ ಸಂಚಾಲಕೆರ್ ಮೋಹನ್ ಕುಮಾರ್, ಉಜಿರೆ ಗಾ.ಪಂ ಉಪಾಧ್ಯಕ್ಷೆರ್ ರವಿ ಕುಮಾರ್ ಬರೆಮೇಲು, ಪ್ರಮುಖೆರಾಯಿನ ರಾಘವೇಂದ್ರ ಬೈಪಡಿತ್ತಾಯ, ರವಿ ಚಕಿತ್ತಾಯ ಇತ್ತೆರ್.

ಯೋಗಾಸನ ಸ್ಪರ್ಧೆಡ್ ಮೋಹಿತ್ ಕುಮಾರ್ ರಾಷ್ಟ್ರ ಮಟ್ಟಗ್ ಆಯ್ಕೆ‌

ಕಲ್ಮಂಜ: ಸರಕಾರಿ ಪ್ರೌಢ ಶಾಲೆ ಕಲ್ಮಂಜ ಮುಲ್ಪದ 10ನೇ ತರಗತಿದ ಕಲ್ಪಾರ್ಥಿ ಮೋಹಿತ್ ಕುಮಾರ್ ಚಿತ್ರದುರ್ಗಡ್ ನಡತ್ತಿನ 17ರ ವಯೋಮಾನದ ಯೋಗಾಸನ ಸ್ಪರ್ಧೆಡ್ ರಾಷ್ಟ್ರ ಮಟ್ಟಗ್ ಆಯ್ಕೆಯಾತೆರ್. ಮೇರ್ ಕನ್ಯಾಡಿ ಗ್ರಾಮದ ಲಕ್ಷ್ಮಿ ಕೃಪಾ ನಿಲಯದ ರಾಜೇಶ್ ಗೌಡ ಬೊಕ್ಕ ಪ್ರೇಮಾ ದಂಪತಿಲೆನ ಮಗೆ.

ಶ್ರೀ ಧ.ಮಂ.ಪ.ಪೂ ಕಾಲೇಜ್‌ದ ದ್ವೈವಾರ್ಷಿಕ ಪತ್ರಿಕೆ ‘ಪ್ರೇರಣಾ’ ಬುಡುಗಡೆ

ಧರ್ಮಸ್ಥಳ: ಅ.20 ದಾನಿ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಪದವಿ ಪೂರ್ವ ಕಾಲೇಜ್‌ದ ದ್ವೈವಾರ್ಷಿಕ ಪತ್ರಿಕೆ ‘ಪ್ರೇರಣಾ’ನ್ ಶ್ರೀ ಧರ್ಮಸ್ಥಳ ಕ್ಷೇತ್ರದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆರ್‌ ಬುಡುಗಡೆ ಮಲ್ತೆರ್. ಎಸ್.ಡಿ.ಎಂ ಶಿಕ್ಷಣ ಸಂಸ್ಥೆದ ಕಾರ್ಯದರ್ಶಿ ಡಿ.ಹರ್ಷೇಂದ್ರ ಕುಮಾರ್ ಪತ್ರಿಕೆದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಾಯೆರ್.‌
ಪ್ರಾಂಶುಪಾಲೆರ್ ಬೊಕ್ಕ ಪತ್ರಿಕೆಯ ಗೌರವ ಸಂಪಾದಕೆರ್ ಪ್ರಮೋದ್ ಕುಮಾರ್, ಕಾರ್ಯನಿರ್ವಾಹಕ ಸಂಪಾದಕೆರ್ ಡಾ.ರಾಜೇಶ್ ಬಿ, ಸಂಪಾದಕೆರ್ ಮಂಡಳಿದ ಸದಸ್ಯೆರ್ ಸೌಮ್ಯ ಡಿ.ಎಲ್, ಡಾ|.ಫ್ಲಾವಿಯಾ ಪಾವ್ಲ್, ಸುಪ್ರಿತಾ ಪಡಿವಾಳ್, ದೀಕ್ಷಿತ್ ರೈ ಈ ಪೊರ್ತುಡು ಇತ್ತೆರ್.