ಬೊಲ್ತೆರ್ ಸುದ್ದಿ | Belthangady News

ರಂಜಿತ್ ಪೂಜಾರಿ ನಾರಾವಿಗ್ ಓಮಾನ್ಡ್ ತುಳುವ ಬೊಳ್ಳಿ ಪ್ರಶಸ್ತಿ

ಬೋಲ್ತೆರ್: ಓಮಾನ್ ಡ್ ಬೇಲೆ ಮಲ್ತೊಂದು ಪೆನ್ಸಿಲ್ ಚಿತ್ರ ಬೊಕ್ಕ ಲೀಫ್ ಆರ್ಟ್ ಕಲೆಟ್ ಖ್ಯಾತಿ ಪಡೆನ ನಾರಾವಿದ ರಂಜಿತ್ ಗ್ ಓಮಾನ್ಡ್ ತುಳುವ ಬೊಳ್ಳಿ ಪ್ರಶಸ್ತಿ ತಿಕ್ಕ್ ದ್ಂಡ್. ಮೇರೆಗ್ ಭಾರತೀಯ ಸಾಮಾಜಿಕ ವೇದಿಕೆ ಓಮಾನ್ ತುಳು ಶಾಖೆ ವರ್ಷದ ಸಾಂಸ್ಕ್ರತಿಕ ಕಾರ್ಯಕ್ರಮ 2023 ಡ್ ಓಮಾನ್ ನಕ್ಷತ್ರ ಬಿರುದು ಕೊರ್ದು ಮಾನಾದಿಗೆ ಮಲ್ತ್ ದೆರ್.

ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ದ.ಕ. ಒಡಿಪು ಜಿಲ್ಲೆ ಬೋಲ್ತೆರ್ ವಲಯದ ಪೊಸ ಪದಾಧಿಕಾರಿಲೆನ ಪದಪ್ರದಾನ ಕಾರ್ಯಕ್ರಮ

ಬೋಲ್ತೆರ್: ಸೌತ್ ಕೆನರಾ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ದ.ಕ. ಒಡಿಪು ಜಿಲ್ಲೆ ಬೋಲ್ತೆರ್ ವಲಯದ ಪೊಸ ಪದಾಧಿಕಾರಿಲೆನ ಪದಪ್ರದಾನ ಕಾರ್ಯಕ್ರಮ ಅ.31 ದಾನಿ ಬೋಲ್ತೆರ್ ಹೋಲಿ ರೆಡೀಮೆರ್ ಚರ್ಚ್ ಅಡಿಟೋರಿಯಂಡ್ ನಡತ್‌ಂಡ್.‌

 ಮಲ್ಲ ಬಿನ್ನೆರಾದ್‌ ಪಾಲ್‌ ಪಡೆನ ರಕ್ಷಿತ್‌ ಶಿವರಾಮ್‌ ಪಾತೆರ್ದ್‌ ಸಾವಿರ ಛಾಯಾಗ್ರಹಕೆರ್ ಅವಿಭಜಿತ ಜಿಲ್ಲೆಡ್‌ ಇಪ್ಪುನ ಮಲ್ಲ ಶಕ್ತಿ. ಬೋಲ್ತೆರ್‌ ಭಾಗದ ಛಾಯಾಗ್ರಾಹಕರ ಸಂಘದ ಕಟ್ವಾನ ಇಪ್ಪುನ ಪೆರ್ಮೆದ ಇಸಯ. ಜಾತಿ ಧರ್ಮ ಸಂಸ್ಕೃತಿನ್‌ ಒರಿಪಾವುನೆಟ್ಟ್ ಮುಖ್ಯ ಪಾತ್ರ ಛಾಯಾಗ್ರಾಹಕೆರ್ನ. ಸರ್ಕಾರರ್ದ್‌ ಒವ್ವೇ ಅನುದಾನನ್ ಕೊರ್ಪುಲಕ ಮಲ್ಪೆರೆ ಯಾನ್‌ ಸದಾ ಸಿದ್ಧ ಉಲ್ಲೆ. ಪ್ರಪ್ರಥಮ ಭಾರಿಗ್ ಛಾಯಾಗ್ರಾಹಕರ ಸಂಘದ ಮಹಿಳಾ ಅಧ್ಯಕ್ಷೆರಾದ್‌ ಆಯ್ಕೆ ಆಯಿನ ಸಿಲ್ವಿಯಾ ಕೊರ್ಡೆರೊ ಮೇರೆಗ್‌ ಎಡ್ಡೆಪ್ಪು ಬಯಕೆರ್.

ಲೇಸ್‌ದ ಉದಿಪನನ್ ಎಸ್‌ಕೆಪಿಎ ದಕ್ಷಿಣ ಕನ್ನಡ ಒಡಿಪು ಸಂಚಾಲಕೆರ್ ಕರುಣಾಕರ ಕಾನಂಗಿ ಮಲ್ತೆರ್.‌ ದಕ್ಷಿಣ ಕನ್ನಡ ಒಡಿಪು ಜಿಲ್ಲೆದ ಜಿಲ್ಲಾಧ್ಯಕ್ಷೆರ್ ಪದ್ಮ ಪ್ರಸಾದ್ ಜೈನ್ ಗುರ್ಕಾರ್ಮೆನ್‌ ವಹಿಸ್‌ದ್‌ ಇತ್ತೆರ್. ಮಲ್ಲ ಬಿನ್ನೆರಾದ್ ಜಿಲ್ಲಾ ಕಟ್ಟಡ ಸಮಿತಿದ ಅಧ್ಯಕ್ಷೆರ್ ಆನಂದ್ ಎನ್ ಬಂಟ್ವಾಳ,‌ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ದಯಾನಂದ್ ಬಂಟ್ವಾಳ, ಎಸ್‌ಕೆಪಿ ಸಹಕಾರಿ ಸಂಘದ ಅಧ್ಯಕ್ಷೆರ್ ವಾಸುದೇವ ರಾವ್, ಬೋಲ್ತೆರ್ ವಲಯದ ಸ್ಥಾಪಕ ಅಧ್ಯಕ್ಷೆರ್ ಪಾಲಾಕ್ಷ ಸುವರ್ಣ ಈ ಪೊರ್ತುಡು ಇತ್ತೆರ್.

ಬೋಲ್ತೆರ್ ಆಡಳಿತ ಸೌಧಡ್‌ ಕರ್ನಾಟಕ ರಾಜ್ಯೋತ್ಸವ ಆಚರಣೆ

 ಬೋಲ್ತೆರ್ ತಾಲೂಕು ರಾಷ್ಟ್ರೀಯ ಪರ್ಬದ ಆಚರಣಾ ಸಮಿತಿದ ವತಿರ್ದ್ ಕರ್ನಾಟಕ ರಾಜ್ಯೋತ್ಸವ ದಿನಾಚರಣೆನ್ ಬೋಲ್ತೆರ್ ತಾಲೂಕು ಆಡಳಿತ ಸೌಧಡ್ ಆಚರಣೆ ಮಲ್ತೆರ್. ಕಾರ್ಯಕ್ರಮನ್ ಬೋಲ್ತೆರ್ ತಹಶೀಲ್ದಾರೆರ್ ಟಿ ಸುರೇಶ್ ಕುಮಾರ್ ಧ್ವಜಾರೋಹಣ ಮಲ್ತ್‌ದ್ ಎಡ್ಡೆಪ್ಪು ಬಯಕಿಯೆರ್.‌

ಉಜಿರೆ ಎಸ್ ಡಿಎಂ ಕಾಲೇಜ್‌ದ ಸಹ ಪ್ರಾಧ್ಯಪಕೆರ್ ಹಳೆ ಮನೆ ರಾಜಶೇಖರ, ತಾ.ಪಂ. ಕಾರ್ಯನಿರ್ವಹಣಾಧಿಕಾರಿ ಕುಸುಮಾಧರ್, ಸರ್ಕಲ್ ಇನ್ಸ್ ಪೆಕ್ಟರ್ ನಾಗೇಶ್ ಕದ್ರಿ, ಸಮಾಜಕಲ್ಯಾಣ ಇಲಾಖೆದ ಹೇಮಚಂದ್ರ, ಮಹಿಳಾ ಬೊಕ್ಕ ಮಕ್ಕಳ ಕಲ್ಯಾಣಾಧಿಕಾರಿ ಪ್ರೀಯಾ ಆಗ್ನೇಶ್, ಕ್ಷೇತ್ರ ಶಿಕ್ಷಣಾಧಿಕಾರಿ ವಿರೂಪಾಕ್ಷಪ್ಪ, ನಗರ ಪಂಚಾಯತ್ ಮುಖ್ಯಾಧಿಕಾರಿ ರಾಜೇಶ್, ತಾಲೂಕು ಪಂಚಾಯತ್ ಸಂಯೋಜಕೆರ್ ಜಯಾನಂದ ಲಾಯಿಲ, ಪಟ್ಟಣ ಪಂಚಾಯತ್ ಸದಸ್ಯೆರ್, ಗ್ರಾ.ಪಂ. ಅಧ್ಯಕ್ಷೆರ್, ಉಪಾಧ್ಯಕ್ಷೆರ್‌ ಬೊಕ್ಕ ಬೇತೆ ಬೇತೆ ಸಂಘ ಸಂಸ್ಥೆದ ಪದಾಧಿಕಾರಿಲು ಇತ್ತೆರ್.

ಪುಗರ್ತೆದ ವಾಲಿಬಾಲ್ ಕ್ರೀಡಾಪಟು ಬೋಲ್ತೆರ್ ಅಶ್ವಲ್ ರೈಗ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ‌

ಬೋಲ್ತೆರ್: 50ನೇ ಕರ್ನಾಟಕ ರಾಜ್ಯೋತ್ಸವದ ಅಂಗವಾದ್‌ ಕೊರ್ಪುನ 2023ನೇ ಸಾಲ್‌ದ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿಗ್ ಕ್ರೀಡಾ ಕ್ಷೇತ್ರಡ್ ವಾಲಿಬಾಲ್ ಕ್ರೀಡಾಪಟು ಭಾರತ ತಂಡದ ಆಟಗಾರೆ ಅಶ್ವಲ್ ರೈಗ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ತಿಕ್ಕೆರೆ ಉಂಡು.

ಆಟಗಾರೆ ಅಶ್ವಲ್ ರೈ ಭಾರತ ತಂಡನ್ ಪ್ರತಿನಿಧಿಸಾಯಿನ ನಂಬರ್ ವನ್ ಪ್ಲೇಯರ್.2023 ಸಪ್ಟೆಂಬರ್ ಚೀನಾಡ್ ನಡತ್ತಿನ ಎಷ್ಯಾನ್ ಗೇಮ್ಸ್‌ಡ್ ಭಾರತದ ಆಂಜೊಕ್ಲೆನ ವಾಲಿಬಾಲ್ ತಂಡನ್ ಪ್ರತಿನಿಧಿಸಾದ್ ಎಡ್ಡೆ ಸಾಧನೆನ್‌ ಮಲ್ತ್‌ದೆರ್.2021 ಸೆಪ್ಟೆಂಬರ್‌ಡ್ ಜಪಾನ್‌ದ ಟೋಕಿಯೋಡ್‌ ನಡತ್ತಿನ ಏಷ್ಯನ್ ಗೇಮ್ಸ್ ಚಾಂಪಿಯನ್‌ಶಿಪ್‌ಡ್ ಪುರುಷರ ವಿಭಾಗದ ವಾಲಿಬಾಲ್‌ಡ್ ಭಾರತ ತಂಡನ್ ಪ್ರತಿನಿಧಿಸಾದ್ ಅಂತರಾಷ್ಟ್ರೀಯ ಮಟ್ಟಡ್‌ ಪುಗರ್ತೆನ್‌ ಪಡೆಯೊಂದೆರ್.

ಏಷ್ಯಾದ ಬೆಸ್ಟ್ ಬ್ಲಾಕರ್ ಪಂದ್‌ ಪುದರ್‌ ಪಡೆನ ಅಶ್ವಲ್ ರೈ, ಮೂಲತಃ ಬೋಲ್ತೆರ್‌ದಾರ್‌. ಪೊಪ್ಪ ಸಂಜೀವ ರೈ ಬೊಕ್ಕ ಅಪ್ಪೆ ವಾಣಿ ಎಸ್ ರೈ.ಪ್ರಸ್ತುತ ಮೇರ್ ಸೌತ್ ವೆಸ್ಟರ್ನ್ ರೈಲ್ವೆ ಇಲಾಖೆಡ್‌ ಬೇಲೆ ಮಲ್ತೊಂದು ಉಲ್ಲೆರ್.

ಬೋಲ್ತೆರ್‌ದ ಡಾ.ಪ್ರಶಾಂತ್ ಶೆಟ್ಟಿ, ಚಾರ್ಮಾಡಿದ ಹಸನಬ್ಬರೆಗ್ ರಾಜ್ಯೋತ್ಸವ ಪ್ರಶಸ್ತಿ‌

 ಬೋಲ್ತೆರ್: ಉಜಿರೆದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಯೋಗ ಬೊಕ್ಕ ಪ್ರಕೃತಿ ಚಿಕಿತ್ಸಾಲಯದ ಪ್ರಾಂಶುಪಾಲೆರ್ ಡಾ.ಪ್ರಶಾಂತ್ ಶೆಟ್ಟಿ ಬೊಕ್ಕ ಸಂಕಷ್ಟಗ್ ಸ್ಪಂದಿಸಾವುನ ಚಾರ್ಮಾಡಿ ಹಸನಬ್ಬೆರೆಗ್ ರಾಜ್ಯೋತ್ಸವ ಪ್ರಶಸ್ತಿ ಘೋಷಣೆ ಆತ್‌ಂಡ್.

ವೈದ್ಯಕೀಯ ಸೇವೆಗಾದ್ ಡಾ.ಪ್ರಶಾಂತ್ ಶೆಟ್ಟಿ ಬೊಕ್ಕ ಸಮಾಜ ಸೇವೆಗಾದ್ ಚಾರ್ಮಾಡಿದ ಹಸನಬ್ಬ ಮೊಕ್ಲೆನ್ ರಾಜ್ಯೋತ್ಸವ ಪ್ರಶಸ್ತಿಗ್ ಆಯ್ಕೆ ಮಲ್ತ್‌ದೆರ್.

ಸೌತಡ್ಕ ಕ್ಷೇತ್ರದ ಪ್ರಭಾರ ಕಾರ್ಯನಿರ್ವಹಣಾಧಿಕಾರಿಯಾದ್ ಕೆ.ವಿ.ಶ್ರೀನಿವಾಸ್‌

ಪುತ್ತೂರು: ನಾಡ್‌ದ ಪ್ರಸಿದ್ಧ ಕ್ಷೇತ್ರ, ಬಯಲು ಆಲಯ ಗಣಪ ಪಂದ್ ಪ್ರಸಿದ್ದಿಯಾಯಿನ ಕೊಕ್ಕಡ ಗ್ರಾಮದ ಸೌತಡ್ಕ ಶ್ರೀ ಮಹಾಗಣಪತಿ ಕ್ಷೇತ್ರದ ಪ್ರಭಾರ ಕಾರ್ಯನಿರ್ವಹಣಾಧಿಕಾರಿಯಾದ್ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಕಾರ್ಯನಿರ್ವಹಣಾಧಿಕಾರಿ ಕೆ.ವಿ.ಶ್ರೀನಿವಾಸ್ ಮೇರ್ ನಿಯೋಜನೆ ಆತೆರ್.

ನ.4 : ಬೋಲ್ತೆರ್ ಶ್ರೀ ಗುರುದೇವ ಕಾಲೇಜ್‌ಡ್‌ ರಕ್ತದಾನ ಶಿಬಿರ

ಬೋಲ್ತೆರ್: ಗುರುದೇವ ಪ್ರಥಮ ದರ್ಜೆ ಕಾಲೇಜು ಬೋಲ್ತೆರ್ , ರೆಡ್‌ಕ್ರಾಸ್ ಸೊಸೈಟಿ ಬೋಲ್ತೆರ್, ದ.ಕ ಜಿಲ್ಲಾ ಸಹಕಾರಿ ಆಸ್ಪತ್ರೆ ಬೊಕ್ಕ ವೈದ್ಯಕೀಯ ಶಿಕ್ಷಣ, ಸಂಶೋಧನಾ ಸಂಘ (ನಿ), ರಾಷ್ಟ್ರೀಯ ಸೇವಾ ಯೋಜನೆ ಘಟಕ ನೆತ್ತ ಒಟ್ಟು ಸೇರಿಗೆಡ್  ರಕ್ತದಾನ ಶಿಬಿರ ನ 4 ದಾನಿ ಶ್ರೀ ಗುರುದೇವ ಪ.ಪೂ ಕಾಲೇಜ್‌ಡ್‌ ನಡಪೆರೆ ಉಂಡು.

ಶಿಬಿರದ ಉದಿಪನನ್ ಶ್ರೀ ಗುರುದೇವ ಎಜುಕೇಶನಲ್ ಟ್ರಸ್ಟ್‌ದ ಅಧ್ಯಕ್ಷೆರ್, ಮಾಜಿ ಶಾಸಕೆರ್ ವಸಂತ ಬಂಗೇರ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೋಲ್ತೆರ್ ರೆಡ್‌ಕ್ರಾಸ್ ಸೊಸೈಟಿದ ಅಧ್ಯಕ್ಷೆರ್ ಹರಿದಾಸ್ ಎಸ್.ಎಂ, ದ.ಕ ಜಿಲ್ಲಾ ಸಹಕಾರಿ ಆಸ್ಪತ್ರೆ ಬೊಕ್ಕ ವೈದ್ಯಕೀಯ ಶಿಕ್ಷಣ, ಸಂಶೋಧನಾ ಸಂಘ (ನಿ)ಅಧ್ಯಕ್ಷೆರ್ ಶಿವಕುಮಾರ್ ಎಸ್.ಎಂ, ರೆಡ್‌ಕ್ರಾಸ್ ಸೊಸೈಟಿದ ಕಾರ್ಯದರ್ಶಿ ಯಶವಂತ ಪಟವರ್ಧನ್, ಶ್ರೀ ಗುರುದೇವ ಪ್ರಥಮ ದರ್ಜೆ ಕಾಲೇಜ್‌ದ ಪ್ರಾಂಶುಪಾಲೆರ್ ಡಾ. ಸವಿತಾ, ಶ್ರೀ ಗುರುದೇವ ಪ.ಪೂ ಕಾಲೇಜ್‌ದ ಪ್ರಾಂಶುಪಾಲೆರ್ ಸುಕೇಶ್, ಶ್ರೀ ಗುರುದೇವ ಪ್ರಥಮ ದರ್ಜೆ ಕಾಲೇಜ್‌ದ ಎನ್ಎಸ್ಎಸ್ ಕಾರ್ಯಕ್ರಮ ಅಧಿಕಾರಿ ಬಿ.ಎ ಶಮಿಯುಲ್ಲ ಪಾಲ್‌ ಪಡೆಯೆರೆ ಉಲ್ಲೆರ್.

ಮಹೇಶ್ ಶೆಟ್ಟಿ ತಿಮರೋಡಿ ಮಿತ್ತ್ ಎಫ್‌ಐಆರ್‌

ಬೋಲ್ತೆರ್: ರಾಷ್ಟ್ರೀಯ ಹಿಂದು ಜಾಗರಣ ವೇದಿಕೆದ ಮುಖಂಡೆರ್ ಮಹೇಶ್ ಶೆಟ್ಟಿ ತಿಮರೋಡಿ ವಿರುದ್ಧ ಬೋಲ್ತೆರ್ ಪೊಲೀಸ್ ಠಾಣೆಡ್ ಕೇಸ್ ಪಾಡ್ದೆರ್. ಧರ್ಮಸ್ಥಳ ಗ್ರಾಮದ ಸಂದೀಪ್ ರೈ ಪನ್ಪಿನಾರ್ ತಿಮರೋಡಿ ಬೊಕ್ಕ ಬೇತೆಕ್ಲೆನ ವಿರುದ್ಧ ಕೇಸ್ ದಾಖಲ್‌ ಮಲ್ತ್‌ದೆರ್.‌

ಮಹೇಶ್ ಶೆಟ್ಟಿ ತಿಮರೋಡಿ, ಅನಿಲ್ ಕುಮಾರ್ ಅಂತರ, ಕಿರಣ್ ಗೌಡ, ಪ್ರಜ್ವಲ್ ಕೆ.ವಿ. ಗೌಡ, ಮನೋಹರ್ ಮನ್ನಡ್ಕ, ಮನೋಜ್ ಸಾಲ್ಯಾನ್ ಕುಂಜರ್ಪ ಸಮಾಜದ ಆರೋಗ್ಯನ್ ಕೆಟ್ಟದಾದ್‌ ಬರೆನ ಬ್ಯಾನರ್ ಗ್ ಅನುಮತಿ ಕೊರ್ನ ಉಜಿರೆದ ಪಿಡಿಒ ಬೊಕ್ಕ ಕಾರ್ಯದರ್ಶಿ ವಿರುದ್ಧಲ ಕೇಸ್‌ ದಾಖಲಾತ್‌ಂಡ್.

ಅ.29 ದಾನಿ ಬೋಲ್ತೆರ್ ಠಾಣಾ ವ್ಯಾಪ್ತಿಡ್ ನಡತ್ತಿನ ಧರ್ಮಸಂರಕ್ಷಣಾ ಯಾತ್ರೆದ ಸಲುವಾದ್ ಸಂಬಂಧಪಟ್ಟ ಇಲಾಖೆರ್ದ್ ಅನುಮತಿ ಪಡೆದ್ ಯಾತ್ರೆಗ್ ಬೆಂಬಲ ಸೂಚಿಸಾದ್ ಪಾರ್ದ್‌ ಇತ್ತಿನ ಬ್ಯಾನರ್‌ದ ಕೈತಲ್ ಪಾದಯಾತ್ರೆನ್‌ ಉಂತಾವುನ ಒಳಸಂಚ್‌ರ್ದ್ ಪ್ರಾದೇಶಿಕ ಗುಂಪುದ ನಡುಟ್ ಸೌಹಾರ್ದಗ್‌ ಪೆಟ್ಟ್ ಆಪಿನಂಚ ಬರವಣಿಗ್‌ ಇತ್ತಿನ ಬ್ಯಾನರ್‌ ಪಾರ್ದ್ ಪ್ರಾದೇಶಿಕ ಗುಂಪುದ ನಡುಟ್ಟು ವೈರತ್ವ, ದ್ವೇಷ, ವೈಮನಸ್ಸು ಭಾವನೆ ಬರ್ಪುಲಕ ಬ್ಯಾನರ್‌ ಪಾರ್ದೆರ್‌ ಪಂದ್‌ ಸಂದೀಪ್ ರೈ ಕೊರ್ನ ದೂರುದಂಚ ಬೋಲ್ತೆರ್ ಪೊಲೀಸ್ ಠಾಣೆಡ್ ಕೇಸ್‌ ದಾಖಲಾತ್‌ಂಡ್.

ನ.18: ಬೋಲ್ತೆರ್ ತಾಲೂಕು ಮಟ್ಟದ ಭಗವದ್ಗೀತೆ ಪಂತೊ

ಬೋಲ್ತೆರ್: ಶಿರಸಿದ ಶ್ರೀ ಸರ್ವಜ್ಞೇಂದ್ರ ಸರಸ್ವತೀ ಪ್ರತಿಷ್ಠಾನ (ರಿ) , ಶ್ರೀ ಸೋಂದಾ ಸ್ವರ್ಣವಲ್ಲೀ ಮಹಾಸಂಸ್ಥಾನ ಮೊಕ್ಲೆನ ಆಶ್ರಯಡ್ ಶಾಲಾ, ಕಾಲೇಜ್‌ ಕಲ್ಪಾರ್ಥಿಲೆಗ್ ಬೋಲ್ತೆರ್ ತಾಲೂಕು ಮಟ್ಟದ ಭಗವದ್ಗೀತೆ ಪಂತೊ ನ.18 ಶನಿವಾರ ಮಧ್ಯಾಹ್ನ 2 ಘಂಟೆಗ್ ಉಜಿರೆದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಪದವಿಪೂರ್ವ ಕಾಲೇಜ್‌ಡ್‌ ನಡಪೆರೆ ಉಂಡು.

ತಾಲೂಕು ಮಟ್ಟದ ಆಯಾ ಸ್ಪರ್ಧೆಡ್ ಗೆಂದಿನ ರಡ್ಡ್‌ ಜನನ್ ಜಿಲ್ಲಾ ಮಟ್ಟದ ಸ್ಪರ್ಧೆಗ್ ಆಯ್ಕೆ ಮಲ್ಪುವೆರ್. ಡಿಸೆಂಬರ್ 2 ದಾನಿ ಜಿಲ್ಲಾ ಮಟ್ಟದ ಸ್ಪರ್ಧೆ ಉಜಿರೆದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕನ್ನಡ ಮಾಧ್ಯಮ ಪ್ರೌಢಶಾಲೆಡ್‌ ನಡಪೆರೆ ಉಂಡು. ಜಿಲ್ಲಾ ಮಟ್ಟದ ಬೊಕ್ಕ ರಾಜ್ಯ ಮಟ್ಟದ ಕಂಠಪಾಠಗ್ ಶ್ರೀ ಭಗವದ್ಗೀತೆದ 10 ನೆಯ ಅಧ್ಯಾಯ ಪೂರ್ತಿ ಶ್ಲೋಕನ್‌ ಪನಿಯೆರೆ ಇಪ್ಪುಂಡು. ಎಚ್ಚದ ವಿವರಗಾದ್ ಬೋಲ್ತೆರ್ ತಾಲೂಕು ಶ್ರೀ ಭಗವದ್ಗೀತಾ ಅಭಿಯಾನದ ಸಂಯೋಜಕೆರ್‌ ಬೊಕ್ಕ ಉಜಿರೆದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಪದವಿಪೂರ್ವ ಕಾಲೇಜ್‌ದ ಸಂಸ್ಕೃತ ಭಾಷಾ ವಿಭಾಗದ ಮುಖ್ಯಸ್ಥೆರ್‌ ಡಾ.ಪ್ರಸನ್ನಕುಮಾರ ಐತಾಳ್ 9964139855 ಮೇರೆನ್ ಸಂಪರ್ಕ ಮಲ್ಪೊಲಿ ಪಂದ್ ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.