ಬೊಲ್ತೆರ್ ಸುದ್ದಿ | Belthangady News

ವೇಣೂರು-ಪೆರ್ಮುಡ 30ನೇ ವರ್ಷದ ಸೂರ್ಯ-ಚಂದ್ರ ಜೋಡುಕರೆ ಕಂಬುಲ ಉದಿಪನ

ಬೊಲ್ತೇರ್: ವೇಣೂರು-ಪೆರ್ಮುಡ 30ನೇ ವರ್ಷದ ಸೂರ್ಯ-ಚಂದ್ರ ಜೋಡುಕರೆ ಕಂಬುಲನ್ ಅಳದಂಗಡಿ ಅರಮನೆತ್ತ ತಿಮ್ಮಣ್ಣರಸೆರ್ ಡಾ. ಪದ್ಮಪ್ರಸಾದ್ ಅಜಿಲೆರ್ ಡಿ.3 ತಾರೀಕ್ ಸನಿವಾರ ಉದಿಪನ ಮಲ್ತೆರ್.

ಈ ಲೇಸ್‌ಡ್ ವೇಣೂರು ಮಹಾಲಿಂಗೇಶ್ವರ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷೆರ್ ಎನ್. ಪುರುಷೋತ್ತಮ ರಾವ್ ಅಧ್ಯಕ್ಷೆತೆ ವಹಿಸೊಂದು ಇತ್ತೆರ್. ಈ ಪೊರ್ತುಡು ತಹಶೀಲ್ದಾರ್ ಪೃಥ್ವಿ ಸಾನಿಕಂ, ಸರ್ಕಲ್ ಇನ್‌ಸ್ಪೆಕ್ಟರ್ ಶಿವಕುಮಾರ್ ಬಿ., ಕಂಬಳ ಸಮಿತಿ ಅಧ್ಯಕ್ಷೆರ್ ನಿತೀಶ್ ಕೋಟ್ಯಾನ್ ಬೊಕ್ಕ ಕಾರ್ಯಾಧ್ಯಕ್ಷೆರ್ ಶೇಖರ ಕುಕ್ಕೆಡಿ ಇತ್ತೆರ್.

ಡಿ.16-20: ಕೇಪು ಶ್ರೀ ಉಳ್ಳಾಲ್ತಿ ದುರ್ಗಾಪರಮೇಶ್ವರೀ ದೇವಲ್ಯಡ್ ಕಜಂಬು ಜಾತ್ರೆ

ಬಂಟ್ವಾಳ ತಾಲೂಕ್‌ದ ಕೇಪು ಶ್ರೀ ಉಳ್ಳಾಲ್ತಿ ದುರ್ಗಾಪರಮೇಶ್ವರೀ ದೇವಲ್ಯಡ್ ಡಿ.16 ಸುಕ್ರಾರರ್ದ್ ಡಿ.20 ತಾರೀಕ್ ಅಂಗಾರೆ ಮುಟ್ಟ ಕಾಲಾವಧಿ ಕಜಂಬು ಜಾತ್ರೆ ನಡಪರೆ ಉಂಡು.

ಈ ಲೇಸ್‌ಗ್ ಭಕ್ತೆರ್ ಬತ್ತ್‌ದ್, ಲೇಸ್‌ನ್ ಎಡ್ಡೆ ಮಲ್ತ್ ಕೊರೊಡು ಪಂದ್ ಕೇಪು ಶ್ರೀ ಉಳ್ಳಾಲ್ತಿ ದೇವಸ್ಥಾನದ ಅನುವಂಶಿಕ ಆಡಳಿತದಾರೆರ್ ಅಂಚನೆ ಶ್ರೀ ದುರ್ಗಾಪರಮೇಶ್ವರಿ (ಉಳ್ಳಾಲ್ತಿ) ಸೇವಾ ಸಮಿತಿ, ಸೀಮೆದ ಗುರಿಕಾರೆರ್ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.1 ಕ್ಕ್ ಗುರುವಾಯನಕೆರೆ ಶ್ರೀ ಪಿಲಿಚಂಡಿ ದೈವದ ದೊಂಪದ ಬಲಿ ಉಚ್ಚಯ

ಬೊಲ್ತೇರ್ ತಾಲೂಕ್‌ದ ಗುರುವಾಯನಕೆರೆ ಪಿಲಿಚಾಮುಂಡಿಕಲ್ಲು ಮುಲ್ಪ ವರ್ಷಂಪ್ರತಿ ನಡಪುನ ಶ್ರೀ ಪಿಲಿಚಂಡಿ ದೈವದ ದೊಂಪದ ಬಲಿ ಉಚ್ಚಯ ಡಿ. 1 ತಾರೀಕ್‌ಗ್ ಬಯ್ಯ 6 ಗಂಟೆಗ್ ನಡಪರೆ ಉಂಡು.

ಈ ಉಚ್ಚಯಗ್ ಮಾತ ಭಕ್ತೆರ್ ಬತ್ತ್‌ದ್, ಗಂಧಪ್ರಸಾದನ್ ದೆತೊಂದ್ ದೈವದ ಕೈಪೆಗ್ ಪಾತ್ರರಾವೊಡು ಪಂದ್ ಪಿಲಿಚಾಮುಂಡಿಕಲ್ಲು ದೊಂಪದಬಲಿ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಸೋಮಶೇಖರ ದೇವಸ್ಯ ಬಾಳಿಕೆ, ಉಪಾಧ್ಯಕ್ಷೆರ್ ವಿತೇಶ್ ಬಂಗೇರ ಅಂಚನೆ ಶ್ರೀನಿವಾಸ ಅಸ್ರಣ್ಣೆರ್ ಮೂಡುಮನೆ, ಅಳದಂಗಡಿ ಅರಮನೆತ್ತ ಎ. ರಾಜಶೇಖರ ಶೆಟ್ಟಿ, ಗೌರವಾಧ್ಯಕ್ಷೆರ್ ಪ್ರವೀಣ್ ಕುಮಾರ್ ಅಜ್ರಿ, ಪ್ರಧಾನ ಕಾರ್ಯದರ್ಶಿ ಜಿ. ನಾಗೇಶ್ ಮೂಲ್ಯ, ಕಾರ್ಯದರ್ಶಿ ಶೋಭಿತ್ ಜೈನ್, ಕೋಶಾಧಿಕಾರಿ ನಾರಾಯಣ ಆಚಾರ್ಯ ಬರಾಯ ಸೇರಿನಂಚನೆ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಧರ್ಮಸ್ಥಳ ಸಿದ್ಧವನ ಮಾರ್ಗದ ತಿರ್ಗೋಸ್ ಡ್ ಗಾಡಿ ಅಡ್ಡ ಬೂರ್ದು 6 ಜನಕ್ಕ್ ಪೆಟ್ಟ್

ಉಜಿರೆ : ಧರ್ಮಸ್ಥಳ ಸಿದ್ಧವನ ಮಾರ್ಗದ ತಿರ್ಗೋಸ್ ಡ್ ಗಾಡಿಯೊಂಜಿ ಅಡ್ಡ ಬೂರ್ದು 6 ಜನಕ್ಕ್ ಗಾಯ ಆಯಿನ ಘಟನೆ ಸನಿಯಾರ ಬಯ್ಯಡ್ ನಡತ್ಂಡ್.

ಚಿಕ್ಕಬಳ್ಳಾಪುರೊರ್ದು ಪ್ರಯಾಣಿಕೆರೆನ್ ಲೆತೊಂದು ಧರ್ಮಸ್ಥಳೊಗು ಬತ್ತಿನ ಟಾಟಾ ಸುಮೊ ಓವರ್ ಸ್ಪೀಡ್ ದ ಕಾರಣ ಅಡ್ಡ ಬೂರ್ದುಂಡು. ಗಾಡಿಡಿತ್ತಿನಕ್ಲೆಗ್ ಎಲ್ಯಮಟ್ಟ್ ದ ಪೆಟ್ಟ್ ಆತ್ಂಡ್. ಆಂಡ ಮಾತೆರ್ಲ ಹುಷಾರ್ ಉಲ್ಲೆರ್.
(ವರದಿ : ಶ್ರೇಣಿಕ್ ಬಲ್ಲಾಳ್)

ನ.28-30: ಬಳ್ಳಮಂಜ ಷಷ್ಠಿ ಮಹೋಚ್ಚಯ

ಬಳ್ಳಮಂಜ: ಪರಪೋಕು ಇಪ್ಪುನ ಪುಗರ್ತೆದ ಮಹತೋಭಾರ ಬಳ್ಳಮಂಜ ಶ್ರೀ ಅನಂತೇಶ್ವರ ಸ್ವಾಮಿ ದೇವಲ್ಯಡ್ ನ.28-30 ಮುಟ್ಟ ಷಷ್ಠಿ ಮಹೋಚ್ಚಯ ನಡಪರೆ ಉಂಡು.

ನ.28 ಗ್ ಕೊಪ್ಪರಿಗೆ ಮೂರ್ತ, ಅಂಗಪ್ರದಕ್ಷಿಣೆ, ಕಾಂಡೆ 11 ಕ್ಕ್ ವೇಣುವಾದನ ವಿದ್ವಾನ್ ಕೃಷ್ಣಗೋಪಾಲ ಪುಂಜಾಲಕಟ್ಟೆ ಬೊಕ್ಕ ಕೂಟದಕ್ಲೆರ್ದ್ ಬ್ರಹ್ಮಶ್ರೀ ದೇರೆಬೈಲು ಶಿವಪ್ರಸಾದ ತಂತ್ರಿದಾರೆರ್ನ ಮುತಾಲಿಕೆಡ್ ಮಹಾಗಣಪತಿಯಾಗ ನಡಪರೆ ಉಂಡು. ಆಯಿಬೊಕ್ಕ ಶ್ರೀ ಅನಂತೇಶ್ವರ ಸ್ವಾಮಿಗ್ ಬಳ್ಳಮಂಜ ದೇವಲ್ಯದ ಕಂಡಡ್ ನಡಪುನ ಶೇಷ-ನಾಗ ಜೋಡು ಕರೆ ಕಂಬಳ ಸಮಿತಿ ಕೊಡುಗೆಗಾದ್ ಕೊರಿನ ಬೊಲ್ಲಿ ಪರ್ಬದ ನೆಂಪುಗಾದ್ ನಿರ್ಮಾಣ ಮಲ್ತಿನ ಪೊಸ ರಥ ಸಮರ್ಪಣೆನ್ ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜ ಮೇರ್ ಮಲ್ಪರೆ ಉಲ್ಲೆರ್. ಆಯಿಬೊಕ್ಕ ಮಹಾಪೂಜೆ, ಅನ್ನಸಂತರ್ಪಣೆ, ಬಯ್ಯಗ್ ರಂಗಪೂಜೆ, ಪಂಚಮಿ ಉಚ್ಚಯ ನಡಪರೆ ಉಂಡು.

ನ.29 ಗ್ ಕಾಂಡೆ 7 ರ್ದ್ ಷಷ್ಠಿ ಉಚ್ಚಯ ಸುರು ಆದ್ 11 ಗಂಟೆಗ್ ಮಲ್ಲ ತೇರ್ ದ ಉಚ್ಚಯ, 12.30 ಗ್ ಮಹಾಪೂಜೆ ಆದ್ ರಾತ್ರೆ ಕಟ್ಟೆ ಪೂಜೆ, ದರ್ಶನ ಬಲಿ ನಡಪರೆ ಉಂಡು. ನ.30 ಗ್ ಮಹಾಸಂಪ್ರೋಕ್ಷಣೆ, ಮಹಾಮಂತ್ರಾಕ್ಷತೆ, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಅನುವಂಶೀಯ ಆಡಳಿತ ಮೊಕ್ತೇಸರೆರ್ ಡಾ| ಎಂ. ಹರ್ಷ ಸಂಪಿಗೆತ್ತಾಯ ಪತ್ರಿಕಾ ಪ್ರಕಟನೆಡ್ ತೆರಿಪಾದೆರ್.