ಬೊಲ್ತೆರ್ ಸುದ್ದಿ | Belthangady News

ನಾಳ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಸಿಂಹ ಸಂಕ್ರಮಣ

ಬೊಲ್ತೆರ್: ನಾಳ ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಸಿಂಹ ಸಂಕ್ರಮಣ (ಕೊಪ್ಪರಿಗೆ ಏರಿಸಾವುನ) ಆ.17 ದಾನಿ ನಡತ್‌ಂಡ್.

ಅಂಚನೆ ಮದ್ಯಾಹ್ನ ಶ್ರೀ ದೇವಿಗ್ ಬೊಕ್ಕ ಪರಿವಾರ ದೇವರೆಗ್ ವಿಶೇಷ ಪೂಜೆ ಬೊಕ್ಕ ಕ್ಷೇತ್ರದ ದೈವಲೆಗ್ ಪರ್ವ ಸೇವೆ ಆದ್ ಬೊಕ್ಕ ಅನ್ನಸಂತರ್ಪಣೆ ನಡತ್‌ಂಡ್.

ಸಿಂಹ ಸಂಕ್ರಮಣರ್ದ್ ಕನ್ಯಾ ಸಂಕ್ರಮಣ ಮುಟ್ಟ ಪ್ರತಿ ಸುಕ್ರಾರ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನಸಂತರ್ಪಣೆ ನಡಪೆರೆ ಉಂಡು. ಈ ಪೊರ್ತುಡ್ ಭಕ್ತಾಧಿಲು ಎಚ್ಚಿನ ಸಂಖ್ಯೆಡ್ ಬತ್ತ್ ದ್ ದೇವೆರ್ನ ಪ್ರಸಾದ ಸ್ವೀಕಾರ ಮಲ್ಪೊಡು ಪಂದ್ ವ್ಯವಸ್ಥಾಪನ ಸಮಿತಿದಕುಲ್ ತೆರಿಪಾದೆರ್.

25ಕೋಟಿ ಕರ್ಚಿಡ್ ವೈದ್ಯನಾಥೇಶ್ವರ ವಿಷ್ಣುಮೂರ್ತಿ ದೇವಲ್ಯದ ಜೀರ್ಣೋದ್ದಾರ

ಬೊಲ್ತೆರ್: ಕೊಕ್ಕಡ ಗ್ರಾಮದ ಶ್ರೀ ವೈದ್ಯನಾಥೇಶ್ವರ ವಿಷ್ಣುಮೂರ್ತಿ ದೇವಲ್ಯಗ್ ಸುಮಾರ್ ವರ್ಷದ ಇತಿಹಾಸ ಇತ್ತ್ ದ್ ಹರಿಹರ ಸಂಗಮ ಕ್ಷೇತ್ರ, ಧನ್ವಂತರಿ ಕ್ಷೇತ್ರ ಪಂದ್ ಪ್ರಸಿದ್ಧಿ ಆತ್‌ಂಡ್.

ಆ.17 ದಾನಿ ದೇವಲ್ಯಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ವ್ಯವಸ್ಥಾಪನ ಸಮಿತಿ ಅಧ್ಯಕ್ಷೆರ್ ವೇ|ಮೂ| ಬಾಲಕೃಷ್ಣ ಕೆದಿಲ್ಲಾಯ ಶ್ರೀ ಕ್ಷೇತ್ರಡ್ 2016 ನೇ ಇಸವಿಡ್ ನಡತಿನ ಅಷ್ಟಮಂಗಳ ಪ್ರಶ್ನೆದ ಪ್ರಕಾರ ದೇವಾಲಯದ ಜೀರ್ಣೋದ್ಧಾರ ಕಾರ್ಯಲೆನ್ ಪೂಜ್ಯ ಶ್ರೀ ಶ್ರೀ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಪೇಜಾವರ ಮಠ ಮೆರೆನ ಗೌರವಾಧ್ಯಕ್ಷತೆ ಬೊಕ್ಕ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿಲು ಪೂಜ್ಯ ರಾಜರ್ಷಿ ಡಾ.ಡಿ ವೀರೇಂದ್ರ ಹೆಗ್ಗಡೆ ಮೊಕ್ಲೆನ ಮಾರ್ಗದರ್ಶನಡ್ ಶ್ರೀ ರಾಧಾಕೃಷ್ಣ ಯಡಪ್ಪಾಡಿತ್ತಾಯ ಮೇರ್‌ನ ಗುರ್ಕಾರ್ಮೆ ಡ್ 2020ನೇ ಫೆಬ್ರವರಿಡ್ ರಚನೆ ಆಯಿನ ಜೀರ್ಣೋದ್ದಾರ ಸಮಿತಿದ 01/05/2020 ದಾನಿ ಪೂಜ್ಯ ಪೇಜಾವರ ಶ್ರೀ ಮೇರ್‌ನ ಅಮೃತ ಹಸ್ತಡ್ ನಿಧಿ ಸಮರ್ಪಣೆದೊಟ್ಟಿಗೆ ಶುರು ಆತ್‌ಂಡ್.

ಶ್ರೀ ದೇವಲ್ಯದ ಅಭಿವೃದ್ದಿಗ್ ಸುಮಾರ್ 25 ಕೋಟಿ ರೂಪಾಯಿ ಕರ್ಚಿ ಆಯರೆ ಉಂಡು. ಉಂದೆಕ್ ಯೋಜನಾ ನಕ್ಷೆ ತಯಾರ್ ಮಲ್ತ್ ದ ಪಂದ್ ತೆರಿಪಾದೆರ್.

ಮಾಜಿ ಶಾಸಕ ವಸಂತ ಬಂಗೇರ ಡಿ.ಕೆ ಶಿವಕುಮಾರ್ ಭೇಟಿ

ಬೊಲ್ತೆರ್: ಮಾಜಿ ಶಾಸಕೆರ್ ವಸಂತ ಬಂಗೇರ ಕರ್ನಾಟಕ ರಾಜ್ಯ ಸರಕಾರದ ಉಪಮುಖ್ಯಮಂತ್ರಿ ಬೊಕ್ಕ ಕೆಪಿಸಿಸಿ ಅಧ್ಯಕ್ಷೆರಾಯಿನ ಡಿ.ಕೆ ಶಿವಕುಮಾರ್ ಮೇರೆನ್ ಆ.17 ದಾನಿ ಭೇಟಿ ಮಲ್ತೆರ್.

ತಾಲೂಕುದ ಅಭಿವೃದ್ಧಿ ಕಾರ್ಯದ ಬಗ್ಗೆ ಬೊಕ್ಕ ಪಕ್ಷ ಸಂಘಟನೆದ ಬಗ್ಗೆ ಚರ್ಚೆ ಮಲ್ತೆರ್.

ಹಿಂದುಳಿದ ವರ್ಗದ ಬೊಕ್ಕ ಅಲ್ಪಸಂಖ್ಯಾತ ಕಲ್ಯಾಣ ಸಮಿತಿಗ್ ಸದಸ್ಯೆರಾದ್ ಶಾಸಕ ಹರೀಶ್ ಪೂಂಜ

ಬೊಲ್ತೆರ್: ಕರ್ನಾಟಕ ವಿಧಾನಸಭಾ ಅಧ್ಯಕ್ಷೆರ್ ಯು.ಟಿ ಖಾದರ್ ಅರೆನ ಆದೇಶದನ್ವಯ ಹಿಂದುಳಿದ ವರ್ಗದ ಬೊಕ್ಕ ಅಲ್ಪಸಂಖ್ಯಾತ ಕಲ್ಯಾಣ ಇಲಾಖೆದ ಸದಸ್ಯೆರಾದ್ ಬೊಲ್ತೆರ್ ಶಾಸಕೆರ್ ಹರೀಶ್ ಪೂಂಜ ಮೇರ್ ಆಯ್ಕೆ ಆತೆರ್.

ಬೊಲ್ತೆರ್: ಪೊಂಜೊವ್‌ಗ್ ಅವಾಚ್ಯ ಶಬ್ದರ್ದ್ ನಿಂದನೆ, ಜೀವ ಬೆದರಿಕೆ

ಬೊಲ್ತೆರ್: ಪೊಂಜೊವ್ ಒರ್ತಿನ ಇಲ್ಲಗ್ ಅಕ್ರಮವಾದ್ ಬತ್‌ದ್ ಹಲ್ಲೆ ಮಲ್ತ್ ದ್, ಜೀವ ಬೆದರಿಕೆ ಪಾರ್ದೆರ್ ಪಂದ್ ಪುಂಜಾಲಕಟ್ಟೆ ಪೊಲೀಸ್ ಠಾಣೆಡ್ ದೂರು ದಾಖಲಾತ್‌ಂಡ್.

ಬೊಲ್ತೆರ್ ತಾಲೂಕುದ ಪುತ್ತಿಲ ಗ್ರಾಮದ ನಿವಾಸಿ ಪೊಂಜೊವ್ ಕೋರ್ನ ದೂರುದ ಪ್ರಕಾರ ಚಂದ್ರಶೇಖರ ಶೆಟ್ಟಿ ಮೇರೆನ ಮಿತ್ತ್ ದೂರು ದಾಖಲಾತ್‌ಂಡ್.

ಇಲ್ಲಗ್ ಬತ್ತಿನ ಚಂದ್ರಶೇಖರ್ ಪೊಂಜೊವ್‌ಗ್, ಜೊಕ್ಲೆಗ್, ಕಂಡನಿಗ್ ಕೈರ್ದ್ ಬೊಕ್ಕ ಕತ್ತಿರ್ದ್ ಹಲ್ಲೆ ಮಲ್ತ್ ದ್ ಇಲ್ಲದ ಬಾಕಿಲ್‌ನ್ ತುಂಡು ಮಲ್ತ್ ದ್ ಇಲ್ಲದ ಶೋಕೇಸ್‌ಗ್ ಹಾನಿ ಮಲ್ತ್ ದೆರ್ ಪಂದ್ ದೂರುಡ್ ತೆರಿಪಾದೆರ್.

ತುಳು ಲಿಪಿ ಆನ್ ಲೈನ್ ಪರೀಕ್ಷೆಡ್ ಪಂಚಮಿ ಬಿ.ಆರ್ ವಿಶೇಷ ಸಾಧನೆ

ಬೊಲ್ತೆರ್: ತುಳುನಾಡ್ ಅಂಚನೆ ವಿಶ್ವದ ನಾನಾ ಭಾಗಡ್ ಇಪ್ಪುನ ತುಳು ಬಾಷೆದಕ್ಲೆಗ್ ತುಳು ಲಿಪಿತ ಬಗ್ಗೆ ಅರಿವು ಬೊಕ್ಕ ಆಸಕ್ತಿ ಮೂಡಿಸಾವುನ ಉದ್ದೇಶಡ್ “ಜೈ ತುಳುನಾಡ್ (ರಿ)” ಸಂಘಟನೆ ನಡಪಾಯಿನ ತುಳು ಲಿಪಿ ಆನ್-ಲೈನ್ ತರಗತಿಡ್ ಪಾಲ್ ಪಡೆದ್ ಬೊಕ್ಕ ಆನ್-ಲೈನ್ ಪರೀಕ್ಷೆಡ್ ಪಂಚಮಿ ಬಿ.ಆರ್ 100 ಕ್ಕ್ 100 ಅಂಕನ್ ಗಳಿಸಾವುನ ಮುಖೇನ ವಿಶೇಷ ಸಾಧನೆ ಮಲ್ತ್ ದೆರ್.

ದಾರವಾಡಡ್ ಇಪ್ಪುನ ಜೆಜೆಎಸ್ ಮಂಜುನಾಥೇಶ್ವರ ಸೆಂಟ್ರಲ್ ಸ್ಕೂಲ್ 8ನೇ ತರಗಡ್ ಕಲ್ತೊಂದು ಇಪ್ಪುನ ಮೇರ್ ಕಾಸರಗೋಡ್‌ದ ದೇಲಂಪಾಡಿ ಗ್ರಾಮದ ಬಂದ್ಯಡ್ಕ ರಾಜೇಶ್ ಬೊಕ್ಕ ಚಿತ್ರಕಲಾ ದಂಪತಿಲೆನ ಮಗಲ್.

ಸೆ.3: ಸೌಜನ್ಯಗ್ ನ್ಯಾಯೊಗಾದ್ ಪ್ರಜಾಪ್ರಭುತ್ವ ವೇದಿಕೆದ ಮುತಾಲಿಕೆಡ್ ಪ್ರತಿಭಟನೆ

ಬೊಲ್ತೇರ್: ಕು. ಸೌಜನ್ಯ ಕೇಸ್ ಆದ್ 11 ವರ್ಷ ಆಂಡಲ ಕೆರ್ನ ನಿಜವಾಯಿನ ಆರೋಪಿಲೆನ್ ಪತ್ತೆ ಮಲ್ತ್ ದ್ ಕಾನೂನುದ ಅಡಿಟ್ ಕಠಿಣ ಶಿಕ್ಷೆ ಕೊರಿಯೆರೆ ಸಂಬಂಧ ಪಟ್ಟಿನ ಇಲಾಖೆ ವಿಫಲ ಆತ್‌ಂಡ್. ನಿಜವಾಯಿನ ಆರೋಪಿಲೆನ್ ಪತ್ತೆ ಮಲ್ಪುನಂಚ ಸೆ.3 ತಾರೀಕ್ ದಾನಿ ಬೊಲ್ತೇರ್ ತಾಲೂಕು ಮೈದಾನಡ್ ಪ್ರಜಾಪ್ರಭುತ್ವ ವೇದಿಕೆ ದ ಮುತಾಲಿಕೆಡ್ ಮಲ್ಲ ಮಟ್ಟ್ ದ ಪ್ರತಿಭಟನಾ ಸಭೆ ನಡಪರೆ ಉಂಡು ಪಂದ್ ಪ್ರಜಾಪ್ರಭುತ್ವ ವೇದಿಕೆದ ತಾಲೂಕು ಅಧ್ಯಕ್ಷೆರ್ ಮಹೇಶ್ ಶೆಟ್ಟಿ ತಿಮರೋಡಿ ತೆರಿಪಾದೆರ್.

ಆ.16 ದಾನಿ ಬೊಲ್ತೆರ್‌ದ ಶ್ರೀ ಗುರುನಾರಾಯಣ ಸಂಕೀರ್ಣಡ್ ನಡತಿನ ಪತ್ರಿಕಾ ಗೋಷ್ಟಿಡ್ ಪಾತೆರ್ನ ಆರ್ ಕರಿನ 11 ವರ್ಷರ್ದ್ ಹೋರಾಟನ್ ಮಲ್ತೊಂದು ಬರೊಂದು ಉಲ್ಲ, ಇತ್ತೆ ಎಂಕ್ಲೆನ ಹೋರಾಟಗ್ ಶಕ್ತಿ ಬೈದುಂಡ್. ಶೇ.77 ಜನ ಸೌಜನ್ಯ ಪರ, ನ್ಯಾಯದ ಪರ ಉಲ್ಲೆರ್. ಈ ಪ್ರತಿಭಟನೆಗ್ ಬರಿಯೆರೆ ಏರೆನ್ಲ ಒತ್ತಾಯ ಮಲ್ಪುಜ, ಅಂಗಡಿ, ಆಟೋ ರಿಕ್ಷಾ ಬಂದ್ ಮಲ್ತ್ ಬರಿಯೆರೆ ಒತ್ತಾಯ ಮಲ್ಪುಜ ಸ್ವಯಂ ಪ್ರೇರಿತವಾದ್ ಶಾಂತಿಯುತ ಹೋರಾಟ ಮಲ್ತ್ ಸೌಜನ್ಯ ಕುಟುಂಬಗ್ ನ್ಯಾಯಗ್ ಹೋರಾಟ ಮಲ್ಪೊಡು ಪಂದ್ ತೆರಿಪಾಯೆರ್.

ಬೊಲ್ತೆರ್: ತಾಲೂಕು ಆಡಳಿತ ಸೌಧಡ್ ಸ್ವಾತಂತ್ರ್ಯ ದಿನಾಚರಣೆ

ಬೊಲ್ತೆರ್ ತಾಲೂಕ್ ರಾಷ್ಟ್ರೀಯ ಪರ್ಬದ ಆಚರಣಾ ಸಮಿತಿದ ಮುತಾಲಿಕೆಡ್ 76 ವರ್ಷದ ಸ್ವಾತಂತ್ರ್ಯ ದಿನಾಚರಣೆ ತಾಲೂಕು ಆಡಳಿತ ಸೌಧಡ್ ನಡತ್‌ಂಡ್.

ಧ್ವಜರೋಹಣನ್ ಬೊಲ್ತೆರ್‌ದ ತಹಶೀಲ್ದಾರ್ ಡಿ ಸುರೇಶ್ ಕುಮಾರ್ ಕೆ.ಎ.ಎಸ್ ನಡಪಾಯೆರ್. ಶಾಸಕೆರ್ ಹರೀಶ್ ಪೂಂಜ ಲೇಸ್‌ದ ಗುರ್ಕಾಮೆನ್ ವಹಿಸಾದ್ ಇತ್ತೆರ್.

ಮಲ್ಲ ಬಿನ್ನೆರಾದ್ ವಿಧಾನ ಪರಿಷತ್ ಶಾಸಕೆರ್ ಪ್ರತಾಪಸಿಂಹ ನಾಯಕ್, ಪ್ರಧಾನ ಭಾಷಣಗಾರೆರಾದ್ ಪ್ರೊ. ಗಣಪತಿ ಭಟ್ ಕುಳಮರ್ವ ಪಾಲ್ ಪಡೆದ್ ಇತ್ತೆರ್. ಅಂಚನೆ ಗೌರವ ಉಪಸ್ಥಿತಿಟ್ ಪಟ್ಟಣ ಪಂಚಾಯತ್ ಸದಸ್ಯೆರ್, ತಾಲೂಕುದ ಗ್ರಾ,ಪಂ ಅಧ್ಯಕ್ಷೆರ್, ಉಪಾಧ್ಯಕ್ಷೆರ್, ಸದಸ್ಯೆರ್, ವಿವಿಧ ಸಂಘ ಸಂಸ್ಥೆದ ಪದಾಧಿಕಾರಿಲು ಪಾಲ್ ಪಡೆದ್ ಇತ್ತೆರ್.

ಇಲಾಖಾ ಅಧಿಕಾರಿ, ಪೊಲೀಸೆರ್, ಗೃಹರಕ್ಷಕ ದಳ, ಎಸ್.ಸಿ.ಸಿ, ಸ್ಕೌಟ್ಸ್, ಗೈಡ್ಸ್, ಬುಲ್ ಬುಲ್ಸ್, ಕಬ್ಸ್ ಶಾಲೆದ ಜೊಕುಲ್ ಚರ್ಚ್ ರೋಡ್ ರ್ದ್ ಬೊಲ್ತೆರ್ ಮುಟ ಮೆರವಣಿಗೆದ ಮುಖೇನ ತಾಲೂಕು ಕಚೇರಿ ಮುಟ ಬತ್‌ದ್, ಬೊಕ್ಕ ಶಾಲೆದ ಜೊಕ್ಲೆರ್ದ್ ಸಾಂಸ್ಕೃತಿಕ ಕಾರ್ಯಕ್ರಮ ನಡತ್‌ಂಡ್.