ಬೊಲ್ತೆರ್ ಸುದ್ದಿ | Belthangady News

ಗುರುವಾಯನಕೆರೆ: ಎಕ್ಸೆಲ್ ಕಾಲೇಜ್ ಡ್ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಫ್ರೀ ನೀಟ್ ಕೋಚಿಂಗ್

ಗುರುವಾಯನಕೆರೆ: ಎಕ್ಸೆಲ್ ಕಾಲೇಜ್ ಡ್ ಪ್ರತಿಭಾವಂತ ಕಲ್ಪಾರ್ಥಿಲೆಗ್ ಫ್ರೀ ನೀಟ್ ಕೋಚಿಂಗ್ ಕೊರ್ಪುನ ಮುಖೇನ ಶೈಕ್ಷಣಿಕ ಸಾಧನೆನ್ ಗುರುವಾಯನಕೆರೆ ಎಕ್ಸೆಲ್ ಕಾಲೇಜ್ ಮಲ್ಪೆರೆ ಪಿದರ್‌ದುಂಡು. ಈ ಕಾಲೇಜ್ ನ್ ಸ್ಥಾಪನೆ ಮಲ್ತಿನಾರ್ ನೀಟ್ ಟ್ರೈನರ್ ಬೊಕ್ಕ ರಾಸಾಯನ ವಿಜ್ಞಾನದ ಪ್ರಾದ್ಯಾಪಕೆರ್, ಸುಮಂತ್ ಕುಮಾರ್ ಜೈನ್.

ಲ್ಯಾಂಗ್ ಟರ್ಮ್ ನೀಟ್ : ಡಾಕ್ಟರ್ ಅವೊಡು ಪಂದ್ ಎನೊಂದು ಇಪ್ಪುನ ಕಲ್ಪಾರ್ಥಿಲೆಗ್ ಪಿಯುಸಿ ಡ್ ವೈದ್ಯಕೀಯ ಕೋರ್ಸ್ ದ ಪ್ರವೇಶಗಾದ್ ನೀಟ್ ಪರೀಕ್ಷೆನ್ ಬರೆದ್, ಎನ್ನಿನಾತ್ ಮಾರ್ಕ್ ಬರಂದೆ ಇಪ್ಪುನಗ ವೈದ್ಯಕೀಯ ಕೋರ್ಸ್ ದ ಪ್ರವೇಶಗ್ ಸಂಪೂರ್ಣ ತಯಾರ್ ಆವರೆ, ಒಂಜಿ ವರ್ಷ ಬುಡಂದೆ ತರಬೇತಿನ್ ಪಡೆಯುನೆಕ್ ನೀಟ್ ಲಾಂಗ್ ಟರ್ಮ್ ಪಂದ್ ಪನ್ಪೆರ್.

ನೀಟ್ ಪರೀಕ್ಷೆಡ್ ರ‍್ಯಾಂಕ್ ದೆಪ್ಪೆರೆ ಏತೋ ಸಲ ಪ್ರತಿಭಾವಂತೆರೆಗ್ ಆಪುಜಿ. ಸರಿಯಾದ್ ಕೋಚಿಂಗ್ ತಿಕ್ಕಂದೆ, ಯೋಗ್ಯ ಸ್ಟಡಿ ಮೆಟಿರಿಯಲ್ ತಿಕ್ಕಂದೆ ಇಪ್ಪುನಗ, ಸರಿಯಾಯಿನ ಮಾರ್ಗದರ್ಶನ ಅಂಚನೆ ಕೆಲವಾತ್ ಕಾರಣದಾತ್ರ ಮಾರ್ಕ್ ಕಮ್ಮಿ ದೆಪ್ಪುವೆರ್. ಉಂದೆನ್ ಮಾತಾ ತೆರಿಯೊಂದು ಐಕ್ ಸಲಾದ್ ಎಕ್ಸೆಲ್ ಲಾಂಗ್ ಟರ್ಮ್ ಕೋಚಿಂಗ್ ಸೆಂಟರ್ ನ್ ಸ್ಥಾಪನೆ ಮಲ್ತೆರ್. ಮನೋ ವಿಜ್ಞಾನ ಅರ್ಥ ಮಲ್ತೊಂದು, ಅಕ್ಲೆಗ್ ಜಾಸ್ತಿ ಮಾರ್ಕ್ ದೆಪ್ಪೆರೆ ಬೋಡಾಪಿನ ಮಾತಾ ವಿಧಾನನ್ ಎಕ್ಸೆಲ್ ಡ್ ಪಂದ್ ಕೊರ್ಪೆರ್.

ಪ್ರತಿಭಾವಂತ ಕಲ್ಪಾರ್ಥಿ ಲೆಗ್ ಎಕ್ಸೆಲ್ ಡ್ ರಿಯಾಯಿತಿ:

ಈ ಸರ್ತಿ ನೀಟ್ ಪರೀಕ್ಷೆಡ್ 450 ರ್ದ್ ಎಚ್ಚ ಮಾರ್ಕ್ ದೆತ್ತಿನ ಕಲ್ಪಾರ್ಥಿಲೆಗ್ ಧಮಾರ್ಥ ಕೋಚಿಂಗ್ ಕೊರ್ಪೆರ್. 400 ರ್ದ್ ಎಚ್ಚ ಮಾರ್ಕ್ ದೆತ್ತಿನಕ್ಲೆಗ್ ಕಾಲೇಜ್ ದ ಪೀಸ್ ಡ್ ಶೇಕಡಾ 50% ರಿಯಾಯಿತಿ ಕೊರ್ಪ ಪಂದ್ ಕಾಲೇಜ್ ಪ್ರಕಟಣೆ ತೆರಿಪಾದೆರ್.

ನಿಡ್ಲೆಡ್ ಅಗ್ರಿಲೀಫ್ ಎಕ್ಸ್ ಪೋರ್ಟ್ಸ್ ಪೈ.ಲಿ ಉದಿಪನದ ಲೇಸ್

ನಿಡ್ಲೆ: ಭಾರತದ ನಂ 1 ಪಾಲೆದ ತಟ್ಟೆ ರಫ್ತು ಸಂಸ್ಥೆಯಾಯಿನ ಅಗ್ರಿಲೀಫ್ ಎಕ್ಸ್ ಪೋರ್ಟ್ಸ್ ಪ್ರೈವೆಟ್ ಲಿಮಿಟೆಡ್ ನೆತ್ತ ಪೊಸ ಕಾರ್ಖಾನೆದ ಉದಿಪನ ಆ.28 ಅಂಗಾರೆ ದಾನಿ ನಿಡ್ಲೆದ ಬರಂಗಾಯದ ಅಗ್ರಿಲೀಫ್ ಸಂಸ್ಥೆಡ್ ನಡತ್‌ಂಡ್.

ಸಣ್ಣ ಕೈಗಾರಿಕೆ ಬೊಕ್ಕ ಸಾರ್ವಜನಿಕ ಉದ್ದಿಮೆ ಸಚಿವೆರ್ ಶರಣಬಸಪ್ಪ ದರ್ಶನಾಪುರ ಲೇಸ್‌ದ ಉದಿಪನ ಮಲ್ತೆರ್. ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜೆರ್ ಗುರ್ಕಾಮೆನ್ ವಹಿಸಾದ್ ಇತ್ತೆರ್.

ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಡಿ. ಹಷೇಂದ್ರ ಕುಮಾರ್ ಪಾಲ್ ಪಡೆದ್ ಇತ್ತೆರ್. ಗೌರವ ಬಿನ್ನೆರಾದ್ ಮಾಜಿ ಶಾಸಕೆರ್, ವಿಧಾನ ಪರಿಷತ್ ಬೊಕ್ಕ ಎಸ್.ಯು.ಸಿ.ಒ ಬ್ಯಾಂಕ್ ಲಿ, ಗುರ್ಕಾರೆ ಮನೋಹರ್ ಮಸ್ಕಿ, ವಿಧಾನ ಪರಿಷತ್ ಶಾಸಕೆರ್ ಕೆ.ಹರೀಶ್ ಕುಮಾರ್, ಯು.ಎಸ್.ಎ ರ್ದ್ ಬತ್ತಿನ ಗ್ರಾಹಕೆರ್ ಮೈಕಲ್, ಉಜಿರೆ ಜನಾರ್ಧನ ದೇವಳ್ಯದ ಆಡಳಿತ ಮೊಕ್ತೇಸರೆರ್ ಶರತ್ ಕೃಷ್ಣ ಪಡ್ವೆಟ್ನಾಯ, ಶಶಿ ಕ್ಯಾಟರಿಂಗ್ ಸರ್ವೀಸ್‌ದ ನಿರ್ದೇಶಕೆರ್, ಸ್ಥಾಪಕೆರ್ ಬೊಕ್ಕ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಶಶಿಧರ ಶೆಟ್ಟಿ, ಎಸ್.ಬಿ.ಐ ಡೆಪ್ಯೂಟಿ ಮ್ಯಾನೇಜರ್ ಜೋಬಿ ಜೋಸ್ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಅಗ್ರಿಲೀಫ್ ಎಕ್ಸ್ಪೋರ್ಟ್ಸ್ ಪ್ರೈವೆಟ್ ಲಿಮಿಟೆಡ್ ನೆತ್ತ ಸಂಸ್ಥಾಪಕೆರ್ ಅವಿನಾಶ್ ರಾವ್, ಸಹ ಸಂಸ್ಥಾಪಕೆರ್ ಅತಿಶಯ ಜೈನ್, ಅಗ್ರಿಲೀಫ್ ನಿರ್ದೇಶೆಕೆರ್ ರಾಗ್ನಿಶ್ ಈ ಪೊರ್ತುಡು ಇತ್ತೆರ್.

ಸೆ.7 : ಶ್ರೀ ಕೃಷ್ಣ ಜನ್ಮಾಷ್ಟಮಿ ಸಮಿತಿದ ಮುತಾಲಿಕೆಡ್ ಮೊಸರು ಕುಡಿಕೆ ಉಚ್ಚಯ

ಮಡಂತ್ಯಾರು: ಶ್ರೀ ಕೃಷ್ಣ ಜನ್ಮಾಷ್ಟಮಿ ಸಮಿತಿ ಸಮಿತಿದ ಮುತಾಲಿಕೆಡ್ 34 ನೇ ವರ್ಷದ ಮೊಸರು ಕುಡಿಕೆ ಉಚ್ಚಯ ಸೆ.7 ಗುರುವಾರ ಮಡಂತ್ಯಾರು ಗಣಪತಿ ಮಂಟಪದ ಚಾವಡಿಡ್ ನಡಪೆರೆ ಉಂಡು.

ಲೇಸ್‌ದ ಉದಿಪನನ್ ಮಡಂತ್ಯಾರು ವರ್ತಕರ ಸಂಘದ ಗುರ್ಕಾರೆರ್ ಬಿ.ಜಯಂತ ಶೆಟ್ಟಿ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಮಡಂತ್ಯಾರು ಗ್ರಾ.ಪಂದ ಗುರ್ಕಾರ್ದಿ ರೂಪ ಎ.ಸ್, ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಕೆದ ನಿವೃತ್ತ ವಿಸ್ತಾರಣಾಧಿಕಾರಿ ಸುರೇಂದ್ರ ಎಸ್, ಪಾಲ್‌ಪಡೆಯೆರೆ ಉಲ್ಲೆರ್.

ಸಮಾರೋಪ ಸಮಾರಂಭದ ಗುರ್ಕಾಮೆನ್ ಬೊಲ್ತೇರ್ ಶಾಸಕೆರ್ ಹರೀಶ್ ಪೂಂಜೆರ್ ವಹಿಸಾಯೆರೆ ಉಲ್ಲೆರ್. ಕುದ್ರೋಳಿ ನಾರಾಯಣ ಗುರು ಕಾಲೇಜುದ ಉಪನ್ಯಾಸಕೆರ್ ಕೇಶವ ಬಂಗೇರ ಧಾರ್ಮಿಕ ಭಾಷಣ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶ್ರೀ ಕ್ಷೇತ್ರ ಪಾರೆಂಕಿದ ಪ್ರಧಾನ ಅರ್ಚಕೆರ್ ಟಿ.ವಿ ಶ್ರೀಧರ ರಾವ್, ಬೆಸ್ಟ್ ಪೌಂಡೇಶನ್‌ದ ಗುರ್ಕಾರೆ ರಕ್ಷಿತ್ ಶಿವರಾಂ, ಬಂಟ್ವಾಳ ಕಾರ್ಯನಿರತ ಪತ್ರಕರ್ತರ ಸಂಘದ ಗುರ್ಕಾರೆ ಪ್ರಶಾಂತ್ ಎಂ ಪುಂಜಾಲಕಟ್ಟೆ, ತಣ್ಣೀರುಪಂತ ರುದ್ರಗಿರಿ ಶ್ರೀ ಮೃತ್ಯುಂಜಯ ದೇವಸ್ಥಾನದ ಗುರ್ಕಾರೆ ಭರತ್ ಕುಮಾರ್ ಕೇರಿ ಈ ಲೇಸ್‌ಡ್ ಪಾಲ್ ಪಡಯೆರೆ ಉಲ್ಲೆರ್.

ನಿವೃತ್ತ ಯೋಧೆರ್ ಮಂಜುನಾಥ ಗೌಡ, ಬೊಲ್ತೇರ್ ಉಪತಹಶೀಲ್ದಾರ್ ಜಯ ಪ್ರವೀಣ್, ನಾಟಿ ವೈದ್ಯರ್ ರಾಧಾಕೃಷ್ಣ, ಉಜಿರೆ ಉರಗ ಪ್ರೇಮಿ ಸ್ನೇಕ್ ಜೋಯಿ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ನಡಪೆರೆ ಉಂಡು.

ರಾತ್ರೆ 8.30 ಗಂಟೆರ್ದ್ ಜಿ.ವಿ ರಾರ‍್ಸ್ ಡ್ಯಾನ್ಸ್ ಅಕಾಡೆಮಿ ಮೊಕ್ಲೆನ ಲೆಕ್ಕಡ್ ನೃತ್ಯ-ಗಾನ-ವೈವಿದ್ಯ ಲೇಸ್ ನಡಪೆರೆ ಉಂಡು.

ಬೇತೆ ಬೇತೆ ಪಂತೋಲಾಯಿನ ಕಂಗ್‌ದ ಮರ ಬರ್ತುನ, ಗೋವಿಂದ ಪಂತೋ, ಕ್ರಾಸ್ ಕಂಟ್ರಿರೇಸ್, ಕರ ದರ್ಪುನ, ಸ್ಲೋ ಸೈಕಲ್ ಬ್ಯಾಲೆನ್ಸ್, ಗೋಣಿ ಚೀಲ ಪಂತೋ, ಶ್ರೀ ಕೃಷ್ಣ ವೇಷ ಸ್ಪರ್ಧೆ, ಪೊಂಜೊವ್ ನಕ್ಲೆಗ್ ರಂಗೋಲಿ ಬುಡ್ ಪಾವುನ ಸ್ಪರ್ಧೆ ನಡಪೆರೆ ಉಂಡು.

ಸೆ.6 : ವಿಶ್ವ ಹಿಂದೂ ಪರಿಷತ್ ಶಿರ್ಲಾಲು ಮುತಾಲಿಕೆಡ್ ಮೊಸರುಕುಡಿಕೆ ಉಚ್ಚಯ

ಶಿರ್ಲಾಲು: ವಿಶ್ವ ಹಿಂದೂ ಪರಿಷತ್ ನೆತ್ತ ಮುತಾಲಿಕೆಡ್ 21 ನೇ ವರ್ಷದ ಮೊಸರು ಕುಡಿಕೆ ಉಚ್ಚಯ ಶಿರ್ಲಾಲು ಗ್ರಾ.ಪಂ ವಠಾರಡ್ ಸೆ.6 ಬುಧವಾರ ನಡಪೆರೆ ಉಂಡು.

ಸಭಾ ಕಾರ್ಯಕ್ರಮದ ಉದಿಪನನ್ ವಿಶ್ವ ಹಿಂದೂ ಪರಿಷತ್ ವೇಣೂರು ಘಟಕದ ಗುರ್ಕಾರೆ ಭಾಸ್ಕರ್ ಎಸ್ ನಡಪಾದ್ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಿರ್ಲಾಲು ಗ್ರಾ.ಪಂ ಮಾಜಿ ಗುರ್ಕಾರೆ ಸಂಜೀವ ದೇವಾಡಿಗ, ಶಿರ್ಲಾಲು ಪ್ರಗತಿಪರ ಕೃಷಿಕೆರ್ ಯುವರಾಜ್ ಮುಡ್ಡಾಲು, ಶಿರ್ಲಾಲು ಗ್ರಾ.ಪಂ ಸದಸ್ಯೆ ಪ್ರಕಾಶ್ ಹೆಗ್ಡೆ, ಪ್ರಗತಿಪರ ಕೃಷಿಕೆ ಗಂಗಾಧರ ಮನಿಲ ಪಾಲ್ ಪಡೆಯೆರೆ ಉಲ್ಲೆರ್.

ಧಾರ್ಮಿಕ ಸಭೆತ ಗುರ್ಕಾರ್ಮೆನ್ ಶಿರ್ಲಾಲು ವಿಶ್ವಹಿಂದೂ ಪರಿಷತ್‌ದ ಗುರ್ಕಾರೆ ಸೋಮನಾಥ ಬಳ್ಳಿದಡ್ಡ ವಹಿಸಾಯೆರೆ ಉಲ್ಲೆರ್. ಧಾರ್ಮಿಕ ಭಾಷಣನ್ ರಾ.ಸ್ವ.ಸೇ.ಸಂಘ ಪುತ್ತೂರು ಕಾರ್ಯಕಾರಿಣಿ ಸದಸ್ಯೆರ್ ಪ್ರಕಾಶ್ ಪುರೋಹಿತ್ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್‌ದ ವಕೀಲೆರ್ ಮುರಳಿ ನೋಟರಿ, ಬೊಂಬೈ ಬೊಕ್ಕ ಊರುದ ಉದ್ಯಮಿ ಸುರೇಶ್ ಪೂಜಾರಿ, ಪಾಲ್ ಪಡೆಯೆರೆ ಉಲ್ಲೆರ್. ಗೌರವ ಉಪಸ್ಥಿತಿಟ್ ಶಿರ್ಲಾಲು ಗ್ರಾ.ಪಂ ದ ಗುರ್ಕಾರ್ದಿ ಉಷಾ ಎಂ ಶೆಟ್ಟಿ, ಸಿ.ಎ ಬ್ಯಾಂಕ್ ಗುರ್ಕಾರೆರ್ ನವೀನ್ ಸಾಮಾನಿ, ಶಿರ್ಲಾಲು ಹಾಲು ಉತ್ಪಾದಕರ ಸಂಘದ ಗುರ್ಕಾರೆರ್ ಮಾಧವ, ಶಿರ್ಲಾಲು ಗ್ರಾ.ಪಂ ಅಭಿವೃದ್ಧಿ ಅಧಿಕಾರಿ ರಾಜು, ಶಿರ್ಲಾಲು ಶ್ರೀ ರಾಮ್ ಫ್ರೆಂಡ್ಸ್ ದ ಗುರ್ಕಾರೆರ್ ಹರೀಶ್ ಮಿತ್ತಬೆಟ್ಟು ಪಾಲ್ ಪಡೆಯೆರೆ ಉಲ್ಲೆರ್.

ಸಾಮಾಜಿಕ ಕಾರ್ಯಕರ್ತೆರಾಯಿನ ಗಿರೀಶ್ ಕಟ್ಟ ಬೊಕ್ಕ ಜಗನ್ನಾಥ್ ಅತ್ಯಾಜೆ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ನಡಪರೆ ಉಂಡು.

ಮುಗಿತಲದ ಲೇಸ್ ದ ಗುರ್ಕಾರ್ಮೆನ್ ಕರಂಬಾರು ಹಳೆಬೀಡುದ ಪ್ರಶಾಂತ್ ಶೆಟ್ಟಿ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಿರ್ಲಾಲು ಭಜರಂಗದಳತ ಗುರ್ಕಾರೆರ್ ಸುಂದರ ಊರ, ಕುಶಾಲಪ್ಪ ಗೌಡ ಕಲ್ಲಂದಡ್ಡ, ಶಿರ್ಲಾಲು ಆಟೋ ಚಾಲಕ&ಮಾಲಕ ಸಂಘದ ಗುರ್ಕಾರೆರ್ ಜಗನ್ನಾಥ್ ಆಂತ್ರOಗೆ, ಶಿರ್ಲಾಲು ಶಾಲಾಭಿವೃದ್ಧಿ ಸಮಿತಿ ಗುರ್ಕಾರೆರ್ ಅಶೋಕ್ ಕುಲಾಲ್, ಆರುಷ್ ಚಿಕನ್ ಸೆಂಟರ್‌ದ ಲೋಕೇಶ್ ಪಾಲ್ ಪಡಯೆರೆ ಉಲ್ಲೆರ್.

ಪೊಂಜೊವ್ ನಕ್ಲೆಗ್, ಜೊಕ್ಲೆಗ್ ಬೊಕ್ಕ ಆಂಜೋವ್ ನಕ್ಲೆಗ್ ವಿವಿಧ ಪಂತೊಲು ನಡಪೆರೆ ಉಂಡು. ಶಿರ್ಲಾಲು, ಕರಂಬಾರು ಶಾಲೆದ ಜೋಕ್ಲೆಗ್ ಭಗವದ್ಗೀತೆ ಬಾಯಿಪಾಠ ಪಂತೊ, ಮಧ್ಯಾಹ್ನ 1 ಗಂಟೆರ್ದ್ “ಸತ್ವಪರೀಕ್ಷೆ” ಯಕ್ಷಗಾನ ತಾಳಮದ್ದಳೆ ನಡಪರೆ ಉಂಡು.

ಮದ್ದಡ್ಕ: ಅಷ್ಟೆಮಿದ ಲೆಕ್ಕಡ್ ಮೊಸರು ಕುಡಿಕೆ ಉತ್ಸವ

ಬೊಲ್ತೇರ್: ಶ್ರೀ ರಾಮ ಸೇವಾ ಸಮಿತಿ ಮದ್ದಡ್ಕ ಬೊಕ್ಕ ವಿಶ್ವ ಹಿಂದೂ ಪರಿಷತ್, ಭಜರಂಗ ದಳ ನೆತ್ತ ಒಟ್ಟು ಸೇರಿಗೆಡ್ ಶ್ರೀ ಕೃಷ್ಣ ಜನ್ಮಾಷ್ಟಮಿದ ಲೆಕ್ಕಡ್ ಮೊಸರು ಕುಡಿಕೆ ಉತ್ಸವ ಸೆ.6 ದಾನಿ ಶ್ರೀ ರಾಮ ಭಜನಾ ಮಂದಿರದ ವಠಾರ ಮದ್ದಡ್ಕ ಮೂಲು ನಡಪೆರೆ ಉಂಡು.

ಲೇಸ್‌ದ ಉದಿಪನನ್ ಶ್ರೀ ಕ್ಷೇತ್ರ ಓಡೀಲುದ ಪ್ರಧಾನ ಅರ್ಚಕೆರ್ ವೇದಮೂರ್ತಿ ಯಂ ರಘುರಾಮ ಭಟ್ ಮಠ ಮೇರ್ ನಡಪಾದ್ ಕೊರಿಯೆರೆ ಉಲ್ಲೆರ್. ಮಾಜಿ ಶಾಸಕೆರ್ ಪ್ರಭಾಕರ ಬಂಗೇರ ಗುರ್ಕಾಮೆನ್ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್ ದ ಶಾಸಕೆರ್ ಹರೀಶ್ ಪೂಂಜ, ಯೂನಿಯನ್ ಬ್ಯಾಂಕ್ ಮದ್ದಡ್ಕ ಶಾಖೆದ ಮುಖ್ಯ ಪ್ರಬಂಧಕೆರ್ ಸುಧೀರ್ ನಾಯ್ಕ್ ಪಾಲ್ ಪಡಯೆರೆ ಉಲ್ಲೆರ್. ಗುರುವಾಯನಕೆರೆ ಪ್ರೌಢಶಾಲೆದ ಸಹ ಶಿಕ್ಷಕೆರ್ ಯೋಗೀಶ್ ನಾಯಕ್ ಧಾರ್ಮಿಕ ಭಾಷಣ ಮಲ್ಪೆರೆ ಉಲ್ಲೆರ್.

ನಿವೃತ್ತ ಕೇಂದ್ರ ಸರಕಾರಿ ನೌಕರೆರ್ ವಿಠಲ್ ಶೆಟ್ಟಿ ಉಪ್ಪಡ್ಕ ಮೇರೆಗ್ ಈ ಲೇಸ್‌ಡ್ ಮಾನಾದಿಗೆ ನಡಪೆರೆ ಉಂಡು.

ಬೊಲ್ಪುಗು 8 ಗಂಟೆಗ್ ಶ್ರೀ ರಾಮ ಭಜನಾ ಮಂದಿರಡ್ ಪೂಜೆ, 9 ಗಂಟೆಗ್ ಜೊಕ್ಲೆಗ್ ಬೊಕ್ಕ ಸಾರ್ವಜನಿಕೆರೆಗ್ ಗೊಬ್ಬುಲೆದ ಪಂತೋ, ಜೊಕ್ಲೆಗ್ ಮುದ್ದು ಕೃಷ್ಣ ಸ್ಪರ್ಧೆ, ಬಯ್ಯಗ್ 4 ಗಂಟೆಗ್ ಧಾರ್ಮಿಕ ಸಭೆ, 6 ಗಂಟೆಗ್ ಓಡೀಲು ಮಹಾಲಿಂಗೇಶ್ವರ ಭಜನಾ ಮಂಡಳಿದ ಲೆಕ್ಕಡ್ ವಿಶೇಷ ಭಜನಾ ಕಾರ್ಯಕ್ರಮ ನಡಪೆರೆ ಉಂಡು.

ಆ.30: ಸೌತಡ್ಕ ಶ್ರೀ ಮಹಾಗಣಪತಿ ದೇವಳ್ಯಡ್ 12 ತಾರಾಯಿದ ಗಣಹೋಮ ಬೊಕ್ಕ ಚಂಡಿಕಾ ಹೋಮ

ಕೊಕ್ಕಡ; ಸೌತಡ್ಕ ಶ್ರೀ ಮಹಾಗಣಪತಿ ದೇವಸ್ಥಾನಡ್ 12 ತಾರಾಯಿದ ಗಣಹೋಮ ಬೊಕ್ಕ ಚಂಡಿಕಾ ಹೋಮ ಆ.30 ದಾನಿ ಬೊಲ್ಪುಗು 10.30ಕ್ಕ್ ಬ್ರಹ್ಮಶ್ರೀ ವೇದಮೂರ್ತಿ ಕೆಮ್ಮಿಂಜೆ ನಾಗೇಶ್ ತಂತ್ರಿಲೆನ ನೇತೃತ್ವಡ್ ನಡಪೆರೆ ಉಂಡು ಪಂದ್ ತೆರಿಪಾದೆರ್.

ಈ ಪುಣ್ಯ ಕಾರ್ಯಡ್ ಭಗವದ್ ಭಕ್ತೆರ್ ಪಾಲ್ ಪಡೆದ್, ಪ್ರಸಾದ ಸ್ವೀಕಾರ ಮಲ್ತ್, ದೇವೆರ್ನ ಅನುಗ್ರಹ ಪಡೆಯೊನೊಡು ಪಂದ್ ದೇವಳ್ಯದ ವ್ಯವಸ್ಥಾಪನಾ ಸಮಿತಿದ ಗುರ್ಕಾರೆ, ಸರ್ವ ಸದಸ್ಯೆರ್ ಬೊಕ್ಕ ಕಾರ್ಯನಿರ್ವಾಹಣಾಧಿಕಾರಿ ಪ್ರಕಟನೆಡ್ ತೆರಿಪಾದೆರ್.

ಸೌಜನ್ಯಗ್ ನ್ಯಾಯ ತಿಕ್ಕರೆ ಬೊಲ್ತೇರ್ ಡ್ ಮಹಾಧರಣಿ

ಸೌಜನ್ಯನ ಅತ್ಯಾಚಾರ, ಕೊಲೆ ಕೇಸ್ ಬೊಕ್ಕ ಧರ್ಮಸ್ಥಳದ ಸುತ್ತಮುತ್ತ ನಡತ್ತಿನ ಅಸಹಜ ಸರಣಿ ಸಾವುಲೆನ್ ವಿರೋಧಿಸಾದ್ ಅಂಚೆನೆ ಸೌಜನ್ಯ ಕೇಸ್ ನ್ ಪಿರ ತನಿಖೆಗ್ ಆದೇಶ ಮಲ್ಪೊಡು ಪಂದ್ ಬೊಲ್ತೆರ್ ಚಲೋ ಕಾರ್ಯಕ್ರಮ ಆ.28 ಗು ನಡತ್ಂಡ್.

ಸೌಜನ್ಯಾ ಕೇಸ್ ನ್ SIT ತನಿಖೆಗೆ ವಹಿಸಾದ್ ಕೊರೊಡು ಪಂದ್ ಪ್ರತಿಭಟನಾಕಾರೆರ್ ಒತ್ತಾಯ ಮಲ್ತೆರ್.

ಈ ಪೊರ್ತುಡು ಪಾತೆರ್ನ ಮಾಜಿ ಶಾಸಕೆರ್ ವಸಂತ ಬಂಗೇರ , ಕೇಸ್ ನ್ ಸಿಬಿಐಗ್ ಕೊರಂದೆ ಯಾನ್ ಬೊಲ್ತೇರ್ ಗ್ ಬರ್ಪುಜಿ ಪಂದ್ ಸದನಡ್ ಪಂದ್ ಇತ್ತೆ. ಅಪಗ ಎನನ್ ಲೆತ್ತ್ ದ್ ಸಿಎಂ ಸಿದ್ದರಾಮಯ್ಯಯೆರ್ ಒಂಜರೆ ಗಂಟೆ ಪಾತೆರ್ದೆರ್. ಅಪಗ ಸಿಎಂ ನೇರವಾದ್ ಬತ್ ದ್ ಸಿಬಿಐ ತನಿಖೆಗ್ ಆದೇಶ ಕೊರ್ತೆರ್. ಅಪಗ ಕಾಂಗ್ರೆಸ್ ಸರ್ಕಾರ ಇತ್ತ್ಂಡ್ . 6 ತಿಂಗೊಲ್ ಸರಿಯಾದ್ ತನಿಖೆ ಆವೊಂದು ಇತ್ತ್ಂಡ್. ಅಪಗ ಮುರುಗನ್ ಪನ್ಪುನ ಅಧಿಕಾರಿ ಇತ್ತೆರ್. ಬೊಕ್ಕ ಕಾಂಗ್ರೆಸ್ ಸರ್ಕಾರ ಪೋಂಡು. ಮೋದಿ ಸರ್ಕಾರ ಬತ್ತ್ಂಡ್. ಅಲ್ಪರ್ದ್ ತನಿಖೆ ಮದೆಕ್ಕ್ ಪೋಂಡು ಪಂದ್ ವಸಂತ ಬಂಗೇರ ಪಂಡೆರ್.

ಕಾರ್ಲದ ಸುನಿಲ್ ಕುಮಾರ್ ಶಾಸಕೆರ್ ಅಂಚೆನೆ ಮಂತ್ರಿ ಆದ್ ಇತ್ತೆರ್. ಸದನ ಡ್ ದಾಯೆ ಸೌಜನ್ಯ ಪ್ರಕರಣ ವಿಷಯ ದೆತ್ತಿಜೆರ್ ? ದಾನೆ ಸುನಿಲ್ ಕುಮಾರ್ ಪಂತಿ ಕಡ್ಪೆರೆ ಪೋದಿತ್ತೆರಾ?? ಪಂದ್ ಬಂಗೇರ ಸುನಿಲ್ ಕುಮಾರ್ ಗ್ ಪಂಡೆರ್. ಒಟ್ಟಿಗೆ ಹರೀಶ್ ಪೂಂಜಾ ಕೂಡಾ ಸದನ ಡ್ ಏಪಲ ಪ್ರಸ್ತಾಪ ಮಲ್ತಿಜೆರ್ ಪಂದ್ ಕೋಪ ತೋಜಾದೆರ್.

ಈ ಮಹಾ ಧರಣಿದ ನೇತೃತ್ವನ್ ಬೊಲ್ತೆರ್ ದ ಮಾಜಿ ಶಾಸಕೆರ್ ವಸಂತ ಬಂಗೇರ ವಹಿಸಾದ್ ಇತ್ತೆರ್. ಪ್ರಗತಿಪರ ಸಂಘಟನೆಲು ಬೊಕ್ಕ ಒಡನಾಡಿ ನಿರ್ದೇಶಕರಾಯಿನ ಸ್ಟ್ಯಾನ್ಲಿ, ಪರಶುರಾಮ , ಸಿಐಟಿಯು ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಸುನಿಲ್ ಕುಮಾರ್, ಸಾಹಿತಿ ಬೊಕ್ಕ ಕಾಮ್ರೇಡ್ ನೀಲಾ, ಛಲವಾದಿ ಸಂಘಟನೆ ನಾಯಕಿ ಮೀನಾಕ್ಷಿ, ಮುನೀರ್ ಕಾಟಿಪಳ್ಳ, ಸುರೇಂದ್ರ ರಾವ್, ಮಹಿಳಾ ಚಳವಳಿ ನಾಯಕಿ ಸಂಗಾತಿ ಗೌರಮ್ಮ, ರೈತ ಸಂಘ ಮುಖಂಡ ಭರತ್ ರಾಜ್, ಪತ್ರಕರ್ತ ವಿಠಲ್ ಮಲೆಕುಡಿಯ, ಸಿಪಿಐ ನಾಯಕೆರ್, ಪ್ರಭಾ ಬೆಳವಂಗಳ, ವಿಚಾರವಾದಿ ನರೇಂದ್ರ ನಾಯಕ್, ಬೆಂಗಳೂರು ವಿವಿ ದ ಮಾಜಿ ಸೆನೆಟ್ ಸದಸ್ಯೆ ಲಕ್ಷ್ಮೀ, ಸಬೀಹಾ ಭೂಮಿಗೌಡ, ಪ್ರಗತಿಪರ ಸಂಘಟನೆಲು, ಹೈ ಕೋರ್ಟ್ ವಕೀಲೆರ್ ಶ್ರೀನಿವಾಸ್, ಬಿ.ಎಂ.ಭಟ್ ಈ ಬೃಹತ್ ಚಳವಳಿಗ್ ಬೆಂಬಲ ಕೊರ್ದಿ ತ್ತೆರ್.

ಸೌಜನ್ಯಗ್ ನ್ಯಾಯ ಕೊರಂದೆ ಬುಡ್ಪುಜ : ಬಿ.ಎಂ.ಭಟ್

ಸೌಜನ್ಯ ಪರವಾದ್ ಹೋರಾಟ ಮಲ್ತ್ಂಡ ಕ್ಷೇತ್ರಗ್ ಅವಮಾನ ಆಪುಂಡು ಪನ್ಪುನ ಪಾತೆರಗ್ ವಿರೋಧ ಮಲ್ತಿನ ಹೋರಾಟಗಾರೆರ್ ಬಿ.ಎಂ. ಭಟ್ ಪಾತೆರ್ದ್,ನಮ ಸೌಜನ್ಯಗ್ ನ್ಯಾಯ ಕೊರಂದೆ ಬುಡ್ಪುಜ ಪಂದ್ ಪಂಡೆರ್.

ಆ.27 ಬೊಲ್ತೆರ್ ಡ್ ಎಸ್.ಡಿ.ಸಿ.ಸಿ ಬ್ಯಾಂಕ್ ದ ಪೊಸ ಎ.ಟಿ.ಎಂ ಉದಿಪನ

ಬೊಲ್ತೆರ್: ಎಸ್‌ಡಿಸಿಸಿ ಬ್ಯಾಂಕ್ ಬೊಲ್ತೆರ್ ಶಾಖಾ ಕಟ್ವಾನಡ್ ಪೊಸ ಎಟಿಎಂ ಉದಿಪನ ಬೊಕ್ಕ ಪೊಸ ಲಿಪ್ಟ್ ದ ಉದಿಪನ ಲೇಸ್ ಆ.27 ದಾನಿ ಬ್ಯಾಂಕ್‌ದ ಸಭಾಭವನಡ್ ನಡಪೆರೆ ಉಂಡು.

ಪೊಸ ಎಟಿಎಂ ದ ಉದಿಪಿನನ್ ಬೊಲ್ತೆರ್ ಶಾಸಕೆರ್ ಹರೀಶ್ ಪೂಂಜ ನಡಪಾದು ಕೊರಿಯೆರೆ ಉಲ್ಲೆರ್. ಪೊಸ ಲಿಪ್ಟ್ ದ ಉದಿಪನನ್ ವಿಧಾನ ಪರಿಷತ್ ಶಾಸಕೆರ್ ಕೆ ಹರೀಶ್ ಕುಮಾರ್ ನಡಪಾದ್ ಕೊರಿಯೆರೆ ಉಲ್ಲೆರ್. ಸಭಾ ಕಾರ್ಯಕ್ರಮದ ಗುರ್ಕಾಮೆನ್ ದ.ಕ. ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್‌ದ ಗುರ್ಕಾರೆ ಡಾ. ಎಂ.ಎನ್ ರಾಜೇಂದ್ರ ಕುಮಾರ್ ವಹಿಸೊನಿಯೆರೆ ಉಲ್ಲೆರ್.

ಈ ಪೊರ್ತುಡು ಸಂಘದ ಉಪಾಧ್ಯಕ್ಷೆರ್ ವಿನಯ ಕುಮಾರ್ ಸೂರಿಂಜೆ, ಪ್ರಭಾರ ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿ ಕೆ ಗೋಪಾಲಕೃಷ್ಣ ಭಟ್, ಬೊಕ್ಕ ಸಂಘದ ಮಾತ ನಿರ್ದೇಶೆಕೆರ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಪ್ರಕಟನೆಡ್ ತೆರಿಪಾದೆರ್.

ನ್ಯೂ ಫ್ರೆಂಡ್ಸ್ ಸ್ಪೋರ್ಟ್ ಕ್ಲಬ್; ಸಾರ್ವಜನಿಕ ಮೊಸರು ಕುಡಿಕೆ ಉತ್ಸವ

ಬಳ್ಳಮಂಜ: ನ್ಯೂ ಫ್ರೆಂಡ್ಸ್ ಕ್ಲಬ್ ಬಳ್ಳಮಂಜ ನೆತ್ತ ಮುತಾಲಿಕೆಡ್ ಅಷ್ಟೆಮಿದ ಲೆಕ್ಕಡ್ ಸಾರ್ವಜನಿಕ ಮೊಸರು ಕುಡಿಕೆ ಉತ್ಸವ ಸೆ.6 ದಾನಿ ಬುಧವಾರ ಬಳ್ಳಮಂಜ ಸಾರ್ವಜನಿಕ ಕ್ರೀಡಾಂಗಣಡ್ ನಡಪರೆ ಉಂಡು.

ಲೇಸ್‌ದ ಉದಿಪನನ್ ಶ್ರೀ ಕ್ಷೇತ್ರ ಬಳ್ಳಮಂಜದ ಅರ್ಚಕೆರ್ ಸುನಿಲ್ ಮುಚ್ಚಿನಾಯ ವಹಿಸಾಯೆರೆ ಉಲ್ಲೆರ್. ಬಳ್ಳಮಂಜ ನ್ಯೂ ಫ್ರೆಂಡ್ಸ್ ಸ್ಪೋರ್ಟ್ಸ್ ಕ್ಲಬ್ ದ ಗುರ್ಕಾರೆ ಪ್ರೇಮನಾಥ ಲೇಸ್‌ದ ಗುರ್ಕಾಮೆನ್ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಮಚ್ಚಿನ ಗ್ರಾ,ಪಂ ದ ಗುರ್ಕಾರ್ದಿ ರುಕ್ಮಿಣಿ, ಮಚ್ಚಿನ ಸ.ಪ್ರೌ. ಶಾಲೆದ ಮುಖ್ಯೋಪಾಧ್ಯಾಯೆರ್ ಎಸ್.ಪ್ರಕಾಶ್ ನಾಯ್ಕ್, ಸ.ಪ್ರಾ.ಶಾಲೆದ ಪ್ರಭಾರ ಮುಖ್ಯ ಶಿಕ್ಷಕೆರ್ ಆಗ್ನೇಸ್ ಪ್ರವೀಳಾ ಲೋಬೊ ಈ ಲೇಸ್‌ಡ್ ಪಾಲ್ ಪಡೆಯೆರೆ ಉಲ್ಲೆರ್.

ಮುಗಿತಲದ ಸಮಾರಂಭದ ಗುರ್ಕಾರ್ಮೆನ್ ನ್ಯೂ ಫ್ರೆಂಡ್ಸ್ ಸ್ಪೋರ್ಟ್ಸ್ ಕ್ಲಬ್ ದ ಗುರ್ಕಾರೆ ಪ್ರೇಮನಾಥ ವಹಿಸಾಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶಾಸಕೆರ್ ಹರೀಶ್ ಪೂಂಜ, ಬೆಸ್ಟ್ ಫೌಂಡೇಶನ್ ದ ಗುರ್ಕಾರೆ ರಕ್ಷಿತ್ ಶಿವರಾಮ್, ಮಡಂತ್ಯಾರು-ಪುಂಜಾಲಕಟ್ಟೆ ವರ್ತಕರ ಸಂಘದ ಗುರ್ಕಾರೆ ಜಯಂತ್ ಶೆಟ್ಟಿ, ಬ್ಲಾಕ್ ಕಾಂಗ್ರೆಸ್ ಸಮಿತಿದ ಗುರ್ಕಾರೆ ನಾಗೇಶ್ ಗೌಡ, ಮಚ್ಚಿನ ಗ್ರಾ.ಪಂ ದ ಮಾಜಿ ಗುರ್ಕಾರೆ, ಸಾರ್ವಜನಿಕ ಗಣೇಶೋತ್ಸವದ ಗುರ್ಕಾರೆ ಪ್ರಮೋದ್ ಕುಮಾರ್, ಹಿಂದುಳಿದ ವರ್ಗದ ಕಲ್ಯಾಣ ಇಲಾಖೆದ ನಿವೃತ ವಿಸ್ತಾರಣಾಧಿಕಾರಿ ಲ| ಸುರೇಂದ್ರ ಎಸ್, ಮಚ್ಚಿನ ಗ್ರಾ.ಪಂ ಮಾಜಿ ಗುರ್ಕಾರೆ ಚಂದ್ರಕಾಂತ ನಿಡ್ಡಾಜೆ, ಸೃಷ್ಟಿ ಕನ್ಸ್ ಸ್ಟಕ್ಷನ್& ಕನ್ಸಲ್ಟಿಂಗ್ ಇಂಜಿನಿಯರ್ ಯತೀಶ್ ರೈ ಕೈಲ, ಎಂ.ಆರ್ ಸುಪಾರಿ ಬಿ. ಹೈದರ್, ದೈವ ನರ್ತಕೆರ್ ಪ್ರಶಾಂತ್, ಬ್ಯಾಂಕ್ ಆಫ್ ಬರೋಡದ ಜಯರಾಮ್ ಕುಲಾಲ್, ಅಶ್ರಫ್ ಸಾಲುಮರ, ಜೆಸಿಐ ದ ವಲಯ ನಿರ್ದೇಶಕೆರ್ ಜೆ.ಸಿ ವಿನಿತ್ ಜೋಗಿತ್ತಾಯ ಬಳ್ಳಮಂಜ, ಮಚ್ಚಿನ ಎಸ್.ಡಿ.ಎಮ್.ಸಿ ದ ಕಾರ್ಯಾಧ್ಯಕ್ಷೆರ್ ರುಕ್ಮಯ ಕುಲಾಲ್ ಲೇಸ್‌ಡ್ ಪಾಲ್ ಪಡೆಯೆರೆ ಉಲ್ಲೆರ್.

ಲೇಸ್ ಡ್ ಎಸ್.ಎಸ್.ಎಲ್.ಸಿ ಡ್ ಎಚ್ಚ ಮಾರ್ಕ್ ದೆತ್ತಿನ ಅಪ್ನಾನ್ ಬೊಕ್ಕ ರಚನಾ ಅಂಚನೆ ರಾಜ್ಯ ಮಟ್ಟದ ಕ್ರೀಡಾಕೂಟಡ್ ಪ್ರಶಸ್ತಿ ಪಡೆನ ಪುನೀತ್ ಕುಮಾರ್ ಬೊಕ್ಕ ಧನ್ಯ ಮೊಕ್ಲೆಗ್ ಮಾನಾದಿಗೆ ಮಲ್ಪೆರೆ ಉಂಡು.

ಆಂಜೊವ್ ನಕ್ಲೆಗ್ ಬೈಕ್ ರೇಸ್, ಮೈಲ್ ರೇಸ್, ಗೋವಿಂದ ಸ್ಪರ್ಧೆ, ಹಗ್ಗಜಗ್ಗಾಟ ಸ್ಪರ್ಧೆ, ಪೊಂಜೊವ್ ನಕ್ಲೆಗ್ ಹಗ್ಗಜಗ್ಗಾಟ, ತ್ರೋಬಾಲ್, ಸಂಗೀತ ಕುರ್ಚಿ, ಗುಂಡು ಎಸೆತ, ಮಡಕೆ ಹಾಕುನ, ಜೊಕ್ಲೆಗ್ 3 ವರ್ಷರ್ದ್ 5 ವರ್ಷದ ಉಲಾಯಿದ ಜೋಕುಲೆಗ್ ಕೃಷ್ಣ ವೇಷ ಸ್ಪರ್ಧೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.