ಬೊಲ್ತೆರ್ ಸುದ್ದಿ | Belthangady News

ಉಜಿರೆ: ಪಾಲಿಟೆಕ್ನಿಕ್ ಕಲ್ಪಾರ್ಥಿಲೆಗ್‌ ವಾಲಿಬಾಲ್ ಬೊಕ್ಕ ಕಬಡ್ಡಿ ಪಂದ್ಯಾಟ

ಉಜಿರೆ: ಪಾಲಿಟೆಕ್ನಿಕ್ ಕಲ್ಪಾರ್ಥಿಲೆಗ್ ಒಡಿಪು ಬೊಕ್ಕ ದಕ್ಷಿಣ ಕನ್ನಡ ಮಟ್ಟದ ಪಾಲಿಟೆಕ್ನಿಕ್ ಆಂಜೊಕ್ಲೆಗ್ ವಾಲಿಬಾಲ್ ಬೊಕ್ಕ ಕಬಡ್ಡಿ ಪಂದ್ಯಾಟ ಆಯೋಜನೆ ಮಲ್ತ್‌ದ್‌ ಉಂದುವೆ ಅಕ್ಟೋಬರ್ 4 ಕ್ಕ್ ವಾಲಿಬಾಲ್ ಬೊಕ್ಕ 6 ಕ್ಕ್ ಕಬಡ್ಡಿ ಪಂದ್ಯಾಟ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಪಾಲಿಟೆಕ್ನಿಕ್ ಕ್ಯಾಂಪಸ್‌ಡ್‌ ನಡಪೆರೆ ಉಂಡು.

ವಾಲಿಬಾಲ್ ಪಂದ್ಯಾಟದ ಉದಿಪನನ್ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆ ಬಂದಾರು ಶಾಲೆದ ವಾಲಿಬಾಲ್ ಕೋಚ್ ಪ್ರಶಾಂತ್ ಸುವರ್ಣ ಮಲ್ಪೆರೆ ಉಲ್ಲೆರ್. ಕಬಡ್ಡಿ ಪಂದ್ಯಾಟನ್ ರಾಷ್ಟ್ರ ಮಟ್ಟಡ್ ಕರ್ನಾಟಕ ತಂಡನ್ ಪ್ರತಿನಿಧಿಸಾಯಿನ ತ್ಯಾಗರಾಜ್ ಉದಿಪನ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಶ್ರೀ ಧರ್ಮಸ್ಥಳ ಶಿಕ್ಷಣ ಸಂಸ್ಥೆದ ಕಾರ್ಯದರ್ಶಿ ಸತೀಶ್ಚಂದ್ರ, ಲಕ್ಷ್ಮಿ ಗ್ರೂಪ್ಸ್ ದ ಧಣಿ ಮೋಹನ್ ಕುಮಾರ್, ಅಮೃತ್ ಟೆಕ್ಸ್ಟ್ ಟೈಲ್ಸ್ ಧಣಿ ಪ್ರಶಾಂತ್, ಧರ್ಮಸ್ಥಳ ಶಿಕ್ಷಣ ಸಂಸ್ಥೆದ ವಿದ್ಯಾರ್ಥಿ ಕ್ಷೇಮ ಪಾಲನಾ ಅಧಿಕಾರಿಲಾಯಿನ ಸೋಮಶೇಖರ್ ಶೆಟ್ಟಿ, ಯುವರಾಜ್ ಜೈನ್, ಶ್ರೀ ಧರ್ಮಸ್ಥಳ ಶಿಕ್ಷಣ ಸಂಸ್ಥೆದ ಕಬಡ್ಡಿ ಕೋಚ್ ಕೃಷ್ಣಾನಂದ್ ರಾವ್, ವಾಲಿಬಾಲ್ ಕೋಚ್ ಸುದಿನ್ ಪಾಲ್‌ ಪಡೆಯೆರೆ ಉಲ್ಲೆರ್.

ಬೋಲ್ತೆರ್ ತಾಲೂಕು ಪಂಚಾಯತ್ ಜಮಾಬಂದಿ ಕಾರ್ಯಕ್ರಮ‌

ಬೋಲ್ತೆರ್: ದ.ಕ.ಜಿಲ್ಲಾ ಪಂಚಾಯತ್ ಕುಡ್ಲ, ತಾಲೂಕು ಪಂಚಾಯತ್ ಬೋಲ್ತೆರ್ ನೆತ್ತ 2022-23 ನೇ ಸಾಲ್‌ದ ವಾರ್ಷಿಕ ಜಮಾಬಂದಿ ಕಾರ್ಯಕ್ರಮ ಸೆ.30 ದಾನಿ ತಾಲೂಕು ಪಂಚಾಯತ್ ಸಭಾಂಗಣಡ್‌ ನಡತ್‌ಂಡ್. ಜಮಾಬಂದಿ ನೋಡೆಲ್ ಅಧಿಕಾರಿಯಾದ್ ದ.ಕ.ಜಿ.ಪ.ಮುಖ್ಯ ಯೋಜನಾಧಿಕಾರಿ ಸಂಧ್ಯಾ ಕೆ.ಎಸ್ ಮಾಹಿತಿಲೆನ್‌ ಕೊರಿಯೆರ್.
ತಾಲೂಕು ಪಂಚಾಯತ್ ಕಾರ್ಯನಿರ್ವಾಹಣಾಧಿಕಾರಿ ಬಿ.ಕುಸುಮಾಧರ, ಸಹಾಯಕ ಕಾರ್ಯಪಾಲ ಅಭಿಯಂತರ ನಿತಿನ್, ತಾಲೂಕು ಮಟ್ಟದ ಬೇತೆ ಬೇತೆ ಇಲಾಖೆಗಳ ಅಧಿಕಾರಿಲು, ತಾಲೂಕು ಪಂಚಾಯತ್ ಸಿಬ್ಬಂದಿಲು, ತಾಲೂಕು ಪಂಚಾಯತ್ ಗಣೇಶ್ ಪೂಜಾರಿ, ಮೆನೇಜರ್ ಪ್ರಶಾಂತ್ ಡಿ., ಅಶೋಕ ದೇವಾಡಿಗ ಸಿಬ್ಬಂದಿಲು ಈ ಪೊರ್ತುಡು ಇತ್ತೆರ್.

ನೆಲ್ಯಾಡಿಡ್ ಬೋಲ್ತೆರ್ ಸಿರಿಯನ್ ಕ್ಯಾಥೋಲಿಕ್ ವಿವಿಧೋದ್ದೇಶ ಸಹಕಾರ ಸಂಘದ ಶಾಖೆ ಉದಿಪನ

ನೆಲ್ಯಾಡಿ: ಬೋಲ್ತೆರ್ ಬಸ್‌ ನಿಲ್ದಾಣದ ಎದುರು ಸಾಂತೋಮ್ ಟವರ್‌ದ ಸುರುತ್ತ ಮಾಲಿಗೆಡ್ ಕರಿನ 13ವರ್ಷದ ಪಿರಾಕ್‌ ಸಂಸ್ಥೆ ಉದಿಪನ ಆದ್‌ ಕಾರ್ಯಚರಣೆ ಮಲ್ತೊಂದು ಇಪ್ಪುನ ಸಿರಿಯನ್ ಕ್ಯಾಥೋಲಿಕ್ ವಿವಿಧೋದ್ದೇಶ ಸಹಕಾರ ಸಂಘದ ನೆಲ್ಯಾಡಿಡ್ ತನ್ನ ರಡ್ಡನೇ ಶಾಖೆ ಸೆ.30 ದಾನಿ ನೆಲ್ಯಾಡಿ ತೋಮ್ಸನ್ ಕಾಂಪ್ಲೆಕ್ಸ್ ಡ್‌ ಉದಿಪನ ಆಂಡ್. ಬೋಲ್ತೆರ್ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷ ಅತೀ ವಂದನೀಯ ಬಿಷಪ್ ಲಾರೆನ್ಸ್ ಮುಕ್ಕುಯಿ ಆಶೀರ್ವಚನ ಮಲ್ತೆರ್.‌ ಕೌಕ್ರಾಡಿ ಗ್ರಾಮ ಪಂಚಾಯತ್ ಗುರ್ಕಾರ್ಲು ಲೋಕೇಶ್ ಬಾಂಜಾಲು ಕಚೇರಿದ ಉದಿಪನ ಮಲ್ತೆರ್.‌
ಸಿರಿಯನ್ ಕ್ಯಾಥೋಲಿಕ್ ವಿವಿಧೋದ್ದೇಶ ಸಹಕಾರ ಸಂಘದ ಗುರ್ಕಾರ್ಲು ಅನಿಲ್‌ ಎ.ಜೆ ಗುರ್ಕಾರ್ಮೆನ್‌ ವಹಿಸ್‌ದ್‌ ಇತ್ತೆರ್. ಗಣಕ ಯಂತ್ರದ ಉದಿಪನನ್ ನೆಲ್ಯಾಡಿ ಸೈಂಟ್ ಅಲ್ಫೋನ್ಸ ಚರ್ಚ್ ಧರ್ಮಗುರು ರೆ.ಫಾ.ಶಾಜಿ ಮ್ಯಾಥ್ಯು ವೆಟ್ಟಂತಡತ್ತಿಲ್ ಮಲ್ತೆರ್.ನೆಲ್ಯಾಡಿ ಗ್ರಾ.ಪಂ. ಗುರ್ಕಾರ್ಲು ಸಲಾಮ್ ಚಿಲಾಲ್ ಭದ್ರತಾ ಕೋಶದ ಉದಿಪನ, ಸಿರಿಯನ್ ಕ್ಯಾಥೋಲಿಕ್ ವಿವಿಧೋದ್ದೇಶ ಸಹಕಾರ ಸಂಘ ಉಪಾಧ್ಯಕ್ಷೆರ್ ಜಾರ್ಜ್ ಎಮ್.ವಿ. ನಿರಖು ಠೇವಣಿ ಸರ್ಟಿಫಿಕೇಟ್ ವಿತರಣೆ, ಸಿರಿಯನ್ ಕ್ಯಾಥೋಲಿಕ್ ವಿವಿಧೋದ್ದೇಶ ಸಹಕಾರ ಸಂಘದ ಮಾಜಿ ಗುರ್ಕಾರ್ಲು ಬೊಕ್ಕ ಹಾಲಿ ನಿರ್ದೇಶಕೆರ್ ಸೆಬಾಸ್ಟಿನ್ ವಿ.ಟಿ ಷೇರು ಸರ್ಟಿಫಿಕೇಟ್ ವಿತರಣೆ, ಕುಟ್ರಪ್ಪಾಡಿ ಸೈಂಟ್ ಮೇರೀಸ್ ಫೊರೋನಾ ಚರ್ಚ್ ಧರ್ಮಗುರು ರೆ.ಫಾ.ವರ್ಗೀಸ್ ಪುದಿಯಡತ್ ಉಳಿತಾಯ ಖಾತೆ ಪುಸ್ತಕ ವಿತರಣೆ ಮಲ್ತೆರ್. ಉದನೆ ಸೈಂಟ್ ತೋಮಸ್‌ ಫರೋನಾ ಚರ್ಚ್ ಧರ್ಮಗುರು ರೆ.ಫಾ.ತೋಮಸ್ ಪನಚಿಕ್ಕಲ್, ಶಿರಾಡಿ ಸೈಂಟ್ ಸೆಬಾಸ್ಟಿನ್ ಚರ್ಚ್ ಧರ್ಮಗುರು ರೆ.ಫಾ.ಜೋಸೆಫ್ ಪೂರಕುಲ್, ಅಡ್ಡಹೊಳೆ ಸೈಂಟ್ ತೋಮಸ್ ಚರ್ಚ್ ಧರ್ಮಗುರು ರೆ.ಫಾ. ಜೋಸೆಫ್ ಪಾಂಬಕ್ಕೆಲ್, ಕಳೆಂಜ ಸೈಂಟ್ ಸೆಬಾಸ್ಟಿನ್ ಚರ್ಚ್ ಧರ್ಮಗುರು ರೆ.ಫಾ.ಜೋಸೆಫ್ ವಾಳುಕಾರನ್ ಈ ಪೊರ್ತುಡು ಇತ್ತೆರ್.

ಕಲ್ಮಂಜ: ಪೊಸ ಹಾಲು ಉತ್ಪಾದಕರ ಸಹಕಾರ ಸಂಘದ ಆಡಳಿತ ಮಂಡಳಿ ರಚನೆ

ಕಲ್ಮಂಜ: ಪೊಸದಾದ್ ಸ್ಥಾಪನೆಯಾಯಿನ “ದೇವರಗುಡ್ಡೆ ಹಾಲು ಉತ್ಪಾದಕರ ಸಹಕಾರ ಸಂಘ ನಿ. ಕಲ್ಮಂಜ” ನೆತ್ತ ಪದಾಧಿಕಾರಿಲೆನ ಆಯ್ಕೆ ಅವಿರೋಧವಾದ್‌ ನಡತ್‌ಂಡ್. ಸಂಘದ ಗುರ್ಕಾರೆಯಾದ್ ರಮೇಶ್ ಗೌಡ ಗಲ್ಲೋಡಿ, ಒತ್ತು ಗುರ್ಕಾರೆ ಆದ್ ಸೂರ್ಯನಾರಾಯಣ ಹೊಳ್ಳ ಪಜಿರಡ್ಕ ಮೊಕುಲು ಅವಿರೋಧವಾದ್‌ ಆಯ್ಕೆಯಾತೆರ್.
ಸಂಘದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿಯಾದ್ ಸಚಿನ್ ಗೌಡ ಕಲ್ಮಂಜ ಅರೆನ್‌ ನೇಮಕ ಮಲ್ತೆರ್. ನಿರ್ದೇಶಕೆರಾದ್ ರಾಧಾಕೃಷ್ಣ,‌ ಶ್ರೀನಿವಾಸ್, ಮಂಜುನಾಥ್ ಗುಡಿಗಾರ್, ಗೀತಾ ನಾಯ್ಕ್, ಪುಷ್ಪವತಿ, ಶಿವಪ್ರಸಾದ್, ದೇಜಪ್ಪ ಪೂಜಾರಿ, ಗಿರೀಶ್ ಗೌಡ, ರಾಘವೇಂದ್ರ ವಿಷ್ಣುನಾಯ್ಕ ಅವಿರೋಧವಾದ್‌ ಆಯ್ಕೆಯಾತೆರ್.

ನಾರಾವಿ ಕಾಲೇಜ್‌ಡ್ ಉಚಿತ ಫಿಸಿಯೋಥೆರಪಿ ಬೊಕ್ಕ ಹೋಮಿಯೋಪಥಿಕ್ ತಪಸಣಾ ಶಿಬಿರ

ನಾರಾವಿ: ಸಂತ ಅಂತೋನಿ ಪದವಿ ಕಾಲೇಜು ನಾರಾವಿ ಮೂಲು ರಾಷ್ಟ್ರೀಯ ಸೇವಾ ಯೋಜನೆದ ಆಶ್ರಯದಡ್ ಇತ್ತೀಚೆಗ್ ಉಚಿತ ಫಿಸಿಯೋಥೆರಪಿ ಬೊಕ್ಕ ಹೋಮಿಯೋಪಥಿಕ್ ತಪಸಣಾ ಶಿಬಿರ ಕಾಲೇಜು ಸಭಾಂಗಣಡ್‌ ನಡತ್‌ಂಡ್. ಜಿ.ವಿ.ಸ್ಮಾರಕ ಆಸ್ಪತ್ರೆ ಬೆದ್ರದ ಮುಲ್ತ ವೈದ್ಯೆರಾಯಿನ ಡಾ||ಲಿಬಿನ್ ಮ್ಯಾಥ್ಯೂ ಮೆರ್‌ನ ನೇತೃತ್ವದ ತಂಡ ಉಚಿತ ಫಿಸಿಯೋಥೆರಪಿ ತಪಾಸಣಾ ಶಿಬಿರನ್‌ ನಡಪಾದ್‌ ಕೊರಿಯೆರ್.

ಅಂಚೆನೆ ಡಾ||ರಮ್ಯಾ ಆರ್. ಮೆರ್‌ನ ನೇತೃತ್ವದ ತಂಡ ಉಚಿತ ಹೋಮಿಯೋಪಥಿಕ್ ತಪಸಣಾ ಶಿಬಿರನ್‌ ನಡಪಾದ್‌ ಕೊರಿಯೆರ್. ಕಾಲೇಜ್‌ದ ಪ್ರಾಚಾರ್ಯರಾಯಿನ ವಂ.ಡಾ. ಆಲ್ವಿನ್ ಸೆರಾವೋ ಬತ್ತಿ ಬಿನ್ನೆರೆನ್‌ ಎದ್ಕೊಂಡೆರ್. ಎನ್. ಎಸ್.ಎಸ್.ನ ಯೋಜನಾಧಿಕಾರಿ ಲಾಯಿನ ದಿನೇಶ್ ಬಿ.ಕೆ, ಉಪಪ್ರಾಂಶುಪಾಲೆರ್ ಸಂತೋಷ್ ಸಲ್ಡಾನ, ಉಪನ್ಯಾಸಕೆರ್ ಅವಿನಾಶ್ ಲೋಬೊ, ಸಂತೋಷ್ ಬೊಕ್ಕ ರಾಷ್ಟ್ರೀಯ ಸೇವಾ ಯೋಜನೆಯ ಸ್ವಯಂ ಸೇವಕೆರ್‌ ಈ ಲೇಸ್‌ಗ್‌ ಸಹಕಾರ ಕೊರಿಯೆರ್. ಊರುದ ಜನಕುಲು ಶಿಬಿರದ ಪ್ರಯೋಜನನ್‌ ಪಡೆಯೊಂಡೆರ್.

ಸ್ವಚ್ಛ ಸರ್ವೇಕ್ಷಣ ಗ್ರಾಮೀಣ ಸಮೀಕ್ಷೆ: ಕಾಶಿಪಟ್ಣ ಗ್ರಾಮ ಪಂಚಾಯಿತಿ ರಾಜ್ಯ ಮಟ್ಟಗ್ ಆಯ್ಕೆ‌

ಬೋಲ್ತೆರ್: ಸ್ವಚ್ಛ ಸರ್ವೇಕ್ಷಣ ಗ್ರಾಮೀಣ-2023 ಸಮೀಕ್ಷೆಡ್ ಗ್ರಾಮ ಪಂಚಾಯಿತಿ ವ್ಯಾಪ್ತಿಡ್ ಎಡ್ಡೆ ಸಾಧನೆ ಮಲ್ತಿನ ಕಾಶಿಪಟ್ಣ ಗ್ರಾಮ ಪಂಚಾಯತು ರಾಜ್ಯ ಮಟ್ಟಗ್‌ ಆಯ್ಕೆ ಆತ್‌ಂಡ್.

ಅ.2 ದಾನಿ ಬೆಂಗಳೂರ್‌ದ ವಿಧಾನ ಸೌಧ ಬ್ಯಾಂಕ್ವೆಟ್ ಹಾಲ್‌ಡ್‌ ಕಾಂಡೆ 11 ಗಂಟೆಗ್ ಮುಖ್ಯ ಮಂತ್ರಿ ಸಿದ್ದರಾಮಯ್ಯ ಅರೆನ ಗುರ್ಕಾರ್ಮೆಡ್‌ ಬೊಕ್ಕ ಗ್ರಾಮೀಣಾಭಿವೃದ್ಧಿ ಬೊಕ್ಕ ಪಂಚಾಯತ್ ರಾಜ್ ಸಚಿವೆರ್ನ ಉಪಸ್ಥಿತಿಟ್‌ ನಡಪುನ “ಗಾಂಧೀ ಗ್ರಾಮ ಪುರಸ್ಕಾರ” ಸಮಾರಂಭಡ್ ಕಾಶಿಪಟ್ಣ ಗ್ರಾ.ಪಂ ಗುರ್ಕಾರ್ಲು ಸತೀಶ್ ಕೆ.ಬಂಗೇರ ಬೊಕ್ಕ ಪಿಡಿಒ ಆಶಾಲತಾ ‘ಸ್ವಚ್ಛ ಸರ್ವೇಕ್ಷಣ ಗ್ರಾಮೀಣ-2023’ ಪ್ರಶಸ್ತಿನ್‌ ಪಡೆಯೊನೆರೆ ಉಲ್ಲೆರ್ ಜಿಲ್ಲೆರ್ದ್ ಜಿಲ್ಲಾ ಎಸ್.ಬಿ.ಎಂ ನೋಡಲ್ ಅಧಿಕಾರಿಲು ಬೊಕ್ಕ ಒರಿ ಜಿಲ್ಲಾ ಸಮಾಲೋಚಕೆರ್‌ ಈ ಲೇಸ್‌ಡ್‌ ಪಾಲ್‌ ಪಡೆಯೆರುಲ್ಲೆರ್.

ಬಳಂಜ ಗ್ರಾ.ಪಂ ಗ್ `ಗಾಂಧಿ ಗ್ರಾಮ’ ಪುರಸ್ಕಾರ‌

ಬೋಲ್ತೆರ್: ಗ್ರಾಮ ಪಂಚಾಯತ್‌ಡ್ ಅಭಿವೃದ್ಧಿ ಕಾರ್ಯದ ಉತ್ತೇಜನ, ಜನಪರ ಆಡಳಿತ, ಪಂಚಾಯತ್ ವ್ಯಾಪ್ತಿಡ್‌ ಬೇತೆ ಬೇತೆ ಯೋಜನೆದ ಸಮರ್ಪಕ ಅನುಷ್ಠಾನ, ಪಂಚಾಯತಗ್ ಆದಾಯ ಮೂಲದ ನಿರ್ಮಾಣ ಇಂಚನೆ ಎಡ್ಡೆ ಕಾರ್ಯಲೆನ್ ಪರಿಗಣಿಸಾದ್ 2022-23ನೇ ಸಾಲ್‌ದ ಪ್ರತಿಷ್ಠಿತ `ಗಾಂಧಿ ಗ್ರಾಮ ಪುರಸ್ಕಾರ’ಗ್ ಬಳಂಜ ಗ್ರಾಮ ಪಂಚಾಯತ್‌ ಆಯ್ಕೆ ಆತ್‌ಂಡ್.

ಈ ಪ್ರಶಸ್ತಿ ಪ್ರಧಾನ ಕಾರ್ಯಕ್ರಮ ಅ.2 ಗಾಂಧಿ ಜಯಂತಿ ದಾನಿ ಬೊಲ್ಪುಗು 10 ಗಂಟೆಗ್ ಬೆಂಗಳೂರ್‌ರ್ದ ವಿಧಾನ ಸೌಧ ಬ್ಯಾಂಕ್ವೆಟ್ ಹಾಲ್‌ಡ್‌ ನಡಪುನ ಸಮಾರಂಭಡ್ ಬಳಂಜ ಗ್ರಾಮ ಪಂಚಾಯತ್‌ದ ಗುರ್ಕಾರ್ಲು, ಒತ್ತು ಗುರ್ಕಾರ್ಲು ಬೊಕ್ಕ ಸದಸ್ಯೆರ್ ಅಂಚನೆ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಪಾಲ್‌ ಪಡೆದ್‌ ಪ್ರಶಸ್ತಿ ಸ್ವೀಕಾರ ಮಲ್ಪೆರೆ ಉಲ್ಲೆರ್.

ಮೈರಲ್ಕೆ ಶ್ರೀ ಕಿರಾತಮೂರ್ತಿ ಮಹಾಲಿಂಗೇಶ್ವರ ದೇವಸ್ಥಾನಡ್ ಸಾರ್ವಜನಿಕ ಶಾರದಾ ಉತ್ಸವ ಸಮಿತಿ ರಚನೆ

ಓಡಿಲ್ನಾಳ: ಶ್ರೀ ಕಿರಾತಮೂರ್ತಿ ಮಹಾಲಿಂಗೇಶ್ವರ ದೇವಸ್ಥಾನ ಮೈರಲ್ಕೆ, ಓಡಿಲ್ನಾಳ ಮೂಲು ಈ ವರ್ಷರ್ದ್ ಶಾರದೋತ್ಸವ ಆಚರಣೆ ಮಲ್ಪುನ ಬಗೆಟ್ ಭಕ್ತಾಭಿಮಾನಿಲೆನ ಸಭೆ ಲೆತ್ತ್‌ದ್ ನಿರ್ಣಯ ಮಲ್ತೆರ್.‌ ಅಂಚನೆ ಸಾರ್ವಜನಿಕ ಶಾರದ ಪೂಜಾ ಉತ್ಸವ ಸಮಿತಿ ರಚನೆ ಮಲ್ತೆರ್. ಮಾನಾದಿಗೆ ಗುರ್ಕಾರ್ಲು ಆದ್ ರಾಮಣ್ಣ ಕೋಲಾಜೆ, ಗುರ್ಕಾರ್ಲು ಆದ್ ನಿತೇಶ್ ಕೆ. ಓಡಿಲ್ನಾಳ, ಕಾರ್ಯದರ್ಶಿಯಾದ್ ಸುದೀಪ್ ಶೆಟ್ಟಿ ಮೂಡೈಲು, ಉಪಾಧ್ಯಕ್ಷೆರಾದ್ ಉಮೇಶ್ ಕುಲಾಲ್ ಕೊಂಡೆಮಾರು, ಜಗದೀಶ್ ಉಳತ್ತೋಡಿ, ರಾಕೇಶ್ ಶೆಟ್ಟಿ ಕೊರ್‍ಯಾರು ಬೊಕ್ಕ ಕೋಶಾಧಿಕಾರಿಯಾದ್ ಸುರೇಶ್ ಬರಮೇಲು ಮೊಕ್ಲೆನ್ ಸರ್ವಾನುಮತರ್ದ್‌ ಆಯ್ಕೆ ಮಲ್ತೆರ್.
ಸಮಿತಿದ ಸದಸ್ಯೆರಾದ್ ನಿತೇಶ್ ಕಟ್ಟದಬೈಲು, ರಾಜೇಶ್ ಶೆಟ್ಟಿ ಕೆಂಜಿಲ, ಆದರ್ಶ ಕೆರೆಕೋಡಿ, ಅಬಿರತ್ ಮೂಡೈಲು, ವಿಖ್ಯಾತ್ ಕುಂಡಳಿಕೆ, ಸಂತೋಷ್ ಆರ್ ಕೊಂಡೆಮಾರು, ರಾಮ್‌ದಾಸ್ ಕುಂಞಕೋಡಿ, ಸಂದೀಪ್ ಕೆರೆಕಜೆ, ವಿನುತ ಕೊಂಡೆಮಾರು, ಉಮೇಶ್ ಗೌಡ, ನಾರಾಯಣ ಮೂಲ್ಯ ಇಡ್ಯ, ಶ್ರೀಕಾಂತ್ ಕರ್ನಂತ್ತೋಡಿ, ಸತೀಶ್ ದೇವಾಡಿಗ ಓಡಿಲ್ನಾಳ, ಸುಬ್ರಹ್ಮಣ್ಯ ಕಟ್ಟದಬೈಲು, ಶಿವರಾಮ್ ಕಟ್ಟದಬೈಲು, ಬಾಲಕೃಷ್ಣ ಬನ, ಪ್ರದೀಪ್ ಮಡಂತಿಲ, ಪುರುಷೋತ್ತಮ ಗೌಡ ಪಡ್ಪು ಇಡ್ಯ, ಕಿರಣ್ ಮೈರಲ್ಕೆ, ಸದಾನಂದ ಮೂಲ್ಯ ಪರಾರಿ, ಸಂತೋಷ ಕುಲಾಲ್ ಕೆರೆಕೋಡಿ, ರವಿ ಪೂಜಾರಿ ಮೈರಾರು, ಸ್ವಸ್ತಿಕ ಮೈರಲ್ಕೆ, ಸಂದೀಪ್ ಕೊಂಡೆಮಾರು, ಕರುಣಾಕರ ಶೆಟ್ಟಿ ಪರಾರಿ, ಜಯಾನಂದ ನಾಯಕ್ ಮೂಲೊಟ್ಟು, ವಿಶ್ವನಾಥ ಬನ, ವಿಶ್ವನಾಥ ಶೆಟ್ಟಿ ಪರಾರಿ, ಸುರೇಶ್ ಎಮ್. ಕೆ. ಹೊಸಮನೆ, ವಿಶ್ವನಾಥ ಪ್ರಭು ಅಂಕತ್ತಿಲು ಆಯ್ಕೆ ಆಯೆರ್.

ಧರ್ಮಸಂರಕ್ಷಣ ಯಾತ್ರೆ; ಕೊಲ್ಲೂರ್‌ರ್ದ್ ರಥಯಾತ್ರೆ : ಇನಿ ಸಂಕಲ್ಪ ದಿನ

ಧರ್ಮಸ್ಥಳ: ಶ್ರೀ ಕ್ಷೇತ್ರ ಧರ್ಮಸ್ಥಳದ ವಿರುದ್ಧ ನಡತ್ತೊಂದು ಇಪ್ಪುನ ಅಪಪ್ರಚಾರ ಉಂತೊಡು. ಹಿಂದೂ ಶ್ರದ್ಧಾಕೇಂದ್ರದ ವಿರುದ್ಧದ ದಾಳಿ ಉಂತೊಡು ಪನ್ಪುನ ಉದ್ದೇಶರ್ದ್ ಶ್ರೀ ಕ್ಷೇತ್ರ ಧರ್ಮಸ್ಥಳಗ್ ಅಕ್ಟೋಬರ್ ತಿಂಗೊಲೊಡು ಧರ್ಮ ಸಂರಕ್ಷಣ ಯಾತ್ರೆ ಆಯೋಜನೆ ಮಲ್ತ್‌ದೆರ್. ಕೊಲ್ಲೂರು ಮೂಕಾಂಬಿಕ ಕ್ಷೇತ್ರ ಬೊಕ್ಕ ಕದ್ರಿ ಮಂಜುನಾಥನ ಸನ್ನಿಧಿರ್ದ್ ಯಾತ್ರೆ ಪಿದಾಡುನ ಹಿನ್ನಲೆಡ್‌ ಇನಿ ಬೇತೆ ಬೇತೆ ದೇವಸ್ಥಾನಡ್ ಸಂಕಲ್ಪ ದಿನದ ಪ್ರಾರ್ಥನೆ ಸಲ್ಲಿಸಾಯೆರ್.
ಧರ್ಮಸ್ಥಳದ ಅಣ್ಣಪ್ಪ ಸ್ವಾಮಿನೆದುರು ಸಂಕಲ್ಪ ಮಲ್ತೆರ್. ಮಾಣಿಲದ ಮೋಹನದಾಸ ಪರಮಹಂಸ ಸ್ವಾಮೀಜಿ ಸಂಕಲ್ಪ ಪ್ರಾರ್ಥನೆನ್‌ ನಡಪಾದ್‌ ಕೊರಿಯೆರ್. ಈ ಪೊರ್ತುಡು ಧರ್ಮಸ್ಥಳದ ಭಕ್ತೆರ್, ಪ್ರಮುಖರಾಯಿನ ವೀರೂ ಶೆಟ್ಟಿ, ಸುಬ್ರಹ್ಮಣ್ಯ ಪ್ರಸಾದ್, ಶ್ರೀನಿವಾಸ ರಾವ್, ದಿವಾಕರ್, ಭಾಸ್ಕರ್ ಧರ್ಮಸ್ಥಳ, ಧನಕೀರ್ತಿ ಆರಿಗ, ಪಾರ್ಶ್ವನಾಥ ಜೈನ್ ಈ ಪೊರ್ತುಡು ಇತ್ತೆರ್.

ವೇಣೂರು: ಎಸ್.ಡಿ.ಯಂ. ಐ.ಟಿ.ಐ.ಡ್ ರಾಷ್ಟ್ರೀಯ ಸೇವಾ ಯೋಜನೆ ದಿನಾಚರಣೆ‌

ವೇಣೂರು: ಕಲ್ಪಾರ್ಥಿಲೆಡ ನಾಯಕತ್ವ ಬರಿಯೆರೆ ಬೊಕ್ಕ ತನ್ನ ಪ್ರತಿಭೆನ್‌ ಅನಾವರಣ ಮಲ್ಪೆರೆ, ಸಮಾಜಡ್‌ ಎಡ್ಡೆ ಸ್ಥಾನಗ್‌ ಪೋವರೆ ಬೋಡಾಯಿನ ಆತ್ಮವಿಶ್ವಾಸನ್ ಎನ್.ಎಸ್.ಎಸ್. ಕೊರ್ಪುಂಡು ಪಂದ್ ಜೀ ಕನ್ನಡ ವಾಹಿನಿದ ಕಾಮಿಡಿ ಕಿಲಾಡಿ ಖ್ಯಾತಿದ ಅನೀಷ್ ಪೂಜಾರಿ ವೇಣೂರು ಎಸ್.ಡಿ.ಯಂ. ಐ.ಟಿ.ಐ.ಡ್ ರಾಷ್ಟ್ರೀಯ ಸೇವಾ ಯೋಜನೆ ದಿನಾಚರಣೆ ಕಾರ್ಯಕ್ರಮನ್‌ ಉದಿಪನ ಮಲ್ತ್ ಎನ್.ಎಸ್.ಎಸ್. ಅನುಭವನ್‌ ಪಟ್ಟೊಂಡೆರ್.

ಬಿನ್ನೆರಾದ್‌ ಪಾಲ್‌ ಪಡೆಯಿನ ಸಂಸ್ಥೆದ ಹಳೆ ವಿದ್ಯಾರ್ಥಿ ಮನ್ಸೂರ್, ಸೌದಿ ಅರೇಬಿಯಾಡ್‌ ನಡತ್ತಿನ ರಾಷ್ಟ್ರ ಮಟ್ಟದ ಭಾಷಣ ಸ್ಪರ್ಧೆಡ್‌ ಸುರುತ ಇನಾಮು ಪಡೆನ ಮೆರ್‌ ಎನ್.ಎಸ್.ಎಸ್ ಶಿಬಿರಡ್‌ ಅಪಾರ ಅನುಭವನ್‌ ಕಲ್ಪಾರ್ಥಿಲೆನ ಒಟ್ಟಿಗೆ ಪಟ್ಟೊಂದೆರ್. ಕಾರ್ಯಕ್ರಮದ ಗುರ್ಕಾರ್ಮೆನ್ ಕಾಲೇಜ್‌ದ ಪ್ರಾಚಾರ್ಯ ವಿಶ್ವೇಶ್ವರ ಪ್ರಸಾದ್ ವಹಿಸ್‌ದ್‌ ಇತ್ತೆರ್, ಮಲ್ಲ ಬಿನ್ನೆರಾದ್ ಸಂಸ್ಥೆದ ಹಿತೈಷಿ ಜೀವಾವಿಮಾ ನಿಗಮದ ಪ್ರತಿನಿಧಿ ಜಗನಾಥ್ ಎಚ್., ಎನ್.ಎಸ್.ಎಸ್. ಕಾರ್ಯಕ್ರಮದ ಅಧಿಕಾರಿ ಪದ್ಮಪ್ರಸಾದ್ ಬಸ್ತಿ ಇತ್ತೆರ್.