ಕುಡ್ಲದ ಸುದ್ದಿ | Mangalore News

Misappropriation of funds case- Kallathoor Vishwanath Shetty granted bail ವಂಚನೆ ಕೇಸ್: ಕಳತ್ತೂರು ವಿಶ್ವನಾಥ್ ಶೆಟ್ರೆಗ್ ಜಾಮೀನ್

ಕುಡ್ಲ: ಕುಡ್ಲದ ರಡ್ಡ್ ಜನ ಉದ್ಯಮಿಲೆಗ್ 1.15 ಕೋಟಿ ರೂ. ವಂಚನೆ ಮಲ್ತಿನ ಕೇಸ್‌ಗ್ ಸಂಬಂಧಿಸಾದ್ ಅರೆಸ್ಟ್ ಆಯಿನ ಬೊಂಬಾಯಿದ ಉದ್ಯಮಿ ಕಳತ್ತೂರು ವಿಶ್ವನಾಥ್ ಶೆಟ್ರೆಗ್ ಶರತ್ತ್ ಬದ್ಧ ಜಾಮೀನ್ ಕೊರ್ತ್ಂಡ್.

ಪುಗರ್ತೆದ ಕಟ್ವಾನ ನಿರ್ಮಾಣ ಸಂಸ್ಥೆ ‘ರೋಹನ್ ಕಾರ್ಪೊರೇಷನ್’ ಮುಖ್ಯಸ್ಥೆರ್ ಆಯಿನ ರೋಹನ್ ಮೊಂತೇರೋ ಬೊಕ್ಕ ತೊಕ್ಕೊಟ್ಟುದ ‘ಹರ್ಷ ಫೈನಾನ್ಸ್’ದ ಮಾಲಕೆರ್ ಹರೀಶ್ ಮೆರೆಗ್ ಕಳತ್ತೂರು ವಿಶ್ವನಾಥ್ ಶೆಟ್ಟಿ ಬೊಕ್ಕ ಬೊಂಬಾಯಿದ ಕದಂ ಪನ್ಪಿನಾರ್ 300 ಕೋಟಿ ರೂ. ಸಾಲ ದೆಪ್ಪಾದ್ ಕೊರ್ಪಿನ ಆಮಿಷ ಪಾಡ್ದ್ 1.15 ಕೋಟಿ ರೂ. ಕಾಸ್‌ನ್ ವಂಚನೆ ಮಲ್ತಿನ ಬಗೆಟ್ ಕುಡ್ಲದ ಸೆನ್ ಪೊಲೀಸ್ ಠಾಣೆಡ್ ದೂರು ದಾಖಲ್ ಆದಿತ್ತ್ಂಡ್.

ಪ್ರಕರಣದ ಆರೋಪಿಲೆಡ್ ವಿಶ್ವನಾಥ್ ಶೆಟ್ಟಿ ಮೆರೆನ್ ಒಂಜಿ ವಾರದ ಪಿರವು ಕುಡ್ಲ ವಿಮಾನ ನಿಲ್ದಾಣದ ಪಿದಯಿಡ್ ಅರೆಸ್ಟ್ ಮಲ್ತ್‌ದಿತ್ತೆರ್. ಪ್ರಕರಣದ ಪ್ರಮುಖ ಆರೋಪಿ ಕದಂನ್ ಬೊಂಬಾಯಿ ಕ್ರೈಂ ಬ್ರಾಂಚ್ ಪೊಲೀಸೆರ್‍ನ ಸಕಾಯ ಪಡೆದ್ ಅರೆಸ್ಟ್ ಮಲ್ತ್‌ದ್ ಕುಡ್ಲಗ್ ಲೆತೊಂದು ಬೈದೆರ್.

ವಿಶ್ವನಾಥ್ ಶೆಟ್ಟಿ ಮೆರೆಗ್ ಕುಡ್ಲದ ಸಿಜೆಎಂ ನ್ಯಾಯಾಲಯ ಜಾಮೀನು ಕೊರ್ತ್ಂಡ್. ಯುವ ನ್ಯಾಯವಾದಿ ಎಲಿಜೆಬೆತ್ ನೀಲಿಯಾರ ಆರೋಪಿ ಪರವಾದ್ ವಕಾಲತ್ತು ಮಲ್ತ್‌ದಿತ್ತೆರ್. ಈ ಪ್ರಕರಣಡ್ ತನ್ನ ಕಕ್ಷಿಗಾರೆರ್ ವಿಶ್ವನಾಥ್ ಶೆಟ್ಟಿ ಅಮಾಯಕರಾದಿತ್ತ್‌ದ್ ಅರೆಗ್ ಜಾಮೀನು ಕೊರ್ಪಿಲೆಕ್ಕ ನ್ಯಾಯಾಲಯಗ್ ಎಲಿಜಬೆತ್ ಮನವಿ ಸಂದಾದಿತ್ತೆರ್. ನನೋರಿ ಆರೋಪಿ ಕದಂ ಪೊಲೀಸೆರ್‍ನ ವಶಟ್ಟ್ ಉಲ್ಲೆರ್.

Eshwar M J awarded a Doctorate ಈಶ್ವರ್ ಎಂ.ಜಿ. ಮೆರೆಗ್ ಡಾಕ್ಟರೇಟ್

ಆಳ್ವಾಸ್ ಕಾಲೇಜ್‌ದ ಅರ್ಥಶಾಸ್ತ್ರ ವಿಭಾಗ ಸಹಾಯಕ ಪ್ರಾಧ್ಯಾಪಕೆರ್ ಈಶ್ವರ್ ಎಂ. ಜಿ. ಮೇರ್ ಸಲ್ಲಿಸಾಯಿನ “ಹೆಲ್ತ್ ಕೇರ್ ಸರ್ವಿಸ್ ಇನ್ ಅರ್ಬನ್ – ರೂರಲ್ ಕರ್ನಾಟಕ : ಎ ಸ್ಟಡಿ ಇನ್ ಶಿವಮೊಗ್ಗ ಡಿಸ್ಟ್ರಿಕ್ಟ್ ” ಪನ್ಪಿನ ಸಂಶೋಧನೆದ ಮಹಾ ಪ್ರಬಂಧಗ್ ಕುವೆಂಪು ವಿಶ್ವವಿದ್ಯಾನಿಲಯ ಡಾಕ್ಟರೇಟ್ ಗೌರವ ಕೊರ್ತ್ಂಡ್.

ಮೇರ್ ಕುವೆಂಪು ವಿಶ್ವ ವಿದ್ಯಾನಿಲಯದ ಪ್ರಾಧ್ಯಾಪಕ ಪ್ರೊ. ಬಿ. ಜಯರಾಮ್ ಭಟ್ ಮೆರೆನ ಮಾರ್ಗದರ್ಶನಡ್ ಸಂಶೋಧನೆ ಮಲ್ತ್‌ದಿತ್ತೆರ್. ಈಶ್ವರ್ ಮೇರ್ ಚಿಕ್ಕಮಗಳೂರು ಜಿಲ್ಲೆದ ಬಾಳೆಹೊನ್ನೂರು ಕೈತಲ್‌ದ ಮೆಲ್ಪಾಲ್ ನಿವಾಸಿ ದಿ. ಗೋಪಾಲ ಬೊಕ್ಕ ಕಾಳಿಯಮ್ಮ ಮೆರೆನ ಮಗೆ.

Ambulance stops midway due to bad roads-The child in the ambulance dies ಮಾರ್ಗ ಇಜ್ಜಿ ಪಂದ್ ನಡು ಸಾದಿಡೇ ಉಂತಿನ ಆಂಬ್ಯುಲೆನ್ಸ್; ತೀರ್ ಪೋಯಿನ ಬಾಲೆ

ಚೆನ್ನೈ: ಉಚ್ಚು ತುಚ್ಚಿನ ಬಾಲೆಗ್ ಸರಿಯಾಯಿನ ಪೊರ್ತುಡು ಚಿಕಿತ್ಸೆ ತಿಕ್ಕಂದೇ ತೀರ್ ಪೋಯಿನ ಘಟನೆ ತಮಿಳ್‌ನಾಡ್‌ದ ವೆಲ್ಲೋರ್ ಜಿಲ್ಲೆಡ್ ನಡತ್ಂಡ್.

ತೀರ್ ಪೋಯಿನ ಬಾಲೆಗ್ 18 ತಿಂಗೊಲ್ ಆದಿತ್ತ್ಂಡ್. ಬಾಲೆಗ್ ಉಚ್ಚು ತುಚ್ಚಿನೆಡ್ದಾವರ ಆಸ್ಪತ್ರೆಗ್ ಲೆತೊಂದು ಪೋಯರೆ ಆಂಬ್ಯುಲೆನ್ಸ್‌ಡ್ ಬತ್ತಿತ್ತೆರ್. ಆಂಡ ಗುಡ್ಡೆ ಕಾಡ್ ಜಾಗೆ ಆಯಿನೆಡ್ದಾವರ ಆಂಬ್ಯುಲೆನ್ಸ್ ದುಂಬು ಪೋಯರೆ ಆಯಿಜಿ. ಅಪಗ ಅಪ್ಪೆ ಬಾಲೆನ್ ಪತೊಂದು 6 ಕಿ.ಮೀ .ದಾತ್ ನಡತ್ ಬನ್ನಗ ಬಾಲೆ ತೀರ್ ಪೋತ್ಂಡ್.

ಈ ಜಾಗೆಡ್ ಸರಿಯಾಯಿನ ಮಾರ್ಗದ ವ್ಯವಸ್ಥೆ ಇಜ್ಜಂದಿನವ್ವೇ ಬಾಲೆ ತೀರ್ ಪೋಯರೆ ಕಾರಣ ಆಂಡ್ ಪಂದ್ ಸಂಬಂಧಿಕೆರ್ ಸ್ವರ ಲಕ್ಕಾದೆರ್.

Jai Tulunadu ( R)-winner of the state ” Sangathana Prashasthi Puraskar” forms a new Kendra Samiti ರಾಜ್ಯ ಸಂಘಟನಾ ಪ್ರಶಸ್ತಿ ಪುರಸ್ಕೃತ ಜೈ ತುಲುನಾಡ್ (ರಿ.) ಸಂಘಟನೆದ ಪೊಸ ಕೇಂದ್ರ ಸಮಿತಿ ರಚನೆ

ತುಳು ಅಕಾಡೆಮಿ ರಾಜ್ಯ ಸಂಘಟನಾ ಪ್ರಶಸ್ತಿ ಪುರಸ್ಕೃತ ಜೈ ತುಲುನಾಡ್ (ರಿ.) ಸಂಘಟನೆದ ಸಭೆ ಮೇ 28 ತಾರೀಕ್‌ಗ್ ಕೂಳೂರ್‌ದ ಫಲ್ಗುಣಿ ಸಭಾಭವನದ ಚಾವಡಿಡ್ ನಡತ್ಂಡ್.

ಈ ಸಭೆಟ್ ಕೂಟದ ಪೊಸ ಕೇಂದ್ರ ಸಮಿತಿ ರಚನೆ ಆಂಡ್.

2023-24 ನೇ ಸಾಲ್‌ದ ಕೇಂದ್ರ ಸಮಿತಿದ ಗುರ್ಕಾರೆಯಾದ್ ವಿಶು ಶ್ರೀಕೇರ, ಒತ್ತು ಗುರ್ಕಾರ್ಲು ಆದ್ ರವೀಶ್ ಪಡುಮಲೆ, ಉದಯ್ ಪೂಂಜ, ಉಮೇಶ್ ಸಾಲ್ಯಾನ್, ಪ್ರಧಾನ ಕಾಯಂತೆರ್ ಆದ್ ಕಿರಣ್ ತುಲುವೆ, ಒತ್ತು ಕಾಯಂತೆರ್ ಪೂರ್ಣಿಮಾ ಬಂಟ್ವಾಳ, ರಾಜಶ್ರೀ ಚಂದ್ರಶೇಖರ್, ಪಣವುದ ಪಾಲವೆರಾದ್ ಸಂತೋಷ್ ಕಟ್ಪಾಡಿ, ಒತ್ತು ಪಣವುದ ಪಾಲವೆರಾದ್ ಪೂರ್ಣಿಮಾ ಕಿರಣ್, ಸಂಘಟನಾ ಕಾಯಂತೆರ್ ಸುಮಂತ್ ಹೆಬ್ರಿ, ಒತ್ತು ಸಂಘಟನಾ ಕಾಯಂತೆರ್ ಶೇಖರ್ ಗಂಗೆನೀರ್ ಬೊಕ್ಕ ರಾಜೇಶ್ ಪೂಜಾರಿ ನೀರುಡೆ, ತುಲು ಲಿಪಿ ಸಮಿತಿದ ನಿದಯಂತೆರಾದ್ ಪ್ರಶಾಂತ್ ಪೂಜಾರಿ ನಂದಳಿಕೆ, ಒತ್ತು ನಿದಯಂತೆರಾದ್ ಅಕ್ಷತಾ ಕುಲಾಲ್, ಪ್ರಚಾರ ಸಮಿತಿದ ನಿದಯಂತೆರಾದ್ ಸದಾಶಿವ ಮುದ್ರಾಡಿ, ಮಾಹಿತಿ ಬೊಕ್ಕ ತಂತ್ರಜ್ಞಾನ ಸಮಿತಿದ ನಿದಯಂತೆರಾದ್ ಯತೀಶ್ ಮುಂಡೋಡಿ, ತುಲು ಭಾಷಾ ಸಮಿತಿದ ನಿದಯಂತೆರಾದ್ ಜಯಪ್ರಸಾದ್, ಒತ್ತು ನಿದಯಂತೆರಾದ್ ಅನುಷಾ ಸಾಲ್ಯಾನ್ ಆಯ್ಕೆ ಆತೆರ್.

ಈ ಸಭೆಟ್ 2022-23ನೇ ಸಾಲ್‌ದ ಸಮಿತಿದ ವರದಿನ್ ರಾಜೇಶ್ ತುಲುವೆ ಓದಿಯೆರ್. ಪಣವುದ ವರದಿನ್ ರಕ್ಷಿತ್ ಕೋಟ್ಯಾನ್ ಓದಿಯೆರ್. ಕುಶಾಲಾಕ್ಷಿ ಕಣ್ವತೀರ್ಥ ಸುಗಿತೊಂದು, ಶರತ್ ಕೊಡವೂರ್ ಎದ್ಕೊನಿಯೆರ್. ಸುಮಂತ್ ಹೆಬ್ರಿ ಬತ್ತಿನ ಬಿನ್ನೆರೆಗ್ ಸೊಲ್ಮೆ ಸಂದೈತ ಮಲ್ತೆರ್. ಕಿರಣ್ ತುಲುವೆ ಲೇಸ್ ಸುದಾರಿಕೆ ಮಲ್ತೆರ್.

Distribution of books to School children at a program in Mulki ಮುಲ್ಕಿ ಮಟ್ಟು ಕೈತಲ್ದ ಶಾಲೆದ ಜೋಕುಲೆಗ್ ಬೂಕು ಪಟ್ಟುನ ಲೇಸ್

ಮುಲ್ಕಿ : ಶಾಂಭವಿ ಯುವ ಸಂಗಮ(ರಿ)ಮಟ್ಟು ಬೊಕ್ಕ ಶ್ರೀ ನಾರಾಯಣ ಗುರು ಸೇವಾ ಸಂಘ (ರಿ )ಮಟ್ಟು ಮೊಕ್ಲೆನ ಒಟ್ಟುಸೇರಿಗೆಡ್ ಕೈತಲ್ದ ಶಾಲೆದ ಜೋಕುಲೆಗ್ ಬೂಕು ಪಟ್ಟುನ ಲೇಸ್ ಇಂಚೊಗು ನಡತ್ಂಡ್.

ಊರುದ ಅಂಚೆನೆ ಪರವೂರುದ ದಾನಿಲೆನ ಸಕಾಯೊಡು ಒಂಜಿನೇ ಕ್ಲಾಸ್ ರ್ದ್ ಕಾಲೇಜ್ ಮುಟ್ಟದ ವಿದ್ಯಾರ್ಥಿಲೆಗ್ ಅಂದಾಜಿ 40,000 ರೂಪಾಯಿ ಬಿಲೆತ್ತ ಪುಸ್ತಕಲೆನ್ ಧರ್ಮಾರ್ಥವಾದ್ ಪಟ್ಟಿಯೆರ್.