ಕುಡ್ಲದ ಸುದ್ದಿ | Mangalore News

ಬಲೆ ತುಳು ಲಿಪಿ ಕಲ್ಪುಗ ಕಾರ್ಯಗಾರದ ಮುಗಿತಲದ ಲೇಸ್

ತಾರೀಖ್ 14/3/2021 ನೇ ಐತಾರ ಕಾಂಡೆ 10 ಗಂಟೆಗ್ ಕೊಡವೂರು ಶಂಕರನಾರಾಯಣ ದೇವಸ್ಥಾನಡ್ ಶ್ರೀ ಶಂಕರನಾರಾಯಣ ದೇವಸ್ಥಾನದ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಜೈ ತುಲುನಾಡ್ (ರಿ.) ಬೊಕ್ಕ ಹಳೆ ವಿದ್ಯಾರ್ಥಿ ಸಂಘ ಬೊಕ್ಕ ಯುವಕ ಸಂಘ (ರಿ.) ಕೊಡವೂರು ಮೆಕ್ಲೆನ ಒಟ್ಟು ಸೇರಿಗೆಡ್ ಬಲೆ ತುಳು ಲಿಪಿ ಕಲ್ಪುಗ ಕಾರ್ಯಗಾರದ ಮುಗಿತಲದ ಲೇಸ್ ನಡತ್oಡ್.

ಲೇಸ್‌ದ ಬಿನ್ನೆರಾದ್ ಬೈದಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಡಾ| ಆಕಾಶ್ ರಾಜ್ ಜೈನ್ ಪಾತೆರ್ದ್ “ತುಲು ಲಿಪಿ ನನಾತ್ ಆಧುನಿಕತೆ ತಂತ್ರಜ್ಞಾನೊಗು ಬತ್ತ್‌ದ್ ಪ್ರತಿ ಊರುಡು ಗಲಸುಲಕ ಆವೊಡು, ಯುವಪೀಳಿಗೆ ತುಲು ಲಿಪಿನ್ ದುಂಬು ಕೊನೊಪಿನ ಜಬದಾರಿ ದೆತೊನೊಡು” ಪಂಡೆರ್.

ಅಂಚನೇ ಮಾನದಿಗೆದ ಬಿನ್ನೆರಾಯಿನ ಪ್ರಕಾಶ್ ಜಿ ಕೊಡವೂರು ಪಾತೆರ್ದ್. ” ತುಳು ಲಿಪಿ ತುಳು ಸಂಸ್ಕೃತಿ ಒರಿಪಾದ್ ಬುಲೆಪಾವುನ ನಿಲೆಟ್ಟ್ ನನಾತ್ ಜನಕುಲು ತುಳು ಲಿಪಿ ಕಲ್ಪೊಡು” ಪಂದ್ ಪಂಡೆರ್.

ಈ ಪೊರ್ತುಡು ಕೊಡವೂರು ಶಾಲೆಡ್ d 1992 – 1998 ಬ್ಯಾಚ್ ದ ಪರಾವಾದ್ ಕೊಡವೂರು ಟೀಚರ್ ಶ್ರೀಮತಿ ಮಲ್ಲಿಕಾ ದೇವಿ ಮೆರೆಗ್ ಎಲ್ಯ ಮಾನದಿಗೆ ನಡತoಡ್. ಜೈ ತುಲುನಾಡ್ (ರಿ.) ವತಿರ್ದ್ ಕೊಡವೂರು ಶಾಲೆಡ್ 36 ವರ್ಷ ಸೇವೆ ಮಲ್ತಿನ ಅಂಚನೇ ಕೊಡವೂರು ಶಾಲೆಡ್ ತುಲು ಲಿಪಿ ಬುಲೆಚ್ಚಿಲ್ ಗ್ ಬೆರಿ ಸಹಾಯ ಕೊರಿನ ಶ್ರೀಮತಿ ಮಲ್ಲಿಕಾ ದೇವಿ ಮೆರೆಗ್ ಮಾನದಿಗೆ ಲೇಸ್ ನಡತ್oಡ್.

ವಿಶೇಷ ವಿಚಾರ ದಾದ ಪಂಡ ಕೊಡವೂರು ಡು ಜಾಸ್ತಿ ಜನ ತುಳು ಲಿಪಿ ಕಲ್ದಿನಕುಲು ತುಳು ಲಿಪಿ ಟೀಚರ್ ಉಲ್ಲೆರ್.. ಸರಿ ಸುಮಾರ್ 300 ಜನ ಲಿಪಿ ಕಲ್ಪುನ ಉಮೇದ್ ತೋಜಾದಿನ ಪೆರ್ಮೆದ ಇಚಾರ.

ಇಂದುವೇ ಪೊರ್ತುಡು ಕಜ್ಜಕೊಟ್ಯಡ್ ತುಲು ಲಿಪಿ ಪರೀಕ್ಷೆ ಬರೆದ್ ಉತ್ತೀರ್ಣರಾಯಿನಕ್ಲಗ್ ಆಜೋಲೆ ಪಟ್ಟುನು (ಪ್ರಮಾಣ ಪತ್ರ) ಲೇಸ್ ನಡತ್oಡ್.

ಈ ಲೇಸ್ ಡ್ ,ಕೊಡವೂರು ಶಂಕರನಾರಾಯಣ ವ್ಯವಸ್ಥಾಪನ ಸಮಿತಿದ ಗುರ್ಕಾರ್ಲಾಯಿನ ಪ್ರಕಾಶ್. ಜಿ ಕೊಡವೂರು,ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಡಾ. ಆಕಾಶ್ ರಾಜ್ ಜೈನ್, ,ಕೊಡವೂರು ಶಂಕರನಾರಾಯಣ ವ್ಯವಸ್ಥಾಪನ ಸಮಿತಿದ ಪದುಕೆರಾಯಿನ ಜನಾರ್ಧನ್ ಕೊಡವೂರು,
ಟೈಮ್ಸ್ ಆಫ್ ಕುಡ್ಲ ದ ಪ್ರಭಂದ ಕೆರಾಯಿನ ಯಶೋಧ ಕೇಶವ,ರಾಮ ಶೇರಿಗಾರ್,ಕೊಡವೂರು ಶಾಲಾ ಶಿಕ್ಷಕಿ ಮಲ್ಲಿಕಾ ದೇವಿ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ದ ಪದುಕೆರಾಯಿನ ತಾರಾ ಉಮೇಶ್ ಆಚಾರ್ಯ,
ಶರತ್ ಕೊಡವೂರು,ಸ್ವಾತಿ ಸುವರ್ಣ, ಹಳೆ ವಿದ್ಯಾರ್ಥಿ ಸಂಘದ ಸತೀಶ್ ಕೊಡವೂರು, ಜೈ ತುಲುನಾಡ್ ಗುರ್ಕಾರ್ಲು ಸುದರ್ಶನ್ ಸುರತ್ಕಲ್,ಅಂಜಲಿ ಎಸ್ ಪೂಜಾರಿ,ಪಾಲ್ ಪಡೆದ್ ಇತ್ತೆರ್.

ರಾಜೇಶ್ ತುಳುವೆ ಬತ್ತಿ ಬಿನ್ನೆರೆನ್ ಎದುಕೊಂಡೆರ್, ಬನಶ್ರೀ ಕಲ್ಮಾಡಿ ಸೊಲ್ಮೆ ಸಂದೈತ ಮಲ್ತೆರ್, ಸ್ವಾತಿ ಸುವರ್ಣ ಬೊಕ್ಕ ರಮ್ಯ ಇನಾಮು ದ ಬೊಕ್ಕ ಪ್ರಮಾಣ ಪತ್ರ ದ ಓದುದು ಪಂಡೆರ್,ಸುಷ್ಮಾ ದೇವಾಡಿಗ ಲೇಸ್ ದ ನಿರೂಪಣೆ ಮಲ್ತೆರ್, ಶರತ್ ಕೊಡವೂರು ಪ್ರಾಸ್ತಾವಿಕ ಭಾಷಣ ಮಲ್ತೆರ್.

ಒಡಿಪುಡು ಗ್ಲುಕೋಮಾ ತಪಾಸಣಾ ಶಿಬಿರ ಉದಿಪನ

ಒಡಿಪು , ಮಾ.15: ಒಡಿಪು ಡಾ.ಟಿಎಂಎ ಪೈ ಆಸ್ಪತ್ರೆ, ಮಣಿಪಾಲ ಕಸ್ತೂರ್ಬಾ ಮೆಡಿಕಲ್ ಕಾಲೇಜು ಬೊಕ್ಕ ಆಸ್ಪತ್ರೆದ ನೇತ್ರಶಾಸ್ತ್ರ ವಿಭಾಗ ಬೊಕ್ಕ ಆಪ್ಟೊಮೆಟ್ರಿ ವಿಭಾಗದ ಒಟ್ಟು ಸೇರಿಗೆಡ್ ವಿಶ್ವ ಗ್ಲುಕೋಮಾ ಸಪ್ತಾಹದ ಪರವಾದ್ ಗ್ಲುಕೋಮಾ ಸಪೋರ್ಟ್ ಗ್ರೂಪ್ನ ಆರಂಭ ಬೊಕ್ಕ ಉಚಿತ ಗ್ಲುಕೋಮಾ ತಪಾಸಣಾ ಲೇಸ್ ನ್ ಶನಿವಾರ ಅಟ್ಟನೆ ಮಲ್ತಿತ್ತೆರ್.

ಶಿಬಿರನ್ ಉದಿಪನ ಮಲ್ತಿನ ನಿವೃತ್ತ ಶಿಕ್ಷಕಿ, ಶಿಕ್ಷಣ ತಜ್ಞೆ ಶೈಲಾ ರಾವ್ ಪಾತೆರ್ದ್ , ಗ್ಲುಕೋಮಾ ಪನ್ಪಿನ ಒವ್ವೆ ಲಕ್ಷಣ ಇಜ್ಜಂದೆ ಬರ್ಪಿನೆರ್ದಾವರ ಕಾಲಕಾಲಗ್ ಕಣ್ಣ್ ತಪಾಸನೆ ಮಲ್ಪುನ ಅನಿವಾರ್ಯ ಪಂದ್ ಪಂಡೆರ್.

ಧಾರ್ಮಿಕ , ಸಾಂಸ್ಕೃತಿಕ ಲೇಸ್ ಡ್ ಪಾಲ್ ಪಡೆಂಡ ಬೇನೆ ಬೇಜಾರ್ ಪೋಪುಂಡು : ಪರಮಾನಂದ ಸಾಲ್ಯಾನ್

ಮುಲ್ಕಿ : ನಮ ಏಪಲಾ ಸಾಮಾಜಿಕ, ಧಾರ್ಮಿಕ, ಸಾಂಸ್ಕೃತಿಕ ಲೇಸ್ ಲೆಡ್ ಪಾಲ್ ಪಡೆಂಡ ಮನಸ್ಸ್ ದ ಬೇನೆ ಬೇಸರ್ ಪೋಪುಂಡು ಪಂಡ್ ದ್ ಹಿರಿಯ ರಂಗ ನಿರ್ದೇಶಕೆರ್, ರಂಗ ಸುದರ್ಶನ (ರಿ) ಸಸಿಹಿತ್ಲು ನೆತ್ತ ತಾಪಕೆರ್ ಪರಮಾನಂದ ಸಾಲ್ಯಾನ್ ಪಂಡೆರ್.

ಕಾರ್ನಾಡ್ ದ ಶ್ರೀ ಹರಿಹರ ಕ್ಷೇತ್ರ ಯುವಕ ವೃಂದ ಬೊಕ್ಕ ಮಹಿಳಾ ಮಂಡಲದ ಶಿವರಾತ್ರಿ ೨೦೨೧ ಕಾರ್ಯಕ್ರಮೊಟ್ಟು ಆರ್ ಪಾತೆರಿಯೆರ್.
ಉಂದುವೇ ಪೊರ್ತುಡು ಮೂಲ್ಕಿ ಕಾರ್ನಾಡು ಕೋರ್ದಬ್ಬು ದೈವಸ್ಥಾನದ ದೇವಪ್ಪ ಗುರಿಕಾರೆರ್, ಕೊರೊನಾ ವಾರಿಯರ್ ಅರುಣ್, ಹಿಂದೂ ರುದ್ರಭೂಮಿಡ್ ಸೇವೆ ಮಲ್ಪುನ ಜಯರಾಜ್ ಸಿ.ಶೆಟ್ಟಿ, ಆರೋಗ್ಯ ಸೇವೆ ಜಾನಕಿ ಎಚ್, ಮೊಕ್ಲೆಗ್ ಮಾನಾದಿಗೆ ನಡತ್ಂಡ್.ಅಂಚೆನೇ ಪ್ರತಿಭಾವಂತ ವಿದ್ಯಾರ್ಥಿಲು ಆಯಿನ ಓಂಕಾರ್ ಪ್ರಭು, ಸಂಜನಾ ಡಿ.ಕೋಟ್ಯಾನ್, ಅದಿತಿ ಬಪ್ಪನಾಡು, ನಮಿತಾ ಸತೀಶ್ ಸಾಲ್ಯಾನ್ ಮೊಕಲೆಗ್ ಮಾನಾದಿಗೆ ನಡತ್ಂಡ್.ಅವ್ವತ್ತಾಂದೆ ಕೈತಲ್ದ ಶಾಲೆಲೆಡ್ ಕಲ್ಪುನ ಪತ್ತ್ ಜನ ಪ್ರತಿಭಾವಂತ ವಿದ್ಯಾರ್ಥಿಲೆಗ್ ವಿದ್ಯಾರ್ಥಿವೇತನ ಪಟ್ಟುನ ಲೇಸ್ ಲ ನಡತ್ಂಡ್.
ಶ್ರೀ ಹರಿಹರ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಎಂ.ಎಚ್. ಅರವಿಂದ ಪೂಂಜ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಬಿನ್ನೆರಾದ್ ಮುಲ್ಕಿ ಬಿಲ್ಲವ ಸಂಘದ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರ್ ಕಲ್, ಶಾಂಭವಿ ಜೆಸಿಐ ಅಧ್ಯಕ್ಷೆರ್ ದಿನೇಶ್ ಕೆ ಶೆಟ್ಟಿ, ಯುವಕ ವೃಂದದ ಅಧ್ಯಕ್ಷೆರ್ ಸುಧೀರ್ ಕೋಟ್ಯಾನ್, ಕಾರ್ಯದರ್ಶಿ ಹರ್ಷರಾಜ್ ಶೆಟ್ಟಿ ಜಿಎಂ, ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಶೋಭಾ ಸುರೇಶ್ ಮಿತ್ತರ್ಮೆಡ್ ಇತ್ತೆರ್.ದಯಾನಂದ ಕೋಟ್ಯಾನ್ ಸೊಲ್ಮೆ ಸಂದಾಯೆರ್. ದಿನೇಶ್ ಕೊಲ್ನಾಡ್ ಲೇಸ್ ಸುಧಾರಿಕೆ ಮಲ್ತೆರ್.

ಭ್ರಷ್ಟಾಚಾರದಾಂತೆ ಆಡಳಿತೆ ಮಲ್ಪುಲೆ: ಎಂ.ಸುದರ್ಶನ್ ,ಮುಲ್ಕಿ ಬಿಲ್ಲವ ಸಂಘೊಡು ಉಚಿತ ಆಯುಷ್ಮಾನ್ ಕಾರ್ಡ್ ಪಟ್ಟುನ ಲೇಸ್

ಮುಲ್ಕಿ : ಗ್ರಾಮ ಪಂಚಾಯಿತಿಲೆಗ್
ಸದಸ್ಯೆರಾದ್ ಆಯ್ಕೆ ಆತಿನಕುಲು ಭ್ರಷ್ಟಾಚಾರ ಮಲ್ಪಂದೆ ಜನೊಕ್ಲೆನ ಸಮಸ್ಯೆಗ್ ಸ್ಪಂದಿಸಾದ್ ಆಡಳಿತೆ ಮಲ್ತ್ಂಡ ಗಾಂಧೀಜಿಯೆರ್ ಎನ್ನ್ ದಿನ ಗ್ರಾಮ ಸ್ವರಾಜ್ಯ, ರಾಮರಾಜ್ಯದ ಕನ ನನಸಾಪುಂಡು ಪಂಡ್ ದ್ ದಕ್ಷಿಣಕನ್ನಡ ಜಿಲ್ಲೆ ಬಿಜೆಪಿದ ಅಧ್ಯಕ್ಷೆರ್ ಎಂ.ಸುದರ್ಶನ್ ಮೇರ್ ಪಂಡೆರ್.

ಮುಲ್ಕಿ ಬಿಲ್ಲವ ಸಂಘ (ರಿ) ಮುಲ್ಕಿ ಉಂದೆತ್ತ ಆಶ್ರಯೊಡು ಬ್ರಹ್ಮ ಶ್ರೀ ನಾರಾಯಣ ಗುರು ಸಭಾಂಗಣೊಡು ಐತಾರ ನಡತಿನ ಆಯುಷ್ಮಾನ್ ಕಾರ್ಡ್ ನೋಂದಣಿ ಲೇಸ್ ಬೊಕ್ಕ ಗ್ರಾಮ ಪಂಚಾಯಿತಿಗ್ ಆಯ್ಕೆ ಆಯಿನ ನಮ್ಮ ಸಮಾಜದ ಸದಸ್ಯೆರ್ ಗ್ ಬೊಕ್ಕ ಮುಲ್ಕಿನಗರಸಭೆತ್ತ ಉಪಾಧ್ಯಕ್ಷೆರೆಗ್ ಮಾನಾದಿಗೆ ಲೇಸ್ ಡ್ ಆರ್ ಪಾತೆರಿಯೆರ್.
ಬಿನ್ನೆರಾದ್ ಬರೋಡ ಬ್ಯಾಂಕ್ ದ ನಿವೃತ್ತ ಅಧಿಕಾರಿ ನೀಲಯ್ಯ ಕೋಟ್ಯಾನ್, ಇಂಟಕ್ ಮುಲ್ಕಿ ಬೆದ್ರ ವಲಯದ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್, ಭಾರತ್ ಬ್ಯಾಂಕ್ ಅಧಿಕಾರಿ ವಾಸುದೇವ ಸಾಲ್ಯಾನ್, ಉದ್ಯಮಿ ವಾಸು ಪೂಜಾರಿ ಚಿತ್ರಾಪು, ಪುರಂದರ ಸಾಲ್ಯಾನ್, ಹಿರಿಯ ಸಾಹಿತಿ ಕೆ.ಎಂ.ಕೋಟ್ಯಾನ್, ಕಟ್ಟಡ ಸಮಿತಿದ ಅಧ್ಯಕ್ಷೆರ್ ವಿಠಲ್ ಸಾಲ್ಯಾನ್, ಮಹಿಳಾ ಮಂಡಲದ ಅಧ್ಯಕ್ಷೆರ್ ಅಂಬಾವತಿ ಮೊಕುಲು ಮಾತ ಇತ್ತೆರ್.ಮುಲ್ಕಿ ನಗರಸಭೆತ್ತ ಉಪಾಧ್ಯಕ್ಷೆರ್ ಸತೀಶ್ ಅಂಚನ್, ಕಿಲ್ಪಾಡಿ ಗ್ರಾಮಪಂಚಾಯ್ತಿ ಅಧ್ಯಕ್ಷೆರ್ ಲೀಲಾವತಿ ಜಿ.ಕುಂದರ್, ಉಪಾಧ್ಯಕ್ಷೆರ್ ಗೋಪಿನಾಥ ಪಡಂಗ, ದಯಾನಂದ ಮಟ್ಟು, ಜಯ ಕುಮಾರ್ ಮಟ್ಟು, ಆನಂದ ಕೆ.ಪೂಜಾರಿ, ವೇದಾವತಿ ಜಯಕುಮಾರ್, ನವೀನ್ ಕೋಟ್ಯಾನ್ ಕವತ್ತಾರ್, ಮಮತಾ ಕರ್ಕೇರ, ರಾಜೇಶ್ ಕುಬೆವೂರು, ಸುಜಾತಾ ಪ್ರಭಾಕರ್, ವನಜ ಕರ್ನಿರೆ ಮೊಕಲೆಗ್ ಮಾನಾದಿಗೆ ನಡತ್ಂಡ್.ಉಂದುವೇ ಪೊರ್ತುಡು ಕರರ್ನಾಟಕ ಒನ್ ಸಕಾಯೊಡು ನಡತಿನ ಉಚಿತ ಆಯುಷ್ಮಾನ್ ಕಾರ್ಡ್ ಪಟ್ಟುನೆತ್ತ ಪ್ರಯೋಜನೊನು ೪೦೦ ದ್ದೆರ್ದ್ ಲ ಎಚ್ಚ ಜನೊಕ್ಕುಲು ಪಡೆಯೆರ್.ಬಿಲ್ಲವ ಸಂಘದ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರ್ ಕಲ್ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್.
ಕಾರ್ಯದರ್ಶಿ ಕಮಲಾಕ್ಷ ಬಡಗುಹಿತ್ಲು ಬಿನ್ನೆರೆನ್ ಎದುಕೊಂಡೆರ್. ವಾಮನ ನಡಿಕುದ್ರು ಸೊಲ್ಮೆ ಸಂದಾಯೆರ್ .ಬಿಲ್ಲವ ಸೇವಾ ದಳತ್ತ ಸತೀಶ್ ಕಿಲ್ಪಾಡಿ ಲೇಸ್ ಸುಧಾರಿಕೆ ಮಲ್ತೆರ್.