ಕುಡ್ಲದ ಸುದ್ದಿ | Mangalore News

ಬಂಟ್ವಾಳಡ್ ಕತರ್ ನಾಕ್ ಕಲ್ವೆರ್ ಉಲಾಯಿ

ಬಂಟ್ವಾಳ: ಬಂಟ್ವಾಳ ಸ್ಟೇಷನ್ ದ ಪೊಲೀಸೆರ್ ಬೊಲ್ಪುಗೆ ಬಂಗಾರ್ ಕಂಡೊಂದು ಇತ್ತಿನ ಕಲ್ವೆರೆನ್ ಪತ್ತ್ ದೆರ್.

ಕಸಬಾ ಬೇಂಗ್ರೆ ನಿವಾಸಿ ಮಹಮ್ಮದ್ ಆಯುಬು ಅರೆನ ಮಗೆ ಫರಾಜ್(27) ಬೊಕ್ಕ ಸುರತ್ಕಲ್ ತಾಲೂಕು ಚೊಕ್ಕಬೆಟ್ಟು, ಕೃಷ್ಣಪುರ 8- 36 ಸೈಟ್ ನಂ 37, 4ನೇ ಬ್ಲಾಕ್ ನಿವಾಸಿ ಅಬ್ಬಾಸ್ ಅರೆನ ಮಗೆ ತೌಸಿಫ್ ಅಹಮ್ಮದ್ (34) ಅರೆಸ್ಟ್ ಆಯಿನಕುಲು.

ಮೊಕ್ಲೆಡ ಒಟ್ಟು ರೂ. 12,23,000/- ಮೌಲ್ಯದ 223ಗ್ರಾಂ ಬಂಗಾರ್ ಬೊಕ್ಕ ರೂ 3000/- ಮೌಲ್ಯದ ಬೊಳ್ಳಿ ವಸ್ತ್ ಬೊಕ್ಕ ಕೃತ್ಯಗ್ ಬಳಕೆ ಮಲ್ತಿನ ಸುಮಾರ್ 3,30,000/- ಮೌಲ್ಯದ ಮಹೀಂದ್ರ ಕೈಲೋ ಕಾರು ಬೊಕ್ಕ ಬೈಕ್ ಸೇರಿನಂಚ ಒಟ್ಟು ರೂ 15,56,000/- ಮೌಲ್ಯದ ಸೊತ್ತುಲೆನ್ ಪೊಲೀಸೆರ್ ವಶಕ್ ಪಡೆಯೊಂದೆರ್.

ಆರೋಪಿಲೆನ ಪತ್ತೆ ಕಾರ್ಯಡ್ ಎಸ್.ಪಿ. ಸಿ.ಬಿ ರಿಷ್ಯಂತ್, ಎಸ್.ಪಿ. ಧರ್ಮಪ್ಪ ಎನ್. ಎಂ, ಡಿ.ವೈ.ಎಸ್.ಪಿ. ಪ್ರತಾಪ್ ಸಿಂಗ್ ಥೋರಾಟ್ ನಿರ್ದೇಶನದಂಚ ಪೋಲಿಸ್ ಇನ್ಸ್ ಪೆಕ್ಟರ್ ನಾಗರಾಜ್ ಹೆಚ್. ಇ. ಅರೆನ ನೇತ್ರತ್ವಡ್ ಬಂಟ್ವಾಳ ನಗರ ಠಾಣೆದ ಎಸ್.ಐ.ರಾಮಕೃಷ್ಣ ಅಪರಾಧ ವಿಭಾಗದ ಎಸ್.ಐ ಕಲೈಮಾರ್, ಎ. ಎಸ್. ಐ ನಾರಾಯಣ, ಹೆಡ್ ಕಾನ್ಸ್ ಸ್ಟೇಬಲ್ ಇರ್ಷಾದ್ ಪಿ. ರಾಜೇಶ್, ಮನೋಹರ, ಸಿಬ್ಬಂದಿಲಾಯಿನ ಉಮೇಶ್ ಹಿರೇಮಠ, ರಂಗನಾಥ್ ಬೊಕ್ಕ ಜಿಲ್ಲಾ ಬೆರಳಚ್ಚು ಘಟಕದ ಸಚಿನ್ ಬೊಕ್ಕ ಉದಯ ಬೊಕ್ಕ ಜಿಲ್ಲಾ ಗಣಕಯಂತ್ರ ಕೇಂದ್ರದ ದಿವಾಕರ ಆರೋಪಿಲೆನ ಪತ್ತೆಗ್ ಸಹಕಾರ ಮಲ್ತೆರ್.

ಸಾಂಪ್ರದಾಯಿಕ ಕಸುಬುದ ಮುಖೆನ ದೇಶಗ್ ಕೊಡುಗೆ ಕೊರ್ನ ಕುಶಲಕರ್ಮಿಲು ನನ ಮಿತ್ತರ್ಮೆಗ್ ಬರಿಯೆರೆ ಉಲ್ಲೆರ್: ವೇದವ್ಯಾಸ್ ಕಾಮತ್

ಭಾರತಗ್ ಸ್ವಾತಂತ್ರ್ಯ ತಿಕ್ಕುನ ದುಂಬುದಿಂಚಲ ದೇಶದ ಏಳಿಗೆಗ್ ಅಕ್ಲೆನನೇ ಆಯಿನ ಸಾಂಪ್ರದಾಯಿಕ ಕಸಬುದ ಮೂಲಕ ಅಮೂಲ್ಯವಾಯಿನ ಕೊಡುಗೆನ್ ಕೊರ್ನಂಚಿತ್ತಿನ ಕರ ಕುಶಲಕರ್ಮಿಲೆನ್ ಪಿರೋರ ಜಾಗತಿಕವಾದ್ ಮಿತ್ತ್ ಕನಪುನ ನಿಲೆಟ್ಟ್ ಭಗವಾನ್ ವಿಶ್ವಕರ್ಮ ಜಯಂತಿ ದಾನಿ “ಪಿಎಂ ವಿಶ್ವಕರ್ಮ” ಯೋಜನೆನ್ ಪ್ರಧಾನಿ ನರೇಂದ್ರ ಮೋದಿ ಜಾರಿ ಕಾನಯೆರೆ ಉಲ್ಲೆರ್ ಪಂದ್ ಶಾಸಕೆರ್ ವೇದವ್ಯಾಸ್ ಕಾಮತ್ ಪಂಡೆರ್.

ಕೇಂದ್ರ ಸರ್ಕಾರದ “ಪಿಎಂ ವಿಶ್ವಕರ್ಮ” ಯೋಜನೆ ಲೋಕಾರ್ಪಣೆ ಕಾರ್ಯಕ್ರಮಗ್ ಕೇಂದ್ರ ಸಚಿವೆರಾಯಿನ ಪರ್ಷೋತ್ತಮ್ ರೂಪಾಲ ಮೆರ್ ಕುಡ್ಲ ಪೇಂಟೆದ ಕಾರ್ ಸ್ಟ್ರೀಟ್ ಡ್ ಇಪ್ಪುನ ಕಾಳಿಕಾಂಬಾ ದೇವಸ್ಥಾನಗ್ ಭೇಟಿ ಕೊರ್ದ್ ಬೊಕ್ಕ ಜಿಲ್ಲಾಡಳಿತದ ಮುತಾಲಿಕೆಡ್ ನಡತೊಂದು ಇತ್ತಿನ ಭಗವಾನ್ ವಿಶ್ವಕರ್ಮ ಜಯಂತಿ ಕಾರ್ಯಕ್ರಮಡ್ ಪಾಲ್ ಪಡೆಯೆರ್.

ಈ ಕಾರ್ಯಕ್ರಮಕ್ಕ್ ಹೇಳಿಕೆ ಇಜ್ಜಿಂಡಲ ಕೇಂದ್ರ ಸಚಿವೆರಾಯಿನ ಪರ್ಷೋತ್ತಮ್ ರೂಪಾಲ ಪಾಲ್ ಪಡೆನವು ವಿಶೇಷ ಆದ್ ಇತ್ತ್ಂಡ್. ಆಂಡ ಮುಖ್ಯವಾದ್ ಇಪ್ಪೊಡಾಯಿನ ಜಿಲ್ಲೆದ ಉಸ್ತುವಾರಿ ಸಚಿವೆರೇ ಇಜ್ಜಾಂಡ್. ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆದ ಅಧಿಕಾರಿಲು ಬುಂಡ ಸರ್ಕಾರದ ಬೇತೆ ಪ್ರತಿನಿಧಿಲು ಇಜ್ಜಾಂಡ್. ಶಿಷ್ಟಾಚಾರದ ಪ್ರಕಾರ ಜಿಲ್ಲಾಡಳಿತದ ಉಸ್ತುವಾರಿಡ್ ಅವೊಡಾಯಿನ ಕಾರ್ಯಕ್ರಮಟ್ಟ್ ಸರ್ಕಾರದ ಬೇಜವಾಬ್ದಾರಿ ದೇರ್ತ್ ತೋಜುಂಡು. ಉಂದು ಭಾರಿ ಬೇಜಾರದ ಸಂಗತಿ ಪಂದ್ ಪಂಡೆರ್.

ಉರ್ವ: 34ನೇ ವರ್ಷದ ಸಾರ್ವಜನಿಕ ಗಣಪತಿ ಉಚ್ಚಯ

ಸಾರ್ವಜನಿಕ ಶ್ರೀ ಗಣೇಶೋತ್ಸವ ಉರ್ವ, ಹಿಂದೂ ಸೇವಾ ಸಮಿತಿ ಉರ್ವ, ಅಶೋಕನಗರ, ನೆತ್ತ ಮುತಾಲಿಕೆಡ್ 34 ನೇ ವರ್ಷದ ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸೆಪ್ಟೆಂಬರ್ 19 ರ್ದ್ ಸೆಪ್ಟೆಂಬರ್ 21 ಮುಟ ಉರ್ವ ಶ್ರೀ ಮಾರಿಯಮ್ಮ ದೇವಸ್ಥಾನದ ಕೈತಲ್ ಶ್ರೀ ಗಣೇಶ ಮಂಟಪಡ್ ನಡಪೆರೆ ಉಂಡು.

ಸೆ. 19 ಅಂಗಾರೆ ಕಾಂಡೆ ಶ್ರೀ ಮಾತೆ ಮಾರಿಯಮ್ಮನ ಸನ್ನಿಧಿಡ್ ಪ್ರಾರ್ಥನೆ , ಮಹಾಗಣಪತಿ ಪ್ರತಿಷ್ಠೆ – ಧ್ವಜಾರೋಹಣ, ಮದ್ಯಾಹ್ನ – ಮಹಾಪೂಜೆ – ಪ್ರಸಾದ ವಿತರಣೆ, ರಾತ್ರೆ – 7ಗಂಟೆಗ್ ಸಭಾ ಕಾರ್ಯಕ್ರಮ ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮ ನಡಪೆರೆ ಉಂಡು.

ಸೆ.20 ಬುಧವಾರ ಕಾಂಡೆ 108 ತಾರಾಯಿದ ಮಹಾ ಗಣಯಾಗ ಸುರು, ಮದ್ಯಾಹ್ನ ಪ್ರಸಾದ ವಿತರಣೆ ಬೊಕ್ಕ ಬಯ್ಯ – ಭರತ ನಾಟ್ಯ ಬೊಕ್ಕ ನೃತ್ಯ ರೂಪಕ, ರಾತ್ರೆ 9 ಗಂಟೆಗ್ ರಂಗಪೂಜೆ ಪ್ರಸಾದ ವಿತರಣೆ.

ಸೆ.21 ಈ ಸರ್ತಿ ವಿಶೇಷವಾದ್ ಪುಲ್ಯ ಕಾಂಡೆ 4.30 ಕ್ಕ್ ವಿವಾಹ ಬೊಕ್ಕ ಸಂತಾನ ಪ್ರತಿಬಂಧಕ ದೋಷ ನಿವಾರಣೆಗಾದ್ ” ಶ್ರೀ ಬಾಲ ಗಣಪತಿ ಹವನ” ಕಾಂಡೆ 5 ಗಂಟೆಗ್- ಉಷಾ ಪೂಜೆ, ಮದ್ಯಾಹ್ನ – ಶ್ರೀ ಬಾಲಗಣಪತಿ ಪ್ರಸನ್ನ ಪೂಜೆ, ಪ್ರಸಾದ ವಿತರಣೆ.

ಬೊಕ್ಕ ಬಯ್ಯ 6 ಗಂಟೆಗ್ ಶ್ರೀ ಮಹಾ ಗಣಪತಿ ದೇವೆರ್ನ ಭವ್ಯ ಶೋಭಾಯಾತ್ರೆ ಉರ್ವ ಗಣೇಶ ಮಂಟಪರ್ದ್ ಸುರು ಆದ್ ದಂಬೆಲ್ ಸುದೇತ ಕೈತಲ್ ದೇವೆರ್ನ ಮೂರ್ತಿನ್ ವಿಸರ್ಜನೆ ಮಲ್ಪೆರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಮಂಗಳ ಚಾವಡಿಡೆ ವಿಶ್ವವಿದ್ಯಾಲಯದ ಗಣೇಶೋತ್ಸವ: ಹಿಂದೂ ಸಮಾಜದ ಹೋರಾಟಗ್ ತಿಕ್ಕಿನ ಜಯ: ಶಾಸಕೆರ್ ಕಾಮತ್

ಕುಡ್ಲ ವಿಶ್ವವಿದ್ಯಾಲಯದ ಗಣೇಶೋತ್ಸವ ವಿಚಾರಡ್ ಕಾರಣದಾಂತೆ ಗೊಂದಲ ಇತ್ತ್ಂಡ್. ಆಂಡ ಇತ್ತೆ ಪಿರ ದುಂಬುದಂಚನೆ ಗಣೇಶೋತ್ಸವ ಅವ್ವೆ ಜಾಗಡ್ ದುಂಬು ಕೊನೊವೊಡು ಪಂದ್ ಆದೇಶ ಬತ್ತಿನವ್ ಖುಷಿತ ವಿಚಾರ. ಈತ್ ದಿನ ಬೊರ್ಚಾಂದಿನ ವಿವಾದನ್ ಸೃಷ್ಟಿ ಮಲ್ತ್ ದ್ ಜನಕ್ಲೆನ ದಿಕ್ಕ್ ನ್ ತಪ್ಪಾವುನಂಚ ಪ್ರಯತ್ನನ್ ಮಲ್ತೊಂದು ಇತ್ತಿನಕ್ಲೆಗ್ ಉಂದು ಒಂಜಿ ಸ್ಪಷ್ಟ ಸಂದೇಶ ಆತ್ಂಡ್ ಪಂದ್ ಕುಡ್ಲ ವಿಧಾನ ಸಭಾ ಕ್ಷೇತ್ರದ ಶಾಸಕೆರಾಯಿನ ವೇದವ್ಯಾಸ್ ಕಾಮತೆರ್ ಪಂತೆರ್.

ಒವ್ವೆ ಗೊಂದಲಗ್ ಕೆಬಿ ಕೊರಂದೆ ಈ ದುಂಬುದಂಚ ಗಣೇಶೋತ್ಸವ ನಡಪಾವುನ ಬಗೆಟ್ ಬತ್ತ್ ಇಪ್ಪುನ ಆದೇಶ ಇಡೀ ಹಿಂದೂ ಸಮಾಜದ ಹೋರಾಟಗ್ ತಿಕ್ಕಿನ ಜಯ. ಕಾಂಗ್ರೆಸ್ ಸರ್ಕಾರ ಏಪಲ ಹಿಂದೂ ಧರ್ಮದ ಆಚರಣೆಗ್ ಮಾತ್ರ ನಿರ್ಬಂಧನ್ ಪಾಡುನ ಮುಕೇನ ಗೊಂದಲ ಸೃಷ್ಟಿ ಮಲ್ಪುನ ಕೆಲಸನ್ ದುಂಬುಲ ಮಲ್ತ್ ಇತ್ತೆರ್. ಇತ್ತೆಲ ಅವೆನ್ ದುಂಬು ಕೊನೊವೊಂದು ಉಲ್ಲೆರ್.

ಕೆಲವೆರ್ ವೇದವ್ಯಾಸ್ ಕಾಮತ್ ಮೆರ್ ಪಿದಾಯಿರ್ದ್ ಬತ್ತ್ ದ್ ಈ ಸಮಸ್ಯೆನ್ ಸೃಷ್ಟಿ ಮಲ್ತ್ ದೆರ್ ಪಂದ್ ಪನೊದಿಂತ್ತೆರ್. ಆಂಡ ಸುರುಕೆ ಇತ್ತಿನ ಜಾಗೆಡೆ ಗಣೇಶೋತ್ಸವ ನಡಪಾವೊಂದು ಕೊನೊವೊಂದು ಇತ್ಂಡ ಈತ್ ಚರ್ಚೆ ಆವೆರೆ ಇಜ್ಜಾಂಡ್ ಪಂದ್ ಪಂಡೆರ್.

ವಿಶ್ವವಿದ್ಯಾನಿಲಯಡ್ ಆಪುನ ಗಣೇಶೋತ್ಸವನ್ ಉಂತಾವೆರೆ ಗೊಂದಲ ಸೃಷ್ಟಿ ಮಲ್ಪೆರೆ ಸರಕಾರಗ್ ಕಾಕಜಿ ಬರೆದ್ ಇತ್ತೆರ್. ಆಂಡ ಹಿಂದೂ ಸಮಾಜದ ತೀವ್ರ ವಿರೋಧ ಬೊಕ್ಕ ಪ್ರತಿಭಟನೆಗ್ ಕಡೆಕ್ಲ ವಿಶ್ವವಿದ್ಯಾನಿಲಯದ ಕುಲಪತಿ ಈ ದುಂಬುದಂಚ ಮಂಗಳಾ ಚಾವಡಿಡೆ ಗಣೇಶೋತ್ಸವ ಆಚರಣೆ ಮಲ್ಪ ಪಂದ್ ನಿರ್ಣಯ ಮಲ್ತ್ ದೆರ್.

ಈ ಮುಖೆನ ಹಿಂದೂ ಸಮಾಜದ ಶ್ರದ್ಧೆ-ಭಕ್ತಿ-ನಂಬಿಕೆ ಧಾರ್ಮಿಕ ಆಚರಣೆಗ್ ಧಕ್ಕೆ ಆವಂದಿನಂಚ ಭಾರತೀಯ ಜನತಾ ಪಾರ್ಟಿ ಏಪಲ ಪೊಂರ್ಬಾಟ ಸಿದ್ದ ಪನ್ಪುನ ಸ್ಪಷ್ಟವಾಯಿನ ಸಂದೇಶನ್ ರಾಜ್ಯದ ಕಾಂಗ್ರೆಸ್ ಸರ್ಕಾರಗ್ ಕೊರ್ಪೆ ಪಂದ್ ಪಂಡೆರ್.

ಬೆಂಗಳೂರು ಕುಡ್ಲ ಸೆಂಟ್ರಲ್ ಎಕ್ಸ್‌ಪ್ರೆಸ್ ರೈಲ್ ಮುರ್ಡೇಶ್ವರ ಮುಟ್ಟ ವಿಸ್ತರಣೆದ ಬೇಡಿಕೆ ಈಡೇರ್ದ್ಂಡ್ :ಶಾಸಕೆರ್ ಕಾಮತ್

ಬೆಂಗಳೂರು-ಮೈಸೂರು- ಕುಡ್ಲ ಸೆಂಟ್ರಲ್ ಎಕ್ಸ್‌ಪ್ರೆಸ್ ರೈಲ್ ಪುಣ್ಯಕ್ಷೇತ್ರ ಮುರ್ಡೇಶ್ವರ ಮುಟ್ಟ ವಿಸ್ತರಣೆ ಆಪಿನ ಮೂಲಕ ರಾಜಧಾನಿ, ಸಾಂಸ್ಕೃತಿಕ ರಾಜಧಾನಿ, ಕರಾವಳಿ ಬೊಕ್ಕ ಪುಣ್ಯಕ್ಷೇತ್ರದ ಪ್ರಯಾಣಿಕೆರ್ನ ಕೆಲವ್ ದಿನತ ಬೇಡಿಕೆ ಈಡೇರ್ದ್ಂಡ್ ಪಂದ್ ಶಾಸಕ ವೇದವ್ಯಾಸ ಕಾಮತ್ ಪಂತೆರ್.

ಸಂಸದೆರ್ ನಳಿನ್ ಕುಮಾರ್ ಕಟೀಲ್, ರೈಲ್ವೆ ಸಚಿವೆರಾಯಿನ ಅಶ್ವಿನಿ ವೈಷ್ಣವ್ ಅರೆಡ ಪಾತೆರ್ದ್ ನಿರಂತರ ಪ್ರಯತ್ನದ ಮೂಲಕ ಜನತೆಗ್ ಅನುಕೂಲ ಆಪುಲೆಕ ಮಲ್ಪುನೆಟ್ ಯಶಸ್ವಿಯಾತೆರ್.

ಪ್ರಧಾನಿ ನರೇಂದ್ರ ಮೋದಿನ ನವ ಭಾರತದ ಕನ ದೇಶದ ಮೂಲೆ ಮೂಲೆಡ್ ಬುಲೆಯೊಂದು ಉಂಡು ಪಂದ್ ಪಂಡಿನ ಮೊಕ್ಲೆಗ್ ಮಾತಾ ಸೊಲ್ಮೆ ಸಂದಾವೆ ಪಂದ್ ಶಾಸಕೆರ್ ಪಂಡೆರ್.