ಕುಡ್ಲದ ಸುದ್ದಿ | Mangalore News

ಗ್ರೀನ್ ಪಟಾಕಿ ಗಲಸೆರೆ ಜಿಲ್ಲಾಧಿಕಾರಿ ಸೂಚನೆ

ಕುಡ್ಲ : ತುಡರ್‌ ಪರ್ಬದ ಪೊರ್ತುಡು ಸಾರ್ವಜನಿಕೆರ್ನ ಆಸ್ತಿ ಬೊಕ್ಕ ಆರೋಗ್ಯದ ಸಂರಕ್ಷಣೆ, ಪರಿಸರ ಮಾಲಿನ್ಯ ಬೊಕ್ಕ ಶಬ್ದ ಮಾಲಿನ್ಯನ್‌ ನಿಯಂತ್ರಣ ಮಲ್ಪುನ ಉದ್ದೇಶಡ್ ಎಚ್ಚ ಶಬ್ದ ಮಲ್ಪುನ ಪಟಾಕಿ ಬೊಕ್ಕ ಸುಡುಮರ್ದ್‌ ಮಾರಾಟ ಮಲ್ಪುನ ಬೊಕ್ಕ ಗಲಸುನೆನ್‌ ನಿಷೇಧ ಮಲ್ತ್‌ದೆರ್.‌

ಅಂಚಾದ್ ಸಾರ್ವಜನಿಕೆರ್ 125dB ಅತ್ತ್‌ಂಡ 145dB ರ್ದ್ ಎಚ್ಚ ಶಬ್ದ ಮಲ್ಪುನ ಪಟಾಕಿ ಬೊಕ್ಕ ಸುಡುಮರ್ದ್‌ಲೆನ್‌ ಗಲಸೆರ ಬಲ್ಲಿ ಪಂದ್‌ ಜಿಲ್ಲಾಧಿಕಾರಿ ತೆರಿಪಾದೆರ್.

ಡಿ.30: ಕ್ಯಾ. ಬ್ರಿಜೇಶ್ ಚೌಟ ಸಾರಥ್ಯಡ್ 7ನೇ ವರ್ಷದ ರಾಮ ಲಕ್ಷ್ಮಣ ಜೋಡುಕರೆ ಕಂಬುಲದ ಸಭೆ

ಕುಡ್ಲ : ಕ್ಯಾಪ್ಟನ್ ಬ್ರಿಜೇಶ್ ಚೌಟ ಸಾರಥ್ಯಡ್ ಡಿಸೆಂಬರ್ 30 ದಾನಿ ನಡಪುನ 7 ನೇ ವರ್ಷದ ಕುಡ್ಲ ರಾಮ ಲಕ್ಷ್ಮಣ ಜೋಡುಕರೆ ಕಂಬುಲದ ಪೂರ್ವಭಾವಿ ಸಭೆ ಜನತಾ ಡಿಲಕ್ಸ್ ಹೋಟೆಲ್‌ದ ಸಭಾಂಗಣಡ್‌ ನಡತ್‌ಂಡ್.

ಸಭೆತ್ತ ಗುರ್ಕಾರ್ಮೆನ್‌ ವಹಿಸಿನ ಕಂಬುಲದ ರೂವಾರಿ ಕ್ಯಾಪ್ಟನ್ ಬ್ರಿಜೇಶ್ ಚೌಟ ಪಾತೆರ್ದ್, ಕುಡ್ಲ ಮಹಾನಗರಡ್‌ ಕಂಬುಲ ಸುರು ಮಲ್ಪರೆ ಸಹಕಾರ ಕೊರ್ನಕ್ಲೆನ್‌ ನೆಂಪು ಮಲ್ತೆರ್. 7ನೇ ವರ್ಷದ ಕಂಬುಲದ ವ್ಯವಸ್ಥೆದ ಬಗ್ಗೆ ಸಲಹೆ ಸೂಚನೆನ್‌ ಕೊರಿಯೆರ್.

ಸಮಿತಿದ ಗೌರವ ಸಲಹೆಗಾರೆರ್ ಪ್ರಸಾದ್ ಶೆಟ್ಟಿ, ಜಿಲ್ಲಾ ಕಂಬುಲ ಸಮಿತಿ ಪ್ರಧಾನ ಕಾರ್ಯದರ್ಶಿ ಲೋಕೇಶ್ ಮುಚ್ಚೂರು, ಜಿಲ್ಲಾ ಸಮಿತಿ ಮಾಜಿ ಅಧ್ಯಕ್ಷೆರ್ ಪಿ.ಆರ್.ಶೆಟ್ಟಿ, ತೀರ್ಪುಗಾರೆರ್ನ ಸಮಿತಿದ ಸಂಚಾಲಕೆರ್ ವಿಜಯಕುಮಾರ್ ಕಂಗಿನಮನೆ, ಕುಡ್ಲ ಮಹಾನಗರ ಪಾಲಿಕೆ ಸದಸ್ಯೆರ್ ಅನಿಲ್ ಕುಮಾರ್‌,‌ ಕಂಬುಲ ಸಮಿತಿದ ಪ್ರಧಾನ ಕಾರ್ಯದರ್ಶಿ ಸುಜಿತ್ ಪ್ರತಾಪ್, ಕೋಶಾಧಿಕಾರಿ ಪ್ರೀತಮ್ ರೈ ಇತ್ತೆರ್.

ನ.3-5: “ಕದ್ರಿ ಪಾರ್ಕ್‌ಡ್ ಪರ್ಬದ ಮೇಳ” ಲೇಸ್‌

ಕುಡ್ಲದ ಮಂಗಳಾ ದೇವಿದ ಶಾಂತ ದುರ್ಗಾ ಸ್ವಸಹಾಯ ಸಂಘದ ಮುತಾಲಿಕೆಡ್ ಸಸ್ಯ ಮೇಳ, ವಸ್ತು ಪ್ರದರ್ಶನ ಬೊಕ್ಕ ಮಾರಾಟ ಮೇಳ “ಕದ್ರಿ ಪಾರ್ಕ್ ಡ್ ಪರ್ಬದ ಮೇಳ” ಸಂಭ್ರಮ ನ.3ರ್ದ್ ನ. 5 ಮುಟ್ಟ ಪ್ರತಿ ದಿನ ಕಾಂಡೆ 9 ಗಂಟೆರ್ದ್ ರಾತ್ರೆ 9 ಗಂಟೆ ಮುಟ್ಟ ನಡಪರೆ ಉಂಡು. ನ.3 ಬಯ್ಯ 5 ಗಂಟೆಗ್ ಉದಿಪನ ಲೇಸ್‌ ನಡಪರೆ ಉಂಡು.

ಈ ಕಾರ್ಯಕ್ರಮಡ್‌ ಶಾಸಕೆರ್ ವೇದವ್ಯಾಸ್ ಕಾಮತ್ , ಮಹಾನಗರ ಪಾಲಿಕೆದ ಸದಸ್ಯೆರ್ ಶಕೀಲಾ ಕಾವ, ಕುಡ್ಲ ತೋಟಗಾರಿಕಾ ಇಲಾಖೆದ ಉಪನಿರ್ದೇಶಕೆರ್ ಹೆಚ್ ಆರ್ ನಾಯ್ಕ್, ACP ಟ್ರಾಫಿಕ್ ಪೊಲೀಸ್ ಗೀತಾ ಕುಲಕರ್ಣಿ, ಕುಡ್ಲ ದಕ ಜಿಲ್ಲಾ ಸಣ್ಣ ಕೈಗಾರಿಕಾ ಅಶೋಸಿಯೇಷನ್‌ದ ಅಧ್ಯಕ್ಷೆರ್ ವಿಶಾಲ್ ಎಲ್ ಸಾಲಿಯಾನ್, ಪಾಲ್‌ ಪಡೆಯೆರೆ ಉಲ್ಲೆರ್.‌ ನ. 5 ದಾನಿ ಬಯ್ಯಗ್ 5 ಗಂಟೆಗ್ ಕಲಾ ತಪಸ್ವಿ ಸಾಂಸ್ಕೃತಿಕ ತಂಡ ಧರ್ಮನಗರ ವಿಟ್ಲ ಮೊಕ್ಲೆರ್ದ್ ಅಮೋಘ ಮನೋರಂಜನಾ ಕಾರ್ಯಕ್ರಮ ನಡಪರೆ ಉಂಡು.

ಕುಡ್ಲ: ಲವ್ವರ್ ಔಟಿಂಗ್ ಬತ್ತಿಜಲ್‌ ಪಂದ್ ಪೀಜಿಗೇ ಕಲ್ಲ್‌ ದಕ್ಕಿನ ಜವನೆ..!!!

ಕುಡ್ಲ : ತನ್ನ ಲವರ್ ಔಟಿಂಗ್ ಬತ್ತಿಜಲ್ ಪಂದ್‌ ಆಲ್‌ ಬೇಲೆ ಮಲ್ತೊಂದು ಇತ್ತಿನ ಕಟ್ವಾನಗ್‌ ಜವನೆ ಒರಿ ಕಲ್ಲ್ ದಕ್ಕಿನ ಘಟನೆ ಕುಡ್ಲದ ಸೆಂಟ್ ಆಗ್ನೇಸ್ ಕಾಲೇಜ್‌ದಲ್ಪ ನಡತ್‌ಂಡ್. ಸುಳ್ಯ ನಿವಾಸಿ ವಿವೇಕ್ (18) ಪನ್ಪಿನಾಯೆ  ಪೀಜಿಡ್‌ ಬೇಲೆ ಮಲ್ತೊಂದು ಇತ್ತೆ. ಲವ್ವರ್‌ನ್‌ ಕೋಡೆ (ನವೆಂಬರ್ 2) ಬಯ್ಯಗ್ ಔಟಿಂಗ್​ ಬರಿಯೆರೆ ಪಂದ್‌ ಇತ್ತೆ.

ಆಂಡ ಪೊಣ್ಣು ಔಟಿಂಗ್ ಬರಿಯೆರೆ ಒಪ್ಪ್ಯಂದಿನೆಕ್ಕ್ ಕೋಪಡ್ ವಿವೇಕ್, ಆಲ್‌ ಇತ್ತಿನ ಪೀಜಿಗ್‌ ಕಲ್ಲ್‌ ದಕ್ಕ್‌ದೆ. ಘಟನೆಡ್‌ ಗ್ಲಾಸ್‌ ಪೊಡಿ ಆದ್, ಸಾರ್ವಜನಿಕೆರ್ನ ಕೈರ್ದ್‌ ದರ್ಮೊದ ಪೆಟ್ಟ್‌ ತಿಂತೆ.

ಅಪಾರ್ಟ್‌ಮೆಂಟ್‌ ಮ್ಯಾನೇಜರ್‌ ಆತ್ಮಹತ್ಯೆ..!

ಕುಡ್ಲ: ನಗರದ ಕದ್ರಿ ಕಂಬುಲದಲ್ಪ ಇಪ್ಪುನ ಅಪಾರ್ಟ್‌ಮೆಂಟ್‌ಡ್ ಫೆಸಿಲಿಟಿ ಮ್ಯಾನೇಜರ್‌, ಬಂಟ್ವಾಳ ನಿವಾಸಿ ಹರೀಶ್‌ ಕುಮಾರ್‌ (38) ಬಲ್ಲ್‌ ಪಾಡೊಂದು ಆತ್ಮಹತ್ಯೆ ಮಲ್ತಿನ ಬಗ್ಗೆ ಕದ್ರಿ ಠಾಣೆಡ್‌ ಕೇಸ್‌ ದಾಖಲಾತ್‌ಂಡ್.

ಹರೀಶ್‌ ಕುಮಾರ್‌ ಅರೆನ ಪುನ ಸೋಮವಾರ ಮಧ್ಯಾಹ್ನದ ಪೊರ್ತುಗು ಅಪಾರ್ಟ್‌ಮೆಂಟ್‌ದ ಕೋಣೆಡ್‌ ಪತ್ತೆ ಆತ್‌ಂಡ್. ಆತ್ಮಹತ್ಯೆಗ್ ಕಾರಣ ತೆರಿದ್‌ ಬೈದಿಜಿ. ತನಿಖೆ ಮಲ್ತೊಂದು ಉಲ್ಲ ಪಂದ್ ಪೊಲೀಸೆರ್‌ ತೆರಿಪಾದೆರ್.

ಮುದ್ದು ಮೂಡುಬೆಳ್ಳೆ ಬರೆತಿನ “ತುಳುನಾಡ್‌ದ ಜನಪದ ವಾದ್ಯೊಲು ಬೊಕ್ಕ ಪಾರಂಪರಿಕ ವೃತ್ತಿಲು” ಬೂಕು ಬುಡುಗಡೆ

ಕುಡ್ಲ : ಹಿರಿಯ ಬರವುಗಾರೆರ್, ಜಾನಪದ ವಿದ್ವಾಂಸೆರ್ ಮುದ್ದು ಮೂಡುಬೆಳ್ಳೆ ಮೇರ್ ಬರೆತಿನ “ತುಳುನಾಡ್‌ದ ಜನಪದ ವಾದ್ಯೊಲು ಬೊಕ್ಕ ಪಾರಂಪರಿಕ ವೃತ್ತಿಲು” ಬೂಕು ಬುಡುಗಡೆ ಲೇಸ್ ನ.2 ಗುರುವಾರ ಕುಡ್ಲದ ಪ್ರೆಸ್ ಕ್ಲಬ್‌ಡ್ ನಡತ್ಂಡ್.

ಈ ಬೂಕುನ್ ಜಾನಪದ ವಿದ್ವಾಂಸೆರ್ ಡಾ.ಗಣನಾಥ ಶೆಟ್ಟಿ ಎಕ್ಕಾರು ಮೇರ್ ಬುಡುಗಡೆ ಮಲ್ತೆರ್. ಅವೆರ್ದ್ ಬೊಕ್ಕ ಪಾತೆರಿನ ಆರ್, ಮುದ್ದು ಮೂಡುಬೆಳ್ಳೆ ಮೇರ್ ತುಳುನಾಡ್‌ದ ಮಾಮಲ್ಲ ವಿದ್ವಾಂಸೆರ್. ಆರ್ ತುಳು ಬೊಕ್ಕ ಕನ್ನಡಡ್ ಕವಿ, ಕಬಿತೆ ಬೊಕ್ಕ ಲೇಖಕೆರ್ ಸಂಶೋಧಕೆರ್ ಆದ್ ಬೇಲೆ ಮಲ್ತಿನಾರ್. ಅರೆನ ಮಸ್ತ್ ಬೂಕುಲು ತುಳು ಅಧ್ಯಯನ ಕ್ಷೇತ್ರಗ್ ಕೊಡುಗೆ ಕೊರ್ತ್ಂಡು. ತುಳುನಾಡ್‌ದ ಜನಪದ ವಾದ್ಯೊಲು ಬೊಕ್ಕ ಪಾರಂಪರಿಕ ವೃತ್ತಿಲು ಬೂಕುಡ್ ತುಳುನಾಡ್‌ದ ಜಾನಪದ ವಾದ್ಯೊಲೆನ ಪರಿಚಯ ಮಾತ್ರ ಅತ್ತ್ ಅವು ಸಂಸ್ಕೃತಿದೊಟ್ಟಿಗು ಪಡೆಯಿನ ಸಂಬಂಧನ್‌ಲ ವಿವರಣೆ ಕೊರ್ತೆರ್. ಇಂಚನೆ ನನಾತ್ ಬೂಕುನ್ ಬರೆದ್ ಬುಡುಗಡೆ ಮಲ್ಪುಲೆಕ್ಕ ಆವಡ್ ಪಂದ್ ಪಂಡೆರ್.

ಕರಾವಳಿ ಲೇಖಕಿಯೆರ್, ವಾಚಕಿಯೆರೆನ ಸಂಘ (ರಿ.) ದ ಗುರ್ಕಾರ್ದಿ, ಸಾಹಿತಿ ಡಾ.ಜ್ಯೋತಿ ಚೇಳಾಯಿರು ಪಾತೆರ್ದ್, ಈ ಬೂಕುಡ್ ತುಳುನಾಡ್‌ದ ಜಾನಪದ ವಾದ್ಯದ ಬಗೆಟ್ ಒಂಜಿ ಭಾಗಡ್ ಇತ್ತ್ಂಡ ನನೊಂಜಿ ಭಾಗಡ್ ಆ ವಾದ್ಯದ ಚಿತ್ರಲು ಉಂಡು. ರಡ್ಡನೇ ಭಾಗಡ್ ತುಳುನಾಡ್‌ದ ಪಾರಂಪರಿಕ ವೃತ್ತಿಲು ಒವ್ ಪೂರ ಉಂಡು ಅವೆತ್ತ ವಿವರಣೆ ಉಂಡು ಪಂದ್ ಬೂಕುದ ಬಗೆಟ್ಟ್ ಪೊಲಬು ಕೊರಿಯೆರ್.

ಈ ಪೊರ್ತುಡು ಲೇಖಕೆರ್ ಮುದ್ದು ಮೂಡುಬೆಳ್ಳೆ, ಪ್ರಕಾಶಕೆರ್ ಕಲ್ಲೂರು ನಾಗೇಶ್, ಯುವವಾಹಿನಿದ ಸಾಧು ಪೂಜಾರಿ ಪಾಲ್ ಪಡೆದ್ ಇತ್ತೆರ್.

ಕೇರಳ ಬ್ಲಾಸ್ಟ್ : ಕಾಲಿ 3000 ರೂಪಾಯಿಡ್ ಬಾಂಬ್ ಮಲ್ತಿನ ಡೊಮಿನಿಕ್!

 ರಡ್ಡ್ ದಿನೊತ ದುಂಬು ಕೇರಳದ ಕಲಮಶ್ಶೇರಿಡ್ ಬಾಂಬ್ ಬ್ಲಾಸ್ಟ್ ಮಲ್ದಿನ ಆರೋಪಿ ಡೊಮಿನಿಕ್ ಮಾರ್ಟಿನ್ ತಾನ್ ಇಂಟರ್ನೆಟ್ ತೂದು ಬಾಂಬ್ ಮಲ್ಪರೆ ಕಲ್ತಿನಿ ಪನ್ದ್ ಪನೊಂನ್ದೆ. ಕಾಲಿ ಮೂಜಿ ಸಾರ ರೂ. ಕರ್ಚಿ ಮಲ್ತ್ ಬಾಂಬ್ ಮಲ್ತೆ ಪನ್ದ್ ಮಾರ್ಟಿನ್ ಪನ್ತೆ. ಸುಮಾರ್ ವರ್ಸ ದುಬೈಡ್ ಬೇಲೆಗಿತ್ತಿನ ಮಾರ್ಟಿನ್ ಕರಿನ ಐನ್ ವರ್ಸೊರ್ದಿಂಚಿ ಕೊಚ್ಚಿಡ್ ಬಾಡಯಿದ ಇಲ್ಲಡ್ ಕುಟುಮದಕಲೆನೊಟ್ಟುಗು ಇತ್ತೆ.

ಯೆಹೋವನ ಸಮಾವೇಶೊಡು ಪೋತಿನಕಲೆನ್ ಕೆರ್ಪಿನ ಉದ್ದೇಶೊಡು ಮಾರ್ಟಿನ್ ಬಾಂಬ್ ನ್ ಹಾಲ್ ದ ಉಲಾಯಿ ದೀದಿತ್ತೆ. ಪೊಲೀಸೆರೆಗ್ ಶರಣಾವೊಡ್ಡ ದುಂಬು ಮಾರ್ಟಿನ್ ಸಾಮಾಜಿಕ ಮಾಧ್ಯಮೊಡು ವೀಡಿಯೋ ಪೋಸ್ಟ್ ಮಲ್ತ್ ಸಂಘಟನೆದ ಬೋಧನೆಲು “ದೇಶದ್ರೋಹಿ” ಆಯಿನೆರ್ದಾವರ ತಾನ್ ಈ ನಿರ್ಧಾರ ಮಲ್ತೆ. ಸಮುದಾಯ ಜೋಕುಲೆಗ್, ಜನರೆಗ್ ತಪ್ಪು ಮೌಲ್ಯ ಕಲ್ಪಾವೊಂದುಂಡು ಪನ್ದ್ ವೀಡಿಯೊಡ್ ಪನ್ತೆ.

ಭಜನೆ ಮಲ್ಪುಗ ಜೋಕ್ಲೆಗಾದ್ ಭಕ್ತಿದ ಪಂತೊ

ಕುಡ್ಲ: ಅಂಬಾ ಮಹೇಶ್ವರಿ ಭಜನಾ ಮಂಡಳಿ ಅರಕೆರೆ ಬೈಲು ಜಪ್ಪು ಮೊಕ್ಲೆನ ಒಟ್ಟು ಸೇರಿಗೆಡ್ ಟೀಮ್ ಜೇನುಗೂಡು ಆಯೋಜನೆ ಮಲ್ಪುನ ಪಂತೊದ ಕಲೊಟು ಪೊಸತೊಂಜಿ ಭಕ್ತಿದ ದೊಂಪ ಭಜನೆ ಮಲ್ಪುಗ ಜೋಕ್ಲೆಗಾದ್ ಭಕ್ತಿದ ಪಂತೊ ನಡಪೆರೆ ಉಂಡು.

ಈ ಪಂತೊಗ್ ಕಟ್ಟ್ ನಿಯಮಲು ಉಂಡು. ಸುರುತ ಇನಾಮು 1555/- ರಡ್ಡನೇ ಇನಾಮು 1111/- ಮೂಜನೇ ಇನಾಮು 777/- ಇಸೇಸ ಇನಾಮು 1111/- ಎಚ್ಚದ ಮಾಹಿತಿಗಾದ್ 9591070843 ಕಾಲ್ ಮಲ್ತ್ ತೆರಿಯೊನೊಲಿ.

ಬದಿಕ್ಕ್ ಬಲಿ ಆಯಿನ ಪೊಸ‌ ಮದಿಮಾಲ್!

ಬಂಟ್ವಾಳ: ಕಂಡನಿನ ಇಲ್ಲಲ್ ವರದಕ್ಷಿಣೆ ಕಿರುಕುಳ ತಡೆಯೆರೆ ಆವಂದೆ ಮಾನಸಿಕವಾದ್‌ ಬೇನೆ ತಿನ್ನ ಪೊಸ ಮದಿಮಲ್‌ ಒರ್ತಿ ಅಪ್ಪೆನ ಇಲ್ಲಲ್ ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತಿನ ಘಟನೆ ವರದಿ ಆತ್‌ಂಡ್.‌ ಸಜೀಪ ಮೂಡ ಗ್ರಾಮದ ಸುಭಾಷ್ ನಗರದ ನಿವಾಸಿ ನೌಸೀನ್ (22) ಆತ್ಮಹತ್ಯೆ ಮಲ್ತಿನ ಪೊಣ್ಣು. ನೌಸೀನ್ ಉಳ್ಳಾಲದ ಆಜ್ಮಾನ್ ಒಟ್ಟಿಗೆ ಮೂಜಿ ತಿಂಗೊಲುದ ಪಿರ ಮದಿಮೆ ಆದಿತ್ತೆರ್. ‌

ಪ್ರೇಮವಿವಾಹ ಆಂಡಲ ಮದಿಮೆದ ಪೊರ್ತುಡು 18 ಪವನ್ ಬಂಗಾರ್‌ನ್ ಉಡುಗೊರೆಯಾದ್‌ ಕೊರ್ದು ಇತ್ತೆರ್. ಆಂಡ ಪೊಣ್ಣನ ಕಡೆತಕುಲ್‌ ಕೊರ್ನ ವರದಕ್ಷಿಣೆ ಕಡಿಮೆ ಆತ್‌ಂಡ್, ಮೋಕೆ ಮಲ್ತ್ ಮದುವೆ ಆಯಿನೆಕ್ಕ್‌ ಎಡ್ಡೆ ಪೊಣ್ಣು ತಿಕ್ಕಿಜಲ್, ಇಜ್ಜಿಂಡ ಎಡ್ಡೆ ಪೊಣ್ಣು ತಿಕ್ಕ್‌ದುವಲ್‌ ಪಂದ್‌ ಮಾಮಿ ಝೂಬೈದಾ, ಮಗಲ್ ಅಜ್ಮೀಯಾ ಬೊಕ್ಕ ಕಂಡನಿ ಸೇರೊಂದು ಮಾನಸಿಕ ಕಿರುಕುಳ ಕೊರೊಂದು ಇತ್ತೆರ್. ಮಾನಸಿಕವಾದ್‌ ಬೇನೆ ತಿನ್ನ ಮೆಗ್ದಿ ನೌಸೀನ ಅ.25 ದಾನಿ ಇಲ್ಲಲ್‌ ಏರ್ಲ ಇಜ್ಜಂದಿನ ಪೊರ್ತುಗು ಕೋಣೆದ ಉಲಾಯಿ ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತೊಂದಲ್‌ ಪಂದ್‌ ಅಣ್ಣೆ ನಾಸೀರ್‌ ಆರೋಪ ಮಲ್ತ್‌ದೆರ್.