Mon. Nov 23rd, 2026

ಕುಡ್ಲದ ಸುದ್ದಿ | Mangalore News

ವಿದ್ಯಾರ್ಥಿಲೆನ ಈ ಸಾಧನೆ ಅಕ್ಲೆನ ಪರಿಶ್ರಮ, ಶಿಕ್ಷಕೆರೆನ ಮಾರ್ಗದರ್ಶನ , ಪೋಷಕೆರೆನ ಬೆಂಬಲದ ಫಲ: ಭುವನಾಭಿರಾಮ ಉಡುಪ

ವಿದ್ಯಾರ್ಥಿಲೆನ ಈ ಸಾಧನೆ ಅಕ್ಲೆನ ಪರಿಶ್ರಮ, ಶಿಕ್ಷಕೆರೆನ ಮಾರ್ಗದರ್ಶನ ಬೊಕ್ಕ ಪೋಷಕೆರೆನ ಬೆಂಬಲದ ಫಲ ಆತ್ಂಡ್. ಮಾರ್ಕ್ಸ್ ಲು ಜೀವನದ ಅಕೇರಿದ ಗುರಿ ಅತ್ತ್, ಆಂಡ ಅವು ಶಿಸ್ತ್ ದ, ಪರಿಶ್ರಮದ ಬೊಕ್ಕ ಆತ್ಮವಿಶ್ವಾಸದ ಸಂಕೇತ. ವಿದ್ಯಾರ್ಥಿಲು ನನದ ಹಂತಡ್ ನೈತಿಕ ಮೌಲ್ಯಲೆನ್ ಅಳವಡಿಸಾವೊಂದು ಸಮಾಜಗ್ ಎಡ್ಡೆ ನಾಗರಿಕೆರಾವೊಡು ಪಂದ್ ಶ್ರೀ ಶಾರದಾ ಸೊಸೈಟಿ ಶಿಮಂತೂರ್ ದ ಕೋಶಾಧಿಕಾರಿ ಕೆ. ಭುವನಾಭಿರಾಮ ಉಡುಪ ತೆರಿಪಾಯೆರ್.

ಮೇರ್ ಶಿಮಂತೂರ್ ದ ಶ್ರೀ ಶಾರದಾ ಸೆಂಟ್ರಲ್ ಸ್ಕೂಲ್ ದ ಶಿಕ್ಷಕ ರಕ್ಷಕ ಸಂಘದ ಮುತಾಲಿಕೆಡ್ ಆಯೋಜನೆ ಮಲ್ತಿನ ಗೌರವಾರ್ಪಣ ಲೇಸ್ ದ ಅಧ್ಯಕ್ಷೆರಾದ್ ಇಸೇಸ ಸಭೆಟ್ಟ್ ಪಾಲ್ ಪಡೆದ್ ಪಾತೆರಿಯೆರ್.

ಶಾಲೆದ ಸಂಚಾಲಕೆರ್ ದೇವಿಪ್ರಸಾದ್ ಪುನರೂರ್ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರ್ದ್, ಶಾಲೆ, ಶಿಕ್ಷಕೆರ್ ಬೊಕ್ಕ ಪೋಷಕೆರ್ ಒಟ್ಟಾದ್ ಬೇಲೆ ಮಲ್ತ್ಂಡ ಮಾತ್ರ ವಿದ್ಯಾರ್ಥಿಲೆನ ಅಭಿವೃದ್ಧಿ ಸಾಧ್ಯ. ಇನಿ ಮಾನಾದಿಗೆ ಮಲ್ತಿನ ವಿದ್ಯಾರ್ಥಿಲು ಬೇತೆ ಅಕ್ಲೆಗ್ ಮಾದರಿ ಅವೊಡು ಪಂದ್ ಪಂಡೆರ್.

ಕರಿನ ಶೈಕ್ಷಣಿಕ ವರ್ಷ 2025ಟ್ಟ್ ಸಿಬಿಎಸ್ಇ 10ನೇ ಕ್ಲಾಸ್ ಗ್ ನಡತಿನ ವರ್ಷೊದ ಪರೀಕ್ಷೆಡ್ ಎಚ್ಚ ಮಾರ್ಕ್ಸ್ ಪಡೆಯಿನ ಶಾಲೆದ ವಿದ್ಯಾರ್ಥಿಲಾಯಿನ ಶ್ರೇಯ ವಿ ದೇವಾಡಿಗ, ಸನಾ ಫಾತಿಮಾ, ಅಮಿತ್ ಕೋಟ್ಯಾನ್ ಮೊಕ್ಲೆಗ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಶಿಕ್ಷಕ ರಕ್ಷಕ ಸಂಘದ ಅಧ್ಯಕ್ಷೆರ್ ಸುಮನ, ಜತೆ ಕಾರ್ಯದರ್ಶಿ ಪೂರ್ಣಿಮಾ ಪಾಲ್ ಪಡೆದಿತ್ತೆರ್.

ಶಾಲೆದ ಪ್ರಾಚಾರ್ಯೆರ್ ಜಿತೇಂದ್ರ ವಿ ರಾವ್ ಪೆಜಮಾಡಿ ಪ್ರಸ್ತಾವಿಕವಾದ್ ಪಾತೆರಿಯೆರ್. ಸಹ ಶಿಕ್ಷಕಿ ವನಿತ ಸಂತೋಷ ಎದ್ಕೊನಿಯೆರ್. ದೀಪಿಕಾ ಶೆಟ್ಟಿ ಸೊಲ್ಮೆ ಸಂದಾಯೆರ್. ಕಾಂತಿ ಕೆ ಶೆಟ್ಟಿ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಧಾರ್ಮಿಕ ಸಂಸ್ಕಾರದ ತಿಳುವಳಿಕೆ ಇಲ್ಲಲ್ ರ್ದ್ ಸುರು ಆವೊಡು: ವಿದ್ಯೆಂದ್ರತೀರ್ಥ ಶ್ರೀ

ಜೋಕ್ಲೆಗ್ ಎಲ್ಯ ಪ್ರಾಯಡೇ ಧಾರ್ಮಿಕ ಸಂಸ್ಕಾರದ ತಿಳುವಳಿಕೆನ್ ಇಲ್ಲಲ್ ರ್ದ್ ಸುರು ಮಲ್ತ್ಂಡ ಮಾತ್ರ ಅಕುಲು ಎಡ್ಡೆ ನಾಗರೀಕೆರಾದ್ ದೇಶಗ್ ಎಡ್ಡೆ ಪುದರ್ ಕನಪುನ ನರಮಾನಿಯಾದ್ ಬುಲೆಪೆರ್ ಪಂದ್ ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನ ಬೊಕ್ಕ ಮಠತ್ತ ಯತಿವರ್ಯರಾಯಿನ ಶ್ರೀ ವಿದ್ಯೆಂದ್ರತೀರ್ಥ ಶ್ರೀಪಾದೆರ್ ಪಂಡೆರ್.

ಮೇರ್ ಮುಲ್ಕಿ ತಾಲೂಕ್ ಹಿಂದೂ ಸಂಗಮ ಆಯೋಜನಾ ಸಮಿತಿ ಹಳೆಯಂಗಡಿ ಮಂಡಲದ ಹಿಂದೂ ಸಂಗಮದ ಲೆಕ್ಕೊಡು ಐತಾರ ಪಾವಂಜೆ ರಾಷ್ಟ್ರೀಯ ಮಾರ್ಗದ ಕೈತಲ್ ನಡತಿನ ಸಭಾ ಲೇಸ್ ಡ್ ತುಡರ್ ಅರ್ಲಾದ್ ಉದಿಪನ ಮಲ್ತ್ ದ್ ಆಶೀರ್ವಚನ ಕೊರಿಯೆರ್.‌

ಅಂಚೆನೆ ಸನಾತನ ಹಿಂದೂ ಸಂಸ್ಕಾರಲೆಡ್ ಕೊರತೆ ಇಜ್ಜಿ, ಆಂಡ ನಮ ಕಲ್ತ್ ದ್ ಎಲ್ಯಕ್ಲೆಗ್ ತೆರಿಪಾವೊನ ಬೇಲೆ ಸುರುಕು ಆವೊಡು. ಸಂಘಟನೆಡ್ ಬಲ ಇಪ್ಪು‌ನೇರ್ದಾವೆರ ಹಿಂದೂ ಸಂಗಮರ್ದ್ ಹಿಂದೂ ಸಂಸ್ಕೃತಿದ ಅಭಿವೃದ್ಧಿಗ್ ದೇವೆರ್ ಅನುಗ್ರಹ ಮಲ್ಪಡ್ ಪಂದ್ ಪಂಡೆರ್.

ಲೇಸ್ ದ ಅಧ್ಯಕ್ಷತೆನ್ ಸಸಿಹಿತ್ಲು ಶ್ರೀ ಭಗವತೀ ದೇವಸ್ಥಾನದ ಆಡಳಿತ ಸಮಿತಿ ಅಧ್ಯಕ್ಷೆರ್ ವಾಮನ ಇಡ್ಯಾ ಒಯಿಸೊಂದಿತ್ತೆರ್. ರಾಷ್ಟ್ರೀಯ ಸ್ವಯಂ ಸೇವಾ ಸಂಘ ಕುಡ್ಲ ವಿಭಾಗದ ಕಾರ್ಯಕಾರಿಣಿ ಸದಸ್ಯೆರ್ ಸುರೇಶ್ ಪೆಜಮಾಡಿ ದಿಕ್ಸೂಚಿ ಭಾಷಣ ಮಲ್ತೆರ್.

ಕುಡ್ಲ ಯೆನಪೋಯ ಕಲಾ, ವಿಜ್ಞಾನ, ವಾಣಿಜ್ಯ ಬೊಕ್ಕ ನಿರ್ವಹಣಾ ಸಂಸ್ಥೆದ ಮಹಿಳಾ ಸಾಧಕಿ ಸಹಾಯಕ ಪ್ರಾಧ್ಯಾಪಕಿ
ಡಾ|| ಕೃತಿ ರವಿಕಿರಣ್, ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾಗಣಪತಿ ದೇವಸ್ಥಾನದ ಪ್ರಧಾನ ಅರ್ಚಕೆರ್ ಪಿ.ವಾಸುದೇವ ಭಟ್, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಬಿ.ಸೂರ್ಯ ಕುಮಾರ್, ಪಾವಂಜೆ ಶ್ರೀ ಜ್ಞಾನಶಕ್ತಿ ಸುಬ್ರಹ್ಮಣ್ಯ ಸ್ವಾಮಿ ದೇವಸ್ಥಾನದ ತಂತ್ರಿಲು ಯಾಜಿ ಡಾ|| ದಿವಾಕರ್ ಭಟ್, ಬೊಕ್ಕ ಬೇತೆ ಬೇತೆ ಸಮಾಜ ಮುಖಂಡೆರಾಯಿನ ಎಚ್.ವಾಸುದೇವ ಶೆಣೈ, ಅಣ್ಣಪ್ಪ ದೇವಾಡಿಗ, ಪ್ರೇಮನಾಥ ಸುವರ್ಣ, ಪಿತಾಂಬರ ಶೆಟ್ಟಿಗಾರ್, ಕೆಲೆಸಿಬೆಟ್ಟು,
ಜಗನ್ನಾಥ್ ಸಿ.ಎಂ., ಪಾವಂಜೆ, ಭೋಜ ಅಮೀನ್, ಸಂಧ್ಯಾ ಇಂದಿರಾನಗರ, ನಿರ್ದೇಶಕೆರ್, ಪಡುಪಣಂಬೂರು ಸಹಕಾರಿ ವ್ಯವಸಾಯಿಕ ಸಂಘ ನಿ. ಹಳೆಯಂಗಡಿ ಹಿಂದೂ ಸಂಗಮ ಆಯೋಜನಾ ಸಮಿತಿದ ಉಪಾಧ್ಯಕ್ಷೆರ್ ಜಯಕೃಷ್ಣ ಬಿ.ಕೋಟ್ಯಾನ್ ಹಳೆಯಂಗಡಿ, ಸಹ ಸಂಯೋಜಕೆರ್ ದಿವ್ಯಶ್ರೀ ಆರ್.ಕೋಟ್ಯಾನ್, ಹಳೆಯಂಗಡಿ ತಾಲೂಕ್ ಸಮಿತಿ ಸದಸ್ಯೆರ್ ಎಸ್.ಎಸ್. ಸತೀಶ್ ಭಟ್ ಕೊಳುವೈಲ್, ಯಾದವ ದೇವಾಡಿಗ ಹಳೆಯಂಗಡಿ ಪಾಲ್ ಪಡೆದಿತ್ತೆರ್.‌

ಹಳೆಯಂಗಡಿ ಬಿಲ್ಲವ ಭವನರ್ದ್ ರಾಷ್ಟ್ರೀಯ ಮಾರ್ಗ ಬೊಕ್ಕ ಹಳೆಯಂಗಡಿ ಪೇಂಟೆ ಸಾದಿಡ್ ಗೌಜಿದ ಮೆರವಣಿಗೆ ಪಾವಂಜೆಗ್ ಬತ್ತ್ಂಡ್. ಬೊಕ್ಕ ಸ್ವಾಮೀಜಿಲೆನ ಮುತಾಲಿಕೆಡ್ ಗೋಪೂಜೆ, ಭಾರತ ಮಾತೆಗ್ ಪೂಜೆ ಆಂಡ್. ಅವೆರ್ದ್ ಬೊಕ್ಕ ಶ್ರೀ ದುರ್ಗಾಂಬ ಮಹಿಳಾ ಯಕ್ಷಗಾನ ಮಂಡಳಿ, ತಡಂಬೈಲ್ ಸುರತ್ಕಲ್ ಮೊಕ್ಲೆರ್ದ್ ಯಕ್ಷಗಾನ ತಾಳಮದ್ದಲೆ, ಗುರುದಕ್ಷಿಣೆ ಪಾಂಚಜನೋತ್ಪತ್ತಿ ನಡತ್ಂಡ್.

ಈ ಲೇಸ್ ಬತ್ತಿ ಮಾತೆರೆರ್ನಾಲ ಯತೀಶ್ ಕೋಟ್ಯಾನ್ ಎದ್ಕೊನಿಯೆರ್. ಯಾದವ ದೇವಾಡಿಗ ಹಿಂದೂ ಸಂಗಮದ ಮಹತ್ವದ ಪಂಚ ಉದ್ದೇಶಲೆನ್ ಪ್ರಸ್ತಾವಿಕವಾದ್ ಪಾತೆರಿಯೆರ್. ರಾಮದಾಸ್ ಪಾವಂಜೆ ಲೇಸ್ ನ್ ಸುಧಾರಿಕೆ ಮಲ್ತೆರ್. ದಿವ್ಯಶ್ರೀ ಕೋಟ್ಯಾನ್ ಸೊಲ್ಮೆ ಸಂದಾಯೆರ್.

ಹಿಂದೂ ಸಂಗಮ ಹಳೆಯಂಗಡಿ/ಹಿಂದೂ ಸಂಗಮ ಆಯೋಜನಾ ಸಮಿತಿದ ಹಳೆಯಂಗಡಿ ಮಂಡಲದ ಹಿಂದೂ ಸಂಗಮದ ಲೆಕ್ಕೊಡು ಐತಾರ ಪಾವಂಜೆ ರಾಷ್ಟ್ರೀಯ ಮಾರ್ಗದ ಕೈತಲ್ ನಡತಿನ ಸಭಾ ಲೇಸ್ ನ್ ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನ ಬೊಕ್ಕ ಮಠತ್ತ ಯತಿವರ್ಯರಾಯಿನ ಶ್ರೀ ವಿದ್ಯೆಂದ್ರತೀರ್ಥ ಶ್ರೀಪಾದೆರ್ ಉದಿಪನ ಮಲ್ತ್ ದ್ ಆಶೀರ್ವಚನ ಕೊರಿಯೆರ್.

ಬಪ್ಪನಾಡ್ ಡ್ ಬೃಹತ್ ಹಿಂದೂ ಸಂಗಮ- ಭವ್ಯ ಶೋಭಾ ಯಾತ್ರೆ

ಮುಲ್ಕಿ: ಮುಲ್ಕಿ ತಾಲೂಕ್ ಹಿಂದೂ ಸಂಗಮ ಸಮಿತಿದ ಮುತಾಲಿಕೆಡ್ ಬಪ್ಪನಾಡ್, ಚಿತ್ರಾಪು, ಮಾನಂಪಾಡಿ ಬೊಕ್ಕ ಕಾರ್ನಾಡ್ ಗ್ರಾಮಲೆನ ಹಿಂದೂ ಬಾಂಧವೆರೆನ ಗ್ರಾಮೋಚ್ಚಯ ಹಿಂದೂ ಸಂಗಮದ ಶೋಭಾಯಾತ್ರೆ ಐತಾರ ನಡತ್ಂಡ್.

ಮುಲ್ಕಿ ಬಸ್ ಸ್ಯಾಂಡ್ ದ ಶಿವಾಜಿ ಮಂಟಪರ್ದ್ ಸಾರರ್ದ್ ಎಚ್ಚ ಜನ ಚೆಂಡೆವಾದ್ಯ, ಭಜನಾ ಸಂಕೀರ್ತನೆ, ಭಜನಾ ನೃತ್ಯ, ನಾಸಿಕ್ ಬ್ಯಾಂಡ್, ಕೊಂಬುದೊಟ್ಟಿಗೆ ಶ್ರೀ ಭಾರತ ಮಾತೆನ ಟ್ಯಾಬ್ಲೊನ್ ದೇವಸ್ಥಾನಗ್ ಭವ್ಯ ಮೆರವಣಿಗೆದ ಮುಕೇನ ಕನತೆರ್.

ಸಭಾ ಲೇಸ್ ರ್ದ್ ದುಂಬು ಶಾಸಕೆರ್ ಉಮಾನಾಥ ಎ.ಕೋಟ್ಯಾನ್ ಉಪಸ್ಥಿತಿಡ್ ಸಾಂಪ್ರದಾಯಿಕವಾದ್ ಗೋಪೂಜೆ ನಡತ್ಂಡ್. ವೇದಮಂತ್ರ ಪನ್ಪುನೆತ್ತೊಟ್ಟಿಗೆ ಸಭಾ ಲೇಸ್ ಗ್ ಚಾಲನೆ ಕೊರಿಯೆರ್.

ಈ ಪೊರ್ತುಡು ವಂದೇಮಾತರಂ ಪಂಡೆರ್. ಬೊಕ್ಕ ಸಾಂಸ್ಕೃತಿಕ ಲೇಸ್ ದ ಲೆಕ್ಕೊಡು ರಾಣಿ ಅಬ್ಬಕ್ಕ, ಭರತನಾಟ್ಯ, ಸಾಮೂಹಿಕ ಜನಪದ ನೃತ್ಯ, ಕುಣಿತ ಭಜನೆ, ಭಾರತ ವೈಭವ ದರ್ಶಿನಿ ಪ್ರದರ್ಶನ ಬೊಕ್ಕ ದೀಪಾರಾಧನೆ’ ನಡತ್ಂಡ್.

ತುಳುನಾಡ ಸಾಧಕೆ ದಯಾನಂದ ಕತ್ತಲ್ ಸಾರ್ ಮೆರೆಗ್ “ಕೆನರಾ ರತ್ನ”ಪ್ರಶಸ್ತಿ ಪ್ರದಾನ

ಬೆಂಗಳೂರು : ಕೆನರಾ ಅಸೋಸಿಯೇಷನ್(ರಿ), ಎಲೆಕ್ಟ್ರಾನಿಕ್ ಸಿಟಿ, ಬೆಂಗಳೂರು ಉಂದೆತ್ತ 16ನೇ ವಾರ್ಷಿಕೋತ್ಸವ ಕಾರ್ಯಕ್ರಮ ಜ.17 ಕ್ಕ್ ಅನಂತನಗರದ ಅಮೃತಾಯ ಫಂಕ್ಷನ್ ಹಾಲ್‌ಡ್ ಭಾರಿ ವಿಜೃಂಭಣೆಡ್ ನಡತ್ಂಡ್.
ಅಸೋಸಿಯೇಷನ್‌ದ ಅಧ್ಯಕ್ಷೆರ್ ಸತೀಶ್ ಕುಮಾರ್ ಲೇಸ್‌ದ ಗುರ್ಕಾರ್ಮೆನ್ ವಹಿಸ್‌ದಿತ್ತೆರ್. ಮಲ್ಲ ಬಿನ್ನೆರಾದ್ ಪುಗರ್ತೆದ ವಾಗ್ಮಿ, ಸಾಧಕೆ ದಯಾನಂದ ಕತ್ತಲ್ ಸಾರ್ ಪಾಲ್ ಪಡೆದಿತ್ತೆರ್. ಈ ಪೊರ್ತುಡು ಅರೆಗ್ 2025 -26 ನೇ ವರ್ಷ್ ಅಸೋಸಿಯೇಷನ್ ನ ಪ್ರತಿಷ್ಠಿತ “ಕೆನರಾ ರತ್ನ” ಪ್ರಶಸ್ತಿನ್ ತುಳು ಭಾಷೆ,ತುಳು ಸಂಸ್ಕೃತಿಗೆ ಕೊರ್ತಿನ ಸೇವೆ ಬೊಕ್ಕ ಬೇತರ ಬೇತೆಡ್ ಮಲ್ದಿನ ಸಾಧನೆನ್ ತೂದು ಪ್ರದಾನ ಮಲ್ತೆರ್.
ಮೋಕ್ಷಪ್ರದ ಬೊಕ್ಕ ದೀಪಶ್ರೀ ಮೊಕುಲು ದೇವೆರೆನ್ ಸುಗಿತೆರ್. ಪ್ರಧಾನ ಕಾರ್ಯದರ್ಶಿ ಮೋಹನ್ ದಾಸ್ ಶೆಟ್ಟಿ ಬಿನ್ನೆರೆನ್ ಎದ್ಕೊಂಡೆರ್. ಅಧ್ಯಕ್ಷೆರ್ ಸತೀಶ್ ಕುಮಾರ್ ಮೇರ್, ಅಸೋಸಿಯೇಷನ್‌ದ ಬುಲೆಚ್ಚಿಲ್‌ದ್ ವಿಚಾರ, ಉದ್ದೇಶ ಬೊಕ್ಕ ನನ ದುಂಬುದ ಯೋಜನೆದ ಬಗೆಟ್ಟ್ ತೆರಿಪಾಯೆರ್.
ಪ್ರಶಸ್ತಿ ಸ್ವೀಕಾರ ಮಲ್ತ್ ಪಾತೆರ್ನ ದಯಾನಂದ ಕತ್ತಲ್‌ಸಾರ್, ಅಸೋಸಿಯೇಷನ್‌ದ ಕಾರ್ಯಕ್ರಮದ ಬಗೆಟ್ಟ್ ಮೆಚ್ಚಿದ್ ತುಳು ನಾಡ್ ತುಳು ಸಂಸ್ಕೃತಿ, ಪ್ರಾಚೀನ ತುಳು ಲಿಪಿ, ತುಳುವೆರ್‌ನ ವನಸ್ ತೆನಸ್, ಪದ್ದತಿದ ಬಗೆಟ್ಟ್ ಪೊಲಬು ಮಲ್ತ್ ಕೊರಿಯೆರ್. ತುಳುನಾಡ ದೈವಾರಾಧನೆ, ನಾಗಾರಾಧನೆ, ತಿರುಪತಿ ತಿಮ್ಮಪ್ಪನ ನಂಟ್‌ದ ಬಗೆಟ್ಟ್ ತೆರಿಪಾದ್, ತುಳುನಾಡ ಸಂಸ್ಕೃತಿನ್ ಒರಿಪಾದ್ ಬುಳೆಪಾವುನೆಟ್ಟ್ ಪೊಂಜೊವುಲೆನ ಪಾತ್ರದ ಬಗೆಟ್ಟ್ ತೆರಿಪಾಯೆರ್.
ಪ್ರಶಸ್ತಿ ಪ್ರದಾನದ ಲೇಸ್‌ನ್ ಅಸೋಸಿಯೇಷನ್ ದ ಉಪಾಧ್ಯಕ್ಷೆರ್ ವಿಜಯ್ ಕುಲಾಲ್ ಎಂ. ನೆರವೇರಾದ್ ಕೊರಿಯೆರ್. ತುಳು ಭಾಷಣ ಪಂತ, ಕೃಷ್ಣ ರಾಧೆ ವೇಷ ಪಂತ, ಬೇತೆ ಬೇತೆ ಗೊಬ್ಬುದ ಪಂತಡ್ ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್. ಅಂಚೆನೆ
ಅಂತರಾಷ್ಟ್ರೀಯ ಮಟ್ಟದ ಯೋಗ ಸ್ಪರ್ಧೆಡ್ ಸುರುತ್ತ ಇನಾಮು ಪಡೆತಿನ ಕು| ಆರಾಧ್ಯ ದೇರಾಜೆ , ರಾಷ್ಟ್ರಮಟ್ಟದ ಮಾರ್ಷಲ್ ಆರ್ಟ್ಸ್ ಸ್ಪರ್ಧೆಡ್ ಬಂಗಾರ್‌ದ ಪದಕ ಪಡೆತಿನ ಬಹುಮುಖ ಪ್ರತಿಭೆ ಕು| ಶನಯ ಶರತ್ ಬೊಕ್ಕ ಎಸ್ಎಸ್ ಎಲ್ ಸಿಡ್ ಎಚ್ಚ ಮಾರ್ಕ್ ದೈದಿನ ಕು| ತ್ವಿಷಾ ಪಿ. ಆರ್., ಮನ್ವಿತ್ ಆರ್. ಬೊಕ್ಕ ತನಿಷ್ ರೈ ಎನ್ ಮೊಕ್ಲೆಗ್ ಸನ್ಮಾನ ಮಲ್ತೆರ್. ಸನ್ಮಾನ ಕಾರ್ಯಕ್ರಮನ್ ವಿನಯ ಕಟ್ಟೆ ನಡಪಾದ್ ಕೊರಿಯೆರ್. ಸ್ಮಿತಾ ಸುನಿಲ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ವೇದಿಕೆಡ್ ಉಪಾಧ್ಯಕ್ಷೆರ್ ನವೀನ್ ಶೆಟ್ಟಿ, ಕೋಶಾಧಿಕಾರಿ ಯಶವಂತ್ , ಸಂಘಟನಾ ಕಾರ್ಯದರ್ಶಿ ಯೋಗೇಶ್ ದೇರಾಜೆ, ಜತೆ ಕಾರ್ಯದರ್ಶಿ ಶ್ವೇತಾ ಆರ್ ಹೆಗ್ಡೆ, ಕಾರ್ಯಕಾರಿ ಸಮಿತಿ ಸದಸ್ಯೆರಾಯಿನ ವಸಂತ್ ಪೂಜಾರಿ, ವಿಠ್ಠಲ್ ಗೊಲ್ಲ ಸಚಿನ್ ರೈ, ಸುಭಾಷ್ ಮೊಕುಲು ಮಾತ ಇತ್ತೆರ್. ಅವೆರ್ದ್ ಬೊಕ್ಕ ಅಸೋಸಿಯೇಷನ್ ದ ಸದಸ್ಯೆರೆರ್ದ್ ಮನರಂಜನಾ ಕಾರ್ಯಕ್ರಮ ನಡತ್ಂಡ್. ಶ್ವೇತಾ ಹೆಗ್ಡೆ, ರೂಪ ಮಂಜುನಾಥ್ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.

ರೀಲ್ಸ್ ಸ್ಟಾರ್ ಆಶಾ ಪಂಡಿತ್ ನನ ನೆಂಪು ಮಾತ್ರ

ಕುಡ್ಲ : ತನ್ನ ರೀಲ್ಸ್‌ಗ್ ಮಕ್ಕರ್ ಮಲ್ತ್‌ದ್ ಬೊರ್ಚಾಂದಿನ ಕಮೆಂಟ್ ಪಾಡೊಂದಿತ್ತಿನಕ್ಲೆಗ್ “ಮುಂಗುಲಿ ಮುಸುಂಟುದಾಯೆ, ಮರುವಾಯಿ ಮುಸುಂಡುದಾಯೆ..” ಇಂಚ ಮೋಕ್ಯೆಡ್ ನೆರೊಂದಿತ್ತಿನ ರೀಲ್ಸ್ ಸ್ಟಾರ್ ಆಶಾ ಪಂಡಿತ್ ನನ ನೆಂಪು ಮಾತ್ರ.
ಕುಡ್ಲದ ಪಡೀಲ್‌ಡ್ ಎಲ್ಯ ಕ್ಯಾಂಟೀನ್ ನಡಪಾವೊಂದಿತ್ತಿನ ಆಶಾಕ್ಕಗ್ ಕೋಡೆ ರಾತ್ರೆ ಹೃದಯಾಘಾತ ಆದಿತ್ತ್ಂಡ್ ಪಂದ್ ತೆರಿದ್ ಬೈದ್ಂಡ್.
ಇನ್ಸ್ಟಾಗ್ರಾಂಡ್ ಅರೆಗ್ ಮಸ್ತ್ ಫಾಲೋವರ್ಸ್ ಇತ್ತ್‌ದ್ ದೂರದ ಊರುದ ರೀಲ್ಸ್ ಸ್ಟಾರ್ ನಕುಲು ಅರೆನಡೆ ಬತ್ತ್‌ದ್ ಮೀಟ್ ಮಲ್ತೊಂದಿತ್ತೆರ್.

ಜೈ ತುಲುನಾಡ್ (ರಿ.) ಕೇಂದ್ರ ಸಮಿತಿದ ಮಹಾಸಭೆ

ಪೊಸ ಗುರ್ಕಾರ್ಲು ಆದ್ ಅಶ್ವತ್ ತುಲುವೆ ಆಯ್ಕೆ

​ಕಿನ್ನಿಗೋಳಿ: ತುಳು ಭಾಷೆ, ಸಂಸ್ಕೃತಿ ಬೊಕ್ಕ ನಾಡ್‌ದ ಬುಲೆಚ್ಚಿಲ್‌ಗಾದ್ ಬೆನ್ಪಿನ ಪುಗರ್ತೆದ ಸಂಘಟನೆ ‘ಜೈ ತುಲುನಾಡ್ (ರಿ.)’ ನೆತ್ತ ವಾರ್ಷಿಕ ಮಹಾಸಭೆ ಜ.18 ಗು ಕಿನ್ನಿಗೋಳಿ ರೋಟರಿ ಕ್ಲಬ್ ಚಾವಡಿಡ್ ನಡತ್ಂಡ್.
ಈ ಸಭೆಟ್ಟ್ 2026-27ನೇ ವರ್ಷಗ್ ಕೇಂದ್ರ ಸಮಿತಿ ಪದಾಧಿಕಾರಿಲೆನ್ ಅಜಪುನ ಕಜ್ಜ ನಡತ್ಂಡ್. ಪೊಸ ಗುರ್ಕಾರ್ಲು ಆದ್ ಅಶ್ವತ್ ತುಲುವೆ ಅಜತ್ ಬತ್ತೆರ್.
ಒತ್ತು ಗುರ್ಕಾರ್ಲಾದ್ ಸುಶೀಲ ಕೊಡವೂರು, ವಿಶಾಲ್ ಕೊಡಿಯಾಲ್ ಬೊಕ್ಕ ಮನೀಶ್ ಕುಮಾರ್
ಮಲ್ಲ ಕಾರ್ಯಂತೆರ್ ಸುಕೇಶ್ ಕೆಮ್ಮಾಯಿ, ಒತ್ತು ಕಾರ್ಯಂತೆರ್ : ಚಿತ್ರಾಕ್ಷಿ ಮುಗೇರ ತೆಗ್ಗು ಬೊಕ್ಕ ಪೂರ್ಣಿಮಾ ಶೆಟ್ಟಿಗಾರ್
ಪನವುದ ಪಾಲವೆರ್: ನಿಶಿಲ್ ಶೆಟ್ಟಿ ಬೇಲಾಡಿ
ಒತ್ತು ಪನವುದ ಪಾಲವೆರ್: ನಾಗರಾಜ ಶೆಟ್ಟಿಗಾರ್,
ಸಂಘಟನಾ ಕಾರ್ಯಂತೆರ್: ನಿರಂಜನ್ ಕರ್ಕೇರ ಒತ್ತು ಸಂಘಟನಾ ಕಾರ್ಯಂತೆರ್ ಅಶ್ವಿತಾ ಬೊಕ್ಕ ಸಂಗೀತಾ,
ಕಾರ್ಯಕಾರಿ ಸಮಿತಿ ಸದಸ್ಯೆರಾದ್ ಚಂದ್ರ ತುಲುವೆ ಬೊಕ್ಕ ಚೈತ್ರ ಎನ್ ಅಜತ್ ಬತ್ತೆರ್.
ಅಂಚೆನೇ ಈ ಪೊರ್ತುಡು ಸಾಹಿತ್ಯಿಕ ಬೊಕ್ಕ ಸಾಂಸ್ಕೃತಿಕ ಚಟುವಟಿಕೆದ ಅಂಗಸಂಸ್ಥೆಲೆಗ್ ಮುಖ್ಯಸ್ಥೆರೆನ್ ಆಯ್ಕೆ ಮಲ್ತೆರ್. ‘ಬರವುದ ಬಿತ್ತ್‌ಲ್’ (ಸಾಹಿತ್ಯ ವಿಭಾಗ) ಗುರ್ಕಾರ್ದಿಯಾದ್ ಸವಿತ ಕರ್ಕೆರ ಕಾವೂರು ಅಜತ್ ಬತ್ತೆರ್.”ಲೇಲೇಲೇಗ’ (ಸಾಂಸ್ಕೃತಿಕ ವಿಭಾಗ) ಗುರ್ಕಾರ್ದಿಯಾದ್ ಪೂರ್ಣಿಮಾ ಬಂಟ್ವಾಳ ಅಜತ್ ಬತ್ತೆರ್.

ಹಿಂದೂ ಸಂಗಮದ ಒರುಟು ಸನಾತನ ಧರ್ಮ ಒರಿಪರೆ ದುಂಬು ಬರೊಡು:- ವೇ. ಹರಿನಾರಾಯಣ ದಾಸ ಆಸ್ರಣ್ಣೆರ್

ತೋಕೂರುಡು ಹಿಂದೂ ಸಂಗಮ

ಮುಲ್ಕಿ: ತಾಲೂಕು, ಪಡುಪಣಂಬೂರು ಮಂಡಲ
ಹಿಂದು ಸಂಗಮ ಆಯೋಜನಾ ಸಮಿತಿ ವತಿರ್ದ್ ಹಿಂದೂ ಸಂಗಮ ಕಾರ್ಯಕ್ರಮ ಜ. 16 ಐತಾರ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಎದುರುಡು ನಡತ್ಂಡ್.
ಕಟೀಲು ಕ್ಷೇತ್ರದ ಅರ್ಚಕೆರ್ ಬೊಕ್ಕ ಮುಲ್ಕಿ ತಾಲೂಕು ಹಿಂದು ಸಂಗಮ ಆಯೋಜನಾ ಸಮಿತಿದ ಗುರ್ಕಾರ್ಲು ವೇದಮೂರ್ತಿ ಹರಿನಾರಾಯಣ ದಾಸ ಆಸ್ರಣ್ಣೆರ್ ಆಶೀರ್ವಚನ ಕೊರ್ದು ಹಿಂದೂ ಸಂಗಮದ ಒರುಟು ಸನಾತನ ಧರ್ಮ ಒರಿಪರೆ ದುಂಬು ಬರೊಡು ಪಂಡೆರ್.
ಕಾರ್ಯಕ್ರಮದ ಗುರ್ಕಾರ್ಮೆನ್ ಮುಲ್ಕಿ ಸೀಮೆದ ಅರಸುಲು ದುಗ್ಗಣ್ಣ ಸಾವಂತೆರೆರ್ ವೈಸೊಂದಿತ್ತೆರ್.
ಪ್ರಧಾನ ಭಾಷಣಕಾರೆರಾದ್
ಪ್ರಾಂತ ಕುಂಟುಂಬ ಪ್ರಭೋಧನ ಸಂಯೋಜಕ
ವೆಂಕಟೇಶ್ ಹೆಗ್ಡೆ ಪಾತೆರ್ದ್
ಹಿಂದುತ್ವ ದೇಶದ ಅಸ್ಮಿತೆ,
ಭಾರತ ಶ್ರೇಷ್ಠ ನಾಡ್, ದೇವತೆಲು ಪುಟ್ಟುಂಡ ಭಾರತಡ್ ಪುಟ್ಟೊಡು ಪನ್ಪೆರ್ ಗೆ , ದೇಶಡ್ ಹಿಂದುತ್ವ ಒರಿಯೊಡು, ಒರಿಪಾವುನವು ನಮ್ಮ ಕೈಟ್ ಉಂಡು, ಯುವಜನಾಂಗಗ್ ಸಂಸ್ಕಾರ ಸಂಸ್ಕೃತಿ ಕಲ್ಪಾಂಡ ಭಾರತದ ಭವ್ಯ ಪ್ರಜೆ ಆಪೆರ್ ಜೋಕುಲೆರ್ದ್ ಮೊಬೈಲ್ ದೂರ ದೀದ್ ಧಾರ್ಮಿಕ ಆಚರಣೆಗ್ ಮಹತ್ವ ಕೊರುಂಡ ಮಾತ್ರ ಕುಟುಂಬದ ಮೌಲ್ಯಲು ಒರಿಯರೆ ಸಾಧ್ಯ ದೇಶಡ್ ಸಮಾಜ, ಸಾಮರಸ್ಯ ಬಗ್ಗೆ ಚಿಂತನೆ ಮಲ್ಪುನ ಬೇಲೆ ಆವೊಡು.
ಜಗತತ್ತ್ ಗ್ ಭಾರತನೆ ಆದರ್ಶ , ಪ್ರಕೃತಿದತ್ತವಾಯಿನ ಪರಿಸರ ಒರಿಯೊಡು ,ಸ್ವದೇಶಿ ವಸ್ತುಲೆಗ್ ಬೆರಿಬಲ ಕೊರೊಡು ಪಂಡೆರ್.
ಮಲ್ಲ ಬಿನ್ನೆರಾದ್ ತೋಕೂರು ಶ್ರೀ ಸುಬ್ರಮಣ್ಯ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಗುರ್ಕಾರ್ಲು ಗುರುರಾಜ್ ಎಸ್ ಪೂಜಾರಿ, ಬೆಳ್ಳಾಯರು ಶ್ರೀ ಚಂದ್ರಮೌಳೀಶ್ವರ ದೇವಸ್ಥಾನದ ಒತ್ತುಗುರ್ಕಾರ್ಲು
ವಿದ್ಯಾಧರ ಶೆಟ್ಟಿ,
ರಮೇಶ್ ಕಲ್ಲಾಪು, ಮುಲ್ಕಿ ಹೋಬಳಿ ಒರುಂಭ ಮಾಗಣೆ ಮುಂಡಾಲ ಸೇವಾ ಟ್ರಸ್ಟ್ ಒತ್ತು ಗುರ್ಕಾರ್ಲು ಶಂಕರ್ ಮಾಸ್ಟರ್ ಗೋಳಿಜೋರಾ, ನಿಡ್ಡೋಡಿ
ಶ್ರೀ ದುರ್ಗಾ ದೇವಿ ವಿದ್ಯಾಸಂಸ್ಥೆದ
ಶಿಕ್ಷಕೆರ್ ಸಂಧ್ಯಾ ಉಮೇಶ್ ಆಚಾರ್ಯ, ಕೆರೆಕಾಡು ಶ್ರೀ ದುರ್ಗಾಪರಮೇಶ್ವರೀ ಭಜನಾ ಮಂದಿರದ ಗುರ್ಕಾರ್ಲು
ರಾಜೇಶ್ ಕೆರೆಕಾಡು,ರತ್ನಾ ಶಿವಾನಂದ ಕೋಟ್ಯಾನ್, ಬೊಕ್ಕ ಕೆಲವೆರ್ ಉಪಸ್ಥಿತರಿತ್ತೆರ್.
ಲೀಲಾ ಬಂಜನ್ ಸುಗಿತೆರ್,
ಮಾದವ ಶೆಟ್ಟಿಗಾರ್ ಎದ್ಕೊಂಡೆರ್, ತೋಕೂರು ದೇವಸ್ಥಾನದ ಮಾಜೀ ಮುಕ್ತೇಸೆರೆರ್ ಹರಿದಾಸ್ ಪಟ್ ಪ್ರಸ್ತಾವನೆ ಮಲ್ತೆರ್, ಸಂತೋಷ್ ದೇವಾಡಿಗ ಸೊಲ್ಮೆ ಸಂದಾಯ ಮಲ್ತೆರ್. ಮನೀಶ್ ಸಾಲ್ಯಾನ್ ನಿರೂಪಣೆ ಮಲ್ತೆರ್.

ಕಾರ್ಯಕ್ರಮದ ದುಂಬು ಹಿಂದೂ ಸಂಗಮ ಆಯೋಜನ ಸಮಿತಿ ವತಿರ್ದ್ ಕೆರೆಕಾಡ್ ಎಸ್ಕೋಡಿ, ಕಲ್ಲಾಪು ಲೈಟ್ ಹೌಸ್ ದಲ್ಪರ್ದ್ ತೋಕೂರು ಶ್ರೀ ಸುಬ್ರಮಣ್ಯ ದೇವಸ್ಥಾನ ಮುಟ್ಟ ಭವ್ಯ ಶೋಭಾ ಯಾತ್ರೆ ನಡತ್ಂಡ್.
ಮೆರವಣಿಡ್ ಸಾರ ಸಾರ ಜನ ಪಾಲ್ ಪಡೆದಿತ್ತೆರ್ ಅಂಚೆನೆ ಸಭಾ ಕಾರ್ಯಕ್ರಮದ ದುಂಬು ಗೋಪೂಜೆ ನಡತ್ಂಡ್ ಬೊಕ್ಕ ಭಾರತ್ ಮಾತೆನ ಭಾವಚಿತ್ರಗ್ ಪುಷ್ಪ ನಮನ ಸಂದಾಯೆರ್.

ಜಾಗತಿಕ ಬಿಲ್ಲವರ ಕ್ರೀಡಾಕೂಟಗ್ ಬಿಲ್ಲವರ ಮಹಾ ಮಂಡಲದ ಅಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ ಭೇಟಿ

ಕುಡ್ಲ : ಅಖಿಲ ಭಾರತ ಬಿಲ್ಲವರ ಯೂನಿಯನ್ ಮುತಾಲಿಕೆಡ್ ನೆಹರೂ ಮೈದಾನಡ್ ಐತಾರ ನಡತಿನ
ಜಾಗತಿಕ ಬಿಲ್ಲವರ ಕ್ರೀಡೋತ್ಸವಡ್ ಬಿಲ್ಲವರ ಮಹಾ ಮಂಡಲದ ಅಧ್ಯಕ್ಷೆರ್, ಭಾರತ್ ಬ್ಯಾಂಕ್‌ದ ಕಾರ್ಯಾಧ್ಯಕ್ಷೆರ್ ಸೂರ್ಯಕಾಂತ್ ಜಯ ಸುವರ್ಣ ಪಾಲ್ ಪಡೆಯೆರ್.
ಈ ಪೊರ್ತುಡು ಬ್ಯಾಂಕ್‌ದ ನಿರ್ದೇಶಕೆರಾಯಿನ ಭಾಸ್ಕರ್ ಎಂ ಸಾಲ್ಯಾನ್, ಗಂಗಾಧರ್ ಜೆ ಪೂಜಾರಿ, ಶ್ರೀ ನಾರಾಯಣ ಗುರು ಭಜನಾ ಮಂಡಳಿ ಮುಂಬೈ ಅಧ್ಯಕ್ಷೆರ್ ಅಶೋಕ್ ಸಸಿಹಿತ್ಲು, ಸಂಘಟಕೆ ಸಮಾಜ ಸೇವಕೆ ಸದಾಶಿವ ಕರ್ಕೇರ ಅಂಚೆನೆ ಉಡುಪಿ ಚಿಕ್ಕಮಗಳೂರು ಕ್ಷೇತ್ರದ ಸಂಸದೆರ್ ಕೋಟ ಶ್ರೀನಿವಾಸ ಪೂಜಾರಿ, ನಮ್ಮ ಕುಡ್ಲ ವಾಹಿನಿ ಮುಖ್ಯಸ್ಥೆರ್ ಲೀಲಾಕ್ಷ ಕರ್ಕೇರ ಬೊಕ್ಕ ಇತರ ಗಣ್ಯೆರ್ ಜತೆಟ್ಟ್ ಇತ್ತೆರ್.
ಬಲ್ಲ್ ಒಯಿಪುನೆಟ್ಟ್ ಪ್ರಶಸ್ತಿ : ಕ್ರೀಡೋತ್ಸವಡ್ ಬೊಂಬೈದ ಜಯ ಸಿ ಸುವರ್ಣ ಅಭಿಮಾನಿ ಕೂಟದಕುಲು ಥ್ರೋಬಾಲ್ ಬೊಕ್ಕ ಹಗ್ಗ ಜಗ್ಗಾಟಡ್ ಪಾಲ್ ಪಡೆದಿತ್ತೆರ್. ಆಂಜೋವುಲೆನ ವಿಭಾಗದ ಬಲ್ಲ್ ಒಯಿಪುನ ಪಂತೊಡು ಈ ತಂಡ 4 ನೇ ಸ್ಥಾನ ಪಡೆತ್ಂಡ್. ಈ ತಂಡದಕ್ಲೆಗ್ ಜಯ ಸಿ ಸುವರ್ಣ ಅಭಿಮಾನಿಲು, ಮುಂಬೈ ಬಿಲ್ಲವೆರ್ ಬೊಕ್ಕ ಶ್ರೀ ನಾರಾಯಣ ಗುರು ಭಜನಾ ಮಂಡಳಿದಕುಲು ಅಭಿನಂದನೆ ಸಂದಾದೆರ್

ಬ್ರಾಹ್ಮಣೆರ್ ಒಟ್ಟಾಪುನೆ ಅಗತ್ಯ- ಶ್ರೀಹರಿ ಆಸ್ರಣ್ಣ

ಶಿವಳ್ಳಿ ಸಮಾಜದ ಕ್ರೀಡೋಚ್ಚಯ 2026 ಸಮಾರೋಪ ಲೇಸ್

ಹಳೆಯಂಗಡಿ: ಸಮಾಜದ ಮಾತ ಸಮಸ್ಯೆಲೆಗ್ ಬ್ರಾಹ್ಮಣೆರ್ ಕಾರಣ ಪಂದ್ ಪನ್ಪುನ ಸರಿ ಅತ್ತ್, ಬ್ರಾಹ್ಮಣೆರ್ ಒಟ್ಟಾಪುನೆರ್ದ್ ದೇಶದ ಸಮಸ್ಯೆಲೆಗ್ ಪರಿಹಾರ ತಿಕ್ಕುಂಡು. ಶಿವಳ್ಳಿ ಬ್ರಾಹ್ಮಣೆರ್ ಕೇರಳ ಮುಟ್ಟ ಉಲ್ಲೆರ್. ಶಿವಳ್ಳಿ ಬ್ರಾಹ್ಮಣೆರೆನ ಸಂಘಟನೆ ಕೇರಳರ್ದ್ ಲ ಸುರು ಆತ್ಂಡ್ ಪಂದ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಅರ್ಚಕೆರ್ ಹರಿನಾರಾಯಣ ದಾಸ ಅಸ್ರಣ್ಣ ಪಂಡೆರ್.

ಮೇರ್ ಶಿವಳ್ಳಿ ಸಭಾ ಕುಡ್ಲದ ಮುತಾಲಿಕೆಡ್ ಪಾವಂಜೆ ಶಿವಳ್ಳಿ ಸಭಾದ ಒಟ್ಟುಸೇರಿಗೆಡ್ ಸುರತ್ಕಲ್ ವಿದ್ಯಾದಾಯಿನಿ ಶಾಲೆದ ಮೈದಾನಡ್ ನಡತಿನ ಶಿವಳ್ಳಿ ಸಮಾಜದ ಕ್ರೀಡೋಚ್ಚಯ 2026ತ್ತ ಸಮಾರೋಪಡ್ ಐತಾರ ಸಮಾರೋಪ ಭಾಷಣ ಮಲ್ತೆರ್.

ಜಿಲ್ಲಾ ಧಾರ್ಮಿಕ ಪರಿಷತ್ ಸದಸ್ಯೆರ್ ಸುಬ್ರಹ್ಮಣ್ಯ ಪ್ರಸಾದ್ ಕೋರ್ಯಾರು, ಅಗರಿ ಎಂಟರ್ ಪ್ರೈಸಸ್ ಮಾಲಕೆರ್ ಅಗರಿ ರಾಘವೇಂದ್ರ ರಾವ್ ಪಾತೆರಿಯೆರ್.

ಈ ಪೊರ್ತುಡು ಹರಿಕೃಷ್ಣ ಪೆಜತ್ತಾಯ ಎಂಅರ್ ಪಿಎಲ್, ಪ್ರಸಾದ್ ರಾವ್ ಎಂಆರ್ ಪಿಎಲ್, ಕುಡ್ಲ ತಾಲೂಕ್ ಶಿವಳ್ಳಿ ಸಮಾಜದ ಅಧ್ಯಕ್ಷೆರ್ ಬಿ ಉದಯ ಶಂಕರ್ ಭಟ್, ಪಾವಂಜೆ ವಲಯಾಧ್ಯಕ್ಷೆರ್ ಎಸ್ ಎಸ್ ಸತೀಶ್ ಭಟ್, ಎಂಜಿ ರಾಮಚಂದ್ರ ಮುಕ್ಕ, ಪಾವಂಜೆ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಅರ್ಚಕೆರ್ ವಾಸುದೇವ ಭಟ್, ಬಾಲಕೃಷ್ಣ ರಾವ್ ಚೆನ್ನೈ, ಕ್ರೀಡಾ ಕೂಟದ ಸಂಚಾಲಕೆರ್ ಭಾಸ್ಕರ ರಾವ್ ಬಾಳ, ಕೇಂದ್ರ ಕಾರ್ಯದರ್ಶಿ ಭಾಸ್ಕರ್ ಭಟ್ ಪಾಲ್ ಪಡೆದಿತ್ತೆರ್.

ಸುರತ್ಕಲ್ ವಲಯ ಸಮಗ್ರ ಪ್ರಶಸ್ತಿ ಪಡೆತ್ಂಡ್. ಕ್ರಿಕೆಟ್ ಡ್ ಕಟೀಲ್ ವಲಯ ಪಸ್ಟ್, ಪಾವಂಜೆ ಸೆಕೆಂಡ್, ಪೊಂಜೋವುಲೆನ ರಿಲೇಟ್ ಸುರತ್ಕಲ್ ಪಸ್ಟ್, ಬೊಕ್ಕ ಸೆಕೆಂಡ್, ಆನ್ ಜೋವುಲೆನ ರಿಲೇಟ್ ಸುರತ್ಕಲ್ ಪಸ್ಟ್, ಪಾವಂಜೆ ಸೆಕೆಂಡ್, ಪೊಂಜೋವುಲೆನ ತ್ರೋ ಬಾಲ್‌ ಡ್ ಸುರತ್ಕಲ್ ಪಸ್ಟ್, ಮಂಗಳಾದೇವಿ ಸೆಕೆಂಡ್, ಪೊಂಜೋವುಲೆನ ಬಲ್ಲ್ ಒಯಿಪುನೆಟ್ಟ್ ಸುರತ್ಕಲ್ ಪಸ್ಟ್ ಬೊಕ್ಕ ಸೆಕೆಂಡ್, ಆನ್ ಜೋವುಲೆನ ಬಲ್ಲ್ ಒಯಿಪುನೆಟ್ ಪಾವಂಜೆ ಪಸ್ಟ್, ಸುರತ್ಕಲ್ ಸೆಕೆಂಡ್ ಇನಾಮುನ್ ಪಡೆತ್ಂಡ್.

ಕ್ರಿಕೆಟ್ ಡ್ ಕಟೀಲ್ ಕೂಟದ ಶ್ರಿನಿಧಿ ಪಂದ್ಯ ಶ್ರೇಷ್ಠ, ಪಾವಂಜೆ ಕೂಟದ ಸುದರ್ಶನ್ ಪೆಜತ್ತಾಯ ಉತ್ತಮ ಎಸೆತಗಾರ, ಮಂಗಳಾದೇವಿ ಕೂಟದ ಹರಿಪ್ರಸಾದ್ ಉತ್ತಮ ದಾಂಡಿಗ, ಪಾವಂಜೆ ಕೂಟದ ಕಿರಣ್ ಸರಣಿ ಶ್ರೇಷ್ಠ ಬಿರುದು ಪಡೆಯೆರ್.

ಈ ಲೇಸ್ ನ್ ವೈಭವಿ, ಚಂದ್ರಿಕಾ ಸುರೇಶ್ ಸುಧಾರಿಕೆ ಮಲ್ತೆರ್.

ಕಾವ್ಯಶ್ರೀ ಅಜೇರು ಮೆರೆಗ್ ಕುಂದೇಶ್ವರ ಸಮ್ಮಾನ್ ಪ್ರಶಸ್ತಿ

ಉಮೇಶ್ ಮಿಜಾರ್‌ಗ್ ಕಲಾಭೂಷಣ ಪ್ರಶಸ್ತಿ

ಕುಡ್ಲ : ಕಾರ್ಕಳ ಹಿರ್ಗಾನ ಶ್ರೀ ಕುಂದೇಶ್ವರ ಕ್ಷೇತ್ರದ ವತಿರ್ದ್ ಪ್ರತಿವರ್ಷ ಕೊರ್ಪಿನ ಪ್ರತಿಷ್ಠಿತ ಶ್ರೀ ಕುಂದೇಶ್ವರ ಸಮ್ಮಾನ್ ಪ್ರಶಸ್ತಿಗ್ ಯಕ್ಷರಂಗದ ಅಗ್ರಮಾನ್ಯ ಮಹಿಳಾ ಭಾಗವತೆರಾಯಿನ ಕಾವ್ಯಶ್ರೀ ಅಜೇರು ಆಯ್ಕೆ ಆತೆರ್.
ಶ್ರೀಕುಂದೇಶ್ವರ ದೇಗುಲದ ಧರ್ಮದರ್ಶಿಯಾದ್, ಯಕ್ಷಗಾನ ಮೇಳ ಸಂಘಟಕ, ಕಲಾವಿದ, ಅರ್ಥಧಾರಿ ಆದಿತ್ತಿನ ದಿ.ರಾಘವೇಂದ್ರ ಭಟ್ ಸ್ಮರಣಾರ್ಥ, ಕ್ಷೇತ್ರದ ವತಿರ್ದ್ ಪ್ರಶಸ್ತಿ ಕೊರೊಂದುಲ್ಲೆರ್. ಜ.23 ಕ್ಕ್ ಪ್ರಶಸ್ತಿ ಪ್ರದಾನ ಮಲ್ಪರೆ ಉಂಡು ಪಂದ್ ಆಯ್ಕೆ ಸಮಿತಿ ಸಂಚಾಲಕೆರ್ ಜಿತೇಂದ್ರ ಕುಂದೇಶ್ವರ ಸುದ್ದಿಗೋಷ್ಠಿಡ್ ತೆರಿಪಾಯೆರ್.
ಶ್ರೀ ಕುಂದೇಶ್ವರ ಕ್ಷೇತ್ರಡ್ ಜ. 21 ರ್ದ್ 23 ಮುಟ್ಟ ವರ್ಷಾವಧಿ ಜಾತ್ರೆ ನಡಪರೆ ಇತ್ತ್‌ದ್ ಜ.23 ರಾತ್ರಿ7 ಗಂಟೆಗ್ ರಾಮಚಂದ್ರ ಭಟ್ ಎಲ್ಲೂರು ನಿರ್ದೇಶನಡ್ ಕದ್ರಿ ಮಹಿಳಾ ಯಕ್ಷಕೂಟ ದಕ್ಲೆರ್ದ್ ಮಹಿಳಾ ಯಕ್ಷಗಾನ, ನಮ್ಮ ಬೆದ್ರ ತಂಡದಕ್ಕೆರ್ದ್ ತುಳು ನಾಟಕ ನಡಪರೆ ಉಂಡು.
ಉಂದುವೇ ಪೊರ್ತುಡು ಪ್ರಶಸ್ತಿ ಪ್ರದಾನ ನಡಪರೆ ಉಂಡು. ನೆರ್ದ್ ದುಂಬು ಸಾಲಿಗ್ರಾಮ ಮೇಳದ ಸಂಚಾಲಕೆರ್ ಕಿಶನ್ ಹೆಗ್ಡೆ, ರಮೇಶ್ ಭಂಡಾರಿ ಪಟ್ಲ ಸತೀಶ್ ಶೆಟ್ಟಿ, ಶಶಿಕಾಂತ್ ಶೆಟ್ಟಿ ಕಾರ್ಕಳ, ರಾಘವೇಂದ್ರ ಮಯ್ಯ, ಕಟೀಲು ಶ್ರೀಹರಿ ನಾರಾಯಣದಾಸ ಆಸ್ರಣ್ಣ, ಲೋಕೇಶ್ ಮಚ್ಚೂರು ಮೊಕ್ಲೆಗ್ ಕುಂದೇಶ್ವರ ಸಮ್ಮಾನ್ ಪ್ರಶಸ್ತಿ ಪ್ರದಾನ ಮಲ್ತ್‌ದ ಪಂದ್ ಪಂಡೆರ್.
ಕುಂದೇಶ್ವರ ಕಲಾಭೂಷಣ ಪ್ರಶಸ್ತಿ: ರಂಗಭೂಮಿ ಕಲಾವಿದೆರೆಗ್ ಕೊರ್ಪಿನ ಕುಂದೇಶ್ವರ ಕಲಾಭೂಷಣ ಪ್ರಶಸ್ತಿ ಈ ಸರ್ತಿ ಉಮೇಶ್ ಮಿಜಾರ್ ಮೆರೆಗ್ ಪ್ರದಾನ ಮಲ್ಪರೆ ಉಂಡು. ಸಮಾರಂಭರ್ದ್ ಬೊಕ್ಕ ನಮ್ಮ ಬೆದ್ರ ಕಲಾವಿದೆರೆರ್ದ್ “ವೈರಲ್ ವೈಶಾಲಿ” ತುಳು ನಾಟಕ ಪ್ರದರ್ಶನ ಆವರೆ ಉಂಡು ಪಂದ್ ಜಿತೇಂದ್ರ ಕುಂದೇಶ್ವರ ತೆರಿಪಾಯೆರ್.

You Missed