Sun. Nov 22nd, 2026

ಕಾಸ್ರೋಡ್ ಸುದ್ದಿ | Kasargod News

ಎ.11ಕ್ಕ್ ಜಿಲ್ಲಾ ಮಟ್ಟದ ಗ್ರಾಮ ಸೀಮಿತ ಕೂಟದ ಕಬಡ್ಡಿ ಪಂದ್ಯಾಟ, ಸನ್ಮಾನ ಬೊಕ್ಕ ಅಭಿನಂದನಾ ಲೇಸ್ ದ ಆಮಂತ್ರಣ ಪತ್ರಿಕೆ ಬುಡುಗಡೆ

ವಿಟ್ಲ, ಮಾರ್ಚ್ 31: ನೆಟ್ಲಮುಡ್ನೂರು ಗ್ರಾಮದ ನೇರಳಕಟ್ಟೆ ಫ್ರೆಂಡ್ಸ್ ಕ್ಲಬ್ (ಎನ್.ಎಫ್.ಸಿ) ಒಟ್ಟು ಸೇರಿಗೆಡ್ ದ.ಕ. ಜಿಲ್ಲೆ ಬೊಕ್ಕ ಬಂಟ್ವಾಳ ತಾಲೂಕು ಅಮೆಚೂರು ಕಬಡ್ಡಿ ಎಸೋಸಿಯೇಶನ್ ಸಾಕಾರಡ್ ಎ. 11ಕ್ಕ್ ನಡಪುನ ಜಿಲ್ಲಾ ಮಟ್ಟದ ಗ್ರಾಮ ಸೀಮಿತ ಕೂಟದ ಕಬಡ್ಡಿ ಪಂದ್ಯಾಟ, ಸನ್ಮಾನ ಬೊಕ್ಕ ಅಭಿನಂದನಾ ಲೇಸ್ ದ ಆಮಂತ್ರಣ ಪತ್ರಿಕೆ ಬುಡುಗಡೆ ನೇರಳಕಟ್ಟೆದ ಡಿ.ಕೆ. ಸ್ವಾಮಿ ಶ್ರದ್ದಾ ಕೇಂದ್ರದ ಆವರಣಡ್ ನಡತ್oಡ್ .

ಡಿ.ಕೆ.ಸ್ವಾಮೀಜಿ ನೇರಳಕಟ್ಟೆ ಬುಡುಗಡೆ ಮಲ್ತೆರ್ . ಈ ಪೊರ್ತುಡು ಎನ್‌ಎಫ್ ಸಿ ಗುರ್ಕಾರ್ಲಾಯಿನ ಲತೀಫ್ ನೇರಳಕಟ್ಟೆ, ಒಟ್ಟುಗುರ್ಕಾರ್ಲಾಯಿನ ಮಜೀದ್ ಮಾಣಿ, ರಝಾಕ್ ಸಾಹೇಬ್, ಪ್ರಧಾನ ಕಾರ್ಯದರ್ಶಿ ಚಂದ್ರಶೇಖರ ಪೆರಾಜೆ, ಪದಾಧಿಕಾರಿಗಳಾದ ಅತಾವುಲ್ಲಾ ನೇರಳಕಟ್ಟೆ, ಬದ್ರುದ್ದೀನ್ ನೇರಳಕಟ್ಟೆ, ಇಸ್ಮಾಯಿಲ್ ಎನ್.ಎಚ್. ಪಾಲ್ ಪಡೆದಿತ್ತೆರ್.

ಉಳ್ಳಾಲ ಮಾಸ್ತಿಕಟ್ಟೆದ ನಿವಾಸಿ ಎಂ.ಸಿ.ಅಬ್ದುಲ್ ರಹಿಮಾನ್ ರಾಷ್ಟ್ರೀಯ ಮಟ್ಟದ ಕ್ರೀಡಾ ಕೂಟಗ್ ಆಯ್ಕೆ

ಉಳ್ಳಾಲ, ಮಾರ್ಚ್ 31: ಬೆಂಗಳೂರುದ ದೇವನಹಳ್ಳಿದ ವಿದ್ಯಾನಗರ ಕ್ರೀಡಾಂಗಣಡ್ ಮಾಸ್ಟರ್ಸ್ ಗೇಮ್ಸ್ ಎಸೋಸಿಯೇಶನ್ ವತಿರ್ದ್ ರಡ್ಡನೇ ಸಲ ನಡತಿನ ರಾಜ್ಯ ಮಟ್ಟದ ಪೆರಿಯಾಕ್ಲೆನ ಕ್ರೀಡಾಕೂಟಡ್ ಉಳ್ಳಾಲ ಮಾಸ್ತಿಕಟ್ಟೆದ ನಿವಾಸಿ ಎಂ.ಸಿ.ಅಬ್ದುಲ್ ರಹಿಮಾನ್ 100 ಮೀಟರ್ ಬೊಕ್ಕ 200ಮೀಟರ್ ಓಟಡ್ ಬಂಗಾರ್ ದ ಪದಕ ಬೊಕ್ಕ 100X400 ಮಿಶ್ರ ರಿಲೇ ಡ್ ಲಾ ಬಂಗಾರ್ದ ಪದಕ ಗೆಂದ್ ದೆರ್. ಮೇರ್ ಹೈದರಾಬಾದ್ಡ್ ನಡಪುನ ರಾಷ್ಟ್ರೀಯ ಮಟ್ಟದ ಕ್ರೀಡಾ ಕೂಟಗ್ ಆಯ್ಕೆ ಆತೆರ್ .

ವಿಶ್ವಾಸಾರ್ಹತೆನೆ ಪತ್ರಕರ್ತೆರೆಗ್ ಜೀವಾಳ :ಪ್ರೊ.ಪಿ.ಎಸ್.ಯಡಪಡಿತ್ತಾಯ

ಕುಡ್ಲ, ಮಾರ್ಚ್ 31: ಒವ್ವೆ ಆಮಿಷಗ್ ಬಲಿಯಾವoದೆ ವಿಶ್ವಾಸರ್ಹತೆನ್ ಒರಿ ಪಾವೊಂದು ಪತ್ರಕರ್ತೆರ್ ಬೇಲೆ ಮಲ್ಪೊಡು . ವಿಶ್ವಾಸಾರ್ಹತೆಯೇ ಪತ್ರಕರ್ತರೆಗ್ ಜೀವಾಳ ಪಂದ್ ಕುಡ್ಲ ವಿ.ವಿ.ಕುಲಪತಿ ಪ್ರೊ.ಪಿ.ಎಸ್.ಯಡಪಡಿತ್ತಾಯ ಪಂತೆರ್ .

ಕುಡ್ಲ ಪತ್ರಿಕಾಭವನದಡ್ ಅಂಗಾರೆ ನಡತಿನ ಲೇಸ್ ಡ್ ದ.ಕ.ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ವತಿರ್ದ್ ಕೊರ್ಪಿನ ಪ.ಗೋ. ಪ್ರಶಸ್ತಿನ್ ಪತ್ರಕರ್ತ ಪ್ರದೀಶ್.ಎಚ್.ಮರೋಡಿ ಮೆರೆಗ್ ಮಾನದಿಗೆ ಮಲ್ತ್ ದ್ ಪಾತೆರಿಯೆರ್.

ಬಡ ಕುಟುಂಬದ ಮಂಜುನಾಥ ಪೂಜಾರಿಗ್ ಚಿಕಿತ್ಸೆಗಾದ್ ಮನವಿ

ನಮ್ಮ ಮೋಕೆದ ದೋಸ್ತಿ ಮಂಜುನಾಥ್ ಪೂಜಾರಿ ಕೊಕ್ಕರ್ಣೆ ಮೇರ್ ರಡ್ಡ್ ಕಿಡ್ನಿ ವೈಫಲ್ಯರ್ದ್ ಕೆ.ಎಂ.ಸಿ. ಮಣಿಪಾಲ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಉಲ್ಲೆರ್ . ಸಹೃದಯಿಲಾಯಿನ ನಿಕುಲು ಮೆರ್ನ ಚಿಕಿತ್ಸೆಗ್ ಆರ್ಥಿಕ ನೆರವು ಕೊರ್ದು ಸಾಕಾರ ಕೊರೊಡು ಪಂದ್ ಈ ಮುಖೇನ ಬಿನ್ನಾಪು. ನಿಕ್ಲೆನ ಸಾಕಾರ ಬಾರಿ ಅಗತ್ಯ ಉಂಡು, ಸಾಕಾರ ಮಲ್ಪುನಕುಲು ನೇರವಾದ್ ಆರ್ನ ಬ್ಯಾಂಕ್ ಖಾತೆಗ್ ಅತ್ತುಂಡ ಫೋನ್ ಪೇ ಬೊಕ್ಕ ಗೂಗಲ್ ಪೇ ಗ್ ಜಮ ಮಲ್ಪೋಲಿ .

“ಹನಿ ಗೂಡಿದರೆ ಹಳ್ಳ” ಪನ್ಪಿನ ಪಾತೆರದ ಪ್ರಕಾರ ನಿಕ್ಲೆನ ಬೆರಿ ಸಹಾಯಲ ಬಾರಿ ಅಮೂಲ್ಯ ವಾಯಿನವು.

41ನೇ ಶಿರೂರ್ ಬೈರಂಪಳ್ಳಿ ಗ್ರಾಮ ಪಂಚಾಯತ್ ಗುರ್ಕಾರ್ಲೆಗ್ ಅಂಚನೇ ಒತ್ತು ಗುರ್ಕಾರ್ಲೆಗ್ ತುಳು ಲಿಪಿತಾ ಬೋರ್ಡ್ ವಿತರಣೆ

ಕುಡ್ಲ, ಮಾರ್ಚ್ 30: 41ನೇ ಶಿರೂರ್ ಬೈರಂಪಳ್ಳಿ ಗ್ರಾಮ ಪಂಚಾಯತ್ ಗುರ್ಕಾರ್ಲೆಗ್ ಅಂಚನೇ ಒತ್ತು ಗುರ್ಕಾರ್ಲೆಗ್ ತುಳು ಲಿಪಿತಾ ಬೋರ್ಡ್ ಕೊರ್ದು ದುಂಬುಗು ತುಳು ಲಿಪಿ ಬುಲೆಪಾವರೆ ಬೇರಿಬಲೋ ಕೇಂಡೊಂಡೆರ್ . ಈ ಪೋರ್ತುಡ್ ಪಂಚಾಯತ್ ಗುರ್ಕಾರ್ಲು ಜಿಯಾನಂದ ಹೆಗ್ಡೆ ಒತ್ತು ಗುರ್ಕಾರ್ಲು ಸಚೇತಾ ರಾವ್ ಅಂಚೆನೇ ಪಂಚಾಯತ್ ಸದಸ್ಯ ಹರ್ಷಿತ್ ಬಕ ರೋಹಿತ್ ಬೈರಂಪಳ್ಳಿ, ಸಂದೀಪ್ ಬೆಳ್ಳಾರ್ಪಡಿ ಅಂಚೆನೇ ಜೈ ತುಳುನಾಡ್ ಕಾರ್ಲ ರವಿಚಂದ್ರ, ನಿಧೀಶ್ ಜೈ ತುಳುನಾಡ್ ಇತ್ತೆರ್.

ಈ ಗುರ್ಕಾರ್ಲ್ಡ್ ಬಿನ್ನಪ್ಪು ಮಲ್ತೊನ್ದ ದುಂಬುಗ್ ಹರಿಕಂಡಿಗೆ ಶಾಲೆ, ಬೆಳ್ಳಾರ್ಪಡಿ ಶಾಲೆಡ್ ತುಳು ಲಿಪಿ ಮಲ್ಪರೆ ಅನುಮತಿ ಬೆಂಬಲ ಕೇಂಡೊಂಡ.

ಅಪ್ರಕಟಿತ ತುಳು ನಾಟಕ ಹಸ್ತಪ್ರತಿ ಸ್ಪರ್ಧೆ 2020’ಡ್ ತುಳು ಸಾಹಿತಿ ಅಕ್ಷತಾ ರಾಜ್ ಪೆರ್ಲ ಮೇರ್ನ ಸಾಪೊದ ಕಣ್ಣ್ ನಾಟಕೊಗು ಸುರುತ್ತ ತಾನೊ

ಕುಡ್ಲ, ಮಾರ್ಚ್ 30 : ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆ ಪ್ರಾಯೋಜಕತ್ವಡ್ ತುಳುಕೂಟ ಕೊರ್ಪಿನ ರತ್ನವರ್ಮ ಹೆಗ್ಗಡೆ ಪ್ರಶಸ್ತಿ -2020ಕ್ಕ್ ‘ಅಕ್ಷತಾರಾಜ್ ಪೆರ್ಲ ಮೆರ್ನ ‘ಸಾಪೊದ ಕಣ್ಣ್ ‘ ಪ್ರಥಮ, ರಾಜಶ್ರೀ ಟಿ.ರೈ ಪೆರ್ಲ ಮೆರ್ನ” ತತ್ತ್ ಮೋಸದ ಬಾಲೆ “‘ ದ್ವಿತೀಯ ಬೊಕ್ಕ ಶಶಿರಾಜ್ ರಾವ್ ಕಾವೂರು ಮೆರ್ನ ಬಿಂಬೋದ ಬೊಲ್ಪು ಮೂಜನೆ ಇನಾಮುಗು ಆಯ್ಕೆ ಆತ್oಡ್.

ತನ್ನ ಅಮ್ಮೆರ್ನ ನೆಂಪುಗು ಡಾ.ಹೆಗ್ಗಡೆ ಕರಿನ 45 ವರ್ಷರ್ದ್ ಈ ಮಾನದಿಗೆ ಕೊರೊಂದು ಉಲ್ಲೆರ್ . ಪ್ರಶಸ್ತಿ ಕ್ರಮವಾದ್ 10, 8, 6 ಸಾವಿರ ರೂ. ಪನವು , ಪ್ರಶಸ್ತಿ ಪತ್ರ ಬೊಕ್ಕ ಸ್ಮರಣಿಕೆ ಉಂಡು . ವಿಶ್ರಾಂತ ಪೆರಿಯ ಪತ್ರಕರ್ತ ಮನೋಹರ ಪ್ರಸಾದ್, ಸಾಹಿತಿ ಕದ್ರಿ ನವನೀತ ಶೆಟ್ಟಿ ಬೊಕ್ಕ ಉಡಲ್ ಪತ್ರಿಕೆ ಸಂಪಾದಕಿ ಜಯಂತಿ ಎಸ್. ಬಂಗೇರ ಮೆಕುಲು ಇತ್ತಿನ ಸಮಿತಿ ಕೃತಿಲೆನ್ ಆಯ್ಕೆ ಮಲ್ದುಂಡು . ಮಂಗಳಾದೇವಿ ದೇವಸ್ಥಾನ ವಠಾರಡ್ ತುಳುಕೂಟ ಕುಡ್ಲ ವತಿರ್ದ್ ಎಪ್ರಿಲ್ .14 ತಾರೀಖ್ ಗ್ ನಡಪುನ ಬಿಸು ಪರ್ಬ ಲೇಸ್ ಡ್ ಮಾನದಿಗೆ ಮಲ್ಪರೆ ಉಲ್ಲೆರ್ ಪಂದ್ ಬಿ.ದಾಮೋದರ ಪ್ರಕಟಣೆಡ್ ತೆರಿಪಾದೆರ್ .

ಶ್ರೀ ನಾಗಬ್ರಹ್ಮ ಅದಿಮೊಗೆರ್ಕಳ ಪರಿವಾರ ದೈವಬೊಕ್ಕ ಶ್ರೀ ನಾಗದೇವರ ಪ್ರತಿಷ್ಠಾ ವರ್ಧಂತ್ಯುತ್ಸವ ಬೊಕ್ಕ ದೈವೊಲೆನ ನೇಮೋತ್ಸವ

ಕುಡ್ಲ, ಮಾರ್ಚ್ಶ್ರೀ 30: ನಾಗಬ್ರಹ್ಮ ಅದಿಮೊಗೆರ್ಕಳ ಪರಿವಾರ ದೈವಬೊಕ್ಕ ಶ್ರೀ ನಾಗದೇವರ ಪ್ರತಿಷ್ಠಾ ವರ್ಧಂತ್ಯುತ್ಸವ ಬೊಕ್ಕ ದೈವೊಲೆನ ನೇಮೋತ್ಸವತಾರೀಖ್ ತಾ. 8-5-2021ನೇ ಶನಿವಾರ ಬೊಕ್ಕ ತಾ. 9-5-2021ನೇ ಐತಾರದಾನಿ ಕಾಂಡೆ ಗಂಟೆ 9.00ರ್ದ್ ವೇದಮೂರ್ತಿ ರಾಜಗೋಪಾಲಾಚಾರ್ಯ ಮೆರ್ನ ಮುತಾಲಿಕೆಡ್ ನಡಪರೆ ಉಂಡು.

ಜಿಲ್ಲಾ ಕೃಷಿಕ ಸಂಘ ಶಿರ್ವ ವಲಯ ಕೃಷಿ ಮಾಹಿತಿ ಸಭೆ

ಉಡುಪಿ, ಮಾ.30: ಜಿಲ್ಲಾ ಕೃಷಿಕ ಸಂಘ ಶಿರ್ವ ವಲಯ ಸಮಿತಿ ಅಟ್ಟನೆ ಮಲ್ದಿನ ಮಲ್ಲಿಗೆ ಬೊಕ ಭತ್ತ ಬೇಸಾಯ ಕೃಷಿ ಮಾಹಿತಿ ಸಭೆ ಮಾ.31 ತಾರೀಖ್ ಗ್ ಕಾಂಡೆ 11 ಗಂಟೆಗ್ ಮೂಡುಬೆಳ್ಳೆ ನೆಲ್ಲಿಕಟ್ಟೆ ತಾಬೈಲುಡ್ ನಡಪರೆ ಉಂಡು .

ಮೂಡುಬೆಳ್ಳೆ ಲಾರೆನ್ಸ್ ಆಳ್ವಾ ಗುರ್ಕಾರ್ಮೆಡ್ ನಡಪುನ ಈ ಲೇಸ್ ನ್ ಬೆಳ್ಳೆ ಗ್ರಾಪಂ ಗುರ್ಕಾರ್ಲಾಯಿನ ಸುಧಾಕರ ಪೂಜಾರಿ ಉದಿಪನ ಮಲ್ಪರೆ ಉಲ್ಲೆರ್. ಮಲ್ಲ ಬಿನ್ನೆರ್ ಆದ್ ಬೆಳ್ಳೆ ಪಂಚಾಯತ್ ಒತ್ತುಗುರ್ಕಾರ್ಲಾಯಿನ ಸಂಧ್ಯಾ ಎಂ. ಶೆಟ್ಟಿ, ತಾಪಂ ಸದಸ್ಯೆರಾಯಿನ ಸುಜಾತ ಸುವರ್ಣ, ರಜನಿ ಹೆಗ್ಡೆ, ಜಿಪಂ ಮಾಜಿ ಗುರ್ಕಾರ್ಲಾಯಿನ ಜೆರಾಲ್ಡ್ ಪೆರ್ನಾಂಡಿಸ್, ಗ್ರಾಪಂ ಸದಸ್ಯೆರಾಯಿನ ರಾಜೇಂದ್ರ ಶೆಟ್ಟಿ, ಶಿಲ್ಪಾ ಪಾಲ್ ಪಡೆಯರೆ ಉಲ್ಲೆರ್ .

ಮಲ್ಲ ಬಿನ್ನೆರ್ ಆದ್ ಜಿಲ್ಲಾ ಕೃಷಿಕ ಸಂಘದ ಗುರ್ಕಾರ್ಲಾಯಿನ ರಾಮಕೃಷ್ಣ ಶರ್ಮ ಬಂಟಕಲ್ಲು, ಪ್ರಧಾನ ಕಾರ್ಯದರ್ಶಿ, ರಾಷ್ಟ್ರ ಪ್ರಶಸ್ತಿ ವಿಜೇತ ಕೃಷಿಕ ಕುದಿ ಶ್ರೀನಿವಾಸ ಭಟ್ ಬೊಕ್ಕ ಪ್ರಗತಿಪರ ಕೃಷಿಕ ರಾಘವೇಂದ್ರ ನಾಯಕ್ ಕಲ್ಲೊಟ್ಟು ಪಾಲ್ ಪಡೆಯರೆ ಉಲ್ಲೆರ್ .

ಸುಳ್ಯ ನೆಲ್ಲೂರು ಕೆಮ್ರಾಜೆದ ಎ.ವಿ.ಚಿತ್ತರಂಜನ್ ದಾಸ್ ನಿಧನ

ಸುಳ್ಯ: ದೆಹಲಿ ಆಕಾಶವಾಣಿಡ್ ಕನ್ನಡ ವಾರ್ತೆಲೆನ್ ಓದುನ ಮುಖೇನ ಕನ್ನಡ ನಾಡ್ ದ ಜನತೆಗ್ ಚಿರಪರಿಚಿತರಾತಿನ ಸುಳ್ಯ ನೆಲ್ಲೂರು ಕೆಮ್ರಾಜೆಯ ಎ.ವಿ.ಚಿತ್ತರಂಜನ್ ದಾಸ್ (61) ಹೃದಯಾಘಾತರ್ದ್ ತೀರ್ ಪೋಯೆರ್.

ಇಂಚಗ್ ಮೇರ್ ಬೆಂಗಳೂರುಡು ಉಂತುದು ಇತ್ತೆರ್ . ಮೃತೆರ್ ಧರ್ಮಪತ್ನಿ ಬೊಕ್ಕ ರಡ್ಡ್ ಪೊಣ್ಣು ಜೋಕುಲು, ಒಪ್ಪ ಪುಟ್ಟಿನಕ್ಲೆನೆರ್ದ್ ದೂರ ಆತೆರ್.

ಕಾಂಡೆ, ಮಧ್ಯಾಹ್ನ, ಬೈಯ್ಯದ ಮೂಜಿ ಪೊರ್ತುಲ ದಿಲ್ಲಿರ್ದ್ ಪ್ರಸಾರ ಆವೊಂದು ಇತ್ತಿನ ಕನ್ನಡ ವಾರ್ತೆಲೆನ್ ಒಂದೊಂದು ಇತ್ತಿನಕ್ಲೆನೆಟ್ಟ್ ಚಿತ್ತರಂಜನ್ ದಾಸ್ ಲಾ ಒರಿ . ಗಂಭೀರ ಬೊಕ್ಕ ಆಕರ್ಷಕ ಶೈಲಿಡ್ ಕನ್ನಡ ವಾರ್ತೆಲೆನ್ ಓದೊಂದು ಇತ್ತಿನ ಮೇರ್ ಬಾರಿ ಪುಗಾರ್ತೆ ಪಡೆದ್ ಇತ್ತೆರ್.

‘ಸತ್ಯ – ಧರ್ಮ’ ಜೋಡುಕರೆ ಬಯಲು ಕಂಬಳ : ಮಿಜಾರು ಅಶ್ವತ್ಥಪುರ ಶ್ರೀನಿವಾಸ ಗೌಡ ಹ್ಯಾಟ್ರಿಕ್‌ ಸಾಧನೆ

ಬಂಟ್ವಾಳ: ಕಕ್ಯಪದವು ಮೈರಡ್ ಶನಿವಾರ ಸುರು ಆಯಿನ 8ನೇ ವರ್ಷದ ‘ಸತ್ಯ – ಧರ್ಮ’ ಜೋಡುಕರೆ ಬಯಲು ಕಂಬಳ ಐತಾರ ಬೈಯ್ಯ ಮುಗಿನ್ಡ್ . ಈ ಕಂಬಳಡ್ ಲಾ ಮಿಜಾರು ಅಶ್ವತ್ಥಪುರ ಶ್ರೀನಿವಾಸ ಗೌಡ ಹ್ಯಾಟ್ರಿಕ್‌ ಸಾಧನೆ ಮಲ್ದೆರ್ .

ಬಲ್ಲ್ ದ ಮಲ್ಲ, ಬಲ್ಲ್ ದ ಎಲ್ಯ ಬೊಕ್ಕ ನೇಗಿಲು ಮಲ್ಲ ವಿಭಾಗದ ಎರು ಗಿಡಯಿನ ಶ್ರೀನಿವಾಸ ಗೌಡ ಮೂಜಿ ವಿಭಾಗಡ್ಲಾ ಸುರುತ್ತ ಇನಾಮು ಗೆಂದ್ದೆರ್.

ಕಂಬಳಡ್ ಒಟ್ಟು 155 ಜತೆ ಎರು ಪಾಲ್ ಪಡೆದ್ ಇತ್ತ್ oಡ್ . ಕನೆ ಹಲಗೆಡ್ 2 ಜತೆ, ಅಡ್ಡ ಪಲಾಯಿಡ್ 5 ಜತೆ, ಹಗ್ಗ ಮಲ್ಲ ಡ್ 12 ಜತೆ, ನೇಗಿಲು ಹಿರಿಯಡ್ 21 ಜತೆ, ಹಗ್ಗ ಎಲ್ಯ ಡ್ 18 ಜತೆ, ನೇಗಿಲು ಎಲ್ಯಡ್ 97 ಜತೆ ಎರು ಪಾಲ್ ಪಡೆದ್ ಇತ್ತ್oಡ್ .

You Missed