ಕಾಸ್ರೋಡ್ ಸುದ್ದಿ | Kasargod News

ತನ್ನ ಒಂಜಿ ತಿಂಗೊಲ್ದ ನಿವೃತ್ತಿ ವೇತನನ್ ಕೋವಿಡ್ ಸಹಾಯನಿಧಿಗ್ ಕೊರಿನ ಮಾಜಿ ಶಾಸಕ ವಿಜಯ ಕುಮಾರ್ ಶೆಟ್ಟಿ

ಕುಡ್ಲ , ಜೂ. 25: ಕೋವಿಡ್ ಸಹಾಯನಿಧಿಗ್ ಮಾಜಿ ಶಾಸಕ ವಿಜಯ ಕುಮಾರ್ ಶೆಟ್ಟಿ ಮೇರ್ ತನ್ನ ಒಂಜಿ ತಿಂಗೊಲ್ ದ ನಿವೃತ್ತಿ ವೇತನನ್ ದ.ಕ.ಜಿಲ್ಲಾಧಿಕಾರಿಗ್ ಕೊರಿಯೆರ್ .

ಈ ಪೊರ್ತುಡು ಮಾಜಿ ಉಪಮೇಯರ್ ಪುರುಷೋತ್ತಮ ಚಿತ್ರಾಪುರ, ಹುಸೈನ್ ಕಾಟಿಪಳ್ಳ, ಮಾಜಿ ಕಾರ್ಪೊರೇಟರ್ ಕುಮಾರ್ ಮೆಂಡನ್ ಪಾಲ್ ಪಡೆದಿತ್ತೆರ್ .

ಬಡಾನಿಡಿಯೂರು ಗ್ರಾಮ ಪಂಚಾಯತ್ ಡ್ ವಿಮಾ ಸಪ್ತಾಹಗ್ ಚಾಲನೆ

ಒಡಿಪು, ಜೂನ್ 25:ವಿಮಾ ಸಪ್ತಾಹದ ಅಂಗವಾದ್‌ ಜಿಲ್ಲಾ ಪಂಚಾಯತ್ ರಾಷ್ಟ್ರೀಯ ಗ್ರಾಮೀಣ ಜೀವನೋಪಾಯ ಸಂಜೀವಿನಿದ ಸದಸ್ಯೆರೆಗ್ ‌ಬಡಾನಿಡಿಯೂರು ಗ್ರಾಮ ಪಂಚಾಯತ್ ದ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಆಯಿನ ಶ್ರೀಮತಿ ಮಾಲತಿ ಮೇರ್ ಪ್ರಧಾನಮಂತ್ರಿ ಜೀವನ ಜ್ಯೋತಿ ಬೊಕ್ಕ ಸುರಕ್ಷಾ ವಿಮಾ ಯೋಜನೆದ ಸದುಪಯೋಗ ಮಲ್ತೊನರೆಗ್ ಮಾಹಿತಿ ಕೊರಿಯೆರ್.

ನವಶಕ್ತಿ ಸಂಜೀವಿನಿ ಬಡಾನಿಡಿಯೂರುದ ಮಾತಾ ಪದಾಧಿಕಾರಿಲು ಈ ಯೋಜನೆಗ್ ಅರ್ಜಿ ಪಾಡಿಯೆರ್..ಪಂಚಾಯತ್ ದ ಸದಸ್ಯೆರಾಯಿನ ಶ್ರೀ ಮತಿ ಯಶೋದ ಆಚಾರ್ಯ ವಿಮಾ ಯೋಜನೆ ದ ಅರ್ಜಿನ್‌ ಸಂಜೀವಿನಿದ ಪದಾಧಿಕಾರಿಲೆಗ್ ಹಸ್ತಾಂತರ ಮಲ್ತೆರ್.

ಈ ಪೊರ್ತುಡ್ ನವಶಕ್ತಿ ಸಂಜೀವಿನಿ ಸಂಘದ ಗ್ರಾಮ ಒಕ್ಕೂಟದ ಅಧ್ಯಕ್ಷೆರಾಯಿನ ಶ್ರೀ ಮತಿ ಲತಾ ಅಶೋಕ್, ಉಪಾಧ್ಯಕ್ಷೆರಾಯಿನ ಶ್ರೀ ಮತಿ ತಾರಾ ಪ್ರಭಾಕರ್, ಕಾರ್ಂತೆರಾಯಿನ ಶ್ರೀ ಮತಿ ವತ್ಸಲಾ, ಅಂಚೆನೆ ಬಾಕಿದ ಪದಾಧಿಕಾರಿಲು ಉಪಸ್ಥಿತರಿತ್ತೆರ್..ನವಶಕ್ತಿ ಸಂಜೀವಿನಿ ಬಡಾನಿಡಿಯೂರು ಗ್ರಾಮೊಡ್ ಒಟ್ಟುಗ್ 60 ಸಂಘೊಲೆಡ್ 600 ಜನ ಪೊಂಜೊವುನಕುಲು ಸದಸ್ಯೆರಾದುಲ್ಲೆರ್.ಮಾತಾ ಸದಸ್ಯೆರ್ ಲಾ ಸರಕಾರದ ಯೋಜನೆಲೆನ ಸದುಪಯೋಗ ಪಡೆತೊನೊಡ್ ,ಪೊಂಜೊವುನಕುಲು ಎರೆನಲಾ ಹಂಗ್ ದಾಂತೆ ಸ್ವಾಭಿಮಾನಿಯಾದ್ ಬದುಕೊಡ್ ಪಂಡುದ್ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಶ್ರೀಮತಿ ಮಾಲತಿ ಈ ಪೊರ್ತುಡ್ ತೆರಿಪಾಯೆರ್..

ಎಂಐಟಿದ ಜಂಟಿ ನಿರ್ದೇಶಕೆರಾದ್ ಡಾ.ಸೋಮಶೇಖರ ಭಟ್ ಆಯ್ಕೆ

ಮಣಿಪಾಲ, ಜೂ.25: ಮಣಿಪಾಲ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿದ ಪೊಸ ಜಂಟಿ ನಿರ್ದೇಶಕೆರಾದ್ ಇಲೆಕ್ಟ್ರಾನಿಕ್ಸ್ ಎಂಡ್ ಕಮ್ಯುನಿಕೇಷನ್ ಇಂಜಿನಿಯರಿಂಗ್ ವಿಭಾಗದ ಪ್ರಾಧ್ಯಾಪಕೆರಾಯಿನ ಡಾ.ಸೋಮಶೇಖರ ಭಟ್ ಆಯ್ಕೆ ಆತೆರ್ .

ಈತ್ ಮುಟ ಸಂಸ್ಥೆದ ಸಹ ನಿರ್ದೇಶಕೆ(ಅಭಿವೃದ್ಧಿ)ರಾದ್ ಬೇಲೆ ಮಲ್ತೊಂದು ಇತ್ತಿನ ಡಾ.ಭಟ್, ಕರಿನ ಆಜಿ ವರ್ಷರ್ದ್ ಎಂಐಟಿದ ಜಂಟಿ ನಿರ್ದೇಶಕೆರಾದ್ ಬೇಲೆ ಮಲ್ತೊಂದು ಇತ್ತಿನ ಡಾ.ಬಿ.ಎಚ್.ವಿ.ಪೈ ಮೆರೆರ್ದ್ ಅಧಿಕಾರ ಸ್ವೀಕಾರ ಮಲ್ತೇರ್ .

ವೀಕೆಂಡ್ ಕರ್ಫ್ಯೂ : ಕುಡ್ಲಡ್ ನನ ರಡ್ಡ್ ದಿನ ಸಂಪೂರ್ಣ ಬಂದ್

ಕುಡ್ಲ, ಜೂನ್ 25: ದಕ್ಷಿಣ ಕನ್ನಡ ಜಿಲ್ಲೆಡ್ ಶುಕ್ರವಾರ ರಾತ್ರಿ 7 ಗಂಟೆರ್ದ್ ಸೋಮವಾರ ಕಾಂಡೆ 7 ಗಂಟೆ ಮುಟ ವಾರಾಂತ್ಯ ಕರ್ಫ್ಯೂ ಜಾರಿಡ್ ಉಂಡು , ಈ ಪೊರ್ತುಡು ಪೇರ್ , ಪೇಪರ್‌, ಮೆಡಿಕಲ್‌ ಬೊಕ್ಕ ತುರ್ತು ಸೇವೆಗ್ ಮಾತ್ರ ಅವಕಾಶ ಕೊರ್ತೆರ್ . ದಿನಸಿ ಅಂಗಡಿ, ಮದ್ಯದಂಗಡಿ ಸೇರಿನಂಚ ಒರಿದಿನ ಮಾತಾ ಬಂದ್‌ ಆಯರೇ ಉಂಡು ಪಂದ್ ಜಿಲ್ಲಾಧಿಕಾರಿ ಡಾ| ರಾಜೇಂದ್ರ ಕೆ.ವಿ. ತೆರಿಪಾದೆರ್ .

ಮಾತಾ ರಾಜ್ಯ ಬೊಕ್ಕ ಕೇಂದ್ರ ಸರಕಾರದ ಕಚೇರಿಲು ಬೊಕ್ಕ ಐತ ಸ್ವಾಯತ್ತ ಸಂಸ್ಥೆಲು , ನಿಗಮಲು , ತುರ್ತು ಅಗತ್ಯ ಸೇವೆಲು ಅಂಚನೇ ಕೊರೊನಾ ಕಂಟೈನ್‌ಮೆಂಟ್‌ ಬೇಲೆ ದ ನಿರ್ವಹಣೆಗ್ ಅನುಮತಿ ಕೊರ್ತೇರ್ .

ತುರ್ತು ಬೊಕ್ಕ ಅಗತ್ಯ ಸೇವೆದೊಟ್ಟುಗು ಬೇಲೆ ಮಲ್ಪುನ ಅಂಚನೇ 24×7 ಕಾರ್ಯಾಚರಣೆದ ಅಗತ್ಯ ಉಪ್ಪುನ ಮಾತಾ ಕೈಗಾರಿಕೆಲು / ಕಂಪೆನಿಲು / ಸಂಸ್ಥೆಲು ಬೇಲೆ ಮಲ್ಪೊಲಿ ಪಂದ್ ಪಂಡೆರ್.

ಒಡಿಪುದ ಡಾ.ಟಿ.ಎಂಎ ಪೈ ಆಸ್ಪತ್ರೆ, ಬೊಕ್ಕ ಕಾರ್ಲದ ಡಾ.ಟಿಎಂಎ ಪೈ ರೋಟರಿ ಆಸ್ಪತ್ರೆಡ್ ಕೋವಿಡ್ ಲಸಿಕೆ

ಒಡಿಪು, ಜೂನ್ 25: ಮಣಿಪಾಲದ ಕಸ್ತೂರಬಾ ಆಸ್ಪತ್ರೆ, ಒಡಿಪುದ ಡಾ.ಟಿ.ಎಂಎ ಪೈ ಆಸ್ಪತ್ರೆ, ಬೊಕ್ಕ ಕಾರ್ಲದ ಡಾ.ಟಿಎಂಎ ಪೈ ರೋಟರಿ ಆಸ್ಪತ್ರೆಡ್ ಸಾರ್ವಜನಿಕೆರೆಗ್ ಕೋವಿಡ್ ಲಸಿಕೆ ಲಭ್ಯ ಉಂಡು ಪಂದ್ ಆಸ್ಪತ್ರೆದ ವೈದ್ಯಕೀಯ ಅಧೀಕ್ಷಕೆರೆಗ್ ತೆರಿಪಾದೆರ್.

ಸುರುತ್ತ ಡೋಸ್ ಪಡೆದ್ 84 ದಿನ ಆಯಿನಕ್ಲೆಗ್ ರಡ್ಡನೇ ಡೋಸ್ ಕೋವಿಶೀಲ್ಡ್ ಲಸಿಕೆ ಉಂಡು . ಸರ್ಕಾರ ಪಂಡಿನ ಬಿಲೆಕ್ಕ್ ಲಸಿಕೆ ಕೊರೊಂದು ಉಲ್ಲೆರ್ , ಸಾರ್ವಜನಿಕೆರ್ ನೆತ್ತ ಪ್ರಯೋಜನ ಪಡೆಯೋಲಿ . ಕಾಲೇಜ್ ದ ಜೋಕ್ಲೆಗ್ ವಿಶೇಷ ಕೌಂಟರ್ ವ್ಯವಸ್ಥೆ ಮಲ್ದೆರ್ .

ಎಚ್ಚದ ಮಾಹಿತಿಗಾದ್ ಕಸ್ತೂರ್ಬಾ ಆಸ್ಪತೆ ಮಣಿಪಾಲ: 0820 2922761, ಡಾ.ಟಿಎಂಎ ಪೈ ಆಸ್ಪತೆ, ಒಡಿಪು :08202942126, ಡಾ.ಟಿಎಂಎ ರೋಟರಿ ಪೈ ಆಸ್ಪತೆ, ಕಾರ್ಕಳ: 08258230583 ಗ್ ಲೆಪ್ಪು ಕೊರೋಲಿ .

ಕುಡ್ಲಡ್ ಜುಲೈ 1 ತಾರೀಖ್ ರ್ದ್ ಬಸ್ ಸುರು : ದಿಲ್ ರಾಜ್ ಆಳ್ವ

ಕುಡ್ಲ, ಜೂನ್ 25: ಕುಡ್ಲ ಜುಲೈ 1ರ್ದ್ ಸಿಟಿ ಬೊಕ್ಕ ಸರ್ವಿಸ್ ಬಸ್‌ ಸಂಚಾರ ಸುರು ಮಲ್ಪುಂಡು ಪಂದ್ ಕೆನರಾ ಬಸ್ ಮಾಲಕರ ಅಸೋಸಿಯೇಶನ್ ಗುರ್ಕಾರ್ಲಾಯಿನ ರಾಜವರ್ಮ ಬಲ್ಲಾಳ್ ಬೊಕ್ಕ ದ.ಕ.ಜಿಲ್ಲಾ ಬಸ್ ಮಾಲಕರ ಸಂಘದ ಗುರ್ಕಾರ್ಲಾಯಿನ ದಿಲ್‌ರಾಜ್ ಆಳ್ವ ಪಂಡೆರ್ .

‘ಸರಕಾರದ ಮಾರ್ಗಸೂಚಿನ್ ಯಥಾವತ್ತಾದ್ ಪಾಲಿಸಾಯೆರೆ ಸಾಧ್ಯ ಇಜ್ಜಿ ಬಸ್ ಡ್ ಉಪ್ಪುನ ಸೀಟ್ ದ ಅರ್ಧದಾತ್ ಜನಕ್ಲೆನ್ ಲೆತೊಂದು ಪೊಂಡ ನಮಕ್ ಒವ್ವೆ ಆದಾಯ ಇಜ್ಜಿ. ಇತ್ತೇ ಡೀಸೆಲ್ ಬೆಲೆ ಲ ಜಾಸ್ತಿ ಆತುಂಡು . ಪ್ರಯಾಣ ದರ ಜಾಸ್ತಿ ಮಲ್ಪರೆ ಕೇನೆರೆ ಆಪುಜಿ. ಪಂದ್ ದಿಲ್‌ರಾಜ್ ಆಳ್ವ ಪಂಡೆರ್ .