ಕಾರ್ಲದ ಸುದ್ದಿ Karkala News

ತುಳುನಾಡ್ದ ಸ್ವಾತಂತ್ರ ಬೀರೆರೆ ಪೊಲಬು ಪಟ್ಟರೆ ಪರರಾಜ್ಯೊಗು ಪಿದಡಿಯೆರ್ ಜವನೆರ್

ಕುಡ್ಲ : ತೇದಿ 17 ಸನಿಯಾರದಾನಿ ಭಾರತ ಅಮೃತೊಚ್ಚಯದ ಸಂಬ್ರಮೊಗು, ತುಳುವೆರೆ ಸ್ವಾತಂತ್ರ ಪೊರುಂಬಾಟದ ನೆಂಪುಗಾದ್ ಅನಿಂದಿತ್ ಕೊಚ್ಚಿ ಬಾರಿಕೆ ಮೇರ್ ಬರೆತಿನ, ಕರ್ನಾಟಕ ತುಳು ಸಾಹಿತ್ಯ ಅಕಾಡಮಿ ಬುಡುಗಡೆ ಮಲ್ತಿನ ರೀಕಾಲಿಂಗ್ ಅಮರ ಸುಳ್ಯ ( ಭಾರತ ಸ್ವಾತಂತ್ರಗಾದ್ ತುಳುವೆರೆ ಬಲಿದಾನ ) ಪನ್ಪಿನ ಮಸ್ತಿರೆನ್ ಪತೊಂದು ಐತ ಪೊಲಬುನು ಪರರಾಜ್ಯದ ಜನಕ್ಲೆಗ್ ಮಲ್ಪುನಂಚಿನ ಕಜ್ಜಾ ” ತುಳುನಾಡ್ ಟು ಲಡಾಖ್ ” ಬೈಕ್ ರ‌್ಯಾಲಿಗ್ ಚಾಲನೆ ಕೊರ್ಪಿನ ಕಜ್ಜ ಕರ್ನಾಟಕ ತುಳು ಸಾಹಿತ್ಯ ಅಕಾಡಮಿಡ್ ನಡತ್ಂಡ್.

ಅಕಾಡಮಿದ ಗುರ್ಕಾರ್ಲು ದಯಾನಂದ್ ಜಿ. ಕತ್ತಲ್ಸಾರ್ ತುಡರ್ ಅರ್ಲಾದ್ ಲೇಸ್‌ನ್ ಉದಿಪನ ಮಲ್ತ್‌ದ್, ಬೈಕ್ ರ‌್ಯಾಲಿಡ್ ಪಾಲ್ ಪಡೆಪಿನ ಟೀಮ್ ಸ್ಕ್ರೂ ರೈಡರ್ ತಂಡದ ರೈಡರ್ಸ್ ವಿನೀತ್ ಬಿ ಶೆಟ್ಟಿ, ಅಭಿಷೇಕ್ ಶೆಟ್ಟಿ, ವಿನೀತ್ ಶೆಟ್ಟಿ, ದೀಪಕ್ ಕರ್ಕೇರ, ರೋವಿಲ್ ಅಲ್ಮೆಡ ಬೊಕ ಸಮೂನ್ ಮೊಹಮ್ಮದ್ ಮೊಕಲೆಗ್ ಮಾನಾದಿಗೆ ಮಲ್ತೆರ್.

ಯೋಗೀಶ್ ಶೆಟ್ಟಿ ಗುರ್ಕಾರ್ಲು ತುಳುನಾಡು ರಕ್ಷಣಾ ವೇದಿಕೆ ತನ್ನ ಬಿನ್ನೆರೆ ಮದಿಪುಡು, “ತುಳುನಾಡ್‌ಡ್ ತುಳುವೆರ್ ನಮ್ಮ ಬಾಸೆ ಸಂಸ್ಕೃತಿ ಒರಿಪರೆಗಾದ್ ಪ್ರಯತ್ನ ಮಲ್ತೊಂದುಲ್ಲೆರ್. ಕೆಲವೆರ್ ಯಕ್ಷಗಾನಡ್, ಕೆಲವೆರ್ ತುಳು ಲಿಪಿ ಕಲ್ಪಾವುನ ಮುಕೇನ, ನನ ಕೆಲವೆರ್ ಸಾಹಿತ್ಯದ ಒರುಟು ತುಲುನಾಡ್ದ ಆಚಾರ, ಇಚಾರ, ಸಂಸ್ಕೃತಿ ಬೊಕ ಸ್ವತಂತ್ರ ಪೊರುಂಬಾಟದ ಬಗೆಟ್ ಪೊಲಬುನು ಪಟ್ಟೊನುನ ಬೇಲೆ ಮಲ್ತೊಂದುಲ್ಲೆರ್. ಮಾತೆರ್ಲಾ ಅಕಲ್ನಕಲ್ನ ಮಟ್ಟ್‌ಡ್ ತುಳುವಪ್ಪೆನ ಸೇವೆ ಮಲ್ತೊಂದುಲ್ಲೆರ್. ಜವನೆರ್ ಮಲ್ಪುನ ಇಂಚಿನ ಎಡ್ಡೆ ಕಜ್ಜೊಗು ನಮ ಬೆರಿತಾಂಗ್ ಕೊರ್ಕ ಪಂದ್. ಪಂಡೆರ್.

ಅನಿಂದಿತ್ ಗೌಡ ಕೊಚ್ಚಿ ಬಾರಿಕೆ ಮೇರ್ ಬರೆತಿನ ರಿಕಾಲಿಂಗ್ ಅಮರ್ ಸುಳ್ಯ ದಾಖಲಾಭರಿತ ಮಸ್ತಿರೆ ದೇಶದ ಪ್ರಮುಖ ರಾಜ್ಯದ ಮುಖಂಡೆರೆಗ್ ಕೊರ್ಪಿನ ಮಲ್ಲ ಬೇಲೆ ಆವೊಂದುಂಡು. ಭಾರತ ಸ್ವಾತಂತ್ರಗಾದ್ ಪೊರುಂಬಾಟ ಮಲ್ತುದ್ ಪ್ರಾಣ ಕಳೆಯೊಂದಿನ ಪೆರ್ಮೆದ ತುಳುವೆರೆ ನ ಬಗೆಟ್ ಮಾತೆರೆಗ್ಲಾ ತೆರಿಯೊಡು. ನಮ್ಮ ತುಳುನಾಡ್ದ ಇತಿಹಾಸ ಸಂಸ್ಕೃತಿನ್ ನಾಲೂರುಗು ಪಟ್ಟೊಡು ಅಂಚೆನೆ ನಮ್ಮ ಕೇಪುಲ ರಂಗ್‌ದ ಕೊಡಿ ಪೆರ್ಮೆಡ್ ರಾವೊಡು ಪಂದ್ ದಯಾನಂದ್ ಜಿ ಕತ್ತಲ್ಸಾರ್ ತನ್ನ ಗುರ್ಕಾರ್ಮೆದ ಪಾತೆರೊಡು ಪಂದ್, ಮಾತ ರೈಡರ್ಸ್‌‌ನಕಲೆಗ್ ತುಳುನಾಡ್ದ ಸಾಲ್ ಪಾಡ್ದ್, ಮಸ್ತಿರೆ ಕೊರ್ದು ಎಡ್ಡೆಪ್ಪು ಬಯಕಿಯೆರ್.

ತುಳುನಾಡ್ದ ಸಂಪ್ರದಾಯದಲ್ಕ ದೈವ ದೇವೆರೆನ್ ಪ್ರಾರ್ಥನೆ ಮಲ್ತ್ ದ್ ತುಲುನಾಡ್ದ ಕೊಡಿ ರಾಪಾದ್ ಬೈಕ್ ರ‌್ಯಾಲಿಗ್ ಚಾಲನೆ ಕೊರಿಯೆರ್.

ತುಳುನಾಡು ರಕ್ಷಣಾ ವೇದಿಕೆದ ಗುರ್ಕಾರೆರ್ ಯೋಗೀಶ್ ಶೆಟ್ಟಿ, ದಕ್ಷಿಣ ಕನ್ನಡ ಜಿಲ್ಲಾ ಒಕ್ಕಲಿಗರ ಸೇವಾ ಸಂಘದ ಜಿಲ್ಲಾಧ್ಯಕ್ಷೆರ್ ಲೋಕಯ್ಯ ಗೌಡ ಕೆ, ತುಳು ಪೊರುಂಬಾಟಗಾರೆರ್ ಅಂಚೆನೇ ತುಲು ಲಿಪಿ ಕಲ್ಪಾದಿಲು ರೋಷನ್ ರೋನಾಲ್ಡ್, ಅನಿಂದಿತ್ ಗೌಡ ಕೊಚ್ಚಿ ಬಾರಿಕೆ ಲೇಸ್‌ಡ್ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.

ಜೈ ತುಲುನಾಡ್ ( ರಿ. ) ಸಂಘಟನೆದ ತುಳು ಲಿಪಿ ಕಲ್ಪಾದಿ ಗೀತಾ ಲಕ್ಷ್ಮೀಶ್ ಲೇಸ್ ಸುದಾರಿಕೆ ಮಲ್ತೆರ್.

ತುಲುನಾಡ್ದ ಕೇಪುಲ ಕೊಡಿ ರಾವರೆ ಉಂಡು ಲಡಾಖ್‌ಡ್

ಟೀಮ್ ಸ್ಕ್ರೂ ರೈಡರ್ ತಂಡದ ರೈಡರ್ಸ್‌ನಕುಲು ಕುಡ್ಲಡ್ದ್ ಉಡುಪಿಯಾದ್, ಬೊಂಬೈ, ಗುಜರಾತ್ ರಾಜಸ್ತಾನೊಗು ಸುರುಕು ಪೋಪೆರ್ . ಅಲ್ತ್ ಬೊಕ್ಕ ಪಂಜಾಬ್‌ಡ್ ಅಮೃತ್‌ಸರ, ವಾಘ ಬಾರ್ಡರ್ ತೂದು ಹಿಮಾಚಲ, ಲೆಹ್ ಮನಾಲಿ ಆದ್ ಜಮ್ಮುಗ್ ಪೋಪೆರ್. ಬೊಕ್ಕ ಲಡಾಖ್‌ದ ಕಾರ್‌ದುಂಗ್ಲ ಪಾಸ್ ಕಡತ್ ಉಮ್‌ಲಿಂಗ್ಲ ಪಾಸ್ ಸೇರುವೆರ್. ಉಂದು 19, 300 ಫೀಟ್ ಸಮುದ್ರ ಮಟ್ಟ‌ಡ್ದ್ ಎತ್ತರ ಉಪ್ಪುನ ಜಾಗ ಮುಲ್ಪ ಅಕುಲು ಅಮರ ಸುಳ್ಯ ಬೂಕು ಪತೊಂದು ತುಲುನಾಡ್ದ ಕೇಪುಲ ಕೊಡಿನ್ ರಾಪಾವರೆ ಉಲ್ಲೆರ್. ಬೊಕ್ಕ ಡೆಲ್ಲಿ, ಹೈದ್ರಾಬಾದ್ ಆದ್ ಬೆಂಗಳೂರುಗ್ ಪಿರ ಬರ್ಪೆರು. 17 ತಾರೀಕ್‌ರ್ದ್ ಓಕ್ಟೋಬರ್ 2 ತಾರೀಕ್ ಮುಟ ಮೊಕಲ್ನ ಬೈಕ್ ರ್‍ಯಾಲಿ ನಡಪರೆ ಉಂಡು.

(ವರದಿ : ಗೀತಾ ಲಕ್ಷ್ಮೀಶ್)

The flag of Tulunadu to fly high at Ladakh:

Team Score riders are on a ride from Mangalore to Ladakh were they will go through Khardungla pass to Umlingla pass.This is at a height of 19,300 meters above sea level.
Here they intend to hoist the flag of Tulunadu with the book of the great warrior of Tulunadu Amar Sulya with them.This bike rally wl begin on the 17 th and go on till the 2nd of October.