ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಡೆಂಗ್ಯೂ ಜ್ವರರ್ದ್ ತೀರ್ ಪೋಯಿನ ಕಡಬದ ಜವನೆ

ಡೆಂಗ್ಯೂ ಬೊಕ್ಕ ಮಲೇರಿಯಾ ಜ್ವರರ್ದ್ ಜವನೆಯೊರಿ ತೀರ್ ಪೋಯಿನ ಘಟನೆ ಕಡಬ ತಾಲೂಕ್ ದ ಕುಟ್ರುಪಾಡಿ ಗ್ರಾಮದ ವಿಮಲಗಿರಿಟ್ಟ್ ನಡತ್ಂಡ್.

ವಿಮಲಗಿರಿ ಕಲ್ಲೋಲಿಕ್ಕಲ್ ನಿವಾಸಿ ಶಿಜು ಕಲ್ಲೋಳಿಕಲ್ (31) ತೀರ್ ಪೋಯಿನಾರ್.

ಮೆರೆಗ್ ಐತಾರ ಜ್ವರ ಜೋರಾಯಿರ್ನೆದಾವೆರ ಕಡಬದ ಕ್ಲಿನಿಕ್ ಗ್ ಪೋನಗ ಡೆಂಗ್ಯೂ ಪತ್ತೆ ಆತ್ಂಡ್. ಮನದಾನಿ ಜ್ವರ ಕುಡಲ ಜಾಸ್ತಿಯಾದ್ ಎಚ್ಚದ ಚಿಕಿತ್ಸೆಗ್ ಕುಡ್ಲಗ್ ಲೆತೊಂದು ಪೋತೆರ್. ಆಂಡ ಆತ್ ಪೊರ್ತುಗು ಮೇರ್ ತೀರ್ ಪೋತೆರ್.

ಶಿಜು ಮಲಂಕರ ಕ್ಯಾಥೋಲಿಕ್ ಚರ್ಚ್ ಪುತ್ತೂರು ಧರ್ಮಪ್ರಾಂತ್ಯದ ರೆ.ಫಾ. ಥಾಮಸ್ ಕಲ್ಲೋಳಿಕಲ್ ಮೆರೆನ ಸಹೋದರೆ.

LPG ಕಮರ್ಷಿಯಲ್ ಗ್ಯಾಸ್ ದ ಬಿಲೆ 14 ರೂ. ಎಚ್ಚ

ದೇಶಡ್ LPG ವಾಣಿಜ್ಯ ಸಿಲಿಂಡರ್ ದ ಬಿಲೆ 14 ರೂ. ಎಚ್ಚಾತ್ಂಡ್.

ತೈಲ ಮಾರ್ಕೆಟ್‌ ಡ್ ಪ್ರತಿ ತಿಂಗೊಲ್ ಕಿರಯ ಬದಲಾವಣೆ ಆವೊಂದು ಇಪ್ಪುಂಡು. ಈ ಕಿರಯ 19 ಕೆಜಿ ವಾಣಿಜ್ಯ ಸಿಲಿಂಡರ್ ಗ್ ಮಾತ್ರ ಅನ್ವಯ ಆಪುಂಡು. ಆಂಡ 14.2 ಕೆಜಿ ಗೃಹ ಬಳಕೆ LPG ಗ್ಯಾಸ್ ಸಿಲಿಂಡರ್ ಕಿರಯಡ್ ಒವ್ವೇ ಬದಲಾವಣೆ ಆತಿಜಿ.

ಇನಿ ಡೆಲ್ಲಿಡ್ ಸಿಲಿಂಡರ್ ಕಿರಿಯ 1755.50 ರೂ. ಬದಲ್ 1769.50 ರೂ. ಆತ್ಂಡ್. ಬೊಕ್ಕ ಕಲ್ಕತ್ತಾಡ್ 1869 ರೂ‌.ದ ಬದಲ್ 1887 ರೂ. ಎಚ್ಚಾತ್ಂಡ್. ಬೆಂಗ್ಲೂರುಡು 19 ಕೆಜಿ ವಾಣಿಜ್ಯ ಸಿಲಿಂಡರ್ ಕಿರಯ ಇತ್ತೆ 1843 ರೂ. ಆತ್ಂಡ್.

ಆತ್ಮಬಲ ಗಟ್ಟಿ ಬೋಡು…!

ರಮೇಶೆ ಆಫೀಸ್‌ಗ್ ಪೊವೊಡಾಂಡ ಯಾಪಲ ಬಿ.ಎಂ.ಟಿ.ಸಿ. ಬಸ್ಸುಟೇ ಪೋಪಿನ ವಾಡಿಕೆ. ಇನಿತ ದಿನ ಬಸ್ಸ್ ತತ್ತ್ಂಡ್ ದಾಯೆ ಪಂಡ ಯುಟೂಬ್ ಲೈವ್ಡ್ ಇಡೀ ರಾತ್ರೆ ಸಂಪೂರ್ಣ ದೇವಿ ಮಹಾತ್ಮೆ ಯಕ್ಷಗಾನ ತೂದ್ ಲೇಟ್ ಆದ್ ಜೆತ್ತಿನೆಟ್ಟ್ ಕಾಂಡೆ ಅಯಿನನೇ ಗೊತ್ತುಜ್ಜಿ ರಮೇಶಗ್, ಬೊಕ 3 ಗ್ಲಾಸ್ ಬೆಚ್ಚ ಬೆಚ್ಚ ನೀರ್ ಪರ್ದ್,ಕುಲಿ ದೆಕ್ಕ್ ದ್ , ಚಪ್ಪೆ ನೀರ್ ಮೀದ್, ದೈವ ದೇವೆರೆನ್ ಸುಗಿತ್ತ್, ಎಡ್ಮೆದೆಣ್ಣೆದ ದೀಪ ದೀದ್,ನೀಟಪ್ಪ ಅಡ್ಡ ಬುರ್ದ್ ಕೈ ಮುಗಿದಾನಗ ಕಾಂಡೆ 8.30 ಗಂಟೆ ಆಂಡ್,ಬೊಕ ಬೇಗ ಬೇಗ ನೀರ್ ದೋಸೆ-ಚಟ್ನಿ ತಿಂಡಿ ತಿಂದ್ ಚಾ ಪರ್ದ್ ಆಪೀಸ್ಗ್ ಪೋನಗ ಲೇಟ್ ಆಂಡ್ ದಾದ ಮಲ್ಪುನ್ಂದ್ ಯೋಚನೆ ಮಲ್ಪುನಗ ರಪ್ಪಕ ಮೊಬೈಲ್ಡ್ ಇತ್ತಿನ ಉಬರ್ ಆ್ಯಪ್ ದ ನೆನೆಪಾಪುಂಡು, ಅಂಚ ಉಬರ್ ಕ್ಯಾಬ್ದ್ ಆಟೋ ಬುಕ್ ಮಲ್ಪುವೆ .ಇಂದೇ ಪಸ್ಟ್ ಟೈಮ್ ಡ್ ರಮೇಶೆ ಉಬರ್ ಆ್ಯಪ್ಡ್ ಆಟೋ ಬುಕ್ ಮಲ್ಪುವೆ, ಅದಗನೇ 5 ನಿಮಿಷೊಡೇ ರಮೇಶೆನ ಇತ್ತಿನ ಜಾಗೊಗ್‌ ಆಟೋ ಬತ್ತ್ಂಡ್, ರಮೇಶೆ ಆಟೊಡ್ ಕುಲ್ದಿನಪೆಟ್ಟಿಗೆ ಆಟೋ ಡ್ರೈವರ್ ಒಟಿಪಿ ಕೆನೊವೆ.ಅದಗ ರಮೇಶೆ 4523 ಪನ್ಪೆ, ಅದಗ ರಮೇಶೆನ ಆಪೀಸ್ದ್ ಲೋಕೆಷನ್ದಂಚಿ ಆಟೋ

ಪೋವೆರೆಗ್ ಸುಮಾರ್ ಮುಕ್ಕಾಲ್ ಗಂಟೆ ಸಮಯ ತೊಜುಂಡು.ಅಂಚೆನೇ ದುಂಬು ಪೊನಗ ರಮೇಶೆ ರೋಡ್ ಡ್ ರಾಜಕೀಯ ಪಕ್ಷದಕಲೆನ ಧ್ವಜ ತೂದ್ ಡೈವರಡ ಕೆನೊವೆ, “ಅಣ್ಣ ಇನಿ ಇಂಚಿ ಏರ್ ಬರ್ರೆಗೆ..?” ಅದಗ ಡ್ದೈವರ್., “ಸರ್..ಇನಿ ಏರ್ ಬರ್ಪೆರಾ..? ಅಕುಲು ಏರೆನ್ ಉದ್ದಾರ ಮಲ್ಪುವೆರಾ ..? ಅವು ನಮ ಟ್ಯಾಕ್ಸ್ ಕಟ್ಟಿನ ಕಾಸ್ ಡ್ ಪುರ ಇಂಚ ರೋಡ್ ಇಡೀ ರಾಜಕೀಯ ಪಕ್ಷದಕಲು ಅಕ್ಲೆನ ಪಕ್ಷದ ಧ್ವಜ ಬ್ಯಾನರ್ ಪುರ ಪಾಡುವೆರ್. ಆಕಲೆಗ್ ಜನ ಸಾಮಾನ್ಯರೆನ ಬಗ್ಗೆ ಕಾಳಜಿಯೇ ಇಜ್ಜಿ‌.ಅಕ್ಲೆನ ಕಾಸ್ದ್ ಗಂಟುನು ಮಾತ್ರ ಗಟ್ಟಿ ಮಲ್ಪುವೆರ್‌, ಆಂಡ ಅಂಚ ಮಾತೆರ್ಲ ಮಲ್ಪುವೆರ್ ಪನ್ಪುಜಿ‌‌ ಸರ್, ಅಯ್ಟಿಲ ಶೇಕಡ ನೂದೆಟ್ಟ್ ನಾಡುಂಡ 10-12 ಜನ ಪ್ರಾಮಾಣಿಕದ ರಾಜಕೀಯದ ಎಡ್ಡೆಂತಿ ವ್ಯಕ್ತಿನಕುಲುಲ ತಿಕ್ಕುವೆರ್‌.” “ಅವು ಅಂದ್ ಅಣ್ಣ ಪನ್ಪೆ” ರಮೇಶೆ‌. ಅದಗ ಟ್ರಾಫಿಕ್ ಸಿಗ್ನಲ್ ತಿಕ್ಕುಂಡ್ ಆಯಿತ ಬರಿಟೇ ಮಲ್ಲ ಆಸ್ಪತ್ರೆ ತೊಜುಂಡು,ಅದಗ ಆ ಆಸ್ಪತ್ರೆದಂಚಿ ಕೈ ತೋಜಾದ್ ಆಟೋ ಡ್ರೈವರ್ ಪನ್ಪೆ “ಎನ್ನೊಂಜಿ ಕಿಡ್ನಿ ಎನ್ನ ಮಗಗೋಸ್ಕರ ಯಾನೇ ಆ ಆಸ್ಪತ್ರೆಡೇ ಎನ್ನ ಕಿಡ್ನಿನ್ ಕೊರ್ತೆ ಸರ್” ಪನ್ನಗ ರಮೇಶಗ್ ಮಸ್ತ್ ಬೇಜಾರ್ ಆಪುಂಡ್ .ಅದಗ ರಮೇಶೆ “ದಾದ ಆಂಡ್ ಅಣ್ಣ” ಕೆನ್ನಗ ಆಟೋ ಡ್ರೈವರ್ ಪನ್ಪೆ “ಎನ್ನ ಮಗಕ್ ಎನ್ನಂದಿನ ಕಾಯಿಲೆ ಬತ್ತ್ ದ್ ಆಯನ ಕಿಡ್ನಿ ಡ್ಯಾಮೇಜ್ ಆಂಡ್ ಪಂಡೆರ್ ಡಾಕ್ಟರ್, ಅಯಿಕ್ ಎನ್ನ ಮಲ್ಲ ಮಗೆ ಓರಿಯೊಡಾಂಡ ಕಿಡ್ನಿದ ಅಗತ್ಯ ಉಂಡು ಅಂಚೆನೇ 23-24 ಲಕ್ಷ ಖರ್ಚು ಉಂಡು ಪಂಡೆರ್ ,ಅಯಿಕ್ ಯಾನ್ ದಾಲಾ ಆಲೋಚನೆ ಮಲ್ಪಂದನೇ ಎನ್ನೊಂಜಿ ಕಿಡ್ನಿ ಮಗಕೇ ದಾನ ಮಲ್ತೆ” ಪಂಡ್ದ್ ಖುಷಿಟೇ ಆಟೋ ಬುಡೊಂದು ಪೊವೊಂದುಲ್ಲೆ ಆಟೋ ಡ್ರೈವರ್.ಅದಗ ರಮೇಶನ ಮನಸ್ಸಗ್ ಮಸ್ತ್ ಬೇಜಾರ್ ಆದ್, “ಅಣ್ಣ ಈರ್ ದಾಲ ಬೇಜಾರ್ ಮಲ್ಪಡೇ” ಆಟೋದ ಎದುರುದ ಗ್ಲಾಸ್ಡ್ ಪತ್ತಾಂದ್ ಇತ್ತಿನ ದೇವೆರೆನ ಪಟ ತೂದ್ “ಇರ್ ನಂಬಿನಂಚಿನ ದೇವೆರ್ ಕೈ ಬುಡಯರ್ ಅಣ್ಣಾ ” ಪನ್ಪೆ. “ಅಂದ್ ಸರ್ ದೇವೆರ್ ಕೈ ಬುಡಯೆರ್ ಆಂಡ ಎನ್ನ ಮಗೆ ಹುಷಾರ್ ಉಪ್ಪುನಗ ಎನ್ನ ಇಲ್ಲಗ್ ಸಂಬಂಧದಕಲು ವಾರೊಗೊರ ಬರೊಂದಿತ್ತಿನಕುಲು ಇತ್ತೆ ಒರಿಲ ಬರ್ಪುಜೆರ್, ದಾಯೆ ಪಂಡ್ದ್ ಎಂಕ್ಲ ಗೊತ್ತುಜ್ಜಿ..! ಅಕುಲು ಬನ್ನಗ ಬರುವೆರ್ , ಯಾನ್ ಬೆಗರ್ ಕಟ್ಟ್ದ್ ಬಂಗೊಡ್ ರಾತ್ರೆ ಪಗೆಲ್ ಪಂಡ್ದ್ ಬೆನ್ಪೆ..! ಅಂಚೆನೇ ಎನ್ನ ಎಲ್ಯ ಮಗೆಲ ಎನ್ನಲಕನೇ ಆಟೋ ಬುಡ್ಪೆ ‌, ಆಸ್ಪತ್ರೆದ ಖರ್ಚಿ ಆಯಿನ ಸಾಲ ಪುರ 4-5 ವರ್ಷೊಡ್ ಪೂರಾ ಸಂದಾವ ಎಂಕ್ ಏರ್ನಲ ಕಾಸ್ ಬೊಡ್ಚಿ ಅಂಚೆನೇ ಎನ್ನ ಮಗೆ ಇತ್ತೆ ರೆಸ್ಟ್ ಡ್ ಉಲ್ಲೆ, ಅಯೆಲ 5-6 ತಿಂಗೊಲ್ ಬೊಕ್ಕ ಸಾಪ್ಟವೇರ್ ಕಂಪನಿಗ್ ಸೇರುವೆ, ಅಂಚೆನೇ ಸಾಲ ಸಂದಾವೆರೆ ಬೊಕ್ಕ ಬೇನರೆ ದೇವೆರ್ ಎಂಕೊಂಜಿ ಎಡ್ಡೆ ಆರೋಗ್ಯ ಭಾಗ್ಯ ಕೊರುಂಡ ಯಾವು” ಪನ್ನಗ ರಮೇಶನ ಆಪೀಸ್ ದ ಕೈತಲ್ ಆಟೋ ಬತ್ತ್ಂಡ್, ಅದಗ ಆಟೋ ಡೈವರ್ ಆಟೋ ಚಾರ್ಜ್ “ಸರ್ 548 ರೂಪಾಯಿ ಆಂಡ್” ಪನ್ಪೆ, ಅದಗ ರಮೇಶೆ 1000 ರೂಪಾಯಿ ಕೊರ್ದು “ಒರಿದಿನ ಕಾಸ್ ಈರೆಡ ಉಪ್ಪಡ್ ಪನ್ಪೆ , ಇಂಚೆನೇ ಇರೆನ ಆತ್ಮಬಲ ಗಟ್ಟಿ ಆದ್ ಉಪ್ಪುಡ್ ಅದಗ ದೇವೆರ್ಲಾ ಇರನೊಟ್ಟುಗು ಆರೋಗ್ಯ ಕಾತೊಂದು ಬರ್ಪೆರ್.ಅಂಚೆನೇ ಇರೆಗ್ ಬೊಕ ಇರೆನ ಸಂಸಾರೊಗ್ ಎಂಕ್ಲೆನ ಊರುದ ದೈವ ದೇವೆರ್ ಎಡ್ಡೆ ಮಲ್ಪಡ್” ಪಂಡ್ದ್ ರಮೇಶೆ ಆಪೀಸ್ದಂಚಿ ನಡತ್ತೊಂದು ಪೋಪೆ.ಡೈವರ್ ಗ್ ಬೇತೆ ಕೋಲ್ ಬತ್ತ್ಂಡ್,ಆಯೆ ರಿಕ್ಷ ತಿರ್ಗಾದ್ ಪೋಯೆ,ರಮೇಶಗ್ ಅಟೋ ನು ತೂನಗ ದೇವೆರೆ ತೇರ್ ಪೋಯಿಲೆಕ ತೋಜಿಂಡ್,ಕಣ್ಣ್ ಪಸೆ ಆಂಡ್

–ಯಾದವ ಎಸ್ ಕಲ್ಲಾಪು

ಜೆಸಿಐ ಮುಲ್ಕಿ ಶಾಂಭವಿ ಪೊಸ ಅಧ್ಯಕ್ಷೆರ್ ಪದುಕೆರ್ ನ ಪದಗ್ರಹಣ

ಮುಲ್ಕಿ: ಜೇಸಿಐ ಮುಲ್ಕಿ ಶಾಂಭವಿ 41 ನೇ ವರ್ಷದ ಪೊಸ ಅಧ್ಯಕ್ಷೆರಾದ್ ಸತೀಶ್ ಕುಮಾರ್ ಕಿಲ್ಪಾಡಿ ಮೇರ್ನ ಬೊಕ್ಕ ಪದುಕೆರ್ನ ಪದಗ್ರಹಣ ಲೇಸ್ ಅಂಗಾರೆ ಬಯ್ಯಡ್ ಮುಲ್ಕಿ ಆದಿಧನ್ ಹೋಟೆಲ್ ದ ಚಾವಡಿಡ್ ನಡತ್ಂಡ್.

ಉದ್ಯಮಿ, ಸಿನಿಮಾ ಕ್ಷೇತ್ರದ ಸಾಧಕೆರ್ ದೇವದಾಸ್ ನಾಯಕ್ ಲೇಸ್ ಉದಿಪನ ಮಲ್ತೆರ್.

ನಿಕಟಪೂರ್ವ ಅಧ್ಯಕ್ಷೆರ್ ಅನಿಲ್ ಕುಮಾರ್ ಪೊಸ ಅಧ್ಯಕ್ಷೆರ್ ಸತೀಶ್ ಕುಮಾರ್ ಕಿಲ್ಪಾಡಿ ಮೆರೆಗ್ ಅಧಿಕಾರ ಕೈ ಏರ್ದ್ ಕೊರಿಯೆರ್.

ಪೊಸ ಅಧ್ಯಕ್ಷೆರಾದ್ ಅಧಿಕಾರ ದೆತೊಂದು ಪಾತೆರಿನ ಸತೀಶ್ ಕುಮಾರ್ ಕಿಲ್ಪಾಡಿ, ಈ ವರ್ಷ
ಜೇಸಿಐ ಭವನದ ಕನಸ್ ಸಾಕಾರ ಮಲ್ಪರೆ ಮಾತೆರ್ಲ ಸಹಕಾರ ಕೊರ್ಲೆ ಪಂದ್ ಬಿನ್ನಾಪು ಮಲ್ತೆರ್.

ಅಂಚೆನೆ ಪೊಸ ಪದಾಧಿಕಾರಿಲೆನ ಪದಗ್ರಹಣ, ಜಬದಾರಿ ಬುಡ್ದು ಕೊರ್ಪಿನ ಬೇಲೆ ನಡತ್ಂಡ್.

ಮೂಜಿ ಜನ ಪೊಸ ಸದಸ್ಯೆರೆಗ್ ಸಿಎ ಸನತ್ ಕುಮಾರ್ ನಾಯ್ಕ್ ಪ್ರಮಾಣವಚನ ಬೋಧನೆ ಮಲ್ತೆರ್.

ಮಲ್ಲ ಬಿನ್ನೆರಾದ್ ವಿಜಯ ರೈತರ ಸೇವಾ ಸಂಘದ ಅಧ್ಯಕ್ಷೆರ್ ರಂಗನಾಥ್ ಶೆಟ್ಟಿ, ಜೇಸಿಐ ಮುಲ್ಕಿ ಶಾಂಭವಿ ಜೇಸಿಐ ಟ್ರಸ್ಟ್ ದ ಹಬೀಬುಲ್ಲ, ಕಲ್ಲಪ್ಪ ತಡವಲಗ ಇತ್ತೆರ್.

ಈ ಪೊರ್ತುಡು ದಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆತಿನ ಶ್ರೀಪತಿ ಭಟ್ ಶಿಮಂತೂರು ಮೆರೆಗ್ ಸಮಾಜಸೇವಾ ರತ್ನ ಪ್ರಶಸ್ತಿ ಕೊರ್ದು ಸನ್ಮಾನ ಮಲ್ತೆರ್. ರಾಷ್ಟ್ರೀಯ ಕಬಡ್ಡಿ ಡ್ ಪಾಲ್ ಪಡೆದಿನ ಶಾಹಿದಾ ಖಾಜೇ ಸಾಬ್ ಕೆ.ಎಸ್.ರಾವ್ ನಗರ ಮೆರೆಗ್ ಕ್ರೀಡಾ ರತ್ನ ಪ್ರಶಸ್ತಿ ಕೊರ್ದು ಸನ್ಮಾನ ಮಲ್ತೆರ್.

ವಿಶ್ವನಾಥ್ ಶೆಣೈ, ಅಶೋಕ್ ಕುಮಾರ್ ಶೆಟ್ಟಿ , ಪೂರ್ಣಿಮಾ ಶೆಟ್ಟಿ, ಮೋಹನ್ ಸುವರ್ಣ ಮೊಕುಲು ಬಿನ್ನೆರ್ನ ಪರಿಚಯ ಮಲ್ತೆರ್ .ದಿನೇಶ್ ಕೆ.ಶೆಟ್ಟಿ ಸಭೆ ಸುಧಾರಿಕೆ ಮಲ್ತೆರ್. ಕಾರ್ಯದರ್ಶಿ ವಿಮಲಪ್ರಭು ಸೊಲ್ಮೆ ಸಂದಾಯೆರ್.

ಪಡುಪಣಂಬೂರು ಧರ್ಮದೈವ ಶ್ರೀ ಜಾರಂದಾಯ ದೈವೊಲ್ಯಡ್ ಬ್ರಹ್ಮಕಲಶಾಭಿಷೇಕ

ಮುಲ್ಕಿ: ಪಡುಪಣಂಬೂರು ಧರ್ಮದೈವ ಶ್ರೀ ಜಾರಂದಾಯ ದೈವೊಲ್ಯಡ್ ವೆ.ಮೂ.ಶಿಬರೂರು ವೇದವ್ಯಾಸ ತಂತ್ರಿಲೆನ ಮುತಾಲಿಕೆಡ್ ಬ್ರಹ್ಮಕಲಶಾಭಿಷೇಕ ನಡತ್ಂಡ್.

ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ಗಣಹೋಮ, ಕಲಶ ಹೋಮ, ಮಹಿಷಂದಾಯ ಪ್ರತಿಷ್ಠೆ ಕಲಶಾಭಿಷೇಕ, ಜಾರಂದಾಯಗ್ 108 ಕಲಶಾಭಿಷೇಕ, ಬ್ರಹ್ಮಕಲಶಾಭಿಷೇಕ, ಮಧ್ಯಾಹ್ನ ಪ್ರಸಾದ ವಿತರಣೆ, ಭಂಡಾರ ಜಪ್ಪುನ ಲೇಸ್ ಆದ್ ಅನ್ನ ಪ್ರಸಾದ ಸೇವೆ ನಡತ್ಂಡ್.

ಫೆ.4: ಐರೋಲಿದ ಐತಮಜಲ್ ಶ್ರೀಮತಿ ಜಯಂತಿ ಹೆಗ್ಡೆ ಮೆಮೋರಿಯಲ್ ಹಾಲ್ ಡ್ ಗಣಹೋಮ, ಶ್ರೀ ಸತ್ಯನಾರಾಯಣ ಮಹಾಪೂಜೆ

ಬೊಂಬೈ ಹೆಗ್ಗಡೆ ಸೇವಾ ಸಂಘ (ರಿ.) ದ ಮುತಾಲಿಕೆಡ್ ಗಣಹೋಮ, ಶ್ರೀ ಸತ್ಯನಾರಾಯಣ ಮಹಾಪೂಜೆ, ವಾರ್ಷಿಕೋಚ್ಚಯ ಲೇಸ್, ಅಮರವೀರ ಬೂಕು ಬುಡುಗಡೆ, ಸನ್ಮಾನ ಬೊಕ್ಕ ಸಾಂಸ್ಕೃತಿಕ ಲೇಸ್ ಫೆ.4 ಐತಾರ ನವಿಬೊಂಬೈ ಐರೋಲಿದ ಐತಮಜಲ್ ಶ್ರೀಮತಿ ಜಯಂತಿ ಹೆಗ್ಡೆ ಮೆಮೋರಿಯಲ್ ಹಾಲ್ ಡ್ ನಡಪರೆ ಉಂಡು.

ಈ ಲೇಸ್ ಡ್ ಮಾತೆರ್ಲಾ ಕುಟುಂಬ ಸಮೇತೆರಾದ್ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.