ಮುಲ್ಕಿ: ಉಬಾರ್ಡ್ ನಡತಿನ ಜಿಲ್ಲಾ ಮಟ್ಟದ ದೇಹದಾರ್ಢ್ಯ ಪಂತೊಡು ಸುರುತ್ತ ತಾನೊನ್ ಕಿರಣ್ ಆಚಾರ್ ಬೊಕ್ಕ ರಡ್ಡನೇ ತಾನೊನು ಪ್ರಕಾಶ್ ಮೇರ್ ಪಡೆತೆರ್.
ಮೊಕುಲು ಕಿನ್ನಿಗೋಳಿದ ರಾಜರತ್ನಪುರತ್ತ ವೀರ ಮಾರುತಿ ವ್ಯಾಯಾಮ ಶಾಲೆಡ್ ದೇಹದಾರ್ಢ್ಯನ್ ತರಬೇತಿ ಪಡೆದಿತ್ತ್ದ್, ನಿಶಾನ್ ಪೂಜಾರಿ ಬೊಕ್ಕ ಕೇಶವ ಕರ್ಕೇರ ಮೊಕುಲು ಮೆರೆಗ್ ತರಬೇತಿ ಕೊರ್ತೆರ್.
ರಾಂಚಿ: ಜಾರ್ಖಂಡ್ದ 12ನೇ ಮುಖ್ಯಮಂತ್ರಿಯಾದ್ ಜಾರ್ಖಂಡ್ ಮುಕ್ತಿ ಮೋರ್ಚಾ ಪಕ್ಷದ ನಾಯಕೆರ್ ಚಂಪೈ ಸೊರೆನ್ ಮೇರ್ ಇನಿ ಪ್ರಮಾಣವಚನ ಸ್ವೀಕಾರ ಮಲ್ತ್ದೆರ್.
ರಾಂಚಿದ ರಾಜಭವನದ ದರ್ಬಾರ್ ಹಾಲ್ಡ್ ಈ ಕಾರ್ಯಕ್ರಮ ನಡತ್ದಿತ್ತ್ದ್. ಜಾರ್ಖಂಡ್ ರಾಜ್ಯಪಾಲೆರ್ ಸಿಪಿ ರಾಧಾಕೃಷ್ಣನ್ ಮೇರ್ ಚಂಪೈ ಸೊರೆನ್ ಮೆರೆಗ್ ಪ್ರಮಾಣ ವಚನ ಬೋಧಿಸಾದೆರ್.
ಕೇರಳ: ಪ್ರವಾಸಿಗೆರ್ ಅಕ್ಲೆಗ್ ಗೊತ್ತಿಜಂದಿನ ಜಾಗೆಡ್ ಒವ್ವೇ ಸಾಹಸಗ್ ಪೋಯರೆ ಬಲ್ಲಿ ಪಂದ್ ಪ್ರವಾಸೋದ್ಯಮ ಇಲಾಖೆದಕುಲು ಫಲಕ ಪಾಡ್ದ್ ಎಚ್ಚರ್ಗೆ ಕೊರೊದುಂಡು. ಅವೆನ್ ಮೀರ್ದ್ಲ ಎಚ್ಚಿನ ಜನಕುಲು ಅಕ್ಲೆನ ಸಾಹಸಗ್ ಕೈ ಪಾಡ್ದ್ ಜೂವ ಕಳೆಯೊಂದುಲ್ಲೆರ್.
ಇಂಚಿನ ಒಂಜಿ ಘಟನೆ ಕೇರಳದ ಮುತ್ತುಂಗ ಅರಣ್ಯ ವ್ಯಾಪ್ತಿಡ್ ನಡತ್ತ್ದಿತ್ತ್ದ್, ಮಾರ್ಗದ ಬರಿಟ್ಟ್ ಆನೆ ಒಂಜಿ ಉಂತುದಿತ್ತ್ದ್ ಅವೆತ್ತ ದುಂಬು ಸೆಲ್ಫಿ ವಿಡಿಯೋ ದೆಪ್ಪರೆ ಕಾರ್ರ್ದ್ ರಡ್ಡ್ ಜನ ಜತ್ತ್ದೆರ್. ಆ ಪೊರ್ತುಡು ಆನೆ ರಡ್ಡ್ ಜನನ್ಲ ಗಿಡ್ತೊಂದು ಬೈದ್ಂಡ್. ಅಪಗನೆ ಕಾರ್ದ ಡ್ರೈವರ್ ಕಾರ್ದ ಬಿರ್ಸ್ನ್ ಎಚ್ಚ ಮಲ್ತ್ದ್ ಅಕ್ಲೆನ ರಕ್ಷಣೆ ಮಲ್ತ್ದೆರ್.
ಗರ್ಭಕಂಠದ ಕ್ಯಾನ್ಸರ್ಡ್ ನರಲೊಂದು ಇತ್ತಿನ ಬಾಲಿವುಡ್ ನಟಿ ಬೊಕ್ಕ ಮಾಡೆಲ್ ಪೂನಂ ಪಾಂಡೆ(೩೨) ಕೋಡೆ ರಾತ್ರೆ ತೀರ್ ಪೋಯೆರ್ ಪಂದ್ ಅರೆನ ತಂಡ ಅಧಿಕೃತ ಹೇಳಿಕೆಡ್ ತೆರಿಪಾದೆರ್.
ಆರ್ ತಾನ್ ಪುಟ್ಟಿನ ಊರು ಕಾನ್ಪುರಡ್ ಕಡೆತ್ತ ಉಸುಲ್ ಪೋತ್ಂಡ್. ನಮ್ಮ ಮೋಕೆದ ಪೂನಂನ್ ನಮ ಕಳೆಯೊಂದ ಪಂದ್ ಟ್ವೀಟ್ ಮಲ್ತ್ದೆರ್.
ಫೆ.22-ಮಾ.1 ಮುಟ್ಟ ವೇಣೂರ್ದ ಬಾಹುಬಲಿ ಸ್ವಾಮಿಗ್ ನಡಪುನ ಮಹಾಮಸ್ತಕಾಭಿಷೇಕಗ್ ಮೈಸೂರ್ದ ರಾಜವಂಶದ ಯುದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯೆರ್ ಮೆರೆನ್ ಅಳದಂಗಡಿ ಅರಸೆರ್ ಲೆಪ್ಪು ಕೊರ್ತೆರ್. ಮೈಸೂರ್ ಅರಮನೆಗ್ ಪೋದು ಯದುವೀರ್ ಬೊಕ್ಕ ಅರೆನ ಕುಟುಮದಕ್ಲೆನ್ ಲೇಸ್ಗ್ ಲೆಪ್ಪು ಕೊರ್ತೆರ್.
ಅಳದಂಗಡಿ ಅರಸೆರ್ ಡಾ. ಪದ್ಮಪ್ರಸಾದ್ ಅಜಿಲೆರ್, ಅರೆನ ಬೊಡೆದಿ ಮಧುರಾ ಪದ್ಮಪ್ರಸಾದ್ ಅಜಿಲೆರ್, ಸಹೋದರೆ ಶಿವಪ್ರಸಾದ್ ಅಜಿಲೆರ್, ಅರೆನ ಬೊಡೆದಿ ರೇಖಾ ಶಿವಪ್ರಸಾದ್ ಅಜಿಲೆರ್, ಮುಲ್ಕಿ ಸೀಮೆದ ಅರಸೆರ್ ದುಗ್ಗಣ್ಣ ಸಾವಂತೆರ್ ಮೈಸೂರ್ ಅರಮನೆಡ್ ಲೆಪ್ಪೋಲೆ ಕೊರ್ತೆರ್. ಈ ಪೊರ್ತುಡು ಯದುವೀರ್ ಮೆರೆನ್ ವಿಶೇಷವಾದ್ ಮಾನಾದಿಗೆ ಮಲ್ತೆರ್.
ಕಿನ್ನಿಗೋಳಿ ಕೈತಲ್ದ ದಾಮಸ್ ಕಟ್ಟೆ ಕೋಲ್ಬೆಟ್ಟು ಮುಲ್ಪದ ಧೃತಿ ನಿಲಯದ ಪವಿತ್ರ ಮೇರೆನ ಇಲ್ಲಡ್ ಒರ ಕೈಲ್ ಪಾಡಿನ ಬಾರೆನ್ ಕಡ್ತ್ ದ್ ಒಂಜಿ ತಿಂಗೊಲು ಆಯಿಬೊಕ್ಕ ಮುದೆಲ್ ಡ್ ಕುಡ ಕೈಲ್ ಪಾಡ್ದ್ಂಡ್.
ಒಡಿಪು: ಕಾಡಬೆಟ್ಟು ನಿವಾಸಿ ಪಿಲಿವೇಷಧಾರಿ, ಪಿಲಿಯೇಸಡ್ ತನ್ನನೇ ಆಯಿನ ಪುದರ್ ನ್ ಪಡೆನ ಕಾಡಬೆಟ್ಟು ಅಶೋಕ್ ರಾಜ್ ದೇವೆರೆ ಪಾದೋ ಸೇರಿಯೆರ್.
ಮಸ್ತ್ ದಿನರ್ದ್ ಹುಷಾರ್ ದಾಂತೆ ಇತ್ತಿನೆದಾತ್ರ ಅಶೋಕ್ ರಾಜ್ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಇತ್ತೆರ್. ಚಿಕಿತ್ಸೆ ಫಲ ಕೊರಂದೆ ಒಡಿಪುದ ಖಾಸಗಿ ಆಸ್ಪತ್ರೆಡ್ ತೀರ್ ಪೋತೆರ್.
ಮೇರೆಗ್ ಬುಡೆದಿ, ಇಂಡಿಯನ್ ಖ್ಯಾತಿದ ಸುಷ್ಮರಾಜ್ ಅಂಚನೆ ರಡ್ಡ್ ಪೊಂಜೋಕುಲು ಉಲ್ಲೆರ್.
ಉಜಿರೆ: ಧರ್ಮಸ್ಥಳದ ರತ್ನಗಿರಿಟ್ಟ್ ಭಗವಾನ್ ಬಾಹುಬಲಿ ಮೂರ್ತಿದ ಪ್ರತಿಷ್ಟಾ ಮಹೋಚ್ಚಯದ 42ನೇ ವರ್ಧಂತ್ಯುತ್ಸವದ ಲೆಕ್ಕೊಡು ಗುರುವಾರ ತೋರಣಮುಹೂರ್ತ, ವಿಮಾನಶುದ್ಧಿ, ಶೋಡಷ ಕಲಶಾಭಿಷೇಕ, ಬಯ್ಯ 4 ಗಂಟೆರ್ದ್ ನಾಂದಿಮಂಗಲ ಇಂಚಿತ್ತಿನ ಧಾರ್ಮಿಕ ವಿಧಿ-ವಿಧಾನಲು ನಡತ್ಂಡ್.
ಪೂಜ್ಯ ದಿವ್ಯಸಾಗರ ಮುನಿಮಹಾರಾಜೆರ್, ಪೂಜ್ಯ ಆದಿಸಾಗರ ಮುನಿಮಹಾರಾಜೆರ್, ಪೂಜ್ಯ ನಿರ್ದೋಷಸಾಗರ ಮುನಿಮಹಾರಾಜೆರ್ ಬೊಕ್ಕ ಕ್ಷುಲ್ಲಕ ನಿರ್ವಾಣಸಾಗರ ಮಹಾರಾಜೆರ್ ಈ ಪೊರ್ತುಡು ಇತ್ತೆರ್.
ಹೇಮಾವತಿ ವೀ. ಹೆಗ್ಗಡೆರ್, ಡಿ. ಹರ್ಷೇಂದ್ರ ಕುಮಾರ್ ಬೊಕ್ಕ ಸುಪ್ರಿಯಾ ಹರ್ಷೇಂದ್ರ ಕುಮಾರ್ ಲೇಸ್ಡ್ ಪಾಲ್ ಪಡೆದ್ ಇತ್ತೆರ್. ಶುಕ್ರಾರ ಕಾಂಡೆ 8.30 ಗಂಟೆರ್ದ್ ಭವ್ಯ ಅಗ್ರೋದಕ ಮೆರವಣಿಗೆರ್ದ್ ಬೊಕ್ಕ ಭಗವಾನ್ ಬಾಹುಬಲಿ ಸ್ವಾಮಿಗ್ 216
ಕಲಶರ್ದ್ ಪಾದಾಭಿಷೇಕ ನಡಪುಂಡು. ಕಾರ್ಲ ಜೈನಮಠದ ಪೂಜ್ಯ ಲಲಿತಕೀರ್ತಿಭಟ್ಟಾರಕ ಸ್ವಾಮೀಜಿ ಮೇರ್ ಮಂಗಲ ಪ್ರವಚನ ಕೊರಿಯರೆ ಉಲ್ಲೆರ್.
ಕುಡ್ಲ: ಪೇಂಟೆದ ಬೈಕಂಪಾಡಿ ಕೈಗಾರಿಕಾ ವಲಯಡ್ ಇಪ್ಪುನ ಕುಡುಂಬೂರು ನಡುಗಿರಿ ಗ್ರಾಮದೈವ ಜಾರಂದಾಯ ಅಂಚನೆ ಸಪರಿವಾರ ದೈವಲೆನ ವರ್ಷಾವಧಿ ನೇಮೋಚ್ಚಯ ಫೆ.2-4 ಮುಟ್ಟ ನಡಪರೆ ಉಂಡು.
ಫೆ.2 ಕ್ಕ್ ಕಾಂಡೆ 8 ಗಂಟೆರ್ದ್ ಅನ್ನಪೂರ್ಣೇಶ್ವರಿ ಅಮ್ಮ ಮೆರೆನ ವಿಶೇಷ ಪೂಜೆ, ಹೊಳ್ಳರ ಚಾವಡಿಡ್ ಜಾರಂದಾಯ ಸಪರಿವಾರ ದೈವಲೆಡ ಪ್ರಾರ್ಥನೆ ಅಂಚನೆ ನಾಗದೇವೆರೆಗ್ ತಂಬಿಲ ಸೇವೆ ನಡಪರೆ ಉಂಡು. ಬಯ್ಯ 4 ಗಂಟೆಗ್ ದೈವಸ್ಥಾನಗ್ ಬಂಗಾರ್-ಬೊಲ್ಲಿದ ರೂಪಡ್ ಬತ್ತಿನ ಪರಕೆ ಅಂಚನೆ ಪುದೆಕಾಣಿಕೆ ಕುಡುಂಬೂರು ಕಲ್ಲುರ್ಟಿ ದೈವಸ್ಥಾನರ್ದ್ ಕುಡುಂಬೂರು ನಡುಗಿರಿ ದೈವಸ್ಥಾನಗ್ ಮೆರವಣಿಗೆ ನಡಪರೆ ಉಂಡು. ಬಯ್ಯ 5 ಗಂಟೆಗ್ ದೈವದ ಭಂಡಾರ ಏರ್ದ್ ರಾತ್ರೆ 8 ಗಂಟೆಗ್ ಮೈಸಂದಾಯ ದೈವದ ನೇಮೋಚ್ಚಯ, ರಾತ್ರೆ 9.30 ಗಂಟೆಗ್ ಕಾಂತೇರಿ ಜುಮಾದಿ, ಸರಳ ಜುಮಾದಿ ಬಂಟ ದೈವದ ನೇಮೋಚ್ಚಯ ನಡಪರೆ ಉಂಡು.
ಫೆ.3 ಕ್ಕ್ ಮಧ್ಯಾಹ್ನ12 ಗಂಟೆಗ್ ಅನ್ನಪೂರ್ಣೇಶ್ವರಿ ಅಮ್ಮನ ವಿಶೇಷ ಅಲಂಕಾರ ಪೂಜೆ, ಮಧ್ಯಾಹ್ನ 12.30-3 ಮುಟ್ಟ ಸಾರ್ವಜನಿಕ ಮಹಾ ಅನ್ನಸಂತರ್ಪಣೆ ನಡಪರೆ ಉಂಡು. ಬಯ್ಯ 7 ಗಂಟೆಗ್ ಧಾರ್ಮಿಕ ಸಭಾ ಕಾರ್ಯಕ್ರಮಡ್ ಗುರುಪುರ ವಜ್ರದೇಹಿ ಮಠತ್ತ ಶ್ರೀ ರಾಜಶೇಖರಾನಂದ ಸ್ವಾಮೀಜಿ ಮೇರೆರ್ದ್ ಆಶೀರ್ವಚನ, ವಿದ್ವಾನ್ ಪಂಜ ಭಾಸ್ಕರ್ ಭಟ್ ಮೆರೆರ್ದ್ ಧಾರ್ಮಿಕ ಉಪನ್ಯಾಸ ನಡಪರೆ ಉಂಡು. ಸೋಮಯಾಜಿ ಎಸ್ಟೇಟ್ಸ್ ಮಾಲಕೆರ್ ರಘುನಾಥ್ ಸೋಮಯಾಜಿ ಸಭಾಧ್ಯಕ್ಷೆರಾದ್ ಪಾಲ್ ಪಡೆಯರೆ ಉಲ್ಲೆರ್. ಈ ಪೊರ್ತುಡು ಕೈಗಾರಿಕಾ ಬೊಕ್ಕ ವಾಣಿಜ್ಯ ಇಲಾಖೆದ ಜಂಟಿ ನಿರ್ದೇಶಕೆರ್ ಗೋಕುಲ್ ದಾಸ್ ನಾಯಕ್ ಮೆರೆನ್ ಮಾನಾದಿಗೆ ಮಲ್ಪರೆ ಉಂಡು. ರಾತ್ರೆ 9 ಗಂಟೆಗ್ ಜಾರಂದಾಯ ಬಂಟ ದೈವದ ನೇಮೋಚ್ಚಯ ನಡಪರೆ ಉಂಡು.
ಫೆ.4 ಕ್ಕ್ ರಾತ್ರೆ 7 ಕ್ಕ್ ಪಿಲಿಚಂಡಿ ದೈವದ ಎಣ್ಣೆಬೂಲ್ಯ ಕೊರ್ದು, ರಾತ್ರೆ 10 ಗಂಟೆಗ್ ಪಿಲಿಚಂಡಿ ದೈವದ ನೇಮೋಚ್ಚಯ ನಡಪರೆ ಉಂಡು ಪಂದ್ ದೈವಸ್ಥಾನದ ಆಡಳಿತ ಮಂಡಳಿದಕುಲು ಪ್ರಕಟಣೆಡ್ ತೆರಿಪಾದೆರ್.
ಕರಿನ ವರ್ಷ ಬಜೆಟ್ ಮಂಡನೆದ ಪೊರ್ತುಡು ನಿರ್ಮಲಾ ಸೀತಾರಾಮನ್ ಧಾರವಾಡ ಮೂಲದ ಸೀರೆನ್ ಪಾಡುನ ಮುಕೇನ 2023 ಬಜೆಟ್ ಮಂಡಿಸಾದಿತ್ತೆರ್. ಈ ಸರ್ತಿ “ಟಸ್ಸಾರ್” ಕೈಮಗ್ಗರ್ದ್ ನೈದಿನ ನೀಲಿ ಬೊಕ್ಕ ಬೊಲ್ದು ರಂಗ್ದ ಸೀರೆನ್ ಬಜೆಟ್ ಮಂಡನೆಗಾದ್ ಪಾಡ್ದೆರ್.
ಈ ಮಲ್ಬೆರಿ ರಂಗ್ದ ಸೀರೆ “ಬೆಂಗಲ್ ಕಾಂತ” ವಿನ್ಯಾಸ ಇತ್ತ್ದ್, ತಮಿಳ್ನಾಡ್ದ ಸೀರೆ ಉಂದಾತ್ಂಡ್. ಅಲ್ಪ ಉಂದೆನ್ “ರಾಮನ ನೀಲಿ” ಪಂದ್ ಲೆಪ್ಪುವೆರ್. ಉತ್ತರ ಪ್ರದೇಶಡ್ ನಿರ್ಮಾಣವಾಯಿನ ರಾಮಮಂದಿರ ಪ್ರಾಣ ಪ್ರತಿಷ್ಠಾ ಪೊರ್ತುಡು ಈ ಸೀರೆ ಎಚ್ಚ ಪುಗರ್ತೆ ಪಡೆದಿತ್ತ್ಂಡ್.
