ಬೆಳಾಲು: ಆರಿಕೋಡಿ ಶ್ರೀ ಚಾಮುಂಡೇಶ್ವರಿ ದೇವಲ್ಯಡ್ ಆರಿಕೋಡಿ ಉಚ್ಚಯ ಇನಿರ್ದ್ (ಫೆ.12) ಫೆ.15 ಮುಟ್ಟ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ದೇವಲ್ಯದ ಗುರ್ಕಾರೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬಂದಾರು: ಬಂದಾರು ಗ್ರಾಮದ ಕುರಾಯ ಶ್ರೀ ಸದಾಶಿವ ದೇವೊಲ್ಯಡ್ ಬೇತೆ ಬೇತೆ ಅಭಿವೃದ್ಧಿ ಕಾರ್ಯಲೆಗ್ ಧಾರ್ಮಿಕ ದತ್ತಿ ಇಲಾಖೆದ 25 ಲಕ್ಷದ ಅನುದಾನ ಒದಗಿಸಾಯಿನ ಬೊಲ್ತೇರ್ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಹರೀಶ್ ಪೂಂಜಾ ಮೇರ್ ಕಾಮಗಾರಿಗ್ ಕೆಸರ್ ಕಲ್ಲ್ ಪಾಡಿಯೆರ್.
ಈ ಪೊರ್ತುಡು ಬಂದಾರು ಗ್ರಾಮ ಪಂಚಾಯತ್ ಗುರ್ಕಾರೆ ದಿನೇಶ್ ಗೌಡ ಖಂಡಿಗ, ಒತ್ತು ಗುರ್ಕಾರ್ದಿ ಪುಷ್ಪಾವತಿ, ದೇವಲ್ಯದ ವ್ಯವಸ್ಥಾಪನ ಸಮಿತಿ ಗುರ್ಕಾರೆ ಬಾಬು ಗೌಡ ಮಡ್ಯಲಕಂಡ, ಪದ್ಮುಂಜ ಸಿ.ಎ ಬ್ಯಾಂಕ್ ದ ಒತ್ತು ಗುರ್ಕಾರೆ ಅಶೋಕ್ ಗೌಡ ಬೊಕ್ಕ ವ್ಯವಸ್ಥಾಪನ ಸಮಿತಿ ಸದಸ್ಯೆರ್, ಪ್ರಮುಖೆರ್ ಪಾಲ್ ಪಡೆದಿತ್ತೆರ್.
ದಕ್ಷಿಣ ಕನ್ನಡ ಕೊರಗರ ಜಿಲ್ಲಾ ಸಂಘದ ಮುತಾಲಿಕೆಡ್ ತುಳುನಾಡ್ ದ ಮೂಲ ನಿವಾಸಿಲಾಯಿನ ಆದಿವಾಸಿ ಕೊರಗ ಸಮುದಾಯದ ಸಾಮೂಹಿಕ ಮದಿಮೆದ ಲೇಸ್ ಫೆ.11 ನಡತ್ಂಡ್. ಈ ಮದಿಮೆದ್ ಲೆಪ್ಪೋಲೆನ್ ಕೊರಗ ಭಾಷೆಡ್ ಅಚ್ಚಿ ಮಲ್ಪಾದ್ ತುಳುನಾಡ್ ದ ಪಿರಾಕ್ ದ ಬಾಷೆನ್ ಒರಿಪಾವುನ ಪ್ರಯತ್ನನ್ ಸಂಘಟಕೆರ್ ಮಲ್ದಿನವು ವಿಶೇಷ.
ಸುರತ್ಕಲ್ ಕುತ್ತೆತ್ತೂರುದ ಆದಿವಾಸಿ ಸಮುದಾಯ ಭವನಡ್ ಐತಾರ (ಫೆ.11) ಬೊಲ್ಪುಗು 11.15ಕ್ಕ್ ಒಟ್ಟು ಆಜಿ ಜೋಡಿ ಮದಿಮೆ ನಡತ್ಂಡ್.
ಕೊರಗ ಸಮುದಾಯ ತುಳುನಾಡ್ ದ ಮೂಲ ನಿವಾಸಿ ಸಮುದಾಯ ಆದ್ ತನ್ನನೇ ಆಯಿನ ಭಾಷೆನ್ ಒರಿತೊಂದು ಬೈದ್ಂಡ್. ಈ ಸಾಮೂಹಿಕ ಮದಿಮೆದ ಲೇಸ್ ದ ಲೆಪ್ಪೋಲೆನ್ ಕನ್ನಡ ಬೊಕ್ಕ ಕೊರಗ ಭಾಷೆಡ್ ಅಚ್ಚಿ ಮಲ್ದೆರ್.
ಕೊರಗ ಸಮುದಾಯದ ಸಂಪ್ರದಾಯದಂಚೆನೆ ಸಮುದಾಯದ ಗುರಿಕಾರೆರೆನ ಮುತಾಲಿಕೆಡ್ ಪೋಷಕೆರ್ ಮದಿಮೆಯೆ ಮಾದಿಮಾಲೆಗ್ ಧಾರೆ ಮೈತೆರ್.
ಮದುಮೆದ ಮಾತ ಸಂಪ್ರದಾಯ, ಆಚರಣೆನ್ ಸಮುದಾಯದ ಜನಕ್ಲೆ ಮಲ್ಪುನವು ಸಮುದಾಯದ ವಿಶೇಷತೆ ಆತ್ಂಡ್. ಮದಿಮೆ ಲೇಸ್ ಮಾಂಸಹಾರಿ ಬೊಕ್ಕ ಸಸ್ಯಹಾರಿ ವನಸ್ ದ ವ್ಯವಸ್ಥೆ ಇತ್ತ್ಂಡ್.
ಜಿಲ್ಲಾ ಕೊರಗ ಸಂಘದ ಮುತಾಲಿಕೆಡ್ ಆಯೋಜನೆ ಮಲ್ತಿನ 5ನೇ ವರ್ಷದ ಸಾಮೂಹಿಕ ವಿವಾಹ ಲೇಸ್ ಉಂದಾತ್ಂಡ್. ಮದಿಮೆ ಲೇಸ್ ಡ್ ಸುಮಾರ್ ರಡ್ಡ್ ಸಾರ ಜನ ಪಾಲ್ ಪಡೆಪ್ಪೆರ್ ಪಂದ್ ದಕ್ಷಿಣ ಕನ್ನಡ ಕೊರಗರ ಜಿಲ್ಲಾ ಸಂಘದ ಗುರ್ಕಾರೆ ಸುಂದರ ಬೆಳುವಾಯಿ ಮೇರ್ ತೆರಿಪಾದಿತ್ತೆರ್.
ಮುಲ್ಕಿ: ಪಕ್ಷಿಕೆರೆ ಕೈತಲ್ದ ಪಂಜ ಕೊಯಿಕುಡೆ ಶ್ರೀ ಹರಿಪಾದೆ ಧರ್ಮದೈವ ಜಾರಂತಾಯ ದೈವೊಲ್ಯಡ್ ನೇಮೋಚ್ಚಯ ಗೌಜಿಡ್ ನಡತ್ಂಡ್.
ಕ್ಷೇತ್ರಡ್ ಧಾರ್ಮಿಕ ಲೇಸ್ ದ ಲೆಕ್ಕೊಡು ಜಾರಂತಾಯ ದೈವೊದ ಭಂಡಾರ ಪಿದಾಡುನ ಲೇಸ್, ಚೌತಿ ಪರ್ಬ, ತುಡರ ಬಲಿ, ಕೊಡಿ ಏರುನ ಲೇಸ್ ನಡತ್ಂಡ್. ಐತಾರ ತುಲಾಭಾರ ಸೇವೆ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ರಾತ್ರೆ ನೇಮೋಚ್ಚಯ ಗೌಜಿಡ್ ನಡತ್ಂಡ್.
ಈ ಪೊರ್ತುಡು ಧಾರ್ಮಿಕ ಪರಿಷತ್ ಮಾಜಿ ಸದಸ್ಯೆರ್ ಪಂಜ ಭಾಸ್ಕರ್ ಭಟ್, ದೈವೊಲ್ಯದ ಆಡಳಿತ ಮಂಡಳಿದ ಮೊಕ್ತೇಸರೆರ್ ನಲ್ಯಗುತ್ತು ಪ್ರಕಾಶ್ ಟಿ ಶೆಟ್ಟಿ, ಸದಸ್ಯೆರ್, ಭಕ್ತೆರ್ ಪಾಲ್ ಪಡೆದಿತ್ತೆರ್.
ಬಿಲ್ಲವರ ಅಶೋಸಿಯೇಶನ್ ಮುಂಬಯಿ ಬಿವಂಡಿ ಲೋಕಲ್ ಆಫೀಸ್ ಮುಲ್ಪ 23 ನೇ ವರ್ಷದ ಗುರುಮೂರ್ತಿ ಪ್ರತಿಷ್ಠಾಪನೆ ದ ನೆಂಪು ಬೊಕ್ಕ ಸಾರ್ವಜನಿಕ ಸತ್ಯನಾರಾಯಣ ಮಹಾ ಪೂಜೆದ ಲೇಸ್ ಉಂದುವೇ ಬರ್ಪಿನ ತಾರಿಕ್ 14 ಫೆಬ್ರವರಿ ಬುಧವಾರ ಕಾಂಡೆ ಗುರು ಮಂದಿರ ಡು ನಡಪೆರೆ ಉಂಡು.
ಅಂಚೆನೇ ವರ್ಷಾದ ಲೇಸ್ ತಾರಿಕ್ 17 ಪೆಬ್ರವರಿ 2024 ಶನಿವಾರ ಬಯ್ಯಗ್ 3 ಗಂಟೆಗ್, ಪ್ರೇಮ ತಾಯಿ ಸುರೇಶ್ ಪಾಟೀಲ್ ಮೈದಾನ ವಾರಳ ದೇವಿ ಮಾರ್ಗ ಪದ್ಮನಗರ ಬಿವಂಡಿ ಮುಲ್ಪ ನಡಪೆರೆ ಉಂಡು ಸಾಂಸ್ಕೃತಿಕ ಕಾರ್ಯಕ್ರಮ ದ ಒಟ್ಟಗೂ ಬಿನ್ನೆರೆ ಚಾವಡಿಡ್ ಸಾಧನೆ ಮಲ್ದಿನ ಸದಾಕೆರೆಗ್ ಮಾನದಿಗೆ ಅಂಚೆನೇ, ರಾತ್ರೆಡ್ ವನಸ್ ಆಯಿಬೊಕ್ಕ ರಂಗ ಭೂಮಿ ದ ಪುದರ್ ಪೋಯಿ ನಿರ್ದೇಸಕೆ ಜಗದೀಶ್ ಶೆಟ್ಟಿ ಕೆಂಚನ ಕೆರೆ ಮೆರೆನ ನಿರ್ದೇಶನೊಡು ಬಿವಂಡಿ ಲೋಕಲ್ ಆಫೀಸ್ ದ ಸದಸ್ಯೆರೆದ್ ” ಪಿರ ಬನ್ನಗ ” ಪನ್ಪಿನ ತುಳು ಹಾಸ್ಯಮಯಾ ನಾಟಕ ನಡಪೆರೆ ಉಂಡು.
ಅನಿದ ಲೇಸ್ ದ ಗುರ್ಕಾರ್ಮೆ ವಹಿಸೋನಿಯರೇ ಉಲ್ಲೆರ್ ಬಿಲ್ಲವರ ಅಸೋಸಿಯೇಶನ್ ಮುಂಬಯಿ ದ ಗುರ್ಕಾರೆ ಶ್ರೀ ಹರೀಶ್ ಜಿ ಅಮೀನ್. ಮಲ್ಲ ಬಿನ್ನೆರ್ ಅದ್ ಬಿಲ್ಲವ ಮಹಾ ಮಂಡಲದ ಗುರ್ಕಾರೆ ಶ್ರೀ ರಾಜ ಶೇಖರ್ ಕೋಟಿಯನ್. ಬೊಕ್ಕ ಭಾರತ್ ಕೋ ಅಪ್ ಬ್ಯಾಂಕ್ ಮುಂಬೈದ ಛೇರ್ಮನ್ ಶ್ರೀ ಸೂರ್ಯಕಾಂತ್ ಜಯ ಸುವರ್ಣ ಬರ್ರೆ ಉಲ್ಲೆರ್ ಅಂಚೆನೇ ಮಸ್ತ್ ಜನ ಮಾನದಿಗೆದ ಬಿನ್ನೆರ್ ಬರ್ರೆ ಉಲ್ಲೆರ್. ಈ ಮಾತ ಕಾರ್ಯಕ್ರಮ ಡು ತನೂಕುಲು ಮತಾ ಕುಟುಂಬ ಸಮೇತ ಬಾಗಿ ಆವೊಡು ಪಂದ್ ಬಿಲ್ಲವರ ಅಸೋಸಿಯೇಶನ್ ಮುಂಬಯಿ ಬಿವಂಡಿ ಲೋಕಲ್ ಆಫೀಸ್ ದ ಮಾನದಿಗೆದ ಗುರ್ಕಾರೆ ದೇವು ಪೂಜಾರಿ, ಗುರ್ಕಾರೆ. ರತ್ನಕರ್ ಜಿ ಪೂಜಾರಿ , ಒತ್ತು ಗುರ್ಕರೆ ಜಯಂತ್ ಸಾಲಿಯಾನ್, ಕಾರ್ಯದರ್ಶಿ. ಉದಯ ಡಿ ಸಾಲ್ಯಾನ್, ಪಣವುದ ಗುರ್ಕಾರೆ ಪ್ರಶಾಂತ್ ಆರ್ ಪೂಜಾರಿ, ಅಂಚೆನೇ ಕೂಟದ ಪದುಕೆರ್ ಲೆಪ್ಪೋಲೆಡ್ ತೆರಿಪಾದೆರ್
3 ದಶಕದ ಬೊಕ್ಕ ಭಾರತಡ್ ಪಿರೊರ ವಿಶ್ವ ಸುಂದರಿ ಪಂತೋ ನಡಪೆರೆ ಉಂಡು.
ಮೇ.18 ರ್ದ್ ಭಾರತಡ್ 71ನೇ ವಿಶ್ವ ಸುಂದರಿ ಪಂತೋ ಸುರು ಆವೆರೆ ಉಂಡು. ನೆತ್ತ ಉದಿಪನ ಲೇಸ್ ಫೆ.20 ತಾರೀಕ್ ದಾನಿ ಡೆಲ್ಲಿಡ್ ನಡಪೆರೆ ಇತ್ತ್ ದ್, ಫೈನಲ್ ಮಾ.9 ತಾನಿ ಮುಂಬೈದ ಜಿಯೋ ಕನ್ವೆನ್ಷನ್ ಸೆಂಟರ್ ಡ್ ನಡಪೆರೆ ಉಂಡು.
ಪ್ರಪಂಚದ ಮಾತ ಕಡೆಟ್ಟ್ ಈ ಕಾರ್ಯಕ್ರಮ ಪ್ರಸಾರ ಆವೆರೆ ಉಂಡು. ವಿಶ್ವದ 120 ಪ್ರತಿನಿಧಿಲು ಈ ಪಂತೋಡ್ ಪಾಲ್ ಪಡೆಯೆರೆ ಉಲ್ಲೆರ್. ಭಾರತರ್ದ್ ನಂದಿನಿ ಗುಪ್ತಾ ಪ್ರತಿನಿಧಿಸಾಯೆರೆ ಉಲ್ಲೆರ್.
ತುಳುಕೂಟ ಪುತ್ತೂರು ವತಿರ್ದ್ ಒಡಿಯೂರು ಶ್ರೀ ವಜ್ರಮಾತಾ ಮಹಿಳಾ ಮಂಡಳಿ ಪುತ್ತೂರು ಘಟಕದ ಸಹಯೋಗಡ್ ಕೆಡ್ಡಸದ ಕೂಟ ಕಾರ್ಯಕ್ರಮ ಫೆ.11ಕ್ಕ್ ಕಾಂಡೆ 10 ರ್ದ್ 11 ಗಂಟೆ ಮುಟ್ಟ ನೆಲ್ಲಿಕಟ್ಟೆ ನಯನಾ ರೈ ಮೊಕ್ಲೆನ ಜಾಲ್ ಡ್ ನಡಪೆರೆ ಉಂಡು.
ಮಾಜಿ ಶಾಸಕಿ ಶಕುಂತಲಾ ಶೆಟ್ಟಿ ತುಳುವೆರ್ನ ಕೆಡ್ಡಸ ಆಚರಣೆ ವಿಷಯದ ಬಗ್ಗೆ ಉಪನ್ಯಾಸ ಕೊರಿಯೆರೆ ಉಲ್ಲೆರ್. ಉಜಿರೆ ಎಸ್.ಡಿ.ಎಂ ಕಾಲೇಜ್ ದ ಉಪನ್ಯಾಸಕಿ ಪ್ರೊ. ಹರಿಣಿ ಪುತ್ತೂರಾಯ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್.
ಸಾರ್ವಜನಿಕೆರೆಗ್ ಮುಕ್ತ ಅವಕಾಶ ಪ್ರವೇಶ ಉಂಡು ಪಂದ್ ತುಳುಕೂಟದ ಗುರ್ಕಾರ್ಲು ಪ್ಯಾಟ್ರಿಕ್ ಸಿಪ್ರಿಯನ್ ಮಸ್ಕರೇನಸ್ ಬೊಕ್ಕ ವಜ್ರಮಾತಾ ಮಹಿಳಾ ಮಂಡಳಿದ ಗುರ್ಕಾರ್ದಿ ನಯನಾ ರೈ ನೆಲ್ಲಿಕಟ್ಟೆ ಪ್ರಕಟನೆಡ್ ತೆರಿಪಾದೆರ್.
ಸುಬ್ರಹ್ಮಣ್ಯ: ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಕಡಬ ತಾಲೂಕುದ ಸುರುತ ಡಿಜಿಟಲ್ ಬೊಕ್ಕ ಬಿಕನ್ ಲೈಬ್ರರಿನ್ ಗುರುವಾರ ಏನೆಕಲ್ ಪೂಜಾರಿ ಮನೆ ವಿಶೇಷ ಚೇತನ ಶಮನ್ ಕುಮಾರ್ ಉದಿಪನ ಮಲ್ತೆರ್.
ಮಲ್ಲ ಬಿನ್ನೆರಾದ್ ಪಾಲ್ ಪಡೆನ ತಾಲೂಕು ಪಂಚಾಯತ್ ಸಹಾಯಕ ನಿರ್ದೇಶಕೆರ್ ಚೆನ್ನಪ್ಪ ಗೌಡ ಕಜಮೂಲೆ ಪಾತೆರ್ದ್, ನಮ್ಮ ರಾಜ್ಯದ 5623 ಗ್ರಾಮ ಪಂಚಾಯಿತ್ ಡ್ ತಾಲೂಕುಗ್ ಒಂಜೆತಲಕ ಡಿಜಿಟಲ್ ಬೊಕ್ಕ ಬಿಕನ್ ಗ್ರಾಮ ಪಂಚಾಯಿತಿ ಆದ್ ಮಾರ್ಪಾಡ್ ಮಲ್ತ್ ದ್ ಕಡಬ ತಾಲೂಕುದ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ನ್ ಆಯ್ಕೆ ಮಲ್ತ್ ದೆರ್ .ನೆತ್ತ ಉದ್ದೇಶ ಗ್ರಾಮೀಣ ಆಂಜೊಕ್ಲೆಗ್ ಬೊಕ್ಕ ಪೊಂಜೊವುನಕ್ಲೆಗ್ ಅಂಚನೆ ಸಾರ್ವಜನಿಕೆರೆಗ್ ಮಾತ ಮಾಹಿತಿಲೆನ್ ಗ್ರಂಥಾಲಯದ ಮೂಲಕ ಕೊರೊಡು, ಬೊಕ್ಕ ಎಚ್ಚ ಎಚ್ಚ ಜನಕ್ಕುಲು ಗ್ರಂಥಾಲಯಗ್ ಬತ್ತ್ ದ್ ಪುಸ್ತಕಲೆನ್ ಓದೊಡು, ಬೊಕ್ಕ ಡಿಜಿಟಲ್ ಕಂಪ್ಯೂಟರ್ ಜ್ಞಾನ ಪಡೆಯೊನೊಡು ಪನ್ಪುನ ಉದ್ದೇಶ.ನೆತ್ತ ಒಟ್ಟಿಗೆ ವಿಶೇಷ ಚೇತನ ಜೋಕ್ಲೆಗ್ ಲ ಪ್ರತ್ಯೇಕ ಕಂಪ್ಯೂಟರ್ ವ್ಯವಸ್ಥೆನ್ ಕೂಡ ಮಲ್ತ್ ದ ಪಂದ್ ಪಂಡೆರ್.
ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಗುರ್ಕಾರ್ದಿ ಸುಜಾತ ಕಲ್ಲಾಜೆ ಗುರ್ಕಾರ್ಮೆನ್ ವಹಿಸ್ ದ್ ಇತ್ತೆರ್. ಚಾವಡಿಡ್ ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರ್ ವೆಂಕಟೇಶ ಎಚ್ ಎಲ್ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಮಹೇಶ ಜೆಎನ್ ಲೈಬ್ರರಿಯನ್ ಲಲಿತ ಇತ್ತೆರ್.
ಈ ಪೊರ್ತುಡು ಸುಬ್ರಹ್ಮಣ್ಯ ಹಿರಿಯ ಪ್ರಾಥಮಿಕ ಶಾಲಾ ವಿದ್ಯಾರ್ಥಿಲು ಬೊಕ್ಕ ಶಿಕ್ಷಕ ವೃಂದದಕುಲು ಗ್ರಾಮ ಪಂಚಾಯತ್ ಸದಸ್ಯೆರ್, ಬೇತೆ ಬೇತೆ ಸಂಘ ಸಂಸ್ಥೆದ ಗುರ್ಕಾರ್ಲು, ಒತ್ತು ಗುರ್ಕಾರ್ಲು ಪದಾಧಿಕಾರಿಲು ,ಬೇತೆ ಬೇತೆ ಸ್ವಸಹಾಯ ಗುಂಪುದ ಗುರ್ಕಾರ್ಲು ಇತ್ತೆರ್.
ಸುಬ್ರಹ್ಮಣ್ಯ ಗ್ರಾಮ ಪಂಚಾಯತಿ ಕಾರ್ಯದರ್ಶಿ ಮೋನಪ್ಪ.ಡಿ ಲೇಸ್ ದ ಸುದಾರಿಕೆ ಮಲ್ತೆರ್. ಪಂಚಾಯತ್ ಸದಸ್ಯೆರ್ ಗಿರೀಶ್ ಬತ್ತಿ ಬಿನ್ನೆರೆನ್ ಎದ್ಕೊಂಡೆರ್. ಪಂಚಾಯತ್ ಸದಸ್ಯೆ ಭಾರತಿ ದಿನೇಶ್ ಸೊಲ್ಮೆ ಸಂದಾಯ ಮಲ್ತೆರ್.
ಬೆಳ್ಮಣ್: ಕಾರ್ಲ ತಾಲೂಕುದ ಮುಂಡ್ಕೂರು ಗ್ರಾಮದ ಸಚ್ಚೇರಿಪೇಟೆದ ಶ್ರೀ ಮಹಮ್ಮಾಯೀ ಅಮ್ಮನ ಅಶ್ವತ್ಥ ಕಟ್ಟೆಡ್ ಸಾರ್ವಜನಿಕ ಶ್ರೀ ಶನೈಶ್ಚರ ಪೂಜಾ ಸೇವಾ ಟ್ರಸ್ಟ್ (ರಿ.) ಸಚ್ಚೇರಿಪೇಟೆ ಬೊಕ್ಕ ಹಿಂದು ಸಂಘಟನೆದ ಒಟ್ಟು ಸೇರಿಗೆಡ್ ಫೆ.10 ಶನಿವಾರ ದಾನಿ ಬಯ್ಯ 4 ಗಂಟೆರ್ದ್ 20ನೇ ವರ್ಷದ ಸಾರ್ವಜನಿಕ ಶ್ರೀ ಶನೈಶ್ಚರ ಪೂಜಾ ಮಹೋತ್ಸವ ನಡಪರೆ ಉಂಡು.
ರಾತ್ರೆ 7 ಗಂಟೆಗ್ ಮಹಾಪೂಜೆ, ಪ್ರಸಾದ ವಿತರಣೆ, 7.30ರ್ದ್ ಸಾರ್ವಜನಿಕ ಅನ್ನಸಂತರ್ಪಣೆ, ಬೊಕ್ಕ “ಸಂತ ಸಮಾಗಮ” ಧಾರ್ಮಿಕ ಸಭೆ ನಡಪರೆ ಉಂಡು.
ಈ ಕಾರ್ಯಕ್ರಮಡ್ ಒಡಿಯೂರು ಕ್ಷೇತ್ರದ ಶ್ರೀ ಶ್ರೀ ಗುರುದೇವಾನಂದ ಸ್ವಾಮೀಜಿ, ಬೆದ್ರ ಜೈನ ಮಠದ ಸ್ವಸ್ತಿ ಶ್ರೀ ಭಾರತಭೂಷಣ ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯವರ್ಯ ಮಹಾ ಸ್ವಾಮೀಜಿ, ಶ್ರೀಧಾಮ ಮಾಣಿಲ ಕ್ಷೇತ್ರದ ಶ್ರೀ ಶ್ರೀ ಮೋಹನದಾಸ ಸ್ವಾಮೀಜಿ, ಗುರುಪುರ ಕ್ಷೇತ್ರ ವಜ್ರದೇಹಿ ಮಠದ ಶ್ರೀ ಶ್ರೀ ರಾಜಶೇಖರಾನಂದ ಸ್ವಾಮೀಜಿ, ಶ್ರೀ ಕ್ಷೇತ್ರ ಬಲ್ಯೊಟ್ಟು ಮಠದ ಶ್ರೀ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ, ಗುರುಪುರ ಜಂಗಮ ಮಠದ ಶ್ರೀ ಶ್ರೀ ಮ.ನಿ.ಪ್ರ. ರುದ್ರಮುನಿ ಮಹಾಸ್ವಾಮೀಜಿ, ಶ್ರೀಕ್ಷೇತ್ರ ಕರಿಂಜೆ ಓಂ ಶ್ರೀ ಗುರುಮಠದ ಮುಕ್ತಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್.
ಶ್ರೀಕ್ಷೇತ್ರ ಕೇಮಾರು ಸಾಂದೀಪನಿ ಸಾಧನಾಶ್ರಮದ ಶ್ರೀ ಶ್ರೀ ಈಶ ವಿಠಲದಾಸ ಸ್ವಾಮೀಜಿ ದಿವ್ಯ ಸಾನ್ನಿಧ್ಯ ವಹಿಸರೆ ಉಲ್ಲೆರ್. ವಿಶ್ವ ಹಿಂದು ಪರಿಷತ್ದ ಪ್ರಾಂತ್ಯ ಕಾರ್ಯದರ್ಶಿ ಶರಣ್ ಪಂಪ್ವೆಲ್ ಧಾರ್ಮಿಕ ಭಾಷಣ ಮಲ್ಪೆರೆ ಉಲ್ಲೆರ್, ಕಿನ್ನಿಗೋಳಿ ಯುಗಪುರುಷದ ಸಂಪಾದಕೆರ್ ಭುವನಾಭಿರಾಮ ಉಡುಪ ಗುರ್ಕಾರ್ಮೆ ವಹಿಸೆರೆ ಉಲ್ಲೆರ್.
ರಾತ್ರಿ 10 ಗಂಟೆರ್ದ್ ಅಮ್ಮ ಕಲಾವಿದೆರ್ ಕುಡ್ಲ ಮೊಕ್ಲೆರ್ದ್ ತುಳುನಾಡ ಕಲಾಬಿರ್ಸೆ ದೀಪಕ್ ರೈ ಪಾಣಾಜೆ ಬೊಕ್ಕ ರಂಗ್ದ ರಾಜೆ ಸುಂದರ್ ರೈ ಅಭಿನಯದ ‘ಅಮ್ಮೆರ್’ ತುಳು ಹಾಸ್ಯಮಯ ನಾಟಕ ನಡಪೆರೆ ಉಂಡು ಪಂದ್ ಕಾರ್ಯಕ್ರಮದ ಸಂಚಾಲಕೆರ್ ಹರೀಶ್ ಸಚ್ಚೇರಿಪೇಟೆ ಪ್ರಕಟಣೆಡ್ ತೆರಿಪಾದೆರ್.
ಆಯುರ್ವೇದ ವೈದ್ಯೆರ್ ಕೊರೋನಾದ ಪೊರ್ತುಡು ನಮ್ಮ ಜೀವನ್ ಪಣಕ್ ದೀದ್ ರೋಗಿಲೆಗ್ ಎಡ್ಡೆ ಚಿಕಿತ್ಸೆ ಕೊರ್ದು ಅಕ್ಲೆಗ್ ಪೊಸ ಜೀವನ ಕಲ್ಪಿಸಾಯಿಸವುನಲ್ಪ ಗ್ರಾಮೀಣ ಭಾಗದ ಜನಕುಲು ಜೀವನಾಡಿಯಾದ್ ಸೇವೆ ಸಂದಾದೆರ್.
ಆಯುರ್ವೇದ ವೈದ್ಯೆರೆಗ್ ಸುರುತ್ತ ಹಂತದ ಚಿಕಿತ್ಸೆಡ್ ನಮ್ಮ ಮೂಲ ಪದ್ಧತಿದೊಟ್ಟಿಗೆ ಅವಶ್ಯಕ ಅಲೋಪತಿ ಔಷಧನ್ ಗಲಸಿಯೆರೆ ಬಲ್ಲಿ ಪನ್ಪುನ ರಾಜ್ಯ ಸರ್ಕಾರದ ಕಾನೂನು ಆಯುರ್ವೇದ ವೈದ್ಯೆರೆನ ವೃತ್ತಿ ಜೀವನನ್ ಸಂಕಷ್ಟಗ್ ತಿಕ್ಕಾದ್ಂಡ್ ಪಂದ್ ಆಯುರ್ವೇದ ವೈದ್ಯೆರ್ ನಕುಲು ತುಳುನಾಡ ರಕ್ಷಣಾ ವೇದಿಕೆದ ಮುಕೇನ ಸಹಕಾರ ಕೇಂದೆರ್.
ಈ ನಿಲೆಟ್ಟ್ ತುಳುನಾಡ ರಕ್ಷಣಾ ವೇದಿಕೆ ವೈದ್ಯೆರೆನ ಘಟಕದ ಮುತಾಲಿಕೆಡ್ ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲೆಡ್ ಪ್ರತಿಭಟನೆ ಸಭೆ ಬೊಕ್ಕ ಹಕ್ಕೊತ್ತಾಯ ಸಭೆನ್ ನಡಪಾದ್ ಜಿಲ್ಲಾಧಿಕಾರಿಲೆನ ಮುಕೇನ ಮುಖ್ಯಮಂತ್ರಿಲು ಆರೋಗ್ಯ ಸಚಿವೆರೆಗ್ ಸೇರ್ದ್ ಬಿನ್ನಾಪು ಸಂದಾದೆರ್. ಇತ್ತೆನೇ ನಮ್ಮ ದೇಶದ ಸುಮಾರ್ ರಾಜ್ಯಲೆಡ್ ಅಲ್ಪದ ರಾಜ್ಯ ಸರ್ಕಾರಲು ಆಯುರ್ವೇದ ವೈದ್ಯೆರೆಗ್ (B.A.M.S) ಅವಶ್ಯಕ ಅಲೋಪತಿ ಔಷಧನ್ ಕೊರಿಯೆರೆ ಅನುಮತಿ ಕೊರ್ತೆರ್.
ಆಯುರ್ವೇದ ವೈದ್ಯೆರ್ (B.A.M.S) ಪದವಿನ್ ಐನರೇ ವರ್ಷ ಕಲ್ತ್ ದ್, ಸರ್ಕಾರ ಮಾನ್ಯತೆ ಇಪ್ಪುನ ರಾಜೀವ್ಗಾಂಧಿ ಯುನಿರ್ವಸಿಟಿ ಬೊಕ್ಕ KAUP Board ಡ್ ಪದವಿನ್ ಪಡೆತೆರ್. (B.A.M.S) ಕೋರ್ಸ್ಡ್ ಆಯುರ್ವೇದದೊಟ್ಟಿಗೆ ಮಾಡರ್ನ್ ಮೆಡಿಕಲ್ ಸೈನ್ಸ್ನ್ ಕಲ್ಪಾದೆರ್. (6ತಿಂಗೊಲ್ ಕಡ್ಡಾಯ ತಾಲೂಕ್ ಸರ್ಕಾರಿ ಆಸ್ಪತ್ರೆಡ್ ಇಂಟರ್ನ್ ಶಿಪ್ ಬೊಕ್ಕ 6 ತಿಂಗೊಲ್ ಆಯುರ್ವೇದ ಚಿಕಿತ್ಸೆ ಪದ್ಧತಿಡ್ ಇಂಟರ್ನ್ ಶಿಪ್ ಮಲ್ದೆರ್.
ಕಾನೂನುಡ್ ಇಪ್ಪುನ ಅವಕಾಶನ್ ಗಲಸೊಂದು ರಾಜ್ಯದ ಆಯುಷ್ ವೈದ್ಯೆರೆಗ್ ಸುರುತ್ತ ಹಂತದ ಚಿಕಿತ್ಸೆಡ್ ನಮ್ಮ ಮೂಲ ಪದ್ಧತಿದೊಟ್ಟಿಗೆ ಅವಶ್ಯಕ ಅಲೋಪತಿ ಮಾರ್ದ್ ನ್ ಗಲಸೆರೆ ಇತ್ತೆನೇ ಮಹಾರಾಷ್ಟ್ರ ಸೇರಿನಂಚೆನೆ ಬೇತೆ ಸುಮಾರ್ ರಾಜ್ಯಲೆಡ್ ಇಪ್ಪುನ ಕಾನೂನುದಲೆಕ್ಕನೇ ತಿದ್ದುಪಡಿನ್ ಡ್ರಗ್ಸ್ ಆಂಡ್ ಕಾಸ್ಕೆಟಿಕ್ ಆಕ್ಟ್ (Drugs & cosmatics act 1940 Rule 2EE (iii) ದಲೆಕ್ಕ ನಮ್ಮ ರಾಜ್ಯಡ್ಲಾ ತಿದ್ದುಪಡಿ ಮಲ್ತ್ ದ್ ಜಾರಿಗ್ ಕನವೊಡು. ಬೊಕ್ಕ ಕರ್ನಾಟಕ ರಾಜ್ಯ ಆಯುರ್ವೇದ ಯುನಾನಿ ಬೋರ್ಡ್ ಬೊಕ್ಕ ಹೋಮಿಯೋಪತಿ ಬೋರ್ಡ್ದ ಕಾಯ್ದೆಡ್ ತಿದ್ದುಪಡಿ ಕನತ್ ಜಾರಿಗ್ ಕನವೊಡು ಪಂದ್ ಫೆ.9 ಕ್ಕ್ ಪೇಂಟೆದ ಸರ್ಕ್ಯೂಟ್ ಹೌಸ್ಡ್ ತುಳುನಾಡ ರಕ್ಷಣಾ ವೇದಿಕೆ ಕೇಂದ್ರೀಯ ಮಂಡಳಿ ಗುರ್ಕಾರೆ ಯೋಗಿಶ್ ಶೆಟ್ಟಿ ಜಪ್ಪು ಮೇರ್ ಆರೋಗ್ಯ ಸಚಿವೆರ್ ದಿನೇಶ್ ಗುಂಡುರಾವ್ ಮೆರೆಗ್ ಬಿನ್ನಾಪು ಸಂದಾದ್, ಸರಿಯಾಯಿನ ಕ್ರಮಗ್ ಒತ್ತಾಯ ಮಲ್ದೆರ್. ಬಿನ್ನಾಪುಗ್ ಎಡ್ಡೆ ರೀತಿಡ್ ಸ್ಪಂದಿಸಾಯಿನ ಸಚಿವೆರ್ ಪರಿಶೀಲನೆ ಮಲ್ಪುವೆ ಪಂದ್ ಭರವಸೆ ಕೊರಿಯೆರ್.
