ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ನರಮಾನಿನ ಮೋನೆನ್ ಹೊಲುನ ಇಸೇಸ ಕೀಟ ಮಲ್ಪೆಡ್ ಪತ್ತೆ

ನರಮಾನಿನ ಮೋನೆನ್ ಹೊಲುವ ಇಸೇಸ ಕೀಟ ಮಲ್ಪೆಡ್ ಪತ್ತೆ ಆತ್ಂಡ್.

ಮಲ್ಪೆದ ಕೊಳ ಕೈತಲ್ದ ಯಶಸ್ವಿ ಮಂಜುಗಡ್ಡೆ ಸ್ಥಾವರಡ್ ಈ ಕೀಟ ತೋಜಿದ್ ಬೈದ್ಂಡ್. ನರಮಾನಿನ ಮೋನೆನ್ ಹೋಲುವ ಈ ಕೀಟ ತೂಪುನಕ್ಲೆನ ಗಮನ ಸೆಳೆತ್ಂಡ್.‌ ಕೈತಲ್ದಕುಲು ಮೊಬೈಲ್ ಡ್ ಈ ಚಿತ್ರನ್ ಪೋಟೋ ದೈದೆರ್.

ತರೆಟ್ಟ್ ಟೋಪಿ ಪಾಡಿಲೆಕ್ಕ ತೋಜುನ ಈ ಕೀಟ ರಡ್ಡ್ ಕಣ್ಣ್, ಮಲ್ಲ ಮೂಂಕುದ ತಿರ್ತ್ ಚಾರ್ಲಿ ಚಾಪ್ಲಿನ್ ಥರತ್ತ ಮೀಸೆ ಇಂಚ ದೂರರ್ದ್ ತೂಂಡ ನರಮಾನಿ ಮೋನೆದ ಕಲಾಕೃತಿದಂಚ ತೋಜುಂಡು. ಕೆಂಪು, ಮಂಜಲ್, ಕಿತ್ತಳೆ, ಕಂದು ಬಣ್ಣಡ್ ಇಪ್ಪುನ ಈ ಕೀಟ ಕಾಂಡೆದ ಪೊರ್ತುಡು ಸೂರ್ಯನ ಬೆಚ್ಚಗ್ ಶಾಖ ಹಿರೊಂದು ದೈನ್ ಎಚ್ಚಾದ್ ವಿಹರಿಸುಂಡು. ಉಂದೆನ್ ಹಿಟ್ಲರ್ ಕೀಟ ಪಂದ್ ಲೆಪ್ಪುವೆರ್. ಫೆಬ್ರವರಿರ್ದ್ ಮೇ ತಿಂಗೊಲ್ದ ಪೊರ್ತುಡು ಉಂದು ತೂಜಿದ್ ಬರ್ಪುಂಡು ಪಂದ್ ತಜ್ಞೆರ್ ತೆರಿಪಾದೆರ್.

ಪಾಕಿಸ್ತಾನಡ್ ಉಗ್ರೆರೆನ ದಾಳಿರ್ದ್ 12 ಜನ ತೀರ್ ಪೋಯೆರ್

ಸಾರ್ವತ್ರಿಕ ವೋಟುದ ನಡುಟ್ಟ್ ಪಾಕಿಸ್ತಾನಡ್ 51 ಭಯೋತ್ಪಾದಕ ದಾಳಿಲೆಡ್ 10 ಭದ್ರತಾ ಸಿಬ್ಬಂದಿ ಸೇರ್ದ್ 12 ಜನ ತೀರ್ ಪೋತೆರ್ ಬೊಕ್ಕ 39 ಜನಕ್ಕ್ ಪೆಟ್ಟಾತ್ಂಡ್ ಪಂದ್ ವರದಿಯೊಂಜಿ ತೆರಿಪಾದ್ಂಡ್.

ವೋಟುದ ಕ್ರಮನ್ ಅಡ್ಡಿ ಮಲ್ಪುನ ಉದ್ದೇಶರ್ದ್ ಕೆಪಿ ಬೊಕ್ಕ ಬಲೂಚಿಸ್ತಾನದ 51 ಭಯೋತ್ಪಾದಕೆರೆನ ದಾಳಿ ನಡತ್ ದ್ಂಡ್.

ಸೈನಿಕೆರ್ ದೃಢ ನಿಶ್ಚಯರ್ದ್ ಬೊಕ್ಕ ಪಾಕಿಸ್ತಾನ ಇಡೀ ಶಾಂತಿ ಬೊಕ್ಕ ಭದ್ರತೆನ್ ಕಾಪಾಡೊಂದೆರ್ ಪಂದ್ ವರದಿಯೊಂಜಿ ತೆರಿಪಾದ್ಂಡ್.

ಇನಿ ಮಂಡ್ಯ ಬಂದ್

ಕೆರಗೋಡುಡ್ ಹನುಮಧ್ವಜ ದೆತ್ತಿನೆನ್ ಖಂಡಿಸಾದ್ ಇನಿ ಹಿಂದೂಪರ ಸಂಘಟನೆಲು ಮಂಡ್ಯ ಬಂದ್ ಗ್ ಕರೆ ಕೊರ್ತುಂಡು.

ಕೆರಗೋಡು ಗ್ರಾಮರ್ದ್ ಮಂಡ್ಯದ ಜಿಲ್ಲಾಧಿಕಾರಿಲೆನ ಕಚೇರಿ ಮುಟ್ಟ ಮಲ್ಲ ಬೈಕ್ ರ್ಯಾಲಿ ನಡಪರೆ ಉಂಡು. ಬೈಕ್ ರ್ಯಾಲಿದ ಬೊಕ್ಕ ಜಿಲ್ಲಾಧಿಕಾರಿಲೆನ ಕಚೇರಿದಲ್ಪ ಬಿನ್ನಾಪು ಪತ್ರ ಸಂದಾಯೆರೆ ಉಂಡು.

ಸಾರ್ವಜನಿಕೆರೆಗ್ ತೊಂದರೆ ಆಯೆರೆ ಬಲ್ಲಿ ಪನ್ಪುನ ದೃಷ್ಟಿರ್ದ್ ಇನಿತ್ತ ಬಂದ್ ಗ್ ಬಿಜೆಪಿ ಬೊಕ್ಕ ಜೆಡಿಎಸ್ ಪಕ್ಷಲು ನೇರ ಬೆಂಬಲ ಕೊರ್ತಿಜಿ ಪಂದ್ ಬಿಜೆಪಿ ಮುಖಂಡೆರ್ ಅಶೋಕ್ ಜಯರಾಂ ಪೊಲಬು ಕೊರ್ತೆರ್.

ಸರಕಾರಿ ಲೇಸ್ ದ ಅಟ್ಟಣೆ ಸಭೆ

ತ್ರಿಪತ ಕವಿ ಸರ್ವಜ್ಞ ಜಯಂತಿ ಕಾರ್ಲ ನಡ್ಸಪ್ಪ ತಾಶಿಲ್ದಾರ್ ಮೆರೆನ ಗುರ್ಕಾರ್ಮೆಡ್ ಫೆ.20 ಕ್ಕ್ ನಡಪರೆ ಇಪ್ಪುನ ಸರಕಾರಿ ಲೇಸ್ ದ ಅಟ್ಟಣೆ ಸಭೆ ಇನಿ ಕಾರ್ಲ ತಾಲೂಕ್ ದ ಕಚೇರಿಡ್ ನಡತ್ಂಡ್.

ಹೊಸ್ಮರ್ ಬೊಕ್ಕ ಬೋಳ ಸಂಘಗ್ ನಿವೇಶನ ಸರ್ಕಾರರ್ದ್ ಕೊರಿಯೆರೆ ಚರ್ಚೆ ಮಲ್ತೆರ್.

ಈ ಪೊರ್ತುಡು ಕರಾವಳಿ ಕುಂಬಾರೆರೆನ ಯುವ ವೇದಿಕೆ ಗುರ್ಕಾರೆ ದಿವಾಕರ್ ಬಂಗೇರ, ಹೊಸ್ಮರ್ ಸಂಘದ ಗುರ್ಕಾರೆ ಪ್ರಮೋದ್ ಕುಲಾಲ್, ಸಂತೋಷ್ ಕುಲಾಲ್ ಹೊಸ್ಮರ್, ಬೋಳ ಸಂಘದ ಗುರ್ಕಾರೆ ಗಣೇಶ್ ಕುಲಾಲ್, ಮಾಧ್ಯಮ ಬಿಂಬ ವಸಂತ್ ಕುಮಾರ್, ಜಯರಾಮ್ ಕುಲಾಲ್ ಕೆರ್ವಶೆ, ಇನ್ನಾ ಗ್ರಾಮ ಪಂಚಾಯತ್ ಮಾಜಿ ಗುರ್ಕಾರೆ ಕುಶ ಆರ್ ಮೂಲ್ಯ ಇನ್ನಾ, ಮಾಜಿ ತಾಲೂಕ್ ಪಂಚಾಯತ್ ಒತ್ತು ಗುರ್ಕಾರೆ ಗೋಪಾಲ್ ಮೂಲ್ಯ ಮುಲ್ಲಡ್ಕ, ನಾನಿಲ್ತಾರ್ ಕುಲಾಲ ಸಂಘದ ಒತ್ತು ಗುರ್ಕಾರೆ ಜಗನ್ನಾಥ ಮೂಲ್ಯ ಬೆಳ್ಮಣ್, ದೀಪಕ್ ಬೆಳ್ಮಣ್ ಪಾಲ್ ಪಡೆದಿತ್ತೆರ್.

ಫೆ.9: ಉರ್ವ ಶ್ರೀ ಮಾರಿಯಮ್ಮ ದೇವಲ್ಯಗ್ ಪುದೆಕಾಣಿಕೆ ಮೆರವಣಿಗೆ

ಕುಡ್ಲ: ಉರ್ವ ಶ್ರೀ ಮಾರಿಯಮ್ಮ ದೇವಲ್ಯಡ್ ಫೆ.15 ಕ್ಕ್ ನಡಪರೆ ಇಪ್ಪುನ ಬ್ರಹ್ಮಕಲಶ ಉಚ್ಚಯಗ್ ಫೆ. 9 ಮಧ್ಯಾಹ್ನ 2:30 ಕ್ಕ್ ಸರಿಯಾದ್ ಶ್ರೀ ನಂದನೇಶ್ವರ ದೇವಸ್ಥಾನ ಪಣಂಬೂರುರ್ದ್ ಪುದೆಕಾಣಿಕೆ ಸಮರ್ಪಣೆ ಮಲ್ಪೆರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಮಧ್ಯಾಹ್ನದೊಳಯಿ ಪುದೆಕಾಣಿಕೆನ್ ಶ್ರೀ ದೇವಲ್ಯಗ್ ಕನತ್ ದ್ ಮೆರವಣಿಗೆಡ್ ಪಾಲ್ ಪಡೆದ್ ಈ ಲೇಸ್ ನ್ ಪೊರ್ಲು ಮಲ್ತ್ ಕೊರ್ದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.

ಫೆ.19: ಕುಡ್ಲ ಪುರಭವನಡ್ “ಒರಿಯೆ” ತುಳು ನಾಟಕ

ಲೀಲಾಧರ ಶೆಟ್ಟಿ ಕರಂದಾಡಿ ಸಾರಥ್ಯದ ರಂಗತರಂಗ ಕಲಾವಿದೆರ್ ಕಾಪು ಮೊಕ್ಲೆರ್ದ್ “ಒರಿಯೆ” ತುಳು ನಾಟಕ ಫೆ.19 ಕ್ಕ್ ಬಯ್ಯಗ್ ಕುಡ್ಲ ಪುರಭವನಡ್ ನಡಪರೆ ಉಂಡು.

ರಾಜೇಶ್ ಆಳಪೆ ಮೆರೆನ ತ್ರಿದಶ ರಂಗಪಯಣದ ಅಭಿನಂದನಾ ಲೇಸ್ ದ ಲೆಕ್ಕೊಡು ಈ ನಾಟಕ ನಡಪರೆ ಉಂಡು.

ಫೆ.10: ಅಜ್ಜಿಕಾನ್ ಕಟ್ಟೆ ಮಂಜುನಾಥ ಫ್ರೆಂಡ್ಸ್ ಸರ್ಕಲ್ ದ 22ನೇ ವಾರ್ಷಿಕ ಉಚ್ಚಯ

ಕುಡ್ಲ: ಯೆಯ್ಯಾಡಿದ ಅಜ್ಜಿಕಾನ್ ಕಟ್ಟೆ ಮಂಜುನಾಥ ಫ್ರೆಂಡ್ಸ್ ಸರ್ಕಲ್ ಡ್ 22ನೇ ವರ್ಷದ ವಾರ್ಷಿಕ ಉಚ್ಚಯ ಫೆ.10 ಸನಿಯಾರ ನಡಪರೆ ಉಂಡು.

ಆನಿ ಬೊಲ್ಪುಗು ಗಣಹೋಮ, ಸಾರ್ವಜನಿಕ ಸತ್ಯನಾರಾಯಣ ಪೂಜೆ, ಮಹಾಪೂಜೆ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಸಭಾ ಲೇಸ್, ರಾತ್ರೆ ಭರತನಾಟ್ಯ ಬೊಕ್ಕ ಚಲನಚಿತ್ರ ನಟೆ ಮಂಜು ರೈ ಮೂಳೂರು ನಿರೂಪಣೆದ ಸರಿಗಮಪ ಮ್ಯೂಸಿಕಲ್ ನೈಟ್ ಲೇಸ್ ನಡಪರೆ ಉಂಡು.

ಅಂಚೆನೆ ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಗುರ್ಕಾರೆ ಉಮೇಶ್ ಶೆಟ್ಟಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

PNB ಡ್ 1025 ಬೇಲೆ

ಪಂಜಾಬ್ ನ್ಯಾಷನಲ್ ಬ್ಯಾಂಕ್ ಡ್ ಖಾಲಿ ಇಪ್ಪುನ 1025 ಆಫೀಸರ್-ಕ್ರೆಡಿಟ್, ಮ್ಯಾನೇಜರ್-ಫಾರೆಕ್ಸ್, ಮ್ಯಾನೇಜರ್-ಸೈಬರ್ ಸೆಕ್ಯುರಿಟಿ ಬೊಕ್ಕ ಸೀನಿಯರ್ ಮ್ಯಾನೇಜರ್-ಸೈಬರ್ ಸೆಕ್ಯುರಿಟಿ ಬೇಲೆಗ್ ಆನ್ ಲೈನ್ ಮುಕೇನ ಅರ್ಜಿ ಸಂದಾವೊಲಿ.

ಉಂದೆಕ್ಕ್ ದೇಶ ಇಡೀ ಮಾತ ಅಭ್ಯರ್ಥಿಲೆಗ್ ಅರ್ಜಿ ಸಂದಾಯೆರೆ ಅವಕಾಶ ಉಂಡು. ಆಸಕ್ತ ಅಭ್ಯರ್ಥಿಲು 2024 ತ್ತ ಫೆಬ್ರವರಿ 7-25 ಮುಟ್ಟ ಅಧಿಕೃತ ವೆಬ್‌ಸೈಟ್‌ pnbindia.in ಮುಕೇನ ಅರ್ಜಿ ಸಂದಾವೊಲಿ.

ಕ್ರೀಡಾ ಇಲಾಖೆದ ಸಹಾಯಕ ನಿರ್ದೇಶಕೆರಾದ್ ಪ್ರದೀಪ್ ಡಿಸೋಜಾ

ಕುಡ್ಲ: ದಕ್ಷಿಣ ಕನ್ನಡ ಜಿಲ್ಲೆದ ಯುವ ಸಬಲೀಕರಣ ಬೊಕ್ಕ ಕ್ರೀಡಾ ಇಲಾಖೆದ ಸಹಾಯಕ ನಿರ್ದೇಶಕೆರಾದ್ ಪ್ರದೀಪ್ ಡಿಸೋಜಾ ಫೆ.6 ಅಂಗಾರೆ ಅಧಿಕಾರ ಒಯಿಸೊಂಡೆರ್.

ಇತ್ತೆದ ಜಿಲ್ಲಾ ಕೌಶಲ್ಯಾಭಿವೃದ್ಧಿ ಅಧಿಕಾರಿ ಆಯಿನ ಪ್ರದೀಪ್ ಡಿಸೋಜಾ ಹೆಚ್ಚುವರಿ ಪ್ರಭಾರಡ್ ಬೇಲೆ ಮಲ್ದೆರ್.

ಫೆ‌.7-10: ಒಟ್ಲ ಶ್ರೀ ಧರ್ಮರಸು ಉಳ್ಳಾಕ್ಲು ಬ್ರಹ್ಮಬೈದೆರ್ಲೆನ ಗರಡಿಡ್ ವರ್ಷಾಧಿದ ಜಾತ್ರೆ

ಬೊಲ್ತೇರ್: ಒಟ್ಲ ಶ್ರೀ ಧರ್ಮರಸು ಉಳ್ಳಾಕ್ಲು ಬ್ರಹ್ಮಬೈದೆರ್ಲೆನ ಗರಡಿಡ್ ಬೊಕ್ಕ ಪರಿವಾರ ದೈವೊಲೆನ ಕ್ಷೇತ್ರಡ್ ವರ್ಷಾವಧಿ ಜಾತ್ರೋಚ್ಚಯ ಫೆ‌.7-10 ಮುಟ್ಟ ನಡಪರೆ ಉಂಡು.

ಫೆ.7 ಬುದಾರ ಬೊಲ್ಪುಗು ಪ್ರಾರ್ತನೆ, ಗಣಹೋಮ, ಕಲಶಾಭಿಷೇಕ, ನಾಗತಂಬಿಲ, ಮಾಕಲಬ್ಬೆ ತಂಬಿಲ, ಬ್ರಹ್ಮಬೈದೆರ್ಲೆನ ತಂಬಿಲ, ದೈವೊಲೆನ ತಂಬಿಲ, ಪುದೆಕಾಣಿಕೆ ನಡತ್ಂಡ್.

ಫೆ.8 ಗುರುವಾರ (ಇನಿ) ಬೊಲ್ಪುಗು ತೋರಣ ಮೂರ್ತ, ಧರ್ಮರಸು ಉಳ್ಳಾಕ್ಲು ಬೊಕ್ಕ ಪರಿವಾರ ದೈವೊಲೆನ ನೇಮೋಚ್ಚಯ, ಮಧ್ಯಾಹ್ನ ಕೊಡಮಂದಾಯ ನೇಮ, ಅನ್ನ ಪ್ರಸಾದ ಸೇವೆ, ಕಲ್ಲಾಜೆರ್ದ್ ಪಿಲಿಕಲ್ತಾಯ ಭಂಡಾರ ಬರಿಯೆರೆ, ಶಿರಾಡಿ ದೈವ, ಪಂಜುರ್ಲಿ ದೈವೊಲೆನ ಭಂಡಾರ ದೆತ್ತೆರ್, ಬಯ್ಯಗ್ ಸತ್ಯ ಜಾವತೆ ನೇಮ, ಕಲ್ಕುಡ ಕಲ್ಲುರ್ಟಿ ನೇಮ, ರಾತ್ರೆ ಲೆಕ್ಕೆಸಿರಿ ಬಾವನ ನೇಮ, ಪರಿವಾರ ದೈವೊಲೆನ ನೇಮ, ಅನ್ನ ಪ್ರಸಾದ ಸೇವೆ, ಪಿಲಿಕಲ್ತಾಯ ನೇಮ ನಡಪರೆ ಉಂಡು.

ಫೆ.9 ಸುಕ್ರಾರ ಬೊಲ್ಪುಗು ಬಿರ್ಮೆರ್, ಶಿರಾಡಿ ದೈವೊಲೆನ ಪರಿವಾರ ನೇಮ, ಪಂಜುರ್ಲಿ, ಮಾಲದ ಕೊರಗ ನೇಮ, ಬಚ್ಚನಾಯಕ, ಗುಳಿಗ ನೇಮ ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಬೈದೇರುಲೆನ ಗರಡಿ ಜಪ್ಪೆರೆ, ದೇಯಿ ಬೈದಿತಿ ಉಚ್ಚಯ ಬೊಕ್ಕ ಬೈದೇರುಲೆನ ಭೇಟಿ, ಬೊಕ್ಕ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಫೆ.10 ಸನಿಯಾರ ಬೊಲ್ಪುಗು ಮಾನಿಬಾಲೆ ಗರಡಿ ಜಪ್ಪೆರೆ, ಸುರಿಯ ಪಾಡಿಯೆರೆ, ಪರಕೆ ಬೊಕ್ಕ ಗಂಧ ಪ್ರಸಾದ ನಡಪರೆ ಉಂಡು.

ಈ ಮಾತ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ಧರ್ಮರಸು ಉಳ್ಳಾಕ್ಲು ಬ್ರಹ್ಮಬೈದೇರುಲೆನ ಬೊಕ್ಕ ಪರಿವಾರ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶೀಯ ಧರ್ಮದರ್ಶಿಲು ಜನಾರ್ಧನ ಬಂಗೇರ ವಿ., ಆಡಳಿತ ಸಮಿತಿ, ಕ್ಷೇತ್ರಾಭಿವೃದ್ಧಿ ಸಮಿತಿದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.