Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಚಾಮುಂಡಿ ಬೆಟ್ಟಡ್ ಇನಿರ್ದ್ ಪೊಸ ನಿಯಮ

ಮೈಸೂರ್: ಚಾಮುಂಡಿ ಬೆಟ್ಟಡ್ ಕಜವು ಬೊಕ್ಕ ಪ್ಲಾಸ್ಟಿಕ್ ಪಾಡಂದಿಲೆಕ್ಕ ಮಲ್ಪರೆ ಮೈಸೂರ್ ಅರಣ್ಯ ಸಂರಕ್ಷಣಾಧಿಕಾರಿ ಪೊಸ ನಿಯಮನ್ ಇನಿರ್ದೆ ಜಾರಿ ಮಲ್ದ್ಂಡ್.

ರಾಜ್ಯ ಅತ್ತಂದೆ, ಪಿದಯಿ ರಾಜ್ಯ, ದೇಶಲೆರ್ದ್ ದೇವೆರೆನ ದರ್ಶನಗ್ ಪಂದ್ ದಿನೊಲ ಸಾರರ್ದ್ ಎಚ್ಚ ಭಕ್ತೆರ್ ಬೆಟ್ಟಗ್ ಬರ್ಪೆರ್. ಅಕುಲು ತಿಂದ್ ದ್ ತಿಂಡಿದ ಪ್ಯಾಕೆಟ್, ಬಿಸ್ಕತ್ ಕವರ್‌, ನೀರ್, ಜ್ಯೂಸ್ ದ ಬಾಟಲಿನ್ ರೋಡುದ ಸೈಡ್ ಪಾಡುವೆರ್. ನೆರ್ದ್ ಪರಿಸರಗ್ ತೊಂದರೆ ಆವೊಂದು ಉಂಡು. ಅಂಚಾದ್ ಮೈಸೂರ್ ಅರಣ್ಯ ಇಲಾಖೆ ಪೊಸ ಆದೇಶನ್ ಜಾರಿ ಮಲ್ದ್ಂಡ್.

ಪ್ಲಾಸ್ಟಿಕ್ ದಕ್ಕ್ಂಡ 500 ರೂ. ಪೈನ್, ಸುರುತ್ತ ಸರ್ತಿ ತ್ಯಾಜ್ಯ ದಕ್ಕ್ಂಡ 2,500 ರೂ. ಪೈನ್, ರಡ್ಡನೇ ಸರ್ತಿಗ್ 5 ಸಾರ ರೂ., ಮೂಜಿನೇ ಸರ್ತಿಗ್ 10 ಸಾರ ರೂ. ಪೈನ್ ಪಾಡುಂಡು ಬೊಕ್ಕ ಲೈಸನ್ಸ್ ನ್ ಕಾನ್ಸಲ್ ಮಲ್ಪುಂಡು ಪಂದ್ ಚಾಮುಂಡಿ ಬೆಟ್ಟದ ಅಂಗಡಿದಕ್ಲೆಗ್ ಸೂಚನೆ ಕೊರ್ತುಂಡು.

ಸರ್ವೇದ ಬೇಲೆಗ್ ಲಂಚ ದೆತೊನ್ನ ಸರ್ವೆಯರ್ ಗ್ 4 ವರ್ಷ ಜೈಲ್, 50 ಸಾರ ಪೈನ್!

ಜಾಗೆದ ಸರ್ವೇದ ಬೇಲೆಗ್ ಲಂಚ ದೆತೊನ್ನ ಸರ್ವೆಯರ್ ಗ್ ವಿಚಾರಣಾ ನ್ಯಾಯಾಲಯ ನಾಲ್ ವರ್ಷ ಜೈಲ್ ಶಿಕ್ಷೆ ಬೊಕ್ಕ 50 ಸಾರ ಪೈನ್ ಪಾಡಿನ ಘಟನೆ ಬೀದರ್‌ಡ್ ನಡತ್ಂಡ್.

ಬಸವ ಕಲ್ಯಾಣದ ತಹಶೀಲ್ದಾರ್ ಕಚೇರಿಡ್ ರಡ್ಡನೇ ದರ್ಜೆದ ಸರ್ವೆಯರ್ ಆಯಿನ ಅಬ್ದುಲ್ ರಹೀಂ ಬಡೇಸಾಬ್ ಜೈಲ್ ಶಿಕ್ಷೆಗ್ ಗುರಿ ಆಯಿನ ಅಧಿಕಾರಿ.

ಭ್ರಷ್ಟಾಚಾರ ನಿಗ್ರಹ ಕಾಯ್ದೆದ ಸೆಕ್ಷನ್ 13(2) ಅಡಿ ಬೀದರ್‌ದ ಇಸೇಸ ನ್ಯಾಯಾಲಯದ ನ್ಯಾಯಾಧೀಶೆರ್ ವಿಜಯ ಕುಮಾರ್ ಎಂ. ಆನಂದ ಶೆಟ್ಟಿ ಮೇರ್ ಈ ಮಹತ್ವದ ತೀರ್ಪು ಕೊರ್ತೆರ್.  ಅಭಿಯೋಜನೆಡ್ ಇಸೇಸ‌ ಸರ್ಕಾರಿ ಅಭಿಯೋಜಕೆರ್ ಕೇಶವ ರಾವ್ ಶ್ರೀಮಾಳೆ ಪ್ರಾಸಿಕ್ಯೂಷನ್ ಪರ ವಾದ ಮಂಡಿಸಾದೆರ್.

ಅಂಚೆನೆ ತೀರ್ಪುಡು ಪಾಡಿನ ಪೈನ್ ನ್ ಕಟ್ಟಿಜಿಂಡ ಆಜಿ ತಿಂಗೊಲ್ ಜೈಲ್ ಶಿಕ್ಷೆ ಅನುಭವಿಸಾವೊಡು ಪಂದ್ ನ್ಯಾಯಾಲಯ ಆದೇಶ ಕೊರ್ತುಂಡು.

ಸೌಜನ್ಯಗ್ ನ್ಯಾಯ ತಿಕ್ಕೆರೆ ಸುಬ್ರಹ್ಮಣ್ಯಡ್ ಪ್ರತಿಭಟನೆ

ಸೌಜನ್ಯನ್ ಕೆರಿನ ಕೇಸ್ ದ ನ್ಯಾಯಗಾದ್ ಬೊಕ್ಕ ತನಿಖೆಗ್ ಒತ್ತಾಯ ಮಲ್ತ್ ದ್ ಆ.31 ಕ್ಕ್ ಸುಬ್ರಹ್ಮಣ್ಯಡ್ ಪ್ರತಿಭಟನೆ ನಡತ್ಂಡ್.

ಈ ಪೊರ್ತುಡು ಪೊರ್ಂಬಾಟಗಾರೆ ಮಹೇಶ್ ಶೆಟ್ಟಿ ತಿಮರೋಡಿ ಪಾತೆರ್ದ್, ಉಚ್ಚುದ ದ್ವೇಷ 12 ವರ್ಷ ಇಪ್ಪುಂಡು. ಸೌಜನ್ಯ ಕೇಸ್ ಗ್ 12 ನೇ ವರ್ಷೊ ಆಯೆರೆ ನನ ಮೂಜೇ ತಿಂಗೊಲ್ ಇಪ್ಪುನೆ. ಕುಕ್ಕೆ ಸುಬ್ರಹ್ಮಣ್ಯ ನಾಗನ ಕ್ಷೇತ್ರಡ್ ನಮ‌ ಮಾತ ಇತ್ತ್ ದ್, ಪ್ರಾರ್ತನೆ ಮಲ್ತೊಂದು ಉಲ್ಲ. ಈ ಸರ್ತಿ ನ್ಯಾಯ ತಿಕ್ಕೊಂಡೆ. ಆ ದಿನ ದೂರ ಇಜ್ಜಿ. ಸೌಜನ್ಯರ್ದ್ ಲೋಕಡ್ ಧರ್ಮ ಸ್ಥಾಪನೆ ಆಪುನ ಕಾಲ ಬೈದ್ಂಡ್.  ಸಮಾಜಡ್ ಮಾತ ಕಟುಕೆರ್ ಇಜ್ಜೆರ್. ಆಂಡ ತಿಳುವಳಿಕೆದ  ಕೊರತೆ ಉಂಡು. ಅತ್ಯಾಚಾರವಾದ್ ಈ ಭೂಮಿಗ್ ನೆತ್ತೆರ್ ಬೂರುಂಡ ಅವು ನಮಕ್ ಶಾಪ ಆಪುಂಡು ಪಂದ್ ಪಂಡೆರ್.

ಕೇಸ್ ಗ್ ಸಂಬಂಧಪಟ್ಟಿನ  ದಾಖಲೆ ಕೊರ್ಪುನಕುಲು ಕೇವಲ ವೀಸಾ ದಾಖಲೆ ಕೊರ್ಂಡ ಯಾವಂದ್, ಅಮೇರಿಕಾಡ್ ಇತ್ತಿನ ಇಮಾನಡ್ ಪೋಯಿನ ದಾಖಲೆ ಕೊರ್ಲೆ ಪಂದ್ ಪಂಡೆರ್.

ಸೌಜನ್ಯನ ಅಮ್ಮ ಕುಸುಮಾವತಿ ಪಾತೆರ್ದ್, ಮಧ್ಯಾಹ್ನ ವನಸ್ ಗ್ ಇಲ್ಲಡೇ ಬರ್ಪೆ ಪಂಡಿನಾಲ್ ಬೊಕ್ಕ ಇಲ್ಲಡೇ ಬೈಜಲ್. ಅತ್ಯಾಚಾರಿಲು ಅತ್ಯಾಚಾರ ಮಲ್ತ್ ದ್ ಕೆರ್ದ್ ದಕ್ಕ್ ದೆರ್. ಎನ್ನ ಮಗಲೆಕ್ಕ ಅತ್ಯಾಚಾರ ಆಯಿನ ಮಾತೆರೆಗ್ಲಾ ನ್ಯಾಯ ತಿಕ್ಕಡ್ ಪಂದ್ ಪಂಡೆರ್.

ಕುಮಾರಧಾರರ್ದ್ ಮೌನ   ಮೆರವಣಿಗೆ ಸುರು ಆಂಡ್. ತಿಮರೋಡಿ ಮೇರ್ ತಾರಾಯಿ ಹಾಕ್ ದ್ ಚಾಲನೆ ಕೊರಿಯೆರ್. ಮೆರವಣಿಗೆಡ್ ಸಾರರ್ದ್ ಎಚ್ಚ ಜನ ಪಾಲ್ ಪಡೆದಿತ್ತೆರ್. ರಥಬೀದಿಡ್ ಸಭಾ‌ ಕಾರ್ಯಕ್ರಮ ನಡತ್ಂಡ್.  ತಿಮರೋಡಿ ಮೇರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಹೋರಾಟ ಸಮಿತಿದ ಗುರ್ಕಾರ್ಲು ರವಿಕಕ್ಕೆಪದವು ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್. ಕಾರ್ಯದರ್ಶಿ ಗೋಪಾಲ ಎಣ್ಣೆಮಜಲು ಎದ್ಕೊನಿಯೆರ್. ದಿನೇಶ್ ಸಂಪ್ಯಾಡಿ ಸೊಲ್ಮೆ ಸಂದಾಯೆರ್. ವಿಶ್ವನಾಥ ನಡುತೋಟ ಈ ಲೇಸ್ ದ ಸುಧಾರಿಕೆ ಮಲ್ತೆರ್. ಕುಕ್ಕೆ ಸುಬ್ರಹ್ಮಣ್ಯ ದೇವಲ್ಯದ ಸಭೆರ್ದ್ ಬೊಕ್ಕ ರಾಜಗೋಪುರದ ಎದುರು ಸಾಮೂಹಿಕ ಪ್ರಾರ್ತನೆ ನಡತ್ಂಡ್. ಪ್ರಭಾಕರ ಪಡ್ರೆ ಪ್ರಾರ್ತನೆದ ಕಾಕಜಿನ್ ಓದಿಯೆರ್. ಬೊಕ್ಕ ದೇವಲ್ಯಗ್ ಸಂಘಟಕೆರ್, ಮಹೇಶ್ ತಿಮ್ಮರೋಡಿ, ಕುಸುಮಾವತಿ ಬತ್ತ್ ದ್ ದೇವೆರೆನ ಎದುರುಡು ಪ್ರಾರ್ತನೆ ಸಂದಾಯೆರ್.

ಈ ಪೊರ್ತುಡು ರೋಟರಿ ಕ್ಲಬ್ ಸುಬ್ರಹ್ಮಣ್ಯ, ಲಯನ್ಸ್ ಕ್ಲಬ್ ಸುಬ್ರಹ್ಮಣ್ಯ, ಜೆಸಿಐ ಸುಬ್ರಹ್ಮಣ್ಯ, ಬಿಎಂಎಸ್ ಆಟೋ ಚಾಲಕ ಮಾಲಕ ಸಂಘ ಸುಬ್ರಹ್ಮಣ್ಯ, ಕುಕ್ಕೇ ಶ್ರೀ ಆಟೋ ಚಾಲಕ ಮಾಲಕ ಸಂಘ, ಕುಕ್ಕೇ ಶ್ರೀ ಟ್ಯಾಕ್ಸಿ ಚಾಲಕ ಮಾಲಕ ಸಂಘ, ಸಂಜೀವಿನಿ ಒಕ್ಕೂಟ, ರವಿಕಕ್ಕೆಪದವು ಸಮಾಜ ಸೇವಾ ಟ್ರಸ್ಟ್, ಸುಬ್ರಹ್ಮಣ್ಯ ವರ್ತಕರ ಸಂಘ, ಗೌಡ ಸಮಿತಿ ಸುಬ್ರಹ್ಮಣ್ಯ ವಲಯ ಬೊಕ್ಕ ಬೇತೆ ಬೇತೆ ಸಂಘ ಸಂಸ್ಥೆಲು, ಕೈತಲ್ ದಕುಲು ಪಾಲ್ ಪಡೆದಿತ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಕಮರ್ಷಿಯಲ್ ಗ್ಯಾಸ್ ಸಿಲಿಂಡರ್ ಗ್ 157 ರೂ. ಕಮ್ಮಿ

ದೇಶದ 19ಕೆಜಿ ಕಮರ್ಷಿಯಲ್ ಗ್ಯಾಸ್ ಸಿಲಿಂಡರ್ ಗ್ 157 ರೂ. ಕಮ್ಮಿ ಆತ್ಂಡ್.

ಈ ರೇಟ್ ಇನಿರ್ದೆ ಅನ್ವಯ ಆಪುಂಡು. ಡೆಲ್ಲಿಡ್ 1680 ರೂ. ಇತ್ತಿನ ಸಿಲಿಂಡರ್ ದ ರೇಟ್ 1522 ಆತ್ಂಡ್. ಬೆಂಗ್ಲೂರ್ 1768 ರೂ. ಇತ್ತಿನ ವಾಣಿಜ್ಯ ಸಿಲಿಂಡರ್ ರೇಟ್  1611 ಆತ್ಂಡ್. ಇಲ್ಲಲ್ ಉಪಯೋಗ ಮಲ್ಪುನ ಎಲ್ ಪಿಜಿ ಸಿಲಿಂಡರ್ ಗ್ ಒವ್ವೇ ಬದಲಾವಣೆ ಆತಿಜಿ. ಆಂಡ ಕರಿನ ವಾರ ಮೋದಿ ಸರ್ಕಾರ 200 ರೂ. ಕಮ್ಮಿ ಮಲ್ತ್ ಇತ್ತ್ಂಡ್.

ಸೆ.3: ಶ್ರೀ ದತ್ತಮಂದಿರ ನೆಲ್ಲಿಕಟ್ಟೆಡ್ ಬಲೆ ತುಲುಲಿಪಿ ಕಲ್ಪುಗ ಕಜ್ಜಕೊಟ್ಯದ ಉದಿಪನ ಲೇಸ್

ಕಾರ್ಲ: ಶ್ರೀ ದತ್ತಮಂದಿರ ನೆಲ್ಲೆಕಟ್ಟೆ ಹಿರ್ಗಾನ (ಕಾರ್ಲ) ಮೊಕ್ಲೆನ ಮುತಾಲಿಕೆಡ್, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಜೈ ತುಲುನಾಡ್ (ರಿ.) ಮೊಕ್ಲೆನ ಒಟ್ಟುಸೇರಿಗೆಡ್ ಬಲೆ ತುಲುಲಿಪಿ ಕಲ್ಪುಗ ಕಜ್ಜಕೊಟ್ಯದ ಉದಿಪನ ಲೇಸ್ ಸೆ.3 ಕ್ಕ್ ಶ್ರೀ ದತ್ತಮಂದಿರ ನೆಲ್ಲಿಕಟ್ಟೆ ಹಿರ್ಗಾನ (ಕಾರ್ಲ) ಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಶ್ರೀ ದತ್ತಮಂದಿರ ನೆಲ್ಲಿಕಟ್ಟೆ ಹಿರ್ಗಾನದ ಗುರ್ಕಾರ್ಲು ಸತೀಶ್ ಕಡಂಬು ಒಯಿಸೊನ್ವೆರ್. ಹಿರ್ಗಾನ ಗ್ರಾಮ ಪಂಚಾಯತ್ ಗುರ್ಕಾರ್ದಿ ಸುನೀತಾ ಪೂಜಾರಿ ಉದಿಪನ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ನೆಲ್ಲಿಕಟ್ಟೆ ಸಿವಿಲ್ ‌ಕಾಂಟ್ರಾಕ್ಟರ್ ಮಹೇಶ್ ಪೂಜಾರಿ, ಸುಂಕದಕಟ್ಟೆ ನಿರಂಜನ ಸ್ವಾಮಿ ಪದವಿಪೂರ್ವ ಕಾಲೇಜ್ ದ ಪ್ರಾಂಶುಪಾಲೆರ್ ಸುಧಾಕರ ಶೆಟ್ಟಿ, ಜೈ ತುಲುನಾಡ್ (ರಿ.) ದ ಗುರ್ಕಾರ್ಲು ವಿಶು ಶ್ರೀಕೇರ ಬರಿಯೆರೆ ಉಲ್ಲೆರ್. ಪ್ರಶಾಂತ್ ಪೂಜಾರಿ ನಂದೊಲಿಗೆ ತುಲುಲಿಪಿನ್ ಕಲ್ಪಾಯೆರೆ ಉಲ್ಲೆರ್.

ಇನಿ ಇಂಡಿಯಾ ಲೋಗೋ ಬುಡುಗಡೆ

ಸಂಸತ್ ವೋಟುಡು ಬಿಜೆಪಿನ್ ಸೋಪಾಯೆರೆ 26 ವಿರೋಧ ಪಕ್ಷಲೆನ ಒಕ್ಕೂಟ ಇಂಡಿಯಾ, ಬೊಂಬೈಡ್ ಮೂಜಿನೇ ಸಭೆ ನಡಪಾವೊಂದು ಉಂಡು.‌

ಸಭೆತ್ತ ರಡ್ಡನೇ ದಿನವಾಯಿನ ಇನಿ ಮೈತ್ರಿದ ಲೋಗೋ ಬುಡುಗಡೆ ಆಪುಂಡು. ಮೈತ್ರಿಕೂಟದ ಮಾತ ಪಕ್ಷಲೆಗ್ ಒತ್ತು ಕೊರಿಯೆರೆ ಲಾಂಛನನ್ ತಯಾರ್ ಮಲ್ದ್ಂಡ್. ಒಟ್ಟು 9 ಲೋಗೋನ್ ರಚನೆ ಮಲ್ದೆರ್. ಆಯಿಟ್ಟ್ 3 ಲೋಗೋನ್ ಫೈನಲ್ ಮಲ್ದೆರ್. ನೆಟ್ಟ್ ಒವು ಪಂದ್ ಇನಿ ಬಯ್ಯಗ್ ಬುಡುಗಡೆ ಮಲ್ಪುವೆರ್.

ಪಂಜ ಕೊಯಿಕುಡೆ ಹಾಲು ಉತ್ಪಾದಕರ ಸಹಕಾರ ಸಂಘದ ವಾರ್ಷಿಕ ಸಾಮಾನ್ಯ ಸಭೆ

ಕಿನ್ನಿಗೋಳಿ: ಪಂಜ ಕೊಯಿಕುಡೆ ಹಾಲು ಉತ್ಪಾದಕರ ಸಹಕಾರ ಸಂಘ ನಿಯಮಿತ ನೆತ್ತ 2022-2023ನೇ ಸಾಲ್ ದ ಸರ್ವಸದಸ್ಯೆರೆನ ವಾರ್ಷಿಕ ಸಾಮಾನ್ಯ ಸಭೆ ಗುರ್ಕಾರ್ಲು ಆಯಿನ ನವೀನ್ ಶೆಟ್ಟಿ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.

ಈ ವರ್ಷ 22% ಡಿವಿಡೆಂಡ್ ಫಂಡ್ ನ್ ರೈತೆರೆಗ್ ಪಟ್ಟಿಯೆರ್. 25ನೇ ವರ್ಷೊದ ನೆಂಪುಗಾದ್ ಸದಸ್ಯೆರೆಗ್ ಸ್ಟೀಲ್ ದ ಬಜಾನನ್ ಧರ್ಮಾರ್ಥವಾದ್ ಕೊರಿಯೆರ್.‌ ಅಂಚೆನೆ ಕೊಡುಗೆಯಾದ್ ರತ್ನ ವಸಂತ ಶೆಟ್ಟಿ ನಲ್ಯ ಗುತ್ತು ಸಂಘದ ಕೊಡಿ ರಾಪಾದ್ ಕಂಬದ ಕಟ್ಟೆನ್ ನಿರ್ಮಾಣ ಮಲ್ದೆರ್. ಈ ಪೊರ್ತುಡು ಎಸೆಸೆಲ್ಸಿ ಬೊಕ್ಕ ಪಿಯುಸಿಡ್ 85% ಮಾರ್ಕ್ಸ್ ಪಡೆಯಿನ ಕಲ್ಪಾರ್ಥಿಲೆಗ್ ಸನ್ಮಾನ ಮಲ್ತೆರ್. ಮಾಜಿ ಅಧ್ಯಕ್ಷೆರ್ ಬೊಕ್ಕ ಕಾರ್ಯದರ್ಶಿ ಮೊಕ್ಲೆನ ಸೇವೆಗ್ ಸಿಬ್ಬಂದಿಲು ಸನ್ಮಾನ ಮಲ್ತೆರ್. ಮಾಜಿ ಅಧ್ಯಕ್ಷೆರ್ ವಿಶ್ವನಾಥ ಶೆಟ್ಟಿ ಪಂಜದ ಗುತ್ತು, ಸದಾನಂದ ಶೆಟ್ಟಿ ಪಂಜ, ಸತೀಶ್ ಜೆ.ಶೆಟ್ಟಿ ಪಂಜದ ಗುತ್ತು, ಸತೀಶ್ ಎಂ ಶೆಟ್ಟಿ ಬೈಲ ಗುತ್ತು,  ನವೀನ್ ಶೆಟ್ಟಿ ನಲ್ಯ ಗುತ್ತು, ಸುರೇಶ್ ಪಂಜ ಪಂಚಾಯತ್ ಸದಸ್ಯೆರೆಗ್  ಸನ್ಮಾನ ಮಲ್ತೆರ್. ಈ ಪೊರ್ತುಡು ಒಕ್ಕೂಟದ ಉಪ ವ್ಯವಸ್ಥಾಪಕೆರ್ ಡಾ. ಚಂದ್ರಶೇಖರ್ ಭಟ್ ಪೇರ್ ದ ಗುಣಮಟ್ಟನ್ ಕಾಪಾಡಿಯೆರೆ ಪೆತ್ತಲೆನ ನಿರ್ವಹಣೆದ ಬಗೆಟ್ಟ್ ಪೊಲಬು ಕೊರಿಯೆರ್. ಒಕ್ಕೂಟದ ವಿಸ್ತರಣ ಅಧಿಕಾರಿಯಾದ್ ಸಂದೀಪ್ ಮೇರ್ ಸಂಘಗ್ ಪೇರ್ ದ ಗುಣಮಟ್ಟದ ಪೊಲಬು ಕೊರಿಯೆರ್.  ಈ ಸಭೆಟ್ಟ್ ಉಪಾಧ್ಯಕ್ಷೆರ್ ಜಗನ್ನಾಥ್ ದೇವಾಡಿಗ, ನಿರ್ದೇಶಕೆರ್ ವಸಂತ ಶೆಟ್ಟಿ, ಚಂದ್ರಹಾಸ್ ಶೆಟ್ಟಿ, ಸತೀಶ್ ಶೆಟ್ಟಿ, ಸತೀಶ್ ಜೆ ಶೆಟ್ಟಿ, ರಾಜೇಶ್ ಶೆಟ್ಟಿ,  ಮೀರಾ, ಶಾರದ ದೇವಾಡಿಗ,  ಶೀಲಾ ಜೆ ಕೋಟ್ಯಾನ್ ಪಾಲ್ ಪಡೆದಿತ್ತೆರ್. ಅಧ್ಯಕ್ಷೆರ್ ನವೀನ್ ಶೆಟ್ಟಿ ಎದ್ಕೊನಿಯೆರ್. ಕಾರ್ಯದರ್ಶಿ ಜಗದೀಶ್ ಶೆಟ್ಟಿ ಸೊಲ್ಮೆ ಸಂದಾಯೆರ್. ಸತೀಶ್ ಎಂ ಶೆಟ್ಟಿ ಈ ಲೇಸ್ ದ ಸುಧಾರಿಕೆ ಮಲ್ತೆರ್.

ಧರ್ಮಸ್ಥಳದ ಬಗ್ಗೆ ಬೊರ್ಚಾಂದಿನ ಹೇಳಿಕೆ ಕೊರಂದಿಲಕ ಮಹೇಶ್ ಶೆಟ್ಟಿ ತಿಮರೋಡಿಗ್ ಹೈಕೋರ್ಟ್ ಆದೇಶ

ಸೌಜನ್ಯನ ಕೇಸ್ ಡ್ ಮಹೇಶ್ ಶೆಟ್ಟಿ ತಿಮರೋಡಿ ಧರ್ಮಸ್ಥಳದ ವಿರುದ್ಧ ಬೊರ್ಚಾಂದಿನ ಹೇಳಿಕೆ ಕೊರೊಂದುಲ್ಲೆರ್ ಪಂದ್ ಹೆಗ್ಗಡೆ ಕುಟುಂಬದಕುಲು ಹೈಕೋರ್ಟ್ ಗ್ ಮನವಿ ಸಲ್ಲಿಸಾದಿತ್ತೆರ್. ಪ್ರಕರಣದ ವಿಚಾರಣೆ ಮಲ್ತಿನ ಹೈಕೋರ್ಟ್ ಮಹೇಶ್ ಶೆಟ್ಟಿಗ್ ಖಡಕ್ ಎಚ್ಚರಿಕೆ ಕೊರ್ತೆರ್.

ಧರ್ಮಸ್ಥಳದ ವಿರುದ್ಧ ಬೊರ್ಚಾಂದಿನ ಹೇಳಿಕೆ ಕೊರಿಯೆರೆ ಬಲ್ಲಿ, ಒಂಜಿ ವೇಳೆ ಸುಲ್ಲು ಆರೋಪ ಮಲ್ತ್ಂಡ ಡಿ.ಜಿ ಬೊಕ್ಕ ಐ.ಜಿ, ಅಂಚನೆ ಸರಕಾರದ ಮುಖ್ಯ ಕಾರ್ಯದರ್ಶಿ, ದ.ಕ ಜಿಲ್ಲಾ ಪೊಲೀಸ್ ವರಿಷ್ಟಾಧಿಕಾರಿ ಸೇರಿನಂಚ ಪೊಲೀಸ್ ಉನ್ನತ ಅಧಿಕಾರಿಲೆಗ್ ಸೂಕ್ತ ಕ್ರಮ ದೆತೊನಿಯೆರೆ ಹೈಕೋರ್ಟ್ ಆದೇಶ ಕೊರ್ತುಂಡು.

ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಬೊಕ್ಕ ಹೆಗ್ಗಡೆ ಕುಟುಂಬದಕ್ಲೆನ ಪರವಾದ್ ಹಿರಿಯ ವಕೀಲೆರ್ ಉದಯ ಹೊಳ್ಳ ಬೊಕ್ಕ ಚಂದ್ರಶೇಖರ್ ಹಿಲ್ಯಾರ್ ವಾದ ಮಲ್ತ್ ದೆರ್.

ಶಿಕ್ಷಣರ್ದ್ ಪಗೆಮಾನಿ ಆವರೆ ಬಲ್ಲಿ, ವಿಶ್ವಮಾನವೆರಾವೊಡು: ಬಿ.ಕೆ.ಹರಿಪ್ರಸಾದ್

ಮುಲ್ಕಿ : ಶಿಕ್ಷಣಡ್ ಪಗೆಮಾನಿಲಾವರೆ ಬಲ್ಲಿ, ಕಿಚ್ಚಿ ಮಚ್ಚರ ಪುಟ್ಟರೆ ಬಲ್ಲಿ.ಶಿಕ್ಷಣೊರ್ದು ಮೆಗ್ಯೆ ಪಲಯೆ ಪನ್ಪಿನ ಭಾವನೆ ಪುಟ್ಟೊಡು. ಕುವೆಂಪು ಪನ್ತಿಲೆಕ ನಮ ಮಾತ ಸಹೋದರತ್ವದ ಮುಕೇನ ವಿಶ್ವಮಾನವೆರಾವೊಡು.ಮೂಢನಂಬಿಕೆನ್ ಮೀರ್ ದ್ ಬುಳೆಬೊಡು ಪಂದ್ ವಿಧಾನ ಪರಿಷತ್ ಸದಸ್ಯೆರ್ ಬಿ.ಕೆ.ಹರಿಪ್ರಸಾದ್ ಪಂಡೆರ್.

ಆರ್ ದಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಬಿಲ್ಲವ ಸಮಾಜ ಸೇವಾ ಸಂಘ (ರಿ) ಮುಲ್ಕಿ ನೆತ್ತ ನಿರೆಲ್ಡ್ ಗುರುವಾರ ನಡತಿನ ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ 169 ನೇ ಜಯಂತಿ ದ ಆಚರಣೆ ಅಂಚೆನೆ ಎನ್ ಆರ್ ಮೂಲ್ಕಿ ನೆಂಪುದ ಪ್ರಶಸ್ತಿ ಬೊಕ್ಕ ವಿದ್ಯಾರ್ಥಿ ವೇತನ ಪಟ್ಟುನ ಲೇಸ್ ಡ್ ಉನ್ನತ ಶಿಕ್ಷಣ ವಿದ್ಯಾರ್ಥಿ ವೇತನ ಪಟ್ ದ್ ಪಾತೆರಿಯೆರ್.

ಮುಲ್ಕಿ ಬೆದ್ರದ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಾತೆರ್ದ್, ಇನಿ ದೇಶಡ್ ಮಾತ್ರ ಅತ್ತಾಂದೆ ಪರದೇಶೊಡ್ಲ ನಾರಾಯಣ ಗುರು ಜಯಂತಿ ಆಚರಣೆ ಮಲ್ಪುವೆರ್. ಮುಲ್ಕಿ ಬಿಲ್ಲವ ಸಂಘ ಇಡೀ ತುಳುನಾಡ್ ದ ಸಂಘೊಲೆಗ್ ಅಪ್ಪೆನ ತಾನೊಡು ಉಂಡು.ಯಾನ್ ಮಾತ ಜಾತಿದ ಸಮುದಾಯ ಭವನೊಗ್ ಲ ಸರ್ಕಾರೊರ್ದು ತಿಕ್ಕುನ ಮಾತ ಅನುದಾನೊನು ಪ್ರಾಮಾಣಿಕವಾದ್ ಪಟ್ ದ್ ಕೊರ್ಪೆ ಪಂಡೆರ್.

ಸರ್ಕಾರಿ ಪದವಿ ಪೂರ್ವ ಕಾಲೇಜಿದ ಪ್ರಿನ್ಸಿಪಾಲ್ ಡಾ.ವಾಸುದೇವ ಬೆಳ್ಳೆ ಪಾತೆರ್ದ್,ಇದ ಮುಟ್ಟ ನಾರಾಯಣ ಗುರುಕ್ಲೆನ ಕೆಲವೇ ತತ್ವ, ವಿಚಾರಲೆನ ಚಿಂತನೆ, ಅನುಷ್ಠಾನ ಆತ್ಂಡ್. ಗುರುಕ್ಲೆನ ಬಗೆಟ್ಟ್ ನನಾತ್ ಆಳವಾದ್ ಅಧ್ಯಯನ ಆವೊಡು. ಅಪಗ ಮಾತ್ರ ನಮ ನಾರಾಯಣ ಗುರುಕ್ಲೆನ್ ಸಂಪೂರ್ಣ ವಾದ್ ಅರ್ಥ ಮಲ್ತೊನರೆ ಸಾಧ್ಯ ಪಂಡೆರ್.

ಈ ಪೊರ್ತುಡು ಎಸ್ಸೆಸ್ಸೆಲ್ಸಿ ಟಾಪರ್ ಮಿಥುನ್ ಸಿ.ಅಂಚನ್, ಪಿಯುಸಿ ಟಾಪರ್ ಶಾಶ್ವತ್ ಬಿ.ಕರ್ಕೇರ ವಾಣಿಜ್ಯ ವಿಭಾಗದ ಟಾಪರ್
ಸುಚೇತಾ ಡಿ., ಸನಿತ್ ಪೂಜಾರಿ ಮೊಕ್ಲೆಗ್ ಎನ್.ಆರ್. ಮುಲ್ಕಿ ನೆಂಪುದ ಪ್ರಶಸ್ತಿ ಬೊಕ್ಕ ವಿದ್ಯಾನಿಧಿ ಕೊರ್ದು ಮಾನಾದಿಗೆ ಮಲ್ತೆರ್.
ಅವ್ವತ್ತಾಂದೆ ಸಂಘದ ಲೆಕ್ಕೊಡು ಎಸ್ಸೆಸ್ಸೆಲ್ಸಿಡ್ ಸಾಧಕ ವಿದ್ಯಾರ್ಥಿ ಲಾಯಿನ ವರುಣ್ ಎ ಕೋಟ್ಯಾನ್, ಭುವನ್ ಕೆ. ಶಾಂತಿ, ಪ್ರತೀಕ್ ಆರ್ ಸಾಲ್ಯಾನ್ ಕೊಳಚಿಕಂಬಳ,ಪಿಯುಸಿ ವಿಭಾಗಡ್ ವೈಷ್ಣವಿ ಕೆ ಸಾಲ್ಯಾನ್, ದಿಶಾ ಮಾನಂಪಾಡಿ, ಶ್ರಾವ್ಯ ಡಿ. ಬಂಗೇರ, ಸಾಹಿತ್ಯ ಕೊಲೆಕಾಡಿ, ಸೌರಕ್ಷಿಣಿ ಶಿಮಂತೂರು, ಅಭಿಕ್ಷಾ ಶಿಮಂತೂರು, ಅನೀಷ್ ಎ. ಸುವರ್ಣ ಕುಬೆವೂರು, ಶಾಶ್ವತ್ ಬಿ.ಕರ್ಕೇರ ಮೊಕ್ಲೆಗ್ ವಿದ್ಯಾರ್ಥಿ ವೇತನ ಪಟ್ ದ್ ಮಾನಾದಿಗೆ ಮಲ್ತೆರ್. ಸಂಘದ ಲೆಕ್ಕೊಡು ಈ ವರ್ಷ ಒಟ್ಟು 8 ಲಕ್ಷ ರೂ. ಬಿಲೆತ್ತ ಪುಸ್ತಕ ಬೊಕ್ಕ ವಿದ್ಯಾರ್ಥಿ ವೇತನ ಪಟ್ಟ್ ದೆರ್. ನಾರಾಯಣ ಗುರು ಜಯಂತಿದ ನಿಲೆಟ್ಟ್ ಶಾಲೆದ ಜೋಕುಲೆಗಾದ್ ಮಲ್ದಿನ ಬೇತೆ ಬೇತೆ ಪಂತೊಲೆಡ್ ಗೆಂದಿನಕ್ಲೆಗ್ ಇನಾಮು ಪಟ್ಟುನ ಲೇಸ್ ನಡತ್ಂಡ್.

ಮಿತ್ತರ್ಮೆಡ್ ಎನ್. ಆರ್ ಮುಲ್ಕಿ ನೆಂಪುದ ವಿದ್ಯಾರ್ಥಿವೇತನ ಕೊರ್ತಿನ ಉದ್ಯಮಿ ಶಶಿಧರ್ ಕೋಟ್ಯಾನ್, ನಾರಾಯಣ ಗುರು ಸೇವಾರ್ಥಿ ಸಹದೇವ ಕೋಟ್ಯಾನ್, ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಹರ್ಷರಾಜ್ ಶೆಟ್ಟಿ, ಮುಲ್ಕಿ ಬಿಲ್ಲವ ಸಂಘದ ಮಾಜಿ ಅಧ್ಯಕ್ಷೆರ್ ರಮೇಶ್ ಅಮೀನ್ ಕೊಕ್ಕರ್ ಕಲ್, ಬಿಲ್ಲವ ಮಹಿಳಾ ಮಂಡಳಿದ ಅಧ್ಯಕ್ಷೆರ್ ಶಶಿಕಲಾ ಯದೀಶ್ ಅಮೀನ್, ಸೇವಾದಳತ್ತ ಮುಖ್ಯಸ್ಥೆರ್ ಶಂಕರ್ ಪಡುಬೈಲ್ ಇತ್ತೆರ್.

ಮುಲ್ಕಿ ಬಿಲ್ಲವ ಸಮಾಜ ಸೇವಾಸಂಘದ ಅಧ್ಯಕ್ಷೆರ್ ಪ್ರಕಾಶ್ ಸುವರ್ಣ ಬಿನ್ನೆರೆನ್ ಸ್ವಾಗತ ಮಲ್ತೆರ್. ಪ್ರಧಾನ ಕಾರ್ಯದರ್ಶಿ ಜಯ ಕುಮಾರ್ ದೇವೆರೆನ್ ಸುಗಿತೆರ್. ನರೇಂದ್ರ ಕೆರೆಕಾಡು ಲೇಸ್ ನಡಪಾದ್ ಕೊರಿಯೆರ್.

ಬೋಲ್ತೆರ್: ನಗರ ಬೊಕ್ಕ ಗ್ರಾಮೀಣ ಬ್ಲಾಕ್ ಕಾಂಗ್ರೆಸ್ ಕಚೇರಿಡ್ ಗುರುಜಯಂತಿ ಲೇಸ್

ಬೋಲ್ತೆರ್: ಬ್ಲಾಕ್ ಕಾಂಗ್ರೆಸ್ ಸಮಿತಿ ನಗರ ಬೊಕ್ಕ ಗ್ರಾಮೀಣ ಸಮಿತಿರ್ದ್ ಬ್ರಹ್ಮಶ್ರೀ ನಾರಾಯಣ ಗುರುಕುಲ್‌ನ 169ನೇ ಪುಟ್ಟು ದಿನತ ಪ್ರಯುಕ್ತ ಗುರುಜಯಂತಿನ್ ಆ.31 ಗುರುವಾರ ದಾನಿ ಬೊಲ್ತೇರ್ ಸಂತೆಕಟ್ಟೆದ ಬ್ಲಾಕ್ ಕಾಂಗ್ರೆಸ್ ಕಚೇರಿಡ್ ಆಚರಣೆ ಮಲ್ತೆರ್.

ಈ ಪೊರ್ತುಡು ಪೀತಾಂಬರ ಹೇರಾಜೆ, ವಕೀಲೆರಾಯಿನ ಭಗೀರಥ ಜಿ, ಕಾನೂನು ಸಲಹೆಗಾರ ವಕೀಲೆರಾಯಿನ ಸಂತೋಷ್, ಡಿ.ಸಿ.ಸಿ ಸದಸ್ಯೆರ್ ಸೆಬಾಸ್ಟಿಯನ್, ಮಾಜಿ ಉಜಿರೆ ಜಿ.ಪಂ ಸದಸ್ಯೆ ನಮಿತಾ, ಬ್ಲಾಕ್ ಕಾಂಗ್ರೆಸ್ ನಗರದ ಗುರ್ಕಾರೆ ಸತೀಶ್ ಕೆ. ಬಂಗೇರ ಕಾಶಿಪಟ್ಣ, ಬ್ಲಾಕ್ ಕಾಂಗ್ರೆಸ್ ಗ್ರಾಮೀಣ ಸಮಿತಿದ ಗುರ್ಕಾರೆ ಕೆ.ಎಂ ನಾಗೇಶ್ ಕುಮಾರ್ ಗೌಡ ಪಾಲ್ ಪಡೆದಿತ್ತೆರ್.

You Missed