Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಪರಿಸರ, ಸಮಾಜ ದೇಶದ ರಕ್ಷಣೆದ ಸಂಕಲ್ಪ ಮಲ್ತಿನ ಶಕ್ತಿನಗರ ಶಕ್ತಿ ವಿದ್ಯಾಸಂಸ್ಥೆದ ಕಲ್ಪಾರ್ಥಿಲು

ಕುಡ್ಲ: ಪುರಾಣ ಕಾಲರ್ದಿಂಚಲ ರಕ್ಷಾಬಂಧನಗ್ ವಿಶಿಷ್ಟ ಮಹತ್ವ ಉಂಡು. ಭಾರತದ ಇತಿಹಾಸಡ್ ರಕ್ಷಾಬಂಧನದ ಉಲ್ಲೇಖಲು ಉಂಡು. ಸಂಘಲು ಸಮಾಜದ ಹಿತಕ್ಕಾದ್ ಬೊಕ್ಕ ಕಲ್ಪಾರ್ಥಿಲೆನ ಸರ್ವತೋಮುಖ ಅಭಿವೃದ್ಧಿಗ್ ಪೂರಕ ಆತ್ಂಡ್  ಪಂದ್ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸಹಪ್ರಾಂತ ಪ್ರಚಾರಕ್ ನಂದೀಶ್ ಪಂಡೆರ್.

ಶಕ್ತಿನಗರದ ಶಕ್ತಿ ವಿದ್ಯಾಸಂಸ್ಥೆಡ್ ಬುಧಾರ ನಡತಿನ ರಕ್ಷಾಬಂಧನ ಲೇಸ್ ಬೌದ್ಧಿಕ್ ಪಾತೆರ್ದ್, ಅಲೆಕ್ಸಾಂಡರ್ ನ್ ಸೋಪಾಯಿನ ರಾಜಾ ಪುರೂರಗ್ ಅಲೆಕ್ಸಾಂಡರ್ ನ ಬೊಡೆದಿ ರಕ್ಷೆ ಕಟ್ಟ್ ದ್ ತನ್ನ ಕಂಡನಿನ ಜೂವ ಒರಿಪಾಯಿನ ಘಟನೆ ಇತಿಹಾಸಡ್ ಉಲ್ಲೇಖ ಆತ್ಂಡ್. ಪರಿಸರ, ಸಮಾಜ ಬೊಕ್ಕ ದೇಶದ ರಕ್ಷಣೆ ಈ ರಕ್ಷಾಬಂಧನದ ಮೂಲ ಉದ್ದೇಶ ಆತ್ಂಡ್ ಪಂದ್ ಪೊಲಬು ಕೊರಿಯೆರ್.

ಕಲ್ಪಾರ್ಥಿಲು ರಾಕಿ ಕಟ್ಟ್ ದ್ ದೇಶ ರಕ್ಷಣೆದ ಸಂಕಲ್ಪ ಮಲ್ತೆರ್. ಶಿಕ್ಷಕಿಯೆರ್ ಗಣ್ಯೆರೆಗ್ ರಾಕಿ ಕಟ್ಟುನ ಮುಖೇನ ಲೇಸ್ ದ ಉದಿಪನ ಮಲ್ತೆರ್. ಕಲ್ಪಾರ್ಥಿಲು, ಶಿಕ್ಷಕೆರ್ ಬೊಕ್ಕ ಶಿಕ್ಷಕೇತರ ಸಿಬ್ಬಂದಿಲು ರಾಕಿ ಕಟ್ಟೊಂಡೆರ್. ಸಂಸ್ಥೆದ ಸಂಸ್ಥಾಪಕೆರ್ ಡಾ.ಕೆ.ಸಿ ನಾಯಕ್ ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊಂದಿತ್ತೆರ್.

ಈ ಪೊರ್ತುಡು ಪ್ರಧಾನ ಸಲಹೆಗಾರೆ ರಮೇಶ್ ಕೆ, ಶಕ್ತಿ ಪದವಿಪೂರ್ವ ಕಾಲೇಜ್ ಪ್ರಾಂಶುಪಾಲೆರ್ ವೆಂಕಟೇಶಮೂರ್ತಿ, ವಸತಿ ಶಾಲೆದ ಪ್ರಾಂಶುಪಾಲೆರ್ ರವಿಶಂಕರ್ ಹೆಗಡೆ ಪಾಲ್ ಪಡೆದಿತ್ತೆರ್. ಕನ್ನಡ ಉಪನ್ಯಾಸಕೆರ್ ಶರಣಪ್ಪ ಲೇಸ್ ನ್ ಸುಧಾರಿಕೆ ಮಲ್ತೆರ್.

ಸೆ.3-21: ಬಂಟರ ಯಾನೆ ನಾಡವರ ಮಾತೃಸಂಘರ್ದ್ ಚೌತಿದ ಗೌಜಿ: ಅಜಿತ್ ಕುಮಾರ್ ರೈ ಮಾಲಾಡಿ

ಬಂಟ ಕಲಾ ಸಂಭ್ರಮ, ಬಂಟ ಗೊಬ್ಬುದ ಪಂತೊ, ಕುರಲ್ ಪರ್ಬ, ವಿಚಾರಗೋಷ್ಠಿ, ಧಾರ್ಮಿಕ ಸಭೆ, ಸಾಧಕೆರೆಗ್ ಸನ್ಮಾನ

ಕುಡ್ಲ: ಈ ವರ್ಷೊದ ಸಾರ್ವಜನಿಕ ಗಣೇಶೋತ್ಸವ ಬಂಟರ ಯಾನೆ ನಾಡವರ ಮಾತೃ ಸಂಘದ ಓಂಕಾರ ನಗರಡ್, ಮಾತೃಸಂಘ, ಸಿದ್ಧಿವಿನಾಯಕ ಪ್ರತಿಷ್ಠಾನ ಕುಡ್ಲ, ಒಡಿಪು ಬೊಕ್ಕ ಕಾಸ್ರೋಡು ಜಿಲ್ಲೆದ ಮಾತ ಬಂಟೆರ್ ನ ಸಂಘಲೆನ ಒಟ್ಟುಸೇರಿಗೆಡ್ ನಡಪರೆ ಉಂಡು.

ಸೆ.3 ಐತಾರ ಬೊಲ್ಪುರ್ದ್ ಇಡೀ ದಿನ ಬಂಟ ಕಲಾ ಸಂಭ್ರಮ ಲೇಸ್ ನಡಪರೆ ಉಂಡು. ಮೂಜಿ ಜಿಲ್ಲೆದ ಸುಮಾರ್ 18 ಪ್ರಮುಖ ಕೂಟೊಲು ಪಾಲ್ ಪಡೆಯೆರೆ ಉಂಡು. ಒಂಜೊಂಜಿ ಕೂಟಡ್ ಕಮ್ಮಿಡ್ಲಾ 25 ಕಲಾವಿದೆರ್ ಪಾಲ್ ಪಡೆಯೆರೆ ಉಲ್ಲೆರ್‌ ಪಂದ್ ಬಂಟರ ಯಾನೆ ನಾಡವರ ಮಾತೃಸಂಘದ ಅಧ್ಯಕ್ಷೆರ್ ಬೊಕ್ಕ ಸಿದ್ಧಿ ವಿನಾಯಕ ಪ್ರತಿಷ್ಠಾನದ ಮ್ಯಾನೆಜಿಂಗ್ ಟ್ರಸ್ಟಿ ಅಜಿತ್ ಕುಮಾರ್ ರೈ ಮಾಲಾಡಿ ಮೇರ್ ಪತ್ರಿಕಾಗೋಷ್ಠಿಡ್ ತೆರಿಪಾದೆರ್.

ಭಾರತ ದರ್ಶನ ಪುದರ್ ಡ್ ಬೇತೆ ಬೇತೆ ಸಾಂಸ್ಕೃತಿಕ ಲೇಸ್ ಲು ನಡಪರೆ ಉಂಡು. ಈ ಲೇಸ್ ಡ್ ನಮ್ಮ ದೇಶದ ಕಲೆ, ಜನಪದ, ಜನಜೀವನ ಬೊಕ್ಕ ಸಂಸ್ಕೃತಿನ್ ತೂಪಾವುನ ಲೇಸ್ ನಡಪರೆ ಉಂಡು. ಅಂಚೆನೆ ಈ ಪಂತೊಡು ಗೆಂದಿನಕ್ಲೆಗ್ ಇನಾಮುನ್ ಕೊರಿಯೆರೆ ಉಲ್ಲೆರ್.

ಸೆ.10 ಐತಾರ ಬೊಲ್ಪುಗು 8 ಗಂಟೆರ್ದ್ ಇಡೀ ದಿನ ಬಂಟ ಗೊಬ್ಬುದ ಪಂತೊ ನಡಪರೆ ಉಂಡು. ಈ ಗೊಬ್ಬುದ ಪಂತೊಡು 3 ಜಿಲ್ಲೆದ ಬಂಟ ಕ್ರೀಡಾ ಪಟುಲು ಬೊಕ್ಕ, ಕ್ರೀಡಾ ಕೂಟೊಲು ಪಾಲ್ ಪಡೆಯೆರೆ ಉಲ್ಲ. ವಾಲಿಬಾಲ್, ತ್ರೋಬಾಲ್, ಬಲ್ಲ್ ಒಯಿಪುನ ಮಾತ್ರ ಅತ್ತಂದೆ ಬೇತೆ ಬೇತೆ ಗೊಬ್ಬುದ ಪಂತೊಲು 3 ವರ್ಷೊರ್ದ್ 90 ವರ್ಷದಕ್ಲೆನ ಮುಟ್ಟ ನಡಪರೆ ಉಂಡು.

ಗಣೇಶೋತ್ಸವ ಸಮಿತಿದ ಸಂಚಾಲಕೆರ್ ಬಿ. ನಾಗರಾಜ ಶೆಟ್ಟಿ ಮೇರ್ ಪಾತೆರ್ದ್, ಸೆ.18 ಸೋಮಾರ ಮಧ್ಯಾಹ್ನ ರಾಧಾಕೃಷ್ಣ ಮಂದಿರ (ಬಾಳಂ ಭಟ್ರೆನ ಇಲ್ಲ) ರ್ದ್ ಗಣಪತಿನ ವಿಗ್ರಹನ್ ಮೆರವಣಿಗೆದ ಮುಖೇನ ಓಂಕಾರ ನಗರಗ್ ಕನಯೆರೆ ಉಂಡು ಪಂದ್ ಪಂಡೆರ್.

ಸೆ.19 ಅಂಗಾರೆ ಬೊಲ್ಪುಗು ಗಣಪತಿ ವಿಗ್ರಹದ ಪ್ರತಿಷ್ಠಾಪನೆ ನಡಪರೆ ಉಂಡು. ಬೊಕ್ಕ ಕುರಲ್ ಪಟ್ಟುನ ಲೇಸ್ ನಡಪುಂಡು. ಈ ಲೇಸ್ ಡ್ ಸಮಾಜದ ಹಿರಿಯೆರ್ ಕೊಡಿ ರಾಪಾದ್ ಲೇಸ್ ದ ಉದಿಪನ ಮಲ್ತ್ ದ್ ಕುರಲ್ ಪಟ್ಟುವೆರ್. ಬಯ್ಯಗ್ ಧಾರ್ಮಿಕ ಸಭೆ ನಡಪರೆ ಉಂಡು. ನೆಟ್ಟ್ ಬೇತೆ ಬೇತೆ ಕ್ಷೇತ್ರದ ಗಣ್ಯೆರ್ ಪಾಲ್ ಪಡೆಯೆರೆ ಉಲ್ಲೆರ್. ‌

ಸೆ.20 ಕ್ಕ್ ಬೊಲ್ಪುಗು ಧಾರ್ಮಿಕ ಗೋಷ್ಠಿ ಬೊಕ್ಕ ಧಾರ್ಮಿಕ ಸನ್ಮಾನ ಲೇಸ್ ನಡಪರೆ ಉಂಡು. ಧಾರ್ಮಿಕ ಗೋಷ್ಠಿಡ್ ಮೂಜಿ ಜಿಲ್ಲೆದ ಧಾರ್ಮಿಕ ವಿಧಿವಿಧಾನಲು ನಡಪುಂಡು, ಬೊಕ್ಕ ದೇವಲ್ಯದ ಆಡಳಿತ ಶೈಲಿದ ಬಗೆಟ್ಟ್ ಧಾರ್ಮಿಕ ಪಂಡಿತೆರ್ ವಿಚಾರ ಮಂಡಿಸಾವೆರ್. ಧಾರ್ಮಿಕ ಬೊಕ್ಕ ಜನಪದ ಕ್ಷೇತ್ರದ ಹಿರಿಯೆರ್ ಸಮನ್ವಯಕಾರೆರಾದ್ ಲೇಸ್ ನ್ ನಡಪಾದ್ ಕೊರ್ಪೆರ್. ಸುಮಾರ್ 200 ರ್ದ್ ಎಚ್ಚ ಕುಡ್ಲ, ಒಡಿಪು, ಕಾಸ್ರೋಡು ಜಿಲ್ಲೆದ ಬೇತೆ ಬೇತೆ ಪ್ರಮುಖ ದೇವಲ್ಯದ ಬಂಟ ಆಡಳಿತ ಮೊಕ್ತೇಸೆರೆಗ್ ಬೊಕ್ಕ ಧಾರ್ಮಿಕ ದತ್ತಿ ಇಲಾಖೆದ ಬೇತೆ ಬೇತೆ ದೇವಲ್ಯದ ವ್ಯವಸ್ಥಾಪನ ಸಮಿತಿದ ಬಂಟ ಅಧ್ಯಕ್ಷೆರೆಗ್ ಸನ್ಮಾನ ಮಲ್ಪರೆ ಉಲ್ಲೆರ್. ಬಯ್ಯಗ್ ಧಾರ್ಮಿಕ ಸಭೆ ನಡಪರೆ ಉಂಡು. ನೆಟ್ಟ್ ಬೇತೆ ಬೇತೆ ಕ್ಷೇತ್ರದ ಗಣ್ಯೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಸೆ.21 ಕ್ಕ್ ಬೊಲ್ಪುಗು ಸಹಸ್ರನಾರಿಕೇಳ ಗಣಯಾಗ ನಡಪರೆ ಉಂಡು. ಮಧ್ಯಾಹ್ನ ಸಾರ್ವಜನಿಕ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು. ಬಯ್ಯಗ್ ಸಾಮೂಹಿಕ ರಂಗಪೂಜೆ ನಡಪುಂಡು. ಬೊಕ್ಕ 4 ಗಂಟೆಗ್ ನಡಪುನ ಗಣಪತಿ ವಿಗ್ರಹದ ವಿಸರ್ಜನಾ ಮೆರವಣಿಗೆಗ್ ಸಮಾಜದ ಹಿರಿಯೆರ್ ಚಾಲನೆ ಕೊರ್ಪೆರ್. ಮೆರವಣಿಗೆ ವಠಾರದ ಪ್ರಮುಖ ಮಾರ್ಗೊಡು ಪೋಯೆರೆ ಉಂಡು. ನೆಟ್ಟ್ ತುಳುನಾಡ್ ದ ಪ್ರಮುಖ ಭಜನೆ ಕೂಟೊಲು ಪಾಲ್ ಪಡೆಯೆರೆ ಉಲ್ಲೆರ್. ಈ ಪೊರ್ಲುದ ಮೆರವಣಿಗೆಡ್ ಸಮಾಜ ಬಾಂಧವೆರ್ ಸಾರರ್ದ್ ಎಚ್ಚ ಸಂಖ್ಯೆಡ್ ಪಾಲ್ ಪಡೆವೊಡು ಪಂದ್ ಬಿನ್ನಾಪು ಮಲ್ದೆರ್.

ಪತ್ರಿಕಾಗೋಷ್ಠಿಡ್ ಬಂಟರ ಯಾನೆ ನಾಡವರ ಮಾತೃ ಸಂಘದ ಉಪಾಧ್ಯಕ್ಷೆರ್ ಹೇಮನಾಥ ಶೆಟ್ಟಿ ಕಾವು, ಪ್ರಧಾನ ಕಾರ್ಯದರ್ಶಿ ಕೆ.ಎಂ. ಶೆಟ್ಟಿ, ಸಿಎ., ಕೋಶಾಧಿಕಾರಿ ರಾಮ್‌ಮೋಹನ್ ರೈ, ಜತೆ ಕಾರ್ಯದರ್ಶಿ ಸಂಜೀವ ಶೆಟ್ಟಿ ಸಂಪಿಗೇಡಿ, ಸಿದ್ಧಿವಿನಾಯಕ ಪ್ರತಿಷ್ಠಾನದ ಟ್ರಸ್ಟಿಲು ರವಿರಾಜ್ ಶೆಟ್ಟಿ, ಕೃಷ್ಣ ಪ್ರಸಾದ್ ರೈ ಬೆಳ್ಳಿಪ್ಪಾಡಿ, ಡಾ.ಆಶಾಜ್ಯೋತಿ ರೈ, ಉದಯ ಕುಮಾರ್ ಶೆಟ್ಟಿ, ಸಂಜೀವ ಶೆಟ್ಟಿ, ಸುಧಾಕರ ಪೂಂಜ, ಪ್ರೇಮಾನಂದ ಶೆಟ್ಟಿ, ಸಿಎ. ಸುದೇಶ್ ರೈ, ಭಾರತಿ ಜಿ. ಶೆಟ್ಟಿ, ಅರುಣಾ ಶೆಟ್ಟಿ ಬೊಕ್ಕ ಉಲ್ಲಾಸ್ ಶೆಟ್ಟಿ ಸೇರಿನಂಚೆನೆ ಬೇತೆ ಬೇತೆ ಉಪ ಸಮಿತಿದ ಸಂಚಾಲಕೆರ್ ಪಾಲ್ ಪಡೆದಿತ್ತೆರ್.

ಕನ್ಯಾಡಿ ಶ್ರೀ ಗುರುದೇವ ಮಠಟ್ ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿ

ಬೋಲ್ತೆರ್: ರಾಷ್ಟ್ರೀಯ ಪರ್ಬ ಬೊಕ್ಕ ಮಹಾಪುರುಷರ ಜಯಂತಿ ಆಚರಣೆ ತಾಲೂಕು ಸಮಿತಿ ಮುತಾಲಿಕೆಡ್ ಕಲ್ಮಂಜದ ಕನ್ಯಾಡಿದ ಶ್ರೀ ಗುರುದೇವ ಮಠಟ್ ಆ.31 ಗುರುವಾರ ದಾನಿ ಬ್ರಹ್ಮಶ್ರೀ ನಾರಾಯಣ ಗುರು ಜಯಂತಿನ್ ಸದ್ಗುರು ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿನ ದಿವ್ಯ ಉಪಸ್ಥಿತಿಟ್ ನಡತ್‌ಂಡ್.

ಶಾಸಕೆ ಹರೀಶ್ ಪೂಂಜೆರ್ ಲೇಸ್ ದ ಉದಿಪನ ಮಲ್ತೆರ್. ತಹಶೀಲ್ದಾರ್ ಟಿ.ಸುರೇಶ್ ಕುಮಾರ್ ಗುರ್ಕಾಮೆನ್ ವಹಿಸಾದ್ ಇತ್ತೆರ್. ಪೃಥ್ವಿಸ್ ಧರ್ಮಸ್ಥಳ ಈ ದಿನತ ಮಹತ್ವದ ಬಗ್ಗೆ ಪಾತೆರಿಯೆರ್.

ಚಾವಡಿಡ್ ಸರ್ಕಲ್ ಇನ್ಸ್ ಪೆಕ್ಟರ್ ನಾಗೇಶ್ ಕದ್ರಿ, ಚಾತುರ್ಮಾಸ್ಯ ಸಮಿತಿದ ಗುರ್ಕಾರೆರ್ ಜಯಂತ್ ಕೋಟ್ಯಾನ್, ನ.ಪಂ ಮುಖ್ಯಾಧಿಕಾರಿ ರಾಜೇಶ್, ಎ.ಡಿ.ಎಲ್ ಆರ್ ರೇಣುಕಾ ಪ್ರಸಾದ್, ಚಾತುರ್ಮಾಸ್ಯ ಸಮಿತಿದ ಸದಾನಂದ ಪೂಜಾರಿ, ಸಹಕಾರಿ ಅಭಿವೃದ್ದಿ ಅಧಿಕಾರಿ ಸುಪ್ರತಿ ಈ ಪೊರ್ತುಡು ಇತ್ತೆರ್.

ಬೋಲ್ತೆರ್: ಶ್ರೀ ಗುರುನಾರಾಯಣ ಸ್ವಾಮಿ ಸಂಘಡ್ ನಾರಾಯಣಗುರು ಜಯಂತಿ ಲೇಸ್

ಬೋಲ್ತೆರ್: ಶ್ರೀ ಗುರುನಾರಾಯಣ ಸ್ವಾಮಿ ಸೇವಾ ಸಂಘ ಬೋಲ್ತೆರ್, ಯುವ ಬಿಲ್ಲವ ವೇದಿಕೆ, ಬಿಲ್ಲವ ಮಹಿಳಾ ವೇದಿಕೆದ ಒಟ್ಟು ಸೇರಿಗೆಡ್ ಬ್ರಹ್ಮಶ್ರೀ ನಾರಾಯಣ ಗುರುಕುಲ್ ನ 169ನೇ ಗುರು ಜಯಂತಿ ಸಮಾಜದ ಸಾಧಕೆರೆಗ್ ಮಾನಾದಿಗೆ, ಕಲ್ಪಾರ್ಥಿಲೆನ ದತ್ತು ಸ್ವೀಕಾರ ಬೊಕ್ಕ ಕಲ್ಪಾರ್ಥಿ ವೇತನ ಲೇಸ್ ಆ.31 ಗುರುವಾರ ದಾನಿ ಸಂಘದ ಸಭಾ ಭವನಡ್ ನಡತ್‌ಂಡ್.

ಲೇಸ್ ನ್ ಸಂಘದ ಗೌರವ ಗುರ್ಕಾರೆರ್ ಮಾಜಿ ಶಾಸಕೆರ್ ಕೆ.ವಸಂತ ಬಂಗೇರ ಉದಿಪನ ಮಲ್ತೆರ್. ಗುರ್ಕಾಮೆನ್ ಸಂಘದ ಗುರ್ಕಾರೆರ್ ಚಿದಾನಂದ ಪೂಜಾರಿ ಎಲ್ದಕ್ಕ ವಹಿಸೊಂದು ಇತ್ತೆರ್. ಪ್ರಧಾನ ಭಾಷಣಗಾರೆರಾದ್ ಕುದ್ರೋಳಿ ಶ್ರೀ ಗೋಕರ್ಣನಾಥ ದೇವಳ್ಯದ ಪದ್ಮರಾಜ್ ಆರ್ ಪಾಲ್ ಪಡೆದಿತ್ತೆರ್.

ಚಾವಡಿಡ್ ಮಾಜಿ ಶಾಸಕೆರ್ ಕೆ.ಪ್ರಭಾಕರ ಬಂಗೇರ, ಯುವ ಬಿಲ್ಲವ ವೇದಿಕೆದ ಗುರ್ಕಾರೆರ್ ನಿತೀಶ್ ಹೆಚ್, ಮಹಿಳಾ ಬಿಲ್ಲವ ವೇದಿಕೆದ ಗುರ್ಕಾರ್ದಿ ಸುಜಿತಾ ವಿ ಬಂಗೇರ, ಸಂಘದ ಉಪಾಧ್ಯಕ್ಷೆರ್ ಶೇಖರ ಬಂಗೇರ, ಪ್ರಧಾನ ಕಾರ್ಯದರ್ಶಿ ಜಯವಿಕ್ರಮ್ ಕಲ್ಲಾಪು, ಜೊತೆ ಕಾರ್ಯದರ್ಶಿ ರಾಜೀವ್ ಸಾಲಿಯಾನ್ ಈ ಪೊರ್ತುಡು ಇತ್ತೆರ್.

ಸಾಧಕ ಪ್ರಶಸ್ತಿ ಪುರಸ್ಕೃತೆರ್ ಡಾ.ಬಿ.ಸಿ ರಾಯ್, ರಾಜ್ಯ ಪ್ರಶಸ್ತಿ ವಿಜೇತೆ ಖ್ಯಾತ ಮೂತ್ರಪಿಂಡ ತಜ್ಞೆರ್ ಡಾ. ಸದಾನಂದ ಪೂಜಾರಿ, ದೈಹಿಕ ಶಿಕ್ಷಕೆರ್ ಪ್ರಶಾಂತ್, ಲೋಕೋಪಯೋಗಿ ಇಲಾಖೆದ ಕಿರಿಯ ಅಭಿಯಂತರೆರ್ ಸೂರಜ್ ಹೆಚ್, ಸಿ.ಎ ಪರೀಕ್ಷೆಡ್ ಪಾಸ್ ಆಯಿನ ಕು.ನಿರೀಕ್ಷಾ ನಾವರ, ರಾಷ್ಟçಮಟ್ಟದ ಡಿಸ್ಕಸ್ ತ್ರೋ ಆಟಗಾರ್ತಿ ಸುಷ್ಮಾ ಪೂಜಾರಿ ಮೊಕ್ಲೆಗ್ ಈ ಪೊರ್ತುಡು ಮಾನಾದಿಗೆ ಮಲ್ತೆರ್.

ಅಂಚನೆ ಈ ಪೊರ್ತುಡು ಕಲ್ಪಾರ್ಥಿಲೆಗ್ ವೇತನನ್ ಕೊರಿಯೆರ್. ಸಂಘದ ಮಾಜಿ ಗುರ್ಕಾರ್ಲು, ಮಾಜಿ ನಿರ್ದೇಶೆಕೆರ್, ಯುವ ಬಿಲ್ಲವ ಬೊಕ್ಕ ಮಹಿಳಾ ಬಿಲ್ಲವ ವೇದಿಕೆದ ಪದಾಧಿಕಾರಿಲು, ಗ್ರಾಮ ಸಮಿತಿದ ಪದಾಧಿಕಾರಿಲು, ಸಮಾಜ ಭಾಂದವೆರ್ ಪಾಲ್ ಪಡೆದಿತ್ತೆರ್.

ಪುಣೆದ ಲೋಕಶಾಹಿರ್ ಅಣ್ಣಬಾವ್ ಸಾಟೆ ನಾಟ್ಯಗ್ರಹಡ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ

ಬಿಲ್ಲವ ಸಮಾಜ ಸೇವಾ ಸಂಘ ಪುಣೆದ ಮುತಾಲಿಕೆಡ್ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಆಟ (ಆ.30) ಬುಧಾರ ಬಯ್ಯಗ್ 4 ಗಂಟೆಗ್ ಪುಣೆದ ಬೀಬ್ವೇವಾಡಿ ಲೋಕಶಾಹಿರ್ ಅಣ್ಣ ಬಾವ್ ಸಾಟೆ ನಾಟ್ಯಗ್ರಹಡ್ ಗೌಜಿಡ್ ನಡತ್ಂಡ್.

ಬಯ್ಯಗ್ 3 ಗಂಟೆಗ್ ಗೆಜ್ಜೆಗಿರಿ ಮೇಳದ ದೇವೆರೆನ ಚೌಕಿಪೂಜೆ ನಡತ್ಂಡ್. ಈ ಆಟದ ಲೇಸ್ ಡ್ ಎಚ್ಚಾದ ಸಂಖ್ಯೆಡ್ ಕಲಾಭಿಮಾನಿಲು ಪಾಲ್ ಪಡೆದಿತ್ತೆರ್ ಪಂದ್ ಪುಣೆದ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರ್ಲು ಬೊಕ್ಕ ಪದಾಧಿಕಾರಿಲು ತೆರಿಪಾದೆರ್.

ಶ್ರೀ ಸಾಯಿ ಪರಿವಾರ್ ಟ್ರಸ್ಟ್ (ರಿ.) ತೊಕ್ಕೊಟ್ಟು ಮೊಕ್ಲೆರ್ದ್ ನಿಧಿ ಸಂಗ್ರಹಣೆ

ಕ್ಯಾನ್ಸರ್ ಸೀಕ್ ರ್ದ್ ನರಲೊಂದು ಇಪ್ಪುನ ಬಂಟ್ವಾಳದ ಬಾಲೆದ ಚಿಕಿತ್ಸೆಗ್ ತೊಕ್ಕೊಟ್ಟು ಸಾಯಿ ಪರಿವಾರ್ ದ ಸಂಸ್ಥೆ ಬೊಕ್ಕ ಉಳ್ಳಾಲದ ಧರ್ಮನಗರ ಜೂನಿಯರ್  ಬಾಯ್ಸ್ ದ ಸದಸ್ಯೆರ್ ತೊಕ್ಕೊಟ್ಟು ‌ಮೊಸರು ಕುಡಿಕೆ ಉಚ್ಚಯದಾನಿ  ವೇಷ ಪಾಡ್ದ್ ನಿಧಿ ಸಂಗ್ರಹ ಮಲ್ಪೆರೆ ಉಲ್ಲೆರ್.

ನೆತ್ತ ನಿಧಿ ಸಂಗ್ರಹದ ಕಾಕಜಿನ್ ಸಾಯಿ ಪರಿವಾರ್ ಸೇವಾಲಯದ ಸಾಯಿ ಬಾಬಾನ ಸನ್ನಿಧಿಡ್  ಬುಡುಗಡೆ ಮಲ್ತೆರ್. ಡಿಜೆ ಬಾಯ್ಸ್ ದ ಸೇವಾ ಪಥಗ್ ಸಾಯಿ ಪರಿವಾರ್ ಸಂಪೂರ್ಣ ಸಹಕಾರ ಕೊರಿಯೆರೆ ಉಂಡು.

20 ರ್ದ್ ಎಚ್ಚ ದಿನ ಶಾಲೆಗ್ ರಜೆ ಪಾಡ್ಂಡ ಅಪ್ಪೆಅಮ್ಮೆರೆಗ್ ಜೈಲು ಶಿಕ್ಷೆ

ಸೌದಿಅರೇಬಿಯಾ: ಸರಿಯಾಯಿನ ಕಾರಣ ಇಜ್ಜಂದೆ ಜೋಕುಲು 20 ದಿನರ್ದ್ ಎಚ್ಚ ಶಾಲೆಗ್ ರಜೆ ಪಾಡ್ಂಡ ಅಂಚಿನ ಜೋಕುಲೆನ ಅಪ್ಪೆಅಮ್ಮೆರೆಗ್ ಜೈಲು ಶಿಕ್ಷೆನ್ ಕೊರ್ಪುನ ನಿಯಮನ್ ಸೌದಿಅರೇಬಿಯಾ ಜಾರಿಗ್ ಕನದ್ಂಡ್.

ಗುಣಮಟ್ಟದ ಶಿಕ್ಷಣನ್ ಎಚ್ಚಾ ಮಲ್ಪರೆ ಸೌದಿಅರೇಬಿಯಾದ ಜೋಕುಲೆನ ರಕ್ಷಣೆದ ಕಾನೂನುಗ್ ಅನುಸಾರವಾದ್ ಈ ಕ್ರಮನ್ ದೆತೊಂದುಂಡು. ಅಂಚೆನೆ ಜೋಕುಲೆನ ಅಪ್ಪೆಅಮ್ಮೆರೆನ್  ಕಾನೂನುದಡಿಟ್ಟ್ ಪಬ್ಲಿಕ್ ಪ್ರಾಸಿಕ್ಯೂಷನ್ ಮುಖೇನ ಜೋಕುಲೆನ್ ಸರಿಯಾದ್ ತೂಪೆರ ಇಜ್ಜೆರಾ ಪನ್ಪಿನ ತನಿಖೆ ಮಲ್ಪುನ ಕಾನೂನು ಕನದ್ಂಡ್.

ಕಬಡ್ಡಿ ಪ್ಲೆಯರ್ ಸ್ವರಾಜ್ ಆತ್ಮಹತ್ಯೆ

ಪುದುವೆಟ್ಟು ಕುಬಲ ನಿವಾಸಿ ಸ್ವರಾಜ್ (೨೪) ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊನ್ನ ಘಟನೆ ಆ.೩೧ ಬುಧವಾರ ಬೊಲ್ಪುಗು ವರದಿ ಆತ್‌ಂಡ್.

ಪ್ರಸುತ್ತ ಧರ್ಮಸ್ಥಳಡ್ ಇಪ್ಪುನ ಪರತ್ತ್ ಇಲ್ಲಗ್ ಪೋದು ಇತ್ತೆರ್. ಅಲ್ಪ ಮೀಪುನ ಬೆಂದ್‌ರ್ ಡ್ ಮೇರ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಉಜಿರೆದ ಖಾಸಗಿ ಕಂಪನಿಡ್ ಕೆಲಸ ಮೊಲ್ತೊಂದು ಇತ್ತೆರ್. ಮೇರೆಗ್ ಪೊಪ್ಪ, ಅಮ್ಮ, ಅಕ್ಕ ಉಲ್ಲೆರ್. ಆತ್ಮಹತ್ಯೆಗ್ ಕಾರಣ ನನ ತೆರಿದ್ ಬರೊಡಾತೆ.

ಮುಲ್ಕಿ ವಿಜಯ ಕಾಲೇಜ್ ಡ್ ಬಲೆ ತುಲುಲಿಪಿ ಕಲ್ಪುಗ

ತುಲು ಬಾಸೆದ ಲಿಪಿತ ಬುಲೆಚ್ಚಿಲ್‌ಗ್ ತುಲುನಾಡೊರ್ಮೆ ಬೇಸೊಡು ತುಲು ಲಿಪಿತ್ತ ಬೆನ್ನಿ ಆವೊಂದುಂಡು. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪುನೆಪುಡು ಅರವಿಂದ್ ಲಿಂಬಾವಳಿ ಕನ್ನಡ ಭಾಷೆ ಬೊಕ್ಕ ಸಂಸ್ಕೃತಿ ಇಲಾಖೆದ ಮಂತ್ರಿ ಆದುಪ್ಪುನಗ ತುಲು ಲಿಪಿಕ್ ರಾಜ್ಯ ಬೊಕ್ಕ ಕೇಂದ್ರದ ಮಾನ್ಯತೆ ತಿಕ್‌ದಿತ್ತ್ಂಡ್. ಇತ್ತೆ ತುಲು ಲಿಪಿನ್ ಮಾತ ಕಡೆಟ್ ಕಲ್ಪಾವೊಡು ಪನ್ಪಿನ ಉದ್ದೇಸೊಡು ಮುಲ್ಕಿದ ವಿಜಯ ಪದವಿ ಪೂರ್ವ ಕಾಲೇಜ್ ದುಂಬು ಬೈದ್ಂಡ್.

ಸೆಪ್ಟೆಂಬರ್‌ 1 ತೇದಿಗ್ ಕಾಲೇಜ್‌ದ ಮುತಾಲಿಕೆಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ಜೈ ತುಲುನಾಡ್ (ರಿ.) ಕೂಟದ ಮುತಾಲಿಕೆಡ್ “ಬಲೆ ತುಲು ಲಿಪಿ ಕಲ್ಪುಗ” ಪನ್ಪಿನ ಕಜ್ಜಕೊಟ್ಯದ  ಉದಿಪನ ಲೇಸ್ ಮಧ್ಯಾಹ್ನ 2:30 ಗಂಟೆಗ್ ನಡಪರೆ ಉಂಡು. ಲೇಸ್‌ದ ಉದಿಪನೊನು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ಆಯಿನ ನರೇಂದ್ರ ಕೆರೆಕಾಡ್ ಮಲ್ಪರೆ ಉಲ್ಲೆರ್, ಗುರ್ಕಾರ್ಮೆಡ್ ಕಾಲೇಜ್‌ದ ಪ್ರಾಂಶುಪಾಲೆರಾಯಿನ  ಪಮೀದಾ ಬೇಗಂ, ಮಲ್ಲ ಬಿನ್ನೆರಾದ್ ಜೈ ತುಲುನಾಡ್ (ರಿ.) ಕೂಟದ ಒತ್ತು ಗುರ್ಕಾರ್ಲು ಪತ್ರಕರ್ತೆ ಉದಯ್ ಪೂಂಜ, ಸಂಘಟನಾ ಕಾರ್ಯಂತೆರ್ ಸುಮಂತ್ ಹೆಬ್ರಿ ಒತ್ತುಪಾಲ್‌ ಪಡ್ಪೆರ್. ಪ್ರತಿ ಸನಿಯಾರ  ಮಧ್ಯಾಹ್ನ 12:30 ಗಂಟೆಗ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯ ನಡಪುಂಡು. ತುಲು ಲಿಪಿ ಕಲ್ಪಾದಿಲು ಆಯಿನ ಕಿರಣ್ ತುಲುವೆ ಬೊಕ್ಕ ಪ್ರಶಾಂತ್ ಪೂಜಾರಿ ನಂದಳಿಕೆ  ತುಲು ಲಿಪಿ ಕಲ್ಪಾವೆರ್.

ಪುತ್ತೂರು ಅಕ್ಷಯ ಕಾಲೇಜ್‌ಡ್ ಓಣಂ ಆಚರಣೆ

ಪುತ್ತೂರು: ಅಕ್ಷಯ ಎಜ್ಯುಕೇಶನಲ್& ಚಾರಿಟೇಬಲ್ ಟ್ರಸ್ಟ್ ಅಧೀನಡ್ ನಡತೊಂದು ಇಪ್ಪುನ ಅಕ್ಷಯ ಕಾಲೇಜ್ ಐಕ್ಯೂಎಸಿ ಬೊಕ್ಕ ಸಾಂಸ್ಕೃತಿಕ ಸಂಘದ ಒಟ್ಟಿಗೆ ಓಣಂ ಶ್ರಾವಣೋತ್ಸವ ಲೇಸ್ ಆ.30 ಬುಧವಾರ ದಾನಿ ನಡತ್‌ಂಡ್.

ಲೇಸ್ ದ ಉದಿಪನ ಮಲ್ತ್ ಪಾತೆರ್ನ ಪ್ರಗತಿ ಎಜ್ಯುಕೇಶನ್ ಪೌಂಡೇಶನ್ ದ ಸ್ಥಾಪಕಾಧ್ಯಕ್ಷೆರ್ ಗೋಕುಲ್‌ನಾಥ್ ಮಾತಾ ಪರ್ಬಲೆನ್ ನಮ ಆಚರಣೆ ಮಲ್ತ್ ಸೌಹಾರ್ದತೆದ ಸಂದೇಶನ್ ಸಾರೋಡು, ವೃತ್ತಿಪರ ಕೋರ್ಸ್ ದ  ಕನನ್ ದಿಯೊಂದಿನ ನಮ ಈ ಸಂಸ್ಥೆ ನಮಕ್ ಆಶಾಕಿರಣ ಆವೆರುಂಡು ಪಂದ್ ಪಂಡೆರ್.

ಲೇಸ್ ದ ಗುರ್ಕಾರ್ಮೆನ್ ಪುತ್ತೂರು ಅಕ್ಷಯ ಕಾಲೇಜ್ ದ ಗುರ್ಕಾರೆ ಜಯಂತ್ ನಡುಬೈಲು ವಹಿಸಾದ್ ಇತ್ತೆರ್. ಮಲ್ಲ ಬಿನ್ನೆರಾದ್ ಜಯಕುಮಾರ್ ಆರ್ ನಾಯಕ್, ಕಾಲೇಜ್ ದ ಆಡಳಿತ ನಿರ್ದೇಶಕಿ ಕಲಾವತಿ ನಡುಬೈಲು, ಪ್ರಿನ್ಸಿಪಾಲ್ ಸಂಪತ್ ಪಕ್ಕಳ, ಆಡಳಿತಾಧಿಕಾರಿ ಅರ್ಪಿತ್ ಟಿ.ಎ. ಪಾಲ್‌ಪಡೆದಿತ್ತೆರ್.

You Missed