ಬಪ್ಪನಾಡ್ ದೇವಲ್ಯದ ಆಡಳಿತ ಮಂಡಳಿಗ್ ಜಾಗತಿಕ ಬಂಟರ ಸಂಘದ ಒಕ್ಕೂಟದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ರ್ ಭಿನ್ನಯ
ಮುಲ್ಕಿ: ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಲ್ಯಡ್ ಅಭಿವೃದ್ಧಿ ಕಾರ್ಯಲು ನಡತೊಂದುಂಡು ಅಂಚೆನೆ ಹೆದ್ದಾರಿ ಅಗಲೀಕರಣ ಪೊರ್ತುಡು ಐಕಳ ಹರೀಶ್ ಶೆಟ್ರ್ ತನ್ನ ಪೊಪ್ಪ ಅಮ್ಮನ ಅಂಚೆನೆ ಕುಟುಮದಕುಲೆನ ನೆಂಪುಗು 1999 ಟ್ ಮಲ್ದಿನ ಸ್ವಾಗತ ಗೋಪುರ (ಮಹಾದ್ವಾರ) ದ ಅಸ್ತಿತ್ವ ಅತಂತ್ರಡ್ ಇತ್ತ್ ದ್ ಅವೆನ್ ಕುಡೊರ ತನ್ನನೇ ಪುದರ್ ಡ್ ಮಲ್ತ್ ಕೊರ್ಪುನ ನಿಲೆಟ್ ಐಕಳ ಹರೀಶ್ ಶೆಟ್ರ್ ದೇವಲ್ಯದ ಅನುವಂಶಿಕ ಮುಕ್ತೇಸೆರೆರ್ ಮುಲ್ಕಿ ಸೀಮೆದ ಅರಸುಲು ಆಯಿನ ದುಗ್ಗಣ್ಣ ಸಾವಂತೆರೆಗ್ ಅಂಚೆನೆ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ಶ್ವೇತಾ ಪಳ್ಳಿ ಮೇರೆಗ್ ಭಿನ್ನಯ ಮಲ್ತೆರ್.
ಈ ಪಿರವು 1999 ಟ್ ಈ ಸ್ವಾಗತ ಗೋಪುರನ್ ಎನ್ನ ಪೊಪ್ಪ ಅಮ್ಮ ,ಅಣ್ಣನಕುಲೆನ ಅಂಚೆನೆ ಇಲ್ಲದಕ್ಲೆನ ಪುದರ್ ಮಲ್ದಿನಿ ಇತ್ತೆ ಅಭಿವೃದ್ಧಿ ಕಾರ್ಯಕ್ರಮ ಅಂಚೆನೆ ಹೆದ್ದಾರಿ ಅಗಲೀಕರಣದ ಕಾರಣಡ್ ದೆಪ್ಪುನ ಪೊರ್ತುಡು ಭಾವನಾತ್ಮಕ ಸ್ಪರ್ಶ ಇಪ್ಪುನ ಈ ಗೋಪುರನ್ ಕುಡೊರ ಅವೆ ಪುದರ್ ಮಲ್ಪವುನೆಕ್ಕ್ ದೇವಲ್ಯ ಸಾಕಾರ ಕೊರೊಡು ಪಂದ್ ಐಕಳ ಹರೀಶ್ ಶೆಟ್ರ್ ಆಡಳಿತ ವರ್ಗನ್ ಭಿನ್ನಯ ಮಲ್ತೆರ್ .
ಈ ಬಗ್ಗೆ ಪ್ರತಿಕ್ರಿಯೆ ಕೊರಿನ ಶ್ವೇತ ಪಳ್ಳಿ ಬೊಕ್ಕ ದುಗ್ಗಣ್ಣ ಸಾವಂತ ಅರಸುಲು ಸಕಾರಾತ್ಮಕವಾದ್ ಪ್ರತಿಕ್ರಿಯೆ ಕೊರ್ದು
25 ವರ್ಷದ ಪಿರವು ಸ್ವಾಗತ ಗೋಪುರ ನಿರ್ಮಾಣ ಮಲ್ದಿನವು ಅಭಿನಂದನೀಯ, ದೇವಲ್ಯದ ಸಮಗ್ರ ಅಭಿವೃದ್ದಿಗ್ ರೂಪುರೇಷೆ ನಡತೊಂದುಂಡು, ಸ್ವಾಗತ ಗೋಪುರ ನಿರ್ಮಾಣದ ಬಗ್ಗೆ ಅಭಿವೃದ್ದಿ ಸಮಿತಿ ಒಟ್ಟು ಪಾತೆರಕತೆ ಮಲ್ತ್ ತೆರಿಪಾವ ಪಂದ್ ಪಂಡೆರ್. ಈ ಪೊರ್ತುಡು
ಹರೀಶ್ ಶೆಟ್ರೆನ ಅಣ್ಣೆ ಐಕಳ ಗುಣಪಾಲ ಶೆಟ್ಟಿ, ಹರೀಶ್ ಶೆಟ್ರೆನ ಅಭಿಮಾನಿಲಾಯಿನ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಒತ್ತು ಗುರ್ಕಾರ್ಲು ಕರ್ನಿರೆ ವಿಶ್ವನಾಥ ಶೆಟ್ಟಿ, ಪ್ರಧಾನ ಕಾರ್ಯಂತೆರ್ ಇಂದ್ರಾಳಿ ಜಯಕರ ಶೆಟ್ಟಿ, ಸಂಚಾಲಕರಾಯಿನ ಕೊಲ್ಲಾಡಿ ಬಾಲಕೃಷ್ಣ ರೈ,ಮುಲ್ಕಿ ಬಂಟರ ಸಂಘದ ಗೌರವಾಧ್ಯಕ್ಷೆರ್ ಸಂತೋಷ್ ಕುಮಾರ್ ಹೆಗ್ಡೆ, ಮುಲ್ಕಿ ಬಂಟರ ಸಂಘ ಗುರ್ಕಾರ್ಲು ಅಶೋಕ್ ಕುಮಾರ್ ಶೆಟ್ಟಿ, ಕಾರ್ಯಂತೆರ್ ಸಾಯಿನಾಥ ಶೆಟ್ಟಿ, ಒತ್ತು ಕಾರ್ಯಂತೆರ್ ಶರತ್ ಶೆಟ್ಟಿ, ಪಣವುದ ಪಾಲವೆರ್ ಸ್ವರಾಜ್ ಶೆಟ್ಟಿ, ಮಾಜಿ ಗುರ್ಕಾರ್ಲು ಪುರುಶೋತ್ತಮ ಶೆಟ್ಟಿ, ಕಾರ್ಯಕಾರಿ ಸಮಿತಿಯ ಸದಸ್ಯ ಸತೀಶ್ಚಂದ್ರ ಹೆಗ್ಡೆ,ನಿಶಾಂತ್ ಶೆಟ್ಟಿ, ಮಹಿಳಾ ವಿಭಾಗದ ಸಂಚಾಲಕಿ ರೋಹಿಣಿ ಶೆಟ್ಟಿ,ಶಮೀನ ಜಿ.ಆಳ್ವ, ಭಾರತಿ ರೈ,ಯುವ ವಿಭಾಗದ ದಾಮೋದರ ಶೆಟ್ಟಿ ಕೊಡೆತ್ತೂರು ,ಪುಷ್ಪರಾಜ ಚೌಟ,ಶ್ರೀಶ ಸರಫ್ ಐಕಳ, ಜತ್ತೊಟ್ಟು ರವಿರಾಜ್ ಶೆಟ್ಟಿ ಬೊಕ್ಕ ಕೆಲವೆರ್ ಇತ್ತೆರ್.