ತುಳುವ ಅಪ್ಪೆನ್ ಸುಗಿಪುಗ ಬಲೆ

ತುಳುವ ಅಪ್ಪೆನೊರ,
ಸುಗಿಪುಗ ಬಲೆ…
ಅಪ್ಪೆ ಬಾಸೆ ಒರಿಂಡ ತಾನೆ,
ತುಳುವಗ್ ಬಿಲೆ….

ದ್ರಾವಿಡೆರೆ ಮೂಲ,
ಒರಿಪಾಗ ಬಲೆ….
ತುಳುವೇ ದ್ರಾವಿಡ ಕುಲೊತ,
ಮಲ್ಲ ಮಗಳ್ ತೆರಿಲೆ…

ಪರ ಬಾಸೆದ ಪಿರವುಡು,
ನೇಲುವರ್ ದಾಯೆ….?
ತುಳುವೆ ಪನ್ಪುನ ಸ್ವಾಭಿಮಾನ
ಉಡಲ್ಡ್ ದಿಂಜಾಲೆ….

ದೈವ ದೇವೆರೆ,ನಾಗ ಬೆಮ್ಮೆರೆ,
ತುಳುವ ಮಣ್ಣುಡು ಉದಿತೆರೆ….
ಕಲ್ಲ ಕೋರೆಡ್,ತುಂಡು ಕಲ್ಲುಡು,
ಅಳಿದ್ ಒರಿತಿನಿ,ಬಾರ್ಕೂರುದ ಲೀಲೆ….

ಆಯೆ ಪೊರ್ಬುಗೆ,ಇಂಬ್ಯೆ ಬ್ಯಾರಿಗೆ,
ಹಿಂದೂ,ಜೈನೆರ್,ಒಟ್ಟು ನೆಲೆತಿನಿ‌ ಮೂಲೆ….
ಕೋಟಿ ಚೆನ್ನಯೆ,ಅಗೊಲಿ ಮಂಜಣ್ಣೆ,
ರಾಣಿ ಅಬ್ಬಕ್ಕನ ನಾಡೆ….

ಕುಡುಮ ಮಣ್ಣ್.ದ ಧರ್ಮ ಚಾವಡಿ…
ಕಾನತ್ತೂರುಡು ಸತ್ಯ ಮೆರೆತಿನನಿ,
ಕಟಿಲ ಸುತ್ತ ನಂದಿನಿ ಪರತಿನಿ,
ಪುತ್ತೂರೊಡೆಯೆನೆ ಪತ್ತೂರು ಕಾತಿನ,
ತುಳುವ ಮಣ್ಣುದ ಕಾರ್ಣಿಕ.

ಕಡಲ ಕೊರೆಪುಲ,ಪಚ್ಚೆ ಐತೊಲ,
ಪರಪಿ ತುದೆಕುಲೆ,
ಅಪ್ಪೆ ಅಮೃತೊ ಪೇರೆ…..
ಸ್ವರ್ಗ ಮೂಲೆಗೆ,ತುಳುವೆ ಅಮೃತೊ,
ಉಂದುವೇ ಎನ್ನ ನಾಡುಗೆ.

ಕೋಲ ಕಂಬುಳ,ನಾಗ ತಂಬಿಲ,
ತಾಸೆ ಪಟ್ಟ್.ಗ್,
ಪಿಲಿ ನಲಿಪುಂಡು ತೂಲ…
ಏತ್ ಪುಗರೊಡು,ಎಂಚ ಪುಗರೊಡು,
ಎನ್ನ ತುಳುವಪ್ಪೆನ ಐಸಿರ.

ಜಯಪ್ರಸಾದ್ ತುಳುನಾಡ್.
ಗುರಿಕಾರ್ಲು,ಜೈ ತುಳುನಾಡ್(ರಿ)
ಬೆಂಗಳೂರು ಎಗ್ಗೆ.