ಅನಿತಾ ನಾಯಕ್ ಮೇರ್ ಅಮೆರಿಕದ ಕ್ಯಾಲಿಫೋರ್ನಿಯಾಡ್ ಇಪ್ಪುನ ಒರಿ ಸಮಾಜ ಸಂಘಟಕಿ ಬೊಕ್ಕ ಸಾಂಸ್ಕೃತಿಕ ಪರಂಪರೆತ್ತ ಸಂರಕ್ಷಕಿ. ಬಹುರಾಷ್ಟ್ರೀಯ ಕಂಪನಿಲೆಡ್ ಕಂಪ್ಯೂಟರ್ ಸಾಫ್ಟ್‌ವೇರ್ ಎಂಜಿನಿಯರಿಂಗ್ ಉತ್ಪನ್ನಲೆಗ್ ಸಂಬಂಧಪಟ್ಟಿನ ಜಾಗತಿಕ ತಂತ್ರಜ್ಞಾನ ಯೋಜನೆಲೆನ ಮುತಾಲಿಕೆ ಒಯಿಸೊನ್ನ ಮುಕೇನ ಯಶಸ್ವಿ ವೃತ್ತಿಜೀವನನ್ ತಯಾರ್ ಮಲ್ತೊನ್ನ ಮೇರ್, ಕರಿನ 30 ವರ್ಷೊದಿಂಚ ಸಾಮಾಜಿಕ ಸೇವೆ ಬೊಕ್ಕ ಸಾಂಸ್ಕೃತಿಕ ಪರಂಪರೆತ್ತ ಸಂರಕ್ಷಣೆಡ್ ಬೇನ್ತೆರ್.
ಸಮಾಜಸೇವೆಗ್ ಎಪೊಲ ಆದ್ಯತೆ ಕೊರೊಂದು ಬತ್ತಿನ ಅನಿತಾ ಮೇರ್, ಅಮೆರಿಕದ ಶಿಕ್ಷಣ, ಸಮುದಾಯ ಆರೋಗ್ಯ ಬೊಕ್ಕ ಸಾಂಸ್ಕೃತಿಕ ಅಭಿವೃದ್ಧಿಗ್ ದೀನ ಪುಗರ್ತೆದ ಲಾಭರಹಿತ ಸಂಸ್ಥೆಲೆನ ಕಾರ್ಯಕಾರಿ ಬೊಕ್ಕ ಬೇತೆ ಬೇತೆ ಸಮಿತಿಲೆಡ್ ಸೇವೆ ಸಂದಾದೆರ್. ಪ್ರಮಾಣೀಕೃತ ಯೋಗ ಶಿಕ್ಷಕಿ ಬೊಕ್ಕ ಆಯುರ್ವೇದ ಜೀವನಶೈಲಿ ಸಲಹೆಗಾರ್ತಿ ಆಯಿನ ಮೇರ್, ಕ್ಯಾಲಿಫೋರ್ನಿಯಾದ ಬೇತೆ ಬೇತೆ ಸಮುದಾಯಲೆಡ್ ಸಮಗ್ರ ಆರೋಗ್ಯ ಬೊಕ್ಕ ಕ್ಷೇಮ ಜೀವನಶೈಲಿನ್ ತೂಪಾವುನ ಉದ್ದೇಶರ್ದ್ ಸಮಗ್ರ ಆರೋಗ್ಯ ಸೇವಾ ಸಂಸ್ಥೆಯೊಂಜೆನ್ ಸ್ಥಾಪನೆ ಮಲ್ದೆರ್.
ತುಳು ಭಾಷೆ ಬೊಕ್ಕ ಸಂಸ್ಕೃತಿನ್ ಕೈತಲ್ದ ಮಟ್ಟಡ್ ಎಪೊಲ ಸಂರಕ್ಷಣೆ ಮಲ್ತ್ ದ್, ಪ್ರಚಾರ ಮಲ್ತ್ ದ್, ನನದ ಪೀಳಿಗೆಗ್ ಎತ್ತಾವುನ ಉದ್ದೇಶರ್ದ್ ಅನಿತಾ ಮೇರ್ 2021ಟ್ಟ್ ಕ್ಯಾಲಿಫೋರ್ನಿಯಾಡ್ ‘ತುಳಸಿ ತುಳು ಕೂಟ’ (Tulsi Tulu Koota) ಸಂಸ್ಥೆನ್ ಸ್ಥಾಪನೆ ಮಲ್ತೆರ್. ಬೇತೆ ಬೇತೆ ತಲೆಮಾರುಲೆನ ತುಳುವೆರೆನ್ ತನ್ನ ಸಾಮಾನ್ಯ ಸಾಂಸ್ಕೃತಿಕ ಪರಂಪರೆತ್ತ ಮುಕೇನ ಒಂಜೇ ಚಾವಡಿಡ್ ಸೇರ್ಸಾವುನೇ ಈ ಸಂಸ್ಥೆದ ಪ್ರಮುಖ ಆಶಯ ಆತ್ಂಡ್. ಅವೆತ್ತ ಸಮರ್ಥ ನಾಯಕತ್ವಡ್ 270ಕ್ಕ್ ಎಚ್ಚ ಸದಸ್ಯೆರ್ ಇಪ್ಪುನ ಈ ಸಂಸ್ಥೆ ಇತ್ತೆ ಎಪೊಲ ಸಾಂಸ್ಕೃತಿಕ ಜಾಲವಾದ್ ಬುಲೆದ್ ಉಂತುದುಂಡು. ಬಿಸು ಬೊಕ್ಕ ಕೊರಲ್ ಪರ್ಬ / ಪುದ್ದರ್ ಸೇರಿನಂಚೆನೆ ತುಳುನಾಡ್ ದ ಸಾಂಪ್ರದಾಯಿಕ ಪರ್ಬಲು ಬೊಕ್ಕ ಪ್ರಮುಖ ಸಮುದಾಯ ಲೇಸ್ ನ್ ಯಶಸ್ವಿಯಾದ್ ಆಯೋಜನೆ ಮಲ್ತೊಂದು ಬೈದ್ಂಡ್.
ತನ್ನ ತುಳುನಾಡ್ ದ ಪರಂಪರೆತ್ತ ಬಗ್ಗೆ ಮಾಸ್ತ್ ಅಭಿಮಾನ ಬೊಕ್ಕ ಬದ್ಧತೆ ಇಪ್ಪುನ ಅನಿತಾ ಮೇರ್, ಆಲ್ ಅಮೆರಿಕಾ ತುಳು ಅಸೋಸಿಯೇಷನ್ (AATA) ಸಂಸ್ಥೆದ ಮಾಜಿ ಕ್ಯಾಲಿಫೋರ್ನಿಯಾ ರಾಯಭಾರಿಯಾದ್ ಬೊಕ್ಕ ಇತ್ತೆದ ಆಡಳಿತ ಮಂಡಳಿದ ಸದಸ್ಯೆರಾದ್ ಸೇವೆ ಸಂದಾವೊಂದು ಉಲ್ಲೆರ್.
ಈ ಜಬದಾರಿದ ಭಾಗವಾದ್, ವಿಶ್ವದ ಸುರುತ್ತ ಆನ್‌ಲೈನ್ ತುಳು ಗ್ರಂಥಾಲಯ ಆಯಿನ ‘ರಾಣಿ ಅಬ್ಬಕ್ಕ ಗೇಣದ ಚಾವಡಿ’ ಸ್ಥಾಪನೆದ ಪರಿಕಲ್ಪನೆನ್ ತಯಾರ್ ಮಲ್ತ್ ದ್, ಅವೆತ್ತ ಸಾಕಾರಗಾದ್ ದುಂಬು ಉಂತುದು ಬೇನೊಡು. ಈ ಮಹತ್ವದ ಯೋಜನೆಗ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಬೊಕ್ಕ ನಿಟ್ಟೆ ವಿಶ್ವವಿದ್ಯಾಲಯದ ತುಳು ಕೇಂದ್ರದ ಅಮೂಲ್ಯ ಸಹಕಾರ ಬೊಕ್ಕ ಬೆಂಬಲನ್ ದೆತೊನಲ್ಪ ಪ್ರಮುಖ ಪಾತ್ರ ದೆತೊನೊಡು.
ಈ ನೇಮಕನ್ ತುಳುವರ್ಲ್ಡ್ ಫೌಂಡೇಶನ್‌ದ ಗೌರವಾಧ್ಯಕ್ಷೆರ್ ಶ್ರೀಹರಿನಾರಾಯಣದಾಸ ಅಸ್ರಣ್ಣ ಕಟೀಲ್, ಅಧ್ಯಕ್ಷೆರ್ ಭಾನುಮತಿ ಶೆಟ್ಟಿ ಕಕ್ವಗುತ್ತು, ಪ್ರಧಾನ ಕಾರ್ಯದರ್ಶಿ ವಸಂತ ರೈ ಕುತ್ತೆತ್ತೂರು, ನಿರ್ದೇಶಕೆರ್ ಡಾ.ರಾಜೇಶ್ ಕೃಷ್ಣ ಆಳ್ವ, ಬೊಕ್ಕ ತುಳುವ ಮಹಾಸಭೆ ಇಂಟರ್‌ನ್ಯಾಷನಲ್‌ದ ಕರ್ನಾಟಕ ರಾಜ್ಯ ಸಮಿತಿ ಅಧ್ಯಕ್ಷೆರ್ ದೇವೇಂದ್ರ ಹೆಗ್ಗಡೆ ಕೊಕ್ರಾಡಿ ಬೊಕ್ಕ ಕೇಂದ್ರೀಯ ಸಮಿತಿದ ಅಧ್ಯಕ್ಷೆರ್ ಡಾ.ಅವಿನ್ ಬಿ.ಆರ್. ಆಳ್ವ, ಪ್ರಧಾನ ಸಂಚಾಲಕೆರ್ ವಿಶ್ವನಾಥ ಆಚಾರ್ಯ ಮೊಕ್ಲೆಗ್ ಅಭಿನಂದನೆ ಸಂದಾದ್, ಪೊಸ ಅಧ್ಯಕ್ಷೆರೆಗ್ ಎಡ್ಡೆಪ್ಪು ಬಯಕಿಯೆರ್.