ಪುಗರ್ತೆದ ಕ್ರೀಡಾ ಬರವುಗಾರೆ ಜಗದೀಶ್ಚಂದ್ರ ಅಂಚನ್‌‌ರೆಗ್ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿ

ಕುಡ್ಲ : ಸೂಟರ್‌ಪೇಟೆ ನಿವಾಸಿ, ಪುಗರ್ತೆದ ಕ್ರೀಡಾ ಅಂಕಣ ಬರವುಗಾರೆ ಎಸ್. ಜಗದೀಶ್ಚಂದ್ರ ಅಂಚನ್ ಮೇರ್ ಪ್ರತಿಷ್ಠಿತ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿಗ್ ಆಯ್ಕೆ ಆತೆರ್.
ಬೆಂಗಳೂರುದ ಶ್ರೀ ಜ್ಞಾನ ಮಂದಾರ ಎಜುಕೇಶನಲ್ ಮತ್ತು ಸಾಂಸ್ಕೃತಿಕ ಟ್ರಸ್ಟ್ (ರಿ) ತನ್ನ ಬೊಳ್ಳಿ ಪರ್ಬದ ಸಂಭ್ರಮದ ಅಂಗವಾದ್ ಈ ಪ್ರಶಸ್ತಿನ್ ಪ್ರಕಟ ನಲ್ತ್‌ದ್, ಕನ್ನಡ ನಾಡ್‌ಗ್ ಮೇರ್ ಕೊರ್ತಿನ ಅನುಪಮ ಕ್ರೀಡಾ ಸಾಹಿತ್ಯ ಸೇವೆನ್ ಗುರುತಿಸಾದ್ ಈ ಗೌರವಗ್ ಆಯ್ಕೆ ಮಲ್ದೆರ್.
ಕರಿನ 32 ವರ್ಷರ್ದ್ ಮಾಧ್ಯಮ ಕ್ಷೇತ್ರಡ್ ಸಕ್ರಿಯೆರಾದುಪ್ಪುನ ಮೇರ್, ಜಿಲ್ಲೆ, ರಾಜ್ಯ ಬೊಕ್ಕ ಅಂತರರಾಷ್ಟ್ರೀಯ ಮಟ್ಟದ ದಿನಪತ್ರಿಕೆ, ವಾರಪತ್ರಿಕೆ ಅಙಚಡನೆ ಮಾಸಪತ್ರಿಕೆಲೆಡ್ 4,500ರ್ದ್‌ಲ ಎಚ್ಚ ಕ್ರೀಡಾ ಲೇಖನ ಬೊಕ್ಕ ಅಂಕಣಲೆನ್ ಬರೆತೆರ್. ಇಂಚೊಗು ಮೇರ್ ‘ತ್ಯಾಗಮಯಿ ಮೋಹಳ್ಳಿ’ ಪನ್ಪಿನ ಪುಸ್ತಕ ಬರೆದ್ ಲೋಕಾರ್ಪಣೆ ಮಲ್ದೆರ್.
ಪ್ರಶಸ್ತಿ ಪ್ರದಾನ ಸಮಾರಂಭ ಆಗಸ್ಟ್ 29 ಬೆಂಗಳೂರುದ ಜೆಎಸ್‌ಎಸ್ ಸಭಾಂಗಣಡ್ ನಡಪರೆ ಉಂಡು. ಶ್ರೀ ಜ್ಞಾನ ಮಂದಾರ ಎಜುಕೇಶನಲ್ , ಸಾಂಸ್ಕೃತಿಕ ಟ್ರಸ್ಟ್‌ ಬೊಳ್ಳಿ ಪರ್ಬದ ಮುಗಿತಲದ ಲೇಸ್‌ದ ವೇದಿಕೆಡ್ ಜಗದೀಶ್ಚಂದ್ರ ಅಂಚನ್ ಮೆರೆಗ ‘ಬಸವಶ್ರೀ’ ರಾಜ್ಯ ಪ್ರಶಸ್ತಿ ಕೊರ್ದು ಗೌರವ ಮಲ್ಪರೆ ಉಂಡು ಪಂದ್ ಟ್ರಸ್ಟ್‌ದ ಕಾರ್ಯದರ್ಶಿ ಎಲ್. ಸೋಮಶೇಖರ್ ತೆರಿಪಾದೆರ್.