ಅಭಿಯಾನ

ಜುಲೈ 6 ಕ್ಕ್ ಕುಡ್ಲಗ್ ಡಿಕೆ. ಶಿವಕುಮಾರ್ ಭೇಟಿ

Jul 3, 2021

ಒಡಿಪು , ಜುಲೈ 3: ಮೀನುಗಾರಿಕೆ ನಡಪಾವುನ ಮೀನುಗಾರೆರ್ ಬೊಕ್ಕ ಮೀನು ಗಾರಿಕೆನ್ ಅವಲಂಬಿತ ಆಯಿನ ಸಮಸ್ಯೆನ್ ಕೇನರೆ ಮಾಜಿ ಸಚಿವೆರ್ , ಕೆಪಿಸಿಸಿ ಗುರ್ಕಾರ್ಲಾಯಿನ ಶಾಸಕ ಡಿ.ಕೆ.ಶಿವಕುಮಾರ್ ಮೇರ್ ಜು.6 ತಾರೀಖ್ ಗ್ ಕಾಂಡೆ 11ಕ್ ಮಲ್ಪೆ ಮೀನುಗಾರಿಕಾ ಬಂದರ್ ಗ್ ಬರ್ರೆ ಉಲ್ಲೆರ್ .

ಮೀನುಗಾರೆರ್ ಮತ್ಸ್ಯಕ್ಷಾಮ, ಇಂಧನ ಬೆಲೆ ಏರಿಕೆ, ಕೋವಿಡ್ ಸಂಕಷ್ಟ ಬೊಕ್ಕ ಲಾಕ್‌ಡೌನ್ ನಿರ್ಬಂಧನೆರ್ದ್ ಕೆಲವು ಸಮಸ್ಯೆನ್ ಎದುರಿಸಾದೆರ್ , ಸಮುದ್ರ ಮೀನುಗಾರಿಕೆ ನಡಪಾವುನ ಮಾತಾ ವಿಧದ ಮೀನುಗಾರೆರ್ ಬೊಕ್ಕ ಮೀನುಗಾರಿಕೆನ್ ನಂಬ್ದ್ ಬದುಕುನಕ್ಲೆನ ಸಮಸ್ಯೆನ್ ಡಿಕೆಶಿ ಕೇಂದ್ ಇತ್ತೆರ್ ಪಂದ್ ಮಾಜಿ ಮೀನುಗಾರಿಕಾ ಸಚಿವ, ಒಡಿಪುದ ಮೀನುಗಾರೆರ್ನ ಮುಖಂಡ ಪ್ರಮೋದ್ ಮಧ್ವರಾಜ್ ಪಂಡೆರ್.

ಈ ಪೊರ್ತುಡು ಜಿಲ್ಲೆದ ಮಾತಾ ಮೀನುಗಾರೆರ್ನ ಮುಖಂಡೆರ್ , ಬೇತೆ ಬೇತೆ ಸಂಘಸಂಸ್ಥೆದ ಪ್ರತಿನಿಧಿಲು ಪಾಲ್ ಪಡೆಯರೆ ಬಿನ್ನಾಪು ಮಲ್ದೆರ್.

ಈ ಸಲ ತುಳು ಪರೀಕ್ಷೆ ಬರೆಯರೇ ಉಪ್ಪುನ 918 ಜೋಕುಲು

Jul 3, 2021

ಕುಡ್ಲ ಜುಲೈ 3:: ತುಳು ಭಾಷೆದ ಬುಲೆಚ್ಚಿಲ್ ದ ದೃಷ್ಟಿ ಡ್ ರಾಜ್ಯ ಸರಕಾರ 2014-15ನೇ ಸಾಲ್ ರ್ದ್ ಎಸೆಸೆಲ್ಸಿಡ್ ತುಳು ಪಠ್ಯ ನ್ ತೃತೀಯ ಭಾಷೆಯಾದ್ ಆಯ್ಕೆ ಮಲ್ತ್ ಪರೀಕ್ಷೆ ಬರೆಯರೆ ಅವಕಾಶ ಕೊರ್ತೆರ್ , ಕುಡ್ಲ ಬೊಕ್ಕ ಒಡಿಪುಡು ಈ ಸಲ 918 ಜೋಕುಲು ಪರೀಕ್ಷೆ ಬರೆಯರೆ ಉಲ್ಲೆರ್.

ಜು. 22 ಕ್ಕ್ ಎಸೆಸೆಲ್ಸಿ ಭಾಷಾ ವಿಷಯದ ಪರೀಕ್ಷೆ ನಡಪರೇ ಉಂಡು . ಕರಿನ ವರ್ಷ ಒಟ್ಟು 956 ಜೋಕುಲು ತುಳು ಪಠ್ಯಡ್ ಎಸೆಸೆಲ್ಸಿ ಪರೀಕ್ಷೆ ಬರೆದ್ ಇತ್ತೆರ್ . ರಡ್ಡ್ ಜಿಲ್ಲೆಡ್ ಲಾ ಪುತ್ತೂರಿಡು ಈ ಸಲ ಜಾಸ್ತಿ ಜೋಕುಲು ಉಲ್ಲೆರ್. ಬೊಳ್ತೆರ್ 2ನೇ ಸ್ಥಾನಡ್ ಉಂಡು . ವೇಣೂರು ಸರಕಾರಿ ಪ್ರೌಢಶಾಲೆಡ್ ಈ ಬಾರಿ ಜಾಸ್ತಿ ಪಂಡ 70 ಜೋಕುಲು ಎಸೆಸೆಲ್ಸಿಡ್ ತುಳು ಪರೀಕ್ಷೆ ಬರೆಯರೆ ಉಲ್ಲೆರ್ .

ತುಳು ಕಲ್ತೊಂದು ಉಪ್ಪುನ 2,270 ಜೋಕುಲು ಈ ಸಲ ಕುಡ್ಲ, ಒಡಿಪು ಜಿಲ್ಲೆದ 43 ಶಾಲೆಡ್ ಒಟ್ಟು 2,270 ಜೋಕುಲು 2020-21ರ ಸಾಲ್ದ ತುಳುನ್ ತೃತೀಯ ಭಾಷೆಯಾದ್ ಕಲ್ತೊಂದು ಉಲ್ಲೆರ್

ಕುಡ್ಲಡ್ ನಾಲ್ ಬ್ಲಾಕ್ ಫಂಗಸ್ ಪತ್ತೆ

Jul 3, 2021

ಕುಡ್ಲ , ಜುಲೈ 3: ಕುಡ್ಲಡ್ ಶುಕ್ರವಾರ ನಾಲ್ ಬ್ಲಾಕ್ ಫಂಗಸ್ ಪ್ರಕರಣ ಪತ್ತೆ ಆತುಂಡು.ಜಿಲ್ಲೆಡ್ ಇತ್ತೇ ಮುಟ 36 ಜನ ಹುಷಾರ್ ಆತೆರ್ . 29 ಸಕ್ರಿಯ ಪ್ರಕರಣ ಉಂಡು ಪಂದ್ ಜಿಲ್ಲಾಡಳಿತದ ಪ್ರಕಟನೆ ತೆರಿಪಾದುಂಡು.

“ಸಹಾಯ್ ” ಪಡಿತರ ಕಿಟ್ ಗ್ ಕುಡ್ಲಡ್ ಚಾಲನೆ

Jul 2, 2021

ಕುಡ್ಲ , ಜುಲೈ 2: ಕರ್ನಾಟಕ ಮುಸ್ಲಿಂ ಜಮಾಅತ್ ವತಿರ್ದ್ ಕೆಸಿಎಫ್ ಅಂತರಾಷ್ಟ್ರೀಯ ಸಮಿತಿದ ಪ್ರಾಯೋಜಕತ್ವಡ್ ರಾಜ್ಯಾದ್ಯಂತ ನಡಪುನ ಸಹಾಯ್ ಪಡಿತರ ಕಿಟ್ ವಿತರಣೆಗ್ ಕುಡ್ಲಡ್ ಚಾಲನೆ ಕೊರಿಯೆರ್.

ಕರ್ನಾಟಕ ಮುಸ್ಲಿಂ ಜಮಾಅತ್ ರಾಜ್ಯ ಪ್ರಧಾನ ಕಾರ್ಯದರ್ಶಿ ಶಾಫಿ ಸಅದಿ ಗುರ್ಕಾರ್ಮೆ ವಯಿಸ್ದ್ ಇತ್ತೆರ್. ಕೆಸಿಎಫ್ ಅಂತರಾಷ್ಟ್ರೀಯ ಸಮಿತಿ ಗುರ್ಕಾರ್ಲಾಯಿನ ಡಾ.ಶೇಕ್ ಬಾವಾ ಅಬುಧಾಬಿ ಸಭೆನ್ ಉದಿಪನ ಮಲ್ತೆರ್.

ವಿದ್ಯಾರ್ಥಿನಿಗ್ ಆಸರೆಯಾಯಿನ ಗ್ರಾಮ ಪಂಚಾಯತ್

Jul 1, 2021

ಪುತ್ತೂರು, ಜುಲೈ 1: : ಎಸ್ಸೆಸ್ಸೆಲ್ಸಿ ಪರೀಕ್ಷೆ ದಿನಾಂಕ ಘೋಷಣೆ ಮಲ್ತಿನ ದಿನನೇ ಎಸ್ಸೆಸ್ಸೆಲ್ಸಿ ಪರೀಕ್ಷೆಗ್ ತಯಾರ್ ನಡಪಾವೊಂದು ಇತ್ತಿನ ವಿದ್ಯಾರ್ಥಿನಿಯೊರ್ತಿನ ವಾಸ್ತವ್ಯದ ಇಲ್ಲದ ಒಂಜಿ ಭಾಗ ಜರಿದುಂಡು . ನೆರ್ದಾವರ ಈ ಬಡ ಕುಟುಂಬಗ್ ತಾದಿ ತೋಜಂದೆ ಇತ್ತುಂಡು . ನೆಕ್ಕ್ ಸ್ಪಂದನೇ ಕೊರಿನ ಜನಪ್ರತಿನಿಧಿಲು ಈ‌ ಕುಟುಂಬಗ್ ಆಸರೆಯಾತೆರ್ .

ಪೇಂಟೆದ ಬನ್ನೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿದ ಕುಂಬುರ್ಗ ಪನ್ಪಿನ ಜಾಗೆಡ್ ಉಪ್ಪುನ ಗೋಪಾಲ ಶೆಟ್ಟಿ ಮೆರ್ನ ಬಾರಿ ಕಷ್ಟದ ಕುಟುಂಬ . ಜರಿಯುನ ಹಂತಡ್ ಉಪ್ಪುನ ಮಾಡ್ ದ ಇಲ್ಲಗ್ ಪ್ಲಾಸ್ಟಿಕ್ ಹೊದಿಕೆ ಪಾರ್ದ್ ಜೋಪಡಿಡ್ ಈ ಕುಟುಂಬ ದಿನ ದೆತ್ತೊಂದು ಉಂಡು ಬೆನಿಯರೆ ಆವಂದೆ ಅಸಹಾಯಕ ಸ್ಥಿತಿಡುಪ್ಪುನ ಯಜಮಾನ, ಪತ್ನಿ ಶಾರದಾ ಬೀಡಿ ಕಟ್ಟ್ ದ್ ರಡ್ಡ್ ಜನ ಜೋಕ್ಲೆನ ವಿದ್ಯಾಭ್ಯಾಸ, ಇಲ್ಲ್ ತುವೊಂದು ಇತ್ತೆರ್.

ಆನ್‌ಲೈನ್ ತರಗತಿ ಉಪ್ಪುನ ಕಾರಣ ಇಲ್ಲಗ್ ಬತ್ದ್ ಪರೀಕ್ಷೆಗ್ ಮಾತಾ ತಯಾರ್ ಮಲ್ತಿತ್ತಲ್ . ಓದುನೆತ್ತ ಒಟ್ಟುಗು ಇಲ್ಲ್ ಬೂರ್ದಿನ ಮಂಡೆಬೆಚ್ಚ ಅಲೆನ್ ಕಾಡೊಂದೆ ಇತ್ತುಂಡು. ಅವೆನ್ ಮಸ್ತ್ ಜನಟ ಪಂದ್ ಲಾ ಇತ್ತಲ್. ಇತ್ತೇ ಆಲ್ನ ಸೋರೋಕು ಸ್ಪಂದನೆ ತಿಕ್ಕ್ ದುಂಡು .

ಬನ್ನೂರು ಗ್ರಾಮ ಪಂಚಾಯಿತಿ ಗುರ್ಕಾರ್ಲಾಯಿನ ಜಯಾ ರಮೇಶ್ ಬೊಕ್ಕ ಕೂಟದಕುಲು ಈ ವಿದ್ಯಾರ್ಥಿನಿ ಬೊಕ್ಕ ಕುಟುಂಬದಕ್ಲೆನ್ ಗ್ರಾಮ ಪಂಚಾಯಿತಿ ಸಭಾಭವನಗ್ ತಾತ್ಕಾಲಿಕವಾದ್ ಸ್ಥಳಾಂತರ ಮಲ್ದೆರ್ . ಪಂಚಾಯಿತಿ ಮುಖೇನ ಇಲ್ಲ್ ಸರಿ ಮಲ್ತ್ ಮಲ್ತ್ ಕೊರ್ಪಿನ ಭರವಸೆ ಕೊರ್ತೆರ್ .

ಜೋಕ್ಲೆನ ಆರೋಗ್ಯಗ್ ವಿಶೇಷ ಕಾಳಜಿ

Jul 1, 2021

ಮೂಲ್ಕಿ, ಜುಲೈ 1: : ಜೋಕ್ಲೆನ ಆರೋಗ್ಯದ ಬಗ್ಗೆ ಸರ್ಕಾರ ವಿಶೇಷ ಕಾಳಜಿ ವಹಿಸಾಯಿನ ಪರಿಣಾಮವಾದ್ ಲಸಿಕೆ ಕೊರ್ಪಿನ ಅಭಿಯಾನ ಸುರು ಆತುಂಡು . ಶೈಕ್ಷಣಿಕ ಜೀವನಗ್ ಒವ್ವೆ ತೊಂದರೆಯಾವoದಿಲಕ ತಜ್ಞರ್ದ್ ಮಾಹಿತಿ ಪಡೆದ್ ದುಂಬುದ ತಿಂಗೊಲ್ ಡು , ಶಿಕ್ಷಣ ಸಂಸ್ಥೆಲು ಬೇಲೆ ಸುರು ಮಲ್ಪರೆ ಉಲ್ಲೆರ್ ಪಂದ್ ಶಾಸಕ ಉಮಾನಾಥ ಕೋಟ್ಯಾನ್ ಪಂಡೆರ್ .

ಕಿನ್ನಿಗೋಳಿದ ಪಾಂಪೈ ಕಾಲೇಜ್ ದ ಲಯನ್ಸ್ ಕ್ಲಬ್, ರೋಟರಿ ಕ್ಲಬ್, ಕಾಲೇಜಿದ ಪೆರಿಯ ವಿದ್ಯಾರ್ಥಿ ಸಂಘ, ರಾಷ್ಟ್ರೀಯ ಸೇವಾ ಯೋಜನಾ ಘಟಕ, ಎನ್.ಸಿ.ಸಿ ಬೊಕ್ಕ ಯೂತ್ ರೆಡ್‌ಕ್ರಾಸ್ ಸಾಕರಡ್ ಬುಧವಾರ ವಿದ್ಯಾರ್ಥಿಲು,ಉಪನ್ಯಾಸಕೆರ್ ಬೊಕ್ಕ ಶಿಕ್ಷಕೇತೇರ ಸಿಬ್ಬಂದಿಗ್ ಲಸಿಕೆ ಕೊರ್ಪಿನ ಕಾರ್ಯಕ್ರಮಡ್ ಮೇರ್ ಪಾತೆರಿಯೆರ್.

ಕಾಲೇಜ್ ದ ಪ್ರಾಂಶುಪಾಲೆರಾಯಿನ ಡಾ.ಪುರುಷೋತ್ತಮ ಕೆ.ವಿ, ರಾಜೇಶ್ ಶೆಟ್ಟಿ, ಡಾ.ಭಾಸ್ಕರ್ ಕೋಟ್ಯಾನ್, ರೋಟರಿ ಕ್ಲಬ್ ಗುರ್ಕಾರ್ಲಾಯಿನ ಸ್ವರಾಜ್ ಶೆಟ್ಟಿ, ಲಯನ್ಸ್ ಕ್ಲಬ್ ಗುರ್ಕಾರ್ಲಾಯಿನ ಮ್ಯಾಕ್ಸಿಮ್ ಪಿಂಟೋ, ಪದ್ಮಿನಿ ವಸಂತ, ಸುನಿಲ್ ಜಾರ್ಜ್, ಯಾದವ ದೇವಾಡಿಗ, ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಅಭಿವೃದ್ಧಿ ಸಮಿತಿದ ಕಾರ್ಯಾಧ್ಯಕ್ಷ ಹಿಮಕರ್ ಕದಿಕೆ ಇತ್ತೆರ್ .

” ಕೊಪ್ಪರಿಗೆ ” ತುಲು ಡಿಕ್ಷನರಿ ಬುಡುಗಡೆ ಲೇಸ್

Jul 1, 2021

ಕುಡ್ಲ : ಜುಲೈ 1:ತುಲು ಭಾಷೆ, ಲಿಪಿ ಬೊಕ್ಕ ಸಂಸ್ಕೃತಿದ ಬುಲೆಚ್ಚಿಲ್ಗಾದ್ ಬೆನ್ನಿ ಬೆನೊಂದು ಉಪ್ಪುನ ಜೈ ತುಲುನಾಡ್ (ರಿ.) ಪನ್ಪಿ ಸಂಘಟನೆ ತುಲು ಭಾಷೆಡ್ ಮಾಜೊಂದು ಉಪ್ಪುನ ಪದತ ಪೊಲಬು ಅಂಚನೇ ಪುನರ್ ಬಳಕೆಗಾದ್ ಕೊಪ್ಪರಿಗೆ ಪನ್ಪಿನ ಆನ್ಲೈನ್ ತುಳು ಶಬ್ದಕೋಶನ್ ಜುಲೈ 2 ತಾರೀಖ್ ಗ್ ಕಾಂಡೆ 10:30 ಕ್ ಬುಡುಗಡೆ ಮಲ್ಪರೆ ತಯಾರ್ ಮಲ್ದೆರ್ .

ಈ ತುಲು ಡಿಕ್ಷನರಿ ಮುಖೇನ ಜಗತ್ತ್ ಡ್ ಉಪ್ಪುನ ತುಲುವೆರ್ ಅಂಚನೇ ತುಳುವೇತರೆರ್ ತುಳು ಪದಕ್ಲೆನ್ ಸುಲಭವಾದ್ ನಾಡೋಲಿ . ಈ ಶಬ್ದಕೋಶ ತುಲು ಭಾಷೆದ ತುಳು ಲಿಪಿ ಬೊಕ್ಕ ಕನ್ನಡಲಿಪಿಟ್ ಲಭ್ಯ ಉಂಡು. ಇಂಗ್ಲಿಷ್ಹಿಂದಿ ಕನ್ನಡ, ತಮಿಳು, ತೆಲುಗು, ಮಲಯಾಳಂ ಭಾಷೆಡ್ ಅರ್ಥವಿವರಣೆನ್ ಚಿತ್ರಸಹಿತ ಪಡೆಯೋಲಿ . ತುಳು ಭಾಷೆದ ಪದ ಉಚ್ಚಾರಣೆಲಾ ನೆಟ್ಟ್ ಉಂಡು.ಈ ಮಹತ್ವಾಕಾಂಕ್ಷಿ ಯೋಜನೆದ ಮುತಾಲಿಕೆನ್ ಡಿಕ್ಷನರಿ ಡೆವೆಲಪರ್ ಬೊಕ್ಕ ಜೈ ತುಲುನಾಡ್ (ರಿ.) ಬೆಂಗ್ಳೂರು ಘಟಕದ ಉಪಾಧ್ಯಕ್ಷೆರ್ ಆಯಿನ ಶ್ರೀ ಸುಮಂತ್ ಪೂಜಾರಿ ಹೆಬ್ರಿ ಮೇರ್ ವಹಿಸೊಂದೆರ್.

ವಿಶ್ವ ಸಂಸ್ಥೆ : ಭಾಷಣ ಮಲ್ಪರೆ ಉಪ್ಪುನ ಕುಡ್ಲದ ಪ್ರೀತಿ

Jul 1, 2021

ಕುಡ್ಲ, ಜುಲೈ 1: ಇಂಗ್ಲೆಂಡ್‌ದ ಲ್ಯಾಂಕೆಸ್ಟರ್ ವಿಶ್ವವಿದ್ಯಾಲಯಡ್ ಕಾನೂನು ವಿಷಯಡ್ ಪಿಎಚ್‌ಡಿ ಸಂಶೋಧನೆ ಮಲ್ತೊಂದು ಉಪ್ಪುನ ಕುಡ್ಲದ ಪ್ರೀತಿ ಲೋಲಾಕ್ಷ ನಾಗವೇಣಿ ಇತ್ತೇ ವಿಶ್ವ ಸಂಸ್ಥೆದ ‘ಮಹಿಳಾ ವಿರೋಧಿ ತಾರತಮ್ಯ ನಿರ್ಮೂಲನೆ ಕುರಿತ ಸಮಿತಿ’ ಚರ್ಚೆಡ್ ಭಾಷಣ ಮಂಡನೆ ಮಲ್ದೆರ್ .

‘ಲ್ಯಾಂಕೆಸ್ಟರ್ ವಿಶ್ವವಿದ್ಯಾಲಯಡ್ ಸಂಶೋಧನಾ ವಿದ್ಯಾರ್ಥಿನಿಯಾದ್ ಉಪ್ಪುನ ಅಮಿತ್ ಆನಂದ್ ಮೆರ್ನ ಒಟ್ಟುಗು ಪ್ರೀತಿ ಭಾಷಣನ್ ತಯಾರ್ ಮಲ್ದೆರ್ . ಪ್ರೀತಿ ಮೇರ್ ವಿಶ್ವ ಸಂಸ್ಥೆದ ‘ಮಹಿಳಾ ವಿರೋಧಿ ತಾರತಮ್ಯ ನಿರ್ಮೂಲನೆ ಕುರಿತ ಸಮಿತಿ’ ದ 79ನೇ ಅಧಿವೇಶನಡ್ ‘ಮೂಲನಿವಾಸಿ ಪೊಂಜೊವುಲು ಬೊಕ್ಕ ಪೊಣ್ಣು ಜೋಕ್ಲೆನ ಹಕ್ಕುದ ಬಗ್ಗೆ ನಡತಿನ ಚರ್ಚೆ’ಡ್ ತಮ್ಮ ವಿಷಯ ಮಂಡನೆ ಮಲ್ದೆರ್ ‘ ಪಂದ್ ಈ ಅಧಿವೇಶನನ್ ಅಟ್ಟನೆ ಮಲ್ತಿನ ವಿಶ್ವ ಸಂಸ್ಥೆದ ಮಾನವ ಹಕ್ಕುದ ಹೈ ಕಮಿಷನರ್ ಕಚೇರಿ ಪ್ರಕಟಣೆಡ್ ತೆರಿಪಾದುಂಡು.

T20 ಕ್ರಿಕೆಟ್ ಗ್ ಡೇಟ್ ಫಿಕ್ಸ್ : ಅಕ್ಟೋಬರ್ 17ರ್ದ್ ಸುರು

Jul 1, 2021

ಈ ವರ್ಷದ ಐಸಿಸಿ ಪುರುಷೆರ್ನ ಟಿ20 ವಿಶ್ವಕಪ್ʼನ್ ಯುಎಇ ಡ್ ನಡಪಾವ ಪಂದ್ ಬಿಸಿಸಿಐ ಘೋಷಿಣೆ ಮಲ್ತಿನ ಒಂಜಿ ದಿನಟೆ ಪಂದ್ಯದ ಆಯೋಜನೆದ ತಾರೀಖ್ ನ್ ಐಸಿಸಿ ಪ್ರಕಟ ಮಲ್ದುಂಡು .

‘ಪುರುಷರ ಟಿ20 ವಿಶ್ವಕಪ್ 2021 ತ್ತ ಜಾಗೆನ್ ಯುಎಇ ಬೊಕ್ಕ ಒಮನ್ ಗ್ ಸ್ಥಳಾಂತರ ಮಲ್ದೆರ್ . ನನ ಪಂದ್ಯಾವಳಿ ಅಕ್ಟೋಬರ್ 17 ರ್ದ್ ನವೆಂಬರ್ 14 ಮುಟ ನಡಪರೇ ಉಂಡು. ಬಿಸಿಸಿಐ ಈ ಕಾರ್ಯಕ್ರಮದ ಆತಿಥೇಯರಾದ್ ಒರಿಯರೆ ಉಂಡು ಪಂದ್ ಅಂತರರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ತೆರಿಪಾದುಂಡು .

ಒಡಿಪು ಪತ್ರಕರ್ತೆರ್ನ ಸಂಘರ್ದ್ ಸಚಿವೆರೆಗ್ ಬಿನ್ನಾಪು

Jun 29, 2021

ಒಡಿಪು, ಜೂನ್ 29: ಒಡಿಪು ಜಿಲ್ಲಾ ಕಾರ್ಯನಿರತ ಪತ್ರಕರ್ತೆರ್ನ ಸಂಘದ ವತಿರ್ದ್ ರಾಜ್ಯ ಗೃಹ ಸಚಿವೆರ್ ಬೊಕ್ಕ ಓಡಿಪು ಜಿಲ್ಲಾ ಉಸ್ತುವಾರಿ ಸಚಿವೇರಾಯಿನ ಬಸವರಾಜ ಬೊಮ್ಮಾಯಿ ಮೆರೆಗ್ ಇನಿ ಜಿಲ್ಲೆದ ಪತ್ರಕರ್ತೆರ್ನ ವಿವಿಧ ಬೇಡಿಕೆದ ಬಗ್ಗೆ ಬಿನ್ನಾಪು ಮಲ್ತೆರ್ .ನೆಕ್ಕ್ ಸಚಿವೆರ್ ಸಕರಾತ್ಮಕವಾದ್ ಸ್ಪಂದನೆ ಕೊರ್ತೆರ್ , ಬೇಡಿಕೆ ಈಡೇರಿಸಾವುನ ಭರವಸೆ ಕೊರ್ತೆರ್ .