Udupi

ವಾಸುಕಿವನಕ್ ಭೇಟಿ ಕೊರಿನ ಸಚಿವ ಸುನಿಲ್ ಕುಮಾರ್

ಬಂಟ್ವಾಳ : ಬಂಟ್ವಾಳದ ಕುದನೆ ಶ್ರೀ ಕ್ಷೇತ್ರ ವಾಸುಕಿವನಟ್ ಸೋಮವಾರ ರಾತ್ರಿ ನಡತಿನ ನೇಮೋತ್ಸವಡ್ ರಾಜ್ಯ ಇಂಧನ ಸಚಿವೆರಾಯಿನ ವಿ.ಸುನೀಲ್ ಕುಮಾರ್ ದಂಪತಿ ಬೊಕ್ಕ ಬಂಟ್ವಾಳ ಶಾಸಕೆರಾಯಿನ ರಾಜೇಶ್ ನಾಯ್ಕ್ ಉಳಿಪ್ಪಾಡಿ ಪಾಲ್ ಪಡೆದ್ ಧರ್ಮದೈವದ ಗಂಧಪ್ರಸಾದ ಸ್ವೀಕಾರ ಮಲ್ತೆರ್ .

ಈ ಪೊರ್ತುಡು ಬಿಜೆಪಿ ಪ್ರಮುಖೆರಾಯಿನ ಉದಯ ಕುಮಾರ್ ರಾವ್, ಪುರಸಭಾ ಸದಸ್ಯೆರಾಯಿನ ಗೋವಿಂದ ಪ್ರಭು, ನಾಮನಿರ್ದೇಶಿತ ಚಂದ್ರ ಶೇಖರ್ ಪೂಜಾರಿ, ಬಂಟ್ವಾಳ ನಗರ ಯೋಜನಾ ಪ್ರಾಧಿಕಾರದ ಗುರ್ಕಾರ್ಲಾಯಿನ ಬಿ.ದೇವದಾಸ ಶೆಟ್ಟಿ ಪಾಲ್ ಪಡೆದಿತ್ತೆರ್

ಡಾ| ಡಿ.ವೀರೇಂದ್ರ ಹೆಗ್ಗಡೆರೆಗ್ ಶ್ರೀ ಭಗವಾನ್ ಮಹಾವೀರ ಶಾಂತಿ ರಾಷ್ಟ್ರೀಯ ಪ್ರಶಸ್ತಿ

ಬೊಲ್ತೆರ್ : ಧಾರ್ಮಿಕ, ಸಾಮಾಜಿಕ ಬೊಕ್ಕ ಸಾಂಸ್ಕೃತಿಕ ರಂಗಡ್ ಮಲ್ತಿನ ಅನುಪಮ ಸೇವೆಗಾದ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ಡಿ. ವೀರೇಂದ್ರ ಹೆಗ್ಗಡೆ ಮೆರೆಗ್ ರಾಜ್ಯ ಸರಕಾರದ ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ವತಿರ್ದ್ ಶ್ರೀ ಭಗವಾನ್ ಮಹಾವೀರ ಶಾಂತಿ ರಾಷ್ಟ್ರೀಯ ಪ್ರಶಸ್ತಿ ಕೊರ್ದು ಮಾನದಿಗೆ ಮಲ್ಪರೆ ಉಂಡು ಪಂದ್ ಇಲಾಖೆದ ನಿರ್ದೇಶಕೆರ್ ತೆರಿ ಪಾದೆರ್ .

ಆ. 18ಕ್ಕ್ ಬೈಯ್ಯಗ್ 6 ಗಂಟೆಗ್ ಬೆಂಗ್ಳೂರುದ ರವೀಂದ್ರ ಕ್ಷೇತ್ರಡ್ ಕನ್ನಡ ಬೊಕ್ಕ ಸಂಸ್ಕೃತಿ ಸಚಿವ ವಿ. ಸುನಿಲ್ ಕುಮಾರ್ ಪ್ರಶಸ್ತಿ ಪ್ರದಾನ ಮಲ್ಪರೆ ಉಲ್ಲೆರ್ .

ಪಂಪ್ವೆಲ್, ಕಂಕನಾಡಿಡ್ ಸಾವರ್ಕರ್ ಬ್ಯಾನರ್ ಪಾಡಿನ ಭಜರಂಗದಳ

ಕುಡ್ಲ : ಕುಡ್ಲದ ಪ್ರಮುಖ ಜನ ಸಂದಣಿ ಉಪ್ಪುನ ಜಾಗೆ ಆಯಿನ ಪಂಪ್ವೆಲ್ ದಲ್ಪ ಬಜರಂಗದಳದ ಕಾರ್ಯಂತೆರ್ ವೀರ ಸಾವರ್ಕರ್ ಬ್ಯಾನರ್ ಕುಡ ಪಾಡಿನ ಕುಡ್ಲಡ್ ನಡತುಂಡು.

ಪುತ್ತೂರುದ ಕಬಕಡ್ ಎಸ್ ಡಿಪಿಐ ಕಾರ್ಯಂತೆರ್ ಸ್ವಾತಂತ್ರ್ಯ ರಥಯಾತ್ರೆಡ್ ಸಾವರ್ಕರ್ ಫೋಟೋ ದೆಪ್ಪರೆ ಲಡಾಯಿ ಮಲ್ತಿನ ಬೆರಿಟ್ಟೆ ಕುಡ್ಲಡ್ ಕೋಮುದ್ವೇಷ ಕುಡ ಲಕ್ಕುನ ಲಕ್ಷಣ ತೊಜಿದ್ ಬರೊಂದು ಉಂಡು.

ಕಲಾ ಗಂಗೋತ್ರಿ ಉಚ್ಚಿಲ ಸಂಕೋಳಿಗೆ : ಕೋವಿಡ್ ಲಸಿಕಾ ಅಭಿಯಾನ

ಉಚ್ಚಿಲ : ದಕ್ಷಿಣ ಕನ್ನಡ ಜಿಲ್ಲಾಡಳಿತ ಬೊಕ್ಕ ಆರೋಗ್ಯ ಇಲಾಖೆ ಬೊಕ್ಕ ಉಚ್ಚಿಲ ಕೋಟೆ ಶ್ರೀ ಧೂಮವತಿ ಬಂಟ ವೈದ್ಯನಾಥ ಗುಳಿಗ ದೈವದ ಸೇವಾ ಸಮಿತಿ ವತಿರ್ದ್ ಉಚಿತ ಕೋವಿಡ್ ಲಸಿಕಾ ಅಭಿಯಾನ ತಾರೀಖ್ 16-08-2021 ಕ್ಕ್ ಕಲಾ ಗಂಗೋತ್ರಿ ಉಚ್ಚಿಲ ಸಂಕೋಳಿಗೆಡ್ ನಡತುಂಡು .

ಸಮಿತಿದ ಗುರ್ಕಾರ್ಲಾಯಿನ ಶ್ರೀ ರಾಘವ ಆರ್ ಉಚ್ಚಿಲ ತುಡರ್ ಅರ್ಲಾವುನ ಮುಖೇನ ಉದಿಪನ ಮಲ್ತೆರ್.
ಮತ್ತರ್ಮೆಡ್ ಸಮಿತಿದ ಗೌರವ ಗುರ್ಕಾರ್ಲಾಯಿನ ಶ್ರೀ ಚಂದ್ರಶೇಖರ ಉಚ್ಚಿಲ, ಜೀರ್ಣೋದ್ಧಾರ ಸಮಿತಿದ ಗುರ್ಕಾರ್ಲಾಯಿನ ಶ್ರೀಮತಿ ಸರಿತ ಆಶೋಕ್,ಕಾರ್ಯಧ್ಯಕ್ಷಶೆರಾಯಿನ ಶ್ರೀ ಹರೀಶ್ ಟಿ ಉಚ್ಚಿಲ, ಕೋಶಾಧಿಕಾರಿ ಶ್ರೀ ರಘ ಉಚ್ಚಿಲ,ಗುರ್ಕಾರ್ಲಾಯಿನ ಶ್ರೀ ನವೀನ್ ಎಸ್ ಉಚ್ಚಿಲ ಸೋಮೇಶ್ವರ ಪುರಸಭೆತ ಮಾಜಿ ಗುರ್ಕಾರ್ಲಾಯಿನ ಶ್ರೀ ರಾಜೇಶ್ ಉಚ್ಚಿಲ, ಸೋಮೇಶ್ವರ ಪುರಸಭೆದ ಮಾಜಿ ಸದಸ್ಯೆರಾಯಿನ ಶ್ರೀ ದೀಪಕ್ ಪಿಲಾರ್,ಶ್ರೀ ಮುರಳಿ ಮೋಹನ್,ಸುನೀಲ್ಎಂ,ಆಶಾಕಾರ್ಯಕರ್ತೆರಾಯಿನ ಶ್ರೀಮತಿ ಸಾವಿತ್ರಿ ಗಟ್ಟಿ,ಕೋಟೆಕಾರು ಆರೋಗ್ಯ ಕೇಂದ್ರದ ದಾದಿನಕುಲು ಪಾಲ್ ಪಡೆದಿತ್ತೆರ್. ಶ್ರೀ ಪ್ರವೀಣ್ ಬಸ್ತಿ ಬತ್ತಿ ಬಿನ್ನೆರೆನ್ ಎದುಕೊಂಡೆರ್ . ಈ ಲಸಿಕ ಕೇಂದ್ರಗ್ ಶಾಸಕೆರಾಯಿನ ಯು.ಟಿ.ಖಾದರ್ ಬೇಟಿ ಕೊರಿಯೆರ್ . ಒಟ್ಟು 430 ಜನ ಲಸಿಕೆದ ಪ್ರಯೋಜನ ಪಡೆಯೆರ್ . ಸ್ನೇಹ ಸಂಗಮದ ಸದಸ್ಯೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಸಂಪೂರ್ಣ ಸಾಕಾರ ಕೊರಿಯೆರ್.

ಉಪರಾಷ್ಟ್ರಪತಿಗ್ ಬೂಕು ಕೊರ್ದು ಎದುಕೊಂಡಿನ ಸಿಎಂ ಬೊಮ್ಮಾಯಿ

ಬೆಂಗ್ಳೂರು: ಬೆಂಗ್ಳೂರುಗು ಬತ್ತಿನ ಉಪರಾಷ್ಟ್ರಪತಿ ವೆಂಕಯ್ಯನಾಯ್ಡು ಮೆರೆಗ್ ಸಿಎಂ ಬಸವರಾಜ ಬೊಮ್ಮಾಯಿ ಬೂಕು ಕೊರ್ದು ಎದುಕೊಂಡೆರ್.

ಲೇಸ್ ದ ನಿಮಿತ್ತ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಗ್ ಬತ್ತಿನ ವೆಂಕಯ್ಯನಾಯ್ಡು ಮೆರೆನ್ ಸಿಎಂ ಎದುಕೊಂಡೆರ್ . ವಿಮಾನದ ಕೈತಲ್ ಪೋದು ಸಿಎಂ ಬೊಮ್ಮಾಯಿ ವಿಶೇಷ ಹಾರ, ಶಾಲು ಸೇರಿನoಚ ಬೂಕು ಕೊರ್ದು ಎದುಕೊಂಡೆರ್.

ಕಂಡಗ್ ಜತ್ದ್ ಬೆನ್ನಿ ಮಲ್ತಿನ ಶೋಭಾ ಕರಂದ್ಲಾಜೆ

ಮಂಡ್ಯ : ಮಂಡ್ಯ ತಾಲೂಕುದ ಸಾತನೂರು ದ ಕೈತಲ್ ಕೇಂದ್ರ ಕೃಷಿ ರಾಜ್ಯ ಖಾತೆ ಸಚಿವೆ ಶೋಭಾ ಕರಂದ್ಲಾಜೆ ಮೇರ್ ಕಂಡಡ್ ನಾಟಿ ಮಲ್ತ್ ಗಮನ ಸೆಳೆತೆರ್.

ಕೃಷಿ ಸಚಿವೆರಾದ್ ಸುರುತ ಸಲ ಮಂಡ್ಯಗ್ ಬತ್ತಿನ ಮೇರ್ ಜನಾಶೀರ್ವಾದಗ್ ಚಾಲನೆ ಕೊರ್ದು ಸಾತನೂರುದ ಕೃಷಿ ಕಂಡೊಡು ಪೊಂಜೊವ್ಲೆನ ಒಟ್ಟುಗು ನಟ್ಟಿ ನಡಿಯೆರ್.

ಸಂಘಟನೆ ವಿಭಜನೆ ಆವರೆ ಬಲ್ಲಿ : ಡಾ. ಆಕಾಶ್ ರಾಜ್ ಜೈನ್

ಮುಲ್ಕಿ: ತುಳುನಾಡ್‌ಡ್ ಅಂಚೆನೇ ಪಿದಯಿ ರಾಜ್ಯ ಪಿದಯಿ ದೇಶೋಲೆಡ್ ಅವ್ವೆತೋ ಸಂಘಟನೆಲು ತುಳುಅಪ್ಪೆನ ಸೇವೆ ಮಲ್ಲೊಂದುಲ್ಲ. ಸಂಘಟನೆಲೆಡ್ ಏಪಲ ಬಿನ್ನಾಭಿಪ್ರಾಯ ಬರಿಯರೆ ಬಲ್ಲಿ. ಒಂಜಿ ವೇಳೆ ಬಿನ್ನಾಭಿಪ್ರಾಯ ಬತ್ತುಂಡಲ ಅವೆನ್ ಒಂಜೇ ಇಲ್ಲಡುಪ್ಪುನ ಮೆಗ್ಯೆ ಪಲಯೆಲೆಕ್ಕ ಒಂಜೇ ಮನಸ್ಸಡ್ ಸರಿ ಮಲ್ಪೊಡು ಸಂಘಟನೆ ಏಪಲ ವಿಭಜನೆ ಆವರೆ ಬಲ್ಲಿ ಪಂಡ್‌ದ್ ಆಳುಪ ರಾಜ ವಂಶಸ್ತೆರ್ , ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರ್ ಡಾ.ಆಕಾಶ್‌ರಾಜ್ ಜೈನ್ ಪಂಡೆರ್.

ಜೈ ತುಳುನಾಡ್ (ರಿ) ಉಂದೆತ್ತ ಏಳನೇ ವರ್ಷದ ಉಚ್ಚಯದ
ಅಂಗವಾದ್ ಪೊಸ ರೂಪದ ಡಿಜಿಟಲ್ ವೇದಿಕೆ ಕ್ಲಬ್‌ಹೌಸ್‌ಡ್ ಆಟಿ 25 ಪೋಪಿನಾನಿ (ಆಗಸ್ಟ್ 10) ಅಂಗಾರೆ ಬಯ್ಯಡ್ ನಡತಿನ ಲೇಸ್ ಡ್ ಗುರ್ಕಾರ್ಮೆ ಒಯಿಸೊಂದು ಆರ್ ಪಾತೆರಿಯರ್.

ವೈಯಕ್ತಿಕ ವಿಚಾರ ಸಂಘಟನೆಗ್ ಅಡ್ಡಿ ಬರ್ಪುಂಡು, ಆಂಡ ಅವಕ್ಕೆ ಒಯಿಕ್ಲಾ ಅವಕಾಶ ಕೊರೆ ಬಲ್ಲಿ. ಗಂಧದ ಕೊರಡ್ ನ್ ಏತ್ ತರೆತುಂಡಲ ಪರಿಮಳ ಕೊರೊಂದುಪ್ಪುನ ಲೆಕ್ಕನೆ ಒಂಜಿ ಥರತ್ತ ಕೋಂಗಿದ ಪಾತೆರೊಗುಲ ಮಂಡೆ ಕೊರಂದೆ ತುಳುನಾಡ್‌ದ ಬುಳೆಚ್ಚಿಲ್ಗ್ ಪುಣೆವೊಡು ಪಂಡೆರ್.

ಒಡಿಪು ಜಿಲ್ಲೆದ ಕೊಡವೂರು ತುಳುತ್ತ ಮಹಾಕವಿ ಅರುಣಾಬ್ಬನ ಊರು. ಈ ಊರುಡು ಬೊಕ್ಕ ಅಲ್ತ ಶ್ರೀ ಶಂಕರನಾರಾಯಣ ದೇವಸ್ಥಾನೊಡು ಸರ್ಕಾರದ ನೀತಿ ನಿಯಮಾವಳಿದ ಪೋಡಿಗೆದ ನಡುಟ್ಟುಲ ತುಳು ಲಿಪಿ ಪಲವೆ ಪಾಡಾವುನ ಕೆಲಸ ನಡತ್ಂಡ್. ಇತ್ತೆ ತುಳು ಸಾಹಿತ್ಯ ಅಕಾಡೆಮಿ ಅಂಚೆನೆ ಜೈ ತುಳುನಾಡ್‌ದಂಚಿನ ಮಸ್ತ್ ತುಳು ಸಂಘಟನೆಲ್ನ ಬೆರಿಸಾಯೊಡು ತುಳು ಲಿಪಿಕ್ ರಾಜ್ಯದ ಮಾನಾದಿಗೆ ತಿಕ್ದ್‌ಂಡ್. ಆ ಕಜ್ಜಡ್ ಪಾಲ್ ಪಡೆಯಿನೆಕ್ ಎಂಕ್ ಮಲ್ಲ ಪೆರ್ಮೆ ಆವೊಂದುಂಡು ಪಂಡೆರ್.

ಜೈ ತುಳುನಾಡ್ ಸಂಘಟನೆದ ಏಳ್ ವರ್ಸದ ಸಾಧನೆ ಮಾಮಲ್ಲ ಸಾಧನೆ. ತುಳು ಬಾಸೆದ ಬುಲೆಚ್ಚಿಲ್‌ಗಾದ್ ಎಡ್ಡೆನೆ ಬೆನ್ಪಾಟಿಕೆ ಮಲ್ದೆರ್ . ಕಾಡ್ದ ಸಿಂಹ ತಾನ್ ಬತ್ತಿನ ತಾದಿನ್ ಪಿರ ಒರ ಉಂತುದು ತೂಪಿನಲೆಕ್ಕ ಜೈ ತುಳುನಾಡ್ ಸಂಘಟನೆಲ ಒರ ತನ್ನ ಕೆಲಸೊನು ಪಿರ ಸಿಂಹಾವಲೋಕನ ಮಲ್ಪೊಡು ಪನ್ನಿನ ಸಲಹೆನ್ಲಾ ಆರ್ ಕೊರಿಯರ್.

ಮಲ್ಲ ಬಿನ್ನೆರಾದಿತ್ತಿನ ತುಳು ಸಾಹಿತಿ, ಸಂಶೋಧಕರ್, ಪ್ರಾಧ್ಯಾಪಕೆರ್ ಡಾ.ಅರುಣ್ ಉಳ್ಳಾಲ್ ಪಾತೆರ್ದ್, ಆಟದ ದಿಗಿಣ, ಗಗ್ಗರದ ದುನಿಪು, ಕಂಬುಲದ ನಿರ್ಸಾನಿ ತೋಜುನ ಈ ತುಳು ಮಣ್ಣ್ ದ ಮಿತ್ತ್ ಮೋಕೆ ದೀತಿನ, ಸಾರ ಸಾರ ಸಂಖ್ಯೆಡ್ ಜವನೆ, ಜವಾನಿಯೆರುಪ್ಪುನ ಜೈ ತುಳುನಾಡ್ ಸಂಘಟನೆ ಒಂಜಿ ಅಪರೂಪದ ಕೂಟ ತುಳು ಬಾಸೆಗಾದ್ ಅಕ್ಲೆನ ಪುಣೆಪಾಟ ಒಂಜಿ ಆದರ್ಶ. ಏಳ್ ಪನ್ಪಿನವು ಗೇಲ್‌ಗೆ ಏಳನೇ ವರ್ಸದ ಕುಸಿಟ್ಟ್ ಉಪ್ಪುನ ಈ ಕೂಟದಕುಲು ಮಣ್ಣ್ ಮದಪ್ಪಂದಿ ಬೇಲೆ ಮತ್ತೊಂದುಲ್ಲೆರ್, ಅಕ್ಲೆಗ್ ಎಡ್ಡೆ ಆವಡ್. ಸಂಘಟನೆ ನನಲ ಬುಲೆವಡ್ ಪಂಡೆರ್.

ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರ್ಲು ದಯಾನಂದ ಕತ್ತಲ್‌ಸಾರ್ ಪಾತೆರ್ದ್, ಜೈ ತುಳುನಾಡ್ ಸಂಘಟನೆ ತುಳು ಅಕಾಡೆಮಿದ ಬೆರಿಮುಳ್ಳು ಆದ್ ಕೆಲಸ ಮಲ್ತೊಂದು ಉಂಡು . ತುಳುನಾಡ್‌ಗಾದ್ ಅಕುಲು ಬೆಂದಿನ ಬೆನ್ನಿ ಮದಪ್ಪರೆ ಆವಂದಿನ, ನಯಾ ಪೈಸೆದ ಆಸೆ ದೀವಂದೆ ಪರಿಪೂರ್ಣ ಸೇವಾ ಮನೋಭಾವೊಡು ತುಳು ಲಿಪಿನ್ ಊರೊರ್ಮೆ ಕಲ್ಪಾದ್ ಕೊರಿನ ಸಂಘಟನೆದ ಮಾತೆರೆಗ್ಲ ಸೊಲ್ಮೇಲು ಪಂದ್ ಪಂಡೆರ್.

ಮಲ್ಲ ಬಿನ್ನೆರಾದ್ ತುಳು ಸಾಹಿತ್ಯ ಅಕಾಡೆಮಿದ ಪಾದುಕೆರ್ ತಾರ ಆಚಾರ್ಯ, ಒಡಿಪು ಸಮೂಹ ಸಂಸ್ಥೆ, ಮಣಿಪಾಲ ಉಂದೆತ್ತ ಉಪನ್ಯಾಸಕೆರ್ ಅರ್ಪಿತಾ ಶೆಟ್ಟಿ, ಟೈಮ್ಸ್ ಆಫ್ ಕುಡ್ಲ ಪತ್ರಿಕೆದ ಒತ್ತು ಸಂಪೊಲಿಗೆದಾರ್ ಯಶೋಧರ ಕೋಟ್ಯಾನ್, ಜೈ ತುಳುನಾಡ್ (ರಿ) ಗುರ್ಕಾರ್ಲು ಸುದರ್ಶನ್ ಸುರತ್ಕಲ್ ಮೊಕುಲು ಇತ್ತೆರ್.

ಡಾ.ರವೀಶ್ ಪರವ, ಪಡುಮಲೆ ಮೇರ್ ಪಾಡ್ಡನದ ಒರುಟ್ಟು ಲೇಸ್ ಉದಿಪನ ಮಲ್ತೆರ್ , ಜೈ ತುಳುನಾಡ್ ಒತ್ತು ಗುರ್ಕಾರ್ಲು ಉದಯ ಪೂಂಜ ಮಾತೆರೆನ್ಲ ಎಡ್ಕೊಂಡೆರ್. ಪದುಕೆರಾಯಿನ ಕಿರಣ್ ತುಳುವೆ ಸಂಘಟನೆದ ಏಳ್ ವರ್ಷದ ಸಾಧನೆದ ಪೊಲಬು ಮಲ್ತೆರ್ . ಯಶ್ಚಿತಾ ಸೊಲ್ಮೆ ಸಂದಾಯೆರ್‌, ಅರುಣ್ – ವಿ.ಸುರತ್ಕಲ್ ಲೇಸ್ ಸುಧಾರ್ಮೆ ಮಲ್ತೆರ್ .

ಸ್ಯಾಂಡಲ್ ವುಡ್ ಪೆರಿಯ ನಿರ್ಮಾಪಕ ಬಿ. ವಿಜಯ್ ಕುಮಾರ್ ವಿಧಿವಶ

ಬೆಂಗ್ಳೂರು: ಸ್ಯಾಂಡಲ್ ವುಡ್ ಪೆರಿಯ ನಿರ್ಮಾಪಕ ಬಿ. ವಿಜಯ್ ಕುಮಾರ್ (63) ಹೃದಯಘಾತರ್ದ್ ತೀರ್ ಪೋತೆರ್.

ವಿಜಯ್ ಕುಮಾರ್ ಮೇರ್ ಪ್ರಾಯದ ಸೀಕ್ ರ್ದ್ ಇತ್ತೆರ್ . ಈ ನೆಲೆಟ್ಟ್ ಆಸ್ಪತ್ರೆಗ್ ದಾಖಲಾದಿತ್ತೆರ್ . ಆಂಡ ಕೋಡೆ ರಾತ್ರಿ 9: 30 ಕ್ ಹೃದಯಘಾತರ್ದ್ ತೀರ್ ಪೋತೆರ್.

ವಿಜಯ್​​ಕುಮಾರ್ ಮೇರ್ ಸಿಂಹಾದ್ರಿಯ ಸಿಂಹ, ಲಯನ್ ಜಗಪತಿ ರಾವ್, ಮೌನಗೀತೆ, ಜಗದೇಕ ವೀರ, ಸ್ವಚ್ಛ ಭಾರತ ಸೇರಿನಂಚ ಅವ್ವೆತೋ ಸಿನಿಮಾಲೆನ್ ಮಲ್ದೆರ್ .