Udupi

ಮಿರಾ ರೋಡ್ ಶ್ರೀ ಶನೀಶ್ವರ ಮಂದಿರ : ಶ್ರವಣ ಶನಿವಾರ ವಿಶೇಷ ಪೂಜೆ

ಬೊಂಬಾಯಿ : ಮಿರಾ ರೋಡ್ ಶ್ರೀ ಶನೀಶ್ವರ ಮಂದಿರಡ್ ತಾರೀಖ್ 21-08-2021 ಕ್ಕ್  ಶ್ರವಣ ಶನಿವಾರದ ವಿಶೇಷ ಪೂಜೆ ನಡಪರೆ ಉಂಡು ಆನಿ ಕಾಂಡೆ ಶ್ರೀ ಶನೀಶ್ವರ ದೇವೆರೆಗ್ ಅಭಿಷೇಕ ಐರ್ದ್ ಬೊಕ್ಕ ಶ್ರೀ ಶನೀಶ್ವರ ಬೊಕ್ಕ ಹನುಮಾನ್ ಚಾಲಿಸ್ ಪಠಣ. ಬೈಯ್ಯಗ್ 4:30ರ್ದ್ ಶ್ರೀ ಶನೀಶ್ವರ ಗ್ರಂಥ ಪರಾಯಣ. 6 ಗಂಟೆರ್ದ್ ಮಂದಿರದ ಮಿರಾರೋಡ್‌ ಶ್ರೀ ಶನೀಶ್ವರ ಭಜನಾ ಸಮಿತಿದಕ್ಲೆನೆರ್ದ್ ಭಜನೆ ಐರ್ದ್ ಬೊಕ್ಕ 7 ಗಂಟೆರ್ದ್ 8 ಗಂಟೆ ಮುಟ ವಿಠ್ಠಲ ಭಜನಾ ಮಂಡಳಿ ಮಿರಾ ಭಯಿಂದರ್‌ದ ಸದಸ್ಯೆರೆರ್ದ್ ಭಜನೆರ್ದ್ ಬೊಕ್ಕ ಮಹಾ ಮಂಗಾಳಾರತಿ,ತೀರ್ಥ ಪ್ರಸಾದ,ಲಘ ಉಪಾಹಾರದೊಟ್ಟುಗು ನಡಪರೆ ಉಂಡು.ಈ ವಿಶೇಷ ಧಾರ್ಮಿಕ ಲೇಸ್ ಕುಮಾರಿ.ಮಂಗಳಾ .ಜಿ.ಶೆಟ್ಟಿ ಮೆರ್ನ ಪುಟ್ಟು ಪರ್ಬದ ಪರವಾದ್ ನಡಪರೆ ಉಪ್ಪುನ ವಿಶೇಷ ಶ್ರವಣ ಶನಿವಾರ ಪವಿತ್ರ ದಿನತಾನಿ ಕುಮಾರಿ ಮಂಗಳಾ ಜಿ ಶೆಟ್ಟಿ ಮೇರ್ ಪುಟ್ಟು ಪರ್ಬನ್ ಮಂದಿರಡ್ ಆಚರಣೆ ಮಲ್ಪುನ ಶುಭ ಪೊರ್ತುಡು ಮಾತೆರ್ಲ ಸೇರ್ದ್ ಮಂಗಳಾ ಜಿ. ಶೆಟ್ಟಿ ಮೆರೆಗ್ ಆಶೀರ್ವದ ಮಲ್ಪೊಡು ಪಂದ್ ಗುಣಕಾಂತ್ ಶೆಟ್ಟಿ ಕರ್ಜೆ ಬಿನ್ನಾಪು ಮಲ್ದೆರ್.

ಅಂಚಾದ್ ಈ ಮಾತಾ ಧಾರ್ಮಿಕ ಲೇಸ್ ಡ್ ಪಾಲ್ ಪಡೆದ್ ಆರಾಧ್ಯ ದೇವೆರಾಯಿನ
ಶ್ರೀ ಶನೀಶ್ವರ. ಬೊಕ್ಕ ಗಣೇಶ, ನಾಗ ದೇವೆರ್ನ ಅಂಚನೇ ಹನುಮಾನ್ ದೇವೆರ್ನ ಮಹದಾನುಗ್ರಹಕ್ ಪಾತ್ರರಾವೊಡು ಪಂದ್ ಬಿನ್ನಾಪು ಮಲ್ಪುನ ಮ್ಯಾನೇಜ್ಮೆಂಟ್ ಕಮಿಟಿ ಬೊಕ್ಕ ಸರ್ವ ಸದಸ್ಯೆರ್
ಶ್ರೀ ಶನೀಶ್ವರ ಸೇವಾ ಚಾರಿಟೇಬಲ್ ಟ್ರಸ್ಟ್ (ರಿ)
ಮೀರಾ ರೋಡ್

ವರದಿ :- ಸದಾನಂದ್ ಕಾರ್ಕಳ

ತುಳುವೆರ್ ಕುಡ್ಲ (ರಿ). ಪೊಸ ಸಂಘಟನೆದ “ಲೊಗೊ” ಉದಿಪನ ಮಲ್ತಿನ ಸಿಎಂ

ಬೆಂಗ್ಳೂರು : ಕರ್ನಾಟಕ ರಾಜ್ಯದ ಮುಖ್ಯಮಂತ್ರಿಯಾಯಿನ ಶ್ರೀಮಾನ್ ಬಸವರಾಜ್ ಬೊಮ್ಮಾಯಿ ಮೇರ್ ಇನಿ ವಿಧಾನಸೌಧದ ಮುಖ್ಯಮಂತ್ರಿ ಕಚೇರಿಡ್ ತುಳುವೆರ್ ಕುಡ್ಲ (ರಿ). ನೂತನ ಸಂಘಟನೆದ “ಲೊಗೊ”ನು ಉದಿಪನ ಮಲ್ತೆರ್ ಅಂಚನೇ ತುಳುಭಾಷೆನ್ ಕರ್ನಾಟಕ ರಾಜ್ಯದ ಅಧಿಕೃತ ರಾಜ್ಯಭಾಷೆಯಾದ್ ಮಲ್ಪರೆ ಅರಿಕೆ ಮಲ್ತೆರ್. ಅಂಚನೇ “ತುಳು ಕೆಳಿಂಜ ಭಾರತ” ಪನ್ಪಿನ ತುಳುನಾಡ್ ಗ್ ಸಂಬಂಧಪಟ್ಟಿನ ಬೂಕು ಕೊರ್ದು ಮಾನ್ಯ ಮುಖ್ಯಮಂತ್ರಿಲೆಗ್ ಮಾನದಿಗೆ ಮಲ್ತೆರ್.

ಈ ಪೊರ್ತುಡು ಮಂಗಳೂರು ದಕ್ಷಿಣ ವಿಧಾನಸಭಾ ಕ್ಷೇತ್ರದ ಶಾಸಕೇರಾಯಿನ ಶ್ರೀ ಡಿ ವೇದವ್ಯಾಸ ಕಾಮತ್ ಬೊಕ್ಕ ಮುಲ್ಕಿ-ಮೂಡಬಿದ್ರೆ ಕ್ಷೇತ್ರದ ಶಾಸಕೆರಾಯಿನ ಶ್ರೀ ಉಮಾನಾಥ್ ಕೋಟ್ಯಾನ್, ಪಾಲ್ ಪಡೆದಿತ್ತೆರ್ ಅಂಚನೇ ಸಂಘಟನೆದ ಗುರ್ಕಾರ್ಲಾಯಿನ ಪ್ರತೀಕ್ ಯು ಪೂಜಾರಿ, ಕೋಶಾಧಿಕಾರಿಯಾಯಿನ ಚರಿತ್ ಪೂಜಾರಿ, ಒತ್ತು ಕಾರ್ಯಂತೆರ್ ಆಯಿನ ಪ್ರತೀಕ್ ರಾವ್, ಸಂಘಟನಾ ಸಂಚಾಲಕ ರೋಶನ್ ರೇನೊಲ್ಡ್, ಸಹ ಸಂಚಾಲಕ ಕುಷಿತ್, ವರುಣ್ ಆಚಾರ್ಯ ಪಾಲ್ ಪಡೆದಿತ್ತೆರ್ .
ಈ ಲೇಸ್ ಗ್ ವಿಶೇಷವಾದ್ ಸಾಕಾರ ಕೊರಿನ ಶಾಸಕೆರಾಯಿನ ಶ್ರೀ ಡಿ ವೇದವ್ಯಾಸ ಕಾಮತ್ ಮೆರೆಗ್ ಕೂಟದ ಪರವಾದ್ ಸೊಲ್ಮೆ ಸಂದೈತ ಮಲ್ತೆರ್.

ಬೊಲ್ತೆರ್ ಬಿಜೆಪಿ ಯುವ ಮೋರ್ಚಾ ವತಿರ್ದ್ ವೀರ ಯೋಧೆರೆಗ್ ಅಭಿನಂದನಾ ಲೇಸ್

ಬೊಲ್ತೆರ್ : ಬಿಜೆಪಿ ಯುವಮೋರ್ಚಾ ಬೊಲ್ತೆರ್ ನೆತ್ತ ವತಿರ್ದ್ 75 ನೇ ವರ್ಷದ ಸ್ವಾತಂತ್ರೋತ್ಸವದ ಪ್ರಯುಕ್ತ 75 ವೀರ ಯೋದೇರೆಗ್ ಅಭಿನಂದನಾ ಲೇಸ್ ಅಟ್ಟನೆ ಮಲ್ತೆರ್. ವಿಶೇಷವಾದ್ ಇಂದಬೆಟ್ಟು ಮಹಾಶಕ್ತಿ ಕೇಂದ್ರ, ನಡ, ನಾವೂರು, ಇಂದಬೆಟ್ಟು, ಮಿತ್ತಬಾಗಿಲು, ಮಲವಂತಿಗೆ, ಕಡಿರುದ್ಯವರ, ಮುಂಡಾಜೆ, ಗ್ರಾಮದ ಮಾಜಿ ಸೈನಿಕೆರ್ನ ಇಲ್ಲಗ್ ಭೇಟಿ ಕೊರ್ದು ಮಾನದಿಗೆ ಮಲ್ತೆರ್.

ಈ ಪೊರ್ತುಡು ಮಂಡಲ ಒತ್ತು ಗುರ್ಕಾರ್ಲಾಯಿನ ಪ್ರಮೋದ್ ದಿಡುಪೆ, ಯುವ ಮೋರ್ಚಾ ಜಿಲ್ಲಾ ಸದಸ್ಯ ಪ್ರಶಾಂತ್, ಮಂಡಲ ಸದಸ್ಯ ರಾಜೇಶ್ ಕುಕ್ಕಾವ್, ಯುವಮೋರ್ಚ್ ಮಹಾಶಕ್ತಿ ಕೇಂದ್ರದ ಪ್ರಶಾಂತ್ ಕಾಣರ್ಪ ಪಾಲ್ ಪಡೆದಿತ್ತೆರ್.

ರಾಜ್ಯ ಮಟ್ಟದ ಭಾಷಣ ಪಂಥ : ಫಲಿತಾಂಶ ಪ್ರಕಟ

ಕುಡ್ಲ : ಈ ಸಲದ ಸ್ವಾತಂತ್ರ್ಯೋತ್ಸವ 75ನೇ ವರ್ಷಾಚರಣೆದ ನೆಲೆಟ್ಟ್ ಭಾರತೀಯೆರೆಗ್ಲಾ ಪರ್ಬದ ವಾತಾವರಣ. ಸ್ವಾತಂತ್ರ್ಯೋತ್ಸವದ ಪರವಾದ್ ಛಾತ್ರಾ ಯುವ ಸಂಘರ್ಷ ಸಮಿತಿ ಕರ್ನಾಟಕ ವತಿರ್ದ್ ಜೋಕ್ಲೆಗಾದ್ ರಾಜ್ಯಮಟ್ಟದ ಭಾಷಣ ಪಂಥನ್ ಅಟ್ಟನೆ ಮಲ್ತ್ ಇತ್ತೆರ್ . ರಾಜ್ಯದ ಬೇತೆ ಬೇತೆ ಮೂಲೆರ್ದ್ ಜೋಕುಲು ಈ ಪಂಥಡ್ ಪಾಲ್ ಪಡೆದಿತ್ತೆರ್ ಪಂಥದ ಯಶಸ್ಸಿಗ್ ಕಾರಣ ಆಂಡ್ .

ಈ ಭಾಷಣ ಪಂಥಡ್ ಉಲ್ಲಾಸ್ ಧರ್ಮಸ್ಥಳ ಮೇರ್ ಸುರುತ ಇನಾಮು , ರಕ್ಷಾ ಕೋಟ್ಯಾನ್ ರಡ್ಡನೇ ಇನಾಮು ಬೊಕ್ಕ ಸಮ್ಯಕ್ತ್ ಜೈನ್ ಕಡಬ ಮೇರ್ ಮೂಜನೆ ಇನಾಮು ಪಡೆತೆರ್.

ಶಿರೂರು ಮಠದ ಶ್ರೀಲಕ್ಷ್ಮೀವರತೀರ್ಥ ಶ್ರೀಪಾದೆರ್ನ ತೃತೀಯ ಆರಾಧನಾ ಉಚ್ಚಯ

ಒಡಿಪು :ಕೀರ್ತಿಶೇಷ ಶ್ರೀಶಿರೂರು ಮಠದ ಶ್ರೀಲಕ್ಷ್ಮೀವರತೀರ್ಥ ಶ್ರೀಪಾದೆರ್ನ ತೃತೀಯ ಆರಾಧನಾ ಉಚ್ಚಯ ಒಡಿಪುದ ರಾಘವೇಂದ್ರ ಮಠಟ್ ಶಾಸ್ರೋಕ್ತವಾದ್ ನಡತುಂಡು .

ಆರಾಧನಾ ಉಚ್ಚಯಗ್ ಪೂರ್ವಭಾವಿಯಾದ್ ನಿರಂತರ ಎನ್ಮ ದಿನ ಋಕ್ಸಂಹಿತಾ ಪಾರಾಯಣ ನಡತುಂಡು. ಈ ಪಾರಾಯಣದ ಪೊರ್ತುಡು ಕಲಶಡ್ ಇತ್ತಿನ ಜೇನು ಬೊಕ್ಕ ತುಪ್ಪರ್ದ್ ಪಾರಾಯಣದ ಎನ್ಮನೆ ದಿನತನಿ ಮೃತ್ತಿಕಾ ವೃಂದಾವನಗ್ ಅಭಿಷೇಕ ನಡತುಂಡು . ಆರಾಧನೆದ ಪರ್ವದಿನತಾನಿ ವೇದಮೂರ್ತಿ ಶ್ರೀಸುಬ್ರಹ್ಮಣ್ಯ ಭಟ್ ಬೊಕ್ಕ ಶ್ರೀಗಣೇಶ ಆಚಾರ್ಯ ಮೆರ್ನ ಮುತಾಲಿಕೆಡ್ ಶ್ರೀವಿಷ್ಣುಸಹಸ್ರನಾಮ ಯಜ್ಞ ನಡತುಂಡು .

ಈ ಲೇಸ್ ಡ್ ಶ್ರೀ ಹರಿಕೃಷ್ಣ ಪುನರೂರು,ಶ್ರೀ ರಾಘವೇಂದ್ರ ಮಠದ ಪ್ರಧಾನ ಅರ್ಚಕೆರಾಯಿನ ಶ್ರೀ ಅಪ್ಪಣ್ಣ ಆಚಾರ್ಯ,ಜಯತೀರ್ಥ ಆಚಾರ್ಯ,ಜಯರಾಮ ರಾವ್,ಮಡಾಮಕ್ಕಿ ಅನಂತ ತಂತ್ರಿ,ಲಕ್ಷ್ಮೀನಾರಾಯಣ ತಂತ್ರಿ,ವೇದಮೂರ್ತಿ ಶ್ರೀರಾಘವೇಂದ್ರ ಭಟ್, ಡಾ!! ವ್ಯಾಸರಾಜತಂತ್ರಿ,ಕುಂದಾಪುರ ಮಿನರ್ವ ಸಂಸ್ಥೆಯ ಹೊಳ್ಳರು ಹಾಗೂ ಶ್ರೀಶಿರೂರುಮಠದ ಶ್ರೀ ಲಕ್ಷ್ಮೀವರತೀರ್ಥ ಶ್ರೀಪಾದರ ಪೂರ್ವಾಶ್ರಮದ ಸಹೋದರರಾದ ಪಿ ವಾದಿರಾಜ ಆಚಾರ್ಯ, ಪಿ,ಶ್ರೀನಿವಾಸ ಆಚಾರ್ಯ,ವೃಜನಾಥ ಆಚಾರ್ಯ,ನಾವೂರು ವಾದಿರಾಜ ಆಚಾರ್ಯ, ರಘುರಾಮ ಬಲ್ಲಾಳ್,ಪಿ.ಲಾತವ್ಯ ಆಚಾರ್ಯ, ಅಕ್ಷೇಭ್ಯ ಆಚಾರ್ಯ,ಅರ್ಜುನ ಆಚಾರ್ಯ ಪಾಲ್ ಪಡೆದಿತ್ತೆರ್.

ಕುಡ್ಲಡ್ ಆಗಸ್ಟ್ 30 ಮುಟ ಬಾರ್ ಬಂದ್-ಜಿಲ್ಲಾಧಿಕಾರಿ ಆದೇಶ

ಕುಡ್ಲ : ಕೋವಿಡ್-19 ನಿಯಂತ್ರಣಗ್ ಸಂಬಂಧಿ ಜಿಲ್ಲಾಡಳಿತ ಸರ್ಕಾರದ ನಿರ್ದೇಶನದಲಕ ಕಾಲಕಾಲಗ್ ಮಾತಾ ಅವಶ್ಯಕ ಕ್ರಮಕ್ಲೆನ್ ದೆತೊನೊಂದು , ಸದ್ಯ ಗಡಿಟ್ ಉಪ್ಪುನ ಬಾರ್ನ್ ಆಗಸ್ಟ್ 30 ಮುಟ ಬಂದ್ ಮಲ್ಪರೆ ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ. ಆದೇಶ ಕೊರ್ತೆರ್ .

ಈ ನೆಲೆಟ್ಟ್ ಕೇರಳ ರಾಜ್ಯದ ಗಡಿಭಾಗಗ್ ಹೊಂದೊಂದು ಉಪ್ಪುನ ದಕ್ಷಿಣಕನ್ನಡ ಜಿಲ್ಲೆದ , ಬಂಟ್ವಾಳ, ಪುತ್ತೂರು, ಸುಳ್ಯ ತಾಲೂಕು ಪ್ರದೇಶದ 5 ಕಿ.ಮೀ. ವ್ಯಾಪ್ತಿಡ್ ಉಪ್ಪುನ 19 ಗ್ರಾಮದ ಬಾರ್ ನ್ ಆಗಸ್ಟ್ 1ರ್ದ್ 15 ಮುಟ ಮುಚ್ಚರೆ ಆದೇಶ ಕೊರ್ದು ಇತ್ತೆರ್ .

ಕಾಲಿವುಡ್ ಡ್ ಮೆನ್ಕೊಂದು ಉಪ್ಪುನ ಕುಡ್ಲದ ಪ್ರತಿಭೆ

ಕುಡ್ಲ : ‘ದಿಯಾ’ ಚಿತ್ರದ ಮುಖೇನ ಗಡಿ ದಾoಟ್ ದ್ ಮೆನ್ಕೊಂದು ಉಪ್ಪುನ ಕುಡ್ಲದ ಪ್ರತಿಭೆ ಪೃಥ್ವಿ ಅಂಬರ್ ಇತ್ತೆ ತಮಿಳು ಚಿತ್ರರಂಗ ಪೋಯೆರೆ ತಯಾರ್ ಆತೆರ್. ಮೇರ್ ನಟನೆ ಮಲ್ಪರೆ ಉಪ್ಪುನ ತಮಿಳು ಚಿತ್ರಡ್ ಡಾಲಿ ಧನಂಜಯ್ ಲಾ ನಟನೆ ಮಲ್ತೊಂದು ಉಲ್ಲೆರ್ ಪನ್ಪಿನವು ಕುಡೊಂಜಿ ಪೆರ್ಮೆದ ಸಂಗತಿ.

ವಿಜಯ್ ಮಿಲ್ಟನ್ ನಿರ್ದೇಶನದ “ಮಲೈ ಪಿಡಿಕ್ಕಾದ ಮಣಿದನ್” ಚಿತ್ರದ ಮುಖೇನ ಪೃಥ್ವಿ ಅಂಬರ್ ತಮಿಳು ಚಲನಚಿತ್ರ ರಂಗೋಗೂ ಕಾರ್ ದೀತೆರ್.

“ಮಳ್ಳೆ ಪಿಡಿಕ್ಕಾದ ಮಣಿದನ್” ಚಿತ್ರಡ್ ವಿಜಯ್ ಆಂಟನಿ ನಾಯಕೆ ಆದ್ ಉಲ್ಲೆರ್. ಪೃಥ್ವಿ ಅಂಬರ್ ಬೊಕ್ಕ ಧನಂಜಯ್ ಪ್ರಧಾನ ಭೂಮಿಕೆಡ್ ಉಲ್ಲೆರ್ . ಈ ಚಿತ್ರದ ಶೂಟಿಂಗ್ ಆಗಸ್ಟ್ 12ರ್ದ್ ಸುರು ಆಯರೇ ಉಂಡು.

ಕರ್ನಾಟಕರ್ದ್ ಕಾಶ್ಮೀರಗ್ ಪಾದಯಾತ್ರೆ ಮಲ್ತೊಂದು ಉಪ್ಪುನ ಬಂಟ್ವಾಳದ ಜವಣ್ಯೆರ್

ಕುಡ್ಲ : ಕುಡ್ಲದ ಬಂಟ್ವಾಳ ತಾಲ್ಲೂಕುದ ಪಜೀರ್ ಗ್ರಾಮದ ಮೆಹತಾಬ್(21) ಬೊಕ್ಕ ಬಿಲಾಲ್(18) ಪನ್ಪಿನ ಜವಣ್ಯೆರ್ ಐತಿಹಾಸಿಕ ಜಾಗೆದ ಅಧ್ಯಯನ ಮಲ್ಪುನ ನೆಲೆಟ್ಟ್ ಸೋಮವಾರ ಪಾದಯಾತ್ರೆದ ಮುಖೇನ ಕರ್ನಾಟಕರ್ದ್ ಕಾಶ್ಮೀರಗ್ ಪಿದಾಡ್ದೆರ್.

.

ಬಿಲಾಲ್ ಈ ಸಲ ಎಸ್ಸೆಸ್ಸೆಲ್ಸಿ ಪಾಸ್ ಆತೆರ್ , ಶಿಕ್ಷಣ ದುಂಬರಿಪಾವುನ ಆಸೆ ದೀತೆರ್ ಅಂಚನೇ ಮೆಹತಾಬ್ ಸುರುತ ಪಿಯುಸಿ ಮುಟ ಕಲ್ತ್ ದೆರ್ , ಸೂಪರ್ ಮಾರ್ಕೆಟ್‌ಡ್ ಬೇಲೆ ಮಲ್ತೊಂದು ಉಲ್ಲೆರ್ . ಲಾಕ್‌ಡೌನ್‌ರ್ದ್ ಬೇಲೆ ದಾಂತೆ ಇಲ್ಲಡ್ ಉಪ್ಪುನಗ ಸಾಧನೆ ಮಲ್ಪೊಡು ಪನ್ಪಿ ಛಲೋಟ್ಟು ಕನ ಕಟ್ಟಿನ ರಡ್ಡ್ ಜನಲ ಪಾದಯಾತ್ರೆ ಮಲ್ಪುನ ಬಗ್ಗೆ 4 ತಿಂಗೊಲ್ ದ ಪಿರವು ಹಿಂದೆ ಯೋಜನೆ ಮಲ್ದೆರ್ .

ಮಾರ್ಗಡ್ ತಿಕ್ಕುನ ಮಸೀದಿ, ಚರ್ಚ್ ಬೊಕ್ಕ ಮಂದಿರದ ಬಗ್ಗೆ ಮಾಹಿತಿನ್ ಯೂಟ್ಯೂಬ್ ಮುಖೇನ ಅಪ್‌ಲೋಡ್ ಮಲ್ಪುನ ಯೋಜನೆ ದೀತೆರ್ , 90 ದಿನತ ಪಾದಯಾತ್ರೆಡ್ 2,500 ಕಿ.ಮೀ. ದೂರ ಪೋಪಿನ ಗುರಿ ದೀತೆರ್ ಪಂದ್ ಮೆಹತಾಬ್ ಪಂಡೆರ್.