Udupi

ಸಮಾಜ ಸೇವಕ ವಕೀಲ ಶ್ರೀ ರಾಘವೇಂದ್ರ ರಾವ್‌ಗ್ “ಸೇವಾರತ್ನ” ಮಾನದಿಗೆ

ಕುಡ್ಲ : 75ನೇ ಸ್ವಾತಂತ್ರ ಅಮೃತ ಮಹೋತ್ಸವದ ಪರವಾದ್ ಸಮಾಜಡ್ ಎಡ್ಡೆ ಸೇವೆ ಮಲ್ತಿನ ಗಣ್ಯ ವ್ಯಕ್ತಿಲೆನ್ ಗುರ್ತಿಸಾದ್ “ಸೇವಾರತ್ನ” ಬಿರುದು ಮಾನದಿಗೆ ಮಲ್ತೆರ್.

ವಕೀಲ ವೃತ್ತಿದೊಟ್ಟುಗು ಸಾಮಾಜಿಕ ಸೇವಾಕಾರ್ಯಡ್ ಉಪ್ಪುನ ಕುಡ್ಲದ ಖ್ಯಾತ ನ್ಯಾಯವಾದಿ ಬೊಕ್ಕ ನೋಟರಿ ಶ್ರೀ ರಾಘವೇಂದ್ರ ರಾವ್‌ರೆಗ್ ಮ್ಯಾಕ್ಸ್ ಲೈಫ್ ಸಂಸ್ಥೆ”ಸೇವಾ ರತ್ನ ಪ್ರಶಸ್ತಿ” ಕೊರ್ದು ಮಾನದಿಗೆ ಮಲ್ತುಂಡು . ಈ ಪೊರ್ತುಡು ಮೆರೆನ ಉತ್ತಮ ಸೇವೆಲೆನ್ ನೆಂಪು ಮಲ್ತೆರ್.

ರಾಘವೆಂದ್ರ ರಾವ್ ಮೇರ್ ಲಾಕ್ಡೌನ್ ಪೊರ್ತುಡು ಆರಾಮ ಮಲ್ಪಂದೆ ಅವ್ವೆತೋ ಜನಕ್ ಆಹಾರ, ಅತ್ಯಾಗತ್ಯ ವಸ್ತುದ ಪೂರೈಕೆ, ಪಾಪದ ಜೋಕ್ಲೆಗ್ ಬೂಕು ಬೊಕ್ಕ ಲೇಖನಿ ಸಾಮಗ್ರಿ ಅಂಚನೇ ಸಮವಸ್ತ್ರ ಪಟ್ಟುನ ಲೇಸ್ , ನೆತ್ತೆರ್ ದಾನ ಶಿಬಿರ ಲೇಸ್ ನ್ ಅಟ್ಟನೆ ಮಲ್ಪುನು ಅಂಚನೇ ಅವ್ವೆತೋ ಸಮಾಜಮುಖಿ ಬೇಲೆ ಮಲ್ತೊಂದು ಇತ್ತೆರ್.
ಆತೆ ಅತ್ತoದೆ ಸಮಾಜದ ಪಾಪದ ಜನಕ್ಲೆಗ್ ಉಪಯೋಗ ಆವೊಡು ಪಂದ್ ತನ್ನ ಅಂಗಾಗ ನ್ ದಾನ ಮಲ್ಪುನ ಬಗ್ಗೆ ಬರೆದ್ ಕೊರ್ದು ಇತ್ತೆದ ಯುವಪೀಳಿಗೆಗ್ ಮಾದರಿ ಆಯೆರ್ .ಇಂಚ ಇವರ ಮೆರೆನ ಎಡ್ಡೆ ಬೇಲೆನ್ ಗುರ್ತಿಸಾದ್ ಮೆರೆಗ್ “ಸೇವಾರತ್ನ” ಮಾನದಿಗೆ ಮಲ್ತೆರ್ ಪಂದ್ ಕುಡ್ಲ ಮ್ಯಾಕ್ಸ್ ಲೈಫ್‌ದ ಕಛೇರಿ ಗುರ್ಕಾರ್ಲಾಯಿನ ಶ್ರೀ ಸತೀಶ್ ಮೆನನ್ ಪಂಡೆರ್ .

ಲಯನ್ ಪ್ರದೀಪ್ ಕುಮಾರ್ ಬಿನ್ನೆರ್ ಆದ್ ಪಾಲ್ ಪಡೆದಿತ್ತೆರ್ . ಕುಡ್ಲ ಮ್ಯಾಕ್ಸ್ ಲೈಫ್‌ದ ಕಛೇರಿ ಮ್ಯಾನೇಜರ್ ಶ್ರೀ ಆನಂದನ್, ಸಲಹೆಗಾರೆರಾಯಿನ ಶ್ರೀಮತಿ ಗೀತಾ ಬೊಕ್ಕ ಸಂಸ್ಥೆದ ಬೇತೆ ಸಿಬ್ಬಂದಿಲು ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಕುದ್ರೋಳಿ ಕ್ಷೇತ್ರದ ಒತ್ತು ಗುರ್ಕಾರ್ಲಾದ್ ಊರ್ಮಿಳಾ ರಮೇಶ್

ಕುಡ್ಲ : ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಒತ್ತು ಗುರ್ಕಾರ್ಲಾದ್ ಊರ್ಮಿಳಾ ರಮೇಶ್ ಮೆರೆನ್ ಸರ್ವಾನುಮತರ್ದ್ ಆಯ್ಕೆ ಮಲ್ದೆರ್ .

ಮಾಹೆ ” ಜಿಲ್ಲೆದ ಗ್ರೀನ್ ಚಾಂಪಿಯನ್ ಮಾನದಿಗೆ

ಮಣಿಪಾಲ : ಕೇಂದ್ರ ಸರಕಾರದ ಉನ್ನತ ಶಿಕ್ಷಣ ಇಲಾಖೆದ ಮಹಾತ್ಮ ಗಾಂಧಿ ನೇಶನಲ್ ಕೌನ್ಸಿಲ್ ಫಾರ್ ರೂರಲ್ ಎಜ್ಯುಕೇಷನ್ (ಎಂಜಿಎನ್‌ಸಿಆಪ್‌ಇ), ಮಣಿಪಾಲ ಮಾಹೆದ ಪಚ್ಚೆ ಕ್ಯಾಂಪಸ್ ಉಪಕ್ರಮದ ಸ್ವಚ್ಛ ಕ್ರಿಯಾ ಯೋಜನೆನ್ ಅತ್ಯುತ್ತಮ ಪಂದ್ ಆಯ್ಕೆ ಮಲ್ತ್ ಮಾಹೆನ್ ಜಿಲ್ಲಾ ಗ್ರೀನ್ ಚಾಂಪಿಯನ್ ಪಂದ್ ಮಾನದಿಗೆ ಮಲ್ದೆರ್ .

ನಂದಿನಿ ಸಿಹಿ ಉಚ್ಚಯ ಉದಿಪನ

ಕುಡ್ಲ : ದ.ಕ. ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ಆ.19ರ್ದ್ 15 ದಿನತ ಕರ್ನಾಟಕ ರಾಜ್ಯಾದ್ಯಂತ ನಂದಿನಿ ಸಿಹಿ ಉಚ್ಚಯ ಆಚರಣೆ ಮಲ್ತ್ ಶೇ.10ರ ರಿಯಾಯತಿಡ್ ನಂದಿನಿ ಶ್ರೇಣಿದ ಚೀಪೆ ತೆನಸ್ ದ ವಸ್ತುಲೆನ್ ಗ್ರಾಹಕೆರೆಗ್ ಕೊರ್ರೆ ದುಂಬು ಬೈದೆರ್ . ಅಂಚಾದ್ ಗುರುವಾರ ದ.ಕ.ಜಿಲ್ಲೆದ ಬೇತೆ ಬೇತೆ ಜಾಗೆಡ್ ಈ ಲೇಸ್ ಗ್ ಚಾಲನೆ ಕೊರಿಯೆರ್.

ಮೂಡುಬಿದಿರೆಡ್ ನಡತಿನ ಲೇಸ್ ನ್ ಪುರಸಭೆತ ಗುರ್ಕಾರ್ಲಾಯಿನ ಪ್ರಸಾದ್ ಕುಮಾರ್ ಉದಿಪನ ಮಲ್ತೆರ್. ಪುರಸಭೆತ ಸ್ಥಾಯಿ ಸಮಿತಿದ ಗುರ್ಕಾರ್ಲಾಯಿನ ನಾಗರಾಜ ಪೂಜಾರಿ, ಸದಸ್ಯೆರಾಯಿನ ರಾಜೇಶ್ ನಾಯ್ಕ, ದಿನೇಶ್, ಬಿಜೆಪಿ ಮಂಡಲ ಪ್ರಧಾನ ಕಾರ್ಯoತೆರಾಯಿನ ಗೋಪಾಲ್ ಶೆಟ್ಟಿಗಾರ್, ಒಕ್ಕೂಟದ ನಿರ್ದೇಶಕ ಸುಚರಿತ ಶೆಟ್ಟಿ ಪಾಲ್ ಪಡೆದಿತ್ತೆರ್ .

ಎನ್‍ಎಸ್‍ಯುಐದ ರಾಜ್ಯ ಪ್ರಧಾನ ಕಾರ್ಯಂತೆರಾದ್ ಅನ್ವಿತ್ ಕಟೀಲ್

ಕುಡ್ಲ : ಎನ್‍ಎಸ್‍ಯುಐದ ರಾಜ್ಯ ಪ್ರಧಾನ ಕಾರ್ಯಂತೆರಾದ್ ಅಂಚನೇ ವಿಟಿಯು ದ ಉಸ್ತುವಾರಿಯಾದ್ ಅನ್ವಿತ್ ಕಟೀಲ್ ಮೆರೆನ್ ನೇಮಕ ಮಲ್ತ್ ಎನ್‍ಎಸ್‍ಯುಐದ ರಾಷ್ಟ್ರೀಯ ಕಾರ್ಯಂತೆರಾಯಿನ ಎರಿಕ್ ಸ್ಟೆಪನ್ ಆದೇಶ ಮಲ್ದೆರ್ .

ಅನ್ವಿತ್ ಮೇರ್ ತಾ.ಪಂ. ಮಾಜಿ ಸದಸ್ಯೆರಾಯಿನ ತಿಮ್ಮಪ್ಪ ಕೋಟ್ಯಾನ್ರೆನ ಮಗೆ.

ಸಪ್ಟೆಂಬರ್ಡ್ ಜೋಕ್ಲೆಗ್ ಕೋವಿಡ್ ಲಸಿಕೆ : ಡಾ. ಪ್ರಿಯಾ ಅಬ್ರಾಹಮ್ 

ನವದೆಹಲಿ : ಜೋಕ್ಲೆಗಾದ್ ಕೋವಿಡ್ ಸೋಂಕುದ ಲಸಿಕೆ ಸಪ್ಟೆಂಬರ್ ಬೊಕ್ಕ ಡಿಸೆಂಬರ್ ಡ್ ಬಳಕೆಗ್ ಬರು ಪಂದ್ ಐಸಿಎಂಆರ್ ದ ನ್ಯಾಶನಲ್ ಇನ್ ಸ್ಟಿಟ್ಯೂಟ್ ಆಫ್ ವೈರಾಲಜಿದ ನಿರ್ದೇಶಕಿ ಡಾ. ಪ್ರಿಯಾ ಅಬ್ರಾಹಮ್ ಪಂಡೆರ್ .

ವಿಜ್ಞಾನ ಬೊಕ್ಕ ತಂತ್ರಜ್ಞಾನ ಇಲಾಖೆದ ಒಟಿಟಿ ಚಾನೆಲ್ ಡ್ ನಡತಿನ ಸಂದರ್ಶನಡ್ ಪಾಲ್ ಪಡೆದ್ ಪಾತೆರಿನ ಆರ್ , 2 ರ್ದ್ 18 ವರ್ಷದ ಉಲಯಿದ ಜೋಕ್ಲೆಗಾದ್ ಕೋವ್ಯಾಕ್ಸಿನ್ ಲಸಿಕೆದ ರಡ್ಡ ನೇ ಬೊಕ್ಕ ಮೂಜನೇ ಹಂತದ ಪ್ರಾಯೋಗಿಕ ಪರೀಕ್ಷೆ ನಡತೊಂದು ಉಂಡು. ಆಯಿನಾತ್ ಬೆಗೋಡೆ ಫಲಿತಾಂಶನ್ ನಿರೀಕ್ಷೆ ಮಲ್ಪೊಲಿ ಪಂದ್ ಪಂಡೆರ್.

ಆಗಸ್ಟ್ 20 ತಾರೀಖ್ ರ್ದ್ ವಾರಾಂತ್ಯ ಕರ್ಫ್ಯೂ : ಡಾ.ರಾಜೇಂದ್ರ

ಕುಡ್ಲ : ಕುಡ್ಲಡ್ ಕೊರೋನ ಪ್ರಕರಣನ್ ಕಮ್ಮಿ ಮಲ್ಪುನ ನೆಲೆಟ್ಟ್ ಈ ಸಲಲ (ಆ.21,22) ವಾರಾಂತ್ಯ ಕರ್ಫ್ಯೂ ಜಾರಿ ಮಲ್ದಾ ಪಂದ್ ದ.ಕ.ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ. ಪಂಡೆರ್ .ಆ.20 ನೇ ಶುಕ್ರವಾರ ರಾತ್ರಿ 9ರಲ್ ಗಂಟೆರ್ದ್ ಸುರು ಆಪಿನ ವೀಕೆಂಡ್ ಕರ್ಫ್ಯೂ ಆ.23 ನೇ ಸೋಮವಾರ ಕಾಂಡೆ 5 ಗಂಟೆ ಮುಟ ಜಾರಿಡ್ ಉಪ್ಪುಂಡು .

ಆ.21ನೇ ಶನಿವಾರ ಬೊಕ್ಕ ಆ.22ನೇ ಐತಾರ ಮಧ್ಯಾಹ್ನ 2 ಗಂಟೆ ಮುಟ ಅಗತ್ಯ ವಸ್ತು ದೆತೊನೆರೆ ಅವಕಾಶ ಉಂಡು .

ಈ ಪೊರ್ತುಡು ಅಂಗಡಿ ದೆಪ್ಪೋಲಿ, ಮಾರ್ಗದ ಬರಿಟ್ ಬೇರ ಮಲ್ಪುನಕ್ಲೆಗ್ ಅವಕಾಶ ಉಂಡು . ರೆಸ್ಟೋರೆಂಟ್, ಹೊಟೇಲ್‌ಡ್ ಕಾಲಿ ಪಾರ್ಸಲ್‌ಗ್ ಮಾತ್ರ ಅವಕಾಶ ಕೊರ್ತೆರ್ ಪಂದ್ ಜಿಲ್ಲಾಧಿಕಾರಿ ಪಂಡೆರ್.

ಅಫ್ಘಾನಿಸ್ತಾನ : ಭಾರತದೋಟ್ಟುಗು ಆಮದು, ರಫ್ತ್ತು ಬೇರ ಉಂತಾಯಿನ ತಾಲಿಬಾನ್

ನವದೆಹಲಿ: ಅಫ್ಘಾನಿಸ್ತಾನನ್ ತಾಲಿಬಾನ್ ದಕುಲು ವಶಕ್ ದೆತೊನಿ ಬೊಕ್ಕ ಭಾರತದ ಒಟ್ಟುಗು ಇತ್ತಿನ ಆಮದು ಬೊಕ್ಕ ರಫ್ತು ಬೇರನ್ ಉಂತಾದೆರ್. ಐತಾರ ತಾಲಿಬಾನ್ ಅಫ್ಘಾನಿಸ್ತಾನದ ಆಡಳಿತನ್ ತನ್ನ ವಶಕ್ ಪಡೆದ್ ಇತ್ತುಂಡು ಅಫ್ಘಾನ್ ಗುರ್ಕಾರ್ಲಾಯಿನ ಅಶ್ರಫ್ ಘನಿ ದೇಶ ಬುರ್ದು ಬಲ್ತೆರ್.

ಫೆಡರೇಶನ್ ಆಫ್ ಇಂಡಿಯನ್ ಎಕ್ಸ್ ಪೋರ್ಟ್ ಆರ್ಗನೈಜೆಷನ್ ದ ಡೈರೆಕ್ಟರ್ ಜನರಲ್ (ಎಫ್ ಐಇಒ) ಡಾ. ಅಜಯ್ ಸಹಾಯ್ ಮೆರ್ನ ಮಾಹಿತಿ ಪ್ರಕಾರ, ಪಾಕಿಸ್ತಾನದ ಮುಖೇನ ಪೋಪಿನ ಸರಕು ಸಾಗಣೆನ್ ತಾಲಿಬಾನ್ ರದ್ದು ಮಲ್ದುಂಡು .

ವಿಧಾನ ಮಂಡಲ ಅಧಿವೇಶನ ತಾರೀಖ್ ನಿಗದಿ : ಸಂಪುಟ ಸಭೆಟ್ ತೀರ್ಮಾನ

ಬೆಂಗ್ಳೂರು: ಪೊಸ ಸಚಿವೆರೆಗ್ ಖಾತೆ ಪಟ್ಟಿ ಬೊಕ್ಕ ಗುರುವಾರ ಸುರುತ ಸಲ ಸಚಿವ ಸಂಪುಟ ಸಭೆ ನಡತುಂಡು . ಈ ಪೊರ್ತುಡು ವಿಧಾನ ಮಂಡಲ ಅಧಿವೇಶನ ತಾರೀಖ್ ನಿಗದಿ ಮಲ್ದೆರ್ .

ಸೆಪ್ಟೆಂಬರ್ 13 ರ್ದ್ 10 ದಿನತ ಕಾಲ ಬೆಂಗ್ಳೂರುಡು ವಿಧಾನ ಮಂಡಲ ಅಧಿವೇಶನ ನಡಪಾಯೆರೆ ಸಂಪುಟ ಸಭೆಟ್ ತೀರ್ಮಾನ ಮಲ್ದೆರ್ .ಆಯಿನಾತ್ ಬೆಗೋಡೆ ವಿಧಾನಮಂಡಲ ಅಧಿವೇಶನ ಲಿಪ್ಪರೆ ವಿಪಕ್ಷಲು ಒತ್ತಡ ಪಾರ್ದ್ ಇತ್ತುಂಡು . ಬೆಳಗಾವಿದ ಸುವರ್ಣಸೌಧಡ್ ಅಧಿವೇಶನ ನಡಪಾವೊಡು ಪಂದ್ ಸೊರ ಲಕ್ಕಿನ ಕೇಂದ್ ಬತ್ತುಂಡು.

ತುಲು ಭಾಷೆಗ್ ರಾಜ್ಯಡ್ ಅಧಿಕೃತ ಮಾನದಿಗೆ ಕೊರೊಡು ಪಂದ್ ಶೋಭಾ ಕರಂದ್ಲಾಜೆಗ್ ಬಿನ್ನಾಪು ಮಲ್ತಿನ ಜೈ ತುಲುನಾಡ್ (ರಿ) ಸಂಘಟನೆ ಒಡಿಪು ಎಗ್ಗೆ

ಒಡಿಪು : ಅಂಬಲಪಾಡಿ ಕಾರ್ತಿಕ್ ಹೋಟೆಲ್‌ಡ್ ನಡತಿನ ಪತ್ರಿಕಾಗೋಷ್ಠಿಡ್ ಜೈ ತುಲುನಾಡ್ (ರಿ) ಸಂಘಟನೆದ ಪರವಾದ್ ಸದಸ್ಯೆರಾಯಿನ ಅಕ್ಷತಾ ಕುಲಾಲ್ ಮೆರೆರ್ದ್ ಕೇಂದ್ರ ಕೃಷಿ ಸಚಿವೆಯಾಯಿನ ಶೋಭಾ ಕರಂದ್ಲಾಜೆ ಮೆರೆಗ್ ತುಲು ಭಾಷೆಗೆ ಕರ್ನಾಟಕ ರಾಜ್ಯಡ್ ಅಧಿಕೃತ ಮಾನದಿಗೆ ಕೊರೊಡು ಅಂಚನೇ ಈ ವಿಷಯನ್ ಆರ್ಟಿಕಲ್ 347 ಪ್ರಕಾರ ಸನ್ಮಾನ್ಯ ರಾಷ್ಟ್ರಪತಿಲೆನ ಗಮನಗ್ ಕನವೊಡು ಪಂದ್ ಬಿನ್ನಾಪು ಮಲ್ತೆರ್ .

ಈ ಪೊರ್ತುಡು ಸಂಘಟನೆದಕ್ಲೆಗ್ ಶೋಭಾ ಕರಂದ್ಲಾಜೆ ಸಕಾರಾತ್ಮಕ ಪ್ರತಿಕ್ರಿಯೆ ಕೊರಿಯೆರ್ .ಅಂಚನೇ ರಘುಪತಿ ಭಟ್ ತುಲು ಭಾಷೆ ರಾಜ್ಯದ ಅಧಿಕೃತ ಭಾಷೆಯಾವೊಡು ಪಂದ್ ಪಂಡೆರ್. ಈ ಪೊರ್ತುಡು ಬಿಜೆಪಿ ಹಿಂದುಳಿದ ವರ್ಗದ ಮೋರ್ಚಾದ ರಾಷ್ಟ್ರೀಯ ಪ್ರಧಾನ ಕಾರ್ಯಂತೆರ್ ಆಯಿನ ಶ್ರೀ ಯಶ್‌ಪಾಲ್ ಎ ಸುವರ್ಣ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಸದಸ್ಯೆರಾಯಿನ ತಾರಾ ಉಮೇಶ್ ಆಚಾರ್ಯ, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರ ಕುಡ್ಲ ನೆತ್ತ ಸದಸ್ಯೆರಾಯಿನ ಕೇಸರಿ ಯುವರಾಜ್, ಜೈ ತುಲುನಾಡ್ (ರಿ) ಸಂಘಟನೆದ ತುಲು ಲಿಪಿ ಮೇಲ್ವಿಚಾರಕೆರಾಯಿನ ಶರತ್ ಕೊಡವೂರು ಬೊಕ್ಕ ನಗರ ಬಿ.ಜೆ.ಪಿ ಉಪಾಧ್ಯಕ್ಷೆ ಸರೋಜ ಶೆಣೈ, ಜಿಲ್ಲಾ ಬಿ.ಜೆ.ಪಿ. ಮಹಿಳಾ ಮೋರ್ಚಾ ಗುರ್ಕಾರ್ಲಾಯಿನ ವೀಣಿ ಎಸ್ ಶೆಟ್ಟಿ, ಜೈ ತುಲುನಾಡ್ (ರಿ) ಸಂಘಟನೆದ ಸದಸ್ಯೆರಾಯಿನ ಸಂತೋಷ್ ಎಸ್ ಎನ್ , ತುಲು ಲಿಪಿ ಶಿಕ್ಷಕಿಯೆರಾಯಿನ ಸ್ವಾತಿ ಸುವರ್ಣ, ಶಿಲ್ಪಾ ಕೇಶವ್, ಸುಶೀಲಾ ಜಯಕರ್‌ರವರು ಪಾಲ್ ಪಡೆದಿತ್ತೆರ್.