Tulunaad

ಕಲ್ಯಾಣ್ ಸಿಂಗ್ ನಿಧನಗ್ ಕಣ್ಣ ನೀರ ಪನಿತರ್ಪಣ ಮಲ್ತಿನ ಪೇಜಾವರ ಶ್ರೀ

ಒಡಿಪು : ಅಯೋಧ್ಯೆ ಶ್ರೀರಾಮ ಜನ್ಮಭೂಮಿ ಆಂದೋಲನಡ್ ಸದಾ ಸ್ಮರಣೀಯ ಪಾತ್ರ ವಹಿಸೊಂದಿನ ಪೆರಿಯ ಮುತ್ಸದ್ದಿ ಕಲ್ಯಾಣ್ ಸಿಂಗ್ ಜೀ ಮೆರ್ನ ಮರಣ ಬಾರಿ ವಿಷಾದವಾದುಂಡು . ಹಿಂದೂ ಸಿದ್ಧಾಂತಗ್ ಬದ್ಧರಾಯಿನ ಮೇರ್ ನಮ್ಮ ಗುರುಕುಲಾಯಿನ ಶ್ರೀ ವಿಶ್ವೇಶತೀರ್ಥಶ್ರೀಪಾದೆರ್ನ ಒಟ್ಟುಗು ಎಡ್ಡೆ ಬಾಂಧವ್ಯ ಪಡೆದಿತ್ತೆರ್ . ಮೆರ್ನ ಆತ್ಮಗ್ ನಮ್ಮ ಆರಾಧ್ಯಮೂರ್ತಿಯಾಯಿನ ಅಯೋಧ್ಯಾಪತಿ ಶ್ರೀ ರಾಮಚಂದ್ರ ದೇವೆರ್ ಸದ್ಗತಿನ್ ಕರುಣಿಸಾವೊಡು ಪಂದ್ ಅಯೋಧ್ಯಾ ಶ್ರೀ ರಾಮಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್ ( ರಿ ) ದ ಶ್ರೀ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರ್ ಪ್ರಾರ್ಥನೆ ಮಲ್ತೆರ್.

ಹುಷಾರ್ದಾಂತೆ ತೀರ್ ಪೋಯಿನ ಉತ್ತರ ಪ್ರದೇಶದ ಮಾಜಿ ಮುಖ್ಯಮಂತ್ರಿ ಕಲ್ಯಾಣ್ ಸಿಂಗ್

ಉತ್ತರ ಪ್ರದೇಶ : ಬಹು ಅಂಗಾಂಗ ವೈಫಲ್ಯರ್ದ್ ಇತ್ತಿನ ಕಲ್ಯಾಣ್ ಸಿಂಗ್ ಮೆರೆನ್ ಲಕ್ನೋ ದ ಸಂಜಯ್ ಗಾಂಧಿ ಪೋಸ್ಟ್ ಗ್ರಾಜುವೇಟ್ ಇನ್‌ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸಸ್(ಎಸ್‌ಜಿಪಿಜಿಐ) ಆಸ್ಪತ್ರೆಗ್ ದಾಖಲ್ ಮಲ್ತಿತ್ತೆರ್ . ಆಂಡ , ಮರ್ದ್ ಫಲಕಾರಿಯಾವಂದೆ ಕೋಡೆ (ಆ.21) ಕಡೆತ ಉಸುರು ದೆತ್ತೆರ್ .

ಎಸ್‌ಜಿಪಿಜಿಐ ಆಸ್ಪತ್ರೆದ ತೀವ್ರ ನಿಗಾ ಘಟಕಡ್ ಮರ್ದ್ ಪಡೆಯೊಂದು ಇತ್ತುಂಡಲ ಆರ್ನ ಆರೋಗ್ಯ ಪರಿಸ್ಥಿತಿ ನಿಯಂತ್ರಣಗ್ ಬತ್ದ್ ಇತ್ತುಜಿ . ಏತ್ ಮರ್ದ್ ಮಲ್ತುಂಡಲ ಸಮ ಮಲ್ಪರೆ ಆವೊಂದು ಇತ್ತುಜಿ . ಕಲ್ಯಾಣ್ ಸಿಂಗ್ ನಿಧನಗ್ ಪಿಎಂ ನರೇಂದ್ರ ಮೋದಿ, ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಸೇರಿನಂಚ ಅವ್ವೆತೋ ನಾಯಕೆರ್ ಪಾಲ್ ಪಡೆದಿತ್ತೆರ್.

ಒಲಂಪಿಕ್ಸ್ ಡ್ ಪಾಲ್ ಪಡೆಯಿನ ರಾಜ್ಯೋದ ಮೂಜಿ ಕ್ರೀಡಾಪಟುಲೆಗ್ ಮಾನದಿಗೆ

ಬೆಂಗ್ಳೂರು: `ಟೋಕಿಯೋ ಒಲಿಂಪಿಕ್ಸ್-2021ನೇ ಕ್ರೀಡಾಕೂಟಡ್ ಕರ್ನಾಟಕ ರಾಜ್ಯದ ಕ್ರೀಡಾಪಟುಲು ಬೊಕ್ಕ ಕ್ರೀಡಾ ತರಬೇತುದಾರೆರ್ ಭಾರತ ದೇಶನ್ ಪ್ರತಿನಿಧಿಸಾಯಿನವು ಕರ್ನಾಟಕದ ಜನತೆಗ್ ಪೆರ್ಮೆದ ವಿಚಾರ ಪಂದ್’ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್, ರಾಜ್ಯದ ಮೂಜಿ ಕ್ರೀಡಾಪಟು ಬೊಕ್ಕ ಒರಿ ಕ್ರೀಡಾ ತರಬೇತುದಾರಗ್ ತಲಾ 1 ಲಕ್ಷ ರೂಪಾಯಿದ ಮಾನದಿಗೆ ಮಲ್ಪರೆ ಉಲ್ಲೆರ್.

ಹುಬ್ಬಳ್ಳಿ ವಿಮಾನ ನಿಲ್ದಾಣಡ್ ಉಪರಾಷ್ಟ್ರಪತಿನ್ ಎದುಕೊಂಡಿನ ಜಗದೀಶ ಶೆಟ್ಟರ್

ಹುಬ್ಬಳ್ಳಿ: ವಿಜಯನಗರ ಬೊಕ್ಕ ಐತಿಹಾಸಿಕ ಹಂಪಿ ಪ್ರವಾಸ ಪಾರ್ದಿನ ಉಪರಾಷ್ಟ್ರಪತಿ ಎಂ.ವೆಂಕಯ್ಯನಾಯ್ಡು ಮೆರ್ನ ಬೊಡೆದಿ ಎಂ.ಉಷಾ ಮೆರೆನೊಟ್ಟುಗು ಶುಕ್ರವಾರ ಹುಬ್ಬಳ್ಳಿ ವಿಮಾನ ನಿಲ್ದಾಣಗ್ ಭಾರತೀಯ ವಾಯುಸೇನೆದ ವಿಶೇಷ ವಿಮಾನದ ಮುಖೇನ ಬತ್ತೆರ್ .

ಕೇಂದ್ರ ಸಂಸದೀಯ ವ್ಯವಹಾರ, ಗಣಿ ಬೊಕ್ಕ ಕಲ್ಲಿದ್ದಲು ಸಚಿವೆರಾಯಿನ ಪ್ರಲ್ಹಾದ ಜೋಶಿ ಬೊಕ್ಕ ಶಾಸಕ ಜಗದೀಶ ಶೆಟ್ಟರ್ ಮೇರ್ ಶಾಲ್ ಪಾರ್ದ್ ಎದುಕೊಂದೆರ್.

ಆಫ್ಘಾನಿಸ್ತಾನ ಬಿಕ್ಕಟ್ಟು; ಗೃಹ, ರಕ್ಷಣಾ ಸಚಿವ, ಎನ್ಎಸ್ ಎ ಒಟ್ಟುಗು ಪ್ರಧಾನಿ ಮೋದಿ ಮಲ್ಲ ಮಟ್ಟದ ಸಭೆ

ಆಫ್ಘಾನಿಸ್ತಾನಡ್ ತಾಲಿಬಾನ್ ನೆತ್ತೆರ್ದ ಬರ್ಸ ನೇ ಪಸರಾದುಂಡು. ಸರ್ಕಾರನೇ ಶರಣಾಪಿಲಕ ಮಲ್ತ್ ಮಾತಾ ಆಡಳಿತನ್ ತನ್ನ ಸುಪರ್ದಿಗ್ ಕನಯ್ದುಂಡು. ತಾಲಿಬಾನ್ ಉಗ್ರೆರ್ನ ಈ ತಾದಿಡ್ ಅವ್ವೆತೋ ಜನ ಬಲಿ ಆತೆರ್ ಈ ನೆಲೆಟ್ಟ್ ಪ್ರಧಾನಿ ನರೇಂದ್ರ ಮೋದಿ ಉಂದುವೇ ಸುರುತ ಸಲ ಆಫ್ಘಾನ್ ಬಿಕ್ಕಟ್ಟು ಚರ್ಚಿಸಾವುನ ಮಲ್ಲ ಮಟ್ಟದ ಸಭೆ ನಡಪಾದೆರ್ .

ಗೃಹ ಸಚಿವ ಅಮಿತ್ ಶಾ, ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ರಾಷ್ಟ್ರೀಯ ಭದ್ರತಾ ಸಲಹಗಾರೇರಾಯಿನ ಅಜಿತ್ ದೋವಲ್, ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಸೇರಿನಂಚ ಉನ್ನತ ಅಧಿಕಾರಿಲೆನ ಒಟ್ಟುಗು ಮೋದಿ ಮಹತ್ವದ ಸಭೆ ನಡಪಾದೆರ್ .

ಜಿಲ್ಲೆಗೊಂಜಿ ತಾಂತ್ರಿಕ ಶಿಕ್ಷಣ ಶಾಲೆ: ಸಿಎಂ

ಬೆಂಗ್ಳೂರು: ರಾಜ್ಯದ ಶಿಕ್ಷಣ ಸಂಸ್ಥೆನ್ ವಿಶ್ವಾಸಗ್ ಪಡೆದ್ ರಾಷ್ಟ್ರೀಯ ಶಿಕ್ಷಣ ನೀತಿ (ಎನ್‌ಇಪಿ) ಅನುಷ್ಠಾನ ಮಲ್ಪುನೆತ್ತ ಒಟ್ಟುಗು ಯುವ ಜನತೆಗ್ ಬೇಲೆ ಪಡೆಯೆರೆ ಅನುಕೂಲವಾಗು ಆಪಿಲಕ ಜಿಲ್ಲೆಗೊಂಜಿ ತಾಂತ್ರಿಕ ಶಿಕ್ಷಣ ಶಾಲೆನ್ ಸುರು ಮಲ್ಪೊಡು ಪಂದ್ ಸಿಎಂ ಬಸವರಾಜ ಬೊಮ್ಮಾಯಿ ಪಂಡೆರ್ .

ಶುಕ್ರವಾರ ಉನ್ನತ ಶಿಕ್ಷಣ ಇಲಾಖೆದ ಪ್ರಗತಿ ಪರಿಶೀಲನೆ ನಡಪಾಯಿನ ಆರ್ ಈ ಕ್ಷೇತ್ರಡ್ ರಾಷ್ಟ್ರೀಯ ಶಿಕ್ಷಣ ನೀತಿ ಅನುಷ್ಠಾನದ ಬಗ್ಗೆ ಪಾತೆರಿಯೆರ್.

ಕಾಬೂಲ್ ಡ್ ಬಾಕಿ ಆಯಿನ ಕರ್ನಾಟಕದ ದಕ್ಷ ಅಧಿಕಾರಿ

ಬೆಂಗ್ಳೂರು: ವೀರಪ್ಪನ್ ಕಾರ್ಯಾಚರಣೆಡ್ ಪಾಲ್ ಪಡೆದಿತ್ತಿನ ಕರ್ನಾಟಕಡ್ ಸೇವೆ ಮಲ್ದಿನ ಐಪಿಎಸ್ ಅಧಿಕಾರಿ ಸವಿತಾ ಹಂಡೆ ಕಾಬೂಲ್​ಡ್ ಉಲ್ಲೆರ್ , ಮೇರ್ ಸುರಕ್ಷಿತವಾದ್ ಭಾರತಗ್ ಪಿರ ಬರಡ್ ಪಂದ್ ಪೆರಿಯಾ ಪೊಲೀಸ್​ ಅಧಿಕಾರಿಲು ಎಡ್ಡೆಪ್ಪುದ ಪಾತೆರ ಪಂಡೆರ್.

ಐಪಿಎಸ್ ಅಧಿಕಾರಿ ಸವಿತಾ ಹಂಡೆ ಹೊಳೆನರಸೀಪುರ, ಬೀದರ್​​ಡ್ ಎಎಸ್​ಪಿ ಆದ್ , ಒಡಿಪು ಬೊಕ್ಕ ಹಾಸನ ಜಿಲ್ಲೆಡ್ ಎಸ್.ಪಿ ಆದ್ , ಐರ್ದ್ ಬೊಕ್ಕ ಬೆಂಗ್ಳೂರುಡು ಅಡ್ಮಿನ್ ವಿಭಾಗದ ಡಿಸಿಪಿಯಾದ್ ಬೇಲೆ ಮಲ್ದೆರ್ .