Tulunaad

ಅಬ್ದುಲ್ ಅಝೀಝ್ ಗ್ ಐಕಾನಿಕ್ ಇಂಡಿಯನ್ ಅವಾರ್ಡ್

ಕುಡ್ಲ : ಕೋವಿಡ್ ಪೊರ್ತುಡು ಮಲ್ತಿನ ಮಾನವೀಯ ಸೇವೆನ್ ಗುರ್ತಿಸಾದ್ ಇಂಟರ್ ನ್ಯಾಷನಲ್ ಕಲ್ಚರಲ್ ಫೆಸ್ಟ್ ಅಫ್ ಇಂಡಿಯಾದ 2021ನೇ ಸಾಲ್ದ ಪ್ರತಿಷ್ಠಿತ ಐಕಾನಿಕ್ ಇಂಡಿಯನ್ ಅವಾರ್ಡ್ ಪುರಸ್ಕೃತ ಅಬ್ದುಲ್ ಅಝೀಝ್ ಆರ್‌ಕೆಸಿ ಮೆರೆಗ್ ಪೇಂಟೆದ ಬೊಕ್ಕಪಟ್ಣದ ಹಿನ್ನೀರ್ ದ ರಾಣಿ ಅಬ್ಬಕ್ಕ ಕ್ವೀನ್ ಕ್ರೂಝ್ನಡ್ ನಡತಿನ ಲೇಸ್ ಡ್ ಪ್ರಶಸ್ತಿ ಪ್ರದಾನ ಮಲ್ತೆರ್ .

ಆಗಸ್ಟ್ 30 ತಾರೀಖ್ ಗ್ ಶ್ರೀ ಕೃಷ್ಣ ವೇಷ ಪಂಥ

ಕುಡ್ಲ : ಕಲ್ಕೂರ ಪ್ರತಿಷ್ಠಾನ ಕರಿನ 36 ವರ್ಷರ್ದ್ ಅಟ್ಟನೆ ಮಲ್ತೊಂದು ಬತ್ತಿನ ರಾಷ್ಟ್ರೀಯ ಜೋಕ್ಲೆಗ್ ಶ್ರೀ ಕೃಷ್ಣ ವೇಷ ಪಂಥ ಆ.30 ತಾರೀಖ್ ಗ್ ನಡಪರೆ ಉಂಡು.ಕೊರೋನ ನಿಮಿತ್ತ ಈ ವರ್ಷಲಾ ಪಂಥನ್ ಆನ್‌ಲೈನ್ ಮುಖೇನ ನಡಪಾಯರೇ ಉಂಡು ಪಂದ್ ಪಂಡೆರ್.

ಫೋರ್ಬ್ಸ್ 2021ನೇ ಅಮೇರಿಕಾದ ಶ್ರೀಮಂತ ಪೊಂಜೊವ್ಲೆನ ಪಟ್ಟಿಡ್ ಭಾರತೀಯ ಮೂಲದ ರೇಷ್ಮಾ ಶೆಟ್ಟಿ

ಬೆಂಗ್ಳೂರು: ಫೋರ್ಬ್ 2021ನೇ ಅಮೇರಿಕಾದ ಶ್ರೀಮಂತ ಪೊಂಜೊವ್ಲೆನ ಪಟ್ಟಿಡ್ ಭಾರತೀಯ ಮೂಲದ ಉದ್ಯಮಿ ರೇಷ್ಮಾ ಶೆಟ್ಟಿ ಸ್ಥಾನ ಪಡೆತೆರ್ .ರೇಷ್ಮಾ ಶೆಟ್ಟಿ ಮೇರ್ 2009ಡ್ ಗಿಂಕೊ ಬಯೋವರ್ಕ್ ಬೇರನ್ ನಾಲ್ ಜನತ ಕೂಟದೊಟ್ಟುಗು ಸ್ಥಾಪನೆ ಮಲ್ತಿತ್ತೆರ್. 41 ವರ್ಷ ಪ್ರಾಯದ ರೇಷ್ಮಾ ಶೆಟ್ಟಿ ಮೇರ್ 750 ಮೀಲಿಯನ್ ಡಾಲರ್ ಮೌಲ್ಯದ ಸಂಪತ್ತ್ ಪಡೆತೆರ್ ಅಮೇರಿಕಾದ ಸ್ವ ಪರಿಶ್ರಮದಿಂದ ಶ್ರೀಮಂತೆರಾಯಿನ ಪೊಂಜೊವ್ಲೆನ ಪ್ರೋರ್ಬ್ ಪಟ್ಟಿಡ್ 39ನೇ ಸ್ಥಾನ ಪಡೆತೆರ್ .

ಅಫ್ಘಾನಿಸ್ತಾನರ್ದ್ ಸುರಕ್ಷಿತವಾದ್ ಊರುಗು ಮುಟ್ಟಿನ ಮಲ್ಪೆದ ಜಾನ್ ಜತ್ತನ್ನ

ಒಡಿಪು : ಅಫ್ಘಾನಿಸ್ತಾನದ ಕಾಬೂಲ್‌ದ ವಿಮಾನ ನಿಲ್ದಾಣಡ್ ಉಪ್ಪುನ ಪೆಟ್ರೋಲಿಯಂ ಕಂಪೆನಿಡ್ ಸುಪರ್‌ ವೈಸರ್ ಆದ್ ಬೇಲೆ ಮಲ್ತೊಂದು ಇತ್ತಿನ ಮಲ್ಪೆ ವಡಬಾಂಡೇಶ್ವರದ ನಿವಾಸಿ ಜಾನ್ ಜತ್ತನ್ ಭಾರತೀಯ ವಾಯುಸೇನೆ ಮಲ್ದಿನಏರ್‌ಲಿಫ್ಟ್‌ರ್ದ್ ಸುರಕ್ಷಿತವಾದ್ ಇಲ್ಲಗ್ ಬೈದೆರ್ .

ಎನ್ಎಸ್ ಯುಐರ್ದ್ ನೆತ್ತೆರ್ ದಾನ ಶಿಬಿರ

ಕುಡ್ಲ : ಎನ್‌ಎಸ್‌ಯುಐ ರಾಷ್ಟ್ರೀಯ ಕಾರ್ಯದರ್ಶಿ ಎರಿಕ್ ಸ್ಠೀಫನ್, ರಾಜ್ಯಾಧ್ಯಕ್ಷ ಕೀರ್ತಿ ಗಣೇಶ್, ರಾಜ್ಯ ಕಾರ್ಯದರ್ಶಿ ಫಾರೂಕ್ ಬಯಾಬೆ ಮೆರೆನ ನಿರ್ದೇಶನದ ಪ್ರಕಾರ ಎನ್ ಎಸ್‌ಯುಐ ದ.ಕ.ಜಿಲ್ಲಾ ಸಮಿತಿದ ವತಿರ್ದ್ ಮಾಜಿ ಪ್ರಧಾನಿ ರಾಜೀವ್ ಗಾಂಧಿನ ಪುಟ್ಟು ಪರ್ಬದ ಪರವಾದ್ನೆತ್ತೆರ್ ದಾನ ಶಿಬಿರ ಪೇಂಟೆದ ಲೇಡಿಗೋಶನ್ ಆಸ್ಪತ್ರೆಡ್ ಶುಕ್ರವಾರ ನಡತುಂಡು

.

ಸಮಾಜ ಸೇವಕ ವಕೀಲ ಶ್ರೀ ರಾಘವೇಂದ್ರ ರಾವ್‌ಗ್ “ಸೇವಾರತ್ನ” ಮಾನದಿಗೆ

ಕುಡ್ಲ : 75ನೇ ಸ್ವಾತಂತ್ರ ಅಮೃತ ಮಹೋತ್ಸವದ ಪರವಾದ್ ಸಮಾಜಡ್ ಎಡ್ಡೆ ಸೇವೆ ಮಲ್ತಿನ ಗಣ್ಯ ವ್ಯಕ್ತಿಲೆನ್ ಗುರ್ತಿಸಾದ್ “ಸೇವಾರತ್ನ” ಬಿರುದು ಮಾನದಿಗೆ ಮಲ್ತೆರ್.

ವಕೀಲ ವೃತ್ತಿದೊಟ್ಟುಗು ಸಾಮಾಜಿಕ ಸೇವಾಕಾರ್ಯಡ್ ಉಪ್ಪುನ ಕುಡ್ಲದ ಖ್ಯಾತ ನ್ಯಾಯವಾದಿ ಬೊಕ್ಕ ನೋಟರಿ ಶ್ರೀ ರಾಘವೇಂದ್ರ ರಾವ್‌ರೆಗ್ ಮ್ಯಾಕ್ಸ್ ಲೈಫ್ ಸಂಸ್ಥೆ”ಸೇವಾ ರತ್ನ ಪ್ರಶಸ್ತಿ” ಕೊರ್ದು ಮಾನದಿಗೆ ಮಲ್ತುಂಡು . ಈ ಪೊರ್ತುಡು ಮೆರೆನ ಉತ್ತಮ ಸೇವೆಲೆನ್ ನೆಂಪು ಮಲ್ತೆರ್.

ರಾಘವೆಂದ್ರ ರಾವ್ ಮೇರ್ ಲಾಕ್ಡೌನ್ ಪೊರ್ತುಡು ಆರಾಮ ಮಲ್ಪಂದೆ ಅವ್ವೆತೋ ಜನಕ್ ಆಹಾರ, ಅತ್ಯಾಗತ್ಯ ವಸ್ತುದ ಪೂರೈಕೆ, ಪಾಪದ ಜೋಕ್ಲೆಗ್ ಬೂಕು ಬೊಕ್ಕ ಲೇಖನಿ ಸಾಮಗ್ರಿ ಅಂಚನೇ ಸಮವಸ್ತ್ರ ಪಟ್ಟುನ ಲೇಸ್ , ನೆತ್ತೆರ್ ದಾನ ಶಿಬಿರ ಲೇಸ್ ನ್ ಅಟ್ಟನೆ ಮಲ್ಪುನು ಅಂಚನೇ ಅವ್ವೆತೋ ಸಮಾಜಮುಖಿ ಬೇಲೆ ಮಲ್ತೊಂದು ಇತ್ತೆರ್.
ಆತೆ ಅತ್ತoದೆ ಸಮಾಜದ ಪಾಪದ ಜನಕ್ಲೆಗ್ ಉಪಯೋಗ ಆವೊಡು ಪಂದ್ ತನ್ನ ಅಂಗಾಗ ನ್ ದಾನ ಮಲ್ಪುನ ಬಗ್ಗೆ ಬರೆದ್ ಕೊರ್ದು ಇತ್ತೆದ ಯುವಪೀಳಿಗೆಗ್ ಮಾದರಿ ಆಯೆರ್ .ಇಂಚ ಇವರ ಮೆರೆನ ಎಡ್ಡೆ ಬೇಲೆನ್ ಗುರ್ತಿಸಾದ್ ಮೆರೆಗ್ “ಸೇವಾರತ್ನ” ಮಾನದಿಗೆ ಮಲ್ತೆರ್ ಪಂದ್ ಕುಡ್ಲ ಮ್ಯಾಕ್ಸ್ ಲೈಫ್‌ದ ಕಛೇರಿ ಗುರ್ಕಾರ್ಲಾಯಿನ ಶ್ರೀ ಸತೀಶ್ ಮೆನನ್ ಪಂಡೆರ್ .

ಲಯನ್ ಪ್ರದೀಪ್ ಕುಮಾರ್ ಬಿನ್ನೆರ್ ಆದ್ ಪಾಲ್ ಪಡೆದಿತ್ತೆರ್ . ಕುಡ್ಲ ಮ್ಯಾಕ್ಸ್ ಲೈಫ್‌ದ ಕಛೇರಿ ಮ್ಯಾನೇಜರ್ ಶ್ರೀ ಆನಂದನ್, ಸಲಹೆಗಾರೆರಾಯಿನ ಶ್ರೀಮತಿ ಗೀತಾ ಬೊಕ್ಕ ಸಂಸ್ಥೆದ ಬೇತೆ ಸಿಬ್ಬಂದಿಲು ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಕುದ್ರೋಳಿ ಕ್ಷೇತ್ರದ ಒತ್ತು ಗುರ್ಕಾರ್ಲಾದ್ ಊರ್ಮಿಳಾ ರಮೇಶ್

ಕುಡ್ಲ : ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಒತ್ತು ಗುರ್ಕಾರ್ಲಾದ್ ಊರ್ಮಿಳಾ ರಮೇಶ್ ಮೆರೆನ್ ಸರ್ವಾನುಮತರ್ದ್ ಆಯ್ಕೆ ಮಲ್ದೆರ್ .

ಮಾಹೆ ” ಜಿಲ್ಲೆದ ಗ್ರೀನ್ ಚಾಂಪಿಯನ್ ಮಾನದಿಗೆ

ಮಣಿಪಾಲ : ಕೇಂದ್ರ ಸರಕಾರದ ಉನ್ನತ ಶಿಕ್ಷಣ ಇಲಾಖೆದ ಮಹಾತ್ಮ ಗಾಂಧಿ ನೇಶನಲ್ ಕೌನ್ಸಿಲ್ ಫಾರ್ ರೂರಲ್ ಎಜ್ಯುಕೇಷನ್ (ಎಂಜಿಎನ್‌ಸಿಆಪ್‌ಇ), ಮಣಿಪಾಲ ಮಾಹೆದ ಪಚ್ಚೆ ಕ್ಯಾಂಪಸ್ ಉಪಕ್ರಮದ ಸ್ವಚ್ಛ ಕ್ರಿಯಾ ಯೋಜನೆನ್ ಅತ್ಯುತ್ತಮ ಪಂದ್ ಆಯ್ಕೆ ಮಲ್ತ್ ಮಾಹೆನ್ ಜಿಲ್ಲಾ ಗ್ರೀನ್ ಚಾಂಪಿಯನ್ ಪಂದ್ ಮಾನದಿಗೆ ಮಲ್ದೆರ್ .

ನಂದಿನಿ ಸಿಹಿ ಉಚ್ಚಯ ಉದಿಪನ

ಕುಡ್ಲ : ದ.ಕ. ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ಆ.19ರ್ದ್ 15 ದಿನತ ಕರ್ನಾಟಕ ರಾಜ್ಯಾದ್ಯಂತ ನಂದಿನಿ ಸಿಹಿ ಉಚ್ಚಯ ಆಚರಣೆ ಮಲ್ತ್ ಶೇ.10ರ ರಿಯಾಯತಿಡ್ ನಂದಿನಿ ಶ್ರೇಣಿದ ಚೀಪೆ ತೆನಸ್ ದ ವಸ್ತುಲೆನ್ ಗ್ರಾಹಕೆರೆಗ್ ಕೊರ್ರೆ ದುಂಬು ಬೈದೆರ್ . ಅಂಚಾದ್ ಗುರುವಾರ ದ.ಕ.ಜಿಲ್ಲೆದ ಬೇತೆ ಬೇತೆ ಜಾಗೆಡ್ ಈ ಲೇಸ್ ಗ್ ಚಾಲನೆ ಕೊರಿಯೆರ್.

ಮೂಡುಬಿದಿರೆಡ್ ನಡತಿನ ಲೇಸ್ ನ್ ಪುರಸಭೆತ ಗುರ್ಕಾರ್ಲಾಯಿನ ಪ್ರಸಾದ್ ಕುಮಾರ್ ಉದಿಪನ ಮಲ್ತೆರ್. ಪುರಸಭೆತ ಸ್ಥಾಯಿ ಸಮಿತಿದ ಗುರ್ಕಾರ್ಲಾಯಿನ ನಾಗರಾಜ ಪೂಜಾರಿ, ಸದಸ್ಯೆರಾಯಿನ ರಾಜೇಶ್ ನಾಯ್ಕ, ದಿನೇಶ್, ಬಿಜೆಪಿ ಮಂಡಲ ಪ್ರಧಾನ ಕಾರ್ಯoತೆರಾಯಿನ ಗೋಪಾಲ್ ಶೆಟ್ಟಿಗಾರ್, ಒಕ್ಕೂಟದ ನಿರ್ದೇಶಕ ಸುಚರಿತ ಶೆಟ್ಟಿ ಪಾಲ್ ಪಡೆದಿತ್ತೆರ್ .